ಅಧ್ಯಾಯ ಹದಿಮೂರು

ಇಬ್ಬರು ರಾಜರ ಮಧ್ಯೆ ಹೋರಾಟ

 1, 2. ದಾನಿಯೇಲ 11ನೆಯ ಅಧ್ಯಾಯದಲ್ಲಿ ದಾಖಲಿಸಲ್ಪಟ್ಟಿರುವ ಪ್ರವಾದನೆಯಲ್ಲಿ ನಾವೇಕೆ ಆಸಕ್ತಿಯನ್ನು ತೋರಿಸಬೇಕು?

ಇಬ್ಬರು ಪ್ರತಿಸ್ಪರ್ಧಿ ರಾಜರು ಪರಮಾಧಿಕಾರವನ್ನು ಪಡೆದುಕೊಳ್ಳಲಿಕ್ಕಾಗಿ ಸರ್ವಶಕ್ತಿಯನ್ನೂ ಬಳಸಿ ಹೋರಾಡುತ್ತಿದ್ದಾರೆ. ವರ್ಷಗಳು ಗತಿಸಿದಂತೆ, ಮೊದಲನೆಯವನು, ತದನಂತರ ಎರಡನೆಯವನು ಅಧಿಕಾರಕ್ಕೆ ಬರುತ್ತಾರೆ. ಕೆಲವೊಮ್ಮೆ, ಒಬ್ಬ ರಾಜನು ಬಹಳಷ್ಟು ಅಧಿಕಾರದಿಂದ ಆಳುತ್ತಿರುವಾಗ, ಇನ್ನೊಬ್ಬನು ನಿಷ್ಕ್ರಿಯನಾಗುತ್ತಾನೆ, ಮತ್ತು ಹೋರಾಟವೇ ನಡೆಯದ ಸಮಯಾವಧಿಗಳೂ ಇವೆ. ಅಷ್ಟರಲ್ಲೇ ಇದ್ದಕ್ಕಿದ್ದಂತೆ ಇನ್ನೊಂದು ಕದನವು ತಲೆದೋರುತ್ತದೆ, ಹಾಗೂ ಹೋರಾಟವು ಮುಂದುವರಿಯುತ್ತದೆ. ಈ ನಾಟಕದಲ್ಲಿ ಭಾಗವಹಿಸುವ ಪಾತ್ರಧಾರಿಗಳಲ್ಲಿ, ಸಿರಿಯದ ರಾಜನಾದ Iನೆಯ ಸೆಲ್ಯೂಕಸ್‌ ನೈಕೇಟರ್‌, ಐಗುಪ್ತದ ರಾಜನಾದ ಟಾಲೆಮಿ ಲಾಗಸ್‌, ಸಿರಿಯದ ರಾಜಕುಮಾರಿಯಾಗಿದ್ದು, ಐಗುಪ್ತದ ರಾಣಿಯಾಗಿ ಪರಿಣಮಿಸಿದ Iನೆಯ ಕ್ಲಿಯೋಪಾತ್ರ, ಅಗಸ್ಟಸ್‌ ಹಾಗೂ ತಿಬೇರಿಯ ಎಂಬ ರೋಮನ್‌ ಸಾಮ್ರಾಟರು, ಮತ್ತು ಪಾಲ್ಮೈರದ ರಾಣಿ ಸೆನೋಬಿಯರು ಸೇರಿದ್ದಾರೆ. ಈ ಹೋರಾಟವು ಕೊನೆಗೊಳ್ಳುತ್ತಾ ಬಂದಂತೆ, ನಾಸಿ ಜರ್ಮನಿ, ಕಮ್ಯೂನಿಸ್ಟ್‌ ಒಕ್ಕೂಟದ ರಾಷ್ಟ್ರಗಳು, ಆ್ಯಂಗ್ಲೊ-ಅಮೆರಿಕನ್‌ ಲೋಕ ಶಕ್ತಿ, ಜನಾಂಗ ಸಂಘ, ಹಾಗೂ ವಿಶ್ವಸಂಸ್ಥೆಗಳು ಸಹ ಇದರಲ್ಲಿ ಒಳಗೂಡಿರುವವು. ಇದರ ಅಂತ್ಯಗತಿಯು, ಹೋರಾಟದಲ್ಲಿ ಒಳಗೂಡಿರುವ ಯಾವ ರಾಜಕೀಯ ಗುಂಪೂ ಮುನ್ನೋಡಿರದಂತಹ ಒಂದು ಘಟನಾವಳಿಯಾಗಿದೆ. ಸುಮಾರು 2,500 ವರ್ಷಗಳ ಹಿಂದೆ, ಯೆಹೋವನ ದೂತನು ದಾನಿಯೇಲನಿಗೆ ಈ ರೋಮಾಂಚಕ ಪ್ರವಾದನೆಯನ್ನು ಸ್ಪಷ್ಟವಾಗಿ ತಿಳಿಯಪಡಿಸಿದನು.​—⁠ದಾನಿಯೇಲ, 11ನೆಯ ಅಧ್ಯಾಯ.

² ಮುಂದೆ ಬರಲಿಕ್ಕಿದ್ದ ಇಬ್ಬರು ರಾಜರ ನಡುವಿನ ಪ್ರತಿಸ್ಪರ್ಧೆಯನ್ನು ದೇವದೂತನು ತನಗೆ ಸವಿವರವಾಗಿ ಪ್ರಕಟಿಸುವುದನ್ನು ಕೇಳಿ ದಾನಿಯೇಲನು ಎಷ್ಟೊಂದು ರೋಮಾಂಚ​ನಗೊಂಡಿದ್ದಿರಬೇಕು! ಆ ನಾಟಕವು ನಮಗೂ ಆಸಕ್ತಿಯ ವಿಚಾರವಾಗಿದೆ. ​ಏಕೆಂದರೆ ಇಬ್ಬರು ರಾಜರ ನಡುವಿನ ಅಧಿಕಾರದ ಹೋರಾಟವು ನಮ್ಮ ದಿನಗಳ ವರೆಗೂ ವ್ಯಾಪಿಸಿದೆ. ಈ ಪ್ರವಾದನೆಯ ಮೊದಲ ಭಾಗವು ಸತ್ಯವಾಗಿತ್ತು ಎಂಬುದನ್ನು ಇತಿಹಾಸವು ಹೇಗೆ ತೋರಿಸಿಕೊಟ್ಟಿದೆ ಎಂದು ಗಮನಿಸುವ ಮೂಲಕ, ಪ್ರವಾದನಾ ವೃತ್ತಾಂತದ ಕೊನೆಯ ಭಾಗದ ನಿಶ್ಚಿತ ನೆರವೇರಿಕೆಯಲ್ಲಿನ ನಮ್ಮ ನಂಬಿಕೆಯನ್ನು ಹಾಗೂ ದೃಢವಿಶ್ವಾಸವನ್ನು ನಾವು ಇನ್ನೂ ಬಲಗೊಳಿಸಿಕೊಳ್ಳುವೆವು. ನಾವು ಈ ಪ್ರವಾದನೆಗೆ ಗಮನ ಕೊಡುವುದರಿಂದ, ಕಾಲ ಪ್ರವಾಹದಲ್ಲಿ ನಾವು ಎಲ್ಲಿದ್ದೇವೆ ಎಂಬುದರ ಕುರಿತು ಸ್ಪಷ್ಟವಾದ ನೋಟವು ನಮಗೆ ದೊರಕುವುದು. ನಮ್ಮ ಪರವಾಗಿ ದೇವರು ಕಾರ್ಯನಡಿಸುವಂತೆ ನಾವು ತಾಳ್ಮೆಯಿಂದ ಆತನಿಗೋಸ್ಕರ ಕಾಯುತ್ತಿರುವಾಗ, ಆ ಹೋರಾಟದಲ್ಲಿ ತಟಸ್ಥರಾಗಿ ನಿಲ್ಲುವ ನಮ್ಮ ದೃಢನಿರ್ಧಾರವನ್ನು ಸಹ ಇದು ಬಲಗೊಳಿಸುವುದು. (ಕೀರ್ತನೆ ​146:​3, 5) ಆದುದರಿಂದ, ಯೆಹೋವನ ದೂತನು ದಾನಿಯೇಲನೊಂದಿಗೆ ಮಾತಾಡುವಾಗ, ನಾವು ತೀವ್ರಾಸಕ್ತಿಯಿಂದ ಕಿವಿಗೊಡೋಣ.

ಗ್ರೀಕ್‌ ರಾಜ್ಯದ ವಿರುದ್ಧ

 3. “ಮೇದ್ಯಯನಾದ ದಾರ್ಯಾವೆಷನ ಆಳಿಕೆಯ ಮೊದಲನೆಯ ವರುಷದಲ್ಲಿ” ದೇವದೂತನು ಯಾರಿಗೆ ಬೆಂಬಲ ನೀಡಿದನು?

³ “ಮೇದ್ಯಯನಾದ ದಾರ್ಯಾವೆಷನ ಆಳಿಕೆಯ ಮೊದಲನೆಯ ವರುಷದಲ್ಲಿ [ಸಾ.ಶ.ಪೂ. 539/538] ನಾನೇ ಮೀಕಾಯೇಲನಿಗೆ ಬೆಂಬಲಕೊಟ್ಟು ಆಶ್ರಯನಾಗಿ ನಿಂತೆನು” ಎಂದು ದೇವದೂತನು ಹೇಳಿದನು. (ದಾನಿಯೇಲ 11:⁠1) ಈ ಸಮಯ​ದಲ್ಲಿ ದಾರ್ಯವೆಷನು ಬದುಕಿರಲಿಲ್ಲವಾದರೂ, ಅವನ ಆಳ್ವಿಕೆಯು ಪ್ರವಾದನಾ ಸಂದೇಶದ ಆರಂಭದ ಹಂತವಾಗಿತ್ತು ಎಂದು ದೇವದೂತನು ಸೂಚಿಸಿದನು. ದಾನಿಯೇಲನನ್ನು ಸಿಂಹಗಳ ಗವಿಯಿಂದ ಮೇಲೆತ್ತುವಂತೆ ಅಪ್ಪಣೆ ನೀಡಿದ್ದಂತಹ ರಾಜನು ಇವನೇ ಆಗಿದ್ದನು. ತನ್ನ ಪ್ರಜೆಗಳೆಲ್ಲರೂ ದಾನಿಯೇಲನ ದೇವರಿಗೆ ಭಯಪಡಬೇಕು ಎಂಬ ಆಜ್ಞೆಯನ್ನು ಸಹ ದಾರ್ಯಾವೆಷನೇ ಜಾರಿಗೆ ತಂದಿದ್ದನು. (ದಾನಿಯೇಲ 6:​21-27) ಆದರೂ, ಯಾರಿಗೆ ದೇವದೂತನು ಬೆಂಬಲಿಗನಾಗಿ ನಿಂತನೋ ಅವನು ಮೇದ್ಯಯನಾದ ದಾರ್ಯಾವೆಷನಾಗಿರಲಿಲ್ಲ, ಬದಲಾಗಿ ದೇವದೂತನ ಸಂಗಾತಿಯಾಗಿದ್ದು, ದಾನಿಯೇಲನ ಜನರ ಪ್ರಭುವಾಗಿದ್ದ ಮೀಕಾಯೇಲನೇ ಆಗಿದ್ದನು. (ದಾನಿಯೇಲ ​10:​12-14ನ್ನು ಹೋಲಿಸಿರಿ.) ಮೀಕಾಯೇಲನು ಮೇದ್ಯಯ-ಪಾರಸಿಯದ ದೆವ್ವಾಧಿಪತಿಗಳೊಂದಿಗೆ ಹೋರಾಡುತ್ತಿರುವಾಗ, ದೇವದೂತನು ಅವನಿಗೆ ಬೆಂಬಲವನ್ನು ನೀಡಿದನು.

 4, 5. ಮುಂತಿಳಿಸಲ್ಪಟ್ಟ ನಾಲ್ಕು ಮಂದಿ ಪಾರಸಿಯ ರಾಜರು ಯಾರಾಗಿದ್ದರು?

⁴ ದೇವದೂತನು ಮುಂದುವರಿಸಿದ್ದು: “ಇಗೋ, ಪಾರಸಿಯ ದೇಶದಲ್ಲಿ ಇನ್ನು ಮೂವರು ರಾಜರು ಏಳುವರು; ನಾಲ್ಕನೆಯ ರಾಜನು ಎಲ್ಲರಿಗಿಂತಲೂ ಅಧಿಕಧನವಂತನಾಗಿರುವನು; ಅವನು ತನ್ನ ಧನದಿಂದ ಪ್ರಬಲನಾಗಿ ಗ್ರೀಕ್‌ ರಾಜ್ಯಕ್ಕೆ ವಿರುದ್ಧವಾಗಿ ತನ್ನ ಬಲವನ್ನೆಲ್ಲಾ ಎಬ್ಬಿಸುವನು.” (ದಾನಿಯೇಲ 11:⁠2) ಈ ಪಾರಸಿಯ ರಾಜರು ಯಾರಾಗಿದ್ದರು?

⁵ ಮೊದಲ ಮೂವರು ರಾಜರು, ಮಹಾ ಕೋರೆಷ, IIನೆಯ ಕ್ಯಾಂಬೈಸೀಸ್‌, ಮತ್ತು Iನೆಯ ದಾರ್ಯಾವೆಷರೇ ಆಗಿದ್ದರು. ಬಾರ್ಡಿಯನು (ಅಥವಾ ಬಹುಶಃ ಗೌಮಾಟ ಎಂಬ ಹೆಸರಿನ ಒಬ್ಬ ಸುಳ್ಳು ಹಕ್ಕುದಾರನು) ಕೇವಲ ಏಳು ತಿಂಗಳುಗಳ ವರೆಗೆ ಆಳ್ವಿಕೆ ನಡೆಸಿದ್ದರಿಂದ, ಪ್ರವಾದನೆಯು ಅವನ ಅಲ್ಪಾವಧಿಯ ಆಳ್ವಿಕೆಯನ್ನು ಗಣನೆಗೆ ತೆಗೆದುಕೊಳ್ಳಲಿಲ್ಲ. ಸಾ.ಶ.ಪೂ. 490ರಲ್ಲಿ, ಮೂರನೆಯ ರಾಜನಾದ Iನೆಯ ದಾರ್ಯಾವೆಷನು, ಎರಡನೆಯ ಬಾರಿ ಗ್ರೀಸ್‌ ದೇಶಕ್ಕೆ ಮುತ್ತಿಗೆ ಹಾಕಲು ಪ್ರಯತ್ನಿಸಿದನು. ಆದರೂ, ಮ್ಯಾರಥಾನ್‌ನ ಬಳಿ ಪಾರಸಿಯರು ಸೋಲಿಸಲ್ಪಟ್ಟರು ಹಾಗೂ ಏಷ್ಯಾ ಮೈನರ್‌ಗೆ ಓಡಿಸಲ್ಪಟ್ಟರು. ಗ್ರೀಸ್‌ನ ವಿರುದ್ಧ ಇನ್ನೂ ಹೆಚ್ಚಿನ ದಂಡಯಾತ್ರೆಗಾಗಿ ದಾರ್ಯಾವೆಷನು ಜಾಗರೂಕವಾಗಿ ಸಿದ್ಧತೆಗಳನ್ನು ಮಾಡಿದನಾದರೂ, ನಾಲ್ಕು ವರ್ಷಗಳ ಬಳಿಕ ಅವನು ಸಾಯುವ ಮುಂಚೆ ಆ ಯೋಜನೆಯನ್ನು ಪೂರೈಸಲು ಅವನಿಂದ ಸಾಧ್ಯವಾಗಲಿಲ್ಲ. ಅವನ ಮಗನೂ ಅವನ ತರುವಾಯ ಪಟ್ಟಕ್ಕೆ ಬಂದ ರಾಜನೂ ಆಗಿದ್ದ “ನಾಲ್ಕನೆಯ ರಾಜ,” ಅಂದರೆ Iನೆಯ ಸರ್‌ಕ್ಸೀಸನು ಆ ಕೆಲಸವನ್ನು ಪೂರೈಸುವಂತೆ ಬಿಡಲಾಗಿತ್ತು. ಎಸ್ತೇರಳನ್ನು ಮದುವೆಯಾದ ರಾಜನಾದ ಅಹಷ್ವೇರೋಷನೇ ಅವನಾಗಿದ್ದನು.​—⁠ಎಸ್ತೇರಳು 1:1; 2:​15-17.

 6, 7. (ಎ) ನಾಲ್ಕನೆಯ ರಾಜನು “ಗ್ರೀಕ್‌ ರಾಜ್ಯಕ್ಕೆ ವಿರುದ್ಧವಾಗಿ ತನ್ನ ಬಲವನ್ನೆಲ್ಲಾ ಎಬ್ಬಿಸಿ”ದ್ದು ಹೇಗೆ? (ಬಿ) ಗ್ರೀಸ್‌ನ ವಿರುದ್ಧ ನಡೆಸಿದ ಸರ್‌ಕ್ಸೀಸ್‌ನ ದಂಡಯಾತ್ರೆಯ ಫಲಿತಾಂಶ​ವೇನಾಗಿತ್ತು?

⁶ ನಿಜವಾಗಿಯೂ Iನೆಯ ಸರ್‌ಕ್ಸೀಸನು “ಗ್ರೀಕ್‌ ರಾಜ್ಯಕ್ಕೆ ವಿರುದ್ಧ,” ಅಂದರೆ ಒಂದು ಗುಂಪಿನೋಪಾದಿ ಇದ್ದ ಗ್ರೀಸಿನ ಸ್ವತಂತ್ರ ರಾಜ್ಯಗಳ ವಿರುದ್ಧ “ತನ್ನ ಬಲವನ್ನೆಲ್ಲಾ ಎಬ್ಬಿಸಿ”ದನು. “ಮಹತ್ವಾಕಾಂಕ್ಷೆಯುಳ್ಳ ಆಸ್ಥಾನಿಕರಿಂದ ಪ್ರಚೋದಿತನಾದ ಸರ್‌ಕ್ಸೀಸನು, ಭೂಭಾಗದಲ್ಲಿಯೂ ಸಮುದ್ರ ಭಾಗದಲ್ಲಿಯೂ ಆಕ್ರಮಣವನ್ನು ಆರಂಭಿಸಿದನು” ಎಂದು ಮೇದ್ಯರು ಮತ್ತು ಪಾರಸಿಯರು​—⁠ವಿಜೇತರು ಹಾಗೂ ರಾಜತಂತ್ರಜ್ಞರು (ಇಂಗ್ಲಿಷ್‌) ಎಂಬ ಪುಸ್ತಕವು ಹೇಳುತ್ತದೆ. ಸಾ.ಶ.ಪೂ. ಐದನೆಯ ಶತಮಾನದ ಗ್ರೀಕ್‌ ಇತಿಹಾಸಕಾರನಾದ ಹಿರಾಡಟಸನು ಬರೆಯುವುದೇನಂದರೆ, “ಇನ್ನಾವುದೇ ದಂಡಯಾತ್ರೆಯು ಸರ್‌ಕ್ಸೀಸ್‌ನ ಈ ಆಕ್ರಮಣಕ್ಕೆ ಸರಿಸಾಟಿಯಾಗಿರಲಿಲ್ಲ.” ಹಿರಾಡಟಸನ ದಾಖಲೆಯು ಹೇಳುವುದೇನೆಂದರೆ, ಸರ್‌ಕ್ಸೀಸ್‌ನ ನೌಕಾಪಡೆಯು “ಒಟ್ಟು 5,17,610 ಸೈನಿಕರಿಂದ ಕೂಡಿತ್ತು. 17,00,000 ಮಂದಿ ಕಾಲಾಳುಗಳು; 80,000 ಅಶ್ವಬಲ; ಇದರ ಜೊತೆಗೆ ಒಂಟೆಗಳ ಮೇಲೆ ಪ್ರಯಾಣಿಸಿದ ಅರಬ್ಬಿಗಳು, ಹಾಗೂ ರಥಗಳಲ್ಲಿ ಕಾದಾಡಿದ ಲಿಬ್ಯದವರನ್ನು ಸಹ ಕೂಡಿಸಬೇಕಾಗಿದ್ದು, ಅವರು ಸುಮಾರು 20,000ದಷ್ಟಿದ್ದರು ಎಂಬುದು ನನ್ನ ಅಂದಾಜು. ಆದುದರಿಂದ, ಭೂಸೈನ್ಯ ಹಾಗೂ ನೌಕಾ ಸೈನ್ಯದ ಸಂಖ್ಯೆಯನ್ನು ಒಟ್ಟುಗೂಡಿಸಿದಾಗ ಅದರ ಮೊತ್ತವು 23,17,610ರಷ್ಟಾಗಿತ್ತು.”

⁷ ಸಂಪೂರ್ಣ ವಿಜಯವನ್ನು ಸಾಧಿಸುವುದು ಅವನ ಉದ್ದೇಶವಾಗಿದ್ದುದರಿಂದ, ಸಾ.ಶ.ಪೂ. 480ರಲ್ಲಿ Iನೆಯ ಸರ್‌ಕ್ಸೀಸನು ತನ್ನ ದೊಡ್ಡ ಸೈನ್ಯವನ್ನು ಗ್ರೀಸ್‌ನ ವಿರುದ್ಧ ಮುನ್ನಡೆಸಿದನು. ಥರ್ಮಾಪಲೀ ಎಂಬ ಸ್ಥಳದಲ್ಲಿ ಗ್ರೀಕ್‌ ಸೈನಿಕರು, ಯುದ್ಧವನ್ನು ನಿಧಾನಿಸುವ ತಂತ್ರವನ್ನು ಹೂಡಿದರೂ, ಪಾರಸಿಯರು ಅಥೇನೆ ಪಟ್ಟಣವನ್ನು ಧ್ವಂಸಮಾಡಿಬಿಟ್ಟರು. ಆದರೂ, ಸ್ಯಾಲಮೀಸ್‌ನಲ್ಲಿ ಅವರು ಭೀಕರ ಸೋಲನ್ನು ಅನುಭವಿಸಿದರು. ಸಾ.ಶ.ಪೂ. 479ರಲ್ಲಿ, ಪ್ಲಟೀಯ ಎಂಬ ಸ್ಥಳದಲ್ಲಿ ಗ್ರೀಕ್‌ ಸೇನೆಗಳು ಇನ್ನೊಮ್ಮೆ ಪಾರಸಿಯ ಸೈನ್ಯವನ್ನು ಸೋಲಿಸಿಬಿಟ್ಟವು. ಮುಂದಿನ 143 ವರ್ಷಗಳಲ್ಲಿ, ಪಾರಸಿಯ ಸಾಮ್ರಾಜ್ಯದಲ್ಲಿ ಸರ್‌ಕ್ಸೀಸ್‌ನ ಬಳಿಕ ಪಟ್ಟಕ್ಕೆ ಬಂದ ಏಳು ರಾಜರಲ್ಲಿ ಯಾರೊಬ್ಬರೂ ಗ್ರೀಸ್‌ಗೆ ಮುತ್ತಿಗೆ ಹಾಕಲಿಲ್ಲ. ಆದರೆ ತದನಂತರ ಒಬ್ಬ ಬಲಿಷ್ಠ ರಾಜನು ಗ್ರೀಸ್‌ ದೇಶದಲ್ಲಿ ಅಧಿಕಾರಕ್ಕೆ ಬಂದನು.

ಒಂದು ದೊಡ್ಡ ರಾಜ್ಯವು ನಾಲ್ಕು ಭಾಗಗಳಾಗಿ ವಿಭಾಗಗೊಳ್ಳುತ್ತದೆ

 8. ಯಾವ ‘ಪರಾಕ್ರಮಶಾಲಿಯಾದ ರಾಜನು’ ಅಧಿಕಾರಕ್ಕೆ ಬಂದನು, ಮತ್ತು ಅವನು ಹೇಗೆ “ಮಹಾ ಪ್ರಭುತ್ವದಿಂದ ಆಳ”ತೊಡಗಿದನು?

⁸ “ಪರಾಕ್ರಮಶಾಲಿಯಾದ ಒಬ್ಬ ರಾಜನು ಎದ್ದು ಮಹಾ ಪ್ರಭುತ್ವದಿಂದ ಆಳುತ್ತಾ ತನ್ನ ಇಷ್ಟಾರ್ಥಗಳನ್ನು ಸಾಧಿಸಿಕೊಳ್ಳುವನು” ಎಂದು ದೇವದೂತನು ಹೇಳಿದನು. (ದಾನಿಯೇಲ 11:⁠3) ಸಾ.ಶ.ಪೂ. 336ರಲ್ಲಿ, 20 ವರ್ಷ ಪ್ರಾಯದ ಅಲೆಕ್ಸಾಂಡರನು ರಾಜನೋಪಾದಿ ‘ಎದ್ದನು.’ ಅವನು “ಪರಾಕ್ರಮಶಾಲಿಯಾದ ಒಬ್ಬ ರಾಜ”​—⁠ಮಹಾ ಅಲೆಕ್ಸಾಂಡರ್‌​—⁠ನಾದನು. ತನ್ನ ತಂದೆಯಾದ IIನೆಯ ಫಿಲಿಪ್ಪನ ಯೋಜನೆಯಿಂದ ಪ್ರಭಾವಿತನಾದ ಅಲೆಕ್ಸಾಂಡರನು, ಮಧ್ಯಪೂರ್ವದಲ್ಲಿದ್ದ ಪಾರಸಿಯ ಪ್ರಾಂತಗಳನ್ನು ಸ್ವಾಧೀನಪಡಿಸಿಕೊಂಡನು. ಯೂಫ್ರೇಟೀಸ್‌ ಹಾಗೂ ಟೈಗ್ರಿಸ್‌ ನದಿಗಳನ್ನು ದಾಟಿಹೋದ ಅವನ 47,000 ಸೈನಿಕರು, ಗಾಗಮೇಲದಲ್ಲಿ IIIನೆಯ ದಾರ್ಯಾವೆಷನ 2,50,000 ಸೈನಿಕರನ್ನು ಚದುರಿಸಿಬಿಟ್ಟರು. ಇದರ ಪರಿಣಾಮವಾಗಿ, ದಾರ್ಯಾವೆಷನು ಪಲಾಯನಗೈದನು ಮತ್ತು ಕೊಲ್ಲಲ್ಪಟ್ಟನು. ಇದರಿಂದಾಗಿ ಪಾರಸಿಯ ರಾಜವಂಶವು ಕೊನೆಗೊಂಡಿತು. ಈಗ ಗ್ರೀಸ್‌ ಒಂದು ಲೋಕ ಶಕ್ತಿಯಾಗಿ ಪರಿಣಮಿಸಿತು, ಮತ್ತು ಅಲೆಕ್ಸಾಂಡರನು ‘ಮಹಾ ಪ್ರಭುತ್ವದಿಂದ ಹಾಗೂ ತನ್ನ ಇಷ್ಟಾರ್ಥಗಳಿಗನುಸಾರ’ ಆಳ್ವಿಕೆ ನಡಿಸಿದನು.

 9, 10. ಅಲೆಕ್ಸಾಂಡರನ ರಾಜ್ಯವು ಅವನ ಸಂತತಿಯ ಭಾಗವಾಗುವುದಿಲ್ಲ ಎಂಬ ಪ್ರವಾದನೆಯು ಹೇಗೆ ಸತ್ಯವಾಗಿ ರುಜುವಾಯಿತು?

⁹ ಲೋಕದ ಮೇಲೆ ಅಲೆಕ್ಸಾಂಡರನ ಆಳ್ವಿಕೆಯು ತುಂಬ ಅಲ್ಪಾವಧಿಯದ್ದಾಗಿತ್ತು. ಏಕೆಂದರೆ ದೇವದೂತನು ಕೂಡಿಸಿದ್ದು: “ಅವನು ತಲೆಯೆತ್ತಿದ ಮೇಲೆ ಅವನ ರಾಜ್ಯವು ಒಡೆದು ನಾಲ್ಕು ದಿಕ್ಕುಗಳಿಗೂ [ನಾಲ್ಕು] ಪಾಲಾಗುವದು; ಅದು ಅವನ ಸಂತತಿಗೆ ಭಾಗವಾಗದು, ಅವನ ಆಳಿಕೆಯಲ್ಲಿ ಪ್ರಬಲವಾಗಿದ್ದಂತೆ ಇನ್ನು ಪ್ರಬಲವಾಗದು; ಆ ರಾಜ್ಯವು ಕೀಳಲ್ಪಟ್ಟು ನಾಲ್ವರಿಗೆ ಮಾತ್ರವಲ್ಲದೆ ಇತರರಿಗೂ ಪಾಲಾಗುವದು.” (ದಾನಿಯೇಲ 11:⁠4) ಅಲೆಕ್ಸಾಂಡರನು ಇನ್ನೂ 33 ವರ್ಷ ಪ್ರಾಯದವನಾಗಿರುವಾಗಲೇ ಇದ್ದಕ್ಕಿದ್ದಂತೆ ಅಸ್ವಸ್ಥನಾಗಿ, ಸಾ.ಶ.ಪೂ. 323ರಲ್ಲಿ ಬಾಬೆಲಿನಲ್ಲಿ ಮರಣಹೊಂದಿದನು.

