Nalornis­suteqarnerit iliuuseqarfigisinnaavat

1-2. (a) Jehovap kiffai sunik nalornis­suteqarsin­naappat? (b) Allaaserisami matumani suut misissus­savagut?

TAMATTA ilaannikkut nalornis­suteqar­tarpugut.a Assersuutigalugu oqaluus­sisartoq inuusuttoq eqqarsarsinnaavoq Jehovamit ilumut soqutigineqar­nerluni. Immaqa nalornivoq imermut morsutsitaarusun­nerluni. Aamma imaassinnaavoq qatanngut angut utoqqasaaq inuusuk­kallarami aningaasarsiorluar­nissani pinnagu Jehovamut kiffartornermik salliutitsiniarluni aalajangersimasoq. Maannali naammat­tusaarisalerami eqqortumik aalajangersimanerluni nalornilerpoq. Aamma takorlooriaruk qatanngut arnaq utoqqaq siornatigutulli nukissaqar­tiginnginnami nikallungasoq. Illit imminut ima aperinikuuit: “Jehovap ilumut soqutigaanga?” “Jehova pillugu pilliuteqarsimanera imminut akilersinnaava?” “Jehovap suli atorsin­naavaanga?”

² Eqqarsaatit taakku iliuuseqarfigin­ngikkutsigit Jehovamut upperun­naarsin­naavugut. Allaaserisami matumani misissus­savarput makku nalornis­sutigigutsigit Biibili qanoq iluaqutigisin­naagipput: (1) Jehovap soqutigineraatigut, (2) siornatigut aalajangius­simasagut eqqortuunersut imaluunniit (3) Jehovamit suli atorneqarsin­naanersugut.

NALORNINERIT ILIUUSEQARFIGISINNAAVAT

3. Nalornis­sutigut ilaatigut qanoq iliuuseqarfigisin­naavagut?

³ Nalornis­suteqar­tilluta Guutip oqaasianut akissutis­sarsior­nissarput pingaaruteqarpoq. Taamaaliorutta nakussatsin­neqassaagut, anersaakkut ineriar­tussaagut uppernikkullu aalajaal­luarnerusin­naassalluta. – Kor 1. 16:13.

4. Qanoq ililluta ‘sunut tamanut tunngatillugu eqqortoq paasiniarsin­naavarput’? (Tessaluunikamiunut 1. 5:21)

⁴ Tessaluunikamiunut 1. 5:21 atuaruk. Maluginiaruk allassimammat ‘sunut tamanut tunngatillugu eqqortoq paasiniar­tassagipput’. Qanoq taamaaliorsin­naavugut? Biibilimi allassimasut nalornis­sutigisatsinnut tunngasut misissor­tariaqarpagut. Oqaluus­sisartoq inuusuttoq Guutimit soqutigineqar­nerluni nalornisoq eqqarsaatigeriaruk. Nalornerusaagin­nassava? Naamik, ‘sunut tamanut tunngatillugu eqqortoq paasiniar­tariaqarpaa’ Jehovap qanoq isigineraani Biibilimi misissoq­qissaarlugu.

5. Misissuinitsinni Jehova qanoq “tusarnaarsin­naavarput”?

⁵ Biibili atuaraangatsigu Jehovap uagutsinnut oqaatiginiagai tusarnaar­tarpagullusooq. Nalornis­sutigisarpulli Jehovap qanoq isumaqarfigineraa paasissagutsigu Biibili atuaannarnagu iliuuseqar­nerusariaqarpugut. Allassimaffinnik eqqarsaatigisatsinnut tunngasunik ujaasillutalu misissueq­qissaar­tariaqarpugut. Biibililersaarutaatigut ujarliutillu atorluarsin­naavagut. (Uss 2:3-6) Misissuinitsinni Jehovamut siulersoq­qusinnaavugut eqqarsar­taasianillu paasinnin­nissamut ikioqqulluta. Taava najoqqutassianik Biibilimeersunik siunnersuutitsialannillu iluaqutigisin­naasatsinnik ujarlersin­naavugut. Aamma Biibilip nalaani uagutsitut misigisimasut pillugit atuarnerput iluaqutigisin­naavarput.

