Qanoq iliffissat nallersiisallu Jehovap aalajangersartagaasa uatsinnut qanoq pingaaruteqarneri
’Orpiit ajunngitsunik inerititaqanngitsut tamaasa kipissavaat innermullu igillugit.’ — Matîuse 7:19.
1. Jehovap siornatigut naalakkersuisut ilaannut iliuuserisartagai sumik ilinniarfigisinnaavavut?
SILAMIUT oqaluttuarisaanerannit uppernarsarneqarpoq Jehovap ’qanoq iliffissat nallersiisallu allanngortissinnaagai, kunngit peersissinnaagai kunngillu ivertissinnaallugit’. (Dâniale 2:21) Ukiuni hundredilinni siusinnerusuni, siunertaminut tulluaraangat, Farao, Nebukadnezar, Belsazzar, Herodes Agrippa siulleq allallu peersittarsimavai. ’Kisiannili,’ oqartoqarsinnaavoq, ’tamakku itsarujussuarli pisimagamik, uatsinnut pingaaruteqarnavianngillat.’ Uatsinnut pingaaruteqaqaat, uatsinnut ilinniutissaaqigamik. Pisimasut tamakku uuminnga ilinniarfigisinnaavavut: Nallersiisani nalliuttaraangat, Jehovap silarsuup siulersuisuisa naalakkersuineri taamaatitittarpai; piumalleraangamilu naalakkersuisooqqusani ivertittarpaa.
2. Qanoq iliussalluni ullutsinni Jehovap nallersiisaa nalliussimava?
2 Uagut ullutsini Jehovap nallersiisaa nalliuppoq ’kunngit peersissallugit kunngillu ivertissallugit’. Kunngioqqusani ivertereersimagamiuk, ungasinngitsukkut silarsuup matuma naalakkersuisui tamaasa Guutip peersikkumaarpai, aammattaaq pissutsinik aaqqissuussineq aqutaat tamaat peersikkumaarlugu. Suna pissutigalugu? Itsarsuaq Babylonip kunngia Belsazzar assigalugu ’uuttuutinik uuttorneqaramik oqippallaarlutillu’. Pissuseq ullumikkut atuuttoq tassarpiaavoq soorlu Guutip kiffaata Danielip Belsazzar oqarfigimmagu: ’Guutip ullut naalagaaffisit kisippai naasimallugillu.’ (Dâniale 5:26, 27) Taamaattumik uagut nalitsinni Jehovap „ullormi kamaffimmini kunngit sequmisissavai. Inuianni eqqartuussiumaarpoq“. — Tussiaat 110:5, 6.
’Oqippallaarput’
3, 4. Eqqissineq eqqarsaatigalugu, ukiuni hundredilinni maanna atuuttuni silarsuup naalakkersuisui qanoq ’oqippallaarlutik’ paasineqarpat?
3 Silarsuarmi pissutsit eqqarsaatigalugit nunami naalakkersuisut qanoq ilillutik ’oqippallaarpat’? Annertuumik pisooqataapput nalitsinni, ukiuni aatsaat taama sakkortutigisumik ajunaarneqartarfiusuni, inuiannut tamanut pisimasunut. Assersuutigalugu: 1914-iminngaanniinnaq inuit hundredimik ataatsimik millionillit sorsunnerni assigiinngitsuni toqutaapput! Ullumikkut sakkussiat atomitortut nunami uumassuseqartuarsinnaanissaq aarlerinartorsiortippaat. Massakkorpiaq rakettit tuusintikkuutaat atomitortunik qaartartullit piareersimapput, illoqarfinnut inuppassualinnut igeriunneqarnissaminnut.
