Inngilit aalajaatsut ilaakkit

1-2. (a) Qanoq inngilinit allaaneruvugut? (b) Inngilillu suna assigiis­sutigaarput?

JEHOVAMUT kiffartuleratta ilaqutariis­sortaanut asannittunut ilaalerpugut. Taakku ilaatigut tassaapput qatanngutigut nunani tamalaaniittut inngilerpassuillu millionillit. (Dan 7:9, 10) Inngilit eqqarsaatigigaangatsigit immaqa uagutsinniit allaanerunerat isumaliutigisarparput. Assersuutigalugu inuit pinngor­tinneqarnerat sioqquterujus­suarlugu inngilit pinngor­tinneqarput. (Job 38:4, 7) Uagutsinniit pissaaneqar­nerungaarput. Aamma naammal­luinnan­ngitsuugatta uagutsinniit illernar­nerullutillu naapertuil­luarnerupput. – Luk 9:26.

² Inngilillu assigiin­ngikkaluarluta sorpassuartigut assigiis­suteqarpugut. Assersuutigalugu inngilitulli Jehova ilaarlugu nuannersunik pissuseqarsin­naavugut. Tamatta nammineq aalajangiisin­naatitaavugut. Uagutsitulli inngilit immikkut ateqarput, kinaassusiliupput assigiin­ngitsunillu akisussaaf­feqarlutik. Aamma Pinngor­titsisitta guutisiorfiginissaa inngilillu pisariaqar­tipparput. – Pet 1. 1:12.

3. Inngilit aalajaatsut qanoq ilinniarfigisin­naavagut?

³ Inngilillu sorpassuartigut assigiis­suteqaratta taakkua maligas­saalluarnerat qiimmas­saatigalugulu pingaarutilinnik ilinniarfigisin­naavarput. Allaaserisami matumani sammissavarput inngilit maniguunnerat, inunnik asanninnerat, pinertusaarnerat ilagiillu minguitsuutin­niarlugit ilungersornerat qanoq ilaarsin­naanerigut.

INNGILIT MANIGUUPPUT

4. (a) Inngilit maniguut­tuunertik qanoq ersersippaat? (b) Sooq inngilit maniguuppat? (Tussiaat 89:8, Testamentitoqaq 1990-imi naqitigaq)

⁴ Inngilit aalajaatsut maniguupput. Misigisar­tuujugaluarlutik, pissaaneqaraluarlutik silatuujugaluarlutillu Jehovap ilitsersuussutai naalattarpaat. (Tuss 103:20) Naammas­sisatik pingaakujuutigineq ajorpaat, aamma nukitik imminnut malugeq­qusaarlutik atorneq ajorpaat. Jehovamit suliassin­neqarnermissut iliortarnertik nuannaarutigaat, aamma allat ilisiman­ngikkaluaraat qanoq ateqarnersut.a (Mos 1. 32:25, 30; Kng 2. 19:35) Jehovap ataqqineqar­tariaqar­neratut ataqqineqarusun­ngillat. Sooq inngilit taama maniguutsigippat? Jehova asallugulu ataqqingaaramikku. Tamanna allassimaffimmi matumani erserpoq: “Guuti mianerineqarpoq illernar­titaasut isumalioqatigiiffianni, angingaarpoq avatangiisiminilu tamani ataqqinar­titaalluni.” – Tussiaat 89:8, Testamentitoqaq 1990-imi naqitigaq.

5. Inngilip Johannesi naqqikkamiuk maniguut­tuunini qanoq ersersippaa? (Aamma asseq takuuk).

⁵ Inngilit maniguut­tuunerannik assersuuteqariarta. Ukiup 96-ip missaani inngilip mianernartut tupinnar­tuliornikkut Johannesimut takutippai. (Saqq 1:1) Johannesi qanoq iliorpa? Inngili guutisiorfiginiarlugu pallorpoq. Inngililli ingerlaannaq ima oqarfigaa: “Taamaalioqinak! Ilittulli qatanngutittullu inussiaan­naavunga … Guuti guutisiorfigiuk!” (Saqq 19:10) Maniguutingaarami! Inngili nersoqqusaarnanilu immikkut ataqqineqarusunngilaq. Jehovap kisimi guutisiorfigineqar­tariaqar­neranik Johannesi ingerlaannaq paasitippaa. Inngililli Johannesi nikagilinngilaa. Sivisunerujus­suarmik Jehovamut kiffartorsimagaluarluni pissaaneqar­nerungaaraluarlunilu maniguulluni Johannesi oqarfigaa taassumatut inussiaan­naalluni. Aamma apustili Johannesi naqqittariaqaraluarlugu oqalorujuunnagulu sukangasaarfiginngilaa. Inussiar­nersumik oqaluuppaa. Inngilip paasigunarpaa Johannesip takusani ajasoorutigigamigit taama qisuariartoq.

