Qanoq asaqatigiit­tuarsin­naasugut

1-2. (a) Sooq apustili Paulusi oqarpa ‘asanninneq pingaar­nerpaasoq’? (b) Apeqqutit suut sammissavagut?

APUSTILIP Paulusip upperneq, neriunneq asanninnerlu eqqartoramigit oqaatsini ima naavai: ‘Asanninneq taakkunani pingaar­nerpaavoq.’ (Kor 1. 13:13) Sooq Paulusi taama allappa? Siunissami paratiisi pillugu Guutip neriorsuutai eqquutereersimas­sammata taamanik­kussamut taakku upperisariaqar­nagillu neriuutigisariaqan­ngilagut. Jehovamilli inunnillu asannit­tuartariaqarpugut. Tassa asanninnerput naassaan­ngitsumik ineriar­tortittuas­savarput.

² Asannis­suseqar­tuartariaqaratta apeqqutit pingasut sammissavagut. Siullertut, sooq asaqatigiissaagut? Aappaattut, asaqatigiinnerput qanoq ersersis­sinnaavarput? Pingajuattullu, qanoq asaqatigiit­tuarsin­naavugut?

SOOQ ASAQATIGIISSAAGUT?

3. Asaqatigiin­nissatsinnut sunik pissutis­saqarpugut?

³ Sooq asaqatigiin­nissarput pingaaruteqarpa? Ilaatigut kristumiut ilumoortut asanninneq ilisarnaatigimmassuk. Jiisusip apustilini ima oqarfigai: “Asaqatigiikkussi kikkut tamarmik paasissavaat ilinniar­titarigissi.” (Joh 13:35) Aamma asaqatigiikkatta ataasius­suseqarpugut. Paulusi allappoq ‘asanninneq ataasioqatigiil­luinnalersitsisartoq’. (Kol 3:14) Asaqatigiin­nissatsinnulli aamma allamik pingaarutilimmik pissutis­saqarpugut. Apustili Johannesi uppeqatiminut ima allappoq: “Guutimik asannittoq aamma qatanngutiminik asannissaaq.” (Joh 1. 4:21) Tassa asaqatigiinnikkut uppernarsar­tarparput Guutimut asannit­tuulluta.

4-5. Guutimut asanninnitta uppeqatitsinnut asannin­nitsinnut qanoq ataneranik assersuuteqarit.

⁴ Guutimut asanninnerput uppeqatitsinnut asannin­nitsinnut qanoq atava? Uummatitta timitsinnut qanoq sunniuteqar­tarnera assersuutigisin­naavarput. Nakorsap paffitsigut tillersioraangamisigut paasisin­naasarpaa uummaterput peqqinnersoq. Assersuusiaq tamanna qanoq ilinniarfigisin­naavarput?

⁵ Soorlu nakorsap tillersioraangamisigut paasisin­naasaraa uummatitta qanoq peqqitsiginera uagut allanut asanninnerput misissoraangatsigu paasisin­naasarparput Guutimut qanoq asannitsiginerluta. Paasigutsigu uppeqatitsinnut asannin­nikillisimasugut tamanna Guutimut asannin­nikillisimanitsinnut ersiutaasinnaavoq. Uppeqatitsinnulli asanninnerput ersersikulasarutsigu nalussan­ngilarput Guutimut asannil­luartuulluta.

6. Uppeqatitsinnut asannin­nikillisimagutta sooq isumakuluutigis­savarput? (Johannesimit 1. 4:7-9, 11)

⁶ Uppeqatitsinnut asannin­nikillisimagutta anersaakkut sanngiil­lisimanitsinnut ersiutaassaaq. Apustilip Johannesip tamanna erseqqissarpaa ima allakkami: “[Qatanngutiminik] takusimasaminik asannin­ngitsup Guuti takusiman­ngisani asasinnaanngilaa.” (Joh 1. 4:20) Suna pivaa? Aatsaat ‘asaqatigiikkutta’ Jehovap iluaris­savaatigut. – Johannesimit 1. 4:7-9, 11 atuakkit.

