Utoqqaanertat, naapertuilluartumik eqqartuussissaasi

„Eqqartuussisutigut suliassaqaraangat akerleriit tamaasa killisiortassavasi naapertuilluartumillu eqqartuussissallusi.“ — 5 MOSES 1:16.

1. Eqqartuussinermik pisinnaassusiliineq suna pisimava, tamannalu inunnut eqqartuussisussanut qanoq isumaqarpa?

EQQARTUUSSISUP qutsinnerussaartup Jehovap ernini eqqartuussinissamik pisinnaassuseqartissimavaa. (Juánase 5:27) Aammattaaq, kristumiut ilagiissaannut niaqqutut, Kristusip ’inussiaq aalajaallunilu silatooq’ katersaasoq taakkualu Siulersuisoqatigiivi atorlugit utoqqaanertat, ilaannikkut eqqartuussisutut suliassaqartariaqartartut, toqqartarpai. (Matîuse 24:45-47; 1 Korintumiut 5:12, 13; Títuse 1:5, 9) Taakkua eqqartuussisutut sinniisutut Eqqartuussisut qilammiusut Jehovap Jesus Kristusillu maligassiaat maleruaqqissaartariaqarpaat.

Kristus — Eqqartuussisoq maligassaalluartoq

2, 3. (a) Messias pillugu siulittuutip suup takutippaa Kristusip eqqartuussinissamut piukkunnarnera? (b) Ingammik suut malugineqartariaqarpat?

² Kristusip eqqartuussisuunera siulittuutaasumik ima allaatigineqarsimavoq: „Najortuassavaa [Jehovap] anersaavata, anersaap ilisimanartup siuneqarnartullu, anersaap siunnersuisup paasisitsisullu, anersaap [Jehovamik] ilisarsisitsisup mianerinnitsitsisullu. Kajungerissavaa [Jehovamik] mianerinninneq; eqqartuussissanngilaq isimi isigisaat najoqqutariinnarlugu, aalajangiissananilu siutimi tusagaat maliinnarlugu. Nikanartut eqqartuutissavai eqqortumik pineqartillugit, nunamilu piitsut naapertuilluartumik iliorfigalugit.“ — Jesaja 11:2-4.

³ Malugeriakkit siulittuut naapertorlugu pissutsit suut ikiortigalugit Kristusip ’inuit najugaat naapertuilluarluni eqqartuukkumaaraa’. (apustilit suliáinik agdlagkat 17:31) Jehovap anersaava, ilisimassuseq Guutimeersoq, paasinninneq, siunnersuineq ilisimassullu najoqqutaralugit eqqartuussissaaq. Malugeriarullu Jehovamik mianerinnilluni eqqartuussissasoq. Taamaattumik ’Kristusip issiavia eqqartuussivia’ ’Guutip issiavianut eqqartuussivianut’ sinniisuuvoq. (2 Korintumiut 5:10; Rûmamiut 14:10) Peqqissaarluni Guutip eqqartuusseriaasia atortarpaa. (Juánase 8:16) Isigisat tusakkallu maliinnarlugit eqqartuussisanngilaq. Assuarnaalluni nikanartut piitsullu iluaqutissaannut eqqartuussisarpoq. Eqqartuussisoq asseqanngitsoq! Aamma inunnut naammalluinnanngitsunut ullumikkut eqqartuussinissamik suliaqartinneqartunut maligaassaalluarpoq!

Eqqartuussisut nunamiusut

4. (a) Kristusip ukiuni tuusintini naalakkersuineratigut 144.000-t ilaatigut sumik suliaqassappat? (b) Siulittuutip suup takutippaa kristumiut tanitaasut ilaat allaat nunamiitsillutik eqqartuussisutut suliaqassasut?