¹⁰ ಅಲೆಕ್ಸಾಂಡರನ ದೊಡ್ಡ ಸಾಮ್ರಾಜ್ಯವು ‘ಅವನ ಸಂತತಿಯ ಭಾಗ’ವಾಗಲಿಲ್ಲ. ಅವನ ತಮ್ಮನಾದ IIIನೆಯ ಫಿಲಿಪ್‌ ಆ್ಯರಡೀಯಸನು ಏಳು ವರ್ಷಗಳಿಗಿಂತಲೂ ಕಡಿಮೆ ಕಾಲಾವಧಿಯ ವರೆಗೆ ಆಳ್ವಿಕೆ ನಡಿಸಿದನು. ಮತ್ತು ಸಾ.ಶ.ಪೂ. 317ರಲ್ಲಿ, ಅಲೆಕ್ಸಾಂಡರನ ತಾಯಿಯಾದ ಒಲಿಂಪಿಯಸಳ ಕೋರಿಕೆಯ ಮೇರೆಗೆ ಅವನು ಕೊಲ್ಲಲ್ಪಟ್ಟನು. ತದನಂತರ ಅಲೆಕ್ಸಾಂಡರನ ಮಗನಾದ IVನೆಯ ಅಲೆಕ್ಸಾಂಡರನು, ಸಾ.ಶ.ಪೂ. 311ರ ತನಕ ರಾಜ್ಯವಾಳಿದನು. ಆದರೆ ಅವನು ತನ್ನ ತಂದೆಯ ಸೇನಾಧಿಪತಿಗಳಲ್ಲಿ ಒಬ್ಬನಾಗಿದ್ದ ಕಸಾಂಡರನಿಂದ ಕೊಲ್ಲಲ್ಪಟ್ಟನು. ಅಲೆಕ್ಸಾಂಡರನ ಜಾರಜ ಪುತ್ರನಾಗಿದ್ದ ಹಿರಾಕ್ಲೀಸನು ತನ್ನ ತಂದೆಯ ಹೆಸರಿನಲ್ಲಿ ರಾಜ್ಯವನ್ನು ಆಳಲು ಪ್ರಯತ್ನಿಸಿದನಾದರೂ, ಸಾ.ಶ.ಪೂ. 309ರಲ್ಲಿ ಕೊಲ್ಲಲ್ಪಟ್ಟನು. ಹೀಗೆ ಅಲೆಕ್ಸಾಂಡರನ ರಾಜವಂಶವು, ಅಂದರೆ ಅವನ “ರಾಜ್ಯವು” ಅವನ ಕುಟುಂಬದ ಕೈತಪ್ಪಿಹೋಯಿತು.

11. ಅಲೆಕ್ಸಾಂಡರನ ರಾಜ್ಯವು ಹೇಗೆ “ನಾಲ್ಕು ದಿಕ್ಕುಗಳಿಗೂ ನಾಲ್ಕು ಪಾಲಾಯಿತು?”

¹¹ ಅಲೆಕ್ಸಾಂಡರನ ಮರಣದ ಬಳಿಕ ಅವನ ರಾಜ್ಯವು “ನಾಲ್ಕು ದಿಕ್ಕುಗಳಿಗೂ ನಾಲ್ಕು ಪಾಲಾಯಿತು.” ಅವನ ಅನೇಕ ಸೇನಾಧಿಪತಿಗಳು ತಮ್ಮ ನಡುವೆಯೇ ಕಾದಾಟ ನಡೆಸಿ, ಬೇರೆ ಬೇರೆ ಕ್ಷೇತ್ರಗಳನ್ನು ಸ್ವಾಧೀನಪಡಿಸಿಕೊಂಡರು. ಒಕ್ಕಣ್ಣನಾದ Iನೆಯ ಆ್ಯಂಟೈಗೊನಸನು, ಅಲೆಕ್ಸಾಂಡರನ ಸಂಪೂರ್ಣ ಸಾಮ್ರಾಜ್ಯವನ್ನು ತನ್ನ ನಿಯಂತ್ರಣದ ಕೆಳಗೆ ತರಲು ಪ್ರಯತ್ನಿಸಿದನು. ಆದರೆ ಫ್ರಿಜ್ಯದಲ್ಲಿರುವ ಇಪ್ಸಸ್‌ನಲ್ಲಿ ನಡೆದ ಕದನದಲ್ಲಿ ಅವನು ಕೊಲ್ಲಲ್ಪಟ್ಟನು. ಸಾ.ಶ.ಪೂ. 301ನೆಯ ವರ್ಷದಷ್ಟಕ್ಕೆ, ಅಲೆಕ್ಸಾಂಡರನು ವಶಪಡಿಸಿಕೊಂಡಿದ್ದ ದೊಡ್ಡ ಸಾಮ್ರಾಜ್ಯವನ್ನು, ಅವನ ಸೇನಾಧಿಪತಿಗಳಲ್ಲಿ ನಾಲ್ಕು ಮಂದಿ ಆಳತೊಡಗಿದರು. ಕಸಾಂಡ​ರನು ಮ್ಯಾಸಿಡೋನಿಯ ಹಾಗೂ ಗ್ರೀಸನ್ನು ನೋಡಿಕೊಳ್ಳತೊಡಗಿದನು. ಲೈಸಿಮೆಕಸನಿಗೆ ಏಷ್ಯಾ ಮೈನರ್‌ ಹಾಗೂ ಥ್ರೇಸ್‌ಗಳು ಸಿಕ್ಕಿದವು. Iನೆಯ ಸೆಲ್ಯೂಕಸ್‌ ನೈಕೇಟರನು ಮೆಸಪೊಟೇಮಿಯ ಹಾಗೂ ಸಿರಿಯವನ್ನು ತನ್ನ ಸ್ವಾಧೀನಕ್ಕೆ ತೆಗೆದುಕೊಂಡನು. ಮತ್ತು ಟಾಲೆಮಿ ಲಾಗಸ್‌ನು ಐಗುಪ್ತ ಹಾಗೂ ಪ್ಯಾಲೆಸ್ಟೈನನ್ನು ಆಳುತ್ತಿದ್ದನು. ಪ್ರವಾದನಾ ಮಾತುಗಳಿಗೆ ಅನುಸಾರವಾಗಿ, ಅಲೆಕ್ಸಾಂಡರನ ದೊಡ್ಡ ಸಾಮ್ರಾಜ್ಯವು ನಾಲ್ಕು ಗ್ರೀಕ್‌ ರಾಜ್ಯಗಳಾಗಿ ವಿಭಾಗಗೊಂಡಿತು.

ಇಬ್ಬರು ಪ್ರತಿಸ್ಪರ್ಧಿ ಅರಸರು ಉದಯಿಸುತ್ತಾರೆ

12, 13. (ಎ) ನಾಲ್ಕು ಗ್ರೀಕ್‌ ರಾಜ್ಯಗಳಲ್ಲಿ ಕೇವಲ ಎರಡೇ ಹೇಗೆ ಉಳಿದವು? (ಬಿ) ಸೆಲ್ಯೂಕಸನು ಸಿರಿಯದಲ್ಲಿ ಯಾವ ರಾಜವಂಶವನ್ನು ಸ್ಥಾಪಿಸಿದನು?

¹² ಅಧಿಕಾರಕ್ಕೆ ಬಂದ ಕೆಲವೇ ವರ್ಷಗಳಲ್ಲಿ ಕಸಾಂಡರನು ಮೃತಪಟ್ಟನು. ಮತ್ತು ಸಾ.ಶ.ಪೂ. 285ರಲ್ಲಿ, ಗ್ರೀಕ್‌ ಸಾಮ್ರಾಜ್ಯದ ಐರೋಪ್ಯ ಭಾಗವನ್ನು ಲೈಸಿಮೆಕಸನು ಸ್ವಾಧೀನಪಡಿಸಿಕೊಂಡನು. ಸಾ.ಶ.ಪೂ. 281ರಲ್ಲಿ, Iನೆಯ ಸೆಲ್ಯೂಕಸ್‌ ನೈಕೇಟರನು ಲೈಸಿಮೆಕಸನನ್ನು ಕೊಂದುಹಾಕಿದನು. ಇದರಿಂದಾಗಿ ಏಷ್ಯಾದ ಬಹುತೇಕ ಭಾಗಗಳು ಸೆಲ್ಯೂಕಸನ ನಿಯಂತ್ರಣದ ಕೆಳಗೆ ಬಂದವು. ಸಾ.ಶ.ಪೂ. 276ರಲ್ಲಿ, ಅಲೆಕ್ಸಾಂಡರನ ಸೇನಾಧಿಪತಿಗಳಲ್ಲಿ ಒಬ್ಬನ ಮೊಮ್ಮಗನಾದ IIನೆಯ ಆ್ಯಂಟೈಗೊನಸ್‌ ಗಾನಟಸ್‌ನು, ಮ್ಯಾಸಿಡೋನಿಯದ ಸಿಂಹಾಸನವನ್ನು ಏರಿದನು. ಸಕಾಲದಲ್ಲಿ, ಮ್ಯಾಸಿಡೋನಿಯವು ರೋಮ್‌ನ ಮೇಲೆ ಅವಲಂಬಿಸಿತು, ಮತ್ತು ಸಾ.ಶ.ಪೂ. 146ರಲ್ಲಿ ರೋಮ್‌ನ ಒಂದು ಪ್ರಾಂತವಾಗಿ ​ಪರಿಣಮಿಸಿತು.

¹³ ನಾಲ್ಕು ಗ್ರೀಕ್‌ ರಾಜ್ಯಗಳಲ್ಲಿ ಕೇವಲ ಎರಡು ರಾಜ್ಯಗಳು ಈಗ ಅಗ್ರಗಣ್ಯವಾಗಿದ್ದವು​—⁠ಒಂದು ರಾಜ್ಯವು Iನೆಯ ಸೆಲ್ಯೂಕಸ್‌ ನೈಕೇಟರನ ನಿಯಂತ್ರಣದ ಕೆಳಗೆ ಹಾಗೂ ಇನ್ನೊಂದು ರಾಜ್ಯವು ಟಾಲೆಮಿ ಲಾಗಸ್‌ನ ಕೈಕೆಳಗೆ. ಸೆಲ್ಯೂಕಸನು ಸಿರಿಯದಲ್ಲಿ ಸೆಲ್ಯೂಕಸ್‌ ರಾಜವಂಶವನ್ನು ಸ್ಥಾಪಿಸಿದನು. ಅವನು ಸ್ಥಾಪಿಸಿದ ಪಟ್ಟಣಗಳಲ್ಲಿ ಕೆಲವು, ಸಿರಿಯದ ಹೊಸ ರಾಜಧಾನಿಯಾದ ಅಂತಿಯೋಕ್ಯ, ಹಾಗೂ ಸೆಲ್ಯೂಸಿಯದ ರೇವುಪಟ್ಟಣಗಳೇ ಆಗಿದ್ದವು. ಕಾಲಾನಂತರ ಅಪೊಸ್ತಲ ಪೌಲನು ಅಂತಿಯೋಕ್ಯದಲ್ಲಿ ಜನರಿಗೆ ಬೋಧಿಸಿದನು, ಮತ್ತು ಅಲ್ಲಿಯೇ ಯೇಸುವಿನ ಹಿಂಬಾಲಕರಿಗೆ ಮೊದಲಾಗಿ ಕ್ರೈಸ್ತರು ಎಂಬ ಹೆಸರು ಬಂತು. (ಅ. ಕೃತ್ಯಗಳು 11:​25, 26; 13:​1-4) ಸಾ.ಶ.ಪೂ. 281ರಲ್ಲಿ ಸೆಲ್ಯೂಕಸನು ಕೊಲ್ಲಲ್ಪಟ್ಟನು, ಆದರೆ ಸಾ.ಶ.ಪೂ. 64ರಲ್ಲಿ ರೋಮನ್‌ ಜನರಲ್‌ ನೈಯುಸ್‌ ಪಾಂಪೀಯು ಸಿರಿಯವನ್ನು ಒಂದು ರೋಮನ್‌ ಪ್ರಾಂತವನ್ನಾಗಿ ಮಾಡಿಕೊಳ್ಳುವ ವರೆಗೆ, ಸೆಲ್ಯೂಕಸನ ರಾಜವಂಶವು ಆಳ್ವಿಕೆ ನಡಿಸಿತು.

14. ಟಾಲೆಮಿಯ ರಾಜವಂಶವು ಐಗುಪ್ತದಲ್ಲಿ ಯಾವಾಗ ಸ್ಥಾಪಿಸಲ್ಪಟ್ಟಿತು?

¹⁴ ನಾಲ್ಕು ಗ್ರೀಕ್‌ ರಾಜ್ಯಗಳಲ್ಲಿ ಬಹಳ ದೀರ್ಘ ಸಮಯದ ವರೆಗೆ ಉಳಿದಿದ್ದ ರಾಜ್ಯವು, ಟಾಲೆಮಿ ಲಾಗಸ್‌ ಅಥವಾ Iನೆಯ ಟಾಲೆಮಿಯದ್ದಾಗಿತ್ತು. ಅವನು ಸಾ.ಶ.ಪೂ. 305ರಲ್ಲಿ ರಾಜನ ಸ್ಥಾನವನ್ನು ಪಡೆದುಕೊಂಡನು. ಸಾ.ಶ.ಪೂ. 30ರಲ್ಲಿ ಐಗುಪ್ತವು ರೋಮ್‌ನ ವಶವಾಗುವ ವರೆಗೆ, ಅವನು ಸ್ಥಾಪಿಸಿದ ಟಾಲೆಮಿಕ್‌ ರಾಜವಂಶವು ಐಗುಪ್ತವನ್ನು ಆಳುತ್ತಿತ್ತು.

15. ನಾಲ್ಕು ಗ್ರೀಕ್‌ ರಾಜ್ಯಗಳಿಂದ ಉದಯಿಸಿದ ಇಬ್ಬರು ಪ್ರಬಲ ರಾಜರು ಯಾರಾಗಿದ್ದರು, ಮತ್ತು ಅವರು ಯಾವ ಹೋರಾಟವನ್ನು ಆರಂಭಿಸಿದರು?

¹⁵ ಹೀಗೆ, ನಾಲ್ಕು ಗ್ರೀಕ್‌ ರಾಜ್ಯಗಳಿಂದ ಇಬ್ಬರು ಪ್ರಬಲ ರಾಜರು ಉದಯಿಸಿದರು​—⁠ಸಿರಿಯದ ರಾಜನಾದ Iನೆಯ ಸೆಲ್ಯೂಕಸ್‌ ನೈಕೇಟರ್‌ ಹಾಗೂ ಐಗುಪ್ತದ ರಾಜನಾದ Iನೆಯ ಟಾಲೆಮಿ. ದಾನಿಯೇಲ ಪುಸ್ತಕದ 11ನೆಯ ಅಧ್ಯಾಯದಲ್ಲಿ ವಿವರಿಸಲ್ಪಟ್ಟಿರುವಂತೆ, ಈ ಇಬ್ಬರು ರಾಜರಿಂದ “ಉತ್ತರದಿಕ್ಕಿನ ರಾಜ” ಹಾಗೂ “ದಕ್ಷಿಣದಿಕ್ಕಿನ ರಾಜ”ನ ​ನಡುವಿನ ಹೋರಾಟವು ಆರಂಭವಾಯಿತು. ಯೆಹೋವನ ದೂತನು ಆ ರಾಜರ ಹೆಸರುಗಳನ್ನು ತಿಳಿಸಲಿಲ್ಲ, ಏಕೆಂದರೆ ಈ ಇಬ್ಬರು ರಾಜರ ಗುರುತು ಹಾಗೂ ರಾಷ್ಟ್ರೀಯತೆಯು ಶತಮಾನಗಳಾದ್ಯಂತ ಬದಲಾಗುತ್ತಾ ಹೋಗಲಿತ್ತು. ಅನಗತ್ಯವಾದ ವಿವರಗಳನ್ನು ಬಿಟ್ಟುಬಿಟ್ಟು, ಹೋರಾಟಕ್ಕೆ ಸಂಬಂಧಪಟ್ಟ ರಾಜರು ಹಾಗೂ ಘಟನೆಗಳ ಬಗ್ಗೆ ಮಾತ್ರವೇ ದೇವದೂತನು ತಿಳಿಯಪಡಿಸಿದನು.

ಹೋರಾಟವು ಆರಂಭಗೊಳ್ಳುತ್ತದೆ

16. (ಎ) ಆ ಇಬ್ಬರು ರಾಜರು, ಯಾವ ಜನರ ಉತ್ತರ ಹಾಗೂ ದಕ್ಷಿಣ ದಿಕ್ಕಿನಲ್ಲಿದ್ದರು? (ಬಿ) ಮೊದಲಾಗಿ “ಉತ್ತರದಿಕ್ಕಿನ ರಾಜ” ಹಾಗೂ “ದಕ್ಷಿಣದಿಕ್ಕಿನ ರಾಜ”ನ ಸ್ಥಾನವನ್ನು ಯಾರು ಪಡೆದುಕೊಂಡರು?

¹⁶ ಕಿವಿಗೊಡಿರಿ! ಈ ನಾಟಕೀಯ ಹೋರಾಟದ ಆರಂಭವನ್ನು ವರ್ಣಿಸುತ್ತಾ ಯೆಹೋವನ ದೂತನು ಹೇಳುವುದು: “ದಕ್ಷಿಣದಿಕ್ಕಿನ ರಾಜನೂ ಅವನ [ಅಲೆಕ್ಸಾಂಡರನ] ಸರದಾರರಲ್ಲಿ ಒಬ್ಬನೂ ಬಲಗೊಳ್ಳುವರು; ಸರದಾರನು [ಉತ್ತರದಿಕ್ಕಿನ ರಾಜನು] ರಾಜನಿಗಿಂತ ಹೆಚ್ಚು ಬಲಗೊಂಡು ಪ್ರಭುತ್ವಕ್ಕೆ ಬರುವನು; ಅವನ ರಾಜ್ಯವು ದೊಡ್ಡ ರಾಜ್ಯವಾಗಿರುವದು.” (ದಾನಿಯೇಲ 11:5) “ಉತ್ತರ ರಾಜ” ಹಾಗೂ “ದಕ್ಷಿಣ ರಾಜ” ಎಂಬ ಬಿರುದುಗಳು, ದಾನಿಯೇಲನ ಜನರು ವಾಸಿಸುತ್ತಿದ್ದ ಸ್ಥಳದಿಂದ ಉತ್ತರದಲ್ಲಿ ಹಾಗೂ ದಕ್ಷಿಣದಲ್ಲಿದ್ದ ರಾಜರನ್ನು ಸೂಚಿಸುತ್ತವೆ. ಇಷ್ಟರಲ್ಲೇ ದಾನಿಯೇಲನ ಜನರು ಬಾಬೆಲಿನ ಬಂದಿವಾಸದಿಂದ ಬಿಡುಗಡೆಗೊಳಿಸಲ್ಪಟ್ಟು, ಯೆಹೂದದಲ್ಲಿರುವ ತಮ್ಮ ಸ್ವದೇಶಕ್ಕೆ ಹಿಂದಿರುಗಿದ್ದರು. ಆರಂಭದಲ್ಲಿ “ದಕ್ಷಿಣದಿಕ್ಕಿನ ರಾಜನು” ಐಗುಪ್ತದ Iನೆಯ ಟಾಲೆಮಿಯಾಗಿದ್ದನು. Iನೆಯ ಟಾಲೆಮಿಯ ವಿರುದ್ಧ ಜಯವನ್ನು ಗಳಿಸಿ, “ದೊಡ್ಡ ರಾಜ್ಯ”ದೊಂದಿಗೆ ಆಳ್ವಿಕೆ ನಡಿಸಿದ ಅಲೆಕ್ಸಾಂಡರನ ಸೇನಾಧಿಪತಿಗಳಲ್ಲಿ ಒಬ್ಬನು, ಸಿರಿಯದ ರಾಜನಾದ Iನೆಯ ಸೆಲ್ಯೂಕಸ್‌ ನೈಕೇಟರ್‌ ಆಗಿದ್ದನು. “ಉತ್ತರದಿಕ್ಕಿನ ರಾಜ”ನ ಪಾತ್ರವನ್ನು ಇವನೇ ಪಡೆದುಕೊಂಡನು.

17. ಉತ್ತರ ರಾಜ ಹಾಗೂ ದಕ್ಷಿಣ ರಾಜನ ನಡುವಿನ ಹೋರಾಟದ ಆರಂಭದಲ್ಲಿ, ಯೆಹೂದ ದೇಶವು ಯಾರ ಆಧಿಪತ್ಯದ ಕೆಳಗಿತ್ತು?

¹⁷ ಹೋರಾಟದ ಆರಂಭದಲ್ಲಿ, ಯೆಹೂದ ದೇಶವು ದಕ್ಷಿಣ ರಾಜನ ಆಧಿಪತ್ಯದ ಕೆಳಗಿತ್ತು. ಸುಮಾರು ಸಾ.ಶ.ಪೂ. 320ರಲ್ಲಿ, ಯೆಹೂದ್ಯರು ವಲಸೆಗಾರರೋಪಾದಿ ಐಗುಪ್ತಕ್ಕೆ ಬಂದು ನೆಲೆಸುವಂತೆ Iನೆಯ ಟಾಲೆಮಿಯು ಪ್ರಭಾವ ಬೀರಿದನು. ಆ್ಯಲೆಕ್ಸಾಂಡ್ರಿಯದಲ್ಲಿ ಒಂದು ಯೆಹೂದಿ ನೆಲಸುನಾಡು ಬಹು ಬೇಗನೆ ಅಭಿವೃದ್ಧಿ ಹೊಂದಿತು, ಮತ್ತು Iನೆಯ ಟಾಲೆಮಿಯು ಅಲ್ಲೇ ಒಂದು ಪ್ರಸಿದ್ಧ ಗ್ರಂಥಾಲಯವನ್ನು ಸ್ಥಾಪಿಸಿದನು. ಸಾ.ಶ.ಪೂ. 198ರ ತನಕ, ಯೆಹೂದದಲ್ಲಿದ್ದ ಯೆಹೂದ್ಯರು, ಟಾಲೆಮಿಗೆ ಸೇರಿದ್ದ ಐಗುಪ್ತದ ಅಥವಾ ದಕ್ಷಿಣ ರಾಜನ ಅಧಿಕಾರದ ಕೆಳಗಿದ್ದರು.

18, 19. ಸಮಯಾನಂತರ, ಈ ಇಬ್ಬರು ಪ್ರತಿಸ್ಪರ್ಧಿ ರಾಜರು ಹೇಗೆ “ನ್ಯಾಯಸಮ್ಮತವಾದ ಒಪ್ಪಂದ”ವನ್ನು ಮಾಡಿಕೊಂಡರು?

¹⁸ ಆ ಇಬ್ಬರು ರಾಜರ ವಿಷಯದಲ್ಲಿ ದೇವದೂತನು ಪ್ರವಾದಿಸಿದ್ದು: “ಕೆಲವು ವರುಷಗಳ ಮೇಲೆ ಅವರು ಸೇರಿಕೊಳ್ಳುವರು; ದಕ್ಷಿಣ ರಾಜನ ಕುಮಾರಿಯು ಉತ್ತರದಿಕ್ಕಿನ ರಾಜನೊಂದಿಗೆ [“ನ್ಯಾಯಸಮ್ಮತವಾದ,” NW] ಒಪ್ಪಂದಮಾಡಿಕೊಳ್ಳಲಿಕ್ಕೆ ಬರುವಳು; ಆದರೂ ತನ್ನ ಭುಜಬಲವನ್ನು ಉಳಿಸಿಕೊಳ್ಳಳು; ಅವನೂ ಅವನ ತೋಳೂ ನಿಲ್ಲವು; ಅವಳೂ ಅವಳನ್ನು ಕರತಂದವರೂ ಪಡೆದವನೂ ತಕ್ಕೊಂಡವನೂ [“ಅವಳನ್ನು ಬಲಗೊಳಿಸಿದವನೂ,” NW] ಆ ಕಾಲದಲ್ಲಿ ನಾಶನಕ್ಕೆ ಈಡಾಗುವರು.” (ದಾನಿಯೇಲ 11:6) ಇದು ಹೇಗೆ ಸಂಭವಿಸಿತು?

¹⁹ ಒಂದನೆಯ ಸೆಲ್ಯೂಕಸ್‌ ನೈಕೇಟರನ ಮಗನೂ ಅವನ ತರುವಾಯ ರಾಜನಾಗಿ ಬಂದವನೂ ಆದ Iನೆಯ ಆ್ಯಂಟಾಯೊಕಸನು, ದಕ್ಷಿಣ ರಾಜನ ವಿರುದ್ಧ ನಿರ್ಣಾಯಕ ಯುದ್ಧವನ್ನು ನಡೆಸಲಿಲ್ಲವಾದ್ದರಿಂದ, ಪ್ರವಾದನೆಯು ಅವನನ್ನು ಗಣನೆಗೆ ತೆಗೆದುಕೊಳ್ಳಲಿಲ್ಲ. ಆದರೆ ಅವನ ನಂತರ ರಾಜನಾಗಿ ಬಂದ IIನೆಯ ಆ್ಯಂಟಾಯೊಕಸನು, Iನೆಯ ಟಾಲೆಮಿಯ ಮಗನಾಗಿದ್ದ IIನೆಯ ಟಾಲೆಮಿಯ ವಿರುದ್ಧ ದೀರ್ಘ ಸಮಯದ ವರೆಗೆ ಯುದ್ಧ ಮಾಡಿದನು. IIನೆಯ ಆ್ಯಂಟಾಯೊಕಸ್‌ ಹಾಗೂ IIನೆಯ ಟಾಲೆಮಿಯರು, ಅನುಕ್ರಮವಾಗಿ ಉತ್ತರ ಹಾಗೂ ದಕ್ಷಿಣ ರಾಜರ ಸ್ಥಾನವನ್ನು ಪಡೆದುಕೊಂಡರು. IIನೆಯ ಆ್ಯಂಟಾಯೊಕಸನು ಲೇಆಡಸೀಯನ್ನು ಮದುವೆಯಾಗಿದ್ದನು, ಮತ್ತು ಅವರಿಗೆ IIನೆಯ ಸೆಲ್ಯೂಕಸ್‌ ಎಂಬ ಮಗನಿದ್ದನು. ಆದರೆ IIನೆಯ ಟಾಲೆಮಿಗೆ ಬೆರನೈಸೀ ಎಂಬ ಹೆಸರಿನ ಒಬ್ಬ ಮಗಳಿದ್ದಳು. ಸಾ.ಶ.ಪೂ. 250ರಲ್ಲಿ, ಈ ಇಬ್ಬರು ರಾಜರು ಒಂದು “ನ್ಯಾಯಸಮ್ಮತವಾದ ಒಪ್ಪಂದಮಾಡಿ”ಕೊಂಡರು. ಈ ಮೈತ್ರಿ ಸಂಬಂಧದ ಬೆಲೆಯನ್ನು ತೆರಲಿಕ್ಕಾಗಿ, IIನೆಯ ಆ್ಯಂಟಾಯೊಕಸನು ತನ್ನ ಹೆಂಡತಿಯಾದ ಲೇಆಡಸೀಗೆ ವಿಚ್ಛೇದ ನೀಡಿ, “ದಕ್ಷಿಣ ರಾಜನ ಕುಮಾರಿ”ಯಾಗಿದ್ದ ಬೆರನೈಸೀಯನ್ನು ಮದುವೆಮಾಡಿಕೊಂಡನು. ಬೆರನೈಸೀಯ ಮೂಲಕ ಅವನು ಒಬ್ಬ ಮಗನನ್ನು ಪಡೆದನು, ಮತ್ತು ಲೇಆಡಸೀಯ ಪುತ್ರರಿಗೆ ಬದಲಾಗಿ ಇವನು ಸಿರಿಯದ ಸಿಂಹಾಸನದ ಉತ್ತರಾಧಿಕಾರಿಯಾದನು.

20. (ಎ) ಬೆರನೈಸೀಯ “ಭುಜಬಲ”ವು ಹೇಗೆ ಉಳಿಯಲಿಲ್ಲ? (ಬಿ) ಬೆರನೈಸೀಯ, “ಅವಳನ್ನು ಕರತಂದವರು,” ಹಾಗೂ “ಅವಳನ್ನು ಬಲಗೊಳಿಸಿದವನು” ಹೇಗೆ ನಾಶಕ್ಕೆ ಈಡಾದರು? (ಸಿ) IIನೆಯ ಆ್ಯಂಟಾಯೊಕಸನು ತನ್ನ ‘ತೋಳನ್ನು’ ಅಥವಾ ಅಧಿಕಾರವನ್ನು ಕಳೆದುಕೊಂಡ ಬಳಿಕ, ಯಾರು ಸಿರಿಯದ ರಾಜನಾದನು?

²⁰ ಬೆರನೈಸೀಯ ತಂದೆಯಾಗಿದ್ದ IIನೆಯ ಟಾಲೆಮಿಯು, ಅವಳ “ಭುಜಬಲ” ಅಥವಾ ಬೆಂಬಲಿಗನಾಗಿದ್ದನು. ಸಾ.ಶ.ಪೂ. 246ರಲ್ಲಿ ಅವನು ಮರಣಪಟ್ಟಾಗ, ತನ್ನ ಗಂಡನೊಂದಿಗೆ ಅವಳು “ತನ್ನ ಭುಜಬಲವನ್ನು ಉಳಿಸಿಕೊಳ್ಳ”ಲಿಲ್ಲ. IIನೆಯ ಆ್ಯಂಟಾಯೊಕಸನು ಅವಳನ್ನು ತೊರೆದು, ಲೇಆಡಸೀಯನ್ನು ಪುನಃ ಮದುವೆಮಾಡಿಕೊಂಡು, ಅವರ ಮಗನನ್ನು ಉತ್ತರಾಧಿಕಾರಿಯಾಗಿ ಹೆಸರಿಸಿದನು. ಲೇಆಡಸೀಯ ಯೋಜನೆಯ ಪ್ರಕಾರ ​ಬೆರನೈಸೀಯನ್ನು ಹಾಗೂ ಅವಳ ಮಗನನ್ನು ಕೊಲ್ಲಲಾಯಿತು. ಬೆರನೈಸೀಯನ್ನು ಐಗುಪ್ತದಿಂದ ಸಿರಿಯಕ್ಕೆ ಕರೆತಂದಿದ್ದ ಸೇವಕರಿಗೆ​—⁠“ಅವಳನ್ನು ಕರತಂದವ”ರಿಗೆ​—⁠ಸಹ ಅದೇ ಗತಿಯಾಯಿತು ಎಂಬುದು ಸುವ್ಯಕ್ತ. ಲೇಆಡಸೀಯು IIಆ್ಯಂಟಾಯೊಕಸನಿಗೂ ವಿಷ ಕುಡಿಸಿದಳು, ಮತ್ತು ಹೀಗೆ “ಅವನ ತೋಳು” ಅಥವಾ ಅಧಿಕಾರವು ಸಹ “ನಿಲ್ಲ”ಲಿಲ್ಲ. ಆದುದರಿಂದ, ಬೆರನೈಸೀಯ ತಂದೆಯೂ​—⁠‘ಅವಳನ್ನು ಪಡೆದವನು’​—⁠ಅವಳನ್ನು ತಾತ್ಕಾಲಿಕವಾಗಿ “ಬಲಗೊಳಿ”ಸಿದ್ದ ಅವಳ ಸಿರಿಯದ ಗಂಡನೂ ಮರಣಪಟ್ಟರು. ಇದರಿಂದಾಗಿ, ಲೇಆಡಸೀಯ ಮಗನಾದ IIನೆಯ ಸೆಲ್ಯೂಕಸನು ಸಿರಿಯದ ರಾಜನಾದನು. ಟಾಲೆಮಿಯ ವಂಶದ ಮುಂದಿನ ರಾಜನು ಈ ಎಲ್ಲ ಘಟನೆಗಳ ಬಗ್ಗೆ ಹೇಗೆ ಪ್ರತಿಕ್ರಿಯಿಸಲಿದ್ದನು?

