Kiffartornissannut piareersimavit?
1 Ukiumi 778-mi u.n.s. pruffiiti Esaja immikkut ittumik misigisaqarpoq. Takorluuinermini takuaa ’[Jehova] issiavissaarsuarmini portusoorujussuarmi issiasoq’. Taava tusaalerpaa inngilit Jehovap naalannassusia pillugu oqartut: „Illernarpoq, illernarpoq, illernarpoq Katersaarsuit [Jehovaat].“ Misigisaq tupinnarsimassaqaaq. Jehovalu unamminiarnartumik aperivoq: „Kina aallartissavara, kia oqariartuukkumavaatigut?“ Sulerisoqassanersoq imaluunniit piumassuseqarluni sassartup qanoq pissarsiaqaatigissaneraa oqaatigineqanngilaq. Esajalli tunuarsimaarnani akivaa: „Piareersimavunga, aallartinnga!“ — Esa. 6:1, 3, 8.
2 Jehovap piumasaanik sumilluunniit innuttaasa kajumillutik iliuuseqarusunnertik tamanna ilisarnaatigaat. (Tus. 110:3) Maannalu kiffartornissamut piareersimasut immikkorluinnaq kajumissaarneqarput. Pruffiititut Esajatut piumassuseqartigivit?
3 Qatanngutinik angutinik Betelimi kiffartorsinnaasunik suli pisariaqartitsoqarpoq. Guutip naalagaaffiata soqutigisaasa salliutinnissaat iluunngarlutik kissaatigisariaqarpaat aammalu silarsuaq tamakkerlugu oqaluussineq siuarsarniarlugu piumassuseqarlutik qanorluunniit iliuuseqarusussuseqartariaqarlutik. (Mat. 6:33) Betelimi ilaqutariinnut ilaalluni Jehova uummatikkut iluunngarluni kiffartuunnissaanut periarfissaavoq immikkut ittoq. Qanoq?
4 Betelimi sulineq: Betelimi naammassineqartartut tamaasa eqqarsaatigeriakkit. Danmarkimi Betelimiittut qatanngutit angutit arnallu 84-iusut inussiaq ilumoorlunilu silatooq Siulersuisoqatigiillu Biibilinik atugassianillu Biibililersaarutinik oqaluussinermut namminerlu atuaqqissaarnissamut atortussanik saqqummiussuineranni qanimut suleqatiginninnertik immikkut pisinnaatitaaffigaat. (Mat. 24:45) Atuagassiat atortakkavut tamaasa assersuutigalugu qallunaatut ilaallu kallaallisut nutserneqartussaapput, aamma ’oqaatsit eqquisumik oqaatiginnittut atorniarneri oqaatsillu ilumoortut peqqusersuitsumik allattorneri’ suliassarujussuupput. (Oqal. 12:9, 10) Qatanngutit allat allanik ulapputissaqarput, assersuutigalugu Napparsimavinnut Paasissutissiisarfimmi, Betelimi Paasissutissiisarfimmi, Videoleriffimmi, Immiussisarfimmi, Atuagaateqarfimmi, Betelimilu aserfallatsaaliinermik ulluinnarnilu eqqiaanermik, errorsinermik nerisassiornermilu. Tamakku saniatigut ilagiippassuit 200-t sinnillit, ataatsimeersuartarfiillu nakkutigineqartussaapput. Nunarsuaq tamakkerlugu qatanngutit angutit arnallu 19.500-t missaaniittut Betelini nunarsuarlu tamakkerlugu ilagiit 91.000-it sinneqartut oqaluussinermut iluaqutaasut anersaakkullu ittunut siuarsaataasut tapersersorniarlugit sulipput.