⁴ Allakkat takutippaat kristumiut tanitat killilimmik amerlassusillit, apustilit aqqaneq-marluk aallarniutigalugit, Kristus Jesus ilagalugu ukiuni tuusintini eqqartuussisooqataassasut. (Lúkarse 22:28-30; 1 Korintumiut 6:2; sarĸúmersitat 20:4) 1918-19-imi Israelikkut anersaakkut ittut tanitaasut sinneri nunamiitsillutik namminneq eqqartuunneqarsimapput sulinialerseqqinneqalersimallutillu. (Malaki 3:2-4) Israelikkut anersaakkut ittut taakkua sulinialerseqqinneqarnerat pillugu ima siulittuuteqarsimavoq: „Taava eqqartuussisunik tunissavakkit itsartut, siunnersuisunillu qangatuut.“ (Jesaja 1:26) Taamaalilluni ’qangatuut’ Israelikkut nalaanni iliorsimanermisut Jehovap sinneruttut sulilersut eqqartuussisunik siunnersuisunillu naapertuilluartunik tunisimavai.

5. (a) Anersaakkut Israelikkut sulileqqissitaaneranni kikkut ’eqqartuussisunngortitaappat’, sarĸúmersitat-nilu qanoq allaatigineqarpat? (b) Kikkut nakkutilliisut tanitaasut eqqartuussinermik ikiortarpaat, taakkulu qanoq ilillutik eqqartuussisutut pikkorissarneqartarpat?

⁵ Siullermik ’angutit ilisimatuut’ ’eqqartuussisunngortitat’ tamarmik tassaasimapput utoqqaanertat tanitat. (1 Korintumiut 6:4, 5) Nakkutilliisut tanitat aalajaatsut ataqqinartullu sarĸúmersitat-ni allaatigineqarput ullorissatut Jesusip talerpimmiugisaatut, tassa taassumannga nakkutigineqaramik siulersorneqarlutillu. (sarĸúmersitat 1:16, 20; 2:1) 1935-miilli tanitat ’amerlangaartunit’ amerliartuinnartunit ’annikilliornartussamit angisuumit’ aniguinissamik nunamilu paratiisissami naassaanngitsumik inuunissamik neriugisaqartunit ilumoortumik tapersersorneqalersimapput. (sarĸúmersitat 7:9, 10, 14-17) ’Savaaqqap katernaaffissaa’ qanilliartortillugu amerlangaartut taakkua ilaat amerlasuut Siulersuisoqatigiinnit toqqarneqartalerput nunarsuaq tamakkerlugu Jehovap Nalunaajaasuisa ilagiivini 66.000-init amerlanerusuni utoqqaanertatut eqqartuussisussatullu kiffartuuteqarnissaannut.a (sarĸúmersitat 19:7-9) Ilinniarfiit immikkut ittut ikiortigalugit ’nunassami’ inuiaqatigiissanut akisussaassuseqarsinnaanissaminnik ilinniartinneqartarput. (2 Pîtruse 3:13) 1991-ip naalernerani nunani amerlasuuni Naalagaaffimmik kiffartuuteqarnermik ilinniarfik ingerlatinneqarsimavoq tassanilu eqqortumik suliassanik naliliineq pingaartinneqarsimavoq. Utoqqaanertat eqqartuussisutut kiffartuutillit Jehova Kristus Jesusilu ilumoortumik naapertuilluartumillu eqqartuussisartut malinniaqqissaartariaqarpaat. — Juánase 5:30; 8:16; sarĸúmersitat 19:1, 2.

Eqqartuussisut ’mianerinnillutik saqisut’

6. Utoqqaanertat suliassanik naliliisitat sooq ’mianerinnillutik saqisariaqarpat’?

⁶ Kristus nammineq Jehovamut mianerinnilluni Taassumalu anersaava ikiortigalugu eqqartuussisarpat, utoqqaanertat naammalluinnanngitsut aamma taamaaliortariaqarluinnarput! Naliliisitatut suliassaqartinneqaraangamik ’mianerinnillutik saqisariaqarput’, ’Ataataq kinaassusersiornani eqqartuussisartoq torlorfigalugu’ naapertuilluartumik eqqartuussisinnaanissaminnut ikioqqullutik. (1 Pîtruse 1:17) Eqqaamasariaqarpaat inuit inuunerat, tassa ’tarnaat’ pillugit ’akisussaallutik’. (Eprîarit 13:17) Tamanna eqqarsaatigalugu aamma eqqartuussinerminni kukkunitik pinngitsoortinneqarsinnaagaluartut tamaasa Jehovamut akisussaaffigissavaat. J. H. A. Ebrard Eprîarit 13:17 pillugu nassuiaanermini ima allassimavoq: „Paarsisup nakkutigisani tamaasa pigaattariaqarpai, tamaasalu akisussaaffigissallugit, aamma paarsisoq pisuulluni tammarsimasut. Tamanna akisussaafferujussuuvoq. Oqaatsimik kiffartuuteqartut tamarmik eqqarsaatigilissuk kajumillutik [asseqanngitsumik] atorfik akisussaassuseqarfioqisoq tamanna akuerisimagitsik.“ — Naleqqiukkit Juánase 17:12; Jâko 3:1.

