Jisabhu
14 O muhatu wala njimu, ukwatekesa o mwiji wê,
Maji o kyowa kya muhatu, ubula o inzo yê ni maku mê.
2 Woso wala ni wendelu wambote, uxila Jihova,
Maji o yó kala ni wendelu wambote, kamuxila.
3 O izwelu ya ukumbu itunda mu makanu a yowa,
Yedi kala mbangala ya kubeta-nayu,
Maji o izwelu ya jinjimu, yanda ku alanga.
4 Bhwakambe o jingombe, o kididi bhu dila o ibhaku kizela,
Maji o jingombe jikwatekesa o idimakaji kubhongolola idima yavulu.
5 O mbangi yafiyele, uzwela o kidi,
Maji o mbangi ya makutu, utanga ngo makutu.
6 O mukwa kuxongwena, usota o unjimu maji ka usange,
Maji o muthu watongoloka, usanga o kwijiya ni lusolo-lwoso.
7 O kyowa musondoloke,
Mukonda mukanu dyê, ki mwanda tunda izwelu ya unjimu.
8 O unjimu ukwatekesa o muthu watongoloka kwijiya o wendelu wê,
Maji o yowa, a anganala mukonda dya kutobha kwâ.
9 O yowa, ituxi yâ ka ikiti kima.
Maji o athu ayuka asota o kutululuka.
10 O muthu mwene ngo utena kwijiya o kikote kyala ku muxima wê,
Séku muthu wengi utena kwijiya o kusanguluka kwê.
11 O inzo ya athu ayibha anda ibula,
Maji o balaka ya athu ayuka, yanda nangenena.
12 Sayi njila, o muthu u imona kala yayuka mwene,
Maji o disukilu dyê, o kalunga.
13 O muthu né mwene se wasanguluka,
Utena kukala ni dilamba ku muxima,
O kithangana kya kusanguluka,
Kitena kukituka kithangana kya kuluwala.
14 O muthu wabhukumuka wanda bhita mu ibhidi mukonda dya wendelu wê,
Maji o muthu wambote wanda tambula mabesá mukonda dya wendelu wê.
15 O kyowa uxikina mu ima yoso ya mutangela,
Maji o njimu, uxinganeka kyambote ande dya kubhanga kima.
16 O njimu muthu wadimuka, o ima yayibha mwene u ilenga,
Maji o kyowa-phe, kale ni kilunji, mwene udyelela mu nguzu yê.
17 O muthu uthathamana ni lusolo, kyowa,
Maji o muthu watongoloka a muzemba.
18 O undundu wanda tambula o yowa, o kutobha,
Maji o futu yanda tambula o jinjimu, o kwijiya.
19 O athu ayibha anda fukama bhu pholo ya athu ambote,
O akwa phulu, anda fukama bhu myelu ya jinzo ja athu ayuka.
20 O ngadyama kate mwene ni athu a muzukama a muzemba,
Maji o mvwama makamba a muvula.
21 Woso usebhulula mukwâ wa muta kituxi.
Maji wazediwa yó ukwatela henda ku ngadyama.
22 O athu amesena ngo kubhanga o ima yayibha, anda dibota.
Maji o athu anda zola ni kudyelela yó asota kubhanga ima yambote.
23 Kyoso o muthu kyakalakala ni nguzu yoso, mwene umona mbote.
Maji kuzwela kyavulu kubhekela ngo wadyama.
24 O kitundu kya jinjimu, o umvwama wâ.
Maji o yowa, anda suluka ni wowa wâ.
25 O mbangi yakidi, ubhulula myenyu.
Maji o mbangi yamakutu, uzwela ngo makutu.
26 O muthu uxila Jihova, ukala ni kidyelelu kyakidi.
Mwene usanga diswamenu phala o twana twê.
27 O kuxila Jihova kubhekela mwenyu,
Kubhulula o muthu ku kalunga.
28 O sobha wala ni mundu wavulu, wala ni kijingu.
Maji o nguvulu wakambe o mundu, wadiboto.
29 O muthu ukamba kuthathamana ni lusolo wala ni kilunji,
Maji woso wakambe o mwanyu, wijidisa o wowa wê.
31 Woso unyana o ngadyama, wa musebhulula yó wa mubhange.
Maji woso ukwatela henda ku ngadyama, wa mujingisa yó wa mubhange.
32 O muthu wayibha, o kuyibha kwê, kwene kwanda mudya.
Maji o muthu wayuka, anda mulanga mukonda dya kuyuka kwê.
33 O njimu usweka o kwijiya kwala-naku, ku muxima wê,
Maji o yowa ejidisa ku athu o ima yejiya.
34 O kuyuka kuzangeleka o kifuxi,
Maji o kituxi kikwatesa jisonyi ku mundu.
35 O sobha usanguluka mukonda dya selevende yê, ubhanga o ima ni unjimu.
Maji ufutuluka ni yó ubhanga ima yayibha.