„Guutimut palligunniaritsi“

„Guutimut palligunniaritsi, taava ilissinnut palligutissaaq.“ — JAAKU 4:8, NV.

1, 2. (a) Inuppassuit qanoq oqartarpat? (b) Kristumiut ilaat Jaakup qanoq kajumissaarpai, aamma sooq pisariaqarpa?

„GUUTIP ILAGILISIGUT“ oqaasiupput sakkutuut atisaanni naalagaaffiillu ilisarnaataanni takussaasartut. „Guuti tatigaarput“ USA-mi aningaasani allassimasarpoq. Guutimut qanittumik attaveqarnerartarneq nalinginnaasuuvoq. Isumaqannginnerpilli taamatut attaveqarnerarluni oqaannarnermit imaluunniit oqaatsit oqaasinnaatut atornerannit annerusumik iliuuseqartoqartariaqartoq?

² Guutimut qanittumik attaveqartoqarsinnaasoq Biibilimi takutinneqarpoq, suliniuteqarnissarli pisariaqarpoq. Ukiuni hundredelinni siullerni tanitanik kristumioqarpoq Jehova Guutimut qaninnerusumik attaveqalernissaminnik pisariaqartitsisunik. Ilaat timikkut ajortulioqqajaanerannik anersaakkullu minguikkunnaarsimanerannik nakkutilliisup kristumiup Jaakup nalunaarfigisariaqarsimavai. Mianersoqqussutiminut atatillugu ilungersorluni ima kajumissaarivoq:“Guutimut palligunniaritsi, taava ilissinnut palligutissaaq.” (Jaaku 4:1-12, NV) Guutimut ’palliguteqqusigami’ Jaaku qanoq isumaqarpa?

3, 4. (a) Ukiuni hundredelinni siullerni Jaakup allagaanik atuartartut „Guutimut palligunniaritsi“ tusaramikku qanoq eqqaasinneqarsimassappat? (b) Sooq qularutiginngilarput Guutimut palliguttoqarsinnaasoq?

³ Jaakup oqaaseq atugaa taamanikkut allagaanik atuartartorpassuarnit ilisimaneqarluarpoq. Palasit Guutimut inuit sinnerlugit ’palliguttarnissaat’ pillugu Mosesip inatsisaani immikkut ilitsersuuteqarpoq. (2 Mosesi 19:22; nutsikkami Septuaginta-mi takuneqarsinnaavoq Mosesip allagaasa aappaanni oqaaseq atorneqartoq Jaakup atoraa.) Tamanna allagaanik atuartartunut eqqaasitsissaaq Jehovamut palligunnissaq qarsupiinnagassaanngitsoq, Jehovami silarsuarmi qutsinnerpaajummat.

⁴ Kisiannili „kajumissaarut taanna [Jaaku 4:8-miittoq] isumalluarnerujussuarmik ersersitsivoq,“ Biibilimut tunngasumik oqaaseqaammi allaatigineqarpoq. Jaakup ilisimavaa Jehova inunnik naammalluinnanngitsunik asannilluni imminut palliguteqqusiuartoq. (2 Nalunaarsuutit 15:2) Jiisusilli pilliutaa aqqutigalugu Guutimut palligunnissamut suli annerungaartumik periarfissaqalerpoq. (Efesosimiut 3:11, 12) Ullumikkut millionit palligussinnaalersimapput! Periarfissaq nuanningaartoq tamanna qanoq iluaqutigisinnaavarput? Jehova Guutimut palligunniarluta periaaserisinnaasavut pingasut uani sammitsiassavavut.

’Jehova ilisarisimalerniartuaruk’

5, 6. ’Guutimik ilisarisimannilerniarneq’ qanoq isumaqarnersoq Samuelimik oqaluttuami qanoq paasineqarsinnaava?

⁵ Ny Verden nutsigaq naapertorlugu Johannesi 17:3-mi Jiisusi oqarpoq: „Inuuneq naassaanngitsoq tassaavoq: ilinnik, Guutimik ilumoortutuamik, aallartitannillu, Jiisusi Kristusimik, ilisarisimannilerniarnerat.“ Biibilimik nutsigarpassuarni versi taanna Ny Verden nutsikkamiit allaanerulaartumik issuarneqartarpoq. ’Ilinnik ilisarisimannilerniarnerat’-mut taarsiullugu ’ilinnik ilisimanninneq’ imaluunniit ’illit ilisaralutit’ atuinnartarpaat. Biibilili pillugu oqaaseqartartut grækerisut ilisimasaqarluartut arlallit malugeqquaat grækerit oqaasiat atorneqartoq imaqarnerusoq, tassa iliuuseqartuarneq pineqarmat, iliuuseqarneq allamut qanittumik tatigeqatigiiffiusumillu ilisarisimannilernermik kinguneqarsinnaasoq.

⁶ Guutip ilisarisimallualerniarnissaanik eqqarsaat Jiisusip nalaani takornartaanngilaq. Assersuutigalugu Allakkani Hebræerisuuni atuarsinnaavarput Samuelip nukappiaraalluni ’Jehova suli ilisarilersimanngikkaa’. (1 Samueli 3:7) Tamanna isumaqarpa Samuelip Guuti ilisarisimarpianngikkaa? Naamik. Qularnanngitsumik angajoqqaavisa palasillu Guuti pillugu ilinniartingaatsiarsimassavaat. Oqaaserli hebræerisooq uani atorneqartoq, qinerlerfissiaq hebræerisooq naapertorlugu isumaqarsinnaavoq „tatigeqatigiilluni ilisarisimaneq”. Kingusinnerusukkut Guutimut oqariartortitatut sassarami tatiginnilluni ilisarisimanninnermisut Samuelip Jehova suli ilisarisimalersimanngilaa. Samuelilli alliartortilluni Jehova qanittumik attaveqarfigileramiuk ilisarisimallualerniarpaa. — 1 Samueli 3:19, 20.

7, 8. (a) Ajoqersuutit paasiuminaannerit Biibilimiittut atuaqqissaarnissaat sooq tunuarsimaarfigisariaqanngilarput? (b) Guutip oqaasiani sallusuissutit itinerusut ilaannik atuaqqissaartariaqakkatsinnik taasaqarit.