ಒಬ್ಬ ಅರಸನು ತನ್ನ ಸಹೋದರಿಯ ಕೊಲೆಗೆ ಸೇಡು ತೀರಿಸಿಕೊಳ್ಳುತ್ತಾನೆ

21. (ಎ) ಬೆರನೈಸೀಯ “ಬುಡ”ದ “ಸಸಿ”ಯು ಯಾರಾಗಿದ್ದನು, ಮತ್ತು ಅವನು ಹೇಗೆ “ಎದ್ದುನಿಂತನು?” (ಬಿ) IIIನೆಯ ಟಾಲೆಮಿಯು ಹೇಗೆ “ಉತ್ತರರಾಜನ ಸೈನ್ಯಕ್ಕೆ ವಿರುದ್ಧವಾಗಿ ಹೊರಟು ಅವನ ದುರ್ಗದೊಳಗೆ ನುಗ್ಗಿ”ದನು ಮತ್ತು ಅವನ ವಿರುದ್ಧ ಜಯಶಾಲಿಯಾದನು?

²¹ “ಅನಂತರ ಅವಳು ಹುಟ್ಟಿದ ಬುಡದಿಂದ ಒಡೆದ ಸಸಿಯು ಅದರ ಸ್ಥಾನದಲ್ಲಿ ನಿಂತು ಉತ್ತರರಾಜನ ಸೈನ್ಯಕ್ಕೆ ವಿರುದ್ಧವಾಗಿ ಹೊರಟು [“ಎದ್ದುನಿಂತು,” NW] ಅವನ ದುರ್ಗದೊಳಗೆ ನುಗ್ಗಿ ಅಲ್ಲಿನವರಿಗೆ ಮಾಡುವಷ್ಟು ಮಾಡಿ ಗೆದ್ದು”ಕೊಂಡನು ಎಂದು ದೇವದೂತನು ಹೇಳಿದನು. (ದಾನಿಯೇಲ 11:7) ಬೆರನೈಸೀಯ ಹೆತ್ತವರ ಅಥವಾ “ಬುಡ”ದ “ಸಸಿ”ಯು ಅವಳ ಸಹೋದರನಾಗಿದ್ದನು. ತನ್ನ ತಂದೆಯು ಮೃತಪಟ್ಟಾಗ, ಐಗುಪ್ತದ ಫರೋಹನಾದ IIIನೆಯ ಟಾಲೆಮಿಯು ದಕ್ಷಿಣ ರಾಜನೋಪಾದಿ “ಎದ್ದುನಿಂತನು.” ಆ ಕೂಡಲೆ ಅವನು ತನ್ನ ಸಹೋದರಿಯ ಕೊಲೆಯ ಸೇಡನ್ನು ತೀರಿಸಿಕೊಳ್ಳಲು ಹೊರಟನು. ತನ್ನ ಸಹೋದರಿಯಾಗಿದ್ದ ಬೆರನೈಸೀಯನ್ನು ಹಾಗೂ ಅವಳ ಮಗನನ್ನು ಕೊಲ್ಲಲಿಕ್ಕಾಗಿ ಲೇಆಡಸೀಯು ಯಾರನ್ನು ಉಪಯೋಗಿಸಿದ್ದಳೋ, ಆ ಸಿರಿಯದ ರಾಜನಾದ IIನೆಯ ಸೆಲ್ಯೂಕಸನ ವಿರುದ್ಧ ಸೈನ್ಯವನ್ನು ಒಟ್ಟುಗೂಡಿಸಿ, “ಉತ್ತರ ರಾಜನ . . . ದುರ್ಗ”ಕ್ಕೆ ವಿರುದ್ಧವಾಗಿ ದಂಡೆತ್ತಿ ಹೋದನು. IIIನೆಯ ಟಾಲೆಮಿಯು ಅಂತಿಯೋಕ್ಯದ ಭದ್ರವಾದ ಕೋಟೆಕೊತ್ತಲಗಳುಳ್ಳ ಭಾಗವನ್ನು ವಶಪಡಿಸಿಕೊಂಡು, ಲೇಆಡಸೀಯನ್ನು ಕೊಂದುಹಾಕಿದನು. ಉತ್ತರ ರಾಜನ ಕ್ಷೇತ್ರದ ಮೂಲಕ ಪೂರ್ವ ಭಾಗಕ್ಕೆ ಹೋಗಿ, ಬಾಬೆಲನ್ನು ಸೂರೆಮಾಡಿ, ಅವನು ಭಾರತದ ಕಡೆಗೆ ಮುನ್ನುಗ್ಗಿದನು.

22. ಮೂರನೆಯ ಟಾಲೆಮಿಯು ಯಾವ ವಸ್ತುಗಳನ್ನು ಐಗುಪ್ತಕ್ಕೆ ತಂದನು, ಮತ್ತು ಅವನು ಏಕೆ “ಕೆಲವು ವರುಷಗಳ ತನಕ ಉತ್ತರರಾಜನ ತಂಟೆಗೆ ಹೋಗ”ಲಿಲ್ಲ?

²² ಮುಂದೆ ಏನು ಸಂಭವಿಸಿತು? ದೇವದೂತನು ನಮಗೆ ಹೀಗೆ ಹೇಳುತ್ತಾನೆ: “ಅವರ ದೇವರುಗಳನ್ನೂ ಎರಕದ ಬೊಂಬೆಗಳನ್ನೂ ಒಳ್ಳೊಳ್ಳೆ ಬೆಳ್ಳಿಬಂಗಾರದ ಪಾತ್ರೆಗಳನ್ನೂ ಸೂರೆಮಾಡಿಕೊಂಡು [“ಸೆರೆ ಒಯ್ದು,” NW] ಐಗುಪ್ತಕ್ಕೆ ಬಂದು ಕೆಲವು ವರುಷಗಳ ತನಕ [ಅವನು] ಉತ್ತರರಾಜನ ತಂಟೆಗೆ ಹೋಗುವದಿಲ್ಲ.” (ದಾನಿಯೇಲ 11:⁠8) 200ಕ್ಕಿಂತಲೂ ಹೆಚ್ಚು ವರ್ಷಗಳ ಮುಂಚೆ, ಪಾರಸಿಯ ರಾಜನಾದ IIನೆಯ ಕ್ಯಾಂಬಿಸಿಸನು ಐಗುಪ್ತವನ್ನು ಗೆದ್ದು, ಐಗುಪ್ತದ ದೇವದೇವತೆಗಳನ್ನು, ಅಂದರೆ “ಅವರ ಎರಕದ ಬೊಂಬೆಗಳನ್ನು” ಸ್ವದೇಶಕ್ಕೆ ಕೊಂಡೊಯ್ದಿದ್ದನು. ಪಾರಸಿಯರ ಹಿಂದಿನ ರಾಜಮನೆತನದ ರಾಜಧಾನಿಯಾಗಿದ್ದ ಸೂಸವನ್ನು ಕೊಳ್ಳೆಹೊಡೆಯುವ ಮೂಲಕ, IIIನೆಯ ಟಾಲೆಮಿಯು ಈ ದೇವದೇವತೆಗಳನ್ನು ಹಿಂದಿರುಗಿ ಪಡೆದನು ಮತ್ತು ಅವುಗಳನ್ನು ಐಗುಪ್ತಕ್ಕೆ “ಸೆರೆ ಒಯ್ದ”ನು. ಯುದ್ಧದ ಕೊಳ್ಳೆಯೋಪಾದಿ ಅನೇಕ “ಬೆಳ್ಳಿಬಂಗಾರದ ಪಾತ್ರೆಗಳನ್ನು” ಸಹ ಅವನು ತನ್ನೊಂದಿಗೆ ತಂದನು. ಆಂತರಿಕ ಕ್ರಾಂತಿಯನ್ನು ಅಡಗಿಸಲಿಕ್ಕಾಗಿ IIIನೆಯ ಟಾಲೆಮಿಯು ಐಗುಪ್ತಕ್ಕೆ ಹಿಂದಿರುಗಬೇಕಾಗಿದ್ದರಿಂದ, ಅವನು ‘ಉತ್ತರ ರಾಜನ ತಂಟೆಗೆ ಹೋಗದೆ,’ ಅಂದರೆ ಉತ್ತರ ರಾಜನಿಗೆ ಹೆಚ್ಚಿನ ಹಾನಿಯನ್ನು ಉಂಟುಮಾಡದೆ ಇದ್ದುಬಿಟ್ಟನು.

ಸಿರಿಯದ ಅರಸನು ಸೇಡು ತೀರಿಸಿಕೊಳ್ಳುತ್ತಾನೆ

23. ದಕ್ಷಿಣ ರಾಜನ ರಾಜ್ಯದೊಳಗೆ ಪ್ರವೇಶಿಸಿದ ಬಳಿಕ, ಉತ್ತರ ರಾಜನು ಏಕೆ “ಸ್ವದೇಶಕ್ಕೆ ಹಿಂದಿರುಗುವನು?”

²³ ಉತ್ತರ ರಾಜನು ಹೇಗೆ ಪ್ರತಿಕ್ರಿಯೆ ತೋರಿಸಿದನು? ದಾನಿಯೇಲನಿಗೆ ಹೀಗೆ ಹೇಳಲಾಯಿತು: “ಬಳಿಕ ಉತ್ತರರಾಜನು ದಕ್ಷಿಣರಾಜನ ರಾಜ್ಯದೊಳಗೆ ನುಗ್ಗಿ ಸ್ವದೇಶಕ್ಕೆ ಹಿಂದಿರುಗುವನು.” (ದಾನಿಯೇಲ 11:⁠9) ಉತ್ತರ ರಾಜನು, ಅಂದರೆ ಸಿರಿಯದ ರಾಜನಾದ IIನೆಯ ಸೆಲ್ಯೂಕಸನು ಆಕ್ರಮಣ ಮಾಡಿದನು. ಅವನು ದಕ್ಷಿಣದಲ್ಲಿರುವ ಐಗುಪ್ತ ರಾಜನ “ರಾಜ್ಯ”ವನ್ನು ಅಥವಾ ಸಾಮ್ರಾಜ್ಯವನ್ನು ಪ್ರವೇಶಿಸಿದನಾದರೂ, ಸೋಲನ್ನು ಅನುಭವಿಸಿದನು. ತನ್ನ ಸೈನ್ಯದಲ್ಲಿ ಉಳಿದಿದ್ದ ಚಿಕ್ಕ ಸೈನಿಕ ಗುಂಪಿನೊಂದಿಗೆ IIನೆಯ ಸೆಲ್ಯೂಕಸನು ‘ಸ್ವದೇಶಕ್ಕೆ ಹಿಂದಿರುಗಿದನು’ ಅಂದರೆ ಸಿರಿಯದ ರಾಜಧಾನಿಯಾದ ಅಂತಿಯೋಕ್ಯಕ್ಕೆ ಸುಮಾರು ಸಾ.ಶ.ಪೂ. 242ರಲ್ಲಿ ಹಿಂದೆ ಹೋದನು. ಅವನು ಮರಣಹೊಂದಿದಾಗ, ಅವನಿಗೆ ಬದಲಾಗಿ ಅವನ ಮಗನಾದ IIIನೆಯ ಸೆಲ್ಯೂಕಸನು ರಾಜನಾದನು.

24. (ಎ) ಮೂರನೆಯ ಸೆಲ್ಯೂಕಸನಿಗೆ ಏನು ಸಂಭವಿಸಿತು? (ಬಿ) ಸಿರಿಯದ ರಾಜನಾದ IIIನೆಯ ಆ್ಯಂಟಾಯೊಕಸನು, ದಕ್ಷಿಣ ರಾಜನ ಕ್ಷೇತ್ರಕ್ಕೆ “ಮುಂದರಿದು ತುಂಬಿತುಳುಕಿ ಹಬ್ಬಿಕೊಂಡ”ದ್ದು ಹೇಗೆ?

²⁴ ಸಿರಿಯದ ರಾಜನಾದ IIನೆಯ ಸೆಲ್ಯೂಕಸನ ಸಂತಾನದ ಕುರಿತು ಏನು ಮುಂತಿಳಿಸಲ್ಪಟ್ಟಿತು? ದೇವದೂತನು ದಾನಿಯೇಲನಿಗೆ ಹೇಳಿದ್ದು: “ಆ ಮೇಲೆ ಅವನ ಮಕ್ಕಳು ಯುದ್ಧ ಸನ್ನಾಹಮಾಡಿ ವ್ಯೂಹವ್ಯೂಹವಾದ ದೊಡ್ಡ ಸೈನ್ಯವನ್ನು ಕೂಡಿಸುವರು; ಆ ಸೈನ್ಯವು ಮುಂದರಿದು ತುಂಬಿತುಳುಕಿ ಹಬ್ಬಿಕೊಳ್ಳುವದು; ಆದರೆ, ಅವನು ತನ್ನನ್ನು ಉದ್ರೇಕಿಸಿಕೊಂಡು ತನ್ನ ದುರ್ಗಕ್ಕೆ ಹಿಂದಿರುಗುವನು.” (ದಾನಿಯೇಲ 11:​10, NW) ಹತ್ಯೆಯ ಕಾರಣದಿಂದಾಗಿ IIIನೆಯ ಸೆಲ್ಯೂಕಸನ ಆಳ್ವಿಕೆಯು ಮೂರು ವರ್ಷಗಳಿಗೆ ಮುಂಚೆಯೇ ಕೊನೆಗೊಂಡಿತು. ಅವನಿಗೆ ಬದಲಾಗಿ ಅವನ ತಮ್ಮನಾದ IIIನೆಯ ಆ್ಯಂಟಾಯೊಕಸನು ಸಿರಿಯದ ಸಿಂಹಾಸನಕ್ಕೆ ಉತ್ತರಾಧಿಕಾರಿಯಾದನು. IIನೆಯ ಸೆಲ್ಯೂಕಸನ ಮಗನಾದ ಇವನು, ಆ ಸಮಯದಲ್ಲಿ ದಕ್ಷಿಣ ರಾಜನಾಗಿದ್ದ IVನೆಯ ಟಾಲೆಮಿಯ ವಿರುದ್ಧ ಆಕ್ರಮಣ ಮಾಡಲಿಕ್ಕಾಗಿ ದೊಡ್ಡ ದೊಡ್ಡ ಸೈನ್ಯಗಳನ್ನು ಒಟ್ಟುಗೂಡಿಸಿದನು. ಸಿರಿಯದ ಹೊಸ ಉತ್ತರ ರಾಜನು ಐಗುಪ್ತದ ವಿರುದ್ಧ ಯಶಸ್ವಿಕರವಾಗಿ ಹೋರಾಟ ನಡಿಸಿ, ಸೆಲ್ಯೂಸಿಯ ರೇವುಪಟ್ಟಣ​ವನ್ನು, ಸೀಲಿ-ಸಿರಿಯ ಪ್ರಾಂತವನ್ನು, ತೂರ್‌ ಹಾಗೂ ಟಾಲೆಮೇಯಸ್‌ ಪಟ್ಟಣಗಳನ್ನು, ಮತ್ತು ಸಮೀಪದಲ್ಲಿದ್ದ ಊರುಗಳನ್ನು ಗೆದ್ದುಕೊಂಡನು. ಅವನು ರಾಜನಾದ IVನೆಯ ಟಾಲೆಮಿಯ ಸೈನ್ಯವನ್ನು ಸೋಲಿಸಿ, ಯೆಹೂದದ ಅನೇಕ ಪಟ್ಟಣಗಳನ್ನು ಸ್ವಾಧೀನಪಡಿಸಿಕೊಂಡನು. ಸಾ.ಶ.ಪೂ. 217ರ ವಸಂತಕಾಲದಲ್ಲಿ, IIIನೆಯ ಆ್ಯಂಟಾಯೊಕಸನು ಟಾಲೆಮೇಯಸನ್ನು ಬಿಟ್ಟು, ಉತ್ತರ ದಿಕ್ಕಿನ ಸಿರಿಯದಲ್ಲಿರುವ ತನ್ನ “ದುರ್ಗಕ್ಕೆ” ಹೋದನು. ಆದರೆ ಒಂದು ಬದಲಾವಣೆಯು ಸಂಭವಿಸಲಿಕ್ಕಿತ್ತು.

ಸನ್ನಿವೇಶಗಳು ಅದಲುಬದಲಾಗುತ್ತವೆ

25. ಕದನದಲ್ಲಿ IVನೆಯ ಟಾಲೆಮಿಯು IIIನೆಯ ಆ್ಯಂಟಾಯೊಕಸ್‌ನನ್ನು ಎಲ್ಲಿ ಸಂಧಿಸಿದನು, ಮತ್ತು ಯಾವುದು ಐಗುಪ್ತದ ದಕ್ಷಿಣ ರಾಜನ “ಕೈವಶವಾಗುವುದು?”

²⁵ ಯೆಹೋವನ ದೂತನು ಮುಂತಿಳಿಸುವ ವಿಷಯವನ್ನು, ದಾನಿಯೇಲನಂತೆ ನಾವು ಸಹ ನಿರೀಕ್ಷಣೆಯಿಂದ ಆಲಿಸುತ್ತೇವೆ: “ಆಗ ದಕ್ಷಿಣರಾಜನು ಕ್ರೋಧದಿಂದುರಿಯುತ್ತಾ ಹೊರಟುಬಂದು ಉತ್ತರರಾಜನ ಸಂಗಡ ಯುದ್ಧ ಮಾಡುವನು; ಉತ್ತರರಾಜನು ಮಹಾವ್ಯೂಹವನ್ನು ಕಟ್ಟಿದರೂ ಅದೆಲ್ಲಾ [“ಅವನ ಕೈವಶವಾಗುವುದು,” NW].” (ದಾನಿಯೇಲ 11:11) ದಕ್ಷಿಣ ರಾಜನಾದ IVನೆಯ ಟಾಲೆಮಿಯು 75,000 ಸೈನಿಕರನ್ನು ಒಟ್ಟುಗೂಡಿಸಿಕೊಂಡು, ತನ್ನ ವೈರಿಯ ವಿರುದ್ಧ ಉತ್ತರ ದಿಕ್ಕಿನ ಕಡೆಗೆ ಮುನ್ನುಗ್ಗಿದನು. ಸಿರಿಯದ ಉತ್ತರ ರಾಜನಾದ IIIನೆಯ ಆ್ಯಂಟಾಯೊಕಸನು, ಟಾಲೆಮಿಯ ವಿರುದ್ಧ ಹೋರಾಡಲಿಕ್ಕಾಗಿ 68,000 ಮಂದಿಯ “ಮಹಾವ್ಯೂಹವನ್ನು” ಸಜ್ಜುಗೊಳಿಸಿದ್ದನು. ಆದರೆ ಐಗುಪ್ತದ ಗಡಿಪ್ರದೇಶದ ಸಮೀಪದಲ್ಲೇ ಇದ್ದ ರಫಾಯ ಎಂಬ ಕರಾವಳಿ ಪಟ್ಟಣದಲ್ಲಿ ನಡೆದ ಕದನದಲ್ಲಿ, ಆ “ಮಹಾವ್ಯೂಹವು” ದಕ್ಷಿಣ ರಾಜನ “ಕೈವಶ”ವಾಯಿತು.

26. (ಎ) ರಫಾಯದಲ್ಲಿ ನಡೆದ ಕದನದಲ್ಲಿ ಯಾವ “ಮಹಾವ್ಯೂಹವು” ದಕ್ಷಿಣ ರಾಜನಿಂದ ಒಯ್ಯಲ್ಪಟ್ಟಿತು, ಮತ್ತು ಅಲ್ಲಿ ಮಾಡಿಕೊಳ್ಳಲ್ಪಟ್ಟ ಶಾಂತಿ ಒಪ್ಪಂದದ ಷರತ್ತುಗಳು ಏನಾಗಿದ್ದವು? (ಬಿ) IVನೆಯ ಟಾಲೆಮಿಯು ಹೇಗೆ ತನ್ನ “ಪ್ರಬಲ ಸ್ಥಾನವನ್ನು ಉಪಯೋಗಿಸಲಿಲ್ಲ?” (ಸಿ) ಯಾರು ದಕ್ಷಿಣದ ಮುಂದಿನ ರಾಜನಾಗಿ ಪಟ್ಟಕ್ಕೆ ಬಂದರು?

²⁶ ಆ ಪ್ರವಾದನೆಯು ಹೀಗೆ ಮುಂದುವರಿಯುತ್ತದೆ: “ಆ ಮಹಾವ್ಯೂಹವು ಒಯ್ಯಲ್ಪಡುವುದು. ಅವನ ಹೃದಯವು ಉಬ್ಬಿಕೊಳ್ಳುವುದು, ಮತ್ತು ಅವನು ಖಂಡಿತವಾಗಿಯೂ ಲಕ್ಷಾಂತರ ಸೈನಿಕರನ್ನು ಹತಿಸಿಬಿಡುವನು; ಆದರೂ ಅವನು ತನ್ನ ಪ್ರಬಲ ಸ್ಥಾನವನ್ನು ಉಪಯೋಗಿಸುವುದಿಲ್ಲ.” (ದಾನಿಯೇಲ 11:​12, NW) ದಕ್ಷಿಣ ರಾಜನಾದ IVನೆಯ ಟಾಲೆಮಿಯು, ಸಿರಿಯದ 10,000 ಕಾಲಾಳುಗಳನ್ನು ಹಾಗೂ 300 ಅಶ್ವದಳವನ್ನು ಹತಿಸುವ ಮೂಲಕ ‘ಒಯ್ದನು,’ ಮತ್ತು 4,000 ಸೈನಿಕರನ್ನು ಸೆರೆಯಾಳುಗಳೋಪಾದಿ ಕರೆದೊಯ್ದನು. ತದನಂತರ ಈ ರಾಜರು ಒಂದು ಒಪ್ಪಂದವನ್ನು ಮಾಡಿಕೊಂಡರು, ಮತ್ತು ಇದಕ್ಕನುಸಾರವಾಗಿ IIIನೆಯ ಆ್ಯಂಟಾಯೊಕಸನಿಗೆ ಸಿರಿಯದ ರೇವುಪಟ್ಟಣವಾದ ಸೆಲ್ಯೂಸಿಯವು ಸಿಕ್ಕಿತಾದರೂ, ಫಿನೀಶಿಯ ಹಾಗೂ ಸೀಲಿ-ಸಿರಿಯ ಎಂಬ ಪಟ್ಟಣಗಳನ್ನು ಅವನು ಕಳೆದುಕೊಂಡನು. ಈ ವಿಜಯದ ಕಾರಣದಿಂದ, ದಕ್ಷಿಣದಲ್ಲಿರುವ ಐಗುಪ್ತ ರಾಜನ ಹೃದಯವು ವಿಶೇಷವಾಗಿ ಯೆಹೋವನ ವಿರುದ್ಧ ‘ಉಬ್ಬಿಕೊಂಡಿತು.’ ಯೆಹೂದವು IVನೆಯ ಟಾಲೆಮಿಯ ವಶದಲ್ಲೇ ಇತ್ತು. ಆದರೂ, ಸಿರಿಯದ ಉತ್ತರ ರಾಜನ ವಿರುದ್ಧ ತನ್ನ ಜಯವನ್ನು ಮುಂದುವರಿಸಲಿಕ್ಕಾಗಿ ಅವನು “ತನ್ನ ಪ್ರಬಲ ಸ್ಥಾನವನ್ನು ಉಪಯೋಗಿಸ”ಲಿಲ್ಲ. ಅದಕ್ಕೆ ಬದಲಾಗಿ, IVನೆಯ ಟಾಲೆಮಿಯು ವಿಷಯಲಂಪಟ ಜೀವನವನ್ನು ನಡೆಸಲಾರಂಭಿಸಿದನು. ಮತ್ತು IIIನೆಯ ಆ್ಯಂಟಾಯೊಕಸನು ಮರಣಪಡುವ ಕೆಲವು ವರ್ಷಗಳ ಮುಂಚೆಯೇ, IVನೆಯ ಟಾಲೆಮಿಯ ಐದು ವರ್ಷ ಪ್ರಾಯದ ಮಗನಾದ Vನೆಯ ಟಾಲೆಮಿಯು ದಕ್ಷಿಣ ರಾಜನಾಗಿ ಪಟ್ಟಕ್ಕೆ ಬಂದನು.

ಶೋಷಣೆಗಾರನು ಹಿಂದಿರುಗುತ್ತಾನೆ

27. ಐಗುಪ್ತಕ್ಕೆ ಸೇರಿದ್ದ ಭೂಪ್ರದೇಶವನ್ನು ವಶಪಡಿಸಿಕೊಳ್ಳಲಿಕ್ಕಾಗಿ, “ಬಹು ವರುಷಗಳ ಕಾಲವಾದನಂತರ” ಉತ್ತರ ರಾಜನು ಹೇಗೆ ಹಿಂದಿರುಗಿದನು?

²⁷ ತನ್ನ ಎಲ್ಲ ಯುದ್ಧಾಚರಣೆಗಳ ಕಾರಣದಿಂದ, IIIನೆಯ ಆ್ಯಂಟಾಯೊಕಸನು ಮಹಾ ಆ್ಯಂಟಾಯೊಕಸನೆಂದು ಪ್ರಸಿದ್ಧನಾದನು. ಅವನ ಕುರಿತು ದೇವದೂತನು ಹೇಳಿದ್ದು: “ತರುವಾಯ ಉತ್ತರರಾಜನು ಹಿಂದಿನ ದಂಡಿಗಿಂತ ದೊಡ್ಡ ದಂಡನ್ನು ಮತ್ತೆ ಕೂಡಿಸಿ ಬಹು ವರುಷಗಳ ಕಾಲವಾದನಂತರ ಮಹಾ ಸೈನ್ಯದಿಂದಲೂ ಅಧಿಕಸನ್ನಾಹದಿಂದಲೂ ಸಮೇತನಾಗಿ ಬರುವನು.” (ದಾನಿಯೇಲ 11:13) ಈ “ಕಾಲಗಳು,” ಐಗುಪ್ತದವರು ರಫಾಯದಲ್ಲಿ ಸಿರಿಯವನ್ನು ಸೋಲಿಸಿ 16 ಅಥವಾ ಅದಕ್ಕಿಂತಲೂ ಹೆಚ್ಚು ವರ್ಷಗಳು ಗತಿಸಿದ ನಂತರದ ಕಾಲಾವಧಿಯನ್ನು ಸೂಚಿಸುತ್ತವೆ. ಎಳೆಯ ಪ್ರಾಯದ Vನೆಯ ಟಾಲೆಮಿಯು ದಕ್ಷಿಣ ರಾಜನಾಗಿ ಪಟ್ಟಕ್ಕೆ ಬಂದಾಗ, IIIನೆಯ ಆ್ಯಂಟಾಯೊಕಸನು ದಕ್ಷಿಣದ ಐಗುಪ್ತ ರಾಜನು ತನ್ನಿಂದ ಗೆದ್ದುಕೊಂಡಿದ್ದ ಭೂಪ್ರದೇಶಗಳನ್ನು ಪುನಃ ಹಿಂದೆ ಪಡೆಯಲಿಕ್ಕಾಗಿ, “ಹಿಂದಿನ ದಂಡಿಗಿಂತ ದೊಡ್ಡ ದಂಡ”ನ್ನು ಯುದ್ಧಕ್ಕೆ ಸಜ್ಜುಗೊಳಿಸಿದನು. ಈ ಕಾರಣದಿಂದ, ಅವನು ಮ್ಯಾಸಿಡೋನಿಯದ ರಾಜನಾದ Vನೆಯ ಫಿಲಿಪ್‌ನೊಂದಿಗೆ ಒಂದು​ಗೂಡಿದನು.

28. ದಕ್ಷಿಣದ ಎಳೆಯ ರಾಜನು ಯಾವ ತೊಂದರೆಗಳನ್ನು ಎದುರಿಸಿದನು?

²⁸ ದಕ್ಷಿಣ ರಾಜನಿಗೆ, ತನ್ನ ರಾಜ್ಯದೊಳಗೂ ಅನೇಕ ತೊಂದರೆಗಳನ್ನು ಎದುರಿಸಲಿಕ್ಕಿತ್ತು. “ಆ ಕಾಲದಲ್ಲಿ ಅನೇಕರು ದಕ್ಷಿಣರಾಜನಿಗೆ ಎದುರುನಿಲ್ಲುವರು” ಎಂದು ದೇವದೂತನು ಹೇಳಿದನು. (ದಾನಿಯೇಲ 11:14ಎ) ಅನೇಕರು ‘ದಕ್ಷಿಣರಾಜನಿಗೆ ಎದುರುನಿಂತರು.’ IIIನೆಯ ಆ್ಯಂಟಾಯೊಕಸ್‌ ಹಾಗೂ ಮಿತ್ರರಾಷ್ಟ್ರವಾದ ಮ್ಯಾಸಿಡೋನಿಯದ ಸೈನ್ಯಗಳನ್ನು ಎದುರಿಸುವುದರ ಜೊತೆಗೆ, ದಕ್ಷಿಣದ ಈ ಎಳೆಯ ರಾಜನು ತನ್ನ ಸ್ವದೇಶವಾದ ಐಗುಪ್ತದಲ್ಲಿಯೂ ಅನೇಕ ಸಮಸ್ಯೆಗಳನ್ನು ಎದುರಿಸಿದನು. ಈ ರಾಜನ ​ಹೆಸರಿನಲ್ಲಿ ಆಳುತ್ತಿದ್ದ ಅವನ ಪಾಲಕನಾದ ಅಗಾಥಕ್ಲೀಸನು ಐಗುಪ್ತದವರೊಂದಿಗೆ ದುರಹಂಕಾರದಿಂದ ವರ್ತಿಸಿದ್ದರಿಂದ, ಅನೇಕರು ಈ ರಾಜನ ವಿರುದ್ಧ ದಂಗೆಯೆದ್ದರು. ಆ ದೇವದೂತನು ಕೂಡಿಸಿದ್ದು: “ಇದಲ್ಲದೆ ನಿನ್ನ ಜನರಲ್ಲಿ ದುರಾಗ್ರಹಿಗಳು ಕನಸನ್ನು [“ದರ್ಶನವನ್ನು,” NW] ನಿಜಮಾಡಬೇಕೆಂದು ದಂಗೆಏಳುವರು; ಆದರೆ ಬಿದ್ದುಹೋಗುವರು.” (ದಾನಿಯೇಲ 11:14ಬಿ) ದಾನಿಯೇಲನ ಜನರಲ್ಲಿಯೂ ಕೆಲವರು ‘ದುರಾಗ್ರಹಿ’ಗಳಾದರು ಅಥವಾ ಕ್ರಾಂತಿಕಾರಿಗಳಾಗಿ ಪರಿಣಮಿಸಿದರು. ಆದರೆ ತಮ್ಮ ಸ್ವದೇಶದಿಂದ ಅನ್ಯರ ಆಧಿಪತ್ಯವನ್ನು ಕೊನೆಗೊಳಿಸುವುದರ ಬಗ್ಗೆ ಅಂತಹ ಯೆಹೂದಿ ಪುರುಷರು ಕಂಡಿದ್ದ ಯಾವುದೇ “ದರ್ಶನ”ವು ಸುಳ್ಳಾಗಿತ್ತು, ಮತ್ತು ಅವರು ಅಸಫಲರಾಗಲಿದ್ದರು ಅಥವಾ “ಬಿದ್ದುಹೋಗ”ಲಿದ್ದರು.