7. (a) Ullumikkut eqqartuussisut suna eqqaamasariaqarpat sunalu anguniartariaqarlugu? (b) Utoqqaanertat Matîuse 18:18-20 sumik ilinniarfigisinnaavaat?

⁷ Utoqqaanertat eqqartuussisariaqartut eqqaamasariaqarpaat suliassani tamani eqqartuussisuviusut tassaasut Jehova Kristus Jesusilu. Eqqaamajuk Israelimi eqqartuussisut ima oqarfigineqarsimasut: „Inuit eqqartuussissutinngilasi, [Jehovali] eqqartuussissupparsi. [Jehova] najuuttarpoq eqqartuussigaangassi. [Jehova] mianerisiuk. . . . Taamaaliunngikkussi aamma ilissi nammineq pisuutitaalersussaavusi.“ (2 Israelikkut oqaluttuarisaanerat 19:6-10) Utoqqaanertat ataqqinnillutik mianerinnillutillu suliassamik naliliisut qularutiginngilluinnartariaqarpaat eqqartuussigaangamik Jehova ilumut ’najuuttartoq’. Aalajangiisarnerat Jehovap Kristusillu suliassamik isumaqarfiginninnerannut assingulluinnartariaqarpoq. Assersuutaasumik nunami ’qilersukkat’ (pisuutitat) ’qilerussaakkallu’ (pinngitsuutitat) tassaasariaqarput qilammi qilersorsimareersut qilerussaarsimareersullu — soorlu Guutip oqaasiani isumassarsiarititaasumi allassimasutigut paasineqarsinnaasoq. Jesusip aqqa tunaaralugu Jehova qinnuigaangamikku, Jesus ikiorniarlugit akornanniittarpoq. (Matîuse 18:18-20; Inuk inuit inuusimasut pingaarnerpaartaat, kapitali 63) Suliassamik naliliinermi pissutsit qanoq inneratigut takuneqarsinnaasariaqarpoq Kristus ilumut akornanniittoq.

Tamatigut paarsisut

8. Savaatit eqqarsaatigalugit utoqqaanertat pingaartumik sumik akisussaaffeqarpat soorlu Jehovap Kristusillu maligassiaanni takuneqarsinnaasoq? (Jesaja 40:10, 11; Juánase 10:11, 27-29)

⁸ Utoqqaanertat tamatigut eqqartuussisuunngillat. Tamatigulli paarsisuupput. Katsorsaasartuupput pillaasartuunatik. (Jâko 5:13-16) Oqaatsip griikerisup (e·piʹsko·pos) nakkutilliisumik isumallip tungaviusumik isumaa tassaavoq sernissuisumik isumassuineq. Theological Dictionary of the New Testament-imi ima nassuiarneqarpoq: „[1 Pîtruse 2:25-mi] oqaatsimut paarsisumut tapiulluni oqaatsip [e·piʹsko·pos]-ip pivaa paarsisup nakkutiginninnera imaluunniit illersuinera.“ Aap, taakkua pingaartumik savaatit nakkutigineqarnissaat, illersorneqarnissaat savaatillu akornanniittuarnissartik akisussaaffigaat.

9, 10. (a) Paulusip qanoq ililluni utoqqaanertat pingaartumik akisussaaffiat erseqqissarpaa, sunalu apeqqutaalerpa? Paulusip apustilit suliáinik agdlagkat 20:29-mi oqaasiisa suna takutippaat, utoqqaanertallu qanoq ilillutik ’eqqartuussisutut’ suliassatik ikinnerulersissinnaavaat?