⁷ Jehova ima ilisarisimallualerniartigaajuk tatigilernissaa sulissutigalugu? Tamanna kissaatigigukku Jehovap anersaakkut inuussutissat pilersitai ’kajungerisariaqarpatit’. (1 Petrusi 2:2) Biibilimi ajoqersuutit tunngaviusut kisiisa ilikkarnissaat naammagiinnaqinagu. Sallusuissutit itinerusut Biibilimiittut ilikkarniarsarikkit. (Hebræerit 5:12-14) Ilikkaruminnaappallaarsoralugit misissornissaat merseraajuk? Taamaappat, taava eqqaamajuk Jehova ’ajoqersuisorsuusoq’. (Esaja 30:20, NV) Nalunngilaa inuup isumaa naammalluinnanngitsoq sallusuissutinut itisuunut qanoq tigusilluarsinnaalersinneqarsinnaasoq, paasiniarlugillu ilumoorlutit ilungersornitit pilluaqqusinnaavai. — Tussiaat 25:4.

⁸ ’Guutip itissusii’ pillugit sallusuissutinik itinerusunik Guutip oqaasianiittunik paasinninnerit pillugu imminut misilissinnaavutit. (1 Korinthimiut 2:10) Atuagassat qasunartuunngillat palasiinnarnit soqutigineqarsinnaasut. Ajoqersuutaapput pingaarutillit iluaqutaasullu Ataatatta qilammiusup asannittup isumaanik uummammiorisaanillu uagutsinnut paasisaqalersitsisinnaasut. Sammisassat ilagaat utertitsissut, „anngigisaq isertugaasimasoq” angerutsillu assigiinngitsut Jehovap innuttaminut iluaqutissatut siunertaminillu piviusunngortitsisussatut pilersissimasai. Tamakku assingusorpassuillu allat nammineq atuaqqissaarnermi soqutiginarlutillu pissarsinartuussapput. — 1 Korinthimiut 2:7.

9, 10. (a) Makitasuujuneq sooq navianarpa, makitasuunngunnginnissatsinnullu suna iluaqutaassava? (b) Jehovamik ilisarsinermut tunngatillugu sooq maniguunnissamut pissutissaqarpugut?

⁹ Anersaakkut sallusuissutit itinerusut pillugit ilisimasaqarnerujartortillutit navianartoqarnera sianigisariaqarpat: makitasuunngorneq. (1 Korinthimiut 8:1) Makitasuujuneq navianartuuvoq Guutimit ungasilliartortittaramisigut. (Ussatit 16:5; Jaaku 4:6) Eqqaamaniaruk inuup kialuunniit ilisimassuseqarnini pingaakujunniutigissallugu pissutissaqanngimmat. Ilisimatuussutsikkut siuariaatit kingulliit pillugit atuakkiamut aallaqqaasiutigineqartumi qanoq oqaatigineqarnersoq malugeriaruk: „Ilisimasaqarnerujartortilluta qanoq ilisimasakitsiginerput paasinerulersarparput. . . . Ilikkakkavut tamarmik suli ilikkanngisatsinnut naleqqiullugit suunngillat.“ Maniguunneq taamaattoq ilorraallannarpoq. Ilisimasaqarnermut pingaarnerpaamut — Guutimik ilisarsinermut — tunngatillugu maniguuttuaannarnissamut suli annerusumik pissutissaqarpugut. Sooq?

¹⁰ Jehova Biibilimi qanoq oqaatigineqarnersoq malugeriaruk: „Eqqarsaatitit itisoorujussuupput.“ (Tussiaat 92:6, NV) „[Jehovap] paasisimasaqassusia killisissaanngilaq.“ (Tussiaat 147:5) „[Jehovap] paasisimasaqassusia siunersissaanngilaq.“ (Esaja 40:28) „Ilami Guutip pisuussusiata ilisimassusiatalu siuneqassusiatalu itissusiat!“ (Romamiut 11:33) Ersarippoq Jehova pillugu paasisassat tamaasa qaquguluunniit paasinavianngikkivut. (Oqaluussisartup oqaasii 3:11) Nuanningaartorpassuarnik ilinniartissimavaatigut, piumaguttali killeqanngitsumik ilinniagassaqartuarsinnaavugut. Tamatuma nuannaangaalersillutalu maniguuttunngortinnginnerpaatigut? Taamaammat ilikkakkavut Jehovamut palligunnissatsinnut allanillu taamaaliornissaannut ikiuinissatsinnut tunngavissatut tamatigut atorniartigik — allanut anneruniutissatut atornagit. — Matthæusi 23:12; Lukasi 9:48.

Jehovamut asanninnerit takutiguk

11, 12. (a) Jehova pillugu ilikkakkatsinnit qanoq sunnerneqartariaqarpugut? (b) Jehovamut asanninnerup piviusuuneranut suna aalajangiisuusarpa?

¹¹ Apustili Paulusip ilisimasaqarneq asanninnermut tulluartumik attuumassuteqartippaa. Allappoq: „Qinnutigaaralu asanninnissi alliartuinnarnissaa paasisimasaqarnermik silatusaallaqqinnermillu peqangaalerluni.“ (Filippimiut 1:9) Pingaarniartunngornissatsinnut makitasuunngornissatsinnullu taarsiullugu, Jehova siunertaalu pillugit sallusuissutit naleqangaartut ilikkakkavut tamarluinnaasa Jehovamut asanninnerulissutigisariaqarpavut.

¹² Inuppassuit Guutimik asanninnerartut ilumoortumik asanninngillat. Imaassinnaavoq ilumoorullugu isumaqartut uummatertik misigissutsinik sakkortuunik ulikkaartoq. Misigissutsit taamaattut ilisimasaqarnermik eqqorluartumik aallaaveqaraangamik ajunngittaqaat, allaallumi nersornarput. Misigissusiinnaalli Guutimut ilumoortumik asannissuseqarnermut uppernarsaataanngillat. Sooq? Guutimut asanninneq Guutip oqaasiani qanoq allaaserineqarnersoq malugeriaruk: „Guutimummi asanninneq tassaavoq inassutai maleruaratsigit.“ (1 Johannesi 5:3) Taamaammat Jehovamut piviusumik aatsaat asannittoqartarpoq, asanninneq naalalluni iliuuseqarnikkut ersersinneqaraangat.