ASAQATIGIINNERPUT QANOQ ERSERSIS­SINNAAVARPUT?

7-8. Asaqatigiinnerput ilaatigut qanoq ersersis­sinnaavarput?

⁷ Biibilimi ‘asaqatigiin­nissarput’ peqqussutigineqaqat­taarpoq. (Joh 15:12, 17; Rom 13:8; Tes 1. 4:9; Pet 1. 1:22; Joh 1. 4:11) Asanninnerli misigis­susiuvoq, inuillu misigis­sutsigut ilutsin­niittut takusin­naanngilaat. Taamaattumik asaqatigiinnerput qanoq ersersis­sinnaavarput? Oqaatsitsigut iliuutsitsigullu.

⁸ Uppeqatitsinnut asanninnerput assigiin­ngitsorpas­suartigut ersersis­sinnaavarput. Soorlu ima kajumis­saarneqarpugut: “Immissinnut ilumoortumik oqaluffigisaritsi!” (Zak 8:16) ‘Eqqisseqatigiigitsi.’ (Mak 9:50) “Siulliullusi ataqqin­nittulior­taritsi.” (Rom 12:10) “Immissinnut akuerigitsi.” (Rom 15:7) “Isumakkeerfigeqatigiit­tuaritsi.” (Kol 3:13) “Nammaqatigiit­tuaritsi.” (Gal 6:2) “Tuppallersaqatigiit­tuaritsi.” (Tes 1. 4:18) “Ineriar­torteqatigiit­tuaritsi.” (Tes 1. 5:11) “Immissinnut qinnuttaritsi.” – Jaak 5:16.

9. Sooq tuppallersaaneq asanninnermut ersiutaava pingaarutilik? (Aamma asseq takuuk).

⁹ Tuppallersaqatigiit­tuarnissamik Paulusip kajumis­saarutaa sammineroriartigu. Sooq tuppallersaaneq asanninnermut ersiutaava pingaarutilik? Paulusip tuppallersaaq­qusinera Biibilimik qinerlerfissiaq naapertorlugu isumaqarpoq inummik erloqis­sutilimmik qiimmassaaneq. Tassa uppeqaterput erloqis­sutilik tuppallersaraangatsigu Jehovamut kiffartor­tuarnissaanut ikiortarparput. Aamma tuppallersaanikkut asanninnerput ersersit­tarparput. – Kor 2. 7:6, 7, 13.

10. Misigin­neqataaneq tuppallersaanerlu imminnut qanoq attuumas­suteqarpat?

¹⁰ Misigin­neqataaneq tuppallersaanerlu imminnut attuumas­suteqarput. Qanoq? Misigin­neqataasup erloqisoq tuppallersarusullugulu ikiorusuttarpaa. Tassa allat misigin­neqatigigutsigit tuppallersarusus­savagut. Paulusip nassuiarpaa Jehovap inuit misigin­neqatigigamigit tuppallersarusuttarai. Paulusip Jehova ‘Ataatatut qamannga pisumik nallittuisutut Guutitullu sutigut tamatigut tuppallersaasutut’ allaatigaa. (Kor 2. 1:3) Paulusip uani ‘qamannga pisumik nallittuineq’ allaatigigamiuk allanik misigin­neqataaneq pivaa. Tassa Guutip inunnik misigin­neqataanera angingaarmat ‘Ataatamik qamannga pisumik nallittuisumik’ taaneqarpoq. Taamatullu misigin­neqataasarami “misilin­neqarnitsinni tamani” tuppallersarusut­tarpaatigut. (Kor 2. 1:4) Soorlu kuunnguamit imerluni inuummaris­sinartoq, erloqilluni Jehovamit tuppallersar­neqarneq nakussatsinnarpoq. Jehova ilaarlugu inoqatitsinnik qanoq misigin­neqataallutalu tuppallersaasin­naavugut? Ilaatigut taamaaliorsin­naavugut tuppallersaanermut tunngasunik pissuserineqar­tussanik ineriar­tortitsinikkut. Pissuserineqartussat taakkua ilaat suuppat?