6. Nalornis­suteqar­tilluta ataatsimiinnerit qanoq iluaqutigisarpagut?

⁶ Aamma ataatsimiinnerit aqqutigalugit Jehovap oqaluut­tarpaatigullusooq. Ataatsimiigiar­tuartarnerput iluaqutigingaar­tarparput pisariaqar­titarpiatsinnut tunngasumik oqalugiaateqar­toqarsin­naammat akissuteqar­toqarsin­naalluniluunniit. (Uss 27:17) Nalornis­sutigisin­naasatta ilaat qanoq iliuuseqarfigisin­naanerigut maanna sammeriartigu.

JEHOVAP SOQUTIGAANGA?

7. Ilaasa suna eqqarsaatigisarpaat?

⁷ Eqqarsaatiginikuuiuk Jehovap ilumut maluginiar­tarneraatit? Misigiguit pingaaruteqarpal­laarnak qilammik nunamillu Pinngor­titsisumut ikinngutaalernissat piviusorsiun­ngitsutut immaqa isigilersinnaavat. Kunngi Daavi taamatut eqqarsarsimasinnaavoq. Taanna tupigusuppoq Jehovap inuit maluginiar­tarmagit, imalu aperaa: “Inuk suummat ilassiumaviuk, inuup qitornaa suummat pingaar­tuutippiuk?” (Tuss 144:3) Illit Jehovap ilumut soqutigineraatit eqqarsaatigisarukku sumik misissuisinnaavit?

8. Jehovap inunni suna maluginiartarpaa? (Samuelimik 1. 16:6, 7, 10-12)

⁸ Biibilimi paasivarput Jehovap inuit inunnut allanut pingaaruteqan­ngippasissut maluginiartarai. Assersuutigalugu Jehovap Saamuali Iisaajimukaqquaa taassuma ernerisa arfineq-pingasuusut ilaat ataaseq Israalimi kunngissatut taninneqar­niassammat. Iisaajip ernini tamaasa Saamualimik naapigiaaqquai, Daavili nukarlersaasoq ilaatinngilaa.b Jehovalli toqqagaa tassaavoq Daavi. (Samuelimik 1. 16:6, 7, 10-12 atuakkit). Daavip inuttut qanorpiaq ittuunera Jehovap takusinnaavaa. Nalunngilaa anersaakkut ittunik pingaar­titsisuusoq.

9. Sooq upperil­luinnarsin­naaviuk Jehovap soqutigigaatit? (Aamma asseq takuuk).

⁹ Eqqarsaatigiuk Jehovap ilinnik maluginiaasar­neranut takussutis­sarpassuaqareersoq. Illit pisariaqar­titannut naleqqul­luinnartunik siunnersor­tarpaatit. (Tuss 32:8) Ilisarisimal­luaramisit taamaaliorsinnaavoq. (Tuss 139:1) Jehovap siunnersuutai malillugit iliortaruit tamatumalu iluaqutaanera misigigukku qulariun­naassavat soqutigigaatit. (Nal 1. 28:9; ApS 17:26, 27) Jehovap tamaviaarnerit maluginiartarpaa. Pissusitit nuannersut maluginiartarpai ilinnullu ikinngutaajumalluni iliuuseqar­tarluni. (Jer 17:10) Nuannaarutigingaassavaa illittaaq ikinngutigerusukkukku. – Joh 1. 4:19.

SILATUSAARTUMIK AALAJANGIISARSIMAVUNGA?