5 Betelimi sulineq ilungersunartuusinnaavoq, aammali suliaalluni anersaakkut nalerisimaarnartoq. Nalunagu oqaluussineq ilinniartitsinerlu tapersersorniarlugit nukitik tamaasa atoraat assut nuannerpoq. Betelimi kiffartorneq Jehovap peqatigiissortaanut ilisimasaqarnerulernissamut iluaqutaavoq. Tamatuma eqqaasippaatigut tussiaasiortup Israelikkut taamani teokratiskiusumik aqutsinermut nunarsuarmi qitiusumik ilisimasaqarlualernissaannik kajumissaarmagit. — Tus. 48:12, 13.
6 Betelimi kiffartornermi pilluaqqussutaasut: Betelimi sulisut immikkut pisinnaatitaaffieqartutut misigippat? Nunarsuaq tamakkerlugu Betelimi suleqataasut ilaasa inuusuttut utoqqaallu oqaaserisaat tulliupput. Qatanngut arnaq Betelimi ukiut pingasut kiffartorsimasoq oqarpoq: „Betelimi sulinerma Jehovamut attaveqarnera nakussatsippaa. Tamaaniinnera sivitsoriartortillugu Betelip siulersorneqarnera paasiartornerulerpara, taamatullu Jehovap kinaassusivia ilikkarnerullugu. Betelimi aamma Jehovap inuit assigiinngitsut tamaasa qanoq atortarai takusinnaalerpara. Aamma naammalluinnanngikkaluartoq atorsinnaavaa.“
7 Qatanngut angut inuusuttoq oqaluttuarpoq: „Imminut oqarfigiuaannarpunga: ’Silarsuassami nutaami nuannissaaq itsaq angutit aalajaatsut oqaluttuutissallugit Harmagedoninnginnerani silarsuarmi pisuunngorniarnanga Betelimili sulisimagama.’“
8 Ilinniartitaasimanini pillugu qatanngut angut inuusuttoq oqarpoq: „Piginnaanerit sulissutigisariaqakkat takusinnaalerlugit sulissutiginissaannut iluaqutaasorujussuuvoq. Misigaanga Jehovap kiffartuunnissaanut piukkunnarnerulerlunga. Nikallujaannerulerpunga, imminut naalakkersinnaanerulerlunga asannissuseqarnerulerlungalu.“
9 Qatanngutip arnap ulloq manna tikillugu nuannersut misigisani oqaluttuarai: „Maani malittarisassat anersaakkut ittut Jehova eqqarsartaasialu pillugit, misigissusiisigut iliuusiisigullu qanoq ilaarluarnerusinnaanerlugu ilikkagaqarneruvunga. linniartitaajuarattalu nuannaarneq kipisuitsuuvoq.“
10 Qatanngut angut ukiut 59-t piffissaq tamaat kiffartorsimasoq, taakkunanngalu ukiut 43-t Betelimiissimasoq, oqarpoq: „Beteli mattuffittut inngilaq, soorlu ilaasa taamaassorisarunaraat. Ullut pilersaarusiugaareermata suliaqartaqaagut. . . . Ulloq ataasiinnarluunniit suliartornissara eqiagisimanngilara, Jehovami uummammik tamakkiisumik kiffartuukkaangatsigu naammagisimaannartarpoq nalunagu ’pisussaassuserput malillugu iliorluta’. — Luk. 17:10.
11 Qatanngut angut alla Betelimi ukiut 62-it kiffartorsimasoq oqarpoq: „Qularutiginngilluinnarpara Betelimiinneq nunarsuup paratiisinngunnginnerani pitsaanerpaajusoq. Peqqissiminngisaannarpunga piffissaq tamaat kiffartorama. Jehovap nunami peqatigiissortaani alliartupiloorneranut takunnittuulluni peqataaffigalugulu nuannaarneq angeqaaq! Jehova Guutip ikiuineratigut Betelimiiginnarnissara iluunngarlungalu guutip naalagaaffianik suleqataanissara siuarsaaqataanissaralu aalajangiusimavara.
12 Betelimi kiffartornissamut piareersimasimanerminni Betelimi ilaqutariinneersut pilluaqqussutissarpassuit ilaminiinnanngui misigisimasatik eqqaavaat. Kiffartornermut pisinnaatitaaffittulli allatulli piumasaqaatit naammassineqaqqaartariaqarput. Betelimi kiffartorniaraanni suut piumasaqataappat?
