Kisimiin­ngisaan­narpugut

1-2. (a) Sooq oqarsin­naavugut ingasattumik misilin­neqarnermi kisimiinneq ajorluta? (b) Allaaserisami matumani suut sammissavagut?

INGASATTUMIK misilin­neqaraangatta misigisarsin­naavugut soorlu kisimiilluta umiatsiaaqqami anorersuarsiorluta. Misilin­neqarnermili kisimiin­ngisaan­narpugut. Ataatatta qilammiusup asannittup ajornar­torsiutigut maluginiartarpai. Aamma kiffani aalajaatsut ikiorniarlugit asannilluni neriorsorpai. – Es 41:10.

² Allaaserisami matumani sammissavarput Jehovap sisamatigut qanoq ikiortaraatigut: (1) Siulersor­tarpaatigut, (2) pilersor­tarpaatigut, (3) illersor­tarpaatigut, aamma (4) tuppallersar­tarpaatigut. Jehova neriorsuivoq inuunermi qanorluunniit ajornar­torsioraluarutta puiunngisaan­nassalluta. Imminiin­ngisaan­nassavaatigut. Taamaattumik kisimiin­ngisaan­narpugut.

JEHOVAP SIULERSOR­TARPAATIGUT

3-4. Jehovap qanoq siulersor­tarpaatigut? (Tussiaat 48:15)

³ Tussiaat 48:15 atuaruk. Jehovap nalunngilaa siulersor­neqarnissamik pisariaqar­titsisugut. Nalitsinni kiffani aalajaatsut qanoq siulersortarpai? Ilaatigut Biibilimi allassimasut aqqutigalugit. (Tuss 119:105) Oqaatsimigut Jehovap ilinniar­tittarpaatigut qanoq silatusaartumik aalajangiisin­naasugut qanorlu pissusilersus­sasugut. Siunnersuutai maleruarutsigit maanna naassaan­ngitsumillu pilluarluta inuusin­naavugut.a Assersuutigalugu oqarfigaatigut narrutsan­naveersaas­sasugut, sutigut tamatigut unneqqaris­suussasugut qamanngalu pisumik asaqatigiis­sasugut. (Tuss 37:8; Hebr 13:18; Pet 1. 1:22) Taamatut pissuseris­suugutta angajoq­qaajulluarsin­naavugut, aappaal­luarsin­naavugut ikinngutaal­luarsin­naallutalu.

⁴ Aamma inuit uagutsitut misigisaqarsimasut pillugit oqaluttuat Jehovap oqaatsiminut ilanngutitippai. (Kor 1. 10:13; Jaak 5:17) Inuit taakku pillugit atuaraangatta marlutsigut iluaqutigisarparput. Siullertut, paasivarput kisimiin­ngitsugut – allat uagutsinnut assingusunik nalaataqarsimasut Jehovap ikiuineratigut aalajaat­tuarsimapput. (Pet 1. 5:9) Aappaattut, paasivarput misilin­neqarnitsinni qanoq pinertusaarsin­naasugut. – Rom 15:4.

 5. Kikkut aqqutigalugit Jehovap siulersor­tarpaatigut?

⁵ Jehovap aamma uppeqatigut aqqutigalugit siulersor­tarpaatigut.b Assersuutigalugu ilagiinnik nakkutilliisut qiimmas­sarniarluta ilagiit tikeraar­tarpaat. Oqalugiaataat uppernikkut nakussatsis­sutigisarpagut ataasius­suseqar­tuarnis­satsinnullu iluaqutigisarlugit. (ApS 15:40–16:5) Aamma ilagiinni utoqqaanertat uppeqatitik immikkut tamaasa ilumoorlutik soqutigisarpaat. (Pet 1. 5:2, 3) Angajoqqaat meeqqatik anersaakkut ikiortarpaat eqqarsarluarsin­naassuseqaleq­qullugit ajunngitsunillu ileqqoqalersin­naaqqullugit. (Uss 22:6) Kiisalu arnat anersaakkut inersimal­luartut maligas­saalluartullu siunnersuisar­nermikkut qiimmas­saasarnermikkullu arnat inuusun­nerusut ikiortarpaat. – Tit 2:3-5.

 6. Jehovap siulersuinera iluaqutigiumallugu susariaqarpugut?

⁶ Pisariaqar­titatsinnik siulersorumalluta Jehova iliuuseqangaarsimavoq. Ikiuisar­neranut qujamasunnerput qanoq ersersis­sinnaavarput? Ussatit 3:5, 6-imilu ima allassimavoq: “Naalagaq tatigiuk uummatikkut iluunngarlutit, namminerlu paasisimasaqassutsit tatigeqinagu!” Tamanna maleruarutsigu ‘ingerlavissagut nalimmatsissavai’ – tassa ajornar­torsiutaasinnaasut pinngitsoor­tissinnaaq­qullugit pilluarlutalu inuusin­naaqqulluta ikiortarpaatigut. Jehovap immikkut tamatta ilisarisimal­luarmatigut asannillunilu pisariaqar­titatsinnik siunnersor­tarmatigut qujamasuutigingaarparput! – Tuss 32:8.