10. Siornatigut aalajangersimasatsinnut tunngatillugu suut eqqarsaatigilersin­naavagut?

¹⁰ Ilaannikkut ilagut kingumut qiviarlutik eqqarsalersin­naapput eqqortumik aalajangiisarsimanerlutik. Immaqa aalajangersimapput Jehovamut kiffartornermi iliuuseqar­nerujumallutik atorfimminni qaffakkiar­torniarnatik suliffiuteqar­niarnatil­luunniit. Maannalu ukiorpassuit qaangius­simalerput. Immaqa ilisarisimasaasa ilaat akissarsiagis­saarfiusumi suliuarsimapput maannalu aningaasatigut isumakuluutis­saqarpasinnatik. Taamaattumik ima eqqarsalersin­naapput: ‘Eqqortumik aalajangiisimavunga? Imaluunniit aningaasarsiorluar­nissamut periarfissanik atorluaan­ngitsoorpunga?’

11. Tussiaat 73-imik allattoq sooq nikallungava?

¹¹ Illittaaq tamakku eqqarsaatigisarukkit Tussiaat 73-imik allattoq ilinniarfigisinnaavat. Taassuma inuit peqqillutillu pigissaarlutillu isumakuluuteqarpasin­ngitsut qimerloorpai. (Tuss 73:3-5, 12) Ingerlal­luarpasimmata misigilerpoq Jehovamut kiffartor­nermini tamaviaarnini asuliinnaasoq. “Ulloq tamaat” tamanna nikallungas­sutigisarpaa. (Tuss 73:13, 14) Nikallungajun­naarumalluni qanoq iliorpa?

12. Tussiaat 73:16-18 naapertorlugit tussiaasiortoq nikallungajun­naarumalluni qanoq iliorpa?

¹² Tussiaat 73:16-18 atuakkit. Tussiaasiortoq Jehovap illernar­tuutaanukarpoq, tassanilu eqqissilluni eqqarsarsinnaavoq. Eqqarsaatigil­luareerlugu paasilerpaa inuit ilaat ilorrisimaarlutik inuugaluarlutik siunissamut neriuutis­saqanngitsut. Tamanna qamuuna eqqissis­sutigaa nalunnginnamiuk inuunermi Jehovamik salliutitsiniarluni aalajangerneq pitsaanerpaasoq. Tamatuma kinguneranik Jehovamut kiffartor­tuarnissani aalajangiusimanerulerpaa. – Tuss 73:23-28.

13. Aalajangiil­luarsimanerlutit nalorniguit qanoq ilillutit qamuuna eqqissisinnaavit? (Aamma asseq takuuk).

¹³ Tussiaasiortup pisimaneratut illittaaq eqqarsaatit nikallornartut iliuuseqarfigisin­naavatit. Qanoq? Eqqaamajuk nuannaarutis­saqartutit, ilaatigut Jehovamit iluarisaasutit. Aamma eqqaamajuk Jehovamut kiffartun­ngitsut taassumannga ikiorneqariaan­naanngitsut. Taakku massakkut ilorrisimaarlutik inuunis­saminnik pingaar­nerpaatitsipput allamik neriuutis­saqannginnamik. Jehovalli illit takorloorsin­naasatit akimorlugit nuannersorpas­suarnik tuniumaarlutit neriorsorpaatit. (Tuss 145:16) Aamma manna eqqarsaatigiuk: Allatut aalajangersimasuuguit inuunerit ullumikkut qanoq issimas­sagaluarnersoq qulakkeerlugu ilisimasin­naanngilat. Mannali qularnanngilaq: Guutimik inoqatitsinnillu asanninnerput tunngavigalugu aalajangiisarutta ilumoortumik nuannaarnartut inuunitsin­niittuaan­nassapput.

JEHOVAMIT SULI ATORNEQARSIN­NAAVUNGA?

14. Ilagut qanoq atugaqarpat, immaqalu suna eqqarsaatigisarpaat?

¹⁴ Jehovap kiffaasa ilaat utoqqaliar­toramik, peqqiil­lioramik innarluuteqaramil­luunniit kissaatigisamittut iliuuseqar­tigisin­naanngillat. Taamaat­tumillu misigilersin­naapput Jehovap isaani pingaaruteqarpal­laarnatik. Immaqa imminut ima aperisarput: “Jehovamit suli atorneqarsin­naavunga?”

