Sooq ajussuseqarlunilu naalliuttoqar­tarpa?

Alianangaar­tumik pisoqaraangat ima aperisoqarajup­poq: “Sooq?” Qujanar­tumik tamanna Biibilimi paasiuminar­tumik akineqar­poq!

1. Saatanip ajussuseq qanoq aallartippaa?

Saatanip Jehova tunup­paa, allallu pis­saaneqarfigerusuk­kamigit inuit siul­liit marluk aamma tunus­sisun­ngor­tip­pai. (Mosesimik 1. 3:1-5) Eva sal­loqit­tarlugu oqarfigigamiuk toqus­san­ngitsoq ‘sallutuumik sallumullu ataataasumik’ Biibilimi taaneqar­poq. (Johan­nesi 8:44) Eva sallu upperalugu isumaqaler­poq Jehovap ajun­ngitsumik erliguuk­kaani. Tassa Saatani oqar­porlusooq inuit Jehovamut naalan­ngik­kunik pil­luar­nerus­sasut.

2. Adami Evalu suniarlutik aalajangerpat?

Jehova Adamimut Evamullu tuk­kor­tuuvoq. Oqarfigai orpik ataaseq minil­lugu orpiit tamaasa nerif­figisin­naagaat. (Mosesimik 1. 2:15-17) Naam­mal­luin­nar­tuugamik eqqor­tulior­nis­sar­tik ajor­nar­tin­ngik­kaluar­paat, naalan­ngin­niarlutilli aalajanger­put. Eva orpiup nerif­figeq­qusaan­ngitsup “paarnaanik tigusivoq nerillunilu”, Adamilu kingusin­nerusuk­kut “aamma nerivoq”. (Mosesimik 1. 3:6) Adami Evalu piaaralutik naalan­ngin­namik ajor­tulior­put, aamma ersersip­paat Jehovamit naalak­kersor­neqarusun­natik. Taman­nalu pis­sutigalugu naal­liungaaler­put. – Mosesimik 1. 3:16-19.

3. Adamip Evallu aalajangigaat uagutsinnut qanoq sunniuteqarpa?

Adami Evalu ajor­tulioramik naam­mal­luin­nar­tuujun­naar­put. Naam­mal­luin­nan­ngitsuunerallu kinguaavisa kingor­nup­paat. Biibilimi Adami pil­lugu ima allas­simavoq: ‘Inuk ataaseq aqqutigalugu ajorti inunnut annguppoq, ajortillu toqu nassataraa. Toqulu tamanut siaruaappoq.’ – Romamiut 5:12.

Assigiin­ngitsut pis­sutigalugit naal­liut­tar­pugut. Ilaan­nik­kut nam­mineq aalajangiinerlun­ner­put imaluun­niit allat aalajangiinerlun­nerat pis­sutigalugu naal­liut­tar­pugut. Ilaan­nik­kullu nalaatsor­nik­kut pisut pis­sutigalugit naal­liut­tar­pugut. – Jaaku 4:13, 14 atuarsigit.

ITISILIINEQ

4. Kina naalliuutinut pisuua?

Inup­pas­suit isumaqar­put Guutip nunarsuarmi pis­sutsit aquk­kai. Ilumut taamaappa? VIDEO takusiuk.

VIDEO: Kia nunarsuaq aquppaa? (1:24)

Jaaku 1:13 aamma Johannesimit 1. 5:19 atuarsigit apeq­qullu una eqqar­torlugu:

• Guuti ajus­susermut naal­liuutinullu pisuua?

5. Saatanip aqutsinerata kingunipilui

VIDEO: Sooq Guutip naalliunnerit akuerai? – Naalisagaq (3:07)

Mosesimik 1. 3:1-6 atuarsigit apeq­qutillu uku eqqar­torlugit:

• Saatani qanoq sal­luliorpa? – Versit 4 aamma 5 takuk­kit.

• Saatanip qanoq oqarluni inuit isumaqalersin­niar­pai Jehovap ajun­ngitsumik erliguuk­kaatik?

• Saatani naaper­torlugu inuit pil­luas­sagunik Jehovamit aqun­neqar­tariaqar­pat?

Oqaluussisartup oqaasii 8:9 atuarsiuk apeq­qullu una eqqar­torlugu:

• Jehovap nunarsuarmik aqutsin­ngin­nera qanoq kinguneqarsimava?