JEHOVAP PILERSOR­TARPAATIGUT

 7. Jehovap ilaatigut qanoq pilersor­tarpaatigut? (Filippimiut 4:19)

⁷ Filippimiut 4:19 atuaruk. Jehovap anersaakkut siulersuin­narnata aammali nerisas­saqarumalluta, atisassaqarumalluta angerlasimaf­feqarumallutalu ilungersornigut pilluaq­qusarpai. (Mat 6:33; Tes 2. 3:12) Timikkut pisariaqar­titatsinnik isumakuluuteqarneq pissusis­samisooraluartoq Jehovap kajumis­saarpaatigut taakku pillugit isumakuluuteqarpal­laaqqunata. (Mat 6:25) Sooq? Ataatatta qilammiusup amigaateqarfitta nalaani imminiin­ngisaan­narmatigut. (Mat 6:8; Hebr 13:5) Pilersorumalluta neriorsuutaa upperil­luinnarsin­naavarput.

 8. Jehovap Daavi qanoq ikiorpaa?

⁸ Maluginiaruk Jehovap Daavi qanoq ikioraa. Daavi ukiuni imaannaan­ngitsorsiorfiusuni qimaasutut inuugallarmat Jehovap Daavi angutitaalu pisariaqar­titaannik pilersortarpai. Ukiuni taakkunani Jehovap isumassuinera eqqarsaatigigamiuk Daavi ima allappoq: “Inuusut­tuusimavunga utoqqalisimal­lungalu maanna, takusiman­ngisaan­narpungali iluartumik qimagaasumik qitornaanil­luunniit nerisassanik qinnuuloortunik.” (Tuss 37:25) Immaqa illittaaq maluginiar­nikuuat Jehovap qatanngutitsinnik isumassuil­luarsimanera.

 9. Ajunaar­nersuaqar­tillugu Jehovap kiffani qanoq ikiortarpai? (Aamma assit takukkit).

⁹ Jehovap aamma kiffani ajunaar­nersuaqar­tillugu pilersortarpai. Assersuutigalugu kristumiut siulliit nalaanni Jerusalemmimi kaannersuaqarmat kristumiut nunanit allaneersut uppeqatimik pisariaqar­titaannik nassiussipput. (ApS 11:27-30; Rom 15:25, 26) Guutip nalitsinni innuttai aamma taamatut ikiuerusus­suseqarput. Ajunaar­nersuaqar­tillugu Jehovap innuttani ikiuinissamut asannilluni kajumis­sisittarpai. Assersuutigalugu pisariaqar­titsisunut nerisassanik, imermik, atisassanik nakorsaatinillu pilersuisarput. Illut ataatsimiit­tarfiillu iluarsar­neqarnissaat aaqqissor­neqartarpoq. Jehovap innuttai aamma ajunaar­nersuarmi annaasaqarsimasunik misigis­sutsikkut anersaakkullu ikiuipal­lattarput.

10-11. Borisip misigisaa qanoq ilinniarfigaajuk?

¹⁰ Jehovap aamma inuit allat tukkorluni pilersortarpai. Jehova ilaarlugu uaguttaaq uppeqatigin­ngisagut inussiar­nisaarfiginiarlugit periarfis­sarsior­tarpugut. (Gal 6:10) Taamaalioraangatta nalunaajaanermik kinguneqarsin­naasarpoq. Assersuuteqariarta. Boris Ukrainemi najugalik atuarfimmi ittuusoq Nalunaajaasuunngilaq. Atuartulli Nalunaajaasut inussiar­nersumik pisarpai upperisaallu ataqqillugit. Boris sorsuffiusumiit nunami toqqissisimaneruf­fiusumut nuunniarluni aalajangermat qatanngutitta ikiorpaat. Kingusin­nerusukkut Boris Jiisusip toquneranik eqqaaniaaqataavoq. Misigisani eqqarsaatigalugit Boris ima oqarpoq: “Nalunaajaasut inussiar­nerlutillu isumalluarfigisarpaannga. Jehovap Nalunaajaasui qujamasuf­figeqaakka.”

