Apeqquteqarfik

◼ Oqalugiartup allassimaffimmik quppeeqqusigaangat tusarnaartut taamaaliortarpata sooq iluaqutaassava?

Tusarnaartut allassimaffinnik qassinik quppertariaqagaannut suna oqalugiaatigineqartussaq aamma Biibilimi aalajangersimasoq versikkuutaarlugu sammineqassanersoq aalajangiisuupput.

Allassimaffiit atuarneqarnissaata siunertaat eqqaamaneqartariaqarpoq. Ilaatigut atuarneqartarput oqaatigineqartut Biibilimut naapertuunnerat tunngavissaqarluartinniarlugu. (ap. sul. 17:11) Siunertaq alla tassaavoq Biibilimi takutinneqartut tunngavilersuummut tapersersuisut sammineqarnissaat, tusarnaartut uppernermikkut nakussatsinneqarnissaannut. Allassimaffiit pingaarnerit atuarneqaraangata namminneq Biibiliminni malinnaanermikkut misigissutitsigut misigisaqarnerulissapput. Aamma allattuigunik eqqarsaaterpassuit sammineqartut malinnaaffigilluarnerusinnaassavaat.

Oqalugiaatinut najoqqutassani Peqatigiiffimmit suliarineqartuni, allassimaffiit arlallit allattorneqartarput oqalugiartussap oqalugiaatiliornerminut iluaqutissaanik. Tamakkua sammisassap tunuliaqutaanik ilisimatissinnaavaat arlaatigullu najoqqutassiat tunngaviusut Biibilimeersut eqqaamalluarnissaanik ikiorlugit, oqalugiaatissap sammisaanik paasisaqarluarneroqqullugit. Oqalugiartussap aalajangissavaa allassimaffiit pisariaqartut sorliit oqalugiaammi atussanerlugit, tusarnaartullu allassimaffiit atuarneqaraangata nassuiarneqaraangatalu malinnaaqqullugit kajumissaartassavai. Allassimaffiit allat oqalugiaammut tapersersuisut taaneqarsinnaapput imaluunniit ilanngunneqarsinnaallutik, taamaappalli tusarnaartut tamatigut qupperartariaqanngilaat.

Oqalugiartup allassimaffiit innersuussutigineqartut atuaraangamigit toqqaannartumik Biibilimiit atuartassavai, allattukkat qarasaasiamit sananeqartoq atuinnarnagu. Tusarnaartut quppissappatigik Biibilip atuagartaa, kapitali versilu sorliunersut paasiuminartumik erseqqissumillu taasariaqarpai. Apeqqummik eqqartuilluni imaluunniit sooq allassimaffik atuarneqartariaqarnersoq naatsumik oqaaseqarluni tusarnaartut quppiinissamut piffissaqartissavai. Innersuussutini uteqqikkuniuk aamma tusarnaartunut eqqaamanarnerussaaq. Siunnersuutigineqanngilarli oqalugiartup qupperneq sorliunersoq taassagaa, tusarnaartut Biibiliutaat assigiinngitsuusinnaammata. Oqaluugiaammut tusarnaajutigalutik allassimaffiit kajumissaarutigineqartut quppertarunikkik tusarnaartut Guutip oqaasiata nukianik pissarsiaqarluarnissaminnut iluaqutigissavaat. — Epr. 4:12.