Kissaatigineqarput: Biibilimik atuaqqissaaqatigisartakkat amerlanerusut
1 Jehovap peqatigiissortani nunamiittut amerliartortillugit pilluaqquai. Ukiumi kiffartuussiffiusumi kingullermi silarsuarmi tamarmi 375.923-t kuisipput — ullormut agguaqatigiissillugit ajoqersukkat nutaat 1000-init amerlanerusut, nalunaaquttalluunniit akunneranut 43-t missaat! Guutip naalagaaffiata suliaa nunani amerlasuuni qatanngutitta ukiorpassuarni annikilliorfigisimasaanni siuariarujussuarsimavoq. Nutaarsiassap nuannersup siaruarternerani siuariarnerit pillugit nalunaarutit atuarlugit pissanganartorujussuuvoq.
2 Siorna Danmarkimi aamma nersornartorujussuarmik suliaqartoqarsimavoq. Oqaluussisartut ikilerialaarsimagaluarput, atuakkanilli, atuagassiaaqqanik atuagassianillu siaruartikkat ukiumut siulianut sanilliullugu amerlanerupput. Ikiorti-pioneerit aamma amerleriarsimapput, ukiumut siulianut sanilliullugit 13 procentingajammik. Pulaaqqiisarnerit Biibilimillu atuaqqissaaqateqartarnerit qanoq ingerlappat? Pulaaqqiisarnerit ikilisimapput Biibilimillu atuaqqissaaqatigisat 15 procentimik ikilisimallutik. Kiffartuusseriaatsit taakkua ajoqersuganngortitsiniarnitsinni tunngaviupput. Ikiliartornerit tamakkua siumut saatsinniarlugit qanoq iliorsinnaavugut?
3 Biibilimik atuaqqissaaqateqarusunnerit sakkortusiuk: Anersaakkut nukittujuarnissatta suliaqartarnissattalu eqqumaffigiuarnissaat pingaartorujussuuvoq. Kristusip ajoqersugai ilumoortut ’ajunngitsuliornermut ilungersortuupput’. (Tít. 2:14) Atuagassianik pisimasut tamaasa pulaaqqinniartarpavut? Soqutiginninnermik ersersitsisut tamaasa Biibilimik atuaqqissaaqatiginiarlugit angorniorluta neqeroorfigisarpavut? (Rûm. 12:11) Pulaaqqiinissamulluunniit Biibilimillu atuaqqissaaqatitaarnissamut kissaateqarnerunissaq ineriartortittariaqarparput?
4 Nammineerluni Biibilimik atuartarnerup, aalajangersimasumillu ataatsimiinnerit najuuffigisarnerisa Peqatigiiffiullu atuagassiaataasa Biibililersaarutit atuaqqissaartarneratigut anersaakkut peqqissuujuassaagut nukittujuarlutalu Guutillu anersaavanik ilangeeqataalluta. (Evf. 3:16-19) Anersaakkut iliuuseqarnerit tamakkua uppernerput nukittuunngortissavaat, Jehovamut tatiginninnerulersilluta tullermullu asanninnerulersilluta. Allanik sallusuissummik ilinniartitsinissatsinnut aamma kajumissisissavaatigut, taamaalilluni oqaluussineq soqutiginarnerulerlunilu pissanganarnerulissaaq. Biibilimik atuaqqissaaqatigisartakkat amerlitinniarnissaat sulissutigisariaqarparput.
5 Ilaqutariittut atuaqqissaartarneq pingaarneruvoq: Angajoqqaat angerlarsimaffimmi najugalinnik meerallit aalajangersimasumik ilaqutariittut Biibilimik atuaqqissaartarnerup pingaaruteqarnera paasisariaqarpaat. (5 Mos. 31:12; Tus. 148:12, 13; Uss. 22:6) Angajoqqaat meeqqatik oqaluussisartutut kuisimanngitsutut tunniulluinnarnissamullu kuisinnissamullu piukkunnarsisinniarlugit ikiorniarlugit atuagassiaaqqamik Guutip sumik piumaffigaatigut?-mik kingornalu atuakkamik ’Ilisarsineq’-mik atuaqqissaaqatigippatigik iluaqutaangaassaaq. Meeqqat ukiui pisariaqartitaallu apeqqutaatillugit atuaqqissaakkat allanik soorunami ilaneqarsinnaapput. Ataataasup anaanaasulluunniit atuaqqissaarnermik aqutsisup atuaqqissaarneq, piffissaq pulaaqqiinerlu nalunaarutigisinnaavai. — Takuuk Rigets Tjeneste-mi apriili 1987-imoortumi Spørgsmålskassen.
