NGʼALEK CHE KIGITES
Kainetab Kamuktaindet, Boisiet ak Kit ne Iboru Kainanoto
TOS kigisirta ano Tienwogikab Kalosunet 83:18 engʼ Bibilia nengʼungʼ? Engʼ New World Translation of the Holy Scriptures ko kigisir sirutioni ko u ni: “Si kobiit konai bik kole inye, ne kainengʼungʼ ko Jehovah, inyendet inyegei ko i ne Toror Misingʼ ne bou ngʼony komugul.” Bibilia che changʼ che kigesir ko boisie kainet Jehovah kora. Nga u noto, ko ma boisiee che changʼ kainet Jehovah, ne kata u noto, ko boisiee kainaikab torornatet ko u “Kiptaiyat” anan ko “Ne bo Koigeny.” Nee ne magat keboisie engʼ sirutioni? Kainetab torornatet anan kainet Jehovah?
Ngʼalale sirutioni agobo kainet. Engʼ kutitab Hebranik ne kiga kisire kebeberiat ne o ne bo Bibilia, ko kimi kainetab Kamuktaindet ne itabani inendet. Kisirei ko u ni, ) יהוהYHWH( engʼ sirutikab Hebranik. Kiguure kainanito “Jehovah” engʼ kutitab chumbek. Tos kinyoru kainanoto engʼ sirutiet agenge kityo ne bo Bibilia? Achicha. Kinyorjin sirutik che ki bo tai engʼ kutitab Hebranik negit konyil 7000!
Tos bo kamanut ne tia kainetab Kamuktaindet? Ibwat Saetab Kiptaiyat ne kiinetech Jesu Kristo. Tau ko u ni: “Kwandanyo ne mi kipsengwet, Ingotililit kainengʼung.” (Matayo 6:9) Ye ibata noto, kosa Jesu Kamuktaindet kole: “Baba, itoror kainengʼung.” Kowolji Kamuktaindet kolenji, “Kiatoror ak ta atorori kogeny.” (Johana 12:28) Engʼ iman, ko bo kamanut kainetab Kamuktaindet misingʼ. Amu nee anyun, si ma sir siriik alak kainanito engʼ Bibilia, ne kata kainanoto, konde kainaikab torornatet?
U yo mi tuguk aengʼ tuguk che eechen che kiyai keisto kainanoto. Ne tai, ko mwaei bik che changʼ kole, ma nyolu keboisiee kainanoto amu magingen komie ole kigimwaitoi engʼ tai. Kima keboisiee “a, e, i, o, u” kesirei kutitab Hebranik. Ko u noto, ko ma mi chi rani ne imuchi komwa komie ole ki mwaitoi bikab keny YHWH. Nga u noto, ko tos tereech nito ma kiboisiee kainetab Kamuktaindet? Engʼ butusiekab Bibilia, komuch ko ole kigimwaitoi kainetab Jesu ko ki Yeshua anan ko Yehoshua—ma mi chi ne imuchi komwa engʼ iman. Agot nga u noto, koboisiee bik engʼ ngʼony komugul kainet Jesu engʼ ortinwek che teerchin, kosubgei ak ole kimwoitoi engʼ kutuswekwak. Ma esioi koboisiee kainanito amu ma ingen ole kigimwaitoi engʼ tai. Ko u noto, ndo iwendi emet age komuch igas ole kimwaitoi kainengʼung ile teer engʼ kutit age. Ara anyun, agot ndo magingen ole kigimwaitoi kainetab Kamuktaindet engʼ tai, ko ma nito kit ne yaech ma kiboisiee kainanito.
Kit ne bo aengʼ si ma kiboisie kainetab Kamuktaindet engʼ Bibilia ko kayanetab Yahudik ne ki bo kipgaa. Kiiyani che changʼ kole ma nyolu kemwa kainetab Kamuktaindet. Kiiyani ko u noto amu ma iguiyo ngʼatutietab Bibilia ne mwaei kole: “Amemwa kainetab Jehovah Kamuktaindengʼungʼ engʼ tangoi; amu iityin Jehovah ngʼogisto ne mwaei kainenyi engʼ tangoi.”—Komongʼu 20:7.
Eetei ngʼatutionito ketangoe kainetab Kamuktaindet. Nga u noto, ko tos eetei keboisiee kainanito engʼ teegisto? Achicha magoi. Siriik che kisirei Bibilia ne bo Hebranik (“Arorutiet ne bo Keny”) ko ki murenik che iyanotin tugul ago kiisubi Ngʼatutik che kiga igochi Kamuktaindet Israelik. Ago kiboisiee icheget kainetab Kamuktaindet atkaan kora. Ko u, kiboisiee bikab Kamuktaindet kainanoto kingotiendos tienwogikab kalosunet. Kingʼat Jehovah Kamuktaindet bikyik kora koguur kainennyi, ago kigas it che kiiyanotin. (Joel 2:32; Boisionik 2:21) Ko u noto, koboisiee Kristianik rani kainetab Kamuktaindet engʼ teegisto, ko u ye kiyai Jesu.—Johana 17:26.
Yaei lelutiet ne o siriik koboisiee kainaikab torornatet ne kata kainetab Kamuktaindet. Yaei icheget Kamuktaindet koloit ak ko u yo ma chi, nga igimiti bik Bibilia ‘korikyi Jehovah.ʼ (Jakobo 4:8) Ibwat choruengʼungʼ ne chamanet. Tos imuchi koek chorwengʼungʼ iman ngot komengen kainennyi? Ko u noto, ngot ko ma kineet bik kainetab Kamuktaindet, Jehovah, ko tos imuchi irikyi Kamuktaindet iman engʼ or nee? Ngot ko ma boisiee bik kainetab Kamuktaindet kora, ko ma naei kit ne iboru kainanoto. Tos iboru nee kainaetab Kamuktaindet?
Kamwachi Kamuktaindet kiboitiondennyi ne kiiyanat Musa, kit ne iboru kainennyi. Kingoteebee Musa Jehovah agobo kainennyi, kowolji kolenji: “ANENDET NE AMI [“Aegu kit ne amache aeg,” NW].” (Komongʼu 3:14) Mwaei Bibilia ne bo Rotherham engʼ sirutioni kole: “Aegu kit ne achame aeg.” Amu noto komuchi koek Jehovah kit age tugul ne magat si kobiit koyai kosulda magutikyik.
Ndo imuchi iyegu kit age tugul ne imache iyegu, ko tos iyochi nee choronoguk? Ndo miani misingʼ agenge engʼ ichek, imuchi iyegu chepkerichot ne ngʼom ak isoob inendet. Ndo begu robisiekab age, imuchi iyegu mogoriot ak itoret. Nga u noto, engʼ iman ko ngʼeringʼen tuguk che imuchi iyegu. Ki u noto achek tugul. Ye itesetai inetigei Bibilia, ikwongʼe igeer ile imuchi koek Jehovah kit age tugul ne magat si kobiit koyai kosulda arorutikyik. Ak kobaibai koboisiee kimnatennyi engʼ bik che chamei inendet. (2 Ateptab Betusiek 16:9) Magoi nai atebosiechuto kororon bo Jehovah bik che ma ingen kainennyi.
Magat keboisiee kainet Jehovah engʼ Bibilia. Ngot kenai kit ne iboru kainanoto ak keboisiee atkaan kora yo kioote inendet, ko toretech kerikyin Kwandanyo ne bo kipsengwet, Jehovah.
[Pichait ne mi pechitab 195]
Kainetab Kamuktaindet engʼ sirutikab Hebranik