29, 30. (ಎ) “ದಕ್ಷಿಣದ ಭುಜಬಲವು” ಉತ್ತರದ ಆಕ್ರಮಣಕ್ಕೆ ಹೇಗೆ ತುತ್ತಾಯಿತು? (ಬಿ) ಯಾವ ರೀತಿಯಲ್ಲಿ ಉತ್ತರ ರಾಜನು “ಅಂದಚಂದದ ದೇಶದಲ್ಲಿ ನಿಂತು”ಕೊಂಡನು?

²⁹ ಯೆಹೋವನ ದೂತನು ಇನ್ನೂ ಮುಂತಿಳಿಸಿದ್ದು: “ಉತ್ತರರಾಜನು ಬಂದು ದಿಬ್ಬಹಾಕಿ ಕೋಟೆಕೊತ್ತಲದ ಪಟ್ಟಣವನ್ನು ಹಿಡಿಯುವನು; ದಕ್ಷಿಣದ ಭುಜಬಲವು ನಿಲ್ಲದು, ಅಲ್ಲಿನ ಮಹಾವೀರರು ತಡೆಯಲಾರರು, ಎದುರಿಸುವ ಯಾವ ಶಕ್ತಿಯೂ ಇರದು. ದಕ್ಷಿಣರಾಜನಿಗೆ ವಿರುದ್ಧವಾಗಿ ಬರುವವನು ಇಚ್ಛಾನುಸಾರ ನಡೆಯುವನು; ಅವನಿಗೆ ಎದುರೇ ಇಲ್ಲ; ನಾಶನವನ್ನು ಕೈಯಲ್ಲಿಟ್ಟುಕೊಂಡು ಅಂದಚಂದದ ದೇಶದಲ್ಲಿ ನಿಂತಿರುವನು.”​—⁠ದಾನಿಯೇಲ 11:​15, 16.

³⁰ ಐದನೆಯ ಟಾಲೆಮಿಯ ಅಥವಾ “ದಕ್ಷಿಣರಾಜನ ಭುಜಬಲದ” ಕೆಳಗಿದ್ದ ಮಿಲಿಟರಿ ಸೈನ್ಯಗಳು, ಉತ್ತರ ರಾಜನ ಆಕ್ರಮಣಕ್ಕೆ ತುತ್ತಾದವು. ಪನೀಅಸ್‌ (ಕೈಸರೈಯದ ಫಿಲಿಪ್ಪಿ)ನಲ್ಲಿ, ಐಗುಪ್ತದ ಸೇನಾಧಿಪತಿಯಾದ ಸ್ಕೋಪಸ್‌ನನ್ನು ಹಾಗೂ 10,000 ಉತ್ತಮ ಸೈನಿಕರನ್ನು ಅಥವಾ “ಮಹಾವೀರ”ರನ್ನು, IIIನೆಯ ಆ್ಯಂಟಾಯೊಕಸನು “ಕೋಟೆಕೊತ್ತಲದ ಪಟ್ಟಣ”ವಾಗಿದ್ದ ಸೀದೋನ್‌ಗೆ ಓಡಿಸಿದನು. ಅಲ್ಲಿ IIIನೆಯ ಆ್ಯಂಟಾಯೊಕಸನು ‘ದಿಬ್ಬಹಾಕಿ,’ ಸಾ.ಶ.ಪೂ. 198ರಲ್ಲಿ ಫಿನೀಶಿಯದ ಆ ರೇವುಪಟ್ಟಣವನ್ನು ಸ್ವಾಧೀನಪಡಿಸಿಕೊಂಡನು. ಅವನು ತನ್ನ “ಇಚ್ಛಾನುಸಾರ” ಕಾರ್ಯನಡಿಸಿದನು, ಏಕೆಂದರೆ ದಕ್ಷಿಣದಲ್ಲಿರುವ ಐಗುಪ್ತ ರಾಜನ ಸೈನ್ಯಗಳು ಅವನನ್ನು ಎದುರಿಸಲು ಅಸಮರ್ಥವಾಗಿದ್ದವು. ತದನಂತರ IIIನೆಯ ಆ್ಯಂಟಾಯೊಕಸನು ಯೆಹೂದದ ರಾಜಧಾನಿಯಾಗಿದ್ದ ಯೆರೂಸಲೇಮಿನ ವಿರುದ್ಧ, ಅಂದರೆ “ಅಂದಚಂದದ ದೇಶ”ದ ಕಡೆಗೆ ಮುನ್ನುಗ್ಗಿದನು. ಸಾ.ಶ.ಪೂ. 198ರಲ್ಲಿ, ಯೆರೂಸಲೇಮ್‌ ಹಾಗೂ ಯೆಹೂದ ದೇಶಗಳು ದಕ್ಷಿಣದ ಐಗುಪ್ತ ರಾಜನ ಆಧಿಪತ್ಯದಿಂದ ಬೇರ್ಪಟ್ಟು, ಸಿರಿಯದ ಉತ್ತರ ರಾಜನ ಕೈವಶವಾದವು. ಹೀಗೆ ಉತ್ತರ ರಾಜನಾದ IIIನೆಯ ಆ್ಯಂಟಾಯೊಕಸನು, “ಅಂದಚಂದದ ದೇಶದಲ್ಲಿ ನಿಂತು”ಕೊಳ್ಳಲು ಆರಂಭಿಸಿದನು. ವಿರೋಧವನ್ನು ವ್ಯಕ್ತಪಡಿಸುವ ಎಲ್ಲ ಯೆಹೂದ್ಯರು ಹಾಗೂ ಐಗುಪ್ತರಿಗೆ ಅವನು ‘ನಾಶನವನ್ನು ಕೈಯಲ್ಲಿಟ್ಟುಕೊಂಡಿ’ದ್ದನು. ಆದರೆ ಈ ಉತ್ತರದ ರಾಜನು ಎಷ್ಟರ ವರೆಗೆ ತನಗೆ ಇಷ್ಟಬಂದಂತೆ ಮಾಡಶಕ್ತನಾಗಿದ್ದನು?

ಶೋಷಣೆಗಾರನನ್ನು ರೋಮ್‌ ನಿರ್ಬಂಧಿಸುತ್ತದೆ

31, 32. ಕೊನೆಯದಾಗಿ ಉತ್ತರ ರಾಜನು ದಕ್ಷಿಣ ರಾಜನೊಂದಿಗೆ ಏಕೆ ಶಾಂತಿಯ “ಒಪ್ಪಂದಮಾಡಿ”ಕೊಂಡನು?

³¹ ಯೆಹೋವನ ದೂತನು ಈ ಉತ್ತರವನ್ನು ನಮಗೆ ಕೊಡುತ್ತಾನೆ: “ದಕ್ಷಿಣರಾಜನ ಮೇಲೆ ಬೀಳಬೇಕೆಂದು ನಿರ್ಧರಿಸಿ [ಉತ್ತರ ರಾಜನು] ತನ್ನ ರಾಜ್ಯದ ಸಮಸ್ತ ಬಲ ಸಮೇತನಾಗಿ ಹೊರಟು ಅವನ ಸಂಗಡ ಒಪ್ಪಂದಮಾಡಿಕೊಳ್ಳುವನು; ಅವನ ರಾಜ್ಯದ ಹಾನಿಗಾಗಿ ಅವನಿಗೆ ಹೆಣ್ಣುಮಗಳನ್ನು ಕೊಡುವನು; ಆದರೆ ಆ ಉಪಾಯವೂ ನಿಲ್ಲದು, ತನಗೆ ಅನುಕೂಲಿಸದು.”​—⁠ದಾನಿಯೇಲ 11:⁠17.

³² ಉತ್ತರದ ರಾಜನಾಗಿರುವ IIIನೆಯ ಆ್ಯಂಟಾಯೊಕಸನು, “ತನ್ನ ರಾಜ್ಯದ ಸಮಸ್ತ ಬಲ ಸಮೇತನಾಗಿ” ಐಗುಪ್ತವನ್ನು ಆಳಲಿಕ್ಕಾಗಿ “ಹೊರಟನು.” ಆದರೆ ಅವನು ದಕ್ಷಿಣ ರಾಜನಾದ Vನೆಯ ಟಾಲೆಮಿಯೊಂದಿಗೆ ಶಾಂತಿಯ “ಒಪ್ಪಂದಮಾಡಿಕೊಳ್ಳ”ಬೇಕಾಯಿತು. ರೋಮ್‌ನ ಬೇಡಿಕೆಗಳು, IIIನೆಯ ಆ್ಯಂಟಾಯೊಕಸನು ತನ್ನ ಯೋಜನೆಯನ್ನು ಬದಲಾಯಿಸುವಂತೆ ಮಾಡಿದ್ದವು. ಇವನೂ ಮ್ಯಾಸಿಡೋನಿಯದ ರಾಜನಾಗಿದ್ದ Vನೆಯ ಫಿಲಿಪ್ಪನೂ ಸೇರಿಕೊಂಡು, ಐಗುಪ್ತದ ಎಳೆಯ ಪ್ರಾಯದ ರಾಜನ ವಿರುದ್ಧ ಸೈನ್ಯವನ್ನು ಒಟ್ಟುಗೂಡಿಸಿ, ಅವನಿಗೆ ಸೇರಿದ್ದ ಭೂಪ್ರದೇಶಗಳನ್ನು ವಶಪಡಿಸಿಕೊಳ್ಳಲು ಪ್ರಯತ್ನಿಸಿದಾಗ, Vನೆಯ ಟಾಲೆಮಿಯ ಪಾಲಕರು ರಕ್ಷಣೆಗಾಗಿ ರೋಮ್‌ನ ಮರೆಹೊಕ್ಕರು. ತನ್ನ ಪ್ರಭಾವ ಕ್ಷೇತ್ರವನ್ನು ವಿಸ್ತರಿಸಲಿಕ್ಕಾಗಿ ಸಿಕ್ಕಿದ ಅವಕಾಶವನ್ನು ಸದುಪಯೋಗಿಸುತ್ತಾ, ರೋಮ್‌ ತನ್ನ ಬಲವನ್ನು ಪ್ರದರ್ಶಿಸಿತು.

33. (ಎ) ಮೂರನೆಯ ಆ್ಯಂಟಾಯೊಕಸ್‌ ಹಾಗೂ Vನೆಯ ಟಾಲೆಮಿಯ ನಡುವೆ ಯಾವ ಶಾಂತಿ ಒಪ್ಪಂದವು ಮಾಡಿಕೊಳ್ಳಲ್ಪಟ್ಟಿತು? (ಬಿ) Iನೆಯ ಕ್ಲಿಯೋಪಾತ್ರ ಹಾಗೂ Vನೆಯ ಟಾಲೆಮಿಯ ನಡುವಿನ ವಿವಾಹದ ಉದ್ದೇಶವು ಏನಾಗಿತ್ತು, ಮತ್ತು ಈ ಹಂಚಿಕೆಯು ಏಕೆ ಅಸಫಲವಾಯಿತು?

³³ ರೋಮ್‌ನ ಒತ್ತಾಯದ ಮೇರೆಗೆ, IIIನೆಯ ಆ್ಯಂಟಾಯೊಕಸನು ದಕ್ಷಿಣ ರಾಜನೊಂದಿಗೆ ಶಾಂತಿಯ ಒಪ್ಪಂದವನ್ನು ಮಾಡಿಕೊಂಡನು. ರೋಮ್‌ ತಗಾದೆ ಮಾಡಿದ್ದಂತೆ, ಗೆದ್ದುಕೊಂಡ ಭೂಪ್ರದೇಶಗಳನ್ನು ಬಿಟ್ಟುಕೊಡುವ ಬದಲಿಗೆ, IIIನೆಯ ಆ್ಯಂಟಾಯೊಕಸನು ಆ ಭೂಪ್ರದೇಶಗಳನ್ನು ನಾಮ ಮಾತ್ರಕ್ಕೆ ವರ್ಗಾಯಿಸಲು ಯೋಜಿಸಿದನು. ಆದುದರಿಂದ ಅವನು ತನ್ನ ಮಗಳಾದ Iನೆಯ ಕ್ಲಿಯೋಪಾತ್ರಳನ್ನು​—⁠“ಹೆಣ್ಣುಮಗಳನ್ನು”​—⁠Vನೆಯ ಟಾಲೆಮಿಗೆ ಮದುವೆಮಾಡಿಕೊಡಲು ನಿರ್ಧರಿಸಿದನು. ಮತ್ತು “ಅಂದಚಂದದ ದೇಶ”ವಾಗಿದ್ದ ಯೆಹೂದವೂ ಸೇರಿದ್ದ ಪ್ರಾಂತಗಳನ್ನು ವರದಕ್ಷಿಣೆಯೋಪಾದಿ ಕೊಡಲಿದ್ದನು. ಆದರೂ, ಸಾ.ಶ.ಪೂ. 193ರಲ್ಲಿ ನಡೆದ ಆ ವಿವಾಹದಲ್ಲಿ, ಸಿರಿಯದ ರಾಜನು ಈ ಪ್ರಾಂತಗಳನ್ನು Vನೆಯ ಟಾಲೆಮಿಗೆ ಕೊಡಲಿಲ್ಲ. ಇದು ಐಗುಪ್ತವನ್ನು ಸಿರಿಯದ ಅಧೀನಕ್ಕೆ ಒಳಪಡಿಸಿಕೊಳ್ಳಲಿಕ್ಕಾಗಿ ಮಾಡಲ್ಪಟ್ಟ ಒಂದು ರಾಜಕೀಯ ವಿವಾಹವಾಗಿತ್ತು. ಆದರೆ ಈ ರಾಜನ ಯೋಜನೆಯು ಅಸಫಲವಾಯಿತು, ಏಕೆಂದರೆ Iನೆಯ ಕ್ಲಿಯೋಪಾತ್ರಳಿಂದಾಗಿ ‘ಈ ಉಪಾಯವು’ ಫಲಿಸಲಿಲ್ಲ; ವಿವಾಹದ ಬಳಿಕ ಅವಳು ತನ್ನ ಗಂಡನ ಪಕ್ಷವನ್ನು ವಹಿಸಿದಳು. IIIನೆಯ ಆ್ಯಂಟಾಯೊಕಸ್‌ ಹಾಗೂ ರೋಮನರ ನಡುವೆ ಯುದ್ಧವು ಆರಂಭವಾದಾಗ, ಐಗುಪ್ತವು ರೋಮ್‌ನ ಪಕ್ಷವನ್ನು ಸೇರಿತು.

34, 35. (ಎ) ಉತ್ತರ ರಾಜನು ಯಾವ “ಕರಾವಳಿ” ಪ್ರದೇಶಗಳ ಕಡೆಗೆ ಕಣ್ಣಿಟ್ಟನು? (ಬಿ) ಉತ್ತರ ರಾಜನ “ಅವಮಾನ”ವನ್ನು ರೋಮ್‌ ಹೇಗೆ ಕೊನೆಗೊಳಿಸಿತು? (ಸಿ) IIIನೆಯ ಆ್ಯಂಟಾಯೊಕಸನು ಹೇಗೆ ಮರಣಪಟ್ಟನು, ಮತ್ತು ಯಾರು ಉತ್ತರ ರಾಜ್ಯದ ಮುಂದಿನ ರಾಜನಾಗಿ ಪಟ್ಟಕ್ಕೆ ಬಂದರು?

³⁴ ಉತ್ತರ ರಾಜನ ಸೋಲಿನ ಕುರಿತು ತಿಳಿಸುತ್ತಾ, ದೇವದೂತನು ಕೂಡಿಸಿದ್ದು: “ಆ ಮೇಲೆ ಅವನು [IIIನೆಯ ಆ್ಯಂಟಾಯೊಕಸನು] ಕರಾವಳಿಯ ಕಡೆಗೆ ಕಣ್ಣಿಟ್ಟು ಅಲ್ಲಿ ಬಹು ದೇಶಗಳನ್ನು ಆಕ್ರಮಿಸುವನು; ಆದರೆ ಅವನು [IIIನೆಯ ಆ್ಯಂಟಾಯೊಕಸನು] ಮಾಡುವ ಅವಮಾನವನ್ನು ಒಬ್ಬ ಸರದಾರನು [ರೋಮ್‌] ನಿಲ್ಲಿಸಿಬಿಡುವದಲ್ಲದೆ ಅದು ಅವನಿಗೇ ತಗಲುವಂತೆ [ರೋಮ್‌] ಮಾಡುವನು. ಆ ಮೇಲೆ [IIIನೆಯ ಆ್ಯಂಟಾಯೊಕಸನು] ಸ್ವದೇಶದ ದುರ್ಗಗಳ ಕಡೆಗೆ ಹಿಂದಿರುಗಿ ಎಡವಿಬಿದ್ದು ಇಲ್ಲವಾಗುವನು.”​—⁠ದಾನಿಯೇಲ ​11:​18, 19.

³⁵ ಆ “ಕರಾವಳಿ” ಪ್ರದೇಶಗಳು, ಮ್ಯಾಸಿಡೋನಿಯ, ಗ್ರೀಸ್‌, ಹಾಗೂ ಏಷ್ಯಾ ಮೈನರ್‌ನ ಕರಾವಳಿಗಳಾಗಿದ್ದವು. ಸಾ.ಶ.ಪೂ. 192ರಲ್ಲಿ ಗ್ರೀಸ್‌ನಲ್ಲಿ ಒಂದು ಯುದ್ಧವು ಆರಂಭವಾಯಿತು, ಮತ್ತು IIIನೆಯ ಆ್ಯಂಟಾಯೊಕಸನು ಗ್ರೀಸ್‌ಗೆ ಬರುವಂತೆ ಪ್ರಚೋದಿಸಲ್ಪಟ್ಟನು. ಅಲ್ಲಿನ ಭೂಪ್ರದೇಶಗಳನ್ನು ವಶಪಡಿಸಿಕೊಳ್ಳಲಿಕ್ಕಾಗಿ ಸಿರಿಯದ ರಾಜನು ಮಾಡುತ್ತಿರುವ ಪ್ರಯತ್ನಗಳಿಂದ ಅಸಮಾಧಾನಗೊಂಡ ರೋಮ್‌, ಔಪಚಾರಿಕವಾಗಿ ಅವನ ಮೇಲೆ ಯುದ್ಧವನ್ನು ಘೋಷಿಸಿತು. ಥರ್ಮಾಪಲೀ ಎಂಬ ಸ್ಥಳದಲ್ಲಿ ಅವನು ರೋಮನರ ಕೈಯಿಂದ ಸೋಲನ್ನು ಅನುಭವಿಸಿದನು. ಸುಮಾರು ಒಂದು ವರ್ಷದ ಬಳಿಕ, ಸಾ.ಶ.ಪೂ. 190ರಲ್ಲಿ ನಡೆದ ಮ್ಯಾಗ್ನೀಷ ಕದನದಲ್ಲಿ ಸಂಪೂರ್ಣವಾಗಿ ಸೋತ ನಂತರ, ಗ್ರೀಸ್‌, ಏಷ್ಯಾ ಮೈನರ್‌, ಹಾಗೂ ಟಾರಸ್‌ ಮೌಂಟೆನ್ಸ್‌ನ ಪಶ್ಚಿಮ ದಿಕ್ಕಿನಲ್ಲಿದ್ದ ಕ್ಷೇತ್ರಗಳನ್ನು ಅವನು ಬಿಟ್ಟುಕೊಡಬೇಕಾಯಿತು. ಭಾರಿ ಮೊತ್ತದ ಕಪ್ಪಕಾಣಿಕೆಯನ್ನು ತೆರುವಂತೆ ರೋಮ್‌ ತಗಾದೆಮಾಡಿತು ಹಾಗೂ ಸಿರಿಯದ ಉತ್ತರ ರಾಜನ ಮೇಲೆ ತನ್ನ ಸರ್ವಾಧಿಕಾರವನ್ನು ಸ್ಥಾಪಿಸಿತು. ಗ್ರೀಸ್‌ ಹಾಗೂ ಏಷ್ಯಾ ಮೈನರ್‌ನಿಂದ ಓಡಿಸಲ್ಪಟ್ಟು, ತನ್ನ ಅಧಿಕಾಂಶ ನೌಕಾಬಲವನ್ನು ಕಳೆದುಕೊಂಡ IIIನೆಯ ಆ್ಯಂಟಾಯೊಕಸನು ‘ಸ್ವದೇಶದ ದುರ್ಗಗಳ ಕಡೆಗೆ,’ ಅಂದರೆ ಸಿರಿಯಕ್ಕೆ ಹಿಂದಿರುಗಿದನು. ರೋಮನರು ‘ಅವನು ಮಾಡಿದ ಅವಮಾನವನ್ನು ಅವನಿಗೇ ತಗಲುವಂತೆ ಮಾಡಿದ್ದರು.’ ಸಾ.ಶ.ಪೂ. 187ರಲ್ಲಿ, ಪರ್ಷಿಯದ ಎಲಮೇಅಸ್‌ನಲ್ಲಿದ್ದ ಒಂದು ದೇವಾಲಯವನ್ನು ಸುಲಿಗೆಮಾಡಲು ಪ್ರಯತ್ನಿಸುತ್ತಿದ್ದಾಗ IIIನೆಯ ಆ್ಯಂಟಾಯೊಕಸನು ಮರಣಪಟ್ಟನು. ಹೀಗೆ ಅವನು ಮರಣದಲ್ಲಿ ‘ಎಡವಿಬಿದ್ದು’ ಇಲ್ಲವಾದನು. ಅವನಿಗೆ ಬದಲಾಗಿ ಅವನ ಮಗನಾದ IVನೆಯ ಸೆಲ್ಯೂಕಸನು, ಮುಂದಿನ ಉತ್ತರ ರಾಜನಾಗಿ ಪಟ್ಟಕ್ಕೆ ಬಂದನು.

ಹೋರಾಟವು ಮುಂದುವರಿಯುತ್ತದೆ

36. (ಎ) ದಕ್ಷಿಣ ರಾಜನು ಹೇಗೆ ಹೋರಾಟವನ್ನು ಮುಂದುವರಿಸಲು ಪ್ರಯತ್ನಿಸಿದನು, ಮತ್ತು ಅವನಿಗೆ ಏನು ಸಂಭವಿಸಿತು? (ಬಿ) IVನೆಯ ಸೆಲ್ಯೂಕಸನು ಹೇಗೆ ಮರಣಹೊಂದಿದನು, ಮತ್ತು ಅವನಿಗೆ ಬದಲಾಗಿ ಯಾರು ರಾಜನಾದನು?

³⁶ ದಕ್ಷಿಣ ರಾಜನಾದ Vನೆಯ ಟಾಲೆಮಿಯು, ಕ್ಲಿಯೋಪಾತ್ರಳ ವರದಕ್ಷಿಣೆಯೋಪಾದಿ ತನಗೆ ಬರಬೇಕಾಗಿದ್ದ ಪ್ರಾಂತಗಳನ್ನು ಪಡೆದುಕೊಳ್ಳಲು ಪ್ರಯತ್ನಿಸಿದಾಗ, ವಿಷವು ಅವನ ಪ್ರಯತ್ನವನ್ನು ನಿಲ್ಲಿಸಿತು. ಅವನಿಗೆ ಬದಲಾಗಿ VIನೆಯ ಟಾಲೆಮಿಯು ರಾಜನಾದನು. IVನೆಯ ಸೆಲ್ಯೂಕಸನ ಕುರಿತಾಗಿ ಏನು? ರೋಮ್‌ ಹೊರಿಸಿದ್ದ ಭಾರಿ ದಂಡವನ್ನು ತೆರಲಿಕ್ಕಾಗಿ ಹಣದ ಅಗತ್ಯವಿದ್ದುದರಿಂದ, ಯೆರೂಸಲೇಮಿನ ದೇವಾಲಯದಲ್ಲಿ ಶೇಖರಿಸಿಡಲ್ಪಟ್ಟಿದೆಯೆಂದು ಹೇಳಲಾಗುತ್ತಿದ್ದ ಸಂಪತ್ತನ್ನು ವಶಪಡಿಸಿಕೊಳ್ಳಲಿಕ್ಕಾಗಿ, ಅವನು ತನ್ನ ಕೋಶಾಧಿಕಾರಿಯಾದ ಹೀಲಿಓಡೋರಸ್‌ನನ್ನು ಕಳುಹಿಸಿದನು. ಹೀಲಿಓಡೋರಸನಿಗೆ ಸಿಂಹಾಸನವನ್ನೇರುವ ಬಯಕೆಯಿತ್ತು, ಆದುದರಿಂದ ಅವನು IVನೆಯ ಸೆಲ್ಯೂಕಸನನ್ನು ಕೊಲೆಮಾಡಿದನು. ಆದರೂ, ಪೆರ್ಗಮಮ್‌ನ ರಾಜನಾದ ಯೂಮನೀಸ್‌ ಹಾಗೂ ಅವನ ತಮ್ಮನಾದ ಆ್ಯಟಲಸ್‌ರು ಸೇರಿಕೊಂಡು, ಕೊಲೆಯಾದ ರಾಜನ ತಮ್ಮನಾದ IVನೆಯ ಆ್ಯಂಟಾಯೊಕಸ್‌ನನ್ನು ಸಿಂಹಾಸನಕ್ಕೆ ಏರಿಸಿದರು.

37. (ಎ) ನಾಲ್ಕನೆಯ ಆ್ಯಂಟಾಯೊಕಸನು, ಯೆಹೋವ ದೇವರಿಗಿಂತಲೂ ತಾನೇ ಬಲಿಷ್ಠನು ಎಂಬುದನ್ನು ತೋರಿಸಲು ಹೇಗೆ ಪ್ರಯತ್ನಿಸಿದನು? (ಬಿ) IVನೆಯ ಆ್ಯಂಟಾಯೊಕಸನು ಯೆರೂಸಲೇಮಿನಲ್ಲಿರುವ ದೇವಾಲಯವನ್ನು ಅಪವಿತ್ರಗೊಳಿಸಿದ್ದರಿಂದ ಏನು ಸಂಭವಿಸಿತು?

³⁷ ಉತ್ತರದ ಹೊಸ ರಾಜನಾದ IVನೆಯ ಆ್ಯಂಟಾಯೊಕಸನು, ಯೆಹೋವನ ಆರಾಧನಾ ಏರ್ಪಾಡನ್ನು ನಿರ್ಮೂಲಮಾಡಲು ಪ್ರಯತ್ನಿಸುವ ಮೂಲಕ, ತಾನೇ ದೇವರಿಗಿಂತ ಬಲಿಷ್ಠನು ಎಂಬುದನ್ನು ತೋರಿಸಲು ಮುಂದಾದನು. ಯೆಹೋವನನ್ನು ಕಡೆಗಣಿಸಿ, ಅವನು ಯೆರೂಸಲೇಮಿನ ದೇವಾಲಯವನ್ನು ಸೂಸ್‌ ಅಥವಾ ಜೂಪಿಟರ್‌ ದೇವತೆಗೆ ಮೀಸಲಾಗಿಟ್ಟನು. ಸಾ.ಶ.ಪೂ. 167ರ ಡಿಸೆಂಬರ್‌ ತಿಂಗಳಿನಲ್ಲಿ, ಎಲ್ಲಿ ಯೆಹೋವನಿಗೆ ದಿನಾಲೂ ಯಜ್ಞನೈವೇದ್ಯಗಳನ್ನು ಅರ್ಪಿಸಲಾಗುತ್ತಿತ್ತೋ ಆ ದೇವಾಲಯದ ಅಂಗಣದಲ್ಲಿದ್ದ ದೊಡ್ಡ ಯಜ್ಞವೇದಿಯ ಮೇಲೆ ಒಂದು ವಿಧರ್ಮಿ ಯಜ್ಞವೇದಿಯು ಸ್ಥಾಪಿಸಲ್ಪಟ್ಟಿತು. ಹತ್ತು ದಿನಗಳ ತರುವಾಯ, ಆ ವಿಧರ್ಮಿ ಯಜ್ಞವೇದಿಯ ಮೇಲೆ ಸೂಸ್‌ ದೇವತೆಗೆ ಬಲಿಯು ಅರ್ಪಿಸಲ್ಪಟ್ಟಿತು. ಈ ಅಪವಿತ್ರೀಕರಣದಿಂದಾಗಿ, ಮಕಬೀಯರ ನಾಯಕತ್ವದ ಕೆಳಗೆ ಯೆಹೂದ್ಯರು ದಂಗೆಯೆದ್ದರು. IVನೆಯ ಆ್ಯಂಟಾಯೊಕಸನು ಮೂರು ವರ್ಷಗಳ ವರೆಗೆ ಯೆಹೂದ್ಯರ ವಿರುದ್ಧ ಹೋರಾಡಿದನು. ಸಾ.ಶ.ಪೂ. 164ರಲ್ಲಿ, ದೇವಾಲಯದ ಅಪವಿತ್ರೀಕರಣವಾಗಿ ಒಂದು ವರ್ಷ ಕಳೆದ ಬಳಿಕ, ಜೂಡಾಸ್‌ ಮಕಬೀಯಸ್‌ನು ಆ ದೇವಾಲಯವನ್ನು ಪುನಃ ಯೆಹೋವನಿಗೆ ಪ್ರತಿಷ್ಠಾಪಿಸಿದನು. ಮತ್ತು ಆಗ ಹನುಕಾ ಎಂಬ ದೇವಾಲಯ ಪ್ರತಿಷ್ಠೆಯ ಹಬ್ಬವು ಸ್ಥಾಪಿಸಲ್ಪಟ್ಟಿತು.​—⁠ಯೋಹಾನ 10:⁠22.