⁹ Utoqqaanertat Efesusimeersut oqaluffigalugit apustili Paulusip pingaarnersaat erseqqissarpaa: ’Immissinnik taava misissoritsi savarpaallu iluunngaasa misissorlugit, taakkununnga anersaap illernartup ivertikkaasi takusaasartooqqullusi, Guutip ilagiissai nammineq [ernermi aavanik, NV] pissarsiai paareqqullugit.’ (apustilit suliáinik agdlagkat 20:28) Paulusip paarsineq pingaartippaa, pillaaneq pingaartinnagu. Utoqqaanertat ilaasa apeqqut manna eqqarsaatigeqqissaartariaqarpaat: ’Anersaakkut paarsisutut suliassaq ilungersuutiginerusarutsigu taava piffissaq ’eqqartuussinermut’ atortariaqagarput annikinnerussannginnerpa?’

¹⁰ Ilumoorpoq Paulus ’amaqqut sualuttut’ pillugit mianersoqqusisimammat. Taakku ’savarpannik qajassuussinngimmata’ avoqqaarai. (apustilit suliáinik agdlagkat 20:29) Takutippaalu nakkutilliisut aalajaatsut ’amaqqunik’ taakkuninnga ilaasortaajunnaarsitsissasut, aammali takutillugu utoqqaanertat savarpannik ilaasunik allanik ’qajassuussissasut’. Savat ilaat anersaakkut sanngiitsunngorluni Guutimut kiffartorunnaaruni suna pisariaqartippaa — patitsinneq katsorsarneqarnerluunniit, pillaat imaluunniit anersaakkut isumassugaaneq? (Jâko 5:14, 15) Taamaattumik utoqqaanertat akuttunngitsumik anersaakkut paarsinermut piffissaqartariaqarput. Taamaalilluni kristumiut eqqunngitsuliorsimasut pillugit suliassanik naliliinerit sivisunaartut amerlasuut pinngitsoortinneqarsinnaassapput. Aap, utoqqaanertat tuppallersaallutillu nakussatsitsiniaasariaqarput taamaalillutik Jehovap innuttaasa akornanni eqqissineq isumannaassuserlu siuarsarlugit. — Jesaja 32:1, 2.

Paarsisut eqqartuussisullu iluaqutissiuisut

11. Utoqqaanertat ’eqqartuussisuutitat’ sooq kinaassusersiunnginneq ’ilisimassullu pavannga pisoq’ pisariaqartippaat?

¹¹ Kristumiu assuarnartuliortinnagu tamaviaarnerusumik anersaakkut paarsinerup qularnanngitsumik Jehovap innuttaasa akornanni ’eqqartuussisariaqartarneq’ millisissinnaavaa. (Naleqqiuguk Galâsiamiut 6:1.) Taamaakkaluartorli, ajortiliussuseq naammalluinnanngissuserlu pissutaallutik kristumiut nakkutilliisut ilaannikkut eqqunngitsuliornernik naliligassaqartariaqartarput. Suut najoqqutaralugit taamaaliortariaqarpat? Mosesip nalaaniilli kristumiullu siulliit nalaanniilli najoqqutarisat allanngorsimanngillat. Mosesip Israelikkut eqqartuussisuinut oqaaserisimasai suli atuupput: „Nunaqqatigiit akornanni . . . eqqartuussisutigut suliassaqaraangat . . . naapertuilluartumik eqqartuussisassaasi. Eqqartuussisaraangassi nakerisarsiortassanngilasi!“ (5 Moses 1:16, 17) Kinaassusersiunnginneq tassaavoq ’ilisimassummut pavannga pisumut’ ilisarnaatit ilaat, ilisimassut utoqqaanertat suliassanik naliliisariaqartartut pisariaqartilluinnagaat. (Jâko 3:17; Ussatit 24:23) Ilisimassut tamanna ikiortigalugu sanngiissuseq ajussuserlu immikkoortissinnaassavaat.