1. Adami Evalu naam­mal­luin­nar­tuul­lutik paratiisimiip­put. Saatanili naalak­kamikku Jehova tunup­paat

2. Tunus­sinerup kingunerisaanik nunarsuarmi ajor­tulior­toqar­taler­poq, naal­liut­toqar­taler­poq toqusoqar­talerlunilu

3. Jehovap ajor­tulior­nerit, naal­liuutit toqulu atuuk­kun­naarsis­savai. Inuit naam­mal­luin­nar­tuul­lutik paratiisimi inuulis­sap­put

6. Naalliukkaangatta Jehovap isumassorusuttar­paatigut

Guutip naal­liun­ner­put maluginiar­tar­paa? Kun­ngip Daavip apustilillu Petrusip allataat misis­soriar­tigit. Tussiaat 31:8 aamma Petrusimit 1. 5:7 atuarsigit apeq­qullu una eqqar­torlugu:

• Naal­liuk­kaangatta Jehovap maluginiarlutalu isumas­sorusut­taraatigut nalunagu qanoq misigivit?

EQIKKAANEQ

Saatani Diaavulu inuillu siul­liit marluk nunarsuarmi ajus­sutsimut pisuuner­paap­put. Naal­liuk­kaangatta Jehovap isumas­sorusut­tar­paatigut, qanit­tuk­kullu naal­liut­toqarun­naarsitsis­saaq.

Uteqqiineq

• Saatanip Diaavulup Eva qanoq sal­loqit­tar­paa?

• Adamip Evallu Jehovamik tunus­sinerat uagutsin­nut qanoq sun­niuteqarpa?

• Naal­liuk­kaangatta Jehovap maluginiar­tarlutalu isumas­sorusut­taraatigut qanoq nalun­ngilar­put?

NAMMINEQ MISISSUGASSATIT

Biibili naaper­torlugu ajorti qanoq paasisariaqar­toq paasiniaruk.

“Ajortuliorneq qanoq paasisariaqarpa?” (Nit­tar­tak­katsinni allaaserisaq)

Naatsiivimmi Edenimi Saatanip Diaavulup apeq­qusigaa pil­lugu paasisaqar­nerugit.

“Sooq Guutip naalliunnerit akuerai?” (Napasuliaq Alapernaarsuiffik-mi allaaserisaq)

Apeq­qum­mut akiuminaatsumut akis­sut tup­pal­ler­nar­toq atuaruk.

“Sooq juutinik toqoraanersuaqarsimava? Sooq Guutip tamanna pinngitsoortinngilaa?” (Nit­tar­tak­katsinni allaaserisaq)

Angutip naal­lius­simasup Biibili qanoq iluaqutigisimagaa isigin­naaruk.

Kisimiikkunnaarpunga (5:09)

Adamip Evallu Jehova naalan­ngim­mas­suk ajorti, naal­liuutit toqulu atuutiler­put.a Jehovali iliuuseqarmat neriuuteqaler­pugut. Biibilimi paasivar­put ernermi Jiisusip inuunerminik uter­titsis­sutitut pil­liuteqar­nis­saa isumagigaa. Uter­titsis­sut qanoq paasisariaqarpa? Uter­titsis­sut tas­saasin­naavoq inum­mik aniguisitsiniarluni aningaasanik allanil­luun­niit akiliineq. Jiisusip suna uter­titsis­sutitut pil­liutigaa? Nunarsuarmi naas­saan­ngitsumik inuusin­naagaluar­nini. (Matiusi 20:28 atuarsiuk). Kajumil­luni taamaaliormat Adamip Evallu naalan­ngin­nerisa kingunipilui siunis­sami atuuk­kun­naas­sap­put. Uter­titsis­sut iluaqutigalugu aamma paasivar­put Jehovap qanoq asatigigaatigut. Ilin­niagas­saq una iluaqutigalugu Jiisusip uagut pil­luta toqunera qujamasuutiginerulis­savat.

1. Jiisusip toqunera massakkut qanoq iluaqutigaarput?

Ajor­tiliugatta Jehovap iluarin­ngisaanik iliuuseqar­tar­pugut. Biibilimili ima allas­simavoq: “[Kristusi] naapertuilluartoq ilissi naapertuilluanngitsusi Guutimut piseqqullusi ajortuliornerit pillugit ataasiaammik toquvoq.” (Petrusimit 1. 3:18) Taamaat­tumik ilumoorluta peq­qis­simigutta Jiisusilu Kristusi aqqutigalugu Jehovamut isumak­keerfigeq­qugutta kuk­kus­sutit­talu iliuusereq­qin­ngin­nis­saat sulis­sutigiuarutsigit Jehova qanimut ikin­ngutigisin­naavar­put. – Johan­nesimit 1. 2:1.

2. Jiisusip toqunera siunissami qanoq iluaqutigissavarput?

Jiisusip inuunerminik naam­mal­luin­nar­tumik pil­liutigin­nin­nera pis­sutigalugu Adamip ajor­tulior­nerata kingunipilui Jehovap qanit­tuk­kut atuuk­kun­naarsis­savai. Biibilimi allas­simavoq Jehovap ernini nunarsuarmut aal­lar­tik­kaa “kinaluunniit taassumunnga uppertoq suujunnaarsinneqarnani naassaanngitsumik inooqqullugu”. (Johan­nesi 3:16) Taamaat­tumik Jiisusip pil­liutaanik upperin­nin­nermik ersersitsigutta nunarsuarmi paratiisiusumi naas­saan­ngitsumik inuusin­naavugut. – Esaja 65:21-23.

