Jehova Jiisusilu ikinngutigiuakkit

1. Qanoq nalunngilarput Jehovap kissaatigigaa inuit ilisarisimalis­sagaanni asalissagaannilu?

JEHOVA assilillugu pinngor­titaagatta taassumunnga ikinngutaalersin­naavugut.a Jehovap kissaatigaa inuit ilisarisimalis­sagaanni asalissagaannilu. Asannitsini ilisimal­lugillu asangaarpai. Qinnutaannut tusarnaartarpoq, pisariaqar­titaallu naapertorlugit ikiuisarlunilu siunnersuisarpoq. (Tuss 139:1-4) Pinngor­titsisitta tamatta immikkut ikinngutigerusum­matigut qujamasunnaqaaq!

2. Sooq naammal­luinnan­ngitsuugaluarluta Guutimut ikinngutaalernissaq ajornanngila?

² Adami Evalu ajortulioramik Jehovamut ikinngutaanertik annaavaat. Taakkualu uagut kinguaarim­matigut inunngorattali Guutimut akeraavugut. (Rom 5:10) Taamaattumik Guutimut ikinngutaalernissaq ajornarluin­narpasis­sinnaavoq. Eqqaamas­savarpulli Jiisusi oqarmat ‘Guutimut suulluunniit ajornan­ngitsut’. (Mak 10:27) Jehovap ikinngutigerusuk­kamisigut allaat ernituani asangaakkani uagut pilluta pilliutigaa. (Joh 1. 4:9, 10) Jehova Jiisusilu taamatut pilliuteqarmata ikinngutigilersin­naavagut, tamannalu qujamasuutigingaarparput. – Joh 15:9, 10.

3. Sooq Jehovamut ikinngutaaneq immikkuul­larissuua?

³ Jehovamik ikinnguteqarnerput inoqatitsinnik ikinnguteqar­nitsinnit allaaneruvoq. Pinngor­titsisuullunilu Guutiugami Killeqan­ngitsumik Pissaanilik uagutsinnit qutsinnerungaarpoq. Ikinngutigisin­naagatsigu uagutsinnut tunissutaavoq tupinnangaartoq. (Tuss 15:1) Allaaserisami matumani sammeqqaas­savarput qanoq nalunngis­sinnaagipput Jehovap ikinngutigerusuk­kaatigut. Taava paasissavarput sooq kikkunnit allanit tamanit ikinngutaal­luarnerpaasoq. Kiisalu sammissavarput Jehova Jiisusilu qanoq ikinngutigiuarsin­naagigut.

JEHOVAP IKINNGUTIGERUSUP­PAATIGUT

4. Suna qularilersin­naavarput?

⁴ Nalunngilat Jehovap kissaatigigaa inuit naassaan­ngitsumik inuussasut. (Rom 6:23) Imaassin­naavorli ilaannikkut kukkussutitit eqqarsaatigalugit qularilertarit Jehovap ilumut iluarineraatit ikinngutigerusun­neraatillu. Qanoq upperil­luinnalersin­naaviuk Jehovap ilumut illit ikinngutigerusukkaatit?

5. Sooq upperil­luinnarsin­naavarput Jehovap ikinngutigerusuk­kaatigut? (Aamma asseq takuuk).

⁵ Jehovap toqumit ajortimillu aniguisin­niarluta ernini asangaakkani pilliutigimmagu nalunngilarput ikinngutigerusuk­kaatigut. (Joh 3:16) Taamaalior­nissani Adamip Evallu ajortuliornerisa kinguninngua pilersaarusiorpaa. (Mos 1. 3:15) Taamaalior­nermigullu ersersippaa ajortiliugaluartugut asajuarluta imminul­luunniillu akisugaluartoq uagut pilluta qanorluunniit iliuuseqarumalluni. (Jer 31:3) Ersarippoq Jehovap ikinngutigerusuk­kaatigut.

6. Jehovap imminut qanoq qanillisit­tarpaatigut? (Jaaku 4:8)

⁶ Jehovap ikinngutigerusulluta paasitiin­narnata aamma oqarfigaatigut qanoq qanillisin­naaneritsinni. (Jaaku 4:8 atuaruk). Naammal­luinnan­ngitsuusugut nalunngik­kaluarlugu asallutalu imminut qanillisit­tarpaatigut. (Joh 6:44) Kajumis­saartarpaatigut uummammiugisagut qinunikkut imminut aniatit­tassagigut. (Upp 2:19; Flp 4:6, 7) Qinnutigut tusarnaartarpai akisarlugillu. (Mat 7:7, 8) Tassa Jehovap uagutsinnik ikinnguteqarusun­neranut uppernarsaaterpas­suaqarpoq. Sammilaariartigu sooq Jehova kikkunnit allanit tamanit ikinngutaal­luarnerpaasoq.

