Tos Igeertoi ano Betusiek che Bwanei?

Tun‘uusei Kamuktaindet beekab kongʼ alak tugul engʼ konyekwak; ama komi meet kogeny; ama komi kateiyet kogeny, anan rirek, anan ngʼwanindo: kogosiirto tuguk che bo tai.ʼ​—Ngʼangʼutiet 21:3, 4, The Holy Bible in Kalenjin, 1969.

Tun iboibochini boisiet.​—Isaia 65:21-23.

Tun ko ma komi mianwek anan ko nyalilda age tugul.​—Isaia 25:8; 33:24.

Tun keboibochini sobet koigeny kemi ak bikab gorikyok koboto choronok.​—Tienwogikab Kalosunet 37:11, 29.

Tuguk aengʼ:

•  Tinyei Kamuktaindet kamuget koyai kosulda arorutikyik. Engʼ Bibilia ko Jehovah inegei ne keguure “Kamuktaindet” anan ko ne bo Kamuktaet tugul, amu tinyei inendet kimnatet kosiir tugul. (Ngʼangʼutiet 15:3) Ko u noto komuchi koyai kosulda komie arorutiennyi ne bo koyai ngʼony kogararanit. Iman nito amu mwae Bibilia kole “imugaksei tuguk tugul engʼ Jehovah.”​—Matayo 19:26.

•  Tinyei Kamuktaindet maget koyai arorutikyik kosulda. Ko u, ‘tinyei Jehovah magetʼ kongʼeet bik che kigobek.​—Job 14:14, 15.

  Mwae Bibilia kora kole kiisob Jesu bik. Ki amu nee si koyai ko u noto? Amu ki tinyei maget. (Mariko 1:40, 41) Ki kergei Jesu ak Kwandanyi Jehovah, ki machei kotoret bik che ki nyalildos.​—Johana 14:9.

  Ko u noto kiyani kele machei Jehovah ak Jesu kotoretech keboibochi betusiek che bwanei!​—Tienwogikab Kalosunet 72:12-14; 145:16; 2 Petero 3:9.