Jiisusip qilalian­nginnermini ulluni 40-ni iliuusii qanoq ilinniarfigaagut?

1-2. Jiisusip ilinniar­titaasa marluk Emmausiliar­neranni qanoq pisoqarpa?

UKIUMI 33-mi nisanip 16-ianni Jiisusip ilinniartitai aliasungaarlutillu annilaanganermik soriarsin­naanngillat. Taakkua ilaat marluk Jerusalemmimiit nunaqarfimmut 11 kilometerit missaannisut ungasitsigisumut Emmausiliarput. Jiisusi malissimasartik toqutaaq­qammermat nikallungangaarput. Neriuutigisimagaluarpaat Missiarsi juutinut nuanningaartunik iliuuseqassasoq. Maannali piviusun­ngorsin­naajunnaarpasippoq. Ilimagin­ngisaannilli pisoqarpoq.

² Aqqutaani takornartamit ingerlaqatigineqalerput. Ilinniartitat takornartaq oqaluttuuppaat Jiisusi ajortumik qanoq pineqarsimasoq. Takornartallu puiugas­sarinngisaannik oqaluttuutilerpai. “Moorsisimit pruffiitinillu allakkat tamaasa aallarniutigalugit” sooq Missiarsi naalliut­tariaqarlunilu toqusariaqartoq nassuiaappai. Emmausimut tikikkamik takornartap kinaanini qulaarpaa – tassaagamimi Jiisusi makititaasimasoq. Missiarsi uumasoq paasigamikku nuannaangaarsimassapput. – Luk 24:13-35.

3-4. Jiisusip ilinniartitai qanoq misigisaqarpat, allaaserisamilu matumani suna sammissavarput? (Apustilit Suliaat 1:3)

³ Jiisusi qilalian­nginnermini ilinniar­titaminut arlaleriarluni saqqummertarpoq.a (Apustilit Suliaat 1:3 atuaruk). Ilinniartitat aliasuttut annilaangasullu Jiisusimit qiimmas­sarneqaramik nuannaangaalerput sapiissuseqarlutillu Kunngeqarfik pillugu nutaarsiassat nuannersut oqaluus­sissutigalugillu ilinniar­titsissutigaat.

⁴ Qilalian­nginnermini Jiisusip iliuusiisa misissornerat iluaqutigisin­naavarput. Allaaserisami matumani paasissavarput tamatuma nalaani Jiisusip (1) ilinniartitani qanoq qiimmas­sartarai, (2) Allakkanik Illernartunik paasinnin­neruler­nissaannik qanoq ikiortarai aamma (3) akisussaaf­feqaler­nissaannut qanoq ilinniar­tittarai. Taakkua pingasut sammineranni paasissavarput Jiisusi qanoq ilaarsin­naaneripput.

UPPEQATITIT QIIMMAS­SARTAKKIT

 5. Sooq Jiisusip ilinniartitai qiimmas­sarneqar­tariaqarpat?

⁵ Jiisusip ilinniartitai qiimmas­sarneqar­tariaqarput. Sooq? Taakkua ilaasa Jiisusi piffissaq tamaat malikkumallugu angerlarsimaffitsik, ilaquttatik suliffitsillu qimassimavaat. (Mat 19:27) Allat Jiisusi malikkamikku juuteqatiminnit ajattor­neqarput. (Joh 9:22) Kisianni upperigamikku Jiisusi tassaasoq Missiarsi neriorsuutigisaq kajumillutik taamatut pilliuteqartarput. (Mat 16:16) Jiisusili toqutaammat aliasungaarput nikallungangaarlutillu neriuutimik piviusun­ngornissaa ilimanarun­naarmat.

 6. Jiisusi makititaagami sua?

⁶ Qularnan­ngitsumik Jiisusip nalunngilaa ilinniartitami aliasunnerat annaasaqarnermut ersiutaasoq anersaakkut sanngiil­linermut ersiutaanani. Taamaattumik ullormit makititaaf­fimminiilli ikinngutini qiimmas­sartarpai. Assersuutigalugu Mariia Mattaliit ilineqarfimmi silataani qiasoq saqqummerfigaa. (Joh 20:11, 16) Aamma eqqaariik­katsitut ilinniar­titaminut marlunnut Emmausiliartunut saqqummerpoq. Aamma apustilimut Petrusimut saqqummerpoq. (Luk 24:34) Jiisusi qanoq ilinniarfigisin­naavarput? Misissoriartigu saqqummeq­qaarmat qanoq pisoqartoq.

