Ataatsimiinnerit inuusuttunut iluaqutaapput
1 Niviarsiaraq 15-inik ukiulik oqarsimavoq: „Ilaannikkut isumaqartarpunga inuusuttut inuunermi matumani atugarliornersaasut. Kanngunartuliortunik, ikiaroortunik aalakoortunillu avatangerneqarsimavugut.“ Aamma illit taama misigisarpit? Taamaappat sunnerneqarneq sakkortooq tamanna akiorniarlugu suna iluaqutigisinnaasoraajuk? Upperluassuseqartariaqarpoq Jehovallu aqqutigisaasa ilumoortuunerat qularutiginngilluinnartariaqarlugu, uppersuseqarnanimi ’Guutimut iluaritinneq ajornaqaaq’. (Epr. 11:6) Kristumiutut uppernerit ajortullu ingalassimanissaannut aalajangersimanerit nakussatsinnissannut ataatsimiinnerit iluaqutigissavatit.
2 Ataatsimiinnerni sunik pissarsisarnerit: Sooq ikinngutigilluakkat ilagalugit mamartunik nereqatigiilluni nuannertarpa? Nerisagissaarlunilu iluarusunnartumik qasuersimaarluni ataatsimuualaaqatigiinnerugami. Ataatsimiinnerni anersaakkut ittumik taamatut misigisoqarsinnaavoq.
3 Ataatsimiinnerni eqqartorneqartut ineriartuutaapput tassaasarlutillu ulluinnarni ajornartorsiutiniit Biibilimi siulittuutigineqarsimasut pissanganartut atuaqqissaaqatigiissutigineqarneranut. Inooriaatsimik pitsaanerpaamik ilitsersuutinik atoriaannaasunik inuunermilu unamminiarnartut anigorsinnaajumallugit ikiuutissanik tunineqartarpugut. Ataatsimiinnerit tassaapputtaaq ikinngutinik ilumoortunik nassaarfissatut pitsaanerpaat, pisuunnguallannartumi toqqissisimanartumillu silaannaq anersakkut ittoq najorlugu. (Tus. 133:1) Paasinarpoq inuusuttoq ima oqarsimammat: „Ulloq naallugu atuarfimmiittarpunga, tamannalu nakkarsaatigisarpara. Ataatsimiinnerilli puilasuitsumi imertut ittarput ullormut tullermut nukissaqalersittarlunga iluaqutigisannik.“ Allalu oqarsimavoq: „Jehovamik asannittut allat ilagissallugit pisariaqartippara qanimut attaviginissaanut iluaqutigisarakku.“
4 Teokratimmik atuarfimmut ilanngukkuit Biibilimit paasissutissanik katersinermik ilisimassaatit, oqalugiaatissaliaralugit naalagaaffilersaarfimmilu ataatsimiittunut saqqummiuttarlugit. Eqqarsaatigeriassagit qanoq iluaqutaatigissanersoq sallusuissutsimit inuunermut pingaarutilimmik Guutip oqaasianeersumit ajoqersuisinnaanermik pikkorissinissamut ilinniartinneqarluni. Sumi allami taama naleqartigisumik inuusuttut ilinniartinneqarsinnaappat?
5 Ataatsimiinnerit qanoq pissarsiffigineqarnerusinnaasut: Ataatsimiinerit pitsaanerpaamik iluaqutissarsiffigissagaanni pingasut aalajangiisuupput. Piareersarneq, peqataaneq ilinniakkallu ulluinnarni atornissaat pisariaqarput.
6 Ataatsimiinnissanut piareersartarit: Piffissat pilersaarusioruk ataatsimiinnissanut piareersarsimajuarumallutit. Ataatsimiinnermi pisassanut piareersarnissannut piffissaq ilinniagassanut, suliffimmut sukisaarsaarnissamulluunniit atoqinagu. Aalajangersimasumik malittarisassaqarluni pitsaanerpaavoq. Pingaarnerusumik Teokratiimik Atuarfimmi sapaatip-akunneranut Biibilimi atuagassat malinnaaffigisariaqarpatit. Ullut tamaasa taamaallaat minutsialuinnaat atorlugit kapitalit pineqartut atuarneqarsinnaapput eqqarsaatigalugillu. Atuakkamik atuaqqissaaqatigiinnissamut Napasuliaq Alapernaarsuiffik-milu pisassanut piareersarfissannik immikkoortitsigit. Ilaat ulloq ataaseq marlulluunniit sioqqullugu piareersareertarput. Sapaatip-akunneranut oqaluussinermut tunngasumik ataatsimiinnermi sammisassat aammattaq pineqarput.
7 Ataatsimiinnerni peqataagit: Biibilimi allassimavoq Jesus 12-inik ukioqarluni naalaffimmi nanineqarpoq tusarnaartoq, apersortoq akisarlunilu. (Lúk. 2:46, 47) Allatut oqaatigalugu tamakkiisumik peqataavoq. Ataatsimiinnerit pissarsiffiginerussavatit peqataaniarlutit immikkut iliuuseqaruit. — Uss. 15:23.
8 Ataatsimiinnerni ilinniartitsineq malinnaaffigeqqissaartariaqarpatit. Ilaatigut oqalugiaatinut tusarnaarniarneq nammineq oqalugiarnermit ajornakusoornerusarpoq. Sooq? Allat oqalukkaangata eqqarsaatit allamut sangoqqajaasarmata. Qanoq tamanna qaangerniarsinnaaviuk? Allattuinikkut. Pingaarutilinnik kingusinnerusukkut innersuukkumasannik allattuigit. Allattuilluni eqqartorneqartoq eqqumaffigiuminarnerusarpoq. Allassimaffiit quppertakkit, oqalugiartullu atuaraangagit malinnaaffigalugit.
9 Aammattaaq ataatsimiinnerit tamaasa akissarnissat anguniagariuk. Suli iluaqutigilluarnerussavat oqaasissatit siumut eqqarsaatigeqqaartarukkit. Ussatit 15:28-mi ima allassimavoq: „Iluartoq oqalulersinnani eqqarsaqqaartarpoq, ajussuserli iluaatsut qarninit aniasarpoq.“
10 Ilikkakkatit atukkit: Alloriarneq kingulleq tassaavoq ilikkagarisimasat ’sunniutai’ paasiniassallugit. (1 Tás. 2:13) Ataatsimiinerni ilikkakkat ajunngitsut malikkaanni Jehova Guutimut palligukkiartornartarpoq. Ilumut piviunera malunnarsisarpoq, ’sallusuissullu eqqorlugu saqiuaannaraanni’ nuannaarneq nalerisimaanerlu angeqisut misinnarsisarput. — 3 Juá. 4.
11 Inuusuttut ilissi, ataatsimiinnerit iluaqutissarsiffigisigit nuannaarutissarsiffigalugillu akuttoqatigiimmik piareersartarnikkut, peqataaffiginerisigut ilikkakkassilu atornerisigut. Taava pissarsiaqarfiginerussavasi. Uppernersi nakussatsinneqassaaq taamatuttaaq Ataatassinnut qilammiusumut, Jehovamut aalajaattuarumallusi aalajangernersi nakussatsinneqassapput. — Tus. 145:18.