11. Asaqatigiit­tuarnis­satsinnut tuppallersaqatigiit­tuarnis­satsinnullu pissuserineqartussat suut iluaqutigis­savagut? (Kolossimiut 3:12; Petrusimit 1. 3:8)

¹¹ Ullut tamaasa asaqatigiit­tuarnis­satsinnut tuppallersaqatigiit­tuarnis­satsinnullu suna iluaqutigis­savarput? Paaseqatigiit­tarnermik, qatanngutigiittut asaqatigiinnermik ajunngis­susermillu ineriar­tortitsineq. (Kolossimiut 3:12; Petrusimit 1. 3:8 atuakkit). Pissuserineqartussat taakku qanoq iluaqutigis­savagut? Uppeqatigut misigin­neqatigigutsigit ilumoorlutalu asagutsigit erloqigaangata tuppallersarusungaas­savagut. Jiisusi ima oqarpoq: ‘Inuup eqqarsaatigiuakkani oqaatigisarpai. Inuk ajunngitsoq ajunngitsunik eqqarsaateqartarami ajunngitsunik eqqartuisarpoq’. (Mat 12:34, 35) Tassa imaappoq: Uppeqatitsinnik tuppallersaanikkut asaqatigiinnerput ersersis­sinnaavarput.

QANOQ ASAQATIGIIT­TUARSIN­NAAVUGUT?

12. (a) Sooq mianersor­tariaqarpugut? (b) Maanna apeqqut suna sammissavarput?

¹² Tamatta ‘asaqatigiit­tuarusuppugut’. (Joh 1. 4:7) Mianersor­tariaqarpugulli, Jiisusimi oqarpoq ‘amerlanerit asanninnerat nillertik­kiartussasoq’. (Mat 24:12) Jiisusi oqanngilaq ilinniartitami amerlanersaat asaqatigiik­kunnaassasut. Taamaak­kaluartoq Jehovamut kiffartor­tuunngitsunit sunnerneqarumanata mianersor­tariaqarpugut. Tamanna eqqarsaatigalugu apeqqut pingaarutilik una sammeriartigu: Uppeqatitsinnik asannin­nikillisimanerluta qanoq paasisin­naavarput?

13. Asannin­nikillisimanerluta qanoq paasisin­naavarput?

¹³ Pisuni aalajangersimasuni qanoq qisuariar­nerluta eqqarsaatigigutsigu paasisin­naavarput qanoq asannitsiginerluta. (Kor 2. 8:8) Petrusip arlaannik pisoqas­sagaluarpat ima siunnersorpaatigut: “Pingaarnertut, asanninnerup ajortuliarpassuit matoortarmagit qamannga pisumik asaqatigiigitsi.” (Pet 1. 4:8) Tassa uppeqatigut kukkugaangata ajuallan­nartumil­luunniit iliuuseqaraangata qisuariar­nitsinnit paasisin­naavarput asannin­nikillisimanerluta.

14. Petrusimit allakkat siulliit 4:8 naapertorlugu asanninnerput qanoq ittuusariaqarpa? Assersuuteqarit.

¹⁴ Petrusip oqaasii misissulaariartigit. Versimi tassani asanninnitta qanoq ittuusariaqarnera allaatigineqarpoq. Tassa “qamannga pisumik” asaqatigiinneq. Oqaatsit “qamannga pisumik” nutsiin­navillugit ima isumaqarput: “Tasitsaarlugu annertusisinnaasoq.” Versimi aamma asanninnerup taamaattup qanoq sunniuteqar­tarnera allaatigineqarpoq, uppeqatitta ‘ajortuliaat matoortarpai’. Una assersuutigisin­naavarput: Asanninnerput tigullugulusooq annoraaminertut tasitsaarlugu ajortuliarpas­suarnut matoorutigisin­naavarput. Matoorineq uani isumaqarpoq isumakkeerfiginninneq. Soorlu simerneq annoraaminermit asserneqarsinnaasoq, taamatuttaaq allat sanngiissutaat naammal­luinnan­ngissutaallu asanninnermit matoorneqarsin­naapput.

