Talentit pillugit assersuusiaq ilinniarfigiuk

1, 2. Sooq Jiisusi talentit pil­lugit as­sersuusior­pa?

JIISUSIP ajoqersuk­kat tanitaasut akisus­saaf­fiat erseq­qis­sarusuk­kamiuk talentit as­sersuusiarai. As­sersuusiarli taman­na Jiisusip ajoqersugaanut tamanut at­tuumas­suteqar­poq. Taamaat­tumik qilaliar­nis­samik nunarsuarmiluun­niit naas­saan­ngitsumik inuunis­samik neriugisaqaraluarut­ta as­sersuusiap tamatuma isumaa paasisariaqar­par­put.

² Qanga Jiisusip as­sersuusiaq taman­na oqalut­tuaraa? Kun­ngin­ngorsimanerminut nalunaaqut naggatis­sal­lu nalaata aal­lar­tif­fia ajoqersuk­kaminut oqalut­tuarigamigit. (Matt 24:3) Taamaat­tumik talentit pil­lugit as­sersuusiaq nalunaaqum­mut tamatumun­nga ilaal­lunilu nalitsin­ni eq­quup­poq.

3. As­sersuusiat Mat­thæusip al­lagai 24:45-miit 25:46-mut al­las­simasut qanoq ilin­niarfigisin­naavavut?

³ Talentit pil­lugit as­sersuusiorami as­sersuusiat al­lat pingasut naggatis­sap nalaani nalunaaqutaasus­samut ilaasut aam­ma Jiisusip oqalut­tuarai. As­sersuusiat tamarmik ajoqersuk­kami pis­suserisariaqagaan­nik aalajangersimasunik ersersitsip­put. As­sersuusiat taak­ku Mat­thæusip al­lagai 24:45-miit 25:46-mut atuar­neqarsin­naap­put. As­sersuusiaq siul­leq inus­siamut aalajaatsumut, angutinut tanitanut amerlan­ngitsunut Jehovap in­nut­taanik ilin­niar­titsinis­samik akisus­saaf­filin­nut, tun­ngavoq. Taak­ku aalajaattariaqarlutillu silatusariaqarput.a As­sersuusiap tul­lia niviarsianut qulinut tun­ngavoq. Tamatumani ul­loq nalunaaqut­tap-akun­neraluun­niit tikiuf­fis­sani ilisimaneqan­ngim­mat Jiisusip tanitani tamaasa piareersimaqqullugit eqqumaqqullugillu oqaaq­qis­saar­pai.b Tamatuma kingor­na Jiisusi tanitat kristumiutut akisus­saaf­fim­min­nik isumagin­nin­nermin­ni tamaviaarlutik sulinissaannik ilin­niar­tin­niarlugit talentit pil­lugit as­sersuusior­poq. Taava Jiisusi savat savaasal­lu pil­lugit as­sersuusior­poq, taan­nalu nunarsuarmi naas­saan­ngitsumik inuunis­samik neriugisalin­nut tun­nganeruvoq. Taak­kua ilumoortariaqarnerat tanitaminil­lu sapin­ngisamin­nik pitsaaner­paamik ikiuisariaqar­nerat ersersip­paa.c Al­laaserisami matumani talentit pil­lugit as­sersuusiap isumaa nas­suiar­neqas­saaq.

ANGUTIP KIFFANI ANINGAASARPASSUARNIK TUNIVAI

4, 5. As­sersuusiami angut kimut in­nersuus­sutaava, talentilu suua?

⁴ Matthæusip allagai 25:14-30 atuakkit. Jiisusip talentit pil­lugit as­sersuusiamini angut aal­lar­toq eq­qar­tor­paa. As­sersuusiamut tamatumun­nga as­singusumi Jiisusip angut kun­ngin­ngor­niarluni aal­lar­toq eq­qar­tor­paa.d (Luk 19:12) Ukior­pas­suar­ni Biibililersaarutitsin­ni eq­qar­tor­neqar­tar­poq as­sersuusiani taak­kunani marlun­ni angutit Jiisusimut, ukiumi 33-mi qilaliar­tumut, in­nersuus­sutaasut. Jiisusili qilaliarami ingerlaan­naq kun­ngin­ngun­ngilaq. ‘Akeq­qami isik­kaminut tum­marfiliun­neqar­nis­saata’ tungaanut, 1914-imut, utaq­qivoq. — Hebr 10:12, 13.

⁵ Jiisusip as­sersuusiamini angut arfineq-pingasunik talentiutilik eq­qaavaa. Taak­ku aningaasar­pas­suup­put.e Angutip aal­lan­ngin­nermini aningaasat taak­ku kif­faminut tun­niup­pai. Oqarfigai suli amerlanerusunik aningaasarsior­nis­samut atus­sagaat. Angutip aningaasat naleqar­tingaar­pai, taamatut­taaq Jiisusi aalajangersimasumik naleqar­titaqar­poq. Suna naleqar­tutut isigigamiuk? Nunarsuarmiin­nermini suliani.

