Ilisiman­ngisatit maniguullutit akuerikkit

1. Jehovap qanoq piginnaaneqar­tippaatigut, aamma sooq?

JEHOVAP tupinnaan­nartumik pinngor­tippaatigut. Eqqarsarsin­naavugut, nutaanik ilikkagaqarsin­naavugut, ilikkak­kagullu qanoq atussanerlugit paasisin­naavagut. Sooq taama piginnaaneqar­tippaatigut? Kissaatigigamiuk ilisarilis­sagitsinni kiffartor­nitsinnilu silatusaartumik aalajangiisas­sasugut. – Uss 2:1-5; Rom 12:1.

2. (a) Qanoq killeqarpugut? (Jobi 37:23, 24, Testamentitoqaq 1990-imi naqitigaq) (Aamma asseq takuuk). (b) Suut tamaasa ilisimasariaqar­natigit akuerigutsigu qanoq iluaqutigis­savarput?

² Naak ilikkarsin­naalluta pinngor­titaagaluartugut ilisimasagut killeqarput. (Jobi 37:23, 24, Testamentitoqaq 1990-imi naqitigaq atuakkit).a Juubi eqqarsaatigiuk. Juubip ilisiman­ngisaanik Jehovap aperisaqat­taarpaa. Juubillu paasilerpaa maniguulluni eqqarsar­tariaatsini allanngor­tittariaqarlugu. (Job 42:3-6) Uagutsinnut aamma iluaqutaassaaq nassuerutigigutsigu suut tamaasa ilisiman­nginnatsigit. Tamanna maniguulluta Jehovap tatiginissaanut iluaqutigis­savarput, silatusaar­tumillu aalajangiisin­naanias­sagatta Jehovap ilisimasariaqak­katsinnik paasitik­kumaaraatigut upperalugu. – Uss 2:6.

3. Allaaserisami suut sammissavagut?

³ Ilisiman­ngisatta ilaat taakkulu inuunitsinnik qanoq kinguneqar­titsisinnaasut allaaserisami sammissavagut. Aamma paasissavarput aalajangersimasunik ilisimasaqan­nginnerput sooq ajoqutaan­ngitsoq. Jehovap “ilisimasaqangaartup” tatigineruler­nissaanut misissuinerput iluaqutigis­savarput. – Job 37:16.

NAGGATISSAQ QAQUGU NALLIUTIS­SANERSOQ NALUARPUT

4. Matiusi 24:36 naapertorlugu suna naluarput?

⁴ Matiusi 24:36 atuaruk. Naggatissaq qaqugu nalliutis­sanersoq naluarput. Jiisusil­luunniit nunarsuarmiik­kallarami “ulloq akunnerlu” ilisimanngilai.b Apustilini kingusin­nerusukkut oqaluttuuppai pisussat ilaasa qaqugu pinissaannut aalajangiisartoq tassaasoq Jehova. (ApS 1:6, 7) Jehovap aalajangereersimavaa naggatissaq qaqugu nalliutis­sanersoq, uagulli qaqugorpiaq tamanna pissanersoq paasisin­naanngilarput.

5. Naggatissap qaqugorpiaq nalliunnissaa ilisiman­nginnatsigu qanoq uagutsinnut sunniuteqarsinnaava?

⁵ Naggatissap tikiunnissaanut qanoq sivisutigisumik suli utaqqis­sanerluta naluarput. Tamatuma kingunerisaanik erinitsas­sinnaallutalu nikallorsin­naavugut – pingaartumik Jehovap ullussaa sivisuumik utaqqereersimagutsigu imaluunniit suli nallius­simannginnera pillugu ilaqutatsinniit allaniil­luunniit illaruaatigineqar­tarutta. (Pet 2. 3:3, 4) Imaassinnaavoq eqqarsartugut naggatissap nalliun­nissaata ullua ilisimasuugutsigu utaqqisin­naassuseqar­nerullutalu illaruaatigineqarnermi pinertusaar­nerusin­naasugut.

6. Naggatissap ullussaanik ilisimasaqan­nginnerput qanoq periarfissiiva?

⁶ Jehovap naggatissap ullussaanik oqaluttuutin­ngimmatigut periarfis­saqarpugut ersersis­sallugu sooq kiffartorfigineripput, tassa tatigalugulu asagatsigu. Jehovamut kiffartornerput ullumik killiligaanngilaq. Jehovami naassaan­ngitsumik, imaanngitsoq naggatissap nalliun­nissaata tungaannaanut, kiffartorfigerusupparput. Taamaattumik Jehovap ullussaata kingorna pisussat nuannersut eqqarsaatiginerugutsigit ajunngin­nerussaaq. Taamaaliorutta Jehovamut qaninnerulissaagut sapinngisatsinnillu iluarisaanik iliorluta. – Pet 2. 3:11, 12.

