Atuartartut apeqqutaat

Guutisiorfiup paarlia Illernartumut isertarfiuvoq. Nutsikkani New World Translation of the Holy Scriptures-ini 2023 sioqqullugu saqqummersin­neqartuni allassimavoq ‘paarleq guutisiorfiup silissusiatulli aalenninik 20-nik takissuseqartoq 120-nillu portussuseqarluni’. (Nal 2. 3:4) Aamma nutsikkani allani allassimavoq paarleq aalenninik 120-nik portussuseqartoq, taamaappallu napasuliaq taanna 53 meterinik portussuseqarsimassaaq!

Kisianni New World Translation-imi 2023-mi naqitikkami allassimavoq ‘aalenninik 20-nik’, tassa 9 meterit missaannik, portussuseqartoq.a Allannguummut tamatumunnga pissutaasut ilaat sammeriartigit.

Kunnginik allakkat siulliit 6:3-mi paarliup portussusaa eqqaaneqanngilaq. Versimi tamatumani allattup Jeremiap paarliup takissusaa silissusaalu eqqaagaluarlugit portussusaa eqqaanngilaa. Kapitalimilu tulliuttumi guutisiorfim­miittut pingaarutillit allat sukumiisumik allaatigai, soorlu eqqiarfik imaq, qamutaasat qulit sukallu kanngussat marluk paarliup silataan­niittut. (Kng 1. 7:15-37) Paarleq ilumut guutisiorfiup sinneranit portunerungaarluni 50 meterit sinnerlugit portutigisimagaluarpat sooq Jeremiap portussusaa eqqaanngilaa? Aammami ukiorpassuit tamatuma kingorna oqaluttuarisaanermik ilisimatuut juutiusut allapput paarleq guutisiorfiup sinneranit portunerun­ngitsoq.

Ilisimatuut isumaqarput paarleq aalenninik 120-nik portutigigaluarpat guutisiorfiup qarmarsui qajannarpal­laassasut. Itsaq portusuut ujaqqanik qarmasis­sianillu sananeqartut, soorlu Egyptenimi guutisiorfinnut isaaffiit, tunngavii silipput qummullu saaliar­tortarlutik. Saalumuulli guutisiorfia allaaneruvoq. Ilisimatuut naatsorsuutigaat qarmarsui annerpaamik aalenninik arfinilinnik, tassa 2,7 meterinik, silissuseqartut. Illuliassanik titartaasarnermik oqaluttuarisaanermik ilisimatooq Theodor Busink isummerpoq guutisiorfiup isaaffiata qarmarsuisa silissusaat eqqarsaatigalugu paarleq aalenninik 120-nik portussuseqarsimasin­naanngitsoq.

Nalunaarsuutit aappaat 3:4-mi allassimasut ilaat immaqa kukkusumik allaqqin­neqarsimapput. Allagatoqqat ilaanni versimi tamatumani “120-nik” allassimasoqaraluartoq allakkani tutsuiginartuni allani, soorlu Codex Alexandrinusimi 400-kkunneersumi aamma Codex Ambrosianusimi 500-kkunneersumi, “aalenninik 20-nik” allassimasoqarpoq. Sooq allaqqiisup kukkulluni “120-t” allassimasinnaavaa? Hebræerisut oqaatsit “hundredit” aamma “aalennit” allassimaneri imminnut eqqaanarmata. Taamaattumik allaqqiisup kukkulluni “aalennit” allannagu “hundredit” allattoorsimasinnaavaa.

Soorunami Saalumuup guutisiorfiata annikitsualuttortai pillugit eqqoqqis­saartumik paasisaqarusuppugut. Guutisiorfilli taanna guutisiorfimmut anersaakkut ittumut pingaaruteqar­nerusumut siumut assersuutaannaavoq. Qujamasuutigeqaarput Jehovap kiffani tamaasa guutisiorfimmi anersaakkut ittumi guutisior­nissaannut qaaqqummagit! – Hebr 9:11-14; Saqq 3:12; 7:9-17.