4 Atominik sakkussiat atorlugit sorsunneqarnissap kingunissai amiilaarnartut atuagassiami Science-imi imatut nalilerneqarput: ’Akerleriit illua-tungeriit tamarmik sakkussianik atomitortunik ikittuunngitsunik igeriussissappata, nunami naasut uumassusillillu ilarujussuisa nungunnissaat ilimanarpoq. Inuit piuneerunneqarsinnaanissaat ajornavissutut isumaqarfigineqarsinnaanngilaq.’ Europami naalakkersuisut ilaanni atorfikkaaq oqarsimavoq: „Annaasanik naatsorsuinissami illoqarfiit naatsorsuutigineqarnatik, nunavikkuutaartumik naatsorsuisoqartussaavoq.“ Illersornissamut aningaasartuutit amerlangaassusii eqqartorlugit Latinamerikami nunat ilaata præsidentia oqarsimavoq: „Inuiaat umiarsuarmut aserujasumut umiiaratarsinnaasumut ilaapput . . . Umiiassappat ilaasut tamavimmik ajunaassagaluarput.“ Aviisimilu Japanimi saqqummersartumi allassimavoq: „Silamiut oqaluttuarisaaneranni [eqqissinissaq] aatsaat taama ungasitsigisutut ippoq.“
5, 6. Nunat ilarpassuini aningaasatigut pissutsit suut atuuppat?
5 Taamaattoq, inuiaqatigiit sakkussiorneq amerliartuinnartunik aningaasartuutigisarpaat. Sakkussiornermut aningaasartuutit ukiumut koruunit qulinik billionilinngorsimapput! Kisitsisit atorlugit naatsorsueqqissaarnerit ilaat naapertorlugit silarsuarmi tamarmi sakkutuut tamarmik immikkut meeqqanit atuartutut ukiulinnit tamanit 50-eriaataanik amerlanerusunik aningaasartuutigineqartarput. Eqqarsaatigeriaruttaaq FN-ip nalunaarusiaa naapertorlugu silarsuarmi tamarmi inuit minnerpaamik 450 millionit perlilerput, sulilu amerliartorlutik. Nalunaarusiaq alla naapertorlugu nunani siuarsarniakkani „ukiut tamaasa inuit 30-40 millionit perlertarput“. Nalunaarutigineqarpoq perlertut affaat meeraasut tallimat inorlugit ukiullit.
6 Amerikami Kujallermi nunat annerit ilaanni naalakkersuisuni atorfikkaaq oqarpoq „sulisartut 40 procentii piitsuulluinnarlutik inuusut“. Amerikami Kujallermi nunami allami illoqarfiit pingaarnersaanni sulisinnaasut 51 procentii suliffissaaleqipput. Pissutsit pingaarnersiorlugit nalunaarusiami allassimavoq: „Nunavik 260 millioninik inulik ukiut 50-it ingerlaneranni aatsaat taama sakkortutigisumik aningaasatigut ajutoornersuaqalersimavoq.“ Aammalu aviisini qulequttat nunani assigiinngitsuni saqqummersimasut malugikkit: „Piitsut amerlassusii ’annilaarnarpoq’.“ „Piitsut amerleriarsimapput.“ „Piitsuuneq, naalliunnarpoq.“ Nalunaarusianuku nunanit siuarsarniakkaneersuunerpat? Naagga, naalakkersuisuni atorfikkaat Canadami, USA-mi Naalagaaffinnilu Tyskit Killerni oqaaseraat. Aap, inuiaqatigiit pigissaarnerusutut taaneqaraluartut ajornartorsiutit uniffigaat.
7. Pinerluttuliortarnerit nakuusernerillu ullumikkut atugaangaartut qanoq oqaatigineqarpat?
7 Nunat ilarpassuini ajornartorsiutit tamakku pinerluttuliortarnernit, nakuusernernit peqqarniisaarniarnernillu ersersinneqartarput. Assersuutigalugu, USA-mi Naalagaaffeqarfitsigut Qitiusumi Napparsimatsaaliuiffiup tungaaninngaanniit nalunaarutigineqarpoq ukiut tamaasa Amerikamiut 50.000-it inuartarineqartartut imaluunniit imminortartut! Aviisimi The New York Times-imi allaaserisami pingaarnerusumi isuma una inerneqarpoq: „Pisut unitsinniaruminaallillutik ingerlapput.“ Aviisimi allami allaaserisami pingaarnerusumi allassimavoq: „Ukiut inuiaqatigiinni tamalaani inatsisaatsussuseqarfiusut inuuffigaavut.“ Tassa, naak ukiuni hundredilinni arlalinni noqqaasimagaluarlutik, naak misilittagaqarsimagaluarlutik, aammalu naak atortorissaarutitigut siumukarluarsimagaluarlutik, silarsuarmi pisortat innuttamik ilarpassui tunngaviunerusutigut pisariaqartitaannik pissaqartissinnaasimanngilaat.