13. Guutimik mianerinninneq Jehovamut asanninnitta takutinnissaanut qanoq iluaqutigissavarput?

¹³ Guutimik mianerinninneq Jehovamut naalannissatsinnut iluaqutigissavarput. Jehovamik taamatut mianerinningaalersarlutalu ataqqinningaalersarpugut ilisarisimannilerniaraangatta, pissusiinik nalissaqanngitsunik, illernassusianik, naalannassusianik, pissaaneranik, naapertuilluassusianik, ilisimassusianik asanninneranillu ilisimannileraangatta. Taassumunnga palligutissagutta Guutimik mianerinninneq pingaaruteqarpoq. Ny Verden nutsigaq naapertorlugu Tussiaat 25:14-imi allassimasoq malugeriaruk: „Jehovamik mianerinnittut taassumannga tatigineqarput.“ Ataatatta qilammiusup iluarinngisaanik iliunnginnissarput mianerilluinnarutsigu, aatsaat qanittumik attaveqarfigilersinnaavarput. Siunnersuutip silatuup Ussatit 3:6-imiittup malinnissaanut Guutimik mianerinninneq iluaqutigissavarput: „Eqqarsaatigiuartaruk sumiikkaluaraangavilluunniit, taava ingerlavissatit nalimmatsissavai.“ Tamanna qanoq isumaqarpa?

14, 15. (a) Ullut tamaasa aalajangigassarisartakkatta ilaannik taasaqarit. (b) Qanoq aalajangigaqarsinnaavugut Guutimik mianerinnittuunitsinnik takutitsisumik?

¹⁴ Ullut tamaasa pingaarutilinnik pingaaruteqannginnerusunillu aalajangigassaqartarpugut. Soorlu: Suleqatitit, atuaqatitit sanilitillu suut pillugit oqaloqatigissavigit? (Lukasi 6:45) Ilinnut suliassiissutigineqartut eqiasuillutit suliarissavigit, imaluunniit naammassiniapallaannartassavigit? (Kolossemiut 3:23) Jehovamut asannilaaginnartut asanninngivissulluunniit ilaginerusassavigit, imaluunniit anersaakkut ittunik pingaartitsisut qanitarinerussavigit? (Ussatit 13:20) Qanoq iliussavit Guutip naalagaaffiata soqutigisai siuarsarniarlugit, allaat annikitsualutsigut? (Matthæusi 6:33) Najoqqutassianit Biibilimeersunit soorlu uani innersuussutigineqartunit siulersortittaruit — aamma ulluinnarni aalajangigassaqartillutit — taava oqaatigineqarsinnaavoq Jehova „sumiikkaluaraangavilluunniit” eqqarsaatigisarit.

¹⁵ Aalajangigassaqalernerit tamaasa ima eqqarsartariaqarpugut: ‘Jehovap qanoq iliornissara kissaatigaa? Sunamita nuannaarutiginerussavaa?’ (Ussatit 27:11) Taamatut Jehovamut mianerinninnerput asanninnerpullu takutissavarput. Guutimik mianerinninneq minguitsuujuassutigissavarput — anersaakkut, ileqqussatigut timikkullu. Eqqaamajuk — kristumiut ’Guutimut palliguteqqullugit’ kajumissaareerlugit — Jaaku aamma oqarmat: „Ajortiliususi, assasi ipiiarsigit; isumassigut marluususi, uummatisi salissigit!“ — Jaaku 4:8.

16. Jehova piffissatsinnik, nukitsinnik pigisatsinnillu tunigaangatsigu qanoq iliorsinnaanngilagut, qanorli takutitsisarpugut?

¹⁶ Soorunami Jehovamut asanninnermik takutitsineq ajortuliornaveersaarnermit annerungaarpoq. Asanninneq eqqortumik iliornissatsinnut kajumississutigissavarput. Assersuutigalugu Jehovap tukkussusersua akillugu qanoq iliorsinnaavugut? Jaaku allappoq: „Tunissutit ajunngitsut naammalluinnartuusullu tamarmik pavannga qaamasut ataataannit . . . pisarput.“ (Jaaku 1:17) Ilumoorpoq pigisatsinnik tunineratigut Jehova pisuunerulersissinnaanngikkipput. Nunarsuarmiittut suut tamaasa pigereerpai. (Tussiaat 50:12) Aamma piffissarput nukivullu tunniukkaangatsigit pisariatitaanik allatut matussuserneqarsinnaanngitsumik naammassinnittanngilagut. Allaat Naalagaaffimmik nutaarsiassaq nuannersoq oqaluussissutiginngikkaluarutsigu ujaqqat torlulatissinnaavai! Taava sooq Jehova piffissatsinnik, nukitsinnik pigisatsinnillu tunissavarput? Pingaarnerusumik taamaaliornitsigut takutissagatsigu uummatitsigut, tarnitsigut, isumatsigullu iluunngarluta nukivullu tamakkerlugit asallugu. — Markusi 12:29, 30.

17. Nuannaarluta Jehovamut tunissuteqarnissatsinnut suna pissutigissavarput?

¹⁷ Jehovamut tunissuteqaraangatta nuannaarluta taamaaliortariaqarpugut, „kajumittumimmi tunisisoq Guutimit nuannarineqartuuvoq!“ (2 Korinthimiut 9:7) Najoqqutassiaq Mosesimik allakkat tallimaat 16:17-imiittoq nuannaarluta tunisisarnissatsinnut iluaqutigisinnaavarput: „Kinaluunniit pisinnaasani naapertorlugu tunniussissaaq [Jehovap] pilluaatissiissutaanut naapertuuttumik.“ Jehovap uatsinnut qanoq tukkortigissusia eqqarsaatigigaangatsigu, tukkorfiginissaanut kajumissisinneqartassaagut. Uummataa nuannaassaaq, ataataasup anaanaasulluunniit meeqqaminit tunissutinnguamik tunisittup nuannaartarneranut assingusumik. Asanninnerput taamatut takutikkaangatsigu Jehovamut qaninnerusumik attaveqalersarpugut.

