Jesusip unnerluussisini akivai

Jesusip inuunera ajoqersuineralu

ULLORMI sabbatimi Jesusip angut ukiuni 38-ni napparsimasimasoq ajorunnaarsippaa. Taamaaliormat juutit upperisarsiornerup tungaatigut pisortaasa sabbatisiunngitsoornerarlugu pasillilerpaat. Kisianni Jesusip akivai: „Ataataga manna tikillugu sulimmat uangattaaq sulivunga.“

Farisiiarit unnerluussutaanut akerliusumik Jesusip ajunngitsuliai inatsisinit sabbatisiornermut tunngasunit inerteqqutigineqanngillat. Guutip oqaluusinissaanik ajorunnaarsitsisarnissaanillu peqqusimavaa, Jesusillu ullut tamaasa taamaaliornermigut Guuti malinniartarpaa. Akissutaata juutit suli kamannerulersippai, toqutaanissaalu ilungersuutigilerpaat.

Taamaaliorput isumaqaramik Jesus sabbatisiunngitsuuinnarnani aammattaarli Guutip Ernituarigaani oqarami Guutimik mitallersuusoq. Jesus qunusuilluni nangippoq oqaluttuullugillu Guutimut qanittumik attaveqarnini pillugu. „Ataatammi Erneq asavaa, qanoq iliorninilu tamaasa taassumunnga takutittarpai,“ oqarpoq.

„Soorlumi Ataatap toqusut makitittarai,“ Jesus nangippoq, „taamattaaq Ernerup piumasani uummartittarpai.“ Aap, Ernerup anersaakkut paasillugu toqusut makitittalereerpai! „Oqaatsinnik tusartoq aallartitsisigalu upperalugu,“ Jesus oqarpoq, „toqumit inuunermut nuussimavoq.“ Nangillunilu oqarpoq: „Ullut nalliukkumaarput, maannakkummi nalliussimapput, taava toqusut Guutip ernerata nipaa tusarumaarpaat, tusartullu inuussapput.“

Sumiluunniit allassimasoqanngilaq Jesusip taamanikkut tikillugu toqusunik makititsisimaneranik, kisianni unnerluussisini oqaluttuuppai eqqortumik oqaatigalugu toqusunik makiffissaqarumaartoq. Oqarpoq: „Tamanna tupigusuutigissanngilarsi, ullut nalliukkumaarmata, taava iliverniittut tamarmik taassuma nipaa tusarumaarpaat, anillutillu makissapput.“

Qularnanngitsumik Guutip siunertaani inissisimaffini pingaaruteqartoq Jesusip aatsaat taama ersaritsigisumik nassuiarpaa. Unnerluussisuili Jesusip nalunaajaataata saniatigut allamik uppernarsaatissaqaraluarput. „Johannesimut aallartitsigassi taassuma sallusuissut nalunaajaassutigaa,“ Jesusip eqqaasippai.

Ukiut marluinnaat tamatuma siornagut Johannes Kuisisup kingunermigut takkutussaq pillugu juutit upperisarsiornerup tungaatigut pisortaat oqaluttuussimavai. Jesusip eqqaasippai qanoq Johannes, maanna parnaarussaasoq, ataqqitigisimagitsik oqarlunilu: „Ilissi qaamanera qilannguamik [sivikitsumik] nuannariniarparsi.“ Tamanna Jesusip taakkununnga eqqaasitsissutigaa ikiornissaat, aap annaannissaat neriuutigalugu. Johannesilli nalunaajaatai kisiisaanngitsoq innersuussutigisinnaavai.

„Suliat tamakkua suliarisama (tupinnartuliarisaa aatsaannguaq ilanngullugu) nalunaajaassutigaannga Ataatap aallartikkaanga,“ Jesusi oqarpoq imalu nangilluni: „Ataatallu aallartitsisima nammineq nalunaajaassutigaanga.“ Assersuutigalugu, Jesusi kuisimmat nalunaajaassutigalugu Guuti oqarsimavoq: „Tassa ernera asanartoq nuannarisara.“ Jesusip unnerluussisuisa taassuminnga ajattuinissaminnut pissutissaqanngilluinnarput. Allaat allakkat farisiiarinit atuaqqissaarneqarnerartut Jesusi nalunaajaassutigaat! „Mosesimi upperigussiuk uangattaaq uppereqqajaqaassinga,“ Jesusi oqarpoq, „uannik allammat. Taassumali allagai upperinnginnassigik qanormi taava oqaatsikka upperissavisigik?“ Johannes 5:17-47; 1:19-27; Mattæus 3:17. (wD 1/7 86)

◆ Suna pillugu Jesusip suliai sabbatimik inatsisinik unioqqutitsinerunngillat?

◆ Qanoq ililluni Guutip siunertaani inissisimaffini pingaaruteqartoq Jesusip nassuiarpaa?

◆ Nalunaajaatit suut Jesusip uparuarpai uppernarsarumallugu nammineq Guutip ernerigaani?