Jehovap pilluaqqusinerata pisuunngortittarpaatigut
1 Inuit akissarsiamik annertussusiisigut nalilerneqarajupput. Inuppassuit isumaqarput pisoorsuit allanit pilluarnerusartut nalerisimaarnerusartullu. Pilluarnermilli pisisinnaasorisut kukkulluinnarput. (Nal. oq. 5:12) Timip piisigut ’pisuunngorumasut’ ataavartumik nuannaalersinnaanngillat. (1 Tim. 6:9) Akerlianik Jehovap kiffaasa nuannaarneq piviusoq pigaat silarsuarmilu pisuunerpaallutik. (Uss. 10:22; sar. 2:9) Sooq?
2 Pisuujunitsinnut uppernarsaatit: Anersaakkut siuneqassutsimik Biibilimillu ilisimasaqarnermik pisuujuvugut. Jehovap peqatigiissortani qilammiusut aqqutigalugit ernini pillugu imminullu pilluni ajoqersortuarpaatigut, tamannalu uagutsinnut naassaanngitsumut iluaqutissaraarput. Eqqortumik ilisimasaqalernitsigut Jehovamut palligunnerulersarpugut qanimullu attaveqarnerput nuannaarutigisinnaallutigu. (Jâko 4:8) Ajortoq ajunngitsorlu immikkoortissinnaagatsigit Guutillu inatsisai malillugit allaat nappaatinut ulorianartunullu ingalassimatissinnaavaatigut. Tatigilluinnarparput Jehovap isumagiumaaraatigut, tamatumalu nalerisimaartippaatigut eqqarsartaatsitsigullu eqqissisimatilluta. — Mat. 6:33.
3 Anersaap inerititai ineriartortikkatsigit eqqissineq anersaakkullu qatanngutigiissutut ataasiussuseqarneq aamma nuannaarutigisinnaavavut. Asanninnikkut nukittuumik ataasiussuseqaratta ajutoornermik eqqugaagaluarutta Guutimit qatanngutitsinilluunniit qimagaasutut misiginissamut pissutissaqanngilagut. — Gal. 6:10.
4 Inuunerput ilumut siunertaqarpoq. Silarsuaq tamakkerlugu nutaarsiassap nuannersup oqaluussissutigineqarnerani peqataasinnaatitaanerput pisinnaatitaaffittut annertuutut isigaarput. Inuit allat Guutimut attaveqalernissaannut ikiorlugit pallorfiginninnermullu minguitsumut peqataalersillugit ataavartumik nuannaalersitsisarpoq. Oqaluussineq pingaartitarput Jehovamut ataqqinaataavoq, aqqatalu illernarsisinneqarneranut peqataanitta nalerisimaartippaatigut. Neriuutitta ungasinngitsukkut piviusunngorumaarnera nalunagu isumalluartuarpugut.
5 Pingaartitsinermik ersersitsineq: Jehovap pilluaqqussutaanut uagutsinnut silarsuarmi pisuunerpaanngortitsisumut qujamasuutissaqaqaagut. (Uss. 22:4) Pigisavut ullut tamaasa eqqarsaatigigutsigit Jehova asanninnermigut tunisiumassusianut qujaffigiumassavarput tamakkiisumillu tunniussimaffigiuaannarnissaanut kajumissisinneqarluta.