Qinunikkut Guutimut palligugit

18. Qinnutivut qanoq pitsanngorsarsinnaanerlugit eqqarsaatigissallugu sooq pitsaassava?

¹⁸ Piffissaq inuttut Guutimut qinunitsinnut atortagarput erlinnartuuvoq. Piffissaavoq Ataatatsinnik qilammiusumik tatigeqatigiilluta oqaloqateqarfigisinnaasarput. (Filippimiut 4:6) Qinuneq Guutimut palligunnissatsinni pingaartuuvoq, taamaattumillu pitsaassaaq qinnutivut qanoq ittuunersut eqqarsaatigissallugit. Imaanngilaq oqaasertai iluarsartuulluagaasariaqarnatillu aaqqissuulluagaasariaqanngitsut, ilumoortuusariaqarlutillu qamannga pisuusariaqarput. Qinnutivut qanoq pitsanngorsarsinnaavavut?

19, 20. Sooq qinnutiginiakkavut eqqarsaatigeqqaartariaqarpavut, sunalu aallaavigisinnaavarput?

¹⁹ Qinulinnginnitsinni qanoq oqassanerluta eqqarsaatigisinnaavarput. Taamaaliorutta qinnutivut immikkut erseqqissarlugillu isumaqarnerulersissinnaavavut, oqaatsit oqariartaatsillu eqqaaqqaakkavut uteqattaarnaveersaarlugit. (Ussatit 15:28, 29) Immaqa iluaqutaasinnaavoq qinnummi najoqqutassaasumi Jiisusip taasaasa ilai eqqarsaatiginerussallugit, uagullu nammineq atukkatsinnut qanoq attuumassuteqarnersut eqqarsaatigalugit. (Matthæusi 6:9-13) Assersuutigalugu immitsinnut aperisinnaavugut qanoq atsigisumik — qanorluunniit suunngitsigisumik — Jehovap piumasaata nunarsuarmi naammassinissaanut peqataasinnaanersugut. Oqarsinnaanerpugut Jehovamit sapinngisatsinnik atorneqarnissarput kissaatigalugu, suliassiissutigineqartunillu naammassinninnissatsinnut ikiuinissaa qinnutigalugu? Timikkut pisariaqartitatsinnik ernumassuteqarpugut? Isumakkeerfigeqqulluta qinnutigisariaqakkatsinnik sunik ajortuliorsimavugut, aamma kina uagut isumakkeerfigisariaqarparput? Ussernartut suut sissuertariaqarpavut, Jehovallu sernissuinissaa qanoq pisariaqartitsigalugu paasivarput?

²⁰ Aamma Jehovamit ikiorneqarnissaminnik immikkut pisariaqartitsisut eqqarsaatigisinnaavavut. (2 Korinthimiut 1:11) Aammattaaq Jehovap qutsaviginissaa eqqaamasariaqarparput. Qularnanngitsumik Jehovamut qujanissatsinnut ajunngingaassusersualu pillugu unnersiutiginnissaanut pissutissarpassuavut eqqaasinnaavavut. (5 Mosesi 8:10; Lukasi 10:21) Tamanna aamma allatut iluaqutigissavarput — inuunermut isumalluarnerusumik qujamasunnerusumillu isiginnittaaseqarnissatsinnut iluaqutaassaaq.

21. Qinunikkut Jehovamut saqqummiussaqarniaraangatta maligassat Biibilimeersut suut iluaqutaasinnaappat?

²¹ Nammineq atuaqqissaarnitsigut aamma qinnutivut pitsanngorsarsinnaavavut. Angutit arnallu aalajaatsut itsaq inuusimasut qinnutigisimasaannik pitsaasunik oqaatsinillu iluarsartuulluakkanik Biibili imaqarpoq. Arlaannik nalaataqarutta ajornartorsiuteqaruttaluunniit isumakuluutigisatsinnik, uatsinnik ilaquttatsinnilluunniit attuisumik, taava immaqa Jaakup qatanngummi akiniaajumatuup, Esauip, naapilinnginnerani qinnutigisimasaa atuarsinnaavarput. (1 Mosesi 32:10-13) Imaluunniit Guutip innuttai Nubiamiunit millioninit siorasaarneqarmata kunngi Asap qinnutigisimasaa atuarsinnaavarput. (2 Nalunaarsuutit 14:10, 11) Jehovap aqqanut kanngunarsaataasinnaasumik ernumassuteqarutta Eliap Ba’alisiortut pillugit qaqqami Karmelimi qinnutaa eqqarsaatigineqarluarsinnaavoq, aamma taamaappoq Nehemiap qinnutaa Jerusalemimi alianartunik atugaqartoqarnera pillugu tusagaqarami qinnutigisimasaa. (1 Kunngit 18:36, 37; Nehemia 1:4-11) Qinnutinik taamaattunik atuarnikkut eqqarsaatiginneqqissaarnikkullu uppernerput nakussatsinneqarsinnaavoq, isumassarsisissavaatigullu eqqarsaatitta Jehovamut qanoq saqqummiunnissaannut.

22. 2003-mi suna ukiumoortumik allassimaffiussava, ukiullu ingerlanerani imminut qanoq aperisarsinnaavugut?

²² Jaakup ’Guutimut palliguteqqusilluni’ kajumissaarutaata malinnissaanit allamik ataqqinarnerusoqarnanilu anguniakkamik qutsinnerusoqanngilaq. (Jaaku 4:8) Taamaattumik Guutimut palligunniarta ilisarisimanerulerniarneratigut, taassumunnga asanninnitta suli annerusumik takutinneratigut qinunitsinnilu tatigeqatigiilluta attaveqarfigilerneratigut. 2003-mi — Jaaku 4:8 ukiumoortumik allassimaffiusoq eqqaamaatigalugu — Jehovamut qanittumik attaveqarnissaq sulissutiginerlugu imminut misilittuarniarta. Maannakkulli apeqqutaalerpoq: Versimimi oqaaseqatigiit kingulliit? Qanoq Jehova ’uatsinnut palligussinnaava’, tamannalu qanoq uatsinnut iluaqutaassava? Allaaserisami tulliuttumi tamakku sammineqassapput.

„Ilissinnut palligutissaaq“

’[Guuti] . . . ilatsinnit kimilluunniit ungasinngilaq.’ — APUSTILIT SULIAAT 17:27.