13 Betelimi kiffartornermi piumasaqaatit: Betelimi kiffartorniaraanni uani ungalusami piumasaqaatit eqqaaneqarput. Aammattaaq pingaaruteqarpoq suleruloorusussuseqarnissaq aamma ’inuulluarniutinik pingaarnerutitsinnginnissaq’. (2 Tim 3:4; 1 Kor. 13:11) Betelimiittut angutit arnallu anersaakkut ittut pingaartittussaavaat, atuaqqissaartarneq ileqquliutereersimassallugu, aamma ’ajunngitsumik ajortumillu immikkoortitsisinnaanermik’ siuneqassuseqariissallutik. (Heb 5:14) Kristumiutut inersimassusiat inuunerminni sutigut tamatigut takussutissaaqqaartussaavoq — atisalersoriaatsimikkut, isikkumikkut, nipilersuutinik aliikkusersuutinillu qinersisarnermikkut. Betelimiittut atorfissaqartinneqarfimminni kiffartorumassuseqartariaqarput. Inuusunnerusut suleruloornarnerusunik suliassinneqarnerusarput, soorlu peqqumaasivimmi nassiussisarfimmilu, aserfallatsaaliinermik, asaanermik, naatsiivilerinermik, errorsinermik iganermillu. (Uss. 20:29) Silamiutut sulinertut innani Betelimi suliassat tamarmik naammagisimaarnartaqaat, taamatut sulineq Jehovamut ataqqinaataasumik kiffartornerummat illernartoq. — Kol. 3:23.
14 Sivikinnerpaamik ukioq ataaseq Betelimi sulisariaqarpoq. Piffissami tassani sulianik naammassisaqarluarnissaq ilinniarneqartarpoq. Beteli angerlarsimaffittut isigissallugu ajussanngeqaaq. Betelimiittut Jehovamut asanninnertik namminneq soqutigisaminnit salliutitsinissaminnit Guutip naalagaaffiata soqutigisaasa salliutinnissaannut kajumississutigaat, Jehovamit iluarisaasoq. — Mat. 16:24.
15 Danmarkimi maannakkut pisariaqartitat: Suliassap suunera apeqqutaalluni ingammik qatanngutinik angutinik kisimiittunik pisariaqartitsisoqarpoq. Pioneeriunissaq piumasaqaataanngikkaluartoq piuneerioreersut piffissaq tamaat kiffartoreermata piumaneqarnerupput. Aamma ilaatigut qatanngutit arnat kisimiittut aappariillu 19-it 35-llu akornanni ukiullit assigiinngitsunik Betelimi atorfissaqartinneqartumik piginnaasaqartut pisariaqartinneqartarput. Qatanngutit angutit arnallu 35-t sinnilaarlugit ukiullit immikkullu ittunik piginnaassusillit misilittagallillu taamatuttaaq qinnuteqarnissaannut kajumissaarneqarput. Allaffimmiut, nutserisut, assassorissani suliallit (automekanikerit, elektrikerit, elektronikmekanikerit, qalipaasut, qarmaasut, saffiuut, pequsiortut, sanasut ruujorilerisut), qarasaasialerisut (hardware/software) naatsiivilerisullu suliaqartippavut. Aammattaaq ilaannikku qatanngutinik angutinik arnanillu errorsisarfimmi, eqqiaasussanik igaffimmilu sulisussanik atorfissaqartitsisarpugut. Betelimukarnissaq eqqarsaatigalugu periarfissaqarnerujumallutik annerusumik ilinniagaqarnissamut kajumissaarinngilagut. Amerlanertigut Betelimi sulisussatut atorfissaqartitavut nammineq ilinniartittarpavut. Immikkut ilinniagaqareersut, immaqa sallusuissummiilinngikkallaramik, qinnuteqaatiminni ilinniagareriigartik pillugu paasissutissat erseqqissakkat ilanngussinnaavaat.