8. Silamiut oqaluttuarisaanerisa suut takutippaat?
8 Nalunarunnaarpoq silamiut itsarsuaq ullumikkullu oqaluttuarisaanerisa takutikkaat inuit ikiorteqanngitsut aaqqiissutissaqanngitsut. Silarsuatsinni naalakkersuinikkut, aningaasatigut upperisarsiornikkullu pisortat eqqissinissaq, toqqissisimanissaq, pilluarnissaq, peqqissuseq inuunerlu tamatta kissaatigisavut atorfissaqartitavullu pilersissinnaanngisaannassavaat. Taamaattumik silarsuaq una peertariaqarpoq! Peerumaarporlu, Jehovap tamanna siunertarisaqarfigimmagu. Soorlu Bibelimi allassimasoq: ’Ulimaat orpiit tunngaviinut tutsereerpoq; taamaattumik orpik sunaluunniit ajunngitsunik inerititaqanngitsoq kipineqassaaq innermullu igitaassaaq.’ — Lúkarse 3:9.
Eqqartuunneqarnissaanut pissutaasoq alla
9. Silarsuup naalakkersuisuisa Jehovap siunertai qanoq isigisarpaat?
9 Silarsuup matuma pisortaasalu ajortunik inerititaqarnerat ilaatigut pissutaavoq Jehovap, silarsuaq uuttuutinik uuttoreerlugu oqippallaarneralu paasisimallugu, silarsuarmik aseruiumaarnissaanut. Allamilli aamma pissuteqarpoq: Silarsuarmi pisortat Jehova — Pinngortitsisoq qilammilu nunamilu kisimi Oqartussaasoq — naatsorsuutigineq ajorpaat. Taassuma siunertai imaluunniit qanoq iliffissat nallersiisallu Jehovap aalajangersartagai iluamik soqutiginngilaat. Tamanna pissutigalugu Korintumiunut agdlagkane sujugdlerne 2:7, 8-milu taakku eqqortumik imannak oqaatigineqarput: ’Ilisimassut Guutip pia silap matuma naalagaasa tamarmik ilisarinngilaat.’ Taamaattumik Tussiaat 146:3-mi imannak oqaaqqissaarneqarpugut: „Tunaareqinasigit naalagaanertat, inuit ikiuisinnaassuseqanngitsut.“
10, 11. (a) Jehovamik ilisarserusuttut qanoq iliortariaqarpat? (b) Qanoq ilillutik Guutip kiffai ilisimasaqarsinnaappat inuit allat ilisimanngisaannik?
10 Akerlianilli, ússatit 3:5, 6-imi imannak oqaaqqissaaruteqarpoq: ’Jehova isumalluarfiguuk uummatikkut iluunngarlutit, siuneqarsutsillu tatiginagu; sukkut ingerlasaraangavit ilisariniaruk, taava aqqutigisassatit iluartikkumaarpai.’ Inuit taamaaliortut silarsuup matuma neriuuteqanngissusiata qaammarsagaannginneraniittuassanngillat. Jehovap anersaaminik pilluaqqujumaarpai, siunertaminik ilisarseqqullugit nalujunnaaqqullugillu qanoq iliffissat nallersiisallu Jehovap aalajangersartagaasa kiffaminut qanoq pingaaruteqarnerinik. Soorlu apustilit suliáinik agdlagkane 5:32-mi allassimasoq, Jehovap anersaani iluartoq ’naalatsiminut’ tunniukkaa.
11 Taava Guutip kiffai ilisimasaqarput silarsuup matuma naalakkersuisuisa ilisimanngisaannik. Jehovap siunertaanik nallersiisanillu Jehovap aalajangersagaanik ilisimannipput. Pîtrusip agdlagaine sujugdlerne 1:11-mi allassimavoq siornatigut Guutip kiffai ’killisiuisut piffissaq qaqugu nalliuttussaq qanorluunniit ittussaq Kristusip anersaata ilumiugisamik pigaa’. Guutip anersaava tamatuminnga nalunarunnaarsitsimmat, apustili Paulus pallorfiginneqatini ilumoortut pillugit oqarsinnaasimavoq: ’Maanna ilisimagassiuk piffissanngorsimasoq.’ (Rûmamiut 13:11) Ullumikkut Jehovap kiffaasa taanna naalagassatut naalammassuk, Guutip anersaavata iluartup taakkununngattaaq nalunarunnaarsippaa Guutip isumaa malillugu nallersiisaq suna nallersimasoq. Aamorsip agdlagaine 3:7-imi allassimavoq: ’Jehova naalagaasoq sumik sulisarinngilaq, kisianni anngigisi kiffaminut pruffiitinut anngiiaqqaaruniuk.’