38. ಮಕಬೀಯರ ಆಳ್ವಿಕೆಯು ಹೇಗೆ ಕೊನೆಗೊಂಡಿತು?

³⁸ ಬಹುಶಃ ಸಾ.ಶ.ಪೂ. 161ರಲ್ಲಿ ಮಕಬೀಯರು ರೋಮ್‌ನೊಂದಿಗೆ ಒಂದು ಒಪ್ಪಂದ​ವನ್ನು ಮಾಡಿಕೊಂಡು, ಸಾ.ಶ.ಪೂ. 104ರಲ್ಲಿ ಒಂದು ರಾಜ್ಯವನ್ನು ಸ್ಥಾಪಿಸಿದರು. ಆದರೆ ಇವರು ಹಾಗೂ ಸಿರಿಯದ ಉತ್ತರ ರಾಜನ ನಡುವಿನ ಸಂಘರ್ಷವು ಹಾಗೆಯೇ ಮುಂದುವರಿಯಿತು. ಕೊನೆಯದಾಗಿ, ಹಸ್ತಕ್ಷೇಪಮಾಡುವಂತೆ ರೋಮ್‌ಗೆ ಕೇಳಿಕೊಳ್ಳಲಾಯಿತು. ಹೀಗೆ ರೋಮನ್‌ ಜನರಲ್‌ ನೈಯುಸ್‌ ಪಾಂಪೀಯು, ಮೂರು ತಿಂಗಳುಗಳ ವರೆಗೆ ಮುತ್ತಿಗೆ ಹಾಕಿದ ಬಳಿಕ ಸಾ.ಶ.ಪೂ. 63ರಲ್ಲಿ ಯೆರೂಸಲೇಮನ್ನು ವಶ​ಪಡಿಸಿಕೊಂಡನು. ಸಾ.ಶ.ಪೂ. 39ರಲ್ಲಿ ರೋಮನ್‌ ಶಾಸನಸಭೆಯು, ಏದೋಮ್ಯನಾದ ಹೆರೋದನನ್ನು ಯೂದಾಯದ ರಾಜನನ್ನಾಗಿ ನೇಮಿಸಿತು. ಮಕಬೀಯರ ಆಳ್ವಿಕೆಯನ್ನು ಕೊನೆಗೊಳಿಸುತ್ತಾ, ಅವನು ಸಾ.ಶ.ಪೂ. 37ರಲ್ಲಿ ಯೆರೂಸಲೇಮನ್ನು ಸ್ವಾಧೀನಪಡಿಸಿ​ಕೊಂಡನು.

39. ದಾನಿಯೇಲ 11:​1-19ನ್ನು ಪರಿಗಣಿಸುವ ಮೂಲಕ ನೀವು ಹೇಗೆ ಪ್ರಯೋಜನವನ್ನು ಪಡೆದು​ಕೊಂಡಿದ್ದೀರಿ?

³⁹ ಹೋರಾಟ ನಡಿಸುತ್ತಿರುವ ಇಬ್ಬರು ರಾಜರ ಕುರಿತಾದ ಪ್ರವಾದನೆಯ ಮೊದಲ ಭಾಗವು ಸವಿವರವಾಗಿ ನೆರವೇರುವುದನ್ನು ನೋಡುವುದು ಎಷ್ಟು ರೋಮಾಂಚಕ ಸಂಗತಿಯಾಗಿದೆ! ನಿಜವಾಗಿಯೂ, ಪ್ರವಾದನಾ ಸಂದೇಶವು ದಾನಿಯೇಲನಿಗೆ ಕೊಡಲ್ಪಟ್ಟ ಸುಮಾರು 500 ವರ್ಷಗಳ ನಂತರದ ಇತಿಹಾಸದೊಳಗೆ ಇಣಿಕಿ ನೋಡುವುದು ಹಾಗೂ ಉತ್ತರ ರಾಜ ಮತ್ತು ದಕ್ಷಿಣ ರಾಜನ ಸ್ಥಾನವನ್ನು ಪಡೆದುಕೊಳ್ಳುವವರನ್ನು ಗುರುತಿಸುವುದು ಎಷ್ಟು ಭಾವೋದ್ರೇಕಗೊಳಿಸುವ ವಿಷಯವಾಗಿದೆ! ಆದರೂ, ಯೇಸು ಭೂಮಿಯ ಮೇಲಿದ್ದಾಗಿನ ಸಮಯದಿಂದ ನಮ್ಮ ದಿನಗಳ ವರೆಗೆ ಈ ಇಬ್ಬರು ರಾಜರ ನಡುವಿನ ಹೋರಾಟವು ಮುಂದುವರಿದಂತೆ, ಅವರ ರಾಜಕೀಯ ಸ್ವರೂಪಗಳು ಬದಲಾಗುತ್ತಾ ಹೋಗುತ್ತವೆ. ಈ ಪ್ರವಾದನೆಯಲ್ಲಿ ಪ್ರಕಟಪಡಿಸಿರುವ ಆಸಕ್ತಿದಾಯಕ ವಿವರಗಳೊಂದಿಗೆ ಐತಿಹಾಸಿಕ ಬೆಳವಣಿಗೆಗಳನ್ನು ಸರಿಹೊಂದಿಸುವ ಮೂಲಕ, ಹೋರಾಡುತ್ತಿರುವ ಈ ಇಬ್ಬರು ರಾಜರನ್ನು ನಾವು ಗುರುತಿಸಲು ಶಕ್ತರಾಗುವೆವು.

ನೀವೇನನ್ನು ಗ್ರಹಿಸಿದಿರಿ?

• ಗ್ರೀಕ್‌ ರಾಜ್ಯಗಳಿಂದ ಯಾವ ಪ್ರಬಲ ರಾಜರ ಎರಡು ವಂಶಗಳು ಉದಯಿಸಿದವು, ಮತ್ತು ಆ ರಾಜರು ಯಾವ ಹೋರಾಟವನ್ನು ಆರಂಭಿಸಿದರು?

• ದಾನಿಯೇಲ 11:6ರಲ್ಲಿ ಮುಂತಿಳಿಸಲ್ಪಟ್ಟಂತೆ, ಆ ಇಬ್ಬರು ರಾಜರು ಹೇಗೆ ‘ನ್ಯಾಯಸಮ್ಮತವಾದ ಒಪ್ಪಂದವನ್ನು ಮಾಡಿಕೊಂಡರು’?

• ಈ ಕೆಳಗಿನ ರಾಜರ ನಡುವೆ ಹೋರಾಟವು ಹೇಗೆ ಮುಂದುವರಿಯಿತು?

IIನೆಯ ಸೆಲ್ಯೂಕಸ್‌ ಮತ್ತು IIIನೆಯ ಟಾಲೆಮಿ (ದಾನಿಯೇಲ 11:​7-9)?

IIIನೆಯ ಆ್ಯಂಟಾಯೊಕಸ್‌ ಮತ್ತು IVನೆಯ ಟಾಲೆಮಿ (ದಾನಿಯೇಲ ​11:10-12)?

IIIನೆಯ ಆ್ಯಂಟಾಯೊಕಸ್‌ ಮತ್ತು Vನೆಯ ಟಾಲೆಮಿ (ದಾನಿಯೇಲ ​11:13-16)?

• ಒಂದನೆಯ ಕ್ಲಿಯೋಪಾತ್ರ ಹಾಗೂ Vನೆಯ ಟಾಲೆಮಿಯ ನಡುವಿನ ವಿವಾಹದ ಉದ್ದೇಶವು ಏನಾಗಿತ್ತು, ಮತ್ತು ಆ ಒಳಸಂಚು ಏಕೆ ಅಸಫಲ​ವಾಯಿತು (ದಾನಿಯೇಲ 11:​17-19)?

• ದಾನಿಯೇಲ 11:​1-19ಕ್ಕೆ ಗಮನಕೊಡುವುದು, ನಿಮಗೆ ಹೇಗೆ ಪ್ರಯೋಜನ​ವನ್ನು ತಂದಿದೆ?

[Chart/Pictures on page 228]

ದಾನಿಯೇಲ 11:​5-19ರಲ್ಲಿ ತಿಳಿಸಲ್ಪಟ್ಟಿರುವ ಅರಸರು

ದಾನಿಯೇಲ 11:5 Iನೆಯ ಸೆಲ್ಯೂಕಸ್‌ ನೈಕೇಟರ್‌ Iನೆಯ ಟಾಲೆಮಿ

ದಾನಿಯೇಲ 11:​7-9 IIನೆಯ ಸೆಲ್ಯೂಕಸ್‌ IIIನೆಯ ಟಾಲೆಮಿ

ದಾನಿಯೇಲ 11:​10-12 IIIನೆಯ ಆ್ಯಂಟಾಯೊಕಸ್‌ IVನೆಯ ಟಾಲೆಮಿ

[ಚಿತ್ರ]

II ನೆಯ ಟಾಲೆಮಿ ಹಾಗೂ ಅವನ ಹೆಂಡತಿಯನ್ನು ಚಿತ್ರಿಸುತ್ತಿರುವ ನಾಣ್ಯ

[ಚಿತ್ರ]

I ನೆಯ ಸೆಲ್ಯೂಕಸ್‌ ನೈಕೇಟರ್‌

[ಚಿತ್ರ]

III ನೆಯ ಆ್ಯಂಟಾಯೊಕಸ್‌

[ಚಿತ್ರ]

VI ನೆಯ ಟಾಲೆಮಿ

[ಚಿತ್ರ]

ಐಗುಪ್ತದ ಕಾರ್ನಾಕ್‌ನಲ್ಲಿರುವ IIIನೆಯ ಟಾಲೆಮಿಯ ಹೆಬ್ಬಾಗಿಲು

[Map/Pictures on page 216, 217]

(For fully formatted text, see publication)

“ಉತ್ತರ ರಾಜ” ಹಾಗೂ “ದಕ್ಷಿಣ ರಾಜ” ಎಂಬ ಬಿರುದುಗಳು, ದಾನಿಯೇಲನ ಜನರು ವಾಸಿಸುತ್ತಿದ್ದ ಸ್ಥಳದಿಂದ ಉತ್ತರದಲ್ಲಿ ಹಾಗೂ ದಕ್ಷಿಣದಲ್ಲಿ ಅಸ್ತಿತ್ವದಲ್ಲಿದ್ದ ಅರಸರನ್ನು ಸೂಚಿಸುತ್ತವೆ

ಮ್ಯಾಸಿಡೋನಿಯ

ಗ್ರೀಸ್‌

ಏಷ್ಯಾ ಮೈನರ್‌

ಇಸ್ರೇಲ್‌

ಲಿಬ್ಯ

ಈಜಿಪ್ಟ್‌

ಇಥಿಯೋಪಿಯ

ಸಿರಿಯ

ಬಾಬೆಲ್‌

ಅರೇಬಿಯ

[ಚಿತ್ರ]

II ನೆಯ ಟಾಲೆಮಿ

[ಚಿತ್ರ]

ಮಹಾ ಆ್ಯಂಟಾಯೊಕಸ್‌

[ಚಿತ್ರ]

ಮಹಾ ಆ್ಯಂಟಾಯೊಕಸ್‌ನಿಂದ ಚಲಾವಣೆಗೆ ತರಲ್ಪಟ್ಟ ಅಧಿಕೃತ ಶಾಸನಗಳಿರುವ ಒಂದು ಕಲ್ಲಿನ ಫಲಕ

[ಚಿತ್ರ]

Vನೆಯ ಟಾಲೆಮಿಯನ್ನು ಚಿತ್ರಿಸುತ್ತಿರುವ ನಾಣ್ಯ

[ಚಿತ್ರ]

III ನೆಯ ಟಾಲೆಮಿ ಹಾಗೂ ಅವನ ಉತ್ತರಾಧಿಕಾರಿಗಳು, ಐಗುಪ್ತದ ಮೇಲ್ಪ್ರದೇಶದಲ್ಲಿರುವ ಇಡ್‌ಫೂನಲ್ಲಿ ಹಾರಸ್‌ನ ಈ ದೇವಾಲಯವನ್ನು ಕಟ್ಟಿದರು

[ಪುಟ 321 ರಲ್ಲಿ ಇಡೀ ಪುಟದ ಚಿತ್ರ]

[Picture on page 215]

I ನೆಯ ಸೆಲ್ಯೂಕಸ್‌ ನೈಕೇಟರ್‌

[Picture on page 218]

I ನೆಯ ಟಾಲೆಮಿ

ಅಧ್ಯಾಯ ಹದಿನಾಲ್ಕು

ಇಬ್ಬರು ರಾಜರು ತಮ್ಮ ಸ್ವರೂಪವನ್ನು ಬದಲಾಯಿಸುತ್ತಾರೆ

 1, 2. (ಎ) ನಾಲ್ಕನೆಯ ಆ್ಯಂಟಾಯೊಕಸನು ರೋಮ್‌ನ ಬೇಡಿಕೆಗಳಿಗೆ ಮಣಿಯಲು ಯಾವುದು ಕಾರಣವಾಯಿತು? (ಬಿ) ಸಿರಿಯವು ಯಾವಾಗ ರೋಮನ್‌ ಪ್ರಾಂತವಾಗಿ ಪರಿ​ಣಮಿಸಿತು?

ಸಿರಿಯದ ಸಾಮ್ರಾಟನಾದ IVನೆಯ ಆ್ಯಂಟಾಯೊಕಸನು ಐಗುಪ್ತಕ್ಕೆ ಮುತ್ತಿಗೆ ಹಾಕಿ, ಅದರ ರಾಜನೋಪಾದಿ ಸ್ವತಃ ಕಿರೀಟಧಾರಣೆಮಾಡಿಕೊಳ್ಳುತ್ತಾನೆ. ಐಗುಪ್ತದ ರಾಜನಾದ VIನೆಯ ಟಾಲೆಮಿಯ ಕೋರಿಕೆಯ ಮೇರೆಗೆ, ಗಾಯಸ್‌ ಪಾಪಿಲಿಯಸ್‌ ಲೈನಾಸ್‌ ಎಂಬ ರಾಯಭಾರಿಯನ್ನು ರೋಮ್‌ ಐಗುಪ್ತಕ್ಕೆ ಕಳುಹಿಸುತ್ತದೆ. ಅವನೊಂದಿಗೆ ತುಂಬ ದೊಡ್ಡ ನೌಕಾ ಬಲವಿದೆ ಮಾತ್ರವಲ್ಲ, IVನೆಯ ಆ್ಯಂಟಾಯೊಕಸನು ಐಗುಪ್ತದ ದೊರೆತನವನ್ನು ತ್ಯಜಿಸಿ, ದೇಶದಿಂದ ಹೊರಗೆಹೋಗಬೇಕು ಎನ್ನುವ ರೋಮನ್‌ ಶಾಸನಸಭೆಯಿಂದ ಬಂದ ಆಜ್ಞಾಪತ್ರವೂ ಇದೆ. ಆ್ಯಲೆಕ್ಸಾಂಡ್ರಿಯದ ಒಂದು ಪ್ರಾಂತವಾದ ಇಲೂಸಸ್‌ನಲ್ಲಿ, ಸಿರಿಯದ ರಾಜನೂ ರೋಮನ್‌ ರಾಯಭಾರಿಯೂ ಮುಖಾಮುಖಿಯಾಗಿ ಸಂಧಿಸುತ್ತಾರೆ. ತನ್ನ ಮಂತ್ರಿಗಳೊಂದಿಗೆ ಸಮಾಲೋಚನೆ ನಡೆಸಲಿಕ್ಕಾಗಿ ಸ್ವಲ್ಪ ಸಮಯಾವಧಿಯನ್ನು ಕೊಡುವಂತೆ IVನೆಯ ಆ್ಯಂಟಾಯೊಕಸನು ಕೇಳಿಕೊಳ್ಳುತ್ತಾನೆ. ಆದರೆ ಲೈನಾಸನು ಆ ರಾಜನ ಸುತ್ತಲೂ ಒಂದು ವೃತ್ತವನ್ನು ಎಳೆದು, ಈ ವೃತ್ತದ ಹೊರಗೆ ಹೆಜ್ಜೆಯಿಡುವ ಮೊದಲು ತನಗೆ ಉತ್ತರ ಕೊಡಬೇಕು ಎಂದು ಹೇಳುತ್ತಾನೆ. ಅವಮಾನಗೊಂಡ IVನೆಯ ಆ್ಯಂಟಾಯೊಕಸನು, ರೋಮನರ ಬೇಡಿಕೆಗಳನ್ನು ಪೂರೈಸುತ್ತಾನೆ ಮತ್ತು ಸಾ.ಶ.ಪೂ. 168ರಲ್ಲಿ ಸಿರಿಯಕ್ಕೆ ಹಿಂದಿರುಗುತ್ತಾನೆ. ಹೀಗೆ ಸಿರಿಯದ ಉತ್ತರ ರಾಜ ಹಾಗೂ ಐಗುಪ್ತದ ದಕ್ಷಿಣ ರಾಜನ ನಡುವಿನ ಸಂಘರ್ಷವು ಕೊನೆಗೊಳ್ಳುತ್ತದೆ.

² ಮಧ್ಯಪೂರ್ವದ ವ್ಯವಹಾರಗಳಲ್ಲಿ ಪ್ರಮುಖ ಪಾತ್ರವನ್ನು ವಹಿಸುತ್ತಾ, ರೋಮ್‌ ಸಿರಿಯದ ಮೇಲೆ ಅಧಿಕಾರ ಚಲಾಯಿಸಲಾರಂಭಿಸುತ್ತದೆ. ಆದುದರಿಂದ, ಸಾ.ಶ.ಪೂ. 163ರಲ್ಲಿ, IVನೆಯ ಆ್ಯಂಟಾಯೊಕಸನು ಮರಣಪಟ್ಟ ಬಳಿಕ ಸೆಲ್ಯೂಕಸ್‌ ರಾಜವಂಶದ ಇತರ ರಾಜರು ಸಿರಿಯವನ್ನು ಆಳಿದರಾದರೂ, ಅವರಲ್ಲಿ ಯಾರೂ “ಉತ್ತರ​ರಾಜನ” ಸ್ಥಾನವನ್ನು ಪಡೆದುಕೊಳ್ಳಲಿಲ್ಲ. (ದಾನಿಯೇಲ 11:15) ಕೊನೆಯದಾಗಿ, ಸಾ.ಶ.ಪೂ. 64ರಲ್ಲಿ ಸಿರಿಯವು ರೋಮನ್‌ ಪ್ರಾಂತವಾಗಿ ಪರಿಣಮಿಸುತ್ತದೆ.

 3. ಐಗುಪ್ತದ ಮೇಲೆ ರೋಮ್‌ ಯಾವಾಗ ಮತ್ತು ಹೇಗೆ ಸರ್ವಾಧಿಕಾರವನ್ನು ಪಡೆಯಿತು?

³ ಐಗುಪ್ತದ ಟಾಲೆಮಿಯ ರಾಜವಂಶವು, IVನೆಯ ಆ್ಯಂಟಾಯೊಕಸನ ಮರಣದ ಬಳಿಕ ಸುಮಾರು 130 ವರ್ಷಗಳ ವರೆಗೆ “ದಕ್ಷಿಣರಾಜನ” ಸ್ಥಾನದಲ್ಲೇ ​ಮುಂದುವರಿಯುತ್ತದೆ. (ದಾನಿಯೇಲ 11:14) ಸಾ.ಶ.ಪೂ. 31ರಲ್ಲಿ, ಆ್ಯಕ್ಟಿಯಮ್‌ನ ಕದನದ ಸಮಯದಲ್ಲಿ, ರೋಮನ್‌ ರಾಜನಾದ ಆಕ್ಟೇವಿಯನ್‌, ಟಾಲೆಮಿಯ ವಂಶದ ಕೊನೆಯ ರಾಣಿಯಾದ VIIನೆಯ ಕ್ಲಿಯೋಪಾತ್ರಳ ಹಾಗೂ ಅವಳ ರೋಮನ್‌ ಪ್ರಿಯಕರನಾದ ಮಾರ್ಕ್‌ ಆ್ಯಂಟನಿಯ ಜಂಟಿ ಸೈನ್ಯವನ್ನು ಸೋಲಿಸಿಬಿಡುತ್ತಾನೆ. ಮರುವರ್ಷ ಕ್ಲಿಯೋಪಾತ್ರಳು ಆತ್ಮಹತ್ಯೆಮಾಡಿಕೊಂಡ ಬಳಿಕ, ಐಗುಪ್ತವು ಸಹ ರೋಮನ್‌ ಪ್ರಾಂತವಾಗಿ ಪರಿಣಮಿಸಿ, ಇನ್ನು ಮುಂದೆ ದಕ್ಷಿಣ ರಾಜನ ಪಾತ್ರವನ್ನು ವಹಿಸುವುದಿಲ್ಲ. ಸಾ.ಶ.ಪೂ. 30ನೆಯ ವರ್ಷದಷ್ಟಕ್ಕೆ, ಸಿರಿಯ ಹಾಗೂ ಐಗುಪ್ತದ ಮೇಲಿನ ಸರ್ವಾಧಿಕಾರವು ರೋಮ್‌ಗೆ ಸಿಗುತ್ತದೆ. ಈಗ ಬೇರೆ ಆಳ್ವಿಕೆಗಳು, ಉತ್ತರ ರಾಜ ಹಾಗೂ ದಕ್ಷಿಣ ರಾಜನ ಸ್ಥಾನವನ್ನು ಪಡೆದುಕೊಳ್ಳುವಂತೆ ನಾವು ನಿರೀಕ್ಷಿಸಬಹುದೊ?

ಒಬ್ಬ ಹೊಸ ಅರಸನು “ವಸೂಲಿಗಾರನನ್ನು” ಕಳುಹಿಸುತ್ತಾನೆ

 4. ಆಳ್ವಿಕೆ ನಡಿಸುವ ಇನ್ನೊಬ್ಬ ರಾಜನು, ಉತ್ತರ ರಾಜನ ಸ್ವರೂಪವನ್ನು ಪಡೆದುಕೊಳ್ಳುವಂತೆ ನಾವು ಏಕೆ ನಿರೀಕ್ಷಿಸಬೇಕು?

⁴ ಸಾ.ಶ. 33ರ ವಸಂತಕಾಲದಲ್ಲಿ, ಯೇಸು ಕ್ರಿಸ್ತನು ತನ್ನ ಶಿಷ್ಯರಿಗೆ ಹೇಳಿದ್ದು: “ಪ್ರವಾದಿಯಾದ ದಾನಿಯೇಲನು ಹೇಳಿದಂಥ ಹಾಳುಮಾಡುವ ಅಸಹ್ಯವಸ್ತುವು ಪವಿತ್ರಸ್ಥಾನದಲ್ಲಿ ನಿಂತಿರುವದನ್ನು ನೀವು ಕಾಣುವಾಗ . . . ಯೂದಾಯದಲ್ಲಿರುವವರು ಬೆಟ್ಟಗಳಿಗೆ ಓಡಿಹೋಗಲಿ.” (ಮತ್ತಾಯ 24:​15, 16) ದಾನಿಯೇಲ 11:31ರಿಂದ ಉದ್ಧರಿಸುತ್ತಾ, ಯೇಸು ತನ್ನ ಹಿಂಬಾಲಕರಿಗೆ ಭವಿಷ್ಯತ್ತಿನ ‘ಹಾಳುಮಾಡುವ ಅಸಹ್ಯವಸ್ತುವಿನ’ ಕುರಿತು ಎಚ್ಚರಿಸಿದನು. ಉತ್ತರ ರಾಜನನ್ನು ಒಳಗೂಡಿರುವಂತಹ ಈ ಪ್ರವಾದನೆಯು, ಉತ್ತರ ರಾಜನ ಸ್ಥಾನದಲ್ಲಿದ್ದ ಸಿರಿಯದ ಕೊನೆಯ ರಾಜನಾದ IVನೆಯ ಆ್ಯಂಟಾಯೊಕಸನು ಮರಣಪಟ್ಟ 195 ವರ್ಷಗಳ ಬಳಿಕ ಕೊಡಲ್ಪಟ್ಟಿತು. ಖಂಡಿತವಾಗಿಯೂ, ಆಳ್ವಿಕೆ ನಡಿಸು​ವಂತಹ ಇನ್ನೊಬ್ಬ ರಾಜನು ಉತ್ತರ ರಾಜನ ಸ್ವರೂಪವನ್ನು ಪಡೆದುಕೊಳ್ಳಲಿಕ್ಕಿದ್ದನು. ಅವನು ಯಾರಾಗಿರಲಿದ್ದನು?

 5. ಒಂದು ಕಾಲದಲ್ಲಿ IVನೆಯ ಆ್ಯಂಟಾಯೊಕಸನು ಆಕ್ರಮಿಸಿದ್ದ ಸ್ಥಾನವನ್ನು ಪಡೆದುಕೊಳ್ಳುತ್ತಾ, ಯಾರು ಉತ್ತರ ರಾಜನಾಗಿ ಅಧಿಕಾರಕ್ಕೆ ಬಂದನು?

⁵ ಯೆಹೋವ ದೇವರ ದೂತನು ಮುಂತಿಳಿಸಿದ್ದು: “ಅವನ [IVನೆಯ ಆ್ಯಂಟಾಯೊಕಸನ] ಸ್ಥಾನದಲ್ಲಿ ಮತ್ತೊಬ್ಬನು ಎದ್ದು [“ಅಧಿಕಾರಕ್ಕೆ ಬಂದು,” NW] ರಾಜ್ಯದಲ್ಲಿ ಶಿರೋಮಣಿಯಾದ ದೇಶವನ್ನೆಲ್ಲ ದೋಚಿಕೊಳ್ಳತಕ್ಕವನನ್ನು [“ದೇಶದಲ್ಲಿ ಹಾದುಹೋಗುವ ವಸೂಲಿಗಾರನನ್ನು,” NW] ನೇಮಿಸುವನು; ಆಹಾ, ಕೆಲವು ದಿನಗಳೊಳಗೆ ನಾಶವಾಗುವನು; ಆದರೆ ಕೋಪದ ಪೆಟ್ಟಿನಿಂದಲ್ಲ, ಯುದ್ಧದಿಂದಲೂ ಅಲ್ಲ.” (ದಾನಿಯೇಲ 11:20) ಈ ರೀತಿಯಲ್ಲಿ ‘ಅಧಿಕಾರಕ್ಕೆ ಬಂದ’ವನು, ಮೊತ್ತಮೊದಲ ರೋಮನ್‌ ಸಾಮ್ರಾಟನಾದ ಆಕ್ಟೇವಿಯನನಾಗಿದ್ದನು. ಅವನು ಕೈಸರ್‌ ಅಗಸ್ಟಸ್‌ (ಔಗುಸ್ತ) ಎಂದು ಪ್ರಸಿದ್ಧನಾಗಿದ್ದನು.​—⁠248ನೆಯ ಪುಟದಲ್ಲಿರುವ “ಒಬ್ಬನು ಗೌರವಿಸಲ್ಪಟ್ಟನು, ಮತ್ತೊಬ್ಬನು ಕಡೆಗಣಿಸಲ್ಪಟ್ಟನು” ಎಂಬ ಮೇಲ್ಬರಹದ ಕೆಳಗೆ ನೋಡಿ.

 6. (ಎ) “ವಸೂಲಿಗಾರನು” ಯಾವಾಗ “ಶಿರೋಮಣಿಯಾದ ದೇಶ”ದ ಮೂಲಕ ಹಾದುಹೋದನು, ಮತ್ತು ಇದರ ವಿಶೇಷತೆ ಏನಾಗಿತ್ತು? (ಬಿ) ಅಗಸ್ಟಸ್‌ನು “ಕೋಪದ ಪೆಟ್ಟಿನಿಂದ” ಅಥವಾ “ಯುದ್ಧದಿಂದ” ಸಾಯಲಿಲ್ಲ ಎಂದು ಏಕೆ ಹೇಳಸಾಧ್ಯವಿದೆ? (ಸಿ) ಉತ್ತರ ರಾಜನ ಸ್ವರೂಪದಲ್ಲಿ ಯಾವ ಬದಲಾವಣೆಯು ಸಂಭವಿಸಿತು?