15. Tussiaat 71-imik allattup suna qularinngilaa?

¹⁵ Tussiaat 71-imik allattoq siornatigutut nukissaqar­tiginnginnami aamma taamatut misigivoq. Ima qinuvoq: “Qimaqinanga nukeerutileruma.” (Tuss 71:9, 18) Tussiaasiortulli upperiuarpaa aalajaalluni kiffartor­tuartilluni Jehovamit siulersor­neqarlunilu tapersersor­neqarumaarluni. Tussiaasiortup paasivaa pisinnaasamikkut killeqaraluarlutik sapinngisartik tamaat kiffartortut Jehovap nuannaarutigisarai. – Tuss 37:23-25.

16. Utoqqalisut Jehovap qanoq atortarpai? (Tussiaat 92:13-16)

¹⁶ Illit utoqqalisimaguit eqqarsaatigiuk Jehovap qanoq isigineraatit. Timikkut sanngiil­lisimagaluartutit anersaakkut ingerlal­luarnissannut ikiorsin­naavaatit. (Tussiaat 92:13-16 atuakkit). Iliuuserisin­naajunnaarsimasatit eqqarsaatiginagit ullumikkut iliuuserisin­naasatit eqqarsaatigikkit. Assersuutigalugu allat nakussatsis­sinnaavatit aalajaat­tuarnikkut taakkualu soqutiginerisigut. Jehovap ukiorpassuarni qanoq napatit­tarsimaneraatit neriorsuutillu Biibilimiittut eqquuttussat suut qilanaarineritit oqaluttuarisarsinnaavat. Aamma puioqinagu allanik qinnussisarnerit sunniuteqangaarsin­naammat. (Pet 1. 3:12) Pissutsit atukkagut qanorluunniit ikkaluarpata tamatta Jehovamut allanullu tunnius­saqarsin­naavugut.

17. Sooq allanut naleqqiun­naveersaar­tariaqarpugut?

¹⁷ Kiffartorninni iliuuseqar­nerusin­naannginnerit isumatsas­sutigigukku eqqaamajuk iliuuserisin­naasatit suulluunniit Jehovap nuannaarutigingaartarai. Imaassinnaavoq allanut naleqqiuteq­qajaasartutit. Taamaalior­taqinalli! Sooq? Jehovap allanut naleqqiunneq ajormatit. (Gal 6:4) Assersuutigalugu Mariiap Jiisusi uuliamik tipigissumik akisoorujus­suarmik tunivaa. (Joh 12:3-5) Uillarnerlu piitsoq aggorsimasuminin­nguanik marlunnik naleqarpian­ngitsunik guutisiorfimmut tunissuteqarpoq. (Luk 21:1-4) Jiisusilli angusisarluinnarami arnat marluk taakku imminnut naleqqiunnagit upperlutik tunissuteqarnerat maluginiarpaa. Iliuuserisatit qanorluunniit annikigitigigaluarukkit upperneq asanninnerlu kajumis­sissutigalugit iliuuserisatit tamaasa Jehovap pingaar­tingaarpai.

18. Nalornis­sutitta iliuuseqarfiginis­saannut suna iluaqutigis­savarput? (Aamma ungalusaq “Jehovap oqaasia nalorniun­naarnissannut iluaqutigisinnaavat” takuuk).

¹⁸ Tamatta ilaannikkut nalorniler­tarpugut. Sammeriik­katsitulli Guutip oqaasia, Biibili, iluaqutigalugu ‘eqqortoq paasiniarsin­naavarput’. Taamaattumik isumakuluutitit iliuuseqarfigikkit taamaalil­lutillu nalorniun­naarlutit isumallualerlutit. Jehovap maluginiar­tarpaatit ilisarisimal­luarlutillu. Pilliuteqar­tarnerit pingaar­tingaarpaa neriorsuisimanermisullu akissarsisik­kumaarlutit. Qularutigeqinagu Jehovap kiffani ilumoorfiginnittut tamaasa asangaarlugillu isumassorai.