7. Suna ilisimavarput?

⁷ Ilisimasagut eqqarsaatigis­sallugit pingaar­nerpaavoq. Nalunngilarput ullut kingulliit 1914-imi aallartittut. Biibilimimi siulittuutini uppernarsar­neqarpoq ukioq taanna ullut kingulliit aallarnerfigigaat. Ukiullu tamatuma kingorna nunarsuarmi pissutsit qanoq ikkumaar­nerannik Jehovap aamma paasitis­simavaatigut. Taamaammat nalunngilarput ‘Jehovap ullussarsua’ qanilligalut­tuinnalersoq. (Sef 1:14) Aamma nalunngilarput Jehovap uagutsinnut suliassiis­sutigisaa tassaasoq “nutaarsiassat nuannersut” sapinngisatsinnik inunnut amerlasuunut oqaluus­sissutigis­sagigut. (Mat 24:14) Nunani 240-t missaanni oqaatsinilu 1.000-nit amerlanerusuni oqaluus­sisarpugut. Aallussil­luarluta oqaluus­seqataasin­naajumalluta “ulloq akunnerlu” ilisimasariaqan­ngilagut.

JEHOVAP QANORPIAQ ILIORNIARNERA NALUARPUT

8. Oqaluus­sisartup oqaasii 11:5 qanoq ilinniarfigaarput?

⁸ Guutip suliaasa ilaat paasisin­naanngilagut. (Oqaluus­sisartup oqaasii 11:5 atuaruk). Tassa Jehovap piumasani naammas­siniarlugu iliuusii aamma pisartut akuerisai ilaannikkut paasisin­naanngilagut. Qulakkeerlugu naluarput sooq pisartut ilaat akuerinerai imaluunniit ikiorniarluta qanoq iliuuseqarumaarnera. (Tuss 37:5) Soorlu naartup illissami pinngoriar­tortarnera tamakkiisumik paasisin­naanngikkipput, taamatuttaaq Jehovap iliuuseriumagaasa ilaat paasilluarsin­naanngilagut.

9. Jehovap qanorpiaq iliorumaarnera ilisiman­nginnatsigu qanoq isumaqalersin­naavugut?

⁹ Jehovap ikiorniarluta qanorpiaq iliorumaarnera nalugatsigu aalajanger­niarnitsinni nangaasin­naavugut. Assersuutigalugu imaassinnaavoq pilimanian­ngitsumik inooriaaseqar­nissarput imaluunniit oqaluus­sisartunik pisariaqar­titsiffiusumut nuunnissarput tunuarsimaarfigigipput. Imaassin­naavorluunniit kiffartornermi anguniagarput angunngik­kutsigu eqqarsalersugut Jehovap iluarin­ngikkaatigut. Oqaluus­sinermiluunniit ilungersuus­sigaluarluta Biibilimik ilinniar­titaqan­ngikkutta kajumis­sutsimil­luunniit suliaqar­nitsinni akornuterpas­suaqarutta eqqarsalersin­naavugut Jehovap ikiunngik­kaatigut.

10. Jehovap iliuuseriumaagaasa ilaat nalugatsigit pissuserineqartussat suut ineriar­tortissin­naavagut?

¹⁰ Jehovap iliuuseriumaagaasa ilaat nalugatsigit maniguunneq pissuserineqar­tussallu pingaarutillit allat ineriar­tortissallugit ajornan­nginnerutis­savarput. Taamaalilluta suna pitsaanerusoq Jehovap nalunngin­nerugaa akueriuminar­nerutis­savarput. (Es 55:8, 9) Aamma Jehovap tatigil­luinnarnissaa ilinniar­tarparput. Oqaluus­sinermi angusaqarluaraangatta kajumis­sutsimil­luunniit suliatsinni iluatsitsigaangatta Jehova ataqqinaatis­sittarparput. (Tuss 127:1; Kor 1. 3:7) Ilimagin­ngisatsinnillu pisoqar­tillugu eqqaamas­savarput Jehovap suut tamaasa malinnaaf­figimmagit qamuunalu eqqissisimanermik tunisarmatigut. (Es 26:12) Qularin­ngilarput sapinngisarput tamaat iliuuseqar­nitsinni Jehovap ikiortuas­sagaatigut. Itsaq tupinnar­tuliortar­nermisut iliunngik­kaluartoq tatigaarput pisariaqar­titatsinnik siulersorumaaraatigut. – ApS 16:6-10.

