Nakimaallutit oqaluussisarpit?
1 Naak Peter Johannesilu parnaarussaagaluarlutik assortortiminnillu sioorasaarneqaraluarlutik Guutip naalagaaffia pillugu siooranatik oqaluussiuarput. (ap. sul. 4:17, 21, 31) Kristumiutut ilumoortutut ullumikkut qanoq siooranata oqaluussisinnaavugut?
2 Qanoq paasisariaqartoq: Sioorannginneq imaluunniit nakimaanneq sapiinnertut, ersisuinnertut, qunusuinnertut aamma taaneqarsinnaavoq. Siooranani oqaluussineq isumaqarpoq sapiilluni qunusuilluni oqaluussineq imaluunniit nalunaajaaneq nutaarsiassaq nuannersoq periarfissakkut naleqqulluartukkut sukkulluunniit allanut oqaluttuaralugu. (ap. sul. 4:20; 1 Pît. 3:15) Tassa sallusuissut kanngusuutiginagu oqaluuseralugu. (Tus. 119:46; Rûm. 1:16; 2 Tim. 1:8) Nakimaanneq pissusiuvoq ulluni kingullerni makkunani oqaluussinitsinni pisariaqartoq. Tamatuma inunnut sumiluunniit naapitatsinnut nutaarsiassamik nuannersumik oqaluussisinnaatippaatigut. — ap. sul. 4:29; 1 Kor. 9:23.
3 Atuarfimmi sioorannginneq: Atuaqatinnut qunullutit ittoorlutillu oqaluussinissat ajornakusoortittarpiuk? Piuminartuinnaaneq ajorpoq, ilaatigullu unamminiarnarsinnaasarluni. Allalli oqaluussiffiginiarlugit nakimaannissat qinnutigigukku Jehovap nakussatsissavaatit. (Tus. 138:3) Jehovamut Nalunaajaasuunerpit oqaatiginissaanut nakimaannerup ikiussavaatit, illaruaatigineqarnermullu naammagittartissallutit. Immaqa atuarfimmi oqaluussinikkut tusarnaativit ilaat annatsikkumaarpatit. — 1 Tim. 4:16.
4 Suliffimmi sioorannginneq: Suliffinni Jehovap Nalunaajaasuatut ilisimaneqarpit? Immaqa suleqatitit oqaluussiffigigukkit nutaarsiassamik nuannersumik tusarnissartik periarfissatuaraat. Nakimaanneq aamma iluaqutaassaaq ataatsimiinnerit ataatsimeersuarnerillu najuuffigiumallugit sulinngiffeqarnissamik qinnuigissagaanni.
5 Misiligaanermi nakimaanneq: Assortorneqartilluta nakimaannissarput pingaaruteqarluinnarpoq. (1 Tás. 2:1, 2) Sioorasaarneqaraangatta, illaruaatigineqaraangatta toqqaannartumilluunniit asissorneqaraangatta upperisatta aalajangiussimanissaanut iluaqutigissavarput. (Fil. 1:27, 28) Jehova Guutip najoqqutareqqusaasa akerliannik iliornissamut tatineqaraangatta aalajaannissatsinnut nakussatsittarpaatigut. Allat oqallissaarigaangata eqqissisimaannarnissatsinnut iluaqutaavoq. — Rûm. 12:18.
6 Qanorluunniit tamatta immikkut ajornartorsiuteqartigigaluarutta nakimaalluta nutaarsiassaq nuannersoq pillugu oqaluussiuartariaqarpugut. — Evf. 6:18-20.