Suli aamma pissutaasoq
12, 13. Suli aamma suna pissutigalugu silarsuaq manna pisortaalu oqippallaartut Jehovap paasisimavai?
12 Taava silarsuaq manna pisortaalu oqippallaartut Jehovap paasisimagai suujunnaarsitsinissaanullu suli aamma pissut tikipparput. Eqqaamaniakkit Faraop, Belsazzarip, Herodesip allallu siornatigut Jehovap kiffai qanoq iliuuseqarfigigaat. Assortortarpaat, malersortarpaat, allaallu toqullugit. Guutilli naalakkersuisut taakku taamaaliornerinut akisussaatippai.
13 Ullumikkut tamatumunnga assingusumik pisoqartarpoq. Silarsuup naalakkersuisuisa assigiinngitsut Jehovap kiffai eqqissinermik suliaqartut assortortarpaat, malersortarpaat allaallu toqullugit. Naalakkersuisut taakku ’oqalupput Qutsinnerussaartoq assortorlugu, Qutsinnerussaartullu illernartortai nungusarniarlugit isumaliorlutik’. (Dâniale 7:25; 11:36) Guutilli anersaavata sunniineratigut Isaia 54:17-imi allassimavoq: ’Sakkut tamarmik sorsukkumallutit sananeqartut pilluassanngillat . . . Tamassa Jehovap kiffaasa kingornussassaat.’ Taamaattumik assortuisut tamarmik nikanarsagaassapput, soorlu allat siornatigut nikanarsagaasut. Aappaatigulli, Jehovap innuttami amiakkuullutik inuunissaat inuulluarnissaallu neriorsuutigaa.
Naggatissaq qanippoq
14, 15. (a) Ullut qanoq ilineranni inuuvugut, sioorasaarutillu suut mianersuutigisariaqarpavut? (b) Silarsuup naalakkersuisui naak noqqaaniaraluartut, suna qanillinasuarpa?
14 Taava, Guutip isumaa malillugu qassinngorpa? Silarsuup matuma naggatissaa qanillivoq. Seqernga tarrikkiartorpoq. Unnuaa qanilliartorasuarpoq. Ukioriartulerpoq. Bibelimi siulittuutit eqquussimaneri naapertorlugit, Jehovallu piffissalersuinera naapertorlugu pisimasut malillugit, uppernarsaatit tamarmik nalunarunnaarsippaat ’ulluni kingullerni’, ’pissutsit aaqqissuussaanerata naalerfiani’, inuusugut. (2 Timûtiuse 3:1-5; Matîuse 24:3-14, NW) Taamaattumik Jesusip oqaasii tigusariaqarpavut: ’Qinugitsili qimaaffissarsi ukiuunerani eqquuteqqunagu.’ (Matîuse 24:20) Silarsuup matuma unnuaanera, imaluunniit ukiuunera, nalliuppat, Jehovamut iluaritiffissaarussimassaaq.
15 Silarsuup Guutimik ataqqinaataajaasup matuma nungutitaaffissaa qanillinasuarpoq. Piffissaq nallerpat Jehovap silarsuup naalakkersuisui tamaasa pinngitsaaliinikkut soraarsikkumaarpai. Qanoq peqqusersuitsigigaluarpataluunniit, pilersaarusiaat kinguneqanngitsut sussaanngitsullu taamaatiinnassapput. Naalakkersuisut innuttatik kajumissaarniarsarigaluarpaat sakkutooqarnermut atortunik millisaanissamik isumaqatigiissuteqarniarlutik eqqissinissarlu toqqissisimanissarlu pilersinniarlugit assigiinngitsunik pilersaarusiorlutik, allaallu ukiut aalajangersimasut ’illernartittarlugit’; Guutilli sorsunnissaani Harmagedonimi ajorsartitaalluinnarnissaminnut uninnatik ingerlaannarput. — sarĸúmersitat 16:13-16.
