Sooq pioneeriusariaqarpunga?
1 Suliniut „Ukiumi 2000-imi pioneerit 1000-t“ aallartikkatsiguli amerlasuut Jehovap anersaavanik sunnerneqarlutik pioneeritut aallartissimapput. Allat immaqa eqqarsarput: „Sooq pioneeriusariaqarpunga? Pioneeriunngikkaluarlunimi Jehovamut kiffartorneq ajornanngilaq!“ Suliniuteqarnerput imaluunniit akulikitsumik kajumissaarneqarnerput kisimik pioneerinngornissamut pissutaasariaqanngillat. Naamik, allarluinnaap taamaaliornissatsinnut killissavaatigut. Ukiassamut allaaserisat ataqatigiit ima qulequtallit pilersaarutigineqarput: „Sooq pioneeriusariaqarpunga?“ Tassanilu pingaarutilinnik sisamanik tamatta isumaliutigisariaqakkatsinnik tunngavilersuuteqassaaq. Allaaserisami siullermi tunngavilersuut imaappoq: Kristusip asanninnerata pinngitsaalimmanga. — 2 Kor. 5:14, 15.
2 Kialuunniit pinngitsaalineqarnissani nuannarinngilaa. Jesusilli uagutsinnut asanninnera angingaartoq killinnarlunilu kajumissinarpoq. (Juá. 15:13) Asanninngitsooqqissinnaanngilagut asanninneralu akinngitsoorsinnaanagu. Tamanna pissusissamisoorpoq. Tassuunatigut oqarsinnaavugut ’pinngitsaalineqarluta’. Aamma asanninnerput, qujamasunnerput pingaartitsinerpullu kajumissutaapput, ajornanngippat pionerinngornissatsinnut ’pinngitsaalilluta’. Pioneeritut kiffartorneq immaqa uagutsinnut oqitsuinnaanngitsutut pissusissamisuunngitsutullu isigaarput. Kiali misigisimanngilaa sunaluunniit nangaassutiginikuusimagaluarlugu kingornatigut nuannarilluinnagarilersimallugu?
3 Jehovamut Jesusimullu asanninneq: Kristumiutut iliuutsitta tamarmik asanninneq tunngavigisariaqarpaat suliatsigut malunnartoq. Silarsuassami nutaami aniguinissarput pingaarnerpaanngilaq. Sunit tamanit kissaatiginerpaasarput tassaavoq Jehovap aqqata illernarsisinneqarnissaa kisimilu oqartussaassusiata qutsisisinneqarnissaa. Jehova Jesus Kristusilu asanninnikkut annerpaamik namminissarsiunnginnerpaamillu maligassiuipput. Ilinnut ajornanngippat ’uppernerup asanninnikkut sunniisup’ periarfississinnaassavaatit taakkua asanninnerannut pioneeritut kiffartorlutit akinissannut. — Gal. 5:6; 1 Juá. 4:7-11.
4 Tullermut asanninneq: Tullinnut ilumoortumik soqutiginninnerpit asanninnerpillu pioneeritut kiffartorniarlutit aalajangernissannut aamma nakussatsissinnaassavaatit. (Mat. 22:36-40) Tullermut asanninnissamik inassut soqutigisaqannginnermut naapikkajuttatsinnut ilaasa kiffartornerminni ilungersornerannik annikillisitsisumut nakorsaatitut ippoq. Asanninnerup suut tamaasa oqilisittarpai. Soorlu nukiit atorneqaraangamik nukittoriartortartut taama inunnut oqaluussiffigisannut asanninnerit oqaluusseqataanerulernikkut sakkortunerulissaaq. Taamaattumik periarfissaqaleruit imaluunniit atukkannik allannguisinnaaguit ’pinngitsaalitinnissannut’ pioneeritut kiffartorneq pitsaalluinnaassaaq.
5 Pioneeritut kiffartorluni imminut iluaqutissat: Pioneeritut kiffartornerit aamma oqimaaqatigiissumik pilluarnartumillu inuunissannut Jehovamut tatiginninnerulernissannut iluaqutigissavat. (Mák. 10:21) Ilaat allaat isumamikkut peqqinnerulerlutik misigisimapput. Allat Biibilimik ilisimasaqarnerulernerminnut iluaqutaasoq erseqqissarpaat. Qatanngut arnaq isumaqarpoq pioneeritut kiffartornerup allaat inuuneq oqinnerulertissimagaa. Saniatigut misigivoq ilagiit suleqatigiinneq tamanna pingaartikkaat.
6 Sooq illerpiaq pioneeriusariaqarpit? Tassami taamaalillutit Jehovamut, Jesus Kristusimut tullinnullu namminissarsiunngitsumik asanninnerit pitsaanerpaamik takutissinnaavat. (1 Juá. 5:3) Saniatigut inooriaaseq pitsaanerpaaq qinersimassavat. — 2 Pît. 3:11-14.