1, 2. (a) Ulloriarpassuit qimerlooraanni Pinngortitsisoq pillugu immaqa qanoq aperisoqarsinnaava? (b) Jehovap inuit pingaaruteqanngitsutut isiginngivikkai Biibilimi qanoq qularunnaarsinneqarpugut?

ALLAAQQISSUMI unnukkut qilammi ulloriarpassuit isiginnaarnikuuigit? Qularnanngitsumik tupigusungaarsimassaatit, aap, alutorsangaarsimassaatit. Ullorissat amerlassusiat silaannarsuarlu killeqanngitsoq mianerinningaalersitsipput. Silaannarsuarmi angingaartumi nunarsuaq qiviunnguatut ippoq. Imaappali Pinngortitsisoq ’nunarsuarmi tamarmi qutsinnerussaartoq’ ima qutsitsigisoq inuit soqutiginagit imaluunniit taakkunannga ilisarisimaneqalernissaminut ungasippallaarlunilu killisissaanngippallaartoq? — Tussiaat 83:19.

² Biibilimi qularunnaarsinneqarpugut Jehovap inuit pingaaruteqanngitsutut isiginngivikkai. Allaat Guutip oqaasiani ujaqqullugu kajumissaarneqarpugut, Biibilimimi allassimavoq Guuti ’kimilluunniit ungasinngitsoq’. (Apustilit Suliaat 17:27; 1 Nalunaarsuutit 28:9) Guutimut palliguniarluta iliuuseqaqqaartuugutta ilungersornivut akilerumaarpai. Qanoq? 2003-mi allassimaffimmi ukiumoortumi allassimavoq: „Ilissinnut palligutissaaq.“ (Jaaku 4:8, NV) Jehovap imminut qanittumik attaveqartunut pilluaqqussutigisartagaasa ilaat alutornangaartut misissulaariartigit.

Jehovap ilinnut tunissutaa

3. Tunissut suna Jehovap imminut palliguttunut tunniuttarpaa?

³ Jehova erlinnartumik tunissuteqarpoq, kiffaminuinnaq tunniukkumasaminik. Tunissut taanna pissutsit aaqqissuussaaneranni maannakkut atuuttumi pissaanermik, pisuussutinik ilinniagaqarnermillu neqeroorutigineqarsinnaasunit sunilluunniit nallernissaqanngilaq. Ilinnut tunissutaavoq, Jehovap imminut palliguttunuinnaq tunniuttagaa. Sunaava? Guutip oqaasiani allassimavoq: „Paasisimasaqassuseq qaaqqugukku siuneqarnerlu aggeqqullugu nipituumik torlulaffigalugu, ujarukku sølvisiortoq assigalugu, erlinnartunik nassaarniartutut ilungersorlutit, taava paasilissavat Guutimik mianerinninneq sunaasoq, taava Guuti ilisimalissavat.“ (Ussatit 2:3-6) Sunaaffa inuit naammalluinnanngitsut ’Guuti ilisimalersinnaavaat’! Tunissut taanna — ilisimasaqarneq Guutip oqaasiani nanineqarsinnaasoq — ’erlinnartunut’ isertukkanut assersuunneqarpoq. Sooq?

4, 5. Sooq ’Guutimik ilisimanninneq erlinnartunut’ isertukkanut assersuunneqarsinnaava? Assersuuteqarit.

⁴ Siullermik Guuti pillugu ilisimasaqarneq nalilerujussuuvoq. Erlinnarnerpaat uatsinnut tunniuttagaasa ilagaat naassaanngitsumik inuunissamik neriuut. (Johannesi 17:3) Maannangaarli Guuti pillugu ilisimasaqarneq iluaqutigaarput. Assersuutigalugu Guutip oqaasianik peqqissaartumik atuaqqissaartarnitta kingunerisaanik apeqqutit pingaaruteqangaartut soorlu imaattut akissutissarsereerpavut: Guuti qanoq ateqarpa? (Tussiaat 83:19) Toqungasut qanoq pineqartarpat? (Oqaluussisartup oqaasii 9:5, 10) Guutip nunarsuarmut inunnullu siunertaa sunaava? (Esaja 45:18) Aamma ilisimalerparput inooriaaseq pitsaanerpaaq tassaasoq Biibilimi siunnersuutinik silatuunik malinninneq. (Esaja 30:20, 21; 48:17, 18) Inuunermi isumakuluutit anigornissaannut piviusumillu pillualersitsisumik nalerisimaalersitsisumillu inooriaaseqarnissatsinnut iluaqutaasumik Biibilimi silatuumik siunnersuuteqarpoq. Tamanilli pingaarnerusumik atuaqqissaartarnitsigut Jehovap pissusii nuanningaartut qanittumillu attaveqarfiginissaa ilikkarsinnaanngortarpavut. ’Guutimik ilisimanninneq’ tunngavigalugu Jehovamut qanittumik attaveqarnermit naleqarnerusoqarnerpa?

⁵ Guutimik ilisimasaqarnerup ’erlinnartunut’ isertukkanut assersuunnissaanut aamma allamik pissutissaqarpugut. Guutimik ilisimasaqarneq erlinnartorpassuartut allatulli silarsuarmi maani aamma qaqutigoortuuvoq. Nunarsuup inuinit 6 milliardiusunit 6 millioniinnaat — inuit tusindiugaangata ataaseq — Jehovap Nalunaajaasuusut aamma ’Guuti ilisimasalersimagaat’ oqaatigineqarsinnaavoq. Sallusuissummik Guutip oqaasianiittumik ilisimasaqarneq immikkut pisinnaatitaaffiusoq naleqanngitsoq assersuutiginiarlugu apeqqut Biibilimut tunngasoq ataasiinnaq sammisinnaavarput: Toqusoqaraangat qanoq pisoqartarpa? Tarneq toqusartoq aamma toqungasut ilisimanngitsut Biibiliminngaanniit nalunngilarput. (Ezekieli 18:4) Taamaakkaluartoq silarsuarmi maani upperisarsiortut amerlanersaasa ilinniartitsissutigisarpaat inuup iluaniittoqartoq toqup kingorna inuuinnartartumik. Tamanna kristumiuunerartut upperisaanni tunngaviusumik ajoqersuutit ilagaat. Aamma buddhasiornermi, hindusiornermi, islamimi, jainasiornermi, juutit upperisaanni, shintosiornermi, sikhisiornermi taosiornermilu ajoqersuutigineqartarpoq. Ajoqersuut eqqunngitsoq taanna milliardilinnit upperineqarpoq!