⁶ ಅಗಸ್ಟಸ್‌ನ “ಶಿರೋಮಣಿಯಾದ ದೇಶ”ದಲ್ಲಿ, “ಅಂದಚಂದದ ದೇಶ”ವು, ಅಂದರೆ ರೋಮನ್‌ ಪ್ರಾಂತವಾದ ಯೆಹೂದವೂ ಸೇರಿತ್ತು. (ದಾನಿಯೇಲ 11:16) ಸಾ.ಶ.ಪೂ. 2ರಲ್ಲಿ ಅಗಸ್ಟಸನು, ಜನಗಣತಿಗಾಗಿ ಅಥವಾ ಖಾನೇಷುಮಾರಿ ಮಾಡಲಿಕ್ಕಾಗಿ ಆಜ್ಞೆಯನ್ನು ಹೊರಡಿಸುವ ಮೂಲಕ, “ವಸೂಲಿಗಾರನನ್ನು” ಕಳುಹಿಸಿದನು. ತೆರಿಗೆ ಹೊರಿಸಲಿಕ್ಕಾಗಿ ಮತ್ತು ಮಿಲಿಟರಿ ಸೇರ್ಪಡೆಗಾಗಿ, ಜನಸಂಖ್ಯೆಯು ಎಷ್ಟಿದೆ ಎಂಬುದನ್ನು ತಿಳಿದುಕೊಳ್ಳುವ ಉದ್ದೇಶದಿಂದ ಅವನು ಹೀಗೆ ಮಾಡಿದ್ದಿರಬಹುದು. ಈ ಆಜ್ಞೆಯ ಕಾರಣದಿಂದಲೇ, ಯೋಸೇಫ ಹಾಗೂ ಮರಿಯರು ಖಾನೇಷು​ಮಾರಿಗಾಗಿ ಬೇತ್ಲೆಹೇಮ್‌ಗೆ ಪ್ರಯಾಣಿಸಿದರು. ಇದರ ಫಲಿತಾಂಶವಾಗಿ, ಮುಂತಿಳಿಸಲ್ಪಟ್ಟ ಸ್ಥಳದಲ್ಲಿಯೇ ಯೇಸು ಜನಿಸಿದನು. (ಮೀಕ 5:2; ಮತ್ತಾಯ 2:​1-12) ಸಾ.ಶ. 14ರ ಆಗಸ್ಟ್‌ ತಿಂಗಳಿನಲ್ಲಿ, ಅಂದರೆ “ಕೆಲವು ದಿನಗಳೊಳಗೆ” ಅಥವಾ ಖಾನೇಷುಮಾರಿಯ ಆಜ್ಞೆಯನ್ನು ಹೊರಡಿಸಿದ ಸ್ವಲ್ಪ ಸಮಯದಲ್ಲೇ​—⁠ಸುಮಾರು 76ರ ಪ್ರಾಯದಲ್ಲಿ​—⁠ಅಗಸ್ಟಸನು ಮರಣಪಟ್ಟನು. ಆದರೆ ಕೊಲೆಪಾತಕರ “ಕೋಪದ ಪೆಟ್ಟಿನಿಂದಲ್ಲ” ಅಥವಾ “ಯುದ್ಧದಿಂದಲೂ ಅಲ್ಲ,” ಬದಲಾಗಿ ಅಸ್ವಸ್ಥತೆಯ ಕಾರಣದಿಂದ ಮೃತಪಟ್ಟನು. ನಿಜವಾಗಿಯೂ ಉತ್ತರ ರಾಜನು ತನ್ನ ಸ್ವರೂಪವನ್ನು ಬದಲಾಯಿಸಿದ್ದನು! ಇಷ್ಟರಲ್ಲೇ ರೋಮನ್‌ ಸಾಮ್ರಾಜ್ಯವು ಉತ್ತರ ರಾಜನಾಗಿ ಪರಿಣಮಿಸಿತ್ತು. ಅದರ ಬೇರೆ ಬೇರೆ ಚಕ್ರವರ್ತಿಗಳು ಆ ಸಾಮ್ರಾಜ್ಯವನ್ನು ಪ್ರತಿನಿಧಿಸಿದರು.

‘ಕಡೆಗಣಿಸಲ್ಪಡುವವನು ಎದ್ದುಬರುವನು’

 7, 8. (ಎ) ಉತ್ತರದ ರಾಜನೋಪಾದಿ ಅಗಸ್ಟಸ್‌ನ ಸ್ಥಾನಕ್ಕೆ ಯಾರು ಬಂದರು? (ಬಿ) ಕೈಸರ್‌ ಅಗಸ್ಟಸ್‌ನ ಉತ್ತರಾಧಿಕಾರಿಗೆ, ರಾಜನ ಇಚ್ಛೆಗೆ ವಿರುದ್ಧವಾಗಿ ಏಕೆ “ರಾಜ್ಯಪದವಿ”ಯು ಕೊಡಲ್ಪಟ್ಟಿತು?

⁷ ಪ್ರವಾದನೆಯನ್ನು ಮುಂದುವರಿಸುತ್ತಾ ದೇವದೂತನು ಹೇಳಿದ್ದು: “ಅವನ [ಅಗಸ್ಟಸ್‌ನ] ಸ್ಥಾನದಲ್ಲಿ ಒಬ್ಬ ನೀಚನು [“ಕಡೆಗಣಿಸಲ್ಪಡುವವನು,” NW] ಏಳುವನು, ಮತ್ತು ಖಂಡಿತವಾಗಿಯೂ ಅವರು ಅವನಿಗೆ ರಾಜಪದವಿಯನ್ನು ವಹಿಸಿಕೊಡಲು ಇಷ್ಟಪಡುವುದಿಲ್ಲ; ಮತ್ತು ಅವನು ನೆಮ್ಮದಿಯ ಕಾಲದಲ್ಲಿ ನಯವಾದ ನುಡಿಗಳಿಂದ ರಾಜ್ಯವನ್ನು ಪಡೆದುಕೊಳ್ಳುವನು. ಅಷ್ಟುಮಾತ್ರವಲ್ಲ ಅವನನ್ನು ಎದುರಿಸುವ ದೊಡ್ಡ ದೊಡ್ಡ ಸೈನ್ಯಗಳು ಹಾಗೂ ಒಡಂಬಡಿಕೆಯ ಅಧಿಪತಿಯು ಸಹ ಅವನ ಸೈನ್ಯ ಪ್ರವಾಹಕ್ಕೆ ಸಿಕ್ಕಿ ಭಗ್ನವಾಗುವರು.”​—⁠ದಾನಿಯೇಲ ​11:21, 22, NW.

⁸ “ಕಡೆಗಣಿಸಲ್ಪಡುವವನು” ಕೈಸರನಾದ ತಿಬೇರಿಯನಾಗಿದ್ದನು. ಇವನು ಅಗಸ್ಟಸ್‌ನ ಮೂರನೆಯ ಹೆಂಡತಿಯಾಗಿದ್ದ ಲಿವಿಯಳ ಮಗನಾಗಿದ್ದನು. (248ನೆಯ ಪುಟದಲ್ಲಿರುವ “ಒಬ್ಬನು ಗೌರವಿಸಲ್ಪಟ್ಟನು, ಮತ್ತೊಬ್ಬನು ಕಡೆಗಣಿಸಲ್ಪಟ್ಟನು” ಎಂಬ ಮೇಲ್ಬರಹದ ಕೆಳಗಿರುವ ವಿಷಯವನ್ನು ನೋಡಿ.) ತನ್ನ ಈ ಮಲಮಗನ ದುರ್ಗುಣಗಳ ಕಾರಣದಿಂದ ಅಗಸ್ಟಸನು ಅವನನ್ನು ದ್ವೇಷಿಸುತ್ತಿದ್ದನು, ಮತ್ತು ತನ್ನ ನಂತರ ಅವನು ಕೈಸರ​ನಾಗುವುದನ್ನು ಇಷ್ಟಪಡಲಿಲ್ಲ. ಆದರೂ ರಾಜನ ಇಚ್ಛೆಗೆ ವಿರುದ್ಧವಾಗಿ ಅವನಿಗೆ “ರಾಜಪದವಿ”ಯು ಕೊಡಲ್ಪಟ್ಟಿತು; ಅದೂ ಕೂಡ ಬೇರೆ ಎಲ್ಲ ಉತ್ತರಾಧಿಕಾರಿಗಳು ಮರಣಪಟ್ಟ ಬಳಿಕವೇ ಇವನಿಗೆ ಆ ಪದವಿಯು ಸಿಕ್ಕಿತು. ಸಾ.ಶ. 4ರಲ್ಲಿ ಅಗಸ್ಟಸನು ತಿಬೇರಿಯನನ್ನು ದತ್ತುತೆಗೆದುಕೊಂಡು, ಅವನನ್ನು ಸಿಂಹಾಸನಕ್ಕೆ ಬಾಧ್ಯಸ್ಥನನ್ನಾಗಿ ಮಾಡಿದನು. ಅಗಸ್ಟಸ್‌ನ ಮರಣಾನಂತರ, ನೀಚನಾಗಿದ್ದ 56 ವರ್ಷ ಪ್ರಾಯದ ತಿಬೇರಿಯನು ‘ಎದ್ದನು.’ ಮತ್ತು ರೋಮನ್‌ ಚಕ್ರವರ್ತಿಯೋಪಾದಿ ಹಾಗೂ ಉತ್ತರ ರಾಜನೋಪಾದಿ ತನ್ನ ಅಧಿಕಾರ ಸ್ಥಾನವನ್ನು ತೆಗೆದುಕೊಂಡನು.

 9. ತಿಬೇರಿಯನು ಹೇಗೆ “ನಯವಾದ ನುಡಿಗಳಿಂದ ರಾಜ್ಯವನ್ನು ಪಡೆದುಕೊಂಡನು”?

⁹ “ತಿಬೇರಿಯನು ಶಾಸನಸಭೆಯೊಂದಿಗೆ ರಾಜಕೀಯ ನಡೆಸಿ, [ಅಗಸ್ಟಸ್‌ ಮರಣಪಟ್ಟ ಬಳಿಕ] ಸುಮಾರು ಒಂದು ತಿಂಗಳು ಕಳೆಯುವ ತನಕ ಅದು ಅವನನ್ನು ಚಕ್ರವರ್ತಿಯನ್ನಾಗಿ ಮಾಡಲು ಬಿಡಲಿಲ್ಲ” ಎಂದು ದ ನ್ಯೂ ಎನ್‌ಸೈಕ್ಲೊಪೀಡಿಯ ಬ್ರಿಟ್ಯಾನಿಕ ಹೇಳುತ್ತದೆ. ಅಗಸ್ಟಸ್‌ನನ್ನು ಬಿಟ್ಟು ಬೇರೆ ಯಾರಿಗೂ ರೋಮನ್‌ ಸಾಮ್ರಾಜ್ಯವನ್ನು ಆಳುವ ಭಾರಿ ಜವಾಬ್ದಾರಿಯನ್ನು ಹೊರುವ ಸಾಮರ್ಥ್ಯವಿಲ್ಲ ಎಂದು ಅವನು ಶಾಸನಸಭೆಗೆ ಹೇಳಿದನು ಮತ್ತು ಏಕಮಾತ್ರ ವ್ಯಕ್ತಿಗೆ ಅಧಿಕಾರವನ್ನು ಕೊಡುವ ಬದಲು, ಒಂದು ಗುಂಪಿಗೆ ಅಧಿಕಾರವನ್ನು ಕೊಡುವ ಮೂಲಕ ಪ್ರಜಾಧಿಪತ್ಯವನ್ನು ಪುನಸ್ಸ್ಥಾಪಿಸುವಂತೆ ಕೇಳಿಕೊಂಡನು. ಇತಿಹಾಸಕಾರರಾದ ವಿಲ್‌ ಡ್ಯುರ್ಯಾಂಟ್‌ ಹೀಗೆ ಬರೆಯುತ್ತಾರೆ: “ಅವನು ಹೇಳಿದ ವಿಚಾರವನ್ನು ಅಂಗೀಕರಿಸುವ ಧೈರ್ಯಮಾಡದೆ, ಕಟ್ಟಕಡೆಗೆ ಅವನು ಅಧಿಕಾರವನ್ನು ಸ್ವೀಕರಿಸುವ ತನಕ ಶಾಸನಸಭೆಯು ಅವನಿಗೆ ತಲೆಬಾಗುತ್ತಾ ಇತ್ತು.” ಡ್ಯುರ್ಯಾಂಟ್‌ ಕೂಡಿಸಿದ್ದು: “ಎರಡೂ ಪಕ್ಷಗಳು ಚೆನ್ನಾಗಿ ನಾಟಕವಾಡಿದವು. ತಾನೇ ಆಳಿಕೆ ನಡಿಸುವಂತೆ ತಿಬೇರಿಯನು ಬಯಸಿದನು, ಇಲ್ಲದಿದ್ದಲ್ಲಿ ಅವನು ಅದರಿಂದ ತಪ್ಪಿಸಿಕೊಳ್ಳುವ ವಿಧವನ್ನು ಹೇಗಾದರೂ ಕಂಡುಹಿಡಿಯುತ್ತಿದ್ದನು. ಶಾಸನಸಭೆಯು ಅವನಿಗೆ ಭಯಪಡುತ್ತಿತ್ತು ಹಾಗೂ ಅವನನ್ನು ದ್ವೇಷಿಸುತ್ತಿತ್ತು, ಆದರೆ ಈ ಮುಂಚಿನಂತೆ ಸೈದ್ಧಾಂತಿಕ ಸರ್ವ ಸ್ವತಂತ್ರ ಸಭೆಗಳ ಮೇಲಾಧಾರಿತವಾದ ಪ್ರಜಾಧಿಪತ್ಯವನ್ನು ಪುನಸ್ಸ್ಥಾಪಿಸಲು ಅದು ಹಿಂಜರಿಯಿತು.” ಹೀಗೆ ತಿಬೇರಿಯನು ‘ನಯವಾದ ನುಡಿಗಳಿಂದ ರಾಜ್ಯವನ್ನು ಪಡೆದು​ಕೊಂಡನು.’

10. ‘ದೊಡ್ಡ ದೊಡ್ಡ ಸೈನ್ಯಗಳು’ ಹೇಗೆ ‘ಭಗ್ನ’ಗೊಂಡವು?

¹⁰ “ದೊಡ್ಡ ದೊಡ್ಡ ಸೈನ್ಯಗಳ,” ಅಂದರೆ ಸುತ್ತುಮುತ್ತಲಿರುವ ರಾಜ್ಯಗಳ ಮಿಲಿಟರಿ ಸೈನ್ಯಗಳ ವಿಷಯದಲ್ಲಿ ದೇವದೂತನು ಹೇಳಿದ್ದು: ‘ಅವು ಅವನ ಸೈನ್ಯ ಪ್ರವಾಹಕ್ಕೆ ಸಿಕ್ಕಿ ಭಗ್ನವಾಗುವವು.’ ತಿಬೇರಿಯನು ಉತ್ತರದ ರಾಜನಾಗಿ ಪರಿಣಮಿಸಿದಾಗ, ಅವನ ಸೋದರಳಿಯನಾದ ಜರ್ಮ್ಯಾನಿಕಸ್‌ ಕೈಸರನು, ರೈನ್‌ ನದಿಯ ಬಳಿಯಲ್ಲಿದ್ದ ರೋಮನ್‌ ಸೈನ್ಯಗಳ ಸೇನಾಧಿಪತಿಯಾಗಿದ್ದನು. ಸಾ.ಶ. 15ರಲ್ಲಿ ಜರ್ಮ್ಯಾನಿಕಸನು ಜರ್ಮನ್‌ ವೀರನಾಯಕನಾದ ಆರ್‌ಮಿನಿಯಸ್‌ನ ವಿರುದ್ಧ ತನ್ನ ಸೈನ್ಯಗಳನ್ನು ಮುನ್ನಡಿಸಿದನಾದರೂ, ಅವನಿಗೆ ಸಂಪೂರ್ಣ ವಿಜಯ ದೊರಕಲಿಲ್ಲ. ಆದರೂ, ಬಹಳ ಕಷ್ಟದಿಂದ ಕೆಲವೇ ವಿಜಯಗಳನ್ನು ಸಾಧಿಸಲಾಯಿತು, ಮತ್ತು ತದನಂತರ ತಿಬೇರಿಯನು ಜರ್ಮನಿಯಲ್ಲಿನ ಕಾರ್ಯಾಚರಣೆಗಳನ್ನು ನಿಲ್ಲಿಸಿಬಿಟ್ಟನು. ಅದಕ್ಕೆ ಬದಲಾಗಿ, ಆಂತರಿಕ ಯುದ್ಧವನ್ನು ಉಂಟುಮಾಡುವ ಮೂಲಕ, ಜರ್ಮನ್‌ ಕುಲಗಳ ಒಗ್ಗಟ್ಟನ್ನು ಮುರಿಯಲು ಅವನು ಪ್ರಯತ್ನಿಸಿದನು. ತಿಬೇರಿಯನು ರಕ್ಷಣಾತ್ಮಕ ವಿದೇಶೀ ಕಾರ್ಯನೀತಿಯನ್ನು ಇಷ್ಟಪಡುತ್ತಿದ್ದನು, ಆದುದರಿಂದ ಗಡಿಪ್ರದೇಶಗಳನ್ನು ಭದ್ರಪಡಿಸುವ ಕೆಲಸಕ್ಕೆ ಹೆಚ್ಚಿನ ಗಮನಕೊಟ್ಟನು. ಈ ರಕ್ಷಣಾತ್ಮಕ ವಿದೇಶೀ ಕಾರ್ಯನೀತಿಯು ಸಂಪೂರ್ಣವಾಗಿ ಯಶಸ್ವಿಯಾಯಿತು. ಈ ರೀತಿಯಲ್ಲಿ “ದೊಡ್ಡ ದೊಡ್ಡ ಸೈನ್ಯಗಳು” ನಿಯಂತ್ರಿಸಲ್ಪಟ್ಟವು ಮತ್ತು “ಭಗ್ನ”ಗೊಳಿಸಲ್ಪಟ್ಟವು.

11. ‘ಒಡಂಬಡಿಕೆಯ ಅಧಿಪತಿಯು’ ಹೇಗೆ ‘ಭಗ್ನ’ಗೊಳಿಸಲ್ಪಟ್ಟನು?

¹¹ ಭೂಮಿಯ ಎಲ್ಲ ಕುಟುಂಬಗಳನ್ನು ಆಶೀರ್ವದಿಸಲಿಕ್ಕಾಗಿ, ಯೆಹೋವ ದೇವರು ಅಬ್ರಹಾಮನೊಂದಿಗೆ ಮಾಡಿಕೊಂಡಿದ್ದ “ಒಡಂಬಡಿಕೆಯ ಅಧಿಪತಿಯು” ಸಹ “ಭಗ್ನ”ನಾದನು. ಆ ಒಡಂಬಡಿಕೆಯಲ್ಲಿ ವಾಗ್ದಾನಿಸಲ್ಪಟ್ಟ ಅಬ್ರಹಾಮನ ಸಂತಾನವು ಯೇಸು ಕ್ರಿಸ್ತನೇ ಆಗಿದ್ದನು. (ಆದಿಕಾಂಡ 22:18; ಗಲಾತ್ಯ 3:16) ಸಾ.ಶ. 33ರ ನೈಸಾನ್‌ 14ರಂದು, ಯೆರೂಸಲೇಮಿನ ರೋಮನ್‌ ದೇಶಾಧಿಪತಿಯ ಅರಮನೆಯಲ್ಲಿ ಯೇಸು ಪೊಂತ್ಯ ಪಿಲಾತನ ಮುಂದೆ ನಿಂತುಕೊಂಡನು. ಯೇಸುವು ಚಕ್ರವರ್ತಿಯ ವಿರುದ್ಧ ರಾಜದ್ರೋಹ ಗೈದಿದ್ದಾನೆಂಬ ದೋಷಾರೋಪವನ್ನು ಯೆಹೂದಿ ಯಾಜಕರು ಅವನ ಮೇಲೆ ಹೊರಿಸಿದ್ದರು. ಆದರೆ ಯೇಸು ಪಿಲಾತನಿಗೆ ಹೇಳಿದ್ದು: “ನನ್ನ ರಾಜ್ಯವು ಈ ಲೋಕದ್ದಲ್ಲ; . . . ನನ್ನ ರಾಜ್ಯವು ಇಲ್ಲಿಯದಲ್ಲ.” ನಿರ್ದೋಷಿಯಾದ ಯೇಸುವನ್ನು ರೋಮನ್‌ ದೇಶಾಧಿಪತಿಯು ಬಿಟ್ಟುಬಿಡಬಾರದೆಂಬ ಉದ್ದೇಶದಿಂದ ಯೆಹೂದ್ಯರು ಕೂಗಿಹೇಳಿದ್ದು: “ನೀನು ಇವನನ್ನು ಬಿಡಿಸಿದರೆ ನೀನು ಕೈಸರನಿಗೆ ಮಿತ್ರನಲ್ಲ; ತನ್ನನ್ನು ರಾಜನಾಗಿ ಮಾಡಿಕೊಳ್ಳುವವನು ಕೈಸರನಿಗೆ ವಿರೋಧಿ.” ಯೇಸುವನ್ನು ವಧಿಸುವಂತೆ ತಗಾದೆಮಾಡಿದ ಬಳಿಕ ಅವರು ಹೇಳಿದ್ದು: “ಕೈಸರನೇ ಹೊರತು ನಮಗೆ ಬೇರೆ ರಾಜನಿಲ್ಲ.” ಕೈಸರನಿಗೆ ಮಾಡಲ್ಪಡುವ ಯಾವುದೇ ಅವಮಾನವನ್ನು ಹೆಚ್ಚು ಕಟ್ಟುನಿಟ್ಟಾಗಿ ಪರಿಗಣಿಸುವಂತೆ ತಿಬೇರಿಯನು ಜಾರಿಗೆ ತಂದ “ರಾಜದ್ರೋಹದ” ನಿಯಮಕ್ಕನುಸಾರ, ಪಿಲಾತನು ಯೇಸುವನ್ನು “ಭಗ್ನ”ಗೊಳಿಸಲು ಅಥವಾ ಯಾತನಾ ಕಂಬದ ಮೇಲೆ ಶೂಲಕ್ಕೇರಿಸಲು ಒಪ್ಪಿಸಿಕೊಟ್ಟನು.​—⁠ಯೋಹಾನ 18:36; 19:​12-16; ಮಾರ್ಕ 15:​14-20.

ಒಬ್ಬ ಕ್ರೂರ ರಾಜನು ‘ಕುತಂತ್ರಗಳನ್ನು ಕಲ್ಪಿಸುತ್ತಾನೆ’

12. (ಎ) ತಿಬೇರಿಯನೊಂದಿಗೆ ಯಾರು ಒಪ್ಪಂದ ಮಾಡಿಕೊಂಡರು? (ಬಿ) ತಿಬೇರಿಯನು “ಚಿಕ್ಕ ಜನಾಂಗದ ಸಹಾಯದಿಂದ ಏಳಿಗೆಯಾಗಿ ಬಲ”ಗೊಂಡದ್ದು ಹೇಗೆ?

¹² ತಿಬೇರಿಯನ ಕುರಿತು ಇನ್ನೂ ಪ್ರವಾದಿಸುತ್ತಾ ದೇವದೂತನು ಹೇಳಿದ್ದು: “ಅವನ ಸಂಗಡ ಒಪ್ಪಂದಮಾಡಿಕೊಂಡವನಿಗೆ ಕೂಡಲೆ ಮೋಸ ಮಾಡುವನು; ಕೊಂಚ ಜನದ [“ಚಿಕ್ಕ ಜನಾಂಗದ,” NW] ಸಹಾಯದಿಂದ ಏಳಿಗೆಯಾಗಿ ಬಲಗೊಳ್ಳುವನು.” (ದಾನಿಯೇಲ 11:23) ರೋಮನ್‌ ಶಾಸನಸಭೆಯ ಸದಸ್ಯರು, ಸಂವಿಧಾನಬದ್ಧವಾಗಿ ತಿಬೇರಿಯನೊಂದಿಗೆ ‘ಒಪ್ಪಂದಮಾಡಿ’ಕೊಂಡಿದ್ದರೂ, ಅವನು ಮಾತ್ರ ಔಪಚಾರಿಕವಾಗಿ ಅವರ ಮೇಲೆ ಅವಲಂಬಿಸಿದ್ದನು. ಆದರೆ ಅವನು ವಂಚಕನಾಗಿದ್ದು, “ಚಿಕ್ಕ ಜನಾಂಗದ ಸಹಾಯದಿಂದ ಏಳಿಗೆಯಾಗಿ ಬಲ”ಗೊಂಡಿದ್ದನು. ರೋಮನ್‌ ಚಕ್ರವರ್ತಿಯ ಅಂಗರಕ್ಷಕ (ರೋಮನ್‌ ಪ್ರೀಟೋರಿಯನ್‌ ಗಾರ್ಡ್‌) ಸಿಪಾಯಿಗಳೇ ಈ ಚಿಕ್ಕ ಜನಾಂಗವಾಗಿದ್ದರು, ಮತ್ತು ಇವರು ಯೆರೂಸಲೇಮಿನ ಗೋಡೆಗಳ ಸಮೀಪದಲ್ಲೇ ಪಾಳೆಯಮಾಡಿಕೊಂಡಿದ್ದರು. ಇದು ಸಮೀಪವೇ ಇದ್ದುದರಿಂದ ಶಾಸನಸಭೆಗೆ ಭಯ ಉಂಟಾಗಿತ್ತು, ಮತ್ತು ಸಾಮಾನ್ಯ ಜನರಲ್ಲಿ ಯಾರಾದರೂ ತನ್ನ ಅಧಿಕಾರದ ವಿರುದ್ಧ ದಂಗೆಯೇಳುತ್ತಾರೋ ಎಂಬುದನ್ನು ಗಮನಿಸುತ್ತಾ ಇರುವಂತೆ ತಿಬೇರಿಯನಿಗೆ ಸಹಾಯ ಮಾಡಿತು. ಆದುದರಿಂದ, ಸುಮಾರು 10,000 ಅಂಗರಕ್ಷಕ ಸಿಪಾಯಿಗಳ ಸಹಾಯದಿಂದ ತಿಬೇರಿಯನು ಬಲಿಷ್ಠನಾಗಿ ಉಳಿದನು.

13. ಯಾವ ರೀತಿಯಲ್ಲಿ ತಿಬೇರಿಯನು ತನ್ನ ತಂದೆತಾತಂದಿರನ್ನು ಮೀರಿಸಿದ್ದನು?

¹³ ದೇವದೂತನು ಪ್ರವಾದನಾತ್ಮಕವಾಗಿ ಕೂಡಿಸಿದ್ದು: “ನೆಮ್ಮದಿಯ ಕಾಲದಲ್ಲಿ ಸಂಸ್ಥಾನದ ಫಲವತ್ತಾದ ಪ್ರದೇಶಗಳ ಮೇಲೆ ನುಗ್ಗುವನು; ತಂದೆತಾತಂದಿರು ಮಾಡದ ಕಾರ್ಯಗಳನ್ನು ಮಾಡುವನು; ಸೂರೆಸುಲಿಗೆಕೊಳ್ಳೆಹೊಡೆದವುಗಳನ್ನು ತನ್ನವರಿಗೆ ಚೆಲ್ಲಿಬಿಡುವನು; ಕೋಟೆಗಳನ್ನು ಹಿಡಿಯುವ ಕುತಂತ್ರಗಳನ್ನು ಕ್ಲುಪ್ತಕಾಲದ ತನಕ ಕಲ್ಪಿಸುತ್ತಿರುವನು.” (ದಾನಿಯೇಲ 11:24) ತಿಬೇರಿಯನು ತುಂಬ ಸಂದೇಹ ಪ್ರವೃತ್ತಿಯವನಾಗಿದ್ದನು. ಮತ್ತು ಅವನ ಆಳ್ವಿಕೆಯಲ್ಲಿ ಯೋಜಿತ ಕೊಲೆಗಳು ಅತ್ಯಧಿಕವಾಗಿದ್ದವು. ಅರಮನೆಯ ಅಂಗರಕ್ಷಕ ಸಿಪಾಯಿದಳದ ಸೇನಾಧಿಪತಿಯಾಗಿದ್ದ ಸಿಜೇನಸ್‌ನ ಪ್ರಭಾವದಿಂದಲೇ, ತಿಬೇರಿಯನ ಆಳ್ವಿಕೆಯ ಕೊನೆಯ ಭಾಗವು ತುಂಬ ಭಯೋತ್ಪಾದಕವಾಗಿತ್ತು. ಕೊನೆಯದಾಗಿ, ತಿಬೇರಿಯನು ಸಿಜೇನಸನ ಮೇಲೆ ಸಂಶಯಪಟ್ಟು, ಅವನನ್ನೇ ಕೊಲ್ಲಿಸಿಬಿಟ್ಟನು. ಜನರ ಮೇಲೆ ದಬ್ಬಾಳಿಕೆ ನಡೆಸುವುದರಲ್ಲಿ ತಿಬೇರಿಯನು ತನ್ನ ತಂದೆತಾತಂದಿರನ್ನು ಮೀರಿಸಿದ್ದನು.

14. (ಎ) ತಿಬೇರಿಯನು ಹೇಗೆ “ಸೂರೆಸುಲಿಗೆಕೊಳ್ಳೆ”ಗಳನ್ನು ರೋಮನ್‌ ಪ್ರಾಂತಗಳಲ್ಲೆಲ್ಲಾ ಸಿಕ್ಕಾಬಟ್ಟೆ ಚೆಲ್ಲಿಬಿಟ್ಟನು? (ಬಿ) ತಿಬೇರಿಯನು ಮರಣಪಟ್ಟ ಸಮಯದಷ್ಟಕ್ಕೆ ಅವನನ್ನು ಯಾವ ದೃಷ್ಟಿಯಲ್ಲಿ ನೋಡಲಾಯಿತು?