16 Ilaatigut assassorissanik suliallit qarasaasiamilluunniit ilinniagaqarsimasut qallunaat qatanngutit angutit nunani allani sulisussatut piumaneqartarput. Danmarkimi Betelimiit qatanngutinik angutinik arnanillu nunani allani immikkoortortaqarfinnut aallartitsisarpugut, nuannaarutigaarpullu taamatut pisariaqartitsinernik matussuseeqataasinnaagatta. Pissutaasut ilagaat suli amerlanernik Holbækimi Betelimi ilinniartitserusullutalu pikkorissaarusukkatta. Taamatuttaaq Seltersimi immikkoortortaqarfik pisariaqartitsisupilussuunerarpoq, tassungalu qinnuteqarumasut Danmarkimiit qinnuteqaannarsinnaapput. Betelimulli qinnuteqaraluarlutit akuerisaanngikkuit nikalluutiginiaqinagu. Ukiut tamaasa qinnuteqaqqissanerlutit isumaliutigisinnaavat.
17 Betelimi sulisut kristumiut qatanngutit qanimut suleqatigalugit Jehova kiffartuullugu immikkut pisinnaatitaaffigaat. Siulersuisoqatigiit qujamasuutigaat kristumiutut qatanngutigiissuarni pisariaqartinneqartut matussuserniarlugit kiffartornissamut piareersimasoqartarmat. — Fil. 2:20-22; 2 Tim. 4:11.
18 Inuusuttut – Betelimut kiffartornissamut piareersarniaritsi: 19-nik ukioqalinnginnermi Betelimiilernissamut piumasaqaatigineqartunut piareersareersimasariaqarpoq. Inuusuttut Betelimi kiffartornissaminnut qanoq piareersartariaqarpat? Jesus oqarpoq: „Kina arlarsi napasulialiorniaruni ingeqqaassannginnerpa naatsorsorlugillu aningaasartuutissat paasiumallugu inaarnissaanut akissaqassanerluni?“ (Luk. 14:28) Sanaassaq naammassineqassappat piareersartoqartariaqarpoq pilersaarusiortoqartariaqarlunilu, pingaaruteqarnerunnginnerpa peqqissaartumik Jehovamut kiffartornissamut pilersaarusiussalluni? Anersaakkut anguniakkat anguniaraanni siusissorujussuakkut aalajaatsumik tunngaviliortariaqarpoq. Inuusuttuuguit, illit qanoq tunngaviliorpit? Betelimi kiffartulernissat pilerigigukku ilinnut pitsaassaaq tulliuttut eqqarsaatigeqqissaarnissaat.
19 Kiffartorneq immikkut ittoq periarfissiguk: Jesusip ajoqersukkani kajumissaarpai aappaqannginnissaq periarfisseqqullugu. (Mat. 19:12, NV) Sooq? Imminut pinnatik kisiannili Qilaap Nalagaaffia pillugu. Aamma Paulusi assingusumik kajumissaarivoq „akornusersorneqarasili assuarnaatsumik inuunissarsi Naalagaq attavigalugu“. (1 Kor. 7:32-35) Ajoraluartumik inuusuttuulluni katissimaneq pissutaalluni Betelimi katissimanani kiffartorneq misiginngitsoorneqartarpoq. Qatanngutit angutit inuusuttut kajumissaarusuppavut ilaqutariinnik akisussaaffeqalinnginnerminni nukitik piffissaq tamaat kiffartornermi atoqqullugit. Kingusinnerusukkulli katinniarlutik aalajangerunik inuunermi kristumiutullu misilittagaasa uiulluarnerulersissavaat. Ilaat ukiualuit Betelimi kiffartoreernermi kingorna katissimapput aappatillu ilagalugit Betelimi kiffartorlutik. Kingusinnerusukkullu immikkut ittunik pisinnaatitaaffeqalerunik, soorlu angalasartunngorlutik ajoqersuiartortitanngorlutilluunniit pissutissaqarluarlutik Betelimi aappaqannginnermik periarfissaqarsimanertik peqqissimissutiginavianngilaat.