JEHOVA IKINNGUTAAL­LUARNERPAAVOQ

7. Jehovap ikinngutini qanoq pisarpai? (Mosesimik 2. 34:6)

⁷ Jehova ilumoorfigin­nilluni asannittuuvoq. Inuit tamaasa asavai, kisianni ikinngutini immikkuul­larissumik pisarpai. Tassa ilumoorfigin­nilluni asanninnermik ersersitsivigisarpai. (Tuss 4:4) Tamanna isumaqarpoq ikinngutini asajuassagai. Biibilimi arlaleriarluni allassimavoq Jehova ilumoorfigin­nilluni asanninnermik peqangaartoq.b (Mosesimik 2. 34:6 atuaruk). Tassa Jehovap ikinngutini imminiin­ngisaannarpai. Naammal­luinnan­ngitsuullutalu kukkusaraluartugut asajuarpaatigut. Taamaat­tumillu isumakkeerfigalutalu ikiortarpaatigut. – Tuss 103:11, 12.

8. Qanoq nalunngilarput Jehovap ikinngutini Aaperaat Daavilu puiunngisaannarai? (Aamma asseq takuuk).

⁸ Jehovap ikinngutini puiunngisaannarpai. Assersuutigalugu Aaperaap toqunerata kingorna ukiut hundredelik­kuutaat qaangiutereersut Jehovap taanna ikinngutimisut taavaa. (Es 41:8) Aamma kunngi Daavi assersuutigisin­naavarput. Jehovap Daavi neriorsorpaa kunngisut issiavis­saarsua soraajuitsumik atassasoq. (Nal 1. 17:11-17) Neriorsuutinilu puiunngisaannarpaa. Tassami ukiut hundredelik­kuutaat qaangiutereersut Jehova paasititsivoq Jiisusi “siuaasami Daavip issiavis­saarsuanik” tunineqassasoq. (Luk 1:32, 33) Ukiumilu 1914-mi Jehovap neriorsuutini eqquutitippaa Jiisusi qilammi kunngin­ngortikkamiuk.

9. Hannamik oqaluttuaq qanoq ilinniarfigaajuk? (Aamma asseq takuuk).

⁹ Immaqali ima eqqarsarputit: ‘Aaperaat Daavilu inuupput immikkut ittut. Uangali inuuvunga nalinginnaasoq.’ Taamatut misigiguit Jehovap Hanna qanoq pisimaneraa eqqarsaatigiuk. Hannap uia Elkana aamma allamik nuliaqarpoq, taannalu Peninnamik ateqarpoq. Hanna meerartaarsin­naanngimmat Peninnap nikassartarpaa. (Sam 1. 1:4-7) Hannap immaqa eqqarsaatigaa Jehovamit soqutigineqar­nerluni. Tatigigamiulli uummammiugisaminik qinunikkut annissuiffigaa. (Sam 1. 1:11, 15) Jehovallu ersersippaa ilumut soqutigalugu. Tusarnaarpaa qinnutaalu akillugu meerartaarsin­naanngortippaa.c Hanna ernertaarpoq Saamualimik atsikkaminik. (Sam 1. 1:20) Tamatumalu kingorna pingasunik ernertaaqqippoq marlunnillu panissaarluni. (Sam 1. 2:21) Tassa ersarippoq Jehovap ikinngutini tamaasa, allaat pingaaruteqan­ngitsutut naleqan­ngitsutul­luunniit misigisut, ilumoorfigin­nilluni asagai. – Jer 31:3.

10. Jehovap siunnersuutai sooq inuit siunnersuutaannit pitsaanerungaarpat? (Tussiaat 119:98-100)

¹⁰ Jehovap siunnersuutai pitsaanerpaapput. Jehovap ilitsersuutai siunnersuutaalu ilisimas­suseqalersitsisarput. Kikkunnit allanit tamanit siunnersuil­laqqinnerpaavoq! (Tussiaat 119:98-100 atuakkit). Sunik tamanik ilisimasaqarpoq ajunngin­nerpaamillu kissaalluta. (Es 48:17, 18) Inuit ilaat akiliisarput immikkut ilisimasallit siunnersuutaat paasiumallugit. Uagulli tamatumannga pitsaanerungaartumik periarfis­saqarpugut. Pinngor­titsisitsinnummi siunnersor­tissinnaavugut. Akeqanngitsumik qaquguk­kulluunniillu pitsaanerpaamik siunnersuisarpoq. Qasunngisaan­narlunilu sininneq ajorami qinugaangatta tusarnaar­tuaannarpaatigut. (Tuss 121:1-4) Siunnersuutaasalu maleruarnerat iluaqutigiuaan­narparput. – Tuss 1:2, 3.