6, 7. (a) Kikkut kisimik ’Guutimik ilisimannilluinnalersinnaappat’? (b) Assersuutip suup takutippaa paasinninnermik ’ilisimasorpassuarnut sianisoorpassuarnullu’ isertugaasumik Jehovap pilluaqqusimagaatigut?

⁶ Sooq amerlanerit ’Guutimik ilisimannilersimanngillat’? Pissutigalugu Guutip oqaasia Guuti ikiortiginagu paasilluarneqarsinnaanngimmat. Eqqaamajuk ilisimanninneq tunissutaasoq, Jehovallu oqaatsiminik unneqqarillutik maniguullutillu misissuisuinnarnut tunniuttaraa. Taakku tassaagunanngillat ’uinimmut atasunik ilisimasunik’ taaneqartartut. (1 Korinthimiut 1:26) Silarsuarmi naliliisarneq naapertorlugu amerlanersaat immaqa ’inuinnaasutut immikkut ilinniagaqarsimanngitsutut’ isigineqartarput. (Apustilit Suliaat 4:13) Tamannali soqutaanngilaq. Uummataanni pissusii takusinnaasani pissutigalugit ’Guutimik ilisimanninnermik’ naleqangaartumik Jehovap akilertarpai.

⁷ Assersuuteqarsinnaavugut. Kristumiuunerartuni ilisimatoorpassuit Biibilimut tunngasunik sukumiisunik oqaaseqaateqartarput. Biibilimi allassimasunut oqaluttuarisaanikkut tunuliaqutaasunik, oqaatsit hebræerisuut grækerisuullu isumaannik allarpassuarnillu paasissutissiisarput. Ilisimasatilli tamaasa iluaqutigalugit ’Guutimik ilisimannilluinnalersimappat’? Allamik aperaluta akisinnaavarput: Biibilimi ajoqersuutigineqartut pingaarnersaat sunaanersoq paasilluarsimanerpaat — Jehovap naalagaaffini qilammiittoq aqqutigalugu kisimi oqartussaaneranik qutsisisitsineq? Jehova Guuti ataasiullunilu pingasuussutsimut ilaanngitsoq nalunngilaat? Taakku assiginagit uagut apeqqutit tamakku paasilluarsimavavut, Jehovammi anersaakkut sallusuissutinik paasinninnermik ’ilisimasorpassuarnut sianisoorpassuarnullu’ isertugaasumik pilluaqqusimavaatigut. (Matthæusi 11:25) Takuarput Jehovap imminut qanittumik attaveqartut ilumut pilluaqqungaarai!

’Jehovap sernigisarpai asasini tamaasa’

8, 9. (a) Jehovamut qanittumik attaveqartut pilluaqqussutisiassaat alla Daavip qanoq allaatigaa? (b) Guutip sernissuinera kristumiut ilumoortut sooq pisariaqartippaat?

⁸ Aamma pilluaqqussaaneq alla Jehovamut qanittumik attaveqartut nuannaarutigisinnaavaat — Guutip sernissuinera. Tussiaasiortoq Daavi atugarliortarsimaqisoq ima allappoq: „[Jehova] qanippoq torlorfigisiminut tamanut, tamanut ilumoorlutik imminut torlorfiginnittunut. Mianerinnitsiminut kissaataannik iliortarpoq, annikilliornerminni nillianerat tusartarpaa annaattarlugillu. [Jehovap] sernigisarpai asasini tamaasa.“ (Tussiaat 145:18-20) Aap, Jehova asannitsiminut qanippoq, taamaattumillu torlorfigippanni piaartumik ikiorsinnaavai.

⁹ Sooq Guutimit sernissorneqarnissarput pisariaqartipparput? Soorunami ’ernumanartorsiorfiit anigoruminaatsut’ sunniutaat kristumiut ilumoortut inuunerminni malugaat, tamatumali saniatigut aamma Jehovap akeravissuanit, Saatani Diaavulumit, saassunneqarnerusarput. (2 Timotheusi 3:1, NV) Akeqqap peqqusersuup taassuma ’iiniarpaatigut’. (1 Petrusi 5:8) Malersorpaatigut, ussernartorsiortippaatigut tatisarlutalu. Aamma qanoq isumaliortarnersugut uummammioqarnersugullu atornerlussinnaasaminik alapernaattuaannarpaa. Uppernitta sanngiillisinnissaa anersaakkullu aserugaanissarput anguniagaraa. (Saqqummersitat 12:12, 17) Taama pissaaneqartigisumik akeraqarnerput eqqarsaatigalugu, ilaa toqqissisimanangaarami nalunagu ’Jehovap sernigisarai asasini tamaasa’?

10. (a) Jehovap innuttani qanoq sernigisarpai? (b) Sernissorneqarneq sorleq pingaarnerua, sunalu pissutaava?

¹⁰ Jehovalli innuttani qanoq ’sernigisarpai’? Sernissorniarluta neriorsuisimanera pissutsit aaqqissuussaaneranni matumani ajornartorsiuteqarata inuunissatsinnik neriorsuinerunngilaq. Aamma ima isumaqanngilaq tupinnartuliorfigissalluta pisussaasoq. Taamaakkaluartoq Jehovap innuttani tamaasa ataatsimut isigalugit timikkut sernissortarpai. Nunarsuarmi pallorfiginnitsimi ilumoortut Diaavulumit nungutitaanissaat akuerissanngilaa. (2 Petrusi 2:9) Aammattaaq kiffani anersaakkut sernissorpai. Misilinneqarnivut naammagalugit atorsinnaaqqullugit piginnaanngortittarpaatigut, imminullu attaveqarnerput sernissorpaa. Naggaterpiaatigut anersaakkut sernissorneqarneq pingaarnerpaajussaaq, tassami Jehovamut qanittumik attaveqartuartilluta suulluunniit — aamma toqup — ataavartumik ajoqusersinnaanngilaatigut. — Matthæusi 10:28.

