Tappiitsut Jehovamik ilisimasaqalernissaannik ikiukkit
1. Jiisusip tappiitsunik nallittuinini qanoq ersersippaa?
1 Jiisusip toqunissaanut ullualuinnanngorput. Jeriko qimakkaalu tappiitsut marluk suaartalerput: ‘Naalagaq, naakkigitigut!’ Naak Jiisusip toqutaanissani isumakuluutigigaluarlugu unippoq, angutillu qaaqqoriarlugit ajorunnaarsippai. (Matt 20:29-34) Jiisusip tappiitsunik nallittuinera qanoq ilaarsinnaavarput?
2. Tappiitsumut naapitatsinnut qanoq nalunaajaasinnaavugut?
2 Ikiuiumatuugit. Illit oqaluussinngikkaluaruilluunniit tappiitsumik naammattoorsiguit imminut ilisaritigit ikiorumallugulu neqeroorfigalugu. Tappiitsut uukapaasiarineqakkajuttaramik pasilleeqqajaasinnaasarput. Taamaattoqaraluarpat inussiarnisaarlutillu ilumoorlutit soqutiginninnerit ersersikkukku eqqissisarsinnaavat. Aamma eqqaamajuk tappiitsut ilaat isigisaqalaarsinnaasarmata, taamaattumillu tamanna aalajangiisuusinnaavoq qanoq ikiorneqartariaqartiginerannik. Ikioreerukku, taava immaqa oqarsinnaavutit Biibilimik ilinniartitsinermik suleqataallutit. Allassimaffimmik atuffakkumajuk, soorlu Tussiaat 146:8 imaluunniit Esajap allagai 35:5, 6. Tappiitsunut naqinnerit atorlugit atuarsinnaappat taassumalu oqaasiini taama ittunik nassaassaqarpat, aperiuk Biibilimik ilikkagaqarnerunissaanut iluaqutaasunik tappiitsunut naqinnilinnik Biibililersaarutinik perusunnersoq. Aamma jw.org-imiit atuaanermik immiussanik aallernissaanik ikiorsinnaavat. Qarasaasiami atuaasinnaasumik programmeqarpat, jw.org-imi allaaserisat Biibililersaarutillu RTF-itut (Rich Text Format) aaneqarsinnaasut qujamasuutigissaqai. — Ungalusaq “Tappiitsoq ikiussagukku ...” takuuk.
3. Angalaarfigisartakkatsinni tappiitsunik qanoq ujaasisinnaavugut?
3 Tappiitsunik ujaasigit. Illumiit illumut nalunaajaagaangatta qaqutiguinnaq tappiitsunik naapitsisarnitsinnut pissutaavoq tappiitsut ilarpassuisa takornartanik kasuttortunik oqaloqateqarnissartik toqqissisimanartittannginnamikku. Taamaattumik tappiitsunut nalunaajaaniarluni taakkuninnga ujaasinissaq ilungersunarsinnaasarpoq. (Matt 10:11) Tappiitsumik suleqateqarpit atuaqateqarlutilluunniit? Oqaloqatiginiarlugu siulliullutit aallarniigit. Illit angalaarfigisartakkanni tappiitsunut atuarfeqarpat atuagassiaatitsinnik tappiitsunut naqinnilinnik atuarfiup atuagaateqarfianut ilisiumasinnaavutit. Tappiitsumik ilaqutalimmik nalunngisaqarpit? Illit angalaarfigisartakkanni tappiitsunik kiffartuussisunik peqatigiiffeqarpa, imaluunniit tappiitsut najugaqarfigisaannik inissiaqarpa? Ilaqutaasoq, saaffiginnittarfimmi sulisoq pisortarluunniit nassuiaaguk Jehovap Nalunaajaasuisa tappiitsut ikiorusullugit soqutigigaat, atuagassianillu tappiitsunut naqinnilinnik immiussanilluunniit tusarnaagassanik tunerusullugu. Guutip erniinnaq tappiissuseqarunnaarsikkumaaraa Biibilimi neriorsuut takutiguk. Tuluttut oqaluttumik paasisaqarsinnaappat isiginnaagassiaq qulequtalik “Uden den ville jeg være fortabt” angutip tappiitsup Biibili tappiitsunut naqinnilik qanoq iluaqutigisimanerlugu misigisimasani oqaluttuarigaa jw.org-imi takutikkumajuk. Suna pillugu pulaarnerlugu nassuiaateriarukku tappiitsunik ataasiakkaanik attaveqalernissannut periarfissaqalissaatit.
4. Janetip misigisimasaa qanoq ilinniarfigisinnaavarput?
4 Qatanngutip arnap tappiitsup Janetimik atillip tappiitsunut najugaqarfik pulaarsimavaa. Tassani arnaq inuusuttoq oqaloqatigilerpaa imalu nassuiaallugu: “Jiisusip siunissami qanoq iliorumaarnini ersersinniarlugu tappiitsut marluk ajorunnaarsippai.” Saqqummersitat 21:3, 4-lu marluullutik eqqartorpaat, Janetillu nassuiaappaa neriorsuut tamanna Guutip naalagaaffiani qanoq piviusunngortinneqarumaartoq. Arnaq nipaariarluni ima oqarpoq: “Tamanna aatsaat tusarpara, aamma tappiitsumit taama nassuiarneqartoq tusarnikuunngisaannarlugu. Inuimmi tappiitsuunngitsut amerlanerit isumaqarput inuk tappiitsoq nammineq siuaasamiluunniit iliuuserisimasaa pissutigalugu tappiitsuusoq.” Janetip atuakkamut Biibilimi ajoqersuutigineqartut-mut innersuussissut e-mailikkut nassiuppaa, maannakkullu sapaatip-akunneranut marloriarlutik Biibilimik atuaqqissaaqatigiittarput.
5. Naak Jiisusitut tappiitsunik ajorunnaarsitsisinnaanngikkaluarluta, tappiitsunik soqutiginninnermik ersersitsinerput qanoq pilluaqquneqaatigisinnaavarput?
5 Soorunami Jiisusip iliorsimaneratut tappiitsut uagut isigisaqalersissinnaanngilavut, silarsuulli matuma guutianit eqqarsaatimikkut tappiillisinneqarsimasut tamaasa, innarluutigalugu tappiitsut ilanngullugit, sallusuissummik Guutip oqaasianeersumik paasinnilersissinnaavavut. (2 Kor 4:4) Jiisusip angutit marluk Jerikop eqqaaniittut ‘nalligingaaleramigit’ isigisinnaalersippai. (Matt 20:34) Uaguttaaq tappiitsut soqutiginninnermik ersersitsivigigutsigit isigisinnaalersitsisinnaasumik, Jehovamik, ilisimasaqalernissaannik ikiussallugit immikkut pisinnaatitaaffigilersinnaavarput.