12. Eqqartuussisut sooq naapertuilluaannarnatik aamma ajunngitsuusariaqarpat?

¹² Utoqqaanertat Jehovap eqqortoq eqqunngitsorlu pillugit najoqqutassiai naapertorlugit ’naapertuilluartumik eqqartuussisariaqarput’. (Tussiaat 19:10) Tassa naapertuilluarniarlutik ilungersortillutik aamma ajunngitsuuniartariaqarput, Paulusip Rûmamiut 5:7, 8-mi pissutsinik immikkoortiterinera malillugu. Qinerlerfiassiami Insight on the Scriptures-mi oqaatsimut „Naapertuilluassuseq“-mut tunngatillugu versit taakku ima nassuiarneqarput: „Oqaatsip griikerisuup atorneqarnerata takutippaa inuk ajunngissutsimik ilisarnaatilik tassaasoq ajunngitsuliorumatooq (allat ajunngitsuliorfiginissaannut iluaqutissinnissaannulluunniit kajumittoq) ikiuiumatoorlu (suliamigut ajunngissuseq tamanna ersersikkaa). Naapertuilluarniaannarnani aamma allanut peqqinnartumik isumatussuseq iluaqutissaannillu iliuuseqarusussuseq pissutigisarlugit.“ (Atuagaq 2, qupperneq 809) Utoqqaanertat naapertuilluaannarnatik aamma ajunngitsut eqqunngitsuliorsimasunik saamasumik inussiarnersumillu iliorfiginnittassapput. (Rûmamiut 2:4) Naakkinnissallutillu misiginneqataassapput. Sapinngisamik eqqunngitsuliortoq peqqissiminissap pisariaqassusianik paasinneqqullugu ikiorniassavaat, naak immaqa ilungersornitik aallaqqaammut ilassilluanngikkaluaraaluunniit.

Suliassanik naliliinermi eqqortumik periaaseq

13. (a) Utoqqaanertap eqqartuussisutut suligaangami suna pinngitsoortittariaqarpaa? (b) Paulus suliassanik naliliiniarnernut tungatillugu qanoq siunnersuiva?

¹³ ’Eqqartuussinissaq’ pisariaqarpat nakkutilliisut eqqaamasariaqarpaat suli paarsisuullutik, Jehovap savaatai iliorfigalugit, ’savanik paarsisup ajunngitsup’ ataani. (Juánase 10:11) Paulusip ajornartorsiutillit ikiorneqarnissaannik unnersuussutaa ’eqqartuussinissatulli’ pingaartigaaq. Ima allassimavoq: ’Qatanngutikka, inuk misiginngitsoorluni pinerlukkaluarpat, taava ilissi anersaamut atasusi iluarsisinniarsiuk anersaamik qanilaartumik, misissorlutilli illittaaq usserneqaqqunatit. Nanertortigissassinnik ersoqatigiigitsi, taamalu Kristusip inatsisai naammassiniarsigik.’ — Galâsiamiut 6:1, 2.b

14. Nakkutilliisut suliassanik naliliiniarnerit qanoq isigisariaqarpaat, qanorlu ajortuliortoq isigisariaqarlugu?

¹⁴ Utoqqaanertat suliassanik naliliisartut imminnut eqqartuussisorsuartut pingaartutut isiginatik ’eqqartuussineq’ anersaakkut paarsinermut atasutut isigisariaqarpaat. Jehovap savaataasa ilaat ajornartorsiuteqarpat annaanniarlugu qanoq iliorsinnaappat? Savaatit sinnerinit avissaalersup ikiornissaa kingusinaareerpa? Neriuppugut kingusinaariinngitsoq. Naleqqulluaraangat utoqqaanertat isumalluarlutik naakkinnittuliussapput. Sualuttumik ajortuliortoqarsimappat Jehovap najoqqutassiaanik millisitsiniaassanngillat. Kisianni naakkinninnissamut pissutaasinnaasut tamaasa malugigunikkik sapinngisamik naakkinnittuliorsinnaassapput. (Tussiaat 103:8-10; 130:3) Ajoraluartumilli unioqqutitsisut ilaat ima uteriitsigimmata utoqqaanertat aalajaassuseq takutittariaqartarpaat, naakkittaassuserli takutinngisaannarlugu. — 1 Korintumiut 5:13.