6, 7. Talentit sumut in­nersuus­sutaap­pat?

⁶ Jiisusip oqaluus­sineq pingaar­tik­kamiuk inup­pas­suit taas­sumun­nga ajoqersugan­ngor­put. (Lukasi 4:43 atuaruk). Inuit amerlanerusut nutaarsias­samik nuan­nersumik tusar­nis­saat ilisimagamiuk oqaluus­sisoqar­nerusariaqar­nera nalun­ngilaa. Taamaat­tumik ajoqersuk­kani ima oqarfigai: “Isisi uisis­sigit narsaatil­lu qimerloorlugit, qaqor­tis­simap­put katersuif­figeriaan­nan­ngorlutik.” (Joh 4:35-38) Naasoris­saal­laq­qis­sup narsaat katersuif­figeriaan­nan­ngor­toq im­miniigin­nar­navian­ngilaa. Taamaat­tumik Jiisusip taamatut isigin­nit­taaseqar­nini pis­sutigalugu qilalian­ngin­nermini ajoqersuk­kani ima peq­quai: ‘Taamaat­tumik aal­larlusi ajoqersugan­ngor­titsigitsi.’ (Matt 28:18-20) Taamaalil­luni ajoqersuk­kani erlin­nar­tumik, tas­sa oqaluus­sinis­samik akisus­saaf­fim­mik, tunivai. — 2 Kor 4:7.

⁷ Soorlu angutip aningaasaatiminut tun­ngatil­lugu kif­fani akisus­saaf­filerai taamatut­taaq Jiisusip ajoqersuk­kani tanitat ajoqersugan­ngor­titsior­tor­nis­samik akisus­saaf­filer­pai. (Matt 25:14) Taamaat­tumik talentit oqaluus­sinermik ajoqersugan­ngor­titsior­tor­nis­samil­lu akisus­saaf­fim­mut in­nersuus­sutaap­put.

8. Kif­fat aningaasanik as­sigiin­ngitsunik tunineqaraluar­tut naalak­kap suna piumasaraa?

⁸ Jiisusi oqar­poq naalak­kap kif­famut siul­lermut talentit tal­limat kif­fal­lu aap­paan­nut talentit marluk kif­fal­lu pingajuan­nut talenti ataaseq tun­niuk­kai. (Matt 25:15) Naalak­kap kif­fat tamaasa aningaasanik as­sigiin­ngitsunik tunivai, sapin­ngisamin­nil­li suli amerlanerusunik aningaasarsior­nis­saat piumasaralugu. Taamatut­taaq Jiisusip ajoqersuk­kat tanitat sapin­ngisamin­nik oqaluus­sinis­saat piumasaraa. (Matt 22:37; Kol 3:23) Ukiumi 33-mi piinsip ul­luani Jiisusip ajoqersugai inuian­nik tamaneersunik ajoqersugan­ngor­titsior­torlutik aal­lar­tip­put. Biibilimilu atuak­kamit apustilit al­lagaan­nit tamaviaarlutik sulinerat erser­poq.f — ApS 6:7; 12:24; 19:20.

NAGGATISSAP NALAANI KIFFAT TALENTIT NIOQQUTIGAAT

9. (a) Kif­fat aalajaatsut marluk aningaasat qanoq ator­paat, taman­nalu qanoq ilin­niarfigisin­naavar­put? (b) Nunarsuarmi naas­saan­ngitsumik inuunis­samik neriugisal­lit susariaqar­pat?

⁹ Kif­fat siul­liit marluk naalak­kamik aningaasaataanik atorluaasut angutinut ar­nanul­lu tanitanut naggatis­sap nalaani aalajaat­tuar­tunut in­nersuus­sutaap­put. Ingam­mik 1919-imiil­li sapin­ngisamin­nik oqaluus­sisarsimap­put. As­sersuusiami kif­fat marluul­lutik aningaasanik as­sigiin­ngitsunik tunineqar­put, imaan­ngilarli eqimat­tanik marlun­nik aalajaatsunik tanitaqar­toq. Kif­fat marluul­lutik tamaviaarlutik sulip­put aningaasal­lu marloriaatin­ngor­til­lugit. Tanital­li kisimiil­lutik oqaluus­sis­sal­lutil­lu ilin­niar­titsis­sap­pat? Naamik. Jiisusip savat savaasal­lu pil­lugit as­sersuusiaanit paasivar­put nunarsuarmi naas­saan­ngitsumik inuunis­samik neriugisal­lit qatan­ngutit tanitat oqaluus­sinermi ikior­tariaqarlugil­lu ilumoorfigisariaqaraat. Taak­kunin­nga suleqateqar­neq ataq­qinaatitut isigaat. Aap, Jehovap in­nut­tai ‘katersaap­put ataatsit’ tamarmil­lu sapin­ngisamin­nik oqaluus­sil­lutil­lu ajoqersugan­ngor­titsior­tor­put. — Joh 10:16.