 7. Jiisusip Mariia Mattaliit susoq takuaa, aamma suaa? (Johannesi 20:11-16) (Aamma asseq takuuk).

⁷ Johannesi 20:11-16 atuakkit. Nisanip 16-ianni ullaaralaakkut arnat upperluartut arlallit Jiisusip ilineqarfianukarput. (Luk 24:1, 10) Taakkua Mariia Mattaliit ilagaat. Mariia ilivermut tikiukkami paasivaa Jiisusip timaa peqanngitsoq. Arpalluni Petrusi Johannesilu tamanna pillugu paasitik­kiartorpai. Taakkulu ilivermukarmata malippai. Angutit uppernarsigamikku ilivermiit­toqanngitsoq angerlamut uterput, Mariiali qialluni tassaniiginnarpoq. Naluaali Jiisusip isigigaani. Jiisusip arnaq upperluartoq qiasoq takugamiuk tuppallersarusulerpaa, taamaattumik saqqummerfigaa qiimmas­saatigingaagaanillu iliuuseqarluni. Oqaluuppaa pingaarutilimmillu iliuuseqaq­qullugu, tassa peqquaa makititaanini pillugu qatanngutit oqaluttuuk­kiartussagai. – Joh 20:17, 18.

 8. Jiisusi qanoq ilaarsin­naavarput?

⁸ Jiisusi qanoq ilaarsin­naavarput? Uppeqatigut Jehovamut kiffartor­tuarnis­saannut kajumis­saarsin­naavagut Jiisusi ilaarlugu ajornar­torsiornersut maluginiar­tarutsigu misigin­neqataallutalu oqaloqatigisarutsigit. Qatanngutip arnap Jocelynimik atillip nukaa alianaqisumik ajutoornermi toquvoq. Ima oqarpoq: “Qaammaterpassuarni aliasuin­naavippunga.” Aappariilli qaaqquaat, misigin­neqataallutik tusarnaarpaat Guutillu isaani naleqangaar­neranik eqqaaseq­qillugu. Jocelyn ima oqarpoq: “Misigivunga soorlu anorersuarmi imaani ipilerlunga. Jehovalli aappariit taakku atorlugit annaappaanga. Taakku ikiortigalugit Jehovamut kiffartorusus­suseqaleq­qippunga.” Uaguttaaq uppeqatigut qiimmas­sarsinnaavagut uummammiuminnik aniatitsigaangata tusarnaaq­qissaarnikkut misigin­neqataallutalu oqaloqatigisar­nerisigut. Taamaaliornikkut tuppallersarsin­naavagut Jehovamullu kiffartor­tuarnis­saannut ikiorlugit. – Rom 12:15.

BIIBILIMI ALLASSIMASUT PAASINIS­SAANNUT ALLAT IKIUKKIT

 9. Jiisusip ilinniar­titaasa suna paasisin­naanngilaat, Jiisusimillu qanoq ikiorneqarpat?

⁹ Jiisusip ilinniar­titaasa Guutip oqaasia upperaat sapinngisaminnillu inuunerminni maleruar­niartarlugu. (Joh 17:6) Taamaattorli sooq Jiisusi pinerluttutut anniartitaalluni toqutaasoq paasisin­naanngilaat. Jiisusip nalunngilaa ilinniartitani uppersuseqartut Jehovamullu asannittut, aammali paasivaa Allakkat Illernartut paasilluar­nerusariaqaraat. (Luk 9:44, 45; Joh 20:9) Taamaattumik tassani allassimasut paasinis­saannut ikiorpai. Ilinniartitat marluk Emmausiliartut saqqummerfigigamigit qanoq taamaaliornersoq sammeriartigu.

10. Jiisusip Missiarsiunermi paasinissaanut ilinniartitani qanoq ikiorpai? (Lukkarsi 24:18-27)

¹⁰ Lukkarsi 24:18-27 atuakkit. Maluginiaruk Jiisusip ingerlaannaq kinaanini oqaluttuarinagu apeqquteqartoq. Sooq? Imaassinnaavoq eqqarsaatitik oqaluttuarissagaat kissaatigigaa. Taamaaliorpullu. Oqaluttuarput naatsorsuutigigaluarlugu Jiisusip Israali Romamiunit naqisimaneqar­neranit aniguisissagaa. Eqqarsaatitik misigis­sutsitillu oqaluttuarereermatigit Jiisusip Allakkat Illernartut atorlugit siulittuuterpassuit eqquunnerisa paasinis­saannut ikiorpai.b Ullormi tamatumani kingusin­nerusukkut Jiisusip ilinniartitat allat naapippai siulittuutillu aamma taakkununnga nassuiarlugit. (Luk 24:33-48) Pisimasut taakku qanoq ilinniarfigisin­naavagut?

11-12. (a) Jiisusip ilumoortut Biibilimeersut pillugit ilinniar­titseriaasianit suna ilikkarsin­naavarput? (Aamma assit takukkit). (b) Nortey Biibilimik ilinniar­titsisuminit qanoq ikiorneqarpa?