11. Jehovap tukkortuunini qanoq ersersippaa?

¹¹ Jehova tukkortuuvoq. Iliuutsimini tamani tukkortuunini ersersittarpaa. Inuulersip­paatigut nuannaar­nissamullu pisariaqartunik tamanik tunisarluta. (Tuss 145:16; ApS 14:17) Ajornar­torsior­nitsinni aalajangiil­luarnias­sagatta ilisimas­susermik tunisarpaatigut ajortulioraangattalu isumakkeerfigeriaan­naasarluta. (Jaak 1:5). Taamaaliuin­narnanilu pingaar­tilluta ersersittarpaa. Tassa asannittumik ataqqin­nittumillu pisarpaatigut. Erninilu pilliutigigamiuk annerpaamik tunissuteqarfigaatigut. Taamaaliormammi naassaan­ngitsumik inuunissarput ajornarun­naarpoq. Jehova ilumut ikinngutaavoq tukkortoq! Qaqugorsuarmut ikinngutigiuarumallugu qanoq iliorsin­naavugut?

QANOQ JEHOVA QANIMUT IKINNGUTIGIUARSIN­NAAGIPPUT

12. Hebræerit 11:6 naapertorlugu Jehova ikinngutigis­sagutsigu susariaqarpugut?

¹² Jehova qanimut ikinngutigiuas­sagutsigu iliuuseqar­nissarput Jehovap naatsorsuutigaa. Upperfigisariaqarparput akissarsisik­kusukkaatigullu upperalugu. (Hebræerit 11:6 atuaruk). Tamatumalu saniatigut iliuuserisassagut pingasuupput.

13. Guutimik mianerinninneq qanoq isumaqarpa?

¹³ Jehova mianeriuk. Tussiaat 25:14-mi ima allassimavoq: “Jehovap mianerin­nitsini ikinngutigil­luarpai.” (New World Translation) Guutimimmi mianerinninneq qanoq isumaqarpa? Guutimik mianerin­nikkutta asangaarlugulu aliasutsik­kusunngisaan­narparput. Taamaattumik aalajangigas­saqaraangatta siunnersuutai Biibilimi allassimasut maleruar­tarpagut. (Uss 3:5, 6) Jehovallu siulersuinera maleruarutsigu silatusaartumik aalajangiisassaagut. Taamaat­tuminnguna Ussatit 9:10-mi allassimasoq Jehovamik mianerinninneq ‘ilisimas­susermut aallarniutaasoq’.

14. Jehovamut ilumoorfigin­nittuunerput qanoq ersersis­sinnaavarput?

¹⁴ Jehova ilumoorfigiuk. Jehova ikinngutiminut ilumoorfigin­nittuugami uaguttaaq ilumoorfigis­sagitsinni naatsorsuutigaa. (Tuss 15:1, 2; 37:28) Ilumoorfigin­ninnerput ima ersersit­tarparput: Jehova inuunitsinni salliut­tarparput. Aamma Jehova taassumalu pissusii nuannersut pillugit Jiisusi ilaarlugu allanut oqaluus­sisarpugut. (Mat 28:19, 20) Qanorluunniillu akerlilersor­neqaraluarutta Jehovamut aalajaat­tuarpugut. Kiisalu Jehovamik ikinnguteqar­nitsinnut ajoqutaasin­naasumik iliuuseqan­ngisaan­narpugut.

15. Allat qanoq ilumoorfigin­nilluta asanninnermik ersersitsivigisin­naavagut?

¹⁵ Uppeqatitit ilumoorfigalugit asajuakkit. Jehovap kissaatigaa ikinngutimi ilumoorfigin­nillutik asannit­tuullutik ilaassagaanni. Taamaattumik ikinngutigut aamma Jehovamut ikinngutaammata ilumoorfigin­nilluta asanninnermik ersersitsivigisarpagut. Uppeqatigut uagutsinnut ajunngitsumik iliuuseqarsimasut puiornagit qujamasuf­figisarpagut. Ikinngutigut asajuarpagut. Ikiortarlugillu ajunngitsuliorfigisarpagut. Jehovap kissaatigaa ilumoorfiginninneq pingaar­tissagipput. (Mika 6:8) Allaaserisami tulliuttumi allanut qanoq asannit­tuliorsin­naasugut sammineqar­nerussaaq. Maannali Jiisusi qanoq qanimut ikinngutigiuarsin­naagipput sammilaariartigu.