16. Silarsuarmut naalakkersuinermik piginnaaneq Jehovap kimut tunniuppaa?
16 Eqqaamaniarulli Jehovap ’kunngit peersittarinnanngikkai’ aammattaarli ’kunngit ivertittarai’. (Dâniale 2:21) Qilammiorpassuit Jehovap Harmagedonimi eqqartuussutini naammassissallugu kiffarisassaasa siulersortigissavaat Naalakkersuisoq Guutip nunarsuarmut tamarmut ’ivertissimasaa’. Tassaana ernera ilumoortoq, Kristus Jesus, maanna qilammi pissaanermik naalannassusermillu piginnittoq. sarĸúmersitat 19:16-imi taaneqarpoq ’kunngit Kunngiat naalakkallu Naalagaat’. Dâniale 7:14-imi allassimavoq: ’Tunineqarporlu naalagaassusermik naalannarsusermillu naalagaaffimmillu, inuiaqatigiit tamarmik akimanngitsullu immikkullu oqaasillit kiffartuussagaat taanna; naalagaassusia soraarnavianngilaq aserfallassananilu, naalagaaffialu aserujuippoq.’ — Aamma takuuk Dâniale 2:44.
17, 18. (a) Guutimik Guutillu nunarsuatsinnut naalakkersuisunngortitaanik akuersiumanngitsut qanoq pineqassasut Guutip oqaasiani allassimava? (b) Aamma kia nalunngilaa piffissakitsoq?
17 Jehovamik taassumalu nunarsuarmut naalakkersuisunngortitaanik akuersiumanngitsut qanoq pineqarumaarnissat Guutip oqaasiani siulittuutaasumi nassuitsumik oqaluttuarineqarpoq. Allassimavoq: ’Inngili takuara seqinermi qeqartoq; taanna nipituumik torlulavoq timmissanut qilaap missaagut timmisunut tamanut oqarluni: Qaallusi Guutip unnukkut nerliiassiaanut angisuumut katersoritsi, kunngit neqaat sakkutuullu naalagaanerisa neqaat nakuarsuillu neqaat qimuttuarsuillu qaannilu issiasut neqaat tamarmillu kiffaanngitsullu kiffaasullu mikisullu angisuullu neqaat nerissallugit.’ — sarĸúmersitat 19:17, 18.
18 Jerimiap agdlagaine 25:33-mi tamanna imaattumik allaatigineqarpoq: ’Jehovap toqutai taamanikkut nunamiikkumaarput isuanit isuatalu aappaanut; qianeqarnatillu katersorneqarnatillu ilivermut ilineqassaanngillat; anartut issapput nunap qaani.’ Aap, Satanip pissutsinik aaqqissuussinerata ajortunngorsimasup tamarmiusup matulerfissaa nalliutileqaaq. Taassumalu nammineq tamanna nalunngilaa! sarĸúmersitat 12:12-imi allassimavoq ’piffissakissutsi nalunngikkaa’.
Jehova maanna ujaruk
19. Aaqqissuussineq maannakkut atuuttoq naareerpat, ulloq suna ukiullu qanoq ilinera aallartissappat?
19 Satanip aaqqissuussinerata unnuaa, imaluunniit ukiua, qaangiuppat, taava? Taava piffissanngorsimassaaq Jehovap ullussamik nutaamik neriulluarnartumik nuilersitsinissaanut, pissanganartumik upernalersitsinissaanut. Piffissanngorsimassaaq Jehovap aaqqissuussinissaata naapertuilluartup nutaap aallartilernissaanut, Kunngioqqusaata qilammiup, Kristusip Jesusip, naalakkersuinera aqqutigalugu. Aaqqissuussinissami nutaassami tassani nakuuserneq, naapertuilluanngissuseq, naalliunneq, nappaatit toqulu peqarunnaassapput. Inuit naammalluinnartunngorsagaassapput, inuunermik naassaanngitsumik neriugisaqarlutik. Qilanaarisap ila nuannissusissaa! — Tussiaat 37:10, 11, 29; sarĸúmersitat 21:4.