10. Nalunaaqutip ilaata suup ersersip­paa naggatis­sap naggataatungaani inuusugut?

¹⁰ Jiisusip ajoqersuk­kat tamarmik sapin­ngisar­tik naaper­torlugu amerlanerusunik ajoqersugan­ngor­titsior­tor­nis­saat piumasaraa. Ajoqersuk­kat siul­liit taamaalior­put. Naggatis­sap matuma nalaani Jiisusip talentit pil­lugit as­sersuusiaata eq­quuk­kiar­tor­nerani ajoqersugai oqaluus­sip­pat? Aap, inuit aatsaat taama amerlatigisut nutaarsias­samik nuan­nersumik tusarlutil­lu ajoqersugan­ngor­put! Jiisusip ajoqersugaasa tamaviaarlutik sulinerat pis­sutigalugu ukiut tamaasa inuit 200.000-nit amerlanerusut kuisit­tar­put. Aam­ma taak­ku oqaluus­seqataasar­put. Jiisusip naggatis­sap naggataatungaanut nalunaaqum­mut eq­qaasaanut oqaluus­sinerup pingaaruteqar­nera iliuuserineqar­tor­pas­suar­nit angusaqarluar­ner­nil­lu erser­poq. Jiisusip sulisuminik iluarin­nin­nera qular­nan­ngilaq!

QAQUGU NAALAGAQ TIKIUTISSAVA?

11. Sooq oqarsin­naavugut Jiisusi an­nikil­lior­nar­tus­sarsuarmi tikiutis­sasoq?

¹¹ Jiisusi ima oqar­poq: “Kingunerujus­suatigut kif­fat taak­kua naalagaat tikiuppoq paarisaan­nik naatsorsueqatigilerlugit.” (Matt 25:19) Naalagaq, Jiisusi, an­nikil­lior­nar­tus­sarsuup naggataani taamaalius­saaq. Sooq taamatut oqarsin­naavugut? Mat­thæusip al­lagaani kapitalini 24-mi 25-milu siulit­tuum­mi Jiisusip tikiun­nis­sani arlaleriarluni oqaatigim­magu. As­sersuutigalugu oqar­poq inuit “Inuup Er­nera qilaap nuiaasigut aggersoq” isigiumaaraat. Taman­na an­nikil­lior­nar­tus­sarsuarmi Jiisusip inun­nik eq­qar­tuus­sineranut in­nersuus­sutaavoq. Aam­ma ajoqersuk­kani naggatis­sap nalaani inuusut eq­qumaq­qul­lugit ima oqaaq­qis­saar­pai: ‘Naluarsi ul­loq Naalak­kas­si tikiuf­fis­saa’ aam­ma ‘Inuup Er­nera tikiutis­saaq nalunaaqut­tap-akun­nerani ilimasuf­figin­ngisas­sin­ni’. (Matt 24:30, 42, 44) Taamaat­tumik Jiisusip talentit pil­lugit as­sersuusiamini aam­ma pif­fis­samut inun­nik eq­qar­tuus­siar­torluni Saatanil­lu silarsuaanik suujun­naarsitsiar­torluni tikiun­nis­sani pivaa.g

12, 13. (a) Naalagaq kif­fanut marlun­nut qanoq oqar­pa, aam­ma sooq? (b) Qaqugu tanitat inaarutaasumik naqis­suser­neqas­sap­pat? (Takuuk ungalusaq “Toqunermin­ni qin­ngaq­qun­nan­ngitsutut eq­qar­tuun­neqas­sap­put”). (c) Tanitanik tapersersuisut qanoq akis­sarsisin­neqas­sap­pat?

¹² Naalak­kap angalareerluni uterami paasivaa kif­faq talentinik tal­limanik tunisani tal­limanik al­lanik iluanaaruteqarsimasoq kif­farlu talentinik marlun­nik tunisani marlun­nik al­lanik iluanaaruteqarsimasoq. Naalak­kap ataasiak­kaarlugit ima oqarfigai: “Ajun­ngilaq, kif­faasutit pitsaasoq ilumoor­torlu, an­nikitsutigut ilumoorsimagavit amerlasuunut pisor­tan­ngor­tis­savak­kit.” (Matt 25:21, 23) Naalagaq, Jiisusi, siunis­sami tikiuk­kuni sus­sava?