11. Pingaarutillit suut nalunngilagut?

¹¹ Nalunngil­luinnarparput Jehova asannittuusoq, naapertuil­luartuusoq ilisimas­suseqartorlu. Aamma taanna pillugu uppeqatigullu pillugit iliuuserisar­takkagut pingaar­tingaarpai. Nalunngilarpullu Jehovap ilumoorfigin­nitsini akissarsisittarai. – Hebr 11:6.

INUUNERPUT AQAGU QANOQ ISSANERSOQ NALUARPUT

12. Jaaku 4:13, 14 naapertorlugit suna naluarput?

¹² Jaaku 4:13, 14 atuakkit. Inuunerput aqagu qanoq issanersoq naluarput. Naatsorsuutigin­ngisatsinnik aqussin­naanngisatsinnillu pisoqariaannaavoq. (Oqal 9:11) Taamaattumik pilersaarutigut iluatsis­sanersut naammas­sinissaan­nulluunniit uumaannas­sanerluta naluarput.

13. Qanoq misigisarsin­naavugut?

¹³ Inuunitsinni nalaatassagut pillugit ilisimasaqan­nginnerput eqqissiun­naarutigisin­naavarput. Assersuutigalugu qanoq pisoqarsin­naanera isumakuluutigival­laarutsigu nuannaarun­naarsin­naavugut. Aamma ilimagin­ngisamik alianar­tumilluunniit pisoqariataar­tillugu aliasullutalu eqqissiveerus­sinnaavugut. Taamatuttaaq kissaatigisatsitut pisoqan­ngippat pakatsillutalu nikallorsin­naavugut. – Uss 13:12.

14. Pilluar­nissatsinnut suna aalajangiisuua? (Aamma assit takukkit).

¹⁴ Inuunitsinni qanorluunniit pisoqas­sagaluarpat takutis­sinnaavarput Jehova asagatsigu kiffartorfigigipput. Biibilimi oqaluttuat ersersippaat Jehovap inuunitsinni qanoq pisoqarnissaa siumut aalajangereerneq ajoraa aamma naatsorsuutigis­sanngikkipput nalaatas­satsinnut ajortunut tamanut illersor­tarumaaraatigut. Jehovap nalunngilaa suut tamaasa ilisiman­ngikkaluarlutigit pilluarsin­naasugut. Jehovamummi siulersortinneq naalannerlu pilluar­nissatsinnut aalajangiisuuvoq. (Mat 5:3, q.a.i.) Aalajangiiniar­nitsinni Jehovap siunnersuutai maleruar­tarutsigit qanoq pisoqarumaarnissaa isumakuluutigival­laassan­ngilarput. Jaakutulli ima oqarsin­naassaagut: “Jehovap piumasarippagu inuussaagut ima imalu iliorsin­naalluta.” – Jaak 4:15.

15. Siunissaq pillugu suna nalunngilarput?

¹⁵ Aqagussaq qanoq nassataqarumaarnersoq ilisiman­ngilarput, nalunngilarpulli qilammi nunarsuarmiluunniit naassaan­ngitsumik inuunissamik Jehovap neriorsoraatigut. Nalunngilarput sallusin­naanngitsoq neriorsuutaasalu eqquunnis­saannut akornusiisoqarsin­naanngitsoq. (Tit 1:2) Jehovap kisimi ‘qanoq pisoqarnissaa nalunaarutigisinnaavaa, itsaanilli suli pinngitsut oqaatigisinnaavai’. Biibilip nalaani taamaappoq, siunissarlu pillugu siulittuutigisimasai aamma eqquutissapput. (Es 46:10) Qulanngivilluta nalunngilarput Jehovap uagutsinnik asannin­neranut sunaluunniit akornusiisin­naanngitsoq. (Rom 8:35-39) Sutigut tamatigut pinertusaarsin­naaqqulluta ilisimas­suseqalersis­savaatigut, tuppallersas­savaatigut nukissaqar­tillutalu. Upperil­luinnarsin­naavarput Jehovap ikiussagaatigut pilluaq­qullutalu. – Jer 17:7, 8.