’Eqqartuussinerup’ siunertaa

15. Annertuumik isumaqatigiinngittoqaleraangat suna aalajangerneqaqqaartariaqarpa?

¹⁵ Annertuumik isumaqatigiinngittoqaleraangat utoqqaanertat ilisimassusillit paasiniaqqaassavaat isumaqatigiinngitsut namminneq ajornartorsiut aaqqissinnaannginneraat, soorlu Matîuse 5:23, 24-mi aamma Matîuse 18:15-imi siunnersuutigineqartoq. Tamanna iluatsinngitsoorpat, immaqa utoqqaanertap ataatsip marlulluunniit siunnersuutaat naammassapput. ’Eqqartuussineq’ pisariaqarpoq aatsaat sualuttumik ilaasortaajunnaarsitaanissamik kinguneqarsinnaasumik ajortuliortoqarpat. (Matîuse 18:17; 1 Korintumiut 5:11) Biibili tunngavigalugu pissutissaqarluartariaqarpoq suliassamik naliliisitat pilersinneqarnissaannut. (Takuuk Vagttårnet, 15. septemberi 1989, qupperneq 18.) Suliassap nalilernissaanut utoqqaanertat piukkunnarnerpaat qinerneqartariaqarput.

16. Utoqqaanertat suliassanik naliliisitat suna anguniartarpaat?

¹⁶ Suliassanik naliliiniarnerminni utoqqaanertat suna anguniartarpaat? Siullermik naapertuilluartumik eqqartuussisoqarsinnaanngilaq suna ilumoornersoq paasineqarsimanngippat. Israelikkut nalaannisut suliassat ilungersornartut ’paasiniarluartariaqarpaat’. (5 Moses 13:14; Eqqartuussisut 17:4) Taamaattumik naliliisitat anguniagaasa ilaat tassa piviusut paasineqarnissaat. Asanninnikkulli tamanna anguneqarsinnaavoq anguneqartariaqarlunilu. (1 Korintumiut 13:4, 6, 7) Piviusut paasineqarpata utoqqaanertat sapinngisamik ilagiit illersorneqarnissaannut ilagiinnilu Jehovap najoqqutassiaasa qutsissut atatinneqarnissaannut anersaavatalu akornuserneqarani sunniuteqarsinnaanissaanut iliuuseqassapput. (1 Korintumiut 5:7, 8) Ajornanngippalli naliliiniarneq aamma ajortuliorsimasup navianartorsiortup annannissaanik siunertaqarpoq. — Naleqqiuguk Lúkarse 15:8-10.

17. (a) Arlaannik unnerluutigineqartoq qanoq iliorfigineqartariaqarpa, aamma sooq? (b) Tamanna pillugu ’eqqartuussisut’ sumik piumaffigineqarpat?

¹⁷ Arlaannik unnerluutigineqartoq Guutip savaataatut iliorfigineqartuartariaqarpoq. Qajassuunneqartariaqarpoq. Ajortuliorsimappat eqqartuussisut naapertuilluartut iluamik ingerlaqqilernissaanut, iliuuserisimasami eqqunngitsuuneranik paasisaqarnissaanut, peqqissiminissaanullu ikiorniarpaat, taamaalillutillu ’Diaavulup nigaanit’ aniguisillugu. ’Ajoqersuineq’, ’qanilaarnerlu’ pisariaqarput. (2 Timûtiuse 2:24-26; 4:2) Ajortuliorsimasup paasippagu eqqunngitsuliorsimalluni, uummammigut peqqissimissutigingaarlugu Jehovalu isumakkerfigineqarnissaminik qinnuigalugu, taava? (Naleqqiuguk apustilit suliáinik agdlagkat 2:37.) Ilungersorluni ikiorneqarusuppat ilaasortaajunnaarsinneqartariaqanngilaq. — Takuuk Vagttårnet, 1. juni 1983, qupperneq 22, 23.