¹⁴ ಆದರೂ, ತಿಬೇರಿಯನು “ಸೂರೆಸುಲಿಗೆಕೊಳ್ಳೆ”ಗಳನ್ನು ರೋಮನ್‌ ಪ್ರಾಂತಗಳಲ್ಲೆಲ್ಲಾ ಸಿಕ್ಕಾಬಟ್ಟೆ ಚೆಲ್ಲಿಬಿಟ್ಟನು. ಅವನು ಸಾಯುವ ಸಮಯದಷ್ಟಕ್ಕೆ ಅವನ ಪ್ರಜೆಗಳೆಲ್ಲರೂ ತುಂಬ ಸಮೃದ್ಧಿಯಿಂದಿದ್ದರು. ಅವರು ಹೆಚ್ಚು ತೆರಿಗೆಗಳನ್ನು ಕೊಡಬೇಕಾಗಿರಲಿಲ್ಲ, ಮತ್ತು ಯಾವ ಕ್ಷೇತ್ರದ ಜನರಿಗೆ ಕಷ್ಟತೊಂದರೆಗಳು ಇದ್ದವೋ ಅವರ ಕಡೆಗೆ ಅವನು ಉದಾರಭಾವದವನಾಗಿದ್ದನು. ಸೈನಿಕರು ಅಥವಾ ಅಧಿಕಾರಿಗಳು ಯಾರ ಮೇಲಾದರೂ ದಬ್ಬಾಳಿಕೆ ನಡಿಸುವಲ್ಲಿ ಅಥವಾ ಯಾವುದೇ ವ್ಯವಹಾರವನ್ನು ನಿರ್ವಹಿಸುವಾಗ ಅವ್ಯವಸ್ಥೆಯನ್ನು ತೋರಿಸುವಲ್ಲಿ, ಚಕ್ರವರ್ತಿಯು ಖಂಡಿತವಾಗಿಯೂ ಅವರ ಮೇಲೆ ದಂಡನೆಯನ್ನು ವಿಧಿಸಸಾಧ್ಯವಿತ್ತು. ಅವನಿಗೆ ಅಧಿಕಾರದ ಮೇಲೆ ಬಲವಾದ ಹಿಡಿತವಿದ್ದದರಿಂದ, ಸಾರ್ವಜನಿಕ ಭದ್ರತೆಯನ್ನು ಕಾಪಾಡಿಕೊಳ್ಳಲು ಸಾಧ್ಯವಾಯಿತು, ಮತ್ತು ಸಂಪರ್ಕ ವ್ಯವಸ್ಥೆಯನ್ನು ಉತ್ತಮಗೊಳಿಸಿದ್ದರಿಂದ ಅದು ವ್ಯಾಪಾರ ವ್ಯವಹಾರಗಳನ್ನು ಹೆಚ್ಚಿಸಿತು. ರೋಮ್‌ನ ಒಳಗೂ ಹೊರಗೂ, ಸರ್ವ ಸಂಗತಿಗಳೂ ನಿಷ್ಪಕ್ಷಪಾತದಿಂದ ಹಾಗೂ ಸಮತೂಕ ರೀತಿಯಲ್ಲಿ ನಡೆಯುತ್ತಿವೆ ಎಂಬುದನ್ನು ತಿಬೇರಿಯನು ಖಚಿತಪಡಿಸಿಕೊಂಡನು. ನಿಯಮಗಳು ಉತ್ತಮಗೊಳಿಸಲ್ಪಟ್ಟವು, ಮತ್ತು ಕೈಸರ್‌ ಅಗಸ್ಟಸ್‌ನು ಜಾರಿಗೆ ತಂದ ಸುಧಾರಣೆಗಳಿಗೆ ಇನ್ನಿತರ ವಿಷಯಗಳನ್ನು ಕೂಡಿಸುವ ಮೂಲಕ ಸಾಮಾಜಿಕ ಹಾಗೂ ನೈತಿಕ ನಿಯಮಾವಳಿಗಳು ವರ್ಧಿಸಲ್ಪಟ್ಟವು. ಆದರೂ, ತಿಬೇರಿಯನು ‘ಕುತಂತ್ರಗಳನ್ನು ಕಲ್ಪಿಸುತ್ತಲೇ’ ಇದ್ದನು. ಆದುದರಿಂದ ರೋಮನ್‌ ಇತಿಹಾಸಕಾರನಾದ ಟ್ಯಾಸಿಟಸ್‌ ಅವನನ್ನು, ಸುಳ್ಳು ಮುಖವಾಡವನ್ನು ಧರಿಸುವುದರಲ್ಲಿ ಚತುರನಾಗಿರುವ ಒಬ್ಬ ಕಪಟಿಯೆಂದು ವರ್ಣಿಸಿದನು. ಸಾ.ಶ. 37ರ ಮಾರ್ಚ್‌ ತಿಂಗಳಿನಲ್ಲಿ ಅವನು ಮರಣಪಟ್ಟಾಗ, ಪ್ರಜೆಗಳ ದೃಷ್ಟಿಯಲ್ಲಿ ಅವನೊಬ್ಬ ಕ್ರೂರ ರಾಜನಾಗಿದ್ದನು.

15. ಸಾ.ಶ. ಮೊದಲನೆಯ ಶತಮಾನದ ಕೊನೆಯಲ್ಲಿ ಹಾಗೂ ಎರಡನೆಯ ಶತಮಾನದ ಆರಂಭ​ದಲ್ಲಿ ರೋಮ್‌ಗೆ ಏನು ಸಂಭವಿಸಿತು?

¹⁵ ಉತ್ತರ ರಾಜನ ಸ್ಥಾನಕ್ಕೆ ಬಂದ ತಿಬೇರಿಯನ ಉತ್ತರಾಧಿಕಾರಿಗಳಲ್ಲಿ, ಗಾಯಸ್‌ ಕೈಸರ್‌ (ಕ್ಯಾಲಿಗುಲ), Iನೆಯ ಕ್ಲಾಡಿಯಸ್‌, ನೀರೊ, ವೆಸ್‌ಪೇಸಿಯನ್‌, ಟೈಟಸ್‌, ಡೊಮಿಷಿಯನ್‌, ನೆರ್ವ, ಟ್ರೇಜನ್‌, ಮತ್ತು ಹೇಡ್ರಿಯನರು ಸೇರಿದ್ದರು. “ಅಗಸ್ಟಸ್‌ನಿಗೆ ಬದಲಾಗಿ ಸಿಂಹಾಸನವೇರಿದ ರಾಜರು, ಬಹುಮಟ್ಟಿಗೆ ಅವನ ಆಡಳಿತ ರೀತಿನೀತಿಯನ್ನು ಹಾಗೂ ಕಟ್ಟಡ ನಿರ್ಮಾಣ ಯೋಜನೆಯನ್ನು ಮುಂದುವರಿಸಿಕೊಂಡು ಹೋದರಾದರೂ, ಅದರಲ್ಲಿ ಅಷ್ಟೇನೂ ಹೊಸ ಮಾರ್ಪಾಡುಗಳನ್ನು ಮಾಡಲಿಲ್ಲ, ಕೇವಲ ಆಡಂಬರವನ್ನು ತೋರ್ಪಡಿಸಿದರು” ಎಂದು ದ ನ್ಯೂ ಎನ್‌ಸೈಕ್ಲೊಪೀಡಿಯ ಬ್ರಿಟ್ಯಾನಿಕ ಹೇಳುತ್ತದೆ. ಅದೇ ಪ್ರಮಾಣಗ್ರಂಥವು ಹೀಗೂ ಹೇಳುತ್ತದೆ: “1ನೆಯ ಶತಮಾನದ ಕೊನೆಯಲ್ಲಿ ಹಾಗೂ 2ನೆಯ ಶತಮಾನದ ಆರಂಭದಲ್ಲಿ, ರೋಮ್‌ ಮಹಾವೈಭವದಿಂದ ಮೆರೆಯಿತು ಮತ್ತು ಅದರ ಜನಸಂಖ್ಯೆಯೂ ಅತ್ಯಧಿಕವಾಗಿತ್ತು.” ಸಾಮ್ರಾಜ್ಯದ ಗಡಿಗಳಲ್ಲಿ ರೋಮ್‌ಗೆ ಕೆಲವಾರು ಸಮಸ್ಯೆಗಳಿದ್ದವಾದರೂ, ಮುಂತಿಳಿಸಲ್ಪಟ್ಟ ದಕ್ಷಿಣ ರಾಜನೊಂದಿಗಿನ ಅದರ ಪ್ರಥಮ ಹೋರಾಟವು, ಸಾ.ಶ. ಮೂರನೆಯ ಶತಮಾನದ ತನಕ ಸಂಭವಿಸಲಿಲ್ಲ.

ದಕ್ಷಿಣ ರಾಜನ ವಿರುದ್ಧ ಎಬ್ಬಿಸಲ್ಪಟ್ಟದ್ದು

16, 17. (ಎ) ದಾನಿಯೇಲ 11:25ರಲ್ಲಿ ಸೂಚಿಸಲ್ಪಟ್ಟಿರುವ ಉತ್ತರ ರಾಜನ ಪಾತ್ರವನ್ನು ಯಾರು ವಹಿಸಿದರು? (ಬಿ) ದಕ್ಷಿಣ ರಾಜನ ಸ್ಥಾನಕ್ಕೆ ಯಾರು ಬಂದರು, ಮತ್ತು ಇದು ಹೇಗೆ ಸಂಭವಿಸಿತು?

¹⁶ ಈ ಕೆಳಗಿನಂತೆ ಹೇಳುತ್ತಾ ದೇವದೂತನು ತನ್ನ ಪ್ರವಾದನೆಯನ್ನು ಮುಂದುವರಿಸಿದನು: “ಅವನು [ಉತ್ತರ ರಾಜನು] ದೊಡ್ಡ ದಂಡೆತ್ತಿ ದಕ್ಷಿಣರಾಜನಿಗೆ ವಿರುದ್ಧವಾಗಿ ತನ್ನ ರಾಜ್ಯದ ಬಲವನ್ನೆಲ್ಲ ಕೂಡಿಸಿ ಧೈರ್ಯತಂದುಕೊಳ್ಳಲು ದಕ್ಷಿಣರಾಜನು [“ತನ್ನನ್ನು ಉತ್ತೇಜಿಸಿಕೊಂಡು,” NW] ಅತ್ಯಧಿಕಬಲವುಳ್ಳ ಮಹಾ ಸೈನ್ಯಸಮೇತನಾಗಿ ಯುದ್ಧಕ್ಕೆ ಹೊರಡುವನು; ಆದರೆ [ಉತ್ತರ ರಾಜನು] ನಿಲ್ಲಲಾರನು; ಅವನು ಸೋಲುವ ಹಾಗೆ ಕುಯುಕ್ತಿಗಳನ್ನು ಕಲ್ಪಿಸುವರು. ಅವನ ಮೃಷ್ಟಾನ್ನವನ್ನು ತಿನ್ನುವವರೇ ಅವನನ್ನು ಭಂಗಪಡಿಸುವರು; ಉತ್ತರರಾಜನ [ಮಿಲಿಟರಿ] ಸೈನ್ಯವು ತುಂಬಿತುಳುಕುವದು [“ಕೊಚ್ಚಿಕೊಂಡುಹೋಗುವುದು,” NW]; ಬಹು ಜನರು ಹತರಾಗಿ ಬೀಳುವರು.”​—⁠ದಾನಿಯೇಲ ​11:​25, 26.

¹⁷ ಆಕ್ಟೇವಿಯನನು ಐಗುಪ್ತವನ್ನು ರೋಮನ್‌ ಪ್ರಾಂತವಾಗಿ ಮಾಡಿ ಸುಮಾರು 300 ವರ್ಷಗಳು ಕಳೆದ ಬಳಿಕ, ರೋಮನ್‌ ಚಕ್ರವರ್ತಿಯಾದ ಆರೀಲಿಯನನು ಉತ್ತರ ರಾಜನ ಸ್ಥಾನವನ್ನು ಪಡೆದುಕೊಂಡನು. ಅಷ್ಟರಲ್ಲಿ, ರೋಮನ್‌ ನೆಲಸುನಾಡಾದ ಪಾಲ್ಮೈರದ ರಾಣಿ ಸೆಪ್ಟಿಮೀಯ ಸೆನೋಬಿಯಳು, ದಕ್ಷಿಣ ರಾಜನ ಸ್ಥಾನವನ್ನು ಆಕ್ರಮಿಸಿದ್ದಳು.a (252ನೆಯ ಪುಟದಲ್ಲಿರುವ “ಸೆನೋಬಿಯ​—⁠ಪಾಲ್ಮೈರದ ಯುದ್ಧವೀರ ರಾಣಿ” ಎಂಬ ಮೇಲ್ಬರಹದ ಕೆಳಗೆ ನೋಡಿ.) ಸಾ.ಶ. 269ರಲ್ಲಿ, ಐಗುಪ್ತವನ್ನು ರೋಮ್‌ಗೋಸ್ಕರ ಭದ್ರವಾಗಿರಿಸುವ ನೆಪವೊಡ್ಡುತ್ತಾ, ಪಾಲ್ಮೈರದ ಸೈನ್ಯವು ಅದನ್ನು ಸ್ವಾಧೀನಪಡಿಸಿಕೊಂಡಿತು. ಸೆನೋಬಿಯಳು ಪಾಲ್ಮೈರವನ್ನು ಪೂರ್ವದಿಕ್ಕಿನ ಒಂದು ಪ್ರಧಾನ ಪಟ್ಟಣವಾಗಿ ಮಾಡಲು ಬಯಸಿದಳು ಹಾಗೂ ರೋಮ್‌ನ ಪೂರ್ವ ಪ್ರಾಂತಗಳನ್ನು ಆಳಲು ಇಷ್ಟಪಟ್ಟಳು. ಅವಳ ಮಹತ್ವಾಕಾಂಕ್ಷೆಯನ್ನು ನೋಡಿ ದಿಗಿಲುಗೊಂಡ ಆರೀಲಿಯನನು, ಸೆನೋಬಿಯಳ ವಿರುದ್ಧ ಹೋರಾಡಲಿಕ್ಕಾಗಿ “ರಾಜ್ಯದ ಬಲವನ್ನೆಲ್ಲ ಕೂಡಿಸಿ ಧೈರ್ಯತಂದು”ಕೊಂಡನು.

18. ಉತ್ತರ ರಾಜನ ಸ್ಥಾನದಲ್ಲಿದ್ದ ಚಕ್ರವರ್ತಿ ಆರೀಲಿಯನ್‌ ಹಾಗೂ ದಕ್ಷಿಣ ರಾಜನ ಸ್ಥಾನದಲ್ಲಿದ್ದ ಸೆನೋಬಿಯಳ ನಡುವಿನ ಹೋರಾಟದ ಫಲಿತಾಂಶವು ಏನಾಗಿತ್ತು?

¹⁸ ದಕ್ಷಿಣ ರಾಜನ ಸ್ಥಾನದಲ್ಲಿದ್ದ ಸೆನೋಬಿಯಳು ಮುಂದಾಳತ್ವವನ್ನು ವಹಿಸಿ, ಯುದ್ಧಕ್ಕಾಗಿ ‘ತನ್ನನ್ನು ಉತ್ತೇಜಿಸಿ’ಕೊಂಡು, ಸಾಬ್‌ದಾಸ್‌ ಹಾಗೂ ಸಾಬೈ ಎಂಬ ಇಬ್ಬರು ಸೇನಾಧಿಪತಿಗಳ ನೇತೃತ್ವದ ಕೆಳಗೆ “ಅತ್ಯಧಿಕಬಲವುಳ್ಳ ಮಹಾ ಸೈನ್ಯಸಮೇತ”ವಾಗಿ ಉತ್ತರ ರಾಜನ ವಿರುದ್ಧ ಹೊರಟಳು. ಆದರೆ ಆರೀಲಿಯನನು ಐಗುಪ್ತವನ್ನು ಸ್ವಾಧೀನಪಡಿಸಿಕೊಂಡು, ಏಷ್ಯಾ ಮೈನರ್‌ ಹಾಗೂ ಸಿರಿಯದ ದಂಡಯಾತ್ರೆಯನ್ನು ಆರಂಭಿಸಿದನು. ಆಗ ಎಮಸ (ಈಗ ಹೋಮ್ಸ್‌) ಎಂಬ ಸ್ಥಳದಲ್ಲಿ ಸೆನೋಬಿಯಳನ್ನು ಸೋಲಿಸಿ, ಪಾಲ್ಮೈರಕ್ಕೆ ಹಿಮ್ಮೆಟ್ಟಲಾಯಿತು. ಆರೀಲಿಯನನು ಪಾಲ್ಮೈರಕ್ಕೆ ಮುತ್ತಿಗೆ ಹಾಕಿದಾಗ, ಸೆನೋಬಿಯಳು ಅದನ್ನು ಧೈರ್ಯದಿಂದ ಎದುರಿಸಿದಳಾದರೂ ಅವಳು ಯಶಸ್ವಿಯಾಗಲಿಲ್ಲ. ಅವಳೂ ಅವಳ ಮಗನೂ ಪರ್ಷಿಯದ ಕಡೆಗೆ ಪಲಾಯನಗೈದರು, ಆದರೆ ಯೂಫ್ರೇಟೀಸ್‌ ನದಿಯ ಬಳಿ ಅವಳು ರೋಮನರಿಂದ ಬಂಧಿಸಲ್ಪಟ್ಟಳು. ಸಾ.ಶ. 272ರಲ್ಲಿ ಪಾಲ್ಮೈರದವರು ತಮ್ಮ ಪಟ್ಟಣವನ್ನು ಒಪ್ಪಿಸಿ ಶರಣಾಗತರಾದರು. ಆರೀಲಿಯನ್‌ ಸೆನೋಬಿಯಳನ್ನು ಕೊಲ್ಲದೆ ಉಳಿಸಿದನು, ಮತ್ತು ಸಾ.ಶ. 274ರಲ್ಲಿ ರೋಮ್‌ನಲ್ಲಿ ನಡೆದ ತನ್ನ ವಿಜಯದ ಮೆರವಣಿಗೆಯಲ್ಲಿ ಅವಳನ್ನು ಪ್ರಮುಖ ಆಕರ್ಷಣೆಯನ್ನಾಗಿ ಮಾಡಿದನು. ಅಲ್ಲಿ ಅವಳು ಒಬ್ಬ ರೋಮನ್‌ ಮನೆವಾರ್ತೆಯವಳಾಗಿ ತನ್ನ ಜೀವಿತದ ಉಳಿದ ಸಮಯಾವಧಿಯನ್ನು ​ಕಳೆದಳು.

19. ತನ್ನ ವಿರುದ್ಧ ‘ಕಲ್ಪಿಸಲಾಗಿದ್ದ ಕುಯುಕ್ತಿಗಳ’ ಕಾರಣದಿಂದ ಆರೀಲಿಯನನು ಹೇಗೆ ಬಿದ್ದುಹೋದನು?

¹⁹ ಆರೀಲಿಯನನು ಸಹ ‘ನಿಲ್ಲಲಿಲ್ಲ, ಏಕೆಂದರೆ ಅವನು ಸೋಲುವ ಹಾಗೆ ಅವನ ವಿರುದ್ಧ ಕುಯುಕ್ತಿಗಳನ್ನು ಕಲ್ಪಿಸಲಾಯಿತು.’ ಸಾ.ಶ. 275ರಲ್ಲಿ, ಅವನು ಪಾರಸಿಯರ ವಿರುದ್ಧ ಒಂದು ದಂಡಯಾತ್ರೆಯನ್ನು ಆರಂಭಿಸಿದನು. ಏಷ್ಯಾ ಮೈನರನ್ನು ಪ್ರವೇಶಿಸಲು ಜಲಸಂಧಿಯನ್ನು ದಾಟುವ ಅವಕಾಶಕ್ಕಾಗಿ ಥ್ರೇಸ್‌ನಲ್ಲಿ ಕಾಯುತ್ತಿದ್ದಾಗ, ‘ಅವನ ಮೃಷ್ಟಾನ್ನವನ್ನು ತಿಂದವರೇ’ ಅವನ ವಿರುದ್ಧ ಒಳಸಂಚುಗಳನ್ನು ನಡೆಸಿ, ಅವನ ಯೋಜನೆಯನ್ನು ‘ಭಂಗಪಡಿಸಿದರು.’ ಈ ಒಳಸಂಚಿನಿಂದ ಕ್ರೋಧಗೊಂಡ ಆರೀಲಿಯನನು ತನ್ನ ಕಾರ್ಯದರ್ಶಿಯಾದ ಇರಾಸ್‌ನಿಗೆ ಶಿಕ್ಷೆ ವಿಧಿಸಲಿದ್ದನು. ಅಷ್ಟರಲ್ಲಿ ಇರಾಸನು ಮರಣದಂಡನೆಗೆ ಗೊತ್ತುಮಾಡಲ್ಪಟ್ಟ ಕೆಲವೊಂದು ಅಧಿಕಾರಿಗಳ ಹೆಸರುಗಳಿದ್ದ ಸುಳ್ಳು ಪಟ್ಟಿಯನ್ನು ಸಿದ್ಧಪಡಿಸಿದನು. ಈ ಪಟ್ಟಿಯನ್ನು ನೋಡಿದ ಅಧಿಕಾರಿಗಳು ಆ ಕೂಡಲೆ ಆರೀಲಿಯನನ್ನು ಕೊಲ್ಲುವ ಹಂಚಿಕೆಯನ್ನು ರೂಪಿಸಿ, ಅವನನ್ನು ಕೊಲ್ಲುವ ಪ್ರಚೋದನೆಗೆ ಒಳಗಾದರು.

20. ಉತ್ತರ ರಾಜನ “ಮಿಲಿಟರಿ ಸೈನ್ಯ”ವು ಹೇಗೆ “ಕೊಚ್ಚಿಕೊಂಡು”ಹೋಯಿತು?

²⁰ ಚಕ್ರವರ್ತಿ ಆರೀಲಿಯನನು ಮರಣಪಟ್ಟ ಕೂಡಲೆ ಉತ್ತರ ರಾಜನ ರಾಜಪರಂಪರೆಯು ಕೊನೆಗೊಳ್ಳಲಿಲ್ಲ. ಬೇರೆ ರೋಮನ್‌ ರಾಜರು ಅವನಿಗೆ ಬದಲಾಗಿ ಆ ಸ್ಥಾನವನ್ನು ಪಡೆದುಕೊಂಡರು. ಸ್ವಲ್ಪ ಸಮಯದ ವರೆಗೆ, ಒಬ್ಬ ಪಶ್ಚಿಮದ ಚಕ್ರವರ್ತಿಯೂ ಒಬ್ಬ ಪೂರ್ವದ ಚಕ್ರವರ್ತಿಯೂ ಸೇರಿಕೊಂಡು ರೋಮನ್‌ ಸಾಮ್ರಾಜ್ಯವನ್ನು ಆಳಿದರು. ಈ ವ್ಯಕ್ತಿಗಳ ನಾಯಕತ್ವದ ಕೆಳಗೆ, ಉತ್ತರ ರಾಜನ ಮಿಲಿಟರಿ ಸೈನ್ಯವು “ಕೊಚ್ಚಿಕೊಂಡು”ಹೋಯಿತು ಅಥವಾ “ಚದುರಿಸಲ್ಪಟ್ಟಿತು.”b ಮತ್ತು ಉತ್ತರದ ಜರ್ಮನ್‌ ಕುಲಗಳಿಂದ ಸತತವಾದ ದಾಳಿಗೆ ಒಳಗಾದುದರಿಂದ ಅನೇಕರು ‘ಹತರಾಗಿ ಬಿದ್ದರು.’ ಸಾ.ಶ. ನಾಲ್ಕನೆಯ ಶತಮಾನದಲ್ಲಿ, ಗಾತ್‌ ಜನರು ರೋಮನ್‌ ಗಡಿ ಪ್ರದೇಶಗಳನ್ನು ಭೇದಿಸಿಕೊಂಡು ಒಳನುಗ್ಗಿದರು. ಒಂದರ ನಂತರ ಇನ್ನೊಂದು ದಾಳಿಗಳು ಮುಂದುವರಿಯುತ್ತಲೇ ಇದ್ದವು. ಸಾ.ಶ. 476ರಲ್ಲಿ, ಜರ್ಮನ್‌ ನಾಯಕನಾದ ಓಡೋಆಸೆರನು ರೋಮನ್ನು ಆಳುತ್ತಿದ್ದ ಕೊನೆಯ ಚಕ್ರವರ್ತಿಯನ್ನು ಅಧಿಕಾರದಿಂದ ಇಳಿಸಿದನು. ಆರನೆಯ ಶತಮಾನದ ಆರಂಭದಷ್ಟಕ್ಕೆ, ಪಶ್ಚಿಮ ಭಾಗದಲ್ಲಿದ್ದ ರೋಮನ್‌ ಸಾಮ್ರಾಜ್ಯವು ಸಂಪೂರ್ಣವಾಗಿ ಧ್ವಂಸಗೊಂಡಿತ್ತು, ಮತ್ತು ಇಟಲಿ, ಉತ್ತರ ಆಫ್ರಿಕ, ಗಾಲ್‌, ಬ್ರಿಟ್ಯಾನಿಯ ಹಾಗೂ ಸ್ಪೆಯ್ನ್‌ಗಳನ್ನು ಜರ್ಮನ್‌ ರಾಜರು ಆಳುತ್ತಿದ್ದರು. ರೋಮನ್‌ ಸಾಮ್ರಾಜ್ಯದ ಪೂರ್ವ ಭಾಗವು, 15ನೆಯ ಶತಮಾನದ ತನಕವೂ ಅಸ್ತಿತ್ವದಲ್ಲಿತ್ತು.

ಒಂದು ದೊಡ್ಡ ಸಾಮ್ರಾಜ್ಯವು ವಿಭಾಗಿಸಲ್ಪಡುತ್ತದೆ

21, 22. ಸಾ.ಶ. ನಾಲ್ಕನೆಯ ಶತಮಾನದಲ್ಲಿ ಕಾನ್‌ಸ್ಟೆಂಟೀನನು ಯಾವ ಬದಲಾವಣೆಗಳನ್ನು ಜಾರಿಗೆ ತಂದನು?

²¹ ಯೆಹೋವನ ದೂತನು, ಅನೇಕ ಶತಮಾನಗಳ ವರೆಗೆ ಅಸ್ತಿತ್ವದಲ್ಲಿದ್ದಂತಹ ರೋಮನ್‌ ಸಾಮ್ರಾಜ್ಯದ ಕುಸಿತದ ಕುರಿತು ಅನಗತ್ಯವಾದ ಯಾವುದೇ ವಿವರಗಳನ್ನು ಕೊಡದೆ, ಉತ್ತರ ರಾಜ ಹಾಗೂ ದಕ್ಷಿಣ ರಾಜನ ಇನ್ನೂ ಹೆಚ್ಚಿನ ಶೋಷಣೆಗಳ ಕುರಿತು ಮುಂತಿಳಿಸತೊಡಗಿದನು. ಏನೇ ಆಗಲಿ, ರೋಮನ್‌ ಸಾಮ್ರಾಜ್ಯದಲ್ಲಿ ಉಂಟಾದ ಕೆಲವು ವಿಕಸನಗಳ ಕುರಿತಾದ ಪುನರ್ವಿಮರ್ಶೆಯು, ಕಾಲಾನಂತರ ಬರಲಿದ್ದ ಇಬ್ಬರು ಪ್ರತಿಸ್ಪರ್ಧಿ ರಾಜರನ್ನು ಗುರುತಿಸುವಂತೆ ನಮಗೆ ಸಹಾಯ ಮಾಡುವುದು.

²² ನಾಲ್ಕನೆಯ ಶತಮಾನದಲ್ಲಿ, ರೋಮನ್‌ ಚಕ್ರವರ್ತಿಯಾದ ಕಾನ್‌ಸ್ಟೆಂಟೀನನು ಧರ್ಮಭ್ರಷ್ಟ ಕ್ರೈಸ್ತಮತಕ್ಕೆ ಸರಕಾರದ ಮನ್ನಣೆಯನ್ನು ನೀಡಿದನು. ಸಾ.ಶ. 325ರಲ್ಲಿ, ಏಷ್ಯಾ ಮೈನರ್‌ನ ನೈಸೀಯದಲ್ಲಿ ಚರ್ಚಿನ ಒಂದು ಮಹಾ ಸಭೆಯನ್ನು ಒಟ್ಟುಗೂಡಿಸಿ, ವೈಯಕ್ತಿಕವಾಗಿ ಅದರ ಮೇಲ್ವಿಚಾರಣೆಯನ್ನು ನಡೆಸಿದನು. ತದನಂತರ, ಕಾನ್‌ಸ್ಟೆಂಟೀನನು ತನ್ನ ರಾಜಭವನವನ್ನು ರೋಮ್‌ನಿಂದ ಬೈಸ್ಯಾಂಟಿಯಮ್‌ಗೆ ಅಥವಾ ಕಾನ್‌ಸ್ಟೆಂಟಿನೋಪಲ್‌ಗೆ ಸ್ಥಳಾಂತರಿಸಿ, ಆ ಪಟ್ಟಣವನ್ನು ತನ್ನ ಹೊಸ ರಾಜಧಾನಿಯನ್ನಾಗಿ ಮಾಡಿಕೊಂಡನು. ಸಾ.ಶ. 395ರ ಜನವರಿ 17ರಂದು ಚಕ್ರವರ್ತಿ Iನೆಯ ಥಿಯೊಡೋಸಿಯಸನ ಮರಣದ ತನಕ, ರೋಮನ್‌ ಸಾಮ್ರಾಜ್ಯವು ಏಕಮಾತ್ರ ಚಕ್ರವರ್ತಿಯ ಆಳ್ವಿಕೆಯ ಕೆಳಗೆ ಮುಂದುವರಿಯಿತು.

23. (ಎ) ಥಿಯೊಡೋಸಿಯಸ್‌ನ ಮರಣಾನಂತರ ರೋಮನ್‌ ಸಾಮ್ರಾಜ್ಯದಲ್ಲಿ ಯಾವ ವಿಭಜನೆಯು ಉಂಟಾಯಿತು? (ಬಿ) ಪೂರ್ವ ಭಾಗದ ಸಾಮ್ರಾಜ್ಯವು ಯಾವಾಗ ಕೊನೆಗೊಂಡಿತು? (ಸಿ) ಯಾರು 1517ರಷ್ಟಕ್ಕೆ ಐಗುಪ್ತವನ್ನು ಆಳುತ್ತಿದ್ದರು?

²³ ಥಿಯೊಡೋಸಿಯಸ್‌ನ ಮರಣಾನಂತರ ರೋಮನ್‌ ಸಾಮ್ರಾಜ್ಯವು ಅವನ ಪುತ್ರರ ಮಧ್ಯೆ ಹಂಚಿಹೋಯಿತು. ಹನೋರಿಯಸನಿಗೆ ಪಶ್ಚಿಮ ಭಾಗವು ಸಿಕ್ಕಿತು, ಮತ್ತು ಆರ್ಕೇಡಿಯಸ್‌ನಿಗೆ ಪೂರ್ವ ಭಾಗವು ಸಿಕ್ಕಿತು ಹಾಗೂ ಕಾನ್‌ಸ್ಟೆಂಟಿನೋಪಲ್‌ ಅವನ ರಾಜಧಾನಿಯಾಗಿ ಪರಿಣಮಿಸಿತು. ಬ್ರಿಟ್ಯಾನಿಯ, ಗಾಲ್‌, ಇಟಲಿ, ಸ್ಪೆಯ್ನ್‌, ಮತ್ತು ಉತ್ತರ ಆಫ್ರಿಕಗಳು, ಪಶ್ಚಿಮ ವಿಭಾಗಕ್ಕೆ ಸೇರಿದ್ದ ಪ್ರಾಂತಗಳಾಗಿದ್ದವು. ಮ್ಯಾಸಿಡೋನಿಯ, ಥ್ರೇಸ್‌, ಏಷ್ಯಾ ಮೈನರ್‌, ಸಿರಿಯ, ಹಾಗೂ ಐಗುಪ್ತಗಳು, ಪೂರ್ವ ವಿಭಾಗಕ್ಕೆ ಸೇರಿದ್ದ ಪ್ರಾಂತಗಳಾಗಿದ್ದವು. ಸಾ.ಶ. 642ರಲ್ಲಿ, ಐಗುಪ್ತದ ರಾಜಧಾನಿಯಾಗಿದ್ದ ಆ್ಯಲೆಕ್ಸಾಂಡ್ರಿಯವು ಅರಬ್‌ ಜನರ (ಸಾರಸೆನ್‌ರ) ವಶವಾಯಿತು, ಮತ್ತು ಐಗುಪ್ತವು ಕಲೀಫರ ಪ್ರಾಂತವಾಗಿ ಪರಿಣಮಿಸಿತು. 1449ರ ಜನವರಿ ತಿಂಗಳಿನಲ್ಲಿ, XIನೆಯ ಕಾನ್‌ಸ್ಟೆಂಟೀನನು ಪೂರ್ವ ಭಾಗದ ಕೊನೆಯ ಚಕ್ರವರ್ತಿಯಾದನು. 1453ರ ಮೇ 29ರಂದು, IIನೆಯ ಸುಲ್ತಾನ್‌ ಮೆಮೆಟ್‌ನ ನಾಯಕತ್ವದ ಕೆಳಗೆ ಆಟೊಮನ್‌ ತುರ್ಕರು ಕಾನ್‌ಸ್ಟೆಂಟಿನೋಪಲನ್ನು ವಶಪಡಿಸಿಕೊಂಡರು. ಹೀಗೆ ಪೂರ್ವ ಭಾಗದ ರೋಮನ್‌ ಸಾಮ್ರಾಜ್ಯವು ಕೊನೆಗೊಂಡಿತು. 1517ನೆಯ ವರ್ಷದಲ್ಲಿ ಐಗುಪ್ತವು ಟರ್ಕಿಯ ಪ್ರಾಂತವಾಗಿ ಪರಿಣಮಿಸಿತು. ಆದರೂ, ಪುರಾತನ ದಕ್ಷಿಣ ರಾಜನಿಗೆ ಸೇರಿದ್ದ ಈ ದೇಶವು, ಸಕಾಲದಲ್ಲಿ ಪಶ್ಚಿಮ ಭಾಗದಿಂದ ಬಂದ ಇನ್ನೊಂದು ಸಾಮ್ರಾಜ್ಯಕ್ಕೆ ಅಧೀನವಾಗಲಿತ್ತು.