JEHOVAP UAGUTSINNIK ILISARISIMAN­NILLUIN­NARNERA PAASISIN­NAANNGILARPUT

16. Jehovap qanoq ilisarisimatigivaatigut, tamannalu qanoq misigilis­sutigaajuk? (Tussiaat 139:1-6)

¹⁶ Tussiaat 139:1-6 atuakkit. Pinngor­titsisitta uagut pilluta suna tamaat ilisimavaa. Eqqarsar­taatsitsigut misigis­sutsitsigullu qanoq sunnerneqarsimanerput nalunnginnamiuk ilisarisimal­luarpaatigut. Oqaasin­nguinigut uummammiugullu aamma nalunngilai. Iliuutsigut tamaasa aamma sooq taamaalior­nersugut ilisimavai. Kunngi Daavi oqarpoq Jehova uagutsinnik ikiuinis­saminut piareersimajuaan­nartuusoq. Jehovap qutsinnerpaap, sunik tamanik Pinngor­titsisup, soqutigigaatit paasillugu qanoq misigivit? Daavi oqarpoq: “Tamakku tupinnarpal­laaramik uanni siunersis­saanngillat, inornarpal­laaramik uanni paasissaan­ngillat.” – Tuss 139:6.

17. Jehovap uagutsinnik ilisarisiman­nilluin­narnera sooq paasiuminaatsis­sinnaavarput?

¹⁷ Imaassinnaavoq tunuliaqutarput, kulturerput siornatigul­luunniit upperisimasarput pissutigalugu Jehova Ataatatut asannittutut uagutsinnik soqutigin­nittutut takorluus­sallugu ajornakusoor­tikkipput. Imaassin­naavorluunniit eqqarsartugut siornatigut kukkussutigisimasagut ingasangaarmata Jehovap ilisarilerumanavian­ngikkaatigut sussariumanatalu. Allaat Daavi taamatut aamma eqqarsar­tarnikuuvoq. (Tuss 38:19, 22) Aamma imaassinnaavoq Guutip iluarisaatut inooriaaseqalerumalluni allannguiniarsarisoq ima eqqarsartoq: ‘Guutip ilumut paasilluarsin­naaguninga taava sooq piumasarissavaa allannguis­sasunga, uffa uannut tamanna taamak sapernar­tigisoq?’

18. Jehovap uagutsinnik ilisarisiman­nilluin­narnera akuerigutsigu qanoq iluaqutigis­savarput? (Aamma assit takukkit).

¹⁸ Jehovap uagut pilluta immitsinnit ilisarisiman­ninnerunerata ajunngitsor­tatsinnillu nammineq takusin­naanngisatsinnik takunnis­sinnaanerata akuerinissaa ilikkarsin­naavarput. Kukkussutigut takusin­naagaluarlugit naluneq ajorpaa inuttut qanoq ittoorusun­nersugut. (Rom 7:15) Nalunngilaa allannguisin­naasugut, asannit­tumillu ikiorniar­tarpaatigut. Tamanna paasigutsigu aalajaalluta nuannaarlutalu kiffartorfiginissaanut nakussatsin­neqassaagut.

19. Qulanngivilluta Jehova pillugu suna ilisimavarput?

¹⁹ Qulanngivilluta nalunngilarput Jehova tassaasoq asanninneq. (Joh 1. 4:8) Nalunngilarput asagamisigut pitsaanerpaamillu inooriaaseqar­nissarput kissaatigigamiuk najoqqutassianik naapertuil­luartunik tunisimagaatigut. Nalunngilarput Jehovap kissaatigigaa naassaan­ngitsumik inuussasugut. Utertitsissummik pilersitsinermigut tamanna ajornarun­naarsippaa. Jiisusip uagut pilluta inuunini pilliutigimmagu nalunngilarput kukkusaraluarluta Jehovap iluarisaatut kiffartorsin­naasugut. (Rom 7:24, 25) Aamma nalunngilarput “Guuti uummatitsinnit annerullunilu sunik tamanik ilisimasaqartoq”. (Joh 1. 3:19, 20) Jehovap uagutsinni suut tamaasa takusinnaavai, upperil­luinnarpaalu eqqortuliorsin­naasugut.

20. Sooq ilisiman­ngisagut isumakuluutigival­laartariaqan­ngilagut?

²⁰ Jehovap paasissutissanik pisariaqar­titatsinnik tamanik paasitit­tarpaatigut. Taamaattumik ilisiman­ngisagut allanngor­tissinnaan­ngisagullu isumakuluutigival­laartariaqan­ngilagut, pingaaruteqar­nerusulli eqqarsaatiginerusin­naavagut. Taamaalilluta ersersis­sinnaavarput maniguulluta Jehova ilisimasaqarluar­nerpaasoq tatigil­luinnarlutigu. (Rom 11:33) Maanna tamanik paasisimasaqan­ngikkaluarluta nalunngilarput Jehovap naassaan­ngitsumik nutaanik ilinniar­tittarumaaraatigut. Aamma Jehova pillugu ilikkagaqar­tuarnissarput qilanaareqaarput! – Oqal 3:11.