¹¹ Uaguttaaq uppeqatigisagut uppeqatigin­ngisagullu asannit­tuliorfigigutsigit Ataatarput qilammiusoq nallittuisoq ilaarsin­naavarput. (Luk 6:31, 36) Neriuppugut asannit­tuliorfigisagut Kristusimik malinnit­tunngorumaartut. (Pet 1. 2:12) Taamaan­ngikkaluarpal­luunniit tunisinerup pilluar­narnera misigiumaarparput. – ApS 20:35.

JEHOVAP ILLERSOR­TARPAATIGUT

12. Jehovap innuttani eqimattatut qanoq illersortarpai? (Tussiaat 91:1, 2, 14)

¹² Tussiaat 91:1, 2, 14 atuakkit. Jehovap neriorsorpaatigut nalitsinni anersaakkut illersorumaarluta. Taamaattumik Saatanip guutisiorneq ilumoortoq ajoqusersin­naanngilaa. (Joh 17:15) Aamma ‘annikil­liornar­tussarsuarmi’ Jehovap neriorsuinermisut innuttani anersaakkut timikkullu illersussagai upperil­luinnarsin­naavarput. – Saqq 7:9, 14.

13. Jehovap tamatta immikkut qanoq illersor­tarpaatigut?

¹³ Jehovap tamatta immikkut qanoq illersor­tarpaatigut? Biibili aqqutigalugu eqqortumik eqqunngitsumillu immikkoor­titsinissamik ilinniar­tittarpaatigut. (Hebr 5:14) Guutip oqaasiani najoqqutassiat malillugit inuugaangatta timikkut anersaakkullu illersor­neqartarpugut. (Tuss 91:4) Jehovap aamma ilagiit illersuutaasutut pilersippai. (Es 32:1, 2) Jehovamik asannittut najoqqutas­siaanillu maleruaasut peqatigisar­nerisigut qiimmas­sarneqar­tarpugut ajoqutaasunillu ingalas­simannin­nissamut nakussatsin­neqartarluta. – Uss 13:20.

14. (a) Sooq Guutip misilin­neqartarnerput akueraa? (b) Tussiaat 9:11 naapertorlugu suna neriuutigisin­naavarput? (Quppernerup ataani ilanngussaq takuuk).

¹⁴ Jehovap itsaq kiffani ilaannikkut timikkut illersor­tarsimavai. Tamatigulli taamaaliorneq ajorpoq. Ilaannikkut uagut pisunit ilimagin­ngisanit nalaataqarluta ajornar­torsior­tarpugut. (Jaak 4:13, 14) Aamma Saatanip sallutuujunera uppernarsar­niarlugu Jehovap kiffami malersor­neqarsimanerat allaallu toqutaasimanerat akuerai. (Job 2:4-6; Mat 23:34) Nalitsinni aamma taamaappoq. Imaassinnaavoq Jehovap misilin­neqaatigut piinngikkai. Upperil­luinnarsin­naavarpulli asannitsini qaqugumul­luunniit qimannavian­ngikkai.c – Tuss 9:11.

JEHOVAP TUPPALLERSAR­TARPAATIGUT

15. Qinuneq, Guutip oqaasia uppeqatigullu qanoq tuppallersaatigaagut? (Korintimiunut 2. 1:3, 4)

¹⁵ Korintimiunut 2. 1:3, 4 atuakkit. Ilaannikkut aliasut­tarpugut, annilaangasarpugut erloqisarlutalu. Massakkorpiaq erloqiguit kisimiittutut misigisin­naavutit. Misigis­sutsitit paasineqarpat? Aap, Jehovap paasisinnaavai. Aamma “misilin­neqarnitsinni tamani uagutsinnik tuppallersaasarpoq”. Qanoq ililluni? Jehovamut qamannga pisumik qinugaangatta ‘eqqissinermik inuit paasisin­naasaannit annerungaartumik’ tunisarpaatigut. (Flp 4:6, 7) Aamma Biibilimi atuaraangatta Jehovap tuppallersar­tarpaatigut. Jehovap oqaatsini aqqutigalugu asanerarpaatigut ilisimas­susermillu neriunnermillu tunisarluta. Aamma ataatsimiinnerni uppeqatitta uagutsinnik asannittut peqatigisar­nerisigut Biibililu atorlugu qiimmas­sarneqar­nitsigut tuppallersar­neqartarpugut.