JIISUSI QANOQ IKINNGUTIGISIN­NAAGIPPUT

16-17. (a) Qanoq nalunngilarput Jiisusip ikinngutigerusuk­kaatigut? (b) Jiisusimik ikinnguteqarnerput Jehovamik ikinnguteqar­nitsinnit qanoq allaanerua?

¹⁶ Jiisusip ersersippaa ikinngutigerusulluta. Qanoq? Inunngun­ngikkal­larattali uagut pilluta inuunini pilliutigaa. Ilaa, tupinnaq! Jiisusi ima oqarpoq: “Ikinngutini annaanniarlugit inuunerminik pilliutigin­nittumit asannin­nerusoqanngilaq.” – Joh 15:13.

¹⁷ Jiisusip tamatta immikkut qanimut imminut ikinngutaaleq­qulluta kajumis­saarpaatigut. (Mat 11:28-30; Joh 15:15) Jiisusimilli attaveqarnerput Jehovamik attaveqar­nitsinnit allaaneruvoq. Assersuutigalugu Jiisusimut qinuneq ajorpugut guutisiorfiginerlu ajorlugu. (Mat 4:10; 6:9) Uagulli pilluta iliuusii qujamasuutigingaaratsigit qanimut ikinngutigerusupparput.

18. Jiisusip qanoq ikiortarpaatigut?

¹⁸ Jiisusip ikinngutaal­luarluni assigiin­ngitsutigut ikiortarpaatigut. Assersuutigalugu pruffiitip Iisaajap siulittuutigisaatut tassaavoq “Siunnersuisoq Nalissaqan­ngitsoq”, “Naassaan­ngitsumik Ataataq” aamma “Eqqissinermut Naalagaaneq”. (Es 9:5) ‘Siunnersuisuuvoq Nalissaqan­ngitsoq’ inuunermik annassutaasumik siunnersuisarami. Jiisusi ‘Naassaan­ngitsumik Ataatagaarput’. Tamanna isumaqarpoq Jehovap Jiisusi inunnik naassaan­ngitsumik inuuneqalersitsinissamik pissaaneqartikkaa. (Joh 11:25, 26) ‘Sutigut tamatigut misilin­neqarsimagami’ Jiisusip misigin­neqatigisin­naavaatigut. (Hebr 4:15) ‘Eqqissinermullu Naalagaanertut’ Jehovamik eqqisseqateqaq­qulluta qanimullu attaveqaq­qulluta ikiortarpaatigut. Jiisusi ilumut ikinngutaal­luartuuvoq!

19. Jiisusi qanoq ikinngutigiuarsin­naavarput? (Johannesi 15:14) (Aamma asseq takuuk).

¹⁹ Jiisusi ikinngutigiuas­sagutsigu qanoq iliussaagut? (Pet 1. 1:8) Jiisusip iliuusii oqaasiilu iivangkiiliuni allassimasut atuarlugillu misissoq­qissaar­tassavagut. Aalajangigas­saqaraangattalu ilaarlugulu siunnersuutai maleruar­tassavagut. Aamma nalunngin­natsigu Jiisusip peqatigiis­sortagut siulersorai ataqqillugulu naalattarparput. (Johannesi 15:14 atuaruk). Assersuutigalugu Jiisusip utoqqaanertat uagutsinnik isumagin­nittussan­ngortimmagit taakkua ilitsersuutaat maleruar­tarpagut. (Ef 4:8; Hebr 13:17) Ilagiinnilu suliassin­neqaraangatta pimoorut­tarparput. Ikinngutigiuarumallugu iliuuserisagut Jiisusip maluginiarlugillu nuannarisarpai.

20. Jehovamut Jiisusimullu ikinngutaasin­naanerit qanoq igaajuk?

²⁰ Pinngor­titsiserput Jehova erneralu Jiisusi ikinngutigisin­naagatsigit ataqqinaatigaarput! Jehova ikinngutiginerpaavarput, taassumalu asagamitigut qinnutigut tusarnaarlugillu akisarpai. Jehovap Jiisusillu ikinngutigiuarumagamisigut anersaakkut isumagiuarpaatigut. (Mat 5:3) Taakkuninnga ikinnguteqarnerput pingaar­tittuartigu!