6 Nammineq pilersaarusiorneq: Atuagassiat, atuagassiaaqqat atuakkallu taama amerlatigisut agguaanneqarsimanerat eqqarsaatigalugu, naatsiiassat siaruarterneqarsimasut amerlassaqaat. Taamaalilluni sallusuissutip naatsiiassartaanik siaruarterisoqarsimaguni, amerlasuunik nutaanik ajoqersuganngortoqarsinnaavoq. Naasorissaasulli naatsiivilerisulluunniit siaruarterinini naammagissavaa, sulerulooreerlunilu inerititanik katersuinngisaannarluni? Ilaa, naagga. Taamaattumik pulaaqqiisarneq kiffartornitta ilagaa pingaartoq.
7 Akuttoqatigiissumik pulaaqqiisarnissannut piffissalertarpit? Soqutiginninnermik ersersitsisut tamaasa orneqqiaartakkit. Pulaaqqitatit pillugit paasiuminartunik eqqorluartunillu allattuisarpit? Illumiit illumut allattuiffinni paasissutissat pisariaqartut allannissaat eqqaamasakkit, soorlu pulaaqqitap aqqa adressia, pulaarnerup ullua, pulaagaq atuagassianik pisimappat soorliit, suna eqqartorneqarpa tullianillu suna eqqartorsinnaanerlugu. Allattuiffinni pulaakkanut tamanut titarnerit arlallit immikkoortittakkit, ineqartoq kingorna naammattoortarukku paasissutissanik amerlanerusunik allataqarsinnaaqqullutit.
8 Qanoq pulaaqqiisoqartartoq: Pulaaqqiigaanni suna eqqarsaatigisariaqarpa? (1) Asannittuugit, inussiarnersuugit, angorniortuugit eqqissisimagillu. (2) Pulaakkap soqutigisaanik eqqartuigit. (3) Oqaloqatigiinneq Biibilimut tunngasuutiguk paasiuminartuutillugulu. (4) Pulaakkamut pingaaruteqarsinnaasumik pulaarnerit tamaasa ilinniartinniartaruk. (5) Tullianik oqaloqatigiissutigisinnaasassinnik soqutiginnilersinniaruk. (6) Pulaarneq sivisuallaarteqinagu. (7) Peqqusiileqititsisinnaasunik apeqquteqaqinak. (8) Pulaagaq suli anersaakkut nakuussuteqalinngitsoq isumai kukkusut ileqqorlunneriluunniit avoqqaareqinagit. — Qanoq pulaaqqiisoqarsinnaasoq Biibilimillu atuaqqissaaqatitaartoqarsinnaasoq pillugu paasissutissat amerlanerusut Naalagaaffimmut Kiffartorneq-mi marsi 1997-imoortumi nassaarineqarsinnaapput.
9 Periarfissat tamaasa atukkit: Inissiarsuarni isumannaallisagaalluartuni ineqartut aqqi inigisaasalu normui tamaasa ilagiit ataatsit pisinnaasimavaat. Ineqartut tamarmik allaffigineqarput naqitaaqqanillu marlunnik nassinneqarlutik. Biibilimik atuaqqissaaqateqarsinnaanermik neqeroorut oqaluussisartullu saaffigineqarsinnaasup aqqa allassimavoq. Ullualuit qaangiuttut angut inuusuttoq sianerpoq Biibilimik atuaqqissaarusunnerarluni. Aqaguani oqaluussisartumit pulaarneqarpoq atuagarlu ’Ilisarsineq’ atorlugu atuaqqissaarneq aallartinneqarpoq. Unnuk tamanna ilagiit atuakkamik atuaqqissaarnerat najuuffigaa, ataatsimiinnernullu aggertalerluni. Ingerlaannangajak ullut tamaasa Biibili atuartalerpaa. Kuisinnissamut siumukarluarpoq.