15. Uppeqatitsinnik asannin­nikillisiman­ngikkutta susinnaassaagut? (Kolossimiut 3:13)

¹⁵ Ima asaqatigiitsigisariaqarpugut uppeqatitta naammal­luinnan­ngissutaannik isumakkeerfigin­nissinnaalluta, ajornakusoor­tissinnaagaluarutsiguluunniit. (Kolossimiut 3:13 atuaruk). Allat isumakkeerfigigaangatsigit asannin­nikillisiman­nginnerput ersersit­tarparput Jehovalu nuannaar­tittarlugu. Allat kukkussutaannik isumakkeerfigin­ninnissatsinnut iliuusiinillu nuanniigisatsinnik isiginnin­ngitsuusaar­nissatsinnut aamma suna iluaqutigis­savarput?

16-17. Allat kukkussutaasa isiginngitsuusaar­nissaannut aamma suna iluaqutigis­savarput? Assersuuteqarit. (Aamma asseq takuuk).

¹⁶ Uppeqativit ajunngitsortaat maluginiar­nerusakkit, ajortortaat pinnagit. Assersuuteqariarta. Takorlooruk arlaliullusi katerisimaartusi. Nuannisaqatigiippusi angerlan­nginnis­sinnilu imminut ilanngullutit katerisimaaqatigisatit assilivatit. Assit ilaat kusanan­ngeqinammata pingasoriarlutit assiliivutit. Assimili ataatsimi assiliteqataasoq ataaseq qungujulanani annuppoq. Asseq sussaviuk? Piissavat, assimmi sinnerini tamarmik qungujulapput.

¹⁷ Assit kusagisagut taakku eqqaamasar­takkatsinnut assersuus­sinnaavagut. Uppeqatigut nuannersorpas­suarnik eqqaamasaqarfigisarpagut. Imaassin­naavorli ilaanni uppeqativit ilaat inussiar­niitsumik oqaaseqartoq iliuuseqar­torluunniit. Taava sussavit? Soormi puiorniaan­narukku, soorlu assit piikkatit puiorniaan­nartaritit? (Uss 19:11; Ef 4:32) Uppeqaterput inussiar­niitsuliortoq nuannersorpas­suarnik eqqaamasaqarfigigatsigu nuanniitsuliornera tamanna puiuinnarsin­naavarput. Nuannersummi eqqaamarusun­neruagut.

SOOQ NALITSINNI ASAQATIGIINNEQ PINGAARUTEQARTOQ

18. Allaaserisami matumani asanninneq pillugu suut sammivagut?

¹⁸ Sooq asaqatigiit­tuassaagut? Sammeriik­katsitut uppeqatitsinnut asanninnerput ersersik­kaangatsigu aamma Jehovamut asanninnerput ersersit­tarparput. Qanoq immitsinnut asannit­tuliorfigisin­naavugut? Ilaatigut tuppallersaanikkut. Misigin­neqatigin­nikkutta ‘tuppallersaqatigiit­tuarsin­naassaagut’. Qanoq asaqatigiit­tuarsin­naavugut? Uppeqatitta kukkussutaannik sapinngisatsinnik isumakkeerfigin­ninniar­tarnikkut.

19. Sooq asaqatigiinneq nalitsinni pingaaruteqarpa?

¹⁹ Sooq nalitsinni asaqatigiinneq pingaaruteqarpa? Petrusip ima nassuiarpaa: “[Suut] tamarmik naggatissaat qanillivoq. Taamaattumik ... qamannga pisumik asaqatigiigitsi.” (Pet 1. 4:7, 8) Naggatissap qanilliar­tornerani suna ilimagis­savarput? Jiisusi malinnitsiminut ima oqarpoq: “[Atera] pissutigalugu inuiaqatigiinnit tamanit uumissor­neqarumaarpusi.” (Mat 24:9) Taamatut uumissor­neqarnermi pinertusaas­sagutta ataasioqatigiit­tuartariaqarpugut. Taamaaliorutta Saatanip avissaar­tuutsis­sinnaas­sanngilaatigut – ‘asanninnermi ataasioqatigiil­luinnalersitsisarmat’. – Kol 3:14; Flp 2:1, 2.