6. Inngilit maniguunnerat qanoq ilaarsin­naavarput?

⁶ Inngilit maniguunnerat qanoq ilaarsin­naavarput? Aamma uagut iliuutsigut naammas­sisagullu pillugit oqarataarnata Jehovamut kiffartor­nitsinni sapinngisarput tamaat iliuuseqarusuppugut. (Kor 1. 4:7) Allanit sivisunerusumik Jehovamut kiffartorsimagutta immikkul­luunniit ittunik suliassin­neqarutta pingaar­nerusoris­sanngilagut. Angisuumik akisussaaf­feqarutta minnerit ilaattut imminut isiginissarput pingaaruteqarluinnarpoq. (Luk 9:48) Inngilitulli allat kiffartuuk­kusuppagut malugeq­qusaarniarnata.

7. Allamik naqqiinermi siunnersuinermiluunniit qanoq maniguus­sinnaavugut?

⁷ Aamma allamik, assersuutigalugu uppeqatitsinnik qitornatsin­nilluunniit, naqqiinermi siunnersuinermiluunniit maniguunnermik ersersitsisin­naavugut. Ilaannikkut oqaaqqis­saarinissaq pisariaqarsinnaavoq. Kisianni inngili Johannesimik inussiar­nersumik naqqiisoq ilaarutsigu paatsuugas­saanngitsumik oqaaseqaraluarluta oqaluussatta nikallor­tinnissaa pinngitsoor­tissinnaavarput. Allanit pingaar­nerusorin­ngikkutta tamanna Biibili tunngavigalugu ataqqin­nittumik asannit­tumillu siunnersuinissamut iluaqutigis­savarput. – Kol 4:6.

INNGILIT INUNNIK ASANNIPPUT

8. (a) Lukkarsi 15:10 naapertorlugu inngilit qanoq ersersippaat inuit asallugit? (b) Inngilit oqaluus­sinermi qanoq ikiortarpaatigut? (Aamma asseq takuuk).

⁸ Inuit soqutigingaarlugit qanoq pineqar­tarnerat malinnaaf­figisarpaat. Aap, inunnik asannit­tuupput. Ingasattumik ajortuliorsimasoq peqqissimisoq imaluunniit kiffartorun­naarsimasoq Jehovamut utertoq nuannaarutigisarpaat. Aamma Jehova pillugu ilinniar­tinneqartoq taassumunnga kiffartor­tunngorumalluni inooriaatsiminik allannguisoq nuannaarutigisarpaat. (Lukkarsi 15:10 atuaruk). Aammattaaq oqaluus­sinermik suliami peqataapput. (Saqq 14:6) Soorunami inuit toqqaan­nartumik oqaluus­siffigineq ajorpaat, inunnulli Jehova pillugu ilinniarusuttunut siulersorsin­naavaatigut. Qulakkeerluguli oqarsin­naanngilagut tamatigut inummut siulersor­taraatigut. Jehovammi aamma allatigut – assersuutigalugu anersaani illernartoq atorlugu – kiffani siulersortarpai inuillu ikiortarlugit. (ApS 16:6, 7) Kisianni oqaluus­sigaangatta inngilini atorlugit ikiortarpaatigut. Taamaattumik nutaarsiassanik nuannersunik inoqatigut oqaluttuuk­kaangatsigit upperil­luinnarsin­naavarput inngilit najorluta suleqatigisaraatigut. – Ungalusaq “Qinnutaat akineqarput” takuuk.b