20 Pigisaleritunermut ussertinnaveerit: Inuusuttut tamarmik imminnut ima aperisariaqarput: ’Atuarfimmi naammassiguma suliffigissaartuunissara imaluunniit piffissara tamaat Jehovamut kiffartortunngornissara anguniagarivara?’ Qularnanngilaq kingulleq qineraanni pilliuteqartoqartariaqartoq. Aamma siulleq taamaappoq. Sorleq kinguneqarluartumik ataavartumillu iluaqutaasinnaava? Jesusip erseqqissumik akivaatigut. Matthæusi 6:19-21 naapertorlugu oqarpoq: „Erlinnartuutinik nunami katerseqinasi, tassanimi qillaalaat oquillu aseruisarmata tillinniallu nakuuserlutik illumut iserlutik tillittarmata. Qilammili katersigitsi erlinnartuutinik, tassanimi qillaalaat oquillu aseruissanngimmata, tillinniallu nakuuserlutik illumut iserlutik tillissanngimmata. Uummativimmi erlinnartuutitit najortuartarpai.“ Jehovamut uummammik tamakkiisumik kiffartornermut taarsiullugu qanortoq uummatitta ussernaveerilitigut qaffasissumik suliffittaarnissamut pigisaleritunissamulluunniit. Nassuerutigisariaqarparput anguniagassat pingaaruteqartut pingaarnersatuarigaat Jehovamut attaveqarluarneq, uummataa nuannaartinniassagatsigu. (Ussatit 27:11) Inuusuttuunermi Jehovap soqutigisaanik inuunermi siulliussineq suut pingaartitarinerlugit Guutillu nalagaaffianik pingaarnerpaatitsinermik takutitsineruvoq. Eqaamajuk „Naalakkap [Jehovap] pilluaqqusinera pisuunngortitsisaraaq, erloqinartumillu ilasarinngilaa.“ (ússatit 10:22) Jehovap sunik tamanik tunisimammatik inuusuttut immikkut periarfissaqarput akillugu iliuuseqarfiginissaanut uummammiuminnik takutitsinermikkut. Piumasaqaatinik naammassinnittunut Betelimi kiffartorneq pisinnaatitaaffiuvoq angisooq.
21 Betelimi kiffartorniaraanni ileqqorissuusariaqarpoq: Tussiaasiortoq aperivoq: „Qanoq ililluni inuusuttup ingerlavini minguitsuutissinnaavaa? Tassa oqaatsitit maleruarunigit!“ Tamatuma ilagaa Satanip aaqqissuusaani ileqqupiluit ingalassimanissaat. Internettikkut tiingasulersaarutit, angutaagaanni arnamut arnaagaannilu angummut ileqqorlunnerit, nipilersuutinik kanngunartunik tusarnaarneq, aliikkusersuutit aserornartut sualuttumillu erngunnerit Satanip inuusuttut anersaakkut anguniagaqarnerannik akornuserniarlugit usseeriaasiisa ilagaat. Taamaattumik ussiinerit taamaattut akiorsinnaajumallugit aalajangiusimannilluinnartariaqarpoq. Inuusuttuuguit pissutsinillu taamaattunik atugaqaruit Betelimut qinnuteqannginninni ajornartorsiutit aaqqinniarlugit utoqqaanertat oqaloqatiginiakkit. Jehovamut uummatikkut iluunngarluni kiffartornermi ilerasuuteqannginnissaq pingaaruteqarpoq. — 1 Tim. 1:5
22 Allanik peqateqarluarnissaq ilinniaruk: Betelimi kiffartornermi pingaaruteqartoq alla tassaavoq allanik peqateqarluarnissaq. Betelimi ilaqutariit qatanngutit assigiinngeqaat, tunuliaqutaallu assigiinnguilluinnarlutik. Betelimi anersaakkut pinnissutsikkut sulilluarneq nuannarivaat, ilaannili unamminiarnarsinnaavoq asannittumik, eqqissisimasumik ataasiussuseqarlunilu suleqatigiinnissaq. Betelimi kiffartortunngornissat isumaliutigigukku imminut ima aperigit: ’Allanit isumaqatigineqanngikkaangama ajuallajavunga? Ilama ilakkuminarsorivaannga?’ Tamakkunatigut siuariartariaqaruit maannakkut taamaaliorit. Taava naleqqussarsinnaanerussaatit, Betelimilu ilaqutariit najugaqatiginissaat suleqatiginissaallu ajornannginnerutissallugu.