ITISILIINEQ

3. Jiisusip toquneratigut ajortimit toqumillu aniguisinneqarpugut

VIDEO: Sooq Jiisusi toqua? – Immikkoortoq 1 (2:01)

• Adamip Guutimut naalan­ngin­nermigut suna annaavaa?

Romamiut 5:12 atuarsiuk apeq­qullu una eqqar­torlugu:

• Adamip ajor­tulior­nera ilin­nut qanoq sun­niuteqarsimava?

Johannesi 3:16 atuarsiuk apeq­qullu una eqqar­torlugu:

• Sooq Jehovap ernini nunarsuarmut aal­lar­tip­paa?

1. Adami naam­mal­luin­nar­toq Guutimut naalan­ngim­mat ajor­tulior­toqar­talerlunilu toqusoqar­taler­poq

2. Jiisusi naam­mal­luin­nar­toq Guutimut naalam­mat inuit naam­mal­luin­nar­tuul­lutik naas­saan­ngitsumik inuunis­samik periarfis­saqaler­put

4. Inuit tamarmik Jiisusip toqunera iluaqutigisinnaavaat

VIDEO: Sooq Jiisusi toqua? – Immikkoortoq 2 (2:00)

• Inuup ataatsip toqunera inuit tamarmik qanoq iluaqutigisin­naavaat?

Timuutiusimut 1. 2:5, 6 atuarsigit apeq­qullu una eqqar­torlugu:

• Jiisusi Adamitulli naam­mal­luin­nar­tuuvoq. Adamili Guutimut naalan­ngim­mat ajor­tulior­toqar­talerlunilu toqusoqar­taler­poq. Sooq oqar­toqarsin­naava Jiisusip uter­titsis­sutitut akiliutigisaa Adamip annaasaanik ‘matus­susiisoq’?

5. Utertitsissut Jehovamit ilinnut tunissutaavoq

Jehovap ikin­ngutaasa uter­titsis­sut immin­nut tunis­sutitut isigaat. Galaatiamiut 2:20 atuarsiuk apeq­qullu una eqqar­torlugu:

• Apustilip Paulusip uter­titsis­sut imminut tunis­sutaasutut isigalugu qanoq ersersip­paa?

Adami ajor­tuliorami nam­mineq kinguaanilu toqusus­san­ngor­put. Naas­saan­ngitsumilli inuunis­samik illit periarfis­sik­kumal­lutit Jehovap ernini toqusus­san­ngorlugu aal­lar­tip­paa.

Versit tul­liut­tut atuar­neranni Jiisusi naal­lium­mat Jehova qanoq misigisimas­sasoq takorlooruk. Johannesi 19:1-7, 16-18 atuarsigit apeq­qullu una eqqar­torlugu:

• Jehovap Jiisusillu illit pil­lutit iliuuserisimasaat qanoq kil­litsis­sutigaagit?

EQIKKAANEQ

Jiisusip toqunera pis­sutigalugu Jehovap ajor­tuliagut isumak­keerfigisin­naavai, aamma naas­saan­ngitsumik inuunis­samik periarfis­sin­neqar­pugut.

Uteqqiineq

• Sooq Jiisusi toqua?

• Sooq oqar­toqarsin­naava Jiisusip uter­titsis­sutitut akiliutigisaa Adamip annaasaanik matus­susiisoq?

• Jiisusip toqunera qanoq iluaqutigisin­naaviuk?

NAMMINEQ MISISSUGASSATIT

Jiisusip pil­liutaa sooq uter­titsis­sum­mik taaneqar­tar­toq paasiniaruk.

“Jiisusip pilliutaa qanoq ‘amerlasuunik utertitsiva’?” (Nit­tar­tak­katsinni allaaserisaq)

Annaan­neqarumal­luta susariaqar­tugut paasiniaruk.

“Jiisusip annaappaatigut – Qanoq?” (Nit­tar­tak­katsinni allaaserisaq)

Jehovap ingasat­tumik ajor­tulior­tut isumak­keerfigisin­naavai?

“Apeqqutit Biibilimut tunngasut” (Napasuliaq Alapernaarsuiffik, juulip aallaqqaataat 2013)

Kristusip pil­liutaanik paasin­nin­nini angutip kinaassutsiminik allannguinissaminut qanoq iluaqutigigaa atuaruk.

“Nakuusertuujunnaarpunga” (Nittartakkatsinni allaaserisaq)