9. Inngilit inunnik asanninnerat qanoq ilaarsin­naavarput?

⁹ Inngilit inunnik asanninnerat qanoq ilaarsin­naavarput? Ilagiinnut ilaalerseq­qinneqar­toqarneranik tusagaqaraangatta inngilitulli nuannaangaarsin­naavugut. Qatannguterput utersimasoq qamannga pisumik tikilluaq­qusinnaavarput asannin­nitsinnillu uppernarsaavigalugu. (Luk 15:4-7; Kor 2. 2:6-8) Inngilit aamma ilaarsin­naavagut sapinngisatsinnik oqaluus­seqataasar­nitsigut. (Oqal 11:6) Uaguttaaq inngilinit tapersersor­neqarnitsitut qatanngutigut oqaluus­sinermi tapersersor­niarlugit periarfis­sarsiorsin­naavugut. Assersuutigalugu oqaluus­sisartoq misilit­tagakitsoq oqaluus­seqatigiumasin­naavarput? Imaluunniit uppeqatigut utoqqaliarsaartut peqqiil­liortul­luunniit oqaluus­seqataanias­sammata ikiorsin­naavagut?

10. Sara qanoq ilinniarfigaajuk?

¹⁰ Taavami pissutsit atukkavut pissutigalugit Jehovamut kiffartor­nitsinni iliuusererusutagut tamaasa iliuuserisin­naanngik­kutsigit? Suli inngilit suleqatiginis­saannut periarfis­saqarpugut. Sara,c qatanngut arnaq Indiamiu, qanoq misigisaqartoq maluginiaruk. Ukiut 20-t pioneritut kiffartoreerluni peqqiil­liulerami innangaan­nalerpoq. Tupinnan­ngitsumik nikallungasorujussuuvoq. Anersaakkulli ilaquttani annertoq­qutigigamigit ullullu tamaasa Biibilimik atuartarami piffissap ingerlanerani nuannaaq­qilerpoq. Soorunami oqaluus­seqataajumalluni pissutsinut allanngortunut naleqqus­sartariaqarpoq. Issianeq saperamiuk allakkanik allassin­naanngilaq, oqarasuaatikkullu oqaluussineq periarfis­satuaraa. Pulaaqqit­takkani sianerfigai, taakkualu allat soqutigin­nittuusinnaasut pillugit oqaluttuuppaat. Qanoq pisoqarpa? Qaammatialuit ingerlaneranni Sara 70-inik Biibilimik misissueqateqar­talerpoq! Taakku tamaasa nammineerluni ilinniar­tissinnaan­nginnamigit ilaasa ilagiin­niittunit allanit ilinniar­tinneqar­tarnissaat isumagaa. Taakkua ilarpassui ataatsimiigiar­talerput. Inngilit qatanngutinik Saratut sapinngisartik tamaat oqaluus­seqataasartunik suleqateqarnertik nuannaarutigingaarsimassavaat!

INNGILIT PINERTUSAARPUT

11. Inngilit qanoq maluginiar­nartumik pinertusaarsimappat?

¹¹ Pinertusaarneq eqqarsaatigalugu inngilit aalajaatsut maligas­saalluarnerat maluginiarnarpoq. Ukiuni tuusintilinni naapertuil­luannginneq ajussuserlu takusarsimavaat. Saatani inngilerpassuillu allat Jehovamut kiffartoqatigisimasatik pikitsitsimmata isiginnit­tuupput. (Mos 1. 3:1; 6:1, 2; Juud 6) Biibilimi oqaluttuarineqarpoq inngili aalajaatsoq anersaapilummit sakkortuumik akiorneqartoq. (Dan 10:13) Aamma Adamip Evallu nalaanniilli inuit amerlanerit Jehovamut kiffartor­niarnatik aalajanger­tarnerat inngilit arajutsineq ajorpaat. Taamaak­kaluartoq inngilit aalajaatsut nuannaangaarlutik Jehova kiffartorfigiuarpaat. Nalunngilaat Guutip eqqunngitsuliat tamaasa piffissaq eqqorlugu iluarsiumaarai.

12. Pinertusaar­nissamut suna iluaqutigisin­naavarput?

¹² Inngilit pinertusaarnerat qanoq ilaarsin­naavarput? Inngilit assigalugit naapertuil­luannginneq maluginiar­tarparput. Taakkunatulli upperil­luinnarparput piffissan­ngorpat Guutip ajussuseq tamaat piissagaa. Taamaattumik uaguttaaq “ajunngitsuliorneq qatsutis­sanngilarput”. (Gal 6:9) Aamma pinertusaarsin­naaqqulluta ikiorumaarluta Jehovap neriorsorpaatigut. (Kor 1. 10:13) Jehova anersaaminik tuneqqulluta qinnuigisin­naavarput, tamanna naammagit­tarnissamut nuannaar­nissamullu iluaqutigis­sagatsigu. (Gal 5:22; Kol 1:11) Taavami akerlilersor­neqaruit sussavit? Annilaangas­sanngilatit, Jehova tatigil­luinnaruk. Jehovammi nakussatsil­lutillu ikiortuas­savaatit. – Hebr 13:6.

