Pingasunngorneq, apriilip 24-at
“Anersaamit illernartumit sunnerneqangaaritsi. Jehovap inussiaataatut kiffartoritsi.” – Rom 12:11.
Inuunitsinni pisut tamarluinnaasa aqussinnaanngilagut. Taamaattumik eqqarsarnaveersaartariaqarpugut aatsaat aalajangersimasumik kiffartoriaaseqarutta Jehovamit pingaartinneqassalluta, aamma allatut kiffartoriaaseqartunut sanilliunnaveersaartariaqarpugut. (Gal 6:4) Pitsaanerussaaq Jehovamut kiffartornermi allanillu ikiuinermi iliuuserisinnaasagut eqqarsaatigigutsigit. Pilimanianngitsumik inooriaaseqaruit pisariaqanngitsumillu akiitsoqarnaveersaarlutit Jehovamut kiffartorninni iliuuseqarnerunissamut periarfissaqarnerussaatit. Angorusutat ingerlaannaq angusinnaanngisat angujumallugu angoriaannaasannik anguniagaqarit. Assersuutigalugu pionerinngornissaq anguniagarigukku qaammatit tamaasa ikiorti-pioneritut kiffartoqqaarsinnaavit? Ilagiinni kiffartortunngornissaq anguniagarigukku oqaluussinerusinnaavit? Misilittakkatit siunissami akisussaaffilerneqarnerunissannut iluaqutigisinnaavatit. Qanorluunniit suliassinneqaraangavit sapinngisamik iliuuseqartarnissat aalajangiusimajuk. w22.04 26 § 16-17
Sisamanngorneq, apriilip 25-at
“Naalagaq asavara tusarmagu kimigiisernera.” – Tuss 116:1.
Jehovap ajornartorsiutitta naammagalugit atornissaannut kiffartornermilu nuannaaqqulluta ikiorsinnaavaatigut. Ernumassutigisagut pillugit Jehova saaffigigaangatsinni aallaqqaammut pinertusaarsinnaaqqulluta nakussatsittarpaatigut. Kissaatiginngisatsitullu misilinneqartuarutta pinertusaarsinnaaqqulluta nakussatseqqullutalu Jehova arlaleriarluta qinnuigisarsinnaavarput. Kissaatigaa taamaaliussasugut. Tamanna Esajap oqaasiinit ukunannga erserpoq: “[Jehova] noqillaffissaqartinniaqinasiuk.” (Es 62:7) Tamanna qanoq isumaqarpa? Jehovamut qinnutigut imaaginnavittariaqarput allaat soorlulusooq Jehova eqqissisimaartinngikkipput. Esajap oqaasii Jiisusip qinuneq pillugu Lukkarsi 11:8-10, 13-milu assersuusiaanik eqqaasinneqaatigaagut. Tassani Jiisusip kajumissaarpaatigut anersaamik illernartumik tunineqaqqulluta ‘qinujuassasugut’. Aamma silatusaartumik aalajangiisinnaaqqulluta Jehova kimigiiserfigisinnaavarput siulersoqqulluta. w22.11 8 § 1; 9 § 6-7
Tallimanngorneq, apriilip 26-at
“Guutip kunngeqarfianut iserumalluta amerlasuunik annikilliuuteqaqqaartariaqarpugut.” – ApS 14:22.
Ilaquttatillu malersugaariataarnissamut maanna piareersarsinnaavusi. Ajortorpassuit peratarsinnaasut takorloornaveersaakkit. Jehovali qaninniartuaruk aamma meeqqatit taamaalioqqullugit ikiukkit. Ernumaleraangavit uummammiugisatit tamaasa Jehovamut aniatittakkit. (Tuss 62:8, 9) Ilaqutariittut eqqartorsiuk sooq Jehovamik tatiginninnissamut pissutissaqarluartoq. Soorlu meeqqavit ajunaarnersuaqarnissaanut piareersarsimanersi iluaqutigissagaat, taamatuttaaq malersugaanissamut piareersarussi iluaqutigissavaat. Jehovamik tatiginninnissaannik ilinniartissimagukkit sapiillutillu eqqissisimaannarsinnaapput. Eqqissineq Guutimeersoq toqqissisimassutigaarput. (Flp 4:6, 7) Nappaassuit, ajunaarnersuit malersugaanerillu nalaattaraluarigut Jehovap qamuuna eqqissisimatittarpaatigut. Utoqqaanertat eqiasuitsut uagutsinnut paarsisussanngortippai. Tamattalu ikioqatigiinnissatsinnut periarfissaqartippaatigut. Maanna eqqissisimanitsinni siunissami misilinneqaatigisagut artornarnerusut, allaat annikilliornartussarsuaq, piareersimaffigisinnaavagut. – Mat 24:21. w22.12 27 § 17-18