20, 21. Inuit amerlasoorsuanngortut inuiaqatigiinnit tamaneersut qanoq ilillutik maanna Jehova ujarpaat?
20 Aaqqissuussinerli maannakkut atuuttoq naanngikkallartoq aaqqissuussinissarlu nutaassaq aallartinngikkallartoq, Jehovap nallersiisaa nalliussimavoq nunami ilalaartortaasut pillugit iliuuseqarnissaanut. Piffissangortippaa Jehovamik ilisarserusuttut, naalallutik piumasaanik iliorusuttut, taassumalu kunngioqqusaanut naalatsigitillutik pallorusuttut katersorneqarnissaannut. Taamaaliorlutik Jehovamit sernissugaalerput: ’Jehovap aqqa qaqiffiliaavoq pisaanaveerfik; iluartoq tassunga arpattaraaq pineqarnaveersitaallunilu.’ — ússatit 18:10.
21 Ullumikkut inuit amerlasuunngorlutik — millionikkuutaarlutik — taamaaliorrapput. Nunami inuiaqatigiinnit tamaneersuupput. Saggariap agdlagaine kapitali 8-mi, versillu 20-mi 21-milu allaatigineqarput: ’Ima oqarpoq Jehova katersaarsuit Guutiat: Suli tassa aggersoqartassaaq inuiaqatigiinnik ungaluukkallu amerlasuut inuinik; ungaluukkat arlaata inuisa ornikkumaaraat arlaata inui oqarlutik: Qaa, Jehova qinnuigiartortigu, Jehova katersaarsuit Guutiat ujarniarlugu.’ Versi 23-mi oqaatsit imannak ilaneqarput: ’Taamaalisukkut [aap, uagut nalitsinni] akimanngitsut immikkut oqaasillit tamalaat angutitaasa quliullutik angut juutiusoq [Jehovamik unnersiutiginnittut tanitaasut] unitsinniarumaarpaat atisaata nuuagut [isuagut] tigullugu, oqarlutik: Ingerlaqatigilassi, tusaamagatta Guutip najoraasi.’
22. Ullormi Jehovap kamannerata piani annakkusukkutta, suna pingaartittariaqarparput, qanorlu iliortariaqarluta?
22 Taamaattumik, Jehova innuttai ilagalugit pallorfigiartoruk, taassumalu toqqissisimaffiutitaanut aggerit. Suliassat ullumikkut nunarsuarmi ingerlatinneqartut pingaarnerpaavannut suleqataaniarit: Harmagedonimi amiakkuullutik inuujumaartussanik immikkullu pisinnaatitaaffigalugu nunami paratiisinngortitseqataajumaartussanik naassaanngitsumillu tassani inuujumaartussanik maannakkut katersuinissamut perorsaanissamullu. Qanoq ilinera nallersiisallu suut nalliussimanerat paasisimagakku pingaartiguk, kaammattuullu Isaia 55:6-imi allassimasoq malillugu: ’Jehova ujarsiuk nanisassaatillugu; torlorfigisiuk qanitsillugu.’ Aap, ’Jehova ujarsiuk, nunami ilalaartortaasusi tamassi-aa, ileqqoreqqusaanik maleruaasusi; iluarnissaq ilungersuutigisiuk, ilalaarnissaq ilungersuutigisiuk; isertugassaajumaarnersusi Jehovap kamannerata ulluani.’ — Sivfânia 2:3. (wD 15/4 86)
Apeqqutit uteqqitassat
□ Suut pissutigalugit silarsuarmi pisortaanerit oqippallaartut Jehovap paasisimavai?
□ Suna pissutigalugu Jehovap kiffaasa qanoq iliffissat nallersiisallu taassuma aalajangersartagai nalunngilaat, uffa silarsuup naalakkersuisuisa nalugaat?
□ Suup ilinera nallersimava Jehovap isumaa naapertorlugu?
□ Suna pillugu qanorlu ililluta maanna Jehova ujartariaqarparput?
[Qupp. 14-mi assiliartaq]
Maannakkut upperlutik suliaqartut amerlasuut silarsuup matuma naggatissaani annakkumaarput