ILAGIINNIK MINGUITSUUTITSEQATAAPPUT

13. Inngilit ulluni kingullerni immikkut ittumik sumik suliassin­neqarpat? (Matiusi 13:47-49)

¹³ Ulluni kingullerni Jehovap inngilit immikkut ittumik suliassippai. (Matiusi 13:47-49 atuakkit). Nunarsuaq tamakkerlugu oqaluus­sinerput inunnik tamalaanik millionilinnik ussagar­titsisarpoq. Taakkua ilaat Jehovap iluarisaatut allannguil­lutillu taassumunnga kiffartor­tunngorput, allat taamaaliorusun­ngillat. ‘Ajortut naapertuil­luartunit avissaar­tinneqar­nissaannik’ inngilit suliassin­neqarsimapput, taamaalil­lutillu ilagiinnik minguitsuutitseqataapput. Imaanngilarli arlaannik pissutis­saqarluni ataatsimiigias­saarsimasoq kinaluunniit uteqqis­sinnaan­ngitsoq. Aamma imaanngilaq ilagiinni ajornar­torsiuteqar­toqassan­ngitsoq. Qularis­sanngilarpulli inngilit ilagiit minguitsuujuaq­qullugit tamaviaartut.

14-15. Inngilit ilaarlugit qanoq takutis­sinnaavarput ilagiit minguitsuujuar­nissaat kissaatigalugu? (Aamma assit takukkit).

¹⁴ Ilagiinnik minguitsuutitsineq eqqarsaatigalugu inngilit qanoq ilaarsin­naavagut? Jehovamut attaveqarnerput paarilluas­savarput. Taamaalior­tarpugut Jehovamik asannittunik ikinnguteqar­nitsigut Jehovamullu ikinngutaanitsinnut innarliisinnaasut suulluunniit qanillinaveersaar­nerisigut. Taamaalilluta ilagiinnik minguitsuutitseqataavugut. (Tuss 101:3) Aamma uppeqatigut Jehovamut aalajaat­tuarnis­saannik ikiorsin­naavagut. Assersuutigalugu uppeqaterput ingasattumik ajortuliorsimasoq paasigutsigu qanoq iliussaagut? Asagatsigu utoqqaanertanik oqaloqateqaq­qullugu kajumis­saassavarput. Taamaaliun­ngippat qanoq pisoqarsimaneranik utoqqaanertat paasitis­savagut. Uppeqatittami anersaakkut sanngiil­lisimasup piaartumik ikiorneqarnissaa kissaatigaarput! – Jaak 5:14, 15.

¹⁵ Ingasattumik ajortuliorsimasup ilagiinnit peerneqarnissaa pisariaqarsinnaavoq. Taama pisoqaraangat ‘ilagisarun­naartarparput’.d (Kor 1. 5:9-13) Aaqqissuussineq taanna ilagiit minguitsuujuar­nissaannut iluaqutaavoq. Tamatuma saniatigut peerneqarsimasoq ilagisar­niarnagu aalajangiinerput taassumunnga asannit­tuliorneruvoq. Jehovamut aalajaak­kumalluta aalajangiinerput silattor­nissaminut iluaqutigisinnaavaa. Uterpallu Jehova inngiliilu nuannaaqatigis­savagut. – Luk 15:7.

16. Illit inngilit qanoq ilaarusuppigit?

¹⁶ Jehovap inngilit pillugit ilisimatitsinera inngilinillu suleqateqarsin­naanerput ataqqinaatigaarput! Pissusaat nuannersut – maniguunnerat, inunnik asanninnerat pinertusaar­nerallu – ilaartigit. Aamma taakkunatut ilagiit ileqqoris­saarnikkut anersaakkullu minguitsuujuaq­qullugit sapinngisarput tamaat iliorisa. Inngilit aalajaatsut ilaarutsigit uaguttaaq Jehovap ilaqutariis­sortaanut naassaan­ngilluin­nartumik ilaasin­naavugut.