16. Nathanip Priscillallu misigisaat qanoq ilinniarfigaajuk?

¹⁶ Jehovap oqaatsimigut tuppallersaanera erseqqis­sarniarlugu Nathanip Priscillallu USA-mi najugallit misigisaat sammeriartigu. Ukiut arlallit matuma siorna oqaluus­sisartunik pisariaqar­titsiffiunerusumut nuunniarlutik aalajangerput. Nathan ima oqarpoq: “Jehovap ilungersornigut pilluaq­qussagai tatigaarput.” Nooreerlutilli ilimagin­ngisaminnik peqqissutsikkut aningaasatigullu ajornar­torsiulerput. Angerlarsimaf­figisimasaminnut utertariaqarput sulili aningaasarsiornikkut ajornar­torsiuteqarlutik. Nathan ima oqarpoq: “Sooq Guutip ilimagisatsitut pilluaq­qunngim­matigut eqqarsaatigaara. Allaat arlaatigut kukkusimanerlunga eqqarsaatigilerpara.” Kisianni Nathanip Priscillallu paasilerpaat ajornar­torsioraluarlutik Guutip qimassiman­ngikkaatsik. Nathan ima oqaluttuarpoq: “Ajornar­torsior­tilluta Biibili ikinngutitut silatuutut ippoq, Biibilimimmi atuarnikkut qiimmas­sarneqarlutalu siunnersor­neqartarpugut. Misilin­neqaatigut eqqarsaatigival­laarnagit Jehovap pinertusaar­nissamut qanoq ikiuisimanera eqqarsaatiginerusaratsigu upperil­luinnarparput siunissami misilin­neqarutta Jehovap aamma ikiussagaatigut.”

17. Helga qanoq tuppallersar­neqartarsimava? (Aamma asseq takuuk).

¹⁷ Uppeqatitsinnit aamma tuppallersar­neqartarpugut. Qanoq? Helga Ungarnimi najugalik qanoq misigisaqarsimasoq assersuutigeriartigu. Ukiorpassuarni assigiin­ngitsorpas­suarnik ajornar­torsiuteqarami isumatsaq­qangaarpoq naleqan­ngitsutullu misigaluni. Pereersulli eqqarsaatigigamigit takusinnaavaa Jehovap ilagiit aqqutigalugit tuppallersar­tarsimagaani. Ima allappoq: “Suliffiga, napparsimasumik meeraqarnera ajornar­torsiutillu allat pissutigalugit artorsin­neqartutut misigigaangama Jehovap ikiortuaan­narsimavaanga. Jehovap tuppallersaanissamik neriorsuutini ukiuni kingullerni 30-ni ullut tamaasa eqquutitit­tarsimavaa. Allat aqqutigalugit nakussatsit­tarsimavaanga. Pisariaqar­titsinerpaaffinni allaffigineqar­tarpunga, kortimik tunineqar­tarpunga nersualaar­neqarlungaluunniit.”

18. Allat qanoq tuppallersarsin­naavagut?

¹⁸ Guuti ilaarlugu allanik tuppallersaanissamut periarfis­saqartarpugut. Qanoq taamaaliorsin­naavugut? Tusarnaaq­qissaar­nitsigut, tuppaller­nartumik oqaaseqar­nitsigut iluaqutigisin­naasaannillu ikiuisar­nitsigut. (Uss 3:27) Erloqisunut tamanut, aamma Guutimut kiffartor­tunngitsunut, tuppallersaasin­naavugut. Inoqatigut aliasuk­kaangata, napparsimagaangata annilaangasaraangataluunniit pulaartarpagut, tusarnaar­tarpagut Biibilimeersumillu oqaaseqarnikkut qiimmas­sartarlugit. Jehova ‘Guuti sutigut tamatigut tuppallersaasoq’ ilaaraangatsigu uppeqatigut misilin­neqarnermi pinertusaar­nissamut ikiortarpagut aammali uppeqatigin­ngisagut Guuti pillugu ilikkagaqar­nissaannut ikiortarlugit. – Mat 5:16.

JEHOVAP IKIORTUAAN­NASSAVAATIGUT

19. Jehovap qanoq ikiortarpaatigut, qanorlu ilaarsin­naavarput?

¹⁹ Jehovap asannitsini tamaasa soqutigingaarpai. Ajornar­torsioraangatta imminiigin­narnavian­ngilaatigut. Angajoqqaap qitornaminik asannilluni isumassuineratut Jehovap kiffani aalajaatsut isumassortarpai. Siunnersor­tarpaatigut, pilersor­tarpaatigut, illersor­tarpaatigut tuppallersar­tarlutalu. Uagullu ajornar­torsiortunik ikiuisar­nitsigut qiimmas­saanitsigullu Ataatarput qilammiusoq asannittoq ilaartarparput. Ajornar­torsioraluarutta aliasuk­kaluarut­taluunniit qularutigin­ngilarput Jehovap najoraatigut, imami neriorsuivoq: “Siooraqinak ilagigakkit.” (Es 41:10) Taamaattumik upperil­luinnarsin­naavarput kisimiin­ngisaan­narluta!