¹¹ Jiisusi qanoq ilaarsin­naavarput? Biibilimik ilinniar­titsigaangatta ilinniar­titarput eqqarsaatiminik uummammiuminillu aniatitserusulersillugu aperisassaagut. (Uss 20:5) Ilinniar­titavit misigissusii paasereerlugit pissutsinut atugaanut tulluartumik allassimaffimmik qanoq nassaarsinnaasoq takutiguk. Qanoq iliussanersoq oqarfiginagu allassimaffiit pillugit eqqarsaatis­siisarit. Biibilimi atuakkani qanoq atorsin­naanerai eqqarsaatigeq­qullugu kajumissaaruk. Qatanngutip angutip Norteyimik atillip Ghanami najugallip taamatut ikiorneqartup misigisaa sammeriartigu.

¹² Nortey 16-inik ukioqarluni Biibilimik misissuisalerpoq. Ingerlaan­nangajallu ilaquttaminit akerlilersor­neqalerpoq. Biibilip misissor­tuarnissaanut suna iluaqutigaa? Biibilimik ilinniar­titsisunilu kristumiut ilumoortut malersor­neqassasut Matiusi kapitali 10-mi allassimasoq eqqartoreersimavaat. Taamaattumik Nortey ima oqarpoq: “Malersor­neqalerama qulariun­naarpara ilumoortoq nassaarisimallugu.” Ilinniar­titsisuata aamma Matiusi 10:16 takutippaa, tassanilu allassimavoq mianersor­tassasugut. Taava eqqartorpaat versi tamanna iluaqutigalugu Norteyip ataqqin­nilluni ilaquttaminut qanoq upperisani nassuiarsin­naanerai. Nortey imermut morsutsitaareerami pionerin­ngorusuppoq. Ataataatali kissaatigaa universitetimut ilinniariar­tussasoq. Norteyip ilinniar­titsisuata oqarfiginngilaa qanoq iliussasoq, Biibilimili allassimaffiit eqqarsaatigeq­qissaar­nissaannut aalajangiil­luarnis­saanullu ikiorniarlugu apeqquteqartarpoq. Qanoq kinguneqarpa? Nortey aalajangerpoq pionerin­ngorniarluni. Ataataatalu allamut nooqquaa. Pisimasut taakku pillugit Nortey qanoq misigiva? Ima oqarpoq: “Qularin­ngilara eqqortumik aalajangiillunga.” Uagut Biibilimi allassimasut eqqarsaatigeq­qissaar­nissaannut allat kajumis­saartarutsigit uppernikkut nakussatsis­savagut Jehovallu kiffartorfigiuar­nissaanut ikiorlugit. – Ef 3:16-19.

ANGUTIT ‘INUTTUT TUNISSUTITUT’ KIFFARTORSIN­NAAQQULLUGIT ILINNIARTIKKIT

13. Jiisusi nunarsuarmi oqaluus­sisartoqar­tuaqqullugu sua? (Efesossimiut 4:8)

¹³ Jiisusi nunarsuarmiik­kallarami Jehovap suliassiis­sutaanik naammas­sinnilluinnarpoq. (Joh 17:4) Jiisusili eqqarsanngilaq nammineq kisimi suliamik tamatuminnga naammas­sinnissin­naasutuaalluni. Ukiuni pingasuni affarmilu nunarsuarmiin­nermini allat oqaluus­sinermi ilinniartippai. Jiisusip qilalian­nginnermini ilinniartitani – taakkua ilaat 30-t inorlugit ukioqarunartut – Jehovap savaataanik asasaanik paarsinissamik aamma oqaluus­sinermi ilinniar­titsinermilu siulersuinissamik akisussaaf­filerpai. (Efesossimiut 4:8 atuaruk). Angutit taakkua Jiisusi suleqatigil­luarsimavaat ilumoorfigalugulu. Jiisusilli qilalian­nginnermini qanoq pikkorissarpai tassaaleq­qullugit ‘inuit tunissutaasut’?

14. Jiisusi qilalian­nginnermini ulluni 40-ni ilinniartitani qanoq ilinniartippai? (Aamma asseq takuuk).

¹⁴ Jiisusip ilinniartitani toqqaan­nartumik asannit­tumillu siunnersortarpai. Assersuutigalugu ilinniartitami ilaasa qulaqqajaasarnerat maluginiaramiuk siulersorpai. (Luk 24:25-27; Joh 20:27) Aamma paasitippai Jehovap innuttaanik isumassuinissaq pingaar­tissagaat aningaasarsiorneq pivallaarnagu. (Joh 21:15) Eqqaasippai Jehovamut kiffartor­nerminni iliuutsitik allat iliuusiinut sanilliut­tassanngikkaat. (Joh 21:20-22) Aamma Kunngeqarfik pillugu eqqunngitsumik isummersimanerat naqqippaa ikiorlugillu nutaarsiassanik nuannersunik oqaluus­sinerup pingaar­tinnissaanut. (ApS 1:6-8) Utoqqaanertat Jiisusi qanoq ilinniarfigisin­naavaat?