18. (a) Pissutsini suni ’eqqartuussisut’ aalajaallutik ajortuliorsimasoq ilaasortaajunnaarsittariaqarpaat? (b) Annilaamminartoq suna eqqarsaatigalugu utoqqaanertat savat tammalersut pillugit tamaviaartariaqarpat?

¹⁸ Akerlianilli, ilerasuuteqarani tunussisoqarpat, piaaraluni Jehovap inatsisaanik unioqqutitsisoqarpat imaluunniit ajorluinnartoqarpat suliassanik naliliisitat ilagiit ilaasortai allat illersorniarlugit peqqissimerusunngitsoq ilaasortaajunnaarsittariaqarpaat. ’Eqqartuussinermik’ suliaqartoqatigiit eqqunngitsuliortup Guutip piumasaanik unioqqutitsinerminik aliasuuteqarpasinngippat uteqattaarfigalugu kimigiiserfigisussaanngilaat peqqissiminissaanillu pinngitsaaliniartussaanagu.c Ukiuni kingullerni silarsuaq tamakkerlugu ukiut tamaasa oqaluussisartut 1 procentiisa missaat ilaasortaajunnaarsitaasarput. Tamanna isumaqarpoq savat hundredet iniminniittuartut akornanni ataaseq tammartartoq — immaqa tammarallarluni. Piffissaq ilungersornerillu inuup savaatinut utertinneqarnissaanut atorneqartariaqartut eqqarsaatigalugit annilaamminnannginnerpa nalunagu ukiut tamaasa ti tuusintilikkuutaat ’Satanimut pisinneqartartut’? — 1 Korintumiut 5:5.

19. Utoqqaanertat suliassanik naliliisitat suna puiunngisaannartariaqarpat, sunalu anguniartariaqarlugu?

¹⁹ Utoqqaanertat ’eqqartuussisuutitat’ eqqaamasariaqarpaat ilagiit iluanni ajortuliornerit amerlanersaasa sanngiissuseq pissutigisaraat, ajussuseq pissutiginagu. Jesusip savamik tammarsimasumik assersuusiaa puiunngisaannartariaqarpaat. Jesusip ima naggerserpaa: ’Oqarfigaassi: Taamaattoq ajortuliortoq allamik isumataartoq ataaseq iluartunit 99-init allamik isumataarnissamik ajorsanngitsunit qilammi tipaatsuutigineqarnerussaaq.’ (Lúkarse 15:7) Ilumut, ’[Jehova] tammarsimasoqaqqusinngilaq, tamaasali allamik isumataaqquai.’ (2 Pîtruse 3:9) Jehova ikiortigalugu ’eqqartuussisuutitat’ silarsuaq tamakkerlugu tamaviaarlutik ajortuliortut peqqissiminissap pingaaruteqarneranik paasinninnissaannut aqqusinermilu ameqisumi inuunartumut sammisumi ingerlanissaannut ikiorlisigik, qilammi tipaatsuutigineqarnermik kinguneqartumik. — Matîuse 7:13, 14. (wD 1/7 92)

[Quppernerup ataani ilanngussat]

Uteqqiinissamut apeqqutit

□ Savanik paarsisoq Qutsinnerussaartoq savanillu paarsisoq ajunngitsoq malinniarlugit utoqqaanertat pingaartumik suna soqutigissavaat?

□ Utoqqaanertat qanoq ilillutik ’eqqartuussinernik’ ikinnerulersitsisinnaappat?

□ Eqqartuussisut sooq naapertuilluaannarnatik aamma ajunngitsuusariaqarpat?

□ Suliassamik naliliinikkut ajortuliortoq qanoq iliorfigineqartariaqarpa sunalu siunertaralugu?

□ Sooq ilaasortaajunnaarsitsineq periarfissaava kingullerpaaq?

[Qupp. 17-mi assiliartaq]

Anersaakkut paarsineq peqqissaartumik naammassineqaraangat ’eqqartuussinerit’ amerlasuut pinngitsoortinneqarsinnaasarput

[Qupp. 19-mi assiliartaq]

Allaat ’eqqartuussisutut’ sulinerminni utoqqaanertat qajassuussillutik ajortuliortoq ajunngitsumik ingerlalerseqqinniartariaqarpaat