24, 25. (ಎ) ಕೆಲವು ಇತಿಹಾಸಕಾರರಿಗನುಸಾರ, ಪವಿತ್ರ ರೋಮನ್‌ ಸಾಮ್ರಾಜ್ಯದ ಆರಂಭವನ್ನು ಯಾವುದು ಗುರುತಿಸಿತು? (ಬಿ) ಪವಿತ್ರ ರೋಮನ್‌ ಸಾಮ್ರಾಜ್ಯದ “ಚಕ್ರವರ್ತಿ” ಎಂಬ ಬಿರುದಿಗೆ ಅಂತಿಮವಾಗಿ ಏನು ಸಂಭವಿಸಿತು?

²⁴ ರೋಮನ್‌ ಸಾಮ್ರಾಜ್ಯದ ಪಶ್ಚಿಮ ಪಾರ್ಶ್ವದಲ್ಲಿ, ರೋಮ್‌ನ ಕ್ಯಾಥೊಲಿಕ್‌ ಬಿಷಪರು ಅಧಿಕಾರಕ್ಕೆ ಬಂದರು. ಅವರಲ್ಲಿ ವಿಶೇಷವಾಗಿ Iನೆಯ ಪೋಪ್‌ ಲಿಯೋ ಒಬ್ಬನಾಗಿದ್ದು, ಸಾ.ಶ. ಐದನೆಯ ಶತಮಾನದಲ್ಲಿ ಪೋಪರ ಅಧಿಕಾರವನ್ನು ಸಮರ್ಥಿಸಿದ್ದಕ್ಕಾಗಿ ಬಹಳ ಹೆಸರುವಾಸಿಯಾಗಿದ್ದನು. ಸ್ವಲ್ಪ ಸಮಯದ ನಂತರ, ಪಶ್ಚಿಮ ಭಾಗದ ಚಕ್ರವರ್ತಿಗೆ ರಾಜ್ಯಾಭಿಷೇಕಮಾಡುವ ಹಕ್ಕನ್ನು ಈ ಪೋಪ್‌ ತನ್ನದಾಗಿ ಮಾಡಿಕೊಂಡನು. ಇದು ಸಾ.ಶ. 800ರ ಕ್ರಿಸ್‌ಮಸ್‌ ದಿನದಂದು ರೋಮ್‌ನಲ್ಲಿ ಸಂಭವಿಸಿತು; ಅಂದು IIIನೆಯ ಪೋಪ್‌ ಲಿಯೋ, ಫ್ರ್ಯಾಂಕರ ರಾಜನಾದ ಚಾರ್ಲ್ಸ್‌ (ಶಾಲ್‌ಮೇನ್‌)ನನ್ನು ಹೊಸ ಪಶ್ಚಿಮ ರೋಮನ್‌ ಸಾಮ್ರಾಜ್ಯದ ಚಕ್ರವರ್ತಿಯನ್ನಾಗಿ ರಾಜ್ಯಾಭಿಷೇಕ ಮಾಡಿದನು. ಈ ಕಿರೀಟಧಾರಣೆಯು, ರೋಮ್‌ನಲ್ಲಿ ಚಕ್ರವರ್ತಿ ಸ್ಥಾನವನ್ನು ಮತ್ತೆ ಆರಂಭಿಸಿತು. ಮತ್ತು ಕೆಲವು ಇತಿಹಾಸಕಾರರು ಹೇಳುವಂತೆ, ಈ ಘಟನೆಯು ಪವಿತ್ರ ರೋಮನ್‌ ಸಾಮ್ರಾಜ್ಯದ ಆರಂಭವನ್ನೂ ಗುರುತಿಸಿತು. ಅಂದಿನಿಂದ ಪೂರ್ವ ಸಾಮ್ರಾಜ್ಯ ಮತ್ತು ಪಶ್ಚಿಮದಲ್ಲಿ ಪವಿತ್ರ ರೋಮನ್‌ ಸಾಮ್ರಾಜ್ಯವು ಅಸ್ತಿತ್ವಕ್ಕೆ ಬಂದವು; ಈ ಎರಡೂ ಸಾಮ್ರಾಜ್ಯಗಳು ತಾವು ಕ್ರೈಸ್ತಧರ್ಮಕ್ಕೆ ಸೇರಿದ್ದೇವೆ ಎಂದು ಹೇಳಿಕೊಳ್ಳುತ್ತಿದ್ದವು.

²⁵ ಸಮಯ ಕಳೆದಂತೆ, ಶಾಲ್‌ಮೇನ್‌ನ ಉತ್ತರಾಧಿಕಾರಿಗಳು ಕೆಲಸಕ್ಕೆ ಬಾರದಂತಹ ರಾಜರಾಗಿ ಕಂಡುಬಂದರು. ಸ್ವಲ್ಪಕಾಲದ ವರೆಗೆ ಚಕ್ರವರ್ತಿಯ ಸ್ಥಾನವು ಖಾಲಿಯಾಗಿ ಬಿದ್ದಿತ್ತು. ಈ ಮಧ್ಯೆ, ಇಟಲಿಯ ಉತ್ತರಭಾಗ ಹಾಗೂ ಮಧ್ಯಭಾಗವು ಜರ್ಮನ್‌ ರಾಜನಾದ Iನೆಯ ಆಟೊನ ಅಧೀನದಲ್ಲಿತ್ತು. ತಾನೇ ಇಟಲಿಯ ರಾಜನಾಗಿದ್ದೇನೆ ಎಂದು ಅವನು ಘೋಷಿಸಿಬಿಟ್ಟನು. ಸಾ.ಶ. 962ರ ಫೆಬ್ರವರಿ 2ರಂದು, XIIನೆಯ ಪೋಪ್‌ ಜಾನ್‌, Iನೆಯ ಆಟೊನನ್ನು ಪವಿತ್ರ ರೋಮನ್‌ ಸಾಮ್ರಾಜ್ಯದ ಚಕ್ರವರ್ತಿಯನ್ನಾಗಿ ಪಟ್ಟಾಭಿಷೇಕಿಸಿದನು. ಅದರ ರಾಜಧಾನಿಯು ಜರ್ಮನಿಯಲ್ಲಿತ್ತು, ಮತ್ತು ಅದರ ಚಕ್ರವರ್ತಿಗಳು ಜರ್ಮನರಾಗಿದ್ದರು, ಹಾಗೆಯೇ ಅದರ ಅಧಿಕಾಂಶ ಪ್ರಜೆಗಳೂ ಜರ್ಮನರೇ ಆಗಿದ್ದರು. ಐದು ಶತಮಾನಗಳ ಬಳಿಕ, ಆಸ್ಟ್ರಿಯದ ಹ್ಯಾಪ್ಸ್‌ಬರ್ಗ್‌ ರಾಜಮನೆತನವು “ಚಕ್ರವರ್ತಿ”ಯ ಬಿರುದನ್ನು ಪಡೆದುಕೊಂಡಿತು ಮತ್ತು ಪವಿತ್ರ ರೋಮನ್‌ ಸಾಮ್ರಾಜ್ಯದ ಉಳಿದ ವರ್ಷಗಳಲ್ಲೆಲ್ಲ ಅದು ತನ್ನ ಈ ಸ್ಥಾನವನ್ನು ಕಾಪಾಡಿಕೊಂಡಿತು.

ಇಬ್ಬರು ಅರಸರು ಪುನಃ ಸ್ಪಷ್ಟವಾಗಿ ತೋರಿಬರುತ್ತಾರೆ

26. (ಎ) ಪವಿತ್ರ ರೋಮನ್‌ ಸಾಮ್ರಾಜ್ಯದ ಅಂತ್ಯದ ಕುರಿತು ಏನು ಹೇಳಸಾಧ್ಯವಿದೆ? (ಬಿ) ಉತ್ತರ ರಾಜನೋಪಾದಿ ಯಾರು ಅಧಿಕಾರಕ್ಕೆ ಬಂದರು?

²⁶ ಇಸವಿ 1805ರ ಸಮಯಾವಧಿಯಲ್ಲಿ, Iನೆಯ ನೆಪೋಲಿಯನನು ಜರ್ಮನಿಯಲ್ಲಿ ಅನೇಕ ವಿಜಯಗಳನ್ನು ಪಡೆದುಕೊಂಡ ಬಳಿಕ, ಪವಿತ್ರ ರೋಮನ್‌ ಸಾಮ್ರಾಜ್ಯದ ಅಸ್ತಿತ್ವವನ್ನು ಅಂಗೀಕರಿಸಲು ನಿರಾಕರಿಸಿದಾಗ, ಅದಕ್ಕೆ ಒಂದು ಮಾರಕ ಹೊಡೆತವನ್ನು ಕೊಟ್ಟನು. ತನ್ನ ಸಿಂಹಾಸನವನ್ನು ಸಂರಕ್ಷಿಸಿಕೊಳ್ಳಲು ಅಸಮರ್ಥನಾದ IIನೆಯ ಫ್ರಾನ್ಸಿಸ್‌ ಎಂಬ ಚಕ್ರವರ್ತಿಯು, 1806ರ ಆಗಸ್ಟ್‌ 6ರಂದು ರೋಮ್‌ನ ಸಾಮ್ರಾಟ ಪದವಿಗೆ ರಾಜೀನಾಮೆ ಕೊಟ್ಟು, ಆಸ್ಟ್ರಿಯದ ಚಕ್ರವರ್ತಿಯೋಪಾದಿ ತನ್ನ ರಾಷ್ಟ್ರೀಯ ಸರಕಾರಕ್ಕೆ ಹಿಂದಿರುಗಿದನು. IIIನೆಯ ಲಿಯೋ ಎಂಬ ರೋಮನ್‌ ಕ್ಯಾಥೊಲಿಕ್‌ ಪೋಪನಿಂದ ಮತ್ತು ಫ್ರ್ಯಾಂಕರ ರಾಜ ಶಾಲ್‌ಮೇನ್‌ನಿಂದ ಸ್ಥಾಪಿಸಲ್ಪಟ್ಟ ಪವಿತ್ರ ರೋಮನ್‌ ಸಾಮ್ರಾಜ್ಯವು, 1,006 ವರ್ಷಗಳ ಬಳಿಕ ಸಂಪೂರ್ಣವಾಗಿ ಕೊನೆಗೊಂಡಿತು. 1870ರಲ್ಲಿ ಇಟಲಿಯು, ವ್ಯಾಟಿಕನಿನ ರೋಮನ್‌ ಪೋಪರಿಂದ ಸ್ವತಂತ್ರವಾದ ಒಂದು ರಾಜ್ಯವಾಗಿ ಪರಿಣಮಿಸಿತು. ಮುಂದಿನ ವರ್ಷ, Iನೆಯ ವಿಲ್‌ಹೆಲ್ಮ್‌ನನ್ನು ಕೈಸರನನ್ನಾಗಿ ಮಾಡುವ ಮೂಲಕ ಜರ್ಮನಿಯ ಸಾಮ್ರಾಜ್ಯವು ಆರಂಭಗೊಂಡಿತು. ಹೀಗೆ, ಆಧುನಿಕ ದಿನದ ಉತ್ತರ ರಾಜನಾಗಿರುವ ಜರ್ಮನಿಯು, ಲೋಕ ರಂಗವನ್ನು ಪ್ರವೇಶಿಸಿತು.

27. (ಎ) ಐಗುಪ್ತವು ಹೇಗೆ ಬ್ರಿಟಿಷ್‌ ರಕ್ಷಿತ ಸಂಸ್ಥಾನವಾಗಿ ಪರಿಣಮಿಸಿತು? (ಬಿ) ದಕ್ಷಿಣ ರಾಜನ ಸ್ಥಾನಕ್ಕೆ ಯಾರು ಬಂದರು?

²⁷ ಆದರೆ ಆಧುನಿಕ ದಿನದ ದಕ್ಷಿಣ ರಾಜನ ಸ್ವರೂಪವು ಯಾವುದಾಗಿತ್ತು? 17ನೆಯ ಶತಮಾನದಲ್ಲಿ ಗ್ರೇಟ್‌ ಬ್ರಿಟನ್‌, ಸಾಮ್ರಾಜ್ಯದ ಅಧಿಕಾರವನ್ನು ಪಡೆದುಕೊಂಡಿತು ಎಂದು ಇತಿಹಾಸವು ತೋರಿಸುತ್ತದೆ. ಬ್ರಿಟಿಷರ ವ್ಯಾಪಾರ ಮಾರ್ಗಗಳನ್ನು ನಾಶಮಾಡಲು ಬಯಸುತ್ತಾ, Iನೆಯ ನೆಪೋಲಿಯನನು 1798ರಲ್ಲಿ ಐಗುಪ್ತವನ್ನು ವಶಪಡಿಸಿಕೊಂಡನು. ಇದರ ಪರಿಣಾಮವಾಗಿ ಯುದ್ಧವು ತಲೆದೋರಿತು, ಮತ್ತು ಬ್ರಿಟಿಷ್‌-ಆಟೊಮನ್‌ ಒಕ್ಕೂಟವು, ಹೋರಾಟದ ಆರಂಭದಲ್ಲಿ ದಕ್ಷಿಣ ರಾಜನೆಂದು ಗುರುತಿಸಲ್ಪಟ್ಟಿದ್ದ ಐಗುಪ್ತದಿಂದ ಹಿಂದಿರುಗುವಂತೆ ಆ ಫ್ರೆಂಚರನ್ನು ಒತ್ತಾಯಿಸಿತು. ಮುಂದಿನ ಶತಮಾನದಲ್ಲಿ, ಐಗುಪ್ತದಲ್ಲಿನ ಬ್ರಿಟಿಷ್‌ ಪ್ರಭಾವವು ಇನ್ನೂ ಹೆಚ್ಚಾಯಿತು. 1882ರ ನಂತರ, ನಿಜವಾಗಿಯೂ ಐಗುಪ್ತವು ಬ್ರಿಟನಿನ ಒಂದು ಸಾಮಂತ ರಾಷ್ಟ್ರವಾಗಿ ಪರಿಣಮಿಸಿತ್ತು. 1914ರಲ್ಲಿ Iನೆಯ ಲೋಕ ಯುದ್ಧವು ಆರಂಭಗೊಂಡಾಗ, ಐಗುಪ್ತವು ಟರ್ಕಿಗೆ ಸೇರಿದ್ದಾಗಿದ್ದು, ಒಬ್ಬ ಖಡೀವ್‌ ಅಥವಾ ವೈಸ್‌ರಾಯ್‌ ಅದನ್ನು ಆಳುತ್ತಿದ್ದನು. ಆದರೂ, ಆ ಯುದ್ಧದಲ್ಲಿ ಟರ್ಕಿಯು ಜರ್ಮನಿಯ ಪಕ್ಷ ವಹಿಸಿದಾಗ, ಬ್ರಿಟಿಷರು ಖಡೀವ್‌ನನ್ನು ಅಧಿಕಾರದಿಂದ ತೆಗೆದುಹಾಕಿ, ಐಗುಪ್ತವನ್ನು ಒಂದು ಬ್ರಿಟಿಷ್‌ ರಕ್ಷಿತ ಸಂಸ್ಥಾನವೆಂದು ಘೋಷಿಸಿದರು. ಕಾಲಕ್ರಮೇಣ ಬ್ರಿಟನ್‌ ಹಾಗೂ ಅಮೆರಿಕಗಳು ನಿಕಟವಾದ ಸಂಬಂಧಗಳನ್ನು ರೂಪಿಸಿಕೊಂಡು, ಆ್ಯಂಗ್ಲೊ-ಅಮೆರಿಕನ್‌ ಲೋಕ ಶಕ್ತಿಯಾಗಿ ಪರಿಣಮಿಸಿದವು. ಇವೆರಡೂ ಒಟ್ಟಾಗಿಯೇ ದಕ್ಷಿಣ ರಾಜನ ಸ್ಥಾನವನ್ನು ಆಕ್ರಮಿಸಿದವು.

[ಅಧ್ಯಯನ ಪ್ರಶ್ನೆಗಳು]

ನೀವೇನನ್ನು ಗ್ರಹಿಸಿದಿರಿ?

• ಯಾವ ರೋಮನ್‌ ಚಕ್ರವರ್ತಿಯು ಮೊದಲನೆಯ ಉತ್ತರ ರಾಜನಾಗಿ ಅಧಿಕಾರಕ್ಕೆ ಬಂದನು, ಮತ್ತು ಅವನು ಒಬ್ಬ “ವಸೂಲಿಗಾರ”ನನ್ನು ಯಾವಾಗ ಕಳುಹಿಸಿದನು?

• ಅಗಸ್ಟಸ್‌ನ ಮರಣಾನಂತರ ಉತ್ತರ ರಾಜನ ಸ್ಥಾನಕ್ಕೆ ಯಾರು ಬಂದರು, ಮತ್ತು ‘ಒಡಂಬಡಿಕೆಯ ಅಧಿಪತಿ’ಯು ಹೇಗೆ ಭಗ್ನಗೊಳಿಸಲ್ಪಟ್ಟನು?

• ಉತ್ತರ ರಾಜನ ಸ್ಥಾನದಲ್ಲಿದ್ದ ಆರೀಲಿಯನ್‌ ಹಾಗೂ ದಕ್ಷಿಣ ರಾಜನ ಸ್ಥಾನದಲ್ಲಿದ್ದ ಸೆನೋಬಿಯಳ ನಡುವಿನ ಹೋರಾಟದ ಫಲಿತಾಂಶವು ​ಏನಾಗಿತ್ತು?

• ರೋಮನ್‌ ಸಾಮ್ರಾಜ್ಯಕ್ಕೆ ಏನು ಸಂಭವಿಸಿತು, ಮತ್ತು 19ನೆಯ ಶತಮಾನದ ಅಂತ್ಯದಷ್ಟಕ್ಕೆ ಇಬ್ಬರು ರಾಜರ ಸ್ಥಾನಗಳಲ್ಲಿ ಯಾವ ಲೋಕ ಶಕ್ತಿಗಳು ಇದ್ದವು?

[Box/Picture on page 248-251]

ಒಬ್ಬನು ಗೌರವಿಸಲ್ಪಟ್ಟನು, ಮತ್ತೊಬ್ಬನು ಕಡೆಗಣಿಸಲ್ಪಟ್ಟನು

ಒಬ್ಬನು, ಕಲಹದಿಂದ ಕೂಡಿದ್ದ ಪ್ರಜಾಧಿಪತ್ಯವನ್ನು ಒಂದು ಲೋಕ ಸಾಮ್ರಾಜ್ಯವನ್ನಾಗಿ ಮಾರ್ಪಡಿಸಿದನು. ಇನ್ನೊಬ್ಬನು 23 ವರ್ಷಗಳಲ್ಲಿ ಆ ಸಾಮ್ರಾಜ್ಯದ ಐಶ್ವರ್ಯವನ್ನು ಇಪ್ಪತ್ತು ಪಟ್ಟು ಹೆಚ್ಚಿಸಿದನು. ಒಬ್ಬನು ಮೃತಪಟ್ಟಾಗ ಗೌರವಿಸಲ್ಪಟ್ಟನು, ಆದರೆ ಇನ್ನೊಬ್ಬನು ಕಡೆಗಣಿಸಲ್ಪಟ್ಟನು. ಈ ಇಬ್ಬರು ಚಕ್ರವರ್ತಿಗಳ ಆಳ್ವಿಕೆಯು, ಯೇಸುವಿನ ಜೀವನ ಮತ್ತು ಶುಶ್ರೂಷೆಯ ಕಾಲಾವಧಿಯಲ್ಲಿ ನಡೆಯಿತು. ಅವರು ಯಾರಾಗಿದ್ದರು? ಮತ್ತು ಒಬ್ಬನನ್ನು ಗೌರವಿಸಿ, ಇನ್ನೊಬ್ಬನನ್ನು ಏಕೆ ಕಡೆಗಣಿಸಲಾಯಿತು?

ಅವನು ‘ಇಟ್ಟಿಗೆಯಿಂದ ಕಟ್ಟಲ್ಪಟ್ಟಿದ್ದ ರೋಮ್‌ ನಗರವನ್ನು ಅಮೃತಶಿಲೆಯ ನಗರವಾಗಿ ಮಾರ್ಪಡಿಸಿದನು’

ಸಾ.ಶ.ಪೂ. 44ರಲ್ಲಿ ಜೂಲಿಯಸ್‌ ಸೀಸರನು ಹತಿಸಲ್ಪಟ್ಟಾಗ, ಅವನ ಸಹೋದರಿಯ ಮೊಮ್ಮಗನಾದ ಗಾಯಸ್‌ ಆಕ್ಟೇವಿಯನ್‌ ಕೇವಲ 18 ವರ್ಷ ಪ್ರಾಯದವನಾಗಿದ್ದನು. ಜೂಲಿಯಸ್‌ ಸೀಸರನ ದತ್ತುಪುತ್ರನೂ ಅವನ ನಂತರ ಸಿಂಹಾಸನದ ಪ್ರಮುಖ ಬಾಧ್ಯಸ್ಥನೂ ಆಗಿದ್ದ ಯುವ ಆಕ್ಟೇವಿಯನನು, ಉತ್ತರಾಧಿಕಾರವನ್ನು ವಹಿಸಲು ಆ ಕೂಡಲೆ ರೋಮ್‌ಗೆ ಹೋದನು. ಅಲ್ಲಿ ಅವನು ಜಯಿಸಲು ಅಸಾಧ್ಯವಾದಂತಹ ಒಬ್ಬ ವಿರೋಧಿಯನ್ನು ಎದುರಿಸಬೇಕಾಯಿತು. ಜೂಲಿಯಸ್‌ ಸೀಸರನ ಮುಖ್ಯ ಅಧಿಕಾರಿಯಾದ ಮಾರ್ಕ್‌ ಆ್ಯಂಟನಿಯೇ ಅವನಾಗಿದ್ದು, ತಾನೇ ಸಿಂಹಾಸನಕ್ಕೆ ಪ್ರಧಾನ ಬಾಧ್ಯಸ್ಥನಾಗಲಿದ್ದೇನೆ ಎಂದು ಅವನು ನೆನಸಿದ್ದನು. ಇದರ ಪರಿಣಾಮವಾಗಿ ಉಂಟಾದ ರಾಜಕೀಯ ಒಳಸಂಚು ಹಾಗೂ ಅಧಿಕಾರಕ್ಕಾಗಿರುವ ಹೋರಾಟವು 13 ವರ್ಷಗಳ ವರೆಗೆ ನಡೆಯಿತು.

ಐಗುಪ್ತದ ರಾಣಿ ಕ್ಲಿಯೋಪಾತ್ರ ಹಾಗೂ ಅವಳ ಪ್ರಿಯಕರನಾದ ಮಾರ್ಕ್‌ ಆ್ಯಂಟನಿಯ ಸೈನ್ಯಗಳನ್ನು ಸೋಲಿಸಿದ (ಸಾ.ಶ.ಪೂ. 31ರಲ್ಲಿ) ಬಳಿಕವೇ ಆಕ್ಟೇವಿಯನನು ರೋಮನ್‌ ಸಾಮ್ರಾಜ್ಯದ ಅಂಗೀಕೃತ ರಾಜನಾದನು. ಮುಂದಿನ ವರ್ಷ ಆ್ಯಂಟನಿ ಹಾಗೂ ಕ್ಲಿಯೋಪಾತ್ರರು ಆತ್ಮಹತ್ಯೆಮಾಡಿಕೊಂಡಾಗ, ಆಕ್ಟೇವಿಯನನು ಐಗುಪ್ತವನ್ನು ಸಹ ಸ್ವಾಧೀನಪಡಿಸಿಕೊಂಡನು. ಹೀಗೆ, ಗ್ರೀಕ್‌ ಸಾಮ್ರಾಜ್ಯದ ಕೊನೆಯ ಗುರುತು ಸಹ ಅಳಿಸಿಹಾಕಲ್ಪಟ್ಟಿತು, ಮತ್ತು ರೋಮ್‌ ಒಂದು ಲೋಕ ಶಕ್ತಿಯಾಗಿ ಪರಿಣಮಿಸಿತು.

ಜೂಲಿಯಸ್‌ ಸೀಸರನು ದಬ್ಬಾಳಿಕೆಯಿಂದ ಆಳ್ವಿಕೆ ನಡಿಸಿದ್ದಕ್ಕಾಗಿ ಅವನ ಹತ್ಯೆಯಾಯಿತು ಎಂಬುದನ್ನು ಜ್ಞಾಪಕದಲ್ಲಿಟ್ಟುಕೊಂಡ ಆಕ್ಟೇವಿಯನನು, ಅದೇ ತಪ್ಪನ್ನು ಪುನಃ ಮಾಡದಿರುವಂತೆ ಜಾಗ್ರತೆ ವಹಿಸಿದನು. ರೋಮ್‌ನ ಅಧಿಕಾಂಶ ಪ್ರಜೆಗಳು ಪ್ರಜಾಪ್ರಭುತ್ವವನ್ನು ಇಷ್ಟಪಡುತ್ತಿದ್ದುದರಿಂದ, ಯಾವುದೇ ರೀತಿಯಲ್ಲಿ ಅವರ ಭಾವನೆಗಳಿಗೆ ವಿರುದ್ಧವಾಗಿ ನಡೆದುಕೊಳ್ಳಲು ಬಯಸದಿದ್ದ ಆಕ್ಟೇವಿಯನನು, ತನ್ನ ರಾಜಪ್ರಭುತ್ವವನ್ನು ಪ್ರಜಾಧಿಪತ್ಯದ ಸೋಗಿನಲ್ಲಿ ಮರೆಮಾಡಿದನು. “ರಾಜ” ಹಾಗೂ “ನಿರಂಕುಶ ಪ್ರಭು” ಎಂಬ ಬಿರುದುಗಳನ್ನು ಅವನು ನಿರಾಕರಿಸಿಬಿಟ್ಟನು. ಅಷ್ಟುಮಾತ್ರವಲ್ಲ, ಎಲ್ಲ ಪ್ರಾಂತಗಳ ಮೇಲ್ವಿಚಾರಣೆಯನ್ನು ತಾನು ರೋಮನ್‌ ಶಾಸನಸಭೆಗೆ ಒಪ್ಪಿಸಿಬಿಡಲು ಇಷ್ಟಪಡುತ್ತೇನೆ ಎಂದು ಅವನು ಪ್ರಕಟಿಸಿದನು ಮತ್ತು ತನಗಿರುವ ಅಧಿಕಾರಕ್ಕೆ ರಾಜೀನಾಮೆಯನ್ನೂ ಕೊಟ್ಟುಬಿಡುತ್ತೇನೆ ಎಂದು ಹೇಳಿದನು. ಈ ಉಪಾಯವು ಫಲಿಸಿತು. ಈ ವಿಚಾರವನ್ನು ಗ್ರಹಿಸಿದ ಶಾಸನಸಭೆಯು, ಆಕ್ಟೇವಿಯನನು ತನ್ನ ಸ್ಥಾನಮಾನಗಳನ್ನೇ ಮುಂದುವರಿಸಿಕೊಂಡು ಹೋಗುವಂತೆ ಹಾಗೂ ಕೆಲವೊಂದು ಪ್ರಾಂತಗಳ ಮೇಲ್ವಿಚಾರಣೆ ಮಾಡುವಂತೆ ಅವನನ್ನು ಪ್ರಚೋದಿಸಿತು.

ಇದಲ್ಲದೆ, ಸಾ.ಶ.ಪೂ. 27ರ ಜನವರಿ 16ರಂದು, ಶಾಸನಸಭೆಯು ಆಕ್ಟೇವಿಯನ್‌ಗೆ “ಅಗಸ್ಟಸ್‌” ಎಂಬ ಬಿರುದನ್ನು ನೀಡಿತು. ಇದರ ಅರ್ಥ “ಮಹಿಮಾಯುತನು, ಪವಿತ್ರನು” ಎಂದಾಗಿತ್ತು. ಆಕ್ಟೇವಿಯನನು ಈ ಬಿರುದನ್ನು ಸ್ವೀಕರಿಸಿದನು, ಹಾಗೂ ತನ್ನ ಜ್ಞಾಪಕಾರ್ಥವಾಗಿ ಒಂದು ತಿಂಗಳಿಗೆ ತನ್ನ ಹೆಸರನ್ನು ಸಹ ಕೊಟ್ಟನು. ಅಷ್ಟುಮಾತ್ರವಲ್ಲ ಫೆಬ್ರವರಿ ತಿಂಗಳಿನಿಂದ ಒಂದು ದಿನವನ್ನು ಕಡಿಮೆಗೊಳಿಸಿ, ಆ ದಿನವನ್ನು ಆಗಸ್ಟ್‌ ತಿಂಗಳಿಗೆ ಕೂಡಿಸಿದನು. ಜೂಲಿಯಸ್‌ ಸೀಸರನ ನಾಮಾರ