15-16. (a) Utoqqaanertat Jiisusi qanoq ilaarsin­naavaat? (b) Patrickip siunnersor­neqarnini qanoq iluaqutigaa?

¹⁵ Utoqqaanertat Jiisusi qanoq ilaarsin­naavaat? Angutit, ilaatigut inuusuttut, akisussaaf­feqarnerulersin­naaqqullugit ilinniar­tillugillu ikiorsin­naavaat.c Utoqqaanertat naatsorsuutigin­ngilaat qatanngutit angutit taakku kukkujuitsuussasut. Inuusuttut misilit­tagaqaleq­qullugit aamma maniguut­tuunissap, tatiginar­tuunissap ikiuiumatuujunissallu pingaaruteqar­nerannik paasinneq­qullugit utoqqaanertat asannittumik siunnersor­tassavaat. – Tim 1. 3:1; Tim 2. 2:2; Pet 1. 5:5.

¹⁶ Qatanngutip angutip Patrickimik atillip siunnersor­neqarnini iluaqutigaa. Inuusun­nerulluni allanut, allaat qatanngutinut arnanut, sakkortuumik oqaloqqajaasarpoq inussiar­neeqqajaasarlunilu. Patrickip sanngiiffia utoqqaanertap maluginiaramiuk inussiar­nersumik, aammali toqqaan­nartumik, siunnersorpaa. Patrick ima oqarpoq: “Taamaaliornera qujamasuutigaara. Qatanngutit angutit allat uanga kissaatigigaluakkattut ilagiinni akisussaaf­feqalersut takugaangakku nikallor­tarpunga. Utoqqaanertalli siunnersuutaa iluaqutigalugu paasivara uppeqatima maniguullunga kiffartuun­nissaat pingaar­tinnerussagiga ilagiinni akisussaaf­feqaler­nissara pinnagu.” Tamatuma kingunerisaanik Patrick 23-nik ukioqarluni utoqqaaner­tanngorpoq. – Uss 27:9.

17. Jiisusip ilinniartitani tatigalugit qanoq ersersippaa?

¹⁷ Jiisusip ilinniartitani oqaluus­sinissamik ilinniar­titsinis­samillu akisussaaf­filerpai. (Takuuk Matiusi 28:20-mut nassuiaatit “ajoqersorlugillu”).d Imaassinnaavoq ilinniartitat taamatut suliassin­neqarnerminnut ajukkuttut. Jiisusilli qularin­ngilluinnarpaa suliaq naammas­sisinnaagaat. Tatigil­luinnarlugit ima oqarfigai: “Ataatap uannik aallartitsineratut aallartippassi.” – Joh 20:21.

18. Utoqqaanertat Jiisusi qanoq ilaarsin­naavaat?

¹⁸ Utoqqaanertat Jiisusi qanoq ilaarsin­naavaat? Utoqqaanertat misilit­tagaqarluartut suliassat ilaat allanut isumagitit­tarpaat. (Flp 2:19-22) Assersuutigalugu utoqqaanertat ataatsimiit­tarfitsinnik eqqiaanermi aserfal­latsaaliuinermilu meeqqat inuusuttullu ikiortigisin­naavaat. Utoqqaanertat qatanngutit angutit suliassereerlugit ilinniar­tissinnaavaat suliaq qanoq naammas­sisinnaaneraat, tatigalugulu eqqortumik suliarissagaat. Utoqqaaner­tanngorlaap Matthewimik atillip qujamasuutigisarpaa utoqqaanertanit misilit­tagaqarluartunit ilagiinni suliassanik ilinniar­tinneqartarami naammas­silluar­nissaannullu tatigineqartarami. Ima oqarpoq: “Kukkussutigisimasakka qanoq ilinniarfigisin­naanerikka aamma qanoq pikkorin­nerulersin­naanersunga paasinnin­nissamut ikiorpaannga.”e

19. Sunissarput aalajangiusimas­savarput?

¹⁹ Jiisusip qilalian­nginnermini ulluni 40-ni allat qiimmas­sarlugillu ilinniar­tittarpai. Ilaarniartigu! (Pet 1. 2:21) Taamaalior­nissatsinnut ikiussavaatigut, imami neriorsuisimavoq: ‘Naggatissap nalaata tungaanut ullut tamaasa najorpassi.’ – Mat 28:20.