11. Qanoq Jehovap innuttani anersaakkut sernissorsimavai?

¹¹ Jehovap kiffani anersaakkut sernissorniarlugit isumassungaarsimavai. Misilinneqarnerit assigiinngitsut nalaattakkatta anigornissaannut oqaatsimigut ilisimassuseqartippaatigut. (Jaaku 1:2-5) Taamaalillutik siunnersuutit atoriaannaasut Biibilimiittut illersuutaapput. Aamma Jehovap ’imminut qinusut anersaamik illernartumik’ tunisarpai. (Lukasi 11:13) Guutip anersaava illernartoq nukiuvoq silarsuarmi tamarmi nukittunerpaaq, taamaammat misilinneqarnernit ussernartunillu sunilluunniit aniguisinnaanngortissinnaavaatigut. Tamatuma saniatigut Jiisusi Kristusi aqqutigalugu Jehovap ’inunnik tunissuteqarfigaatigut’. (Efesosimiut 4:8, NV) Angutit anersaakkut piukkunnaatillit taakku uppeqatitik ikioraangamikkit Jehovap misiginneqataangaarnerata ilaarnissaa ilungersuutigisarpaat. — Jaaku 5:14, 15.

12, 13. (a) Qanoq Jehovap anersaakkkut inuussutissanik piffissaq eqqorlugu pilersortarpaatigut? (b) Anersaakkut peqqissutsitsinnik Jehovap soqutiginninnera qanoq isumaqarfigaajuk?

¹² Jehovap sernissortissatsinnik allamik isumassorsimavaatigut: piffissaq eqqorlugu anersaakkut inuussutissat. (Matthæusi 24:45) Naqitat, ilaatigut Napasuliaq Alapernaarsuiffik aamma Iteritsi!, ataatsimiinnerit, ataatsimeersuarnerit ataatsimeersuaararnerillu aqqutigalugit Jehovap pisariaqartitatsinnik pilersortarpaatigut, pisariaqartitsigaangatta. Ataatsimiinnermi ataatsimeersuaararnermiluunniit ataatsimeersuarnermiluunniit tusakkatta arlaannik uummatitsinnik attuisumik nakussatsissutaallunilu tuppallersaataasumik eqqaamasaqarpit? Ilaatigut atuagassiani allaaserisamik atuartillutit ima oqarsimannginnerpit: ’Una uannut allagaavoq’?

¹³ Saatanip sakkuisa sunniuteqarnerpaat ilaat tassaavoq nikallunganeq, tamatumanngalu eqqorneqarsinnaavugut. Nalunngilaa sivisuumik nikallunganerup nukillaartissinnaallutalu eqqoruminartunngortissinnaagaatigut. (Ussatit 24:10) Saatanip nikallunganerput atornerluttarmagu ikiorneqartariaqarpugut. Nikallornerup akiornissaanut Napasuliaq Alapernaarsuiffik-mi aamma Iteritsi!-mi ilaatigut allaaserisaqartarpoq iluaqutigisatsinnik. Allaaserisaq taamaattoq pillugu kristumiutut qatanngutitta arnat ilaat allappoq: „Allaaserisaq ullut tamangajaasa atuartaraluarlugu suli qullilisarpunga. Nikallungagaangama atuartarniassagakku siniffimma eqqaani nerriveeqqamiitippara. Allaaserisat taassumatut ittut aqqutigalugit Jehovamit illersorneqarlunga eqinneqartutut misigisarpunga.“a Jehovap anersaakkut inuussutissanik piffissaq eqqorlugu pilersortarmatigut qujamasuutigaarput, ilaa? Eqqaamajuk anersaakkut peqqissutsitsinnik soqutiginninnera uatsinnut palligussimaneranut sernissuineranullu uppernarsaataammat.

’Qinnutinik tusartartumut’ palligussinnaavugut

14, 15. (a) Jehovap imminut qanittumik attaveqartut inuttut sunik pilluaqqusarlugillu tunisarpai? (b) Sooq Jehovamut qinunikkut qaqugukkulluunniit sassarsinnaaneq immikkut pisinnaatitaaffiua nuanningaartoq?

¹⁴ Maluginikuuiuk inuit pissaaneqarneruleraangamik oqartussaassuseqarneruleraangamillu naalatsiminnit oqaloqatigineqarnissaat ajornakusoornerulersartoq? Jehova Guutimi? Ima uatsinnit qutsinnerutigiva qanoq oqaasissaqarnersugut soqutiginagu? Taamaanngilluinnarpoq. Aamma qinuneq imminut qanittumik attaveqartunut pilluaqqussutaasa tunissutaasalu ilagaat. Qaqugukkulluunniit ’qinnutinik tusartartumut’ sassarsinnaaneq immikkut pisinnaatitaaffiuvoq nuanningaartoq. (Tussiaat 65:3) Qanoq?

¹⁵ Assersuuteqariarta. Suliffeqarfissuarmi aqutsisoq akisussaaffeqangaarlunilu naammassisassarpassuaqarpoq. Aalajangiisarpoq suliassat sorliit nammineq suliarissanerlugit, sorliillu allanut suliassiissutigissanerlugit. Taamatuttaaq qilammi nunamilu kisimi oqartussaalluni Naalagaasoq aalajangiisinnaavoq suut nammineq suliarissanerlugit, suullu allanut suliassiissutigissanerlugit. Jehovap ernerminut asasaminut, Jiisusimut, isumagisassanngortissimasarpassui eqqarsaatigeriassagitit. „Tunivaa eqqartuussisinnaassusermik”. (Johannesi 5:27) Inngilit taassumunnga ’naalatsigititaapput’. (1 Petrusi 3:22) Jehovap anersaani illernartoq pissaaneqangaartoq Jiisusimut atoriaannanngortissimavaa, taanna ikiortigalugu ajoqersukkani nunamiittut siulersorsinnaaqqullugit. (Johannesi 15:26; 16:7) Taamaattumik Jiisusi ima oqarsinnaavoq: „Qilammilu nunamilu pissaaneq tamarmi uannut tunniussaavoq.“ (Matthæusi 28:18) Qinnutivulli eqqarsaatigalugit Jehova aalajangersimavoq nammineerluni isumagisarniarlugit. Taamaattuminguna Biibilimi allassimasoq Jehovamuinnaq qinusassasugut Jiisusillu aqqani taamaaliortassasugut. — Tussiaat 69:14; Johannesi 14:6, 13.

