KIBHUIDISU 3
Kiebhi ki Ngi Tena Kuzuela ni Jitata Jami?
IHI I UEJI BHANGA?
Tala o kifika kiki: Kia Kuarta mu usuku. Geoff uala ni 17 dia mivu, ua zubha kubhanga o ikalakalu iê kubhata, iú ua mesena kukatula tu ithangana phala kunhoha-ku! Muéne u xikama, u jikula o mutelembe ua izuzumbia.
Mu kithangana kienhokio o Tata u moneka, ua luuala.
“Geoffrey! Ua mu zangé o kithangana ni jifilme, hinu kua mu kuatekesa ndeng’ê mu kubhanga o ikalakalu iê! Kuxibhaka kuê kua ngi kumu ué kiá!”
Geoff u di kumuna ni dizuí dia suína, “Ua mateka-zé kiá.”
O Tata u mu zukama, anga u zuela. “Ihi, ihi i ua zuela?”
Geoff u hemena, u jika o pholo, anga u tambuijila. “Kané, ki kima Papá.”
O Tata njinda i mu kuata, anga u zuela. “Kana ku ngi tambuijila kiki!”
Se ua kexile bhu kididi kia Geoff, ihi i ueji bhanga phala kuzoke ni tat’ê?
XINGANEKA!
Kuzuela kiambote ni jitata jê kua difu ni kuendesa dikalu. Se u sanga kiluezu, ua-nda kuimana ni kusota njila iéngi.
KIFIKA:
Leah uambe, “ku ngi bhonza kuzuela ni tat’etu. Saí bhabha, nga mu zuela-né kiá tu ithangana maji muéne u ng’ibhuidisa dingi, ‘ua mu zuela n’eme?’”
LEAH UALA NI NDUNGE JITATU PHALA KUBATULA O MAKA ENHÁ.
Kuzoka ni tat’ê.
Leah u dikola, “ki nga mu tonoka! Ngivuidile!”
Kudixibha.
Leah ka mesena dingi kudikunda o maka ala nau ni tat’ê.
Ku kingila o kithangana kia tokala phala kudikunda o maka ni tat’ê.
Leah u kinga bhofele phala kuzuela ni tat’ê mba u soneka o maka ala nau mu mukanda.
Ndunge iebhi i ueji bhana kua Leah?
XINGANEKA MU MBOTE: O tata ia Leah ua landuka ni kima kiengi—kejiié ihi ia bhangesa o mona kuluuala. Se Leah u sola o Ndunge ia 1, o kudikola kuê kua-nda moneka kala ua mu hoia-hoié ngó. O kudikola ki kueji bhangesa o tata ia Leah ku mu ivua, keji londekesa ué kuila ua mu xila tat’ê. (Efezo 6:2) Mu kidi, o ndunge iii ki ieji mu kuatekesa.
Kála o kiluezu ki ki tena ku kufidisa kusuluka o njila i ua mu kuenda, kiene kimoxi ué, phala kuzuela kiambote ni jitata jê, u tena kusota ndunge iéngi
Sumbala o Ndunge ia 2 ki i bhonzo ku i bhanga maji kubhanga kiki, ki ku londesa unjimu. Mukonda diahi? Mukonda phala kubatula kiambote o maka, Leah ua bhingi kudikunda ni tat’ê. Kia mukuá, phala ku mu kuatekesa kua tata, o tata ua tokala uijiia ia mu bhita ni mon’ê. Mu kiki kudixibha ki kueji mu kuatekesa kubatula o maka.
Ni Ndunge ia 3, Leah kehela o ibhidi ku mu fidisa kuzuela ni tat’ê. Mu veji dia kiki, muéne u sola kithangana kiéngi phala kudikunda o maka. Se u sola kusoneka mukanda phala ku u bhana tat’ê, Leah ua-nda divua kiá kiambote.
Kusoneka o mukanda kua-nda mu kuatekesa ué kusokesa o izuelu ia mesena kuzuela. Kioso tata kia-nda tanga o mukanda, ua-nda mona se ihi ia mesenene ku mu tangela, kiki kia-nda mu kuatekesa ué kuijiia ia mu bhita ni mon’ê. Kienhiki o Ndunge ia 3 i kuatekesa kixi Leah mba o tata. Ki kale kuzuela pholo ni pholo mba bhu kaxi ka mukanda, o ndunge iii ia lungu ni kitumu kia Bibidia kiamba kuila, tu “kaiedienu o ima i bheka paze.”—Loma 14:19.
Ndunge iebhi dingi ieji kuatekesa Leah?
Se u tena kuxinganeka ndunge iéngi, soneka-iu ku luiji. Mu kusuluka, soneka o mbote ijila mu kukaiela o ndunge iií.
LOMBOLOLA KIAMBOTE I UA MESENA O KUZUELA KU JITATA JÉ
Ijiia na-kiu kuila, o kima ki ua zuela nange ki kiene kivua o jitata jé.
MU KIFIKA:
O jitata jé a kuibhuidisa se mukonda diahi ua luuala. Eie u tambuijila, “ki ngi mesena kuzuela o maka enhá.”
Maji o jitata jé a banza kiki: “Ki ngi mesena kuzuela o maka iá mukonda ki ngi mi dielela. Nga-nda zuela o maka iá ni makamba mami.”
Xinganeka kuila, eie ua mu dibhana ni ibhidi, o jitata jé a mesena ku ku kuatekesa. Maji eie u zuela: “Ki mu thandanganhe ngó. Ngejiia i nga-nda bhanga.”
O jitata jé a tena kubanza kiki ...
O kitambuijilu kia tokalele kiki ...