10 Oqaluussisartut biileqatigiittut pulaaqqeeqatigiinniarlutik isumaqatigiipput. Qatanngut arnaq pulaaqqitassaminut tikiummat pulaaqqinniagaa peqanngilaq, arnalli allap inuusuttup mappiuppai oqarlunilu: „Utaqqivassi.“ Arnap ilisarisimasaminit atuagaq ’Ilisarsineq’ siusinnerusukkut pisimavaa. Qatanngutinit pulaarneqarami atuagaq marloriarlugu atuareersimavaa paasissutissallu nuannarisimallugit. Oqarpoq ulloq tamanna Jehovap nalunaajaasuinik pulaarneqarnini tupaallaatiginagu, aggernissaat Biibilimillu atuaqatigineqarnissani qinnutigisimagamiuk. Biibilimik atuaqqissaarneq aallartinneqarpoq, ataatsimiinnernut najuuttalerpoq siumukapallallunilu.
11 Qatanngutip arnap ukiuni 25-ni kuisimasimasup, qanittukkut arni atuakkamik ’Ilisarsineq’-mik tunisimavaa. Arnaata, naalagiartartup. atuagaq atualerpaa. Kapitalit marluk atuareerlugit panimminut sianerpoq panimmilu tupaallaatigisaanik oqarluni: „Jehovap nalunaajaasoorusuppunga!“ Arnaata Biibili misissulerpaa maannalu kuisimasuuvoq.
12 Siunnersuutit: Toqqaannarmik periaaseqarlutit Biibilimik atuaqqissaaqatitaarneq misilissimaviuk? Ima oqartoqaannarsinnaavoq: „Akeqanngitsumik angerlasimaffimmi Biibilimik atuaqqissaarusukkuit minuttialuit atorlugit qanoq atuaqqissaartoqartarnersoq takutissinnaavara. Soqutigigukku ingerlatiinnarsinnaavarput.“ Neqeroorut taamaattoq inuit akuerigajuppaat.
13 Aallaqqaataaniilli ilinniartoq piareersartarnissaanut ilinniartiguk, allassimaffiit issuarneqanngitsut quppertaqqullugit apeqqutillu naqinneqarsimasup akissutaanut oqaatsit pingaarnerit ataatigut titartarlugit. Pingaarnersiuisuugit. Naak atuaqqissaarnerni siullerni naleqqussaarisariaqaraluarluni, pingaaruteqarpoq atuaqqissaartarnerit aalajaatsuunissaat. Eqqarsaatigiuk qaqugu atuaqqissaarneq qinunermik aallarnissallugu naggasissallugulu naleqqutissanersoq, qanorlu iliorlutit ilinniartoq akerlilersorneqarnissaanut Biibili tunngavigalugu piareersassanerlugu. Atuaqqissaarneq soqutiginartuusariaqarpoq uummaarissuullunilu.
14 Ilinniartut siumukarneri tamarmik sukkaqatigiinngillat. Ilaasa anersaamut tunngasunik sammisaqarneq sungiusimanngilaat, allat ilinniakkaminnik paasinnikkumaataartarput. Allallu ulapittuullutik inuupput sapaatip-akunneri tamaasa kapitali naallugu atuarnissaminnut piffissaqaratik. Taamaattumik kapitali naaniarlugu arlaleriartariaqarpoq atuakkallu naanissaanut sapaatit-akunneri 19-init amerlanerusut atortariaqarlutik. Ilaannikkut atuagassiaaraq Guutip sumik piumaffigaatigut? atuaqqissaaqqaarneqarsinnaavoq kingusinnerusukkullu atuagaq ’Ilisarsineq’ atuarlugu. Tamatuma ataatsimiinnernilu ilinniartitaanerup ilinniartoq sallusuissummi sorlanilluarnissaanut ikiussavaa.
15 Pingaarnerpaamik Biibilimik atuaqqissaaqatigiinnermik aqutsinissarput kissaatigalugu qinunermi ersersittariaqarparput. (1 Juá. 3:22) Kristumiunut nuannernerpaat ilagaat allanik Kristusimut ajoqersuganngortitsinermi Jehovamit atorneqarneq. (ap. sul. 20:35; 1 Kor. 3:6-9; 1 Tás. 2:8) Biibilimik atuaqqissaaqateqartarnermi aallussilluarnissamut maanna piffissaavoq, suliniutigisavut Jehovap pilluaqqujumaarai tatigilluinnarlugu.
[Qupp. 3-mi issuagaq]
Biibilimik atuaqqissaarnermik aqutserusullutit qinusarpit?