16. Sooq tatigisinnaavarput qinnutivut Jehovap tusartarai?

¹⁶ Qinnutivut Jehovap tusartarpai? Soqutigisaqanngitsuuguni ’qinunitsinni qasusueqqulluta’ imaluunniit artorsaativut isumakuluutivullu imminut tunniuteqqullugit kajumissaarnavianngilluinnarpaatigut. (Romamiut 12:12; Tussiaat 55:23; 1 Petrusi 5:7) Biibilip nalaani Jehovap kiffaasa aalajaatsut qularinngilluinnarpaat Jehovap qinnutitsik tusassagai. (1 Johannesi 5:14) Tussiaasiortoq Daavi ima oqarpoq: „[Jehovap] tusarumaarpaanga.“ (Tussiaat 55:18) Uaguttaaq Jehovap qanikkaatigut aamma qanoq eqqarsarnersugut sunillu isumakuluuteqarnersugut tusarnaarnissamut piareersimasoq tatigissallugu pissutissaqarluarpugut.

Jehovap kiffani akilertarpai

17, 18. (a) Pinngortitami sianissusillit aalajaallutik kiffartornerat Jehovap qanoq isigaa? (b) Nallittuinivut Jehovamit arajutsineqarneq ajortut Ussatit 19:17-imi qanoq takutinneqartoq nassuiaruk.

¹⁷ Jehovap qilammi nunamilu kisimi Oqartussaasutut inissisimaneranut inuit qanoq iliuuseqarnerat iliuuseqanngitsoorneralluunniit apeqqutaanngilaq, iluarisarpaali — aap, pingaartingaartarpaa — pinngortitami sianissusillit aalajaallutik kiffartorfigigaanni. (Tussiaat 147:11) Taamaalilluta tikipparput ajunngitsorsiassaq alla Jehovamut qanittumik attaveqartut peqataaffigisassaat: Kiffani akilertarpai. — Hebræerit 11:6.

¹⁸ Biibilimi ersarissumik takutinneqarpoq Jehovap kiffami iliuuseqarnerat pingaartikkaa. Assersuutigalugu atuarparput: „Piitsumik ikiuisoq [Jehovamut] taarsigassarsisitsisuuvoq, [Jehovallu] taarsiiffigissavaa ajunngitsuliornerata taamaaqataanik.“ (Ussatit 19:17) Atugarissaanngitsunut Jehovap nallittuinera isumassuineralu Mosesip inatsisaani ersersinneqarpoq. (3 Mosesi 14:21; 19:15) Immikkut pisariaqartitallit ikioraangatsigit nallittuinerminik ilaarsinerput Jehovap qanoq isigaa? Akineqarnissarput ilimaginagu tunigaangatsigit, taamaaliornerput Jehovap imminut taarsigassarsisitaanertut isigisarpaa, tunisisumillu pilluaqqusinermigut iluarinninnermigullu taarsigassarsiat utertissavai. (Ussatit 10:22; Matthæusi 6:3, 4; Lukasi 14:12-14) Aap, uppeqat ajornartorsiortoq misiginneqatigigaangatsigu iliuuseqarfigigaangatsigulu, Jehovap uummataata killissutigisarpaa. Nallittuinivut Ataatatta qilammiusup arajutsineq ajormagit qujamasuutigisinnaavarput. — Matthæusi 5:7.

19. (a) Sooq qularinngissinnaavarput oqaluussinermi ajoqersuganngortitsiortornermilu iliuusivut Jehovap pingaartikkai? (b) Naalagaaffimminut iluaqutaasumik kiffartornerput Jehovap qanoq akilertarpaa?

¹⁹ Jehovap ingammik Guutip Naalagaaffianut iluaqutaasumik iliuuseqarnivut pingaartippai. Jehovamut qanittumik attaveqarutta piffissatsinnik, nukitsinnik pigisatsinnillu Guutip Naalagaaffianik oqaluussissutiginninnermi ajoqersuganngortitsiortornermilu sapinngisarput tamaat atuerusunnerput pissusissamisuuinnassaaq. (Matthæusi 28:19, 20) Immaqa ilaannikkut isumaqartarpugut suunngitsuinnarmik angusaqartarluta. Uummatitta naammalluinnanngitsup allaat qularutiginnilersissinnaavaatigut Jehovap ilungersornivut naammaginerai. (1 Johannesi 3:19, 20) Tunissulli suugaluartorluunniit — qanorluunniit suunngitsigigaluartoq — uummammit asanninnermik ulikkaartumit tunniunneqartoq Jehovap pingaartippaa. (Markusi 12:41-44) Biibilimi neriorsoqqissaarneqarpugut: „Guutimmi iluaatsuunnginnami puiorsimanngilai suliasi asanninnersilu aqqanut takutissimasarsi.“ (Hebræerit 6:10) Kiffartorneq minnerpaarluunniit naalagaaffimminut iluaqutaasussaq Jehovap eqqaamasarlugulu akilertarpaa. Anersaakkut pilluaqqusaangaarnerit maanna nuannaarutigaavut, tulliulluguli silarsuassami nutaami inuunissaq qilanaaraarput, taamanikkussamut Jehovap tukkorluni assani ammassavai imminullu qanittumik attaveqartut kissaatigisinnaasaat tamaasa piviusunngortissallugit. — Tussiaat 145:16; 2 Petrusi 3:13.

20. 2003-mi allassimaffik ukiumoortoq qanoq eqqarsaatigiuarsinnaavarput, qanorlu kinguneqassava?

²⁰ Ataatatsinnut qilammiusumut qanittumik attaveqarniartuarnersugut 2003-mi imminut aperisarta. Tamanna akuersaarutsigu qularinngissinnaavarput neriorsuutini naapertorlugit akilerumaaraatigut, ’Guutimi sallusuitsuuvoq’. (Titusi 1:2) Taassumunnga palligukkutta uatsinnut palligutissaaq. (Jaaku 4:8) Tamanna qanoq kinguneqassava? Maanna pilluaqqusaangaarneq Jehovamullu naassaanngitsumik palligunneroqqissinnaaneq! (wE 12/15 02)

[Quppernerup ataani ilanngussaq]