23 Qasusuillutit anersaap piinik aallussilluarnissat suliniutigiuk Jehovamut attaveqarluarneq ineriartortinniarlugu. Nammineq biibilimillu atuaqqissaarnissamut pilersaarusiorluarit. Oqaluussilluartarit. Tamakkuninnga ulapputeqartaruit anersaakkut siuariartornerit ersarissaaq. (1 Tim. 4:15) Piffissaq tamaat kiffartorniarnermut piareersartunut pilluaqqussutissarpassuaqarpoq.
24 Angajoqqaat meeqqasi piareersarsigit: Angajoqqaat meeqqaminnik piffissaq tamaat kiffartornermik anguniagaqarnissaannik qanoq kajumissaarisinnaappat? Jiisusi oqarpoq: „Kinaluunniit ilinniarnermini inersimasoq ajoqersortimisut issaaq.“ (Luk. 6:40) Ilinniartoq ilinniarluarsimasoq pissusissamisoortumik ilinniartitsisumi piginnaasaasa assinginik piginnaasaqassaaq. Najoqqutassiaq tamanna kristumiut angajoqqaat meeqqaminnik perorsaanerminni ’Guutimut tunniusimanermik anguniagallit’ eqqarsalissutigisariaqarpaat. (1 Tim. 4:7NV) Meeqqat angajoqqaamittut anersaakkut ittunut isiginnittariaaseqaqqajaasarmata, angajoqqaajusut imminnut aperisariaqarput: „Pallorfiginninneq ilumoortoq Jehovallu soqutigisai siuarsarniarlugit Betelimi suliarineqartut pingaartippagut? Betelimi aaqqissuussineq Jehovap pilluaqqugaa takusinnaavarput? Isumaqarpugut meeqqatta inuunerminni qinersinnaasaat pitsaanerpaaq tassaasoq Jehovamut kiffartorneq? Meeqqavut assingusumik isiginnittaaseqalernissaannut ikiussavavut uummaterput tamakkerlugu Betelimi kiffartornermi suliarineqartunik pingaartitsigutta.
25 Elkana Hannalu pallorfiginninnermut ilumoortumut pingaartitsisorujussuusimapput. Ullumikkut angajoqqaanut kristumiunut maluginiarnartumik maligassiuilluarput. Itsaq israelimi piumasarineqartarpoq angutit kisimik „Ukiumut pingasoriarlutik angutit tamarmik Guutip Naalakkap [Jehovap] kiinaa takusassagaat“ illernartuutitaliamut. Taamaakkaluartoq Elkana „ukiut tamaasa“ 30 kilometerit missaat, qularnanngitsumik pisuinnarluni, ilaquttani tamaasa ilagalugit pilliiartortarpoq Jehovamut pallorfiginnikkiartorluni. (2 Mos. 23:17; 1 Sam. 1:3, 4, 9, 19; 2:19) Ersarippoq anersaakkut ittut peqataaffigisani ilaqutariit tamarmik peqataaffigissagaat ittuusutut kissaatigigaa.