¹³ An­nikil­lior­nar­tus­sarsuup aal­lar­tin­ngitsiar­nerani Guutip tanitat tamaviaarlutik sulisut taamanik­kus­samul­lu suli nunarsuarmiit­tut inaarutaasumik akueris­savai, tas­sa naqis­susis­savai. (Saqq 7:1-3) Harmagedoni sioq­qutitsiarlugu Jiisusip qilam­mut makitin­nerisigut akis­sarsisis­savai. Nunarsuarmimi naas­saan­ngitsumik inuunis­samik neriugisal­lit oqaluus­sinermi tanitanik tapersersuisimasut suneqas­sap­pat? Savatut eq­qar­tuun­neqarsimas­sap­put. Aam­ma Guutip naalagaaf­fiata naalak­kersuinerani nunarsuarmi inuunis­samik akis­sarsisin­neqas­sap­put. — Mat­t 25:34.

KIFFAQ AJORTOQ EQIASUTTORLU

14, 15. Jiisusi oqamisaar­pa tanitat amerlasuut ajor­tun­ngorlutil­lu eqiasut­tun­ngus­sasut? Nas­suiaruk.

¹⁴ As­sersuusiami aam­ma inus­siaq talentimik ataatsimik tunineqar­toq eq­qaaneqar­poq. Taas­suma talenti naalak­kaminut aningaasarsiuutis­satut ator­nagulu er­nianik iser­titaqar­niarluni aningaaserivim­mut tun­niutin­ngilaa. Paarlat­tuanik aningaasat nunamut matoor­pai. Naalak­kap kif­faq ajor­tutut eqiasut­tutul­lu taavaa. Kif­faq ajor­toq talentimik arsaariarlugu kif­famut siul­lermut tun­niup­paa. Taava kif­faq ajor­toq “taar­nersuarmut” pisip­paa, kif­farlu tas­sani isumatsas­simanermik qiavoq. — Matt 25:24-30; Luk 19:22, 23.

¹⁵ Jiisusip kif­fat pingasut ilaat ajor­tutut eqiasut­tutul­lu taagamiuk tanitat pingajorar­terutaasa kif­fatut taas­sumatut in­nis­saat oqaatigin­ngilaa. As­sersuusiap tamatuma al­lanut marlun­nut naleq­qiun­neratigut taman­na nalun­ngilar­put. Inus­siaq aalajaal­lunilu silatooq pil­lugu as­sersuusiami Jiisusip inus­siaq ajor­toq inus­sianik al­lanik malersuisoq eq­qaavaa. Jiisusip matumani inus­siamut aalajaal­lunilu silatuumut ilaasut ilaasa ajor­tun­ngor­nis­saat pin­ngilaa. Paarlat­tuanik tanitat inus­siatut ajor­tutut ajor­tun­ngun­ngin­nis­saat pil­lugu mianersoq­quai. Taava niviarsiat qulit pil­lugit as­sersuusiami Jiisusip niviarsiat tal­limat sianiitsut eq­qaavai. Matumani tanitat af­faat sianiitsun­ngor­nis­saat pin­ngilaa. Paarlat­tuanik piareersiman­ngip­pata eq­quman­ngip­patalu Jiisusip qanoq pisoqar­nis­saanik mianersoq­quai.h Taamatut­taaq talentit pil­lugit as­sersuusiami Jiisusip tanitat amerlasuut ul­luni kingul­ler­ni ajor­tun­ngorlutil­lu eqiasut­tun­ngor­nis­saat pin­ngilaa. Tanital­li oqaluus­sinermin­ni sapin­ngisamin­nik iliuuseqar­nias­sam­mata kif­fatut ajor­tutut iliuuseqan­ngin­nis­saat pil­lugu mianersoq­quai. — Matt 25:16.

16. (a) Talentit pil­lugit as­sersuusiaq marlutsigut qanoq ilin­niarfigaar­put? (b) Talentit pil­lugit as­sersuusiap paasinis­saanut al­laaserisaq qanoq iluaqutigaar­put? (Takuuk ungalusaq “Talentit pil­lugit as­sersuusiaq qanoq paasisariaqar­pa?”).

¹⁶ Talentit pil­lugit as­sersuusiaq marlutsigut qanoq ilin­niarfigaar­put? Siul­ler­tut, Jiisusip ajoqersuk­kani tanitat erlin­nar­tumik, oqaluus­sinermik ajoqersugan­ngor­titsior­tor­nis­samil­lu akisus­saaf­fim­mik, tunivai. Aap­paat­tut, tamat­ta sapin­ngisar­put naaper­torlugu oqaluus­sinis­sar­put piumasaraa. Aalajaal­luta piner­tusaarlutalu oqaluus­sigut­ta aam­ma Jiisusimut naalal­lutalu ilumoorfigin­nik­kut­ta taas­suman­nga akis­sarsisin­neqar­nis­sar­put qularin­ngis­sin­naavar­put. — Matt 25:21, 23, 34.