26 Hannap uini pallorfiginninnermik ilumoortumik soqutiginninnerani avitseqatigaa. Illernartuutitaliami pallorfiginninnermut ilumoortumut tapersersuisariaqarluni misigisarpoq. Jehova neriorsorpaa ernertaartissappani illernartuutitaliami kiffartornissamut piareersimatinniarlugu. (1 Sam. 1:11) Mosesip inatsisai malillugit uiusoq nuliaasup neriorsuutigisaanik atorunnaarsitsisinnaavoq. (4 Mos. 30:6-8) Elkanalli Hannap neriorsuutaa iluarisimagamiuk pallorfiginninnerlu ilumoortoq taamaassinnaasorigamiuk tapersersorpaa. — 1 Sam. 1:22, 23.
27 Samuelimut angajoqqaavisa pingaartitsisimanerat ajunngitsumillu isiginniginnittaaseqarnerat sunniuteqarluarpa? Aap, sunniuteqangaarpoq. Samueli nukappiaraatilluni suliassaminik piumassuseqarluni aalajaallunilu suliaqartarpoq, Jehovamullu kiffartornermik immikkut pisinnaatitaaffinnut ajoqersorneqalerluni. Elkanap Hannallu Samuelip illernartuutitaliami kiffartornera soqutigiuarpaat. Piffissaq tamaat kiffartornerani qiimmassarniarlugu tapersersorniarlugulu aalajangersimasumik pulaartarsimavaat. — 1 Sam 2:18,19.
28 Taamaalillutik Elkana Hannalu ullumikkut kristumiunut angajoqqaajusunut maligassiuilluarput. Meeqqatta tusaagangamitigut Betelimi kiffartuutigineqartut qanoq pingaartitsiginerigut, takusinnaagaangamikkulu Naalagaaffiup soqutigisaanik qanoq pilliutigeriaannaatigisumik anersaaqartugut, aamma namminneq allanik kiffartuussinissamut uummatimikkut eqqortumik isiginnittaaseqalissapput. Angajoqqaarpassuit meeqqaminnut eqqortumik isiginnittaaseqalersitsisimapput. Niviarsiaraq arfineq-marlunnik ukiulik allappoq: „Angisuunngoruma Betelimiikkusuppunga, suliarerusussinnaasakka amerlaqaat. (1) Napasuliaq Alapernaarsuiffik Iteritsi!-lu naqiterlugit, (2) assilialiornermik suleqataallunga, (3) errorsisarfimmi atisanik iluarsaassillunga. Sulerissagaluarumaluunniit soqutaanngilaq.“ Nuanneqaaq meerartavut kajumissuseqarpaluttut tusarlugit.
29 Inuusuttuususi, eqqaamasiuk „silarsuarlu piumatussusialu nungussapput, Guutilli piumasaanik iliortoq naassaanngitsumik atassaaq.“ (1 Joh. 2:17) Anersaakkut anguniakkasi anguniarniarsigit, immaqa Betelimi immikkut pisinnaatitaaffeqarlusi kiffartulersinnaavusi. Angajoqqaat, itsaq arnat angutillu meeqqaminnik guutimut tunniusimanermik kajumissaarisimasut malinniarsigit. (2 Pet. 3:11) Qanortorlu tamatta inuusuttortagut ikiortigit Pinngortitsisorsuatsinnik kiffartuussinerulernissaannik, ’inuunermut matumunnga piumaartussamullu immini neriorsuuteqarmat’. — 1 Tim. 4:8; Oqa. 12:1.
[Qupp. 4-mi ungalusaq]
Betelimi kiffartorniaraanni tunngaviusumik piumasarineqartut
● Sivikinnerpaamik ukioq ataaseq kuisimasuusariaqarpoq
● Anersaakkut pingaartitsisuusariaqarpoq Jehovamut peqatigiissortaanullu asanningaartuusariaqarluni
● Anersaakkut, sianissutsikkut, misigissutsikkut timikkullu peqqissuusariaqarpoq.
● Allassinnaasariaqarpoq atuarsinnaallunilu qallunaatoorluarsinnaasariaqarluni
● 19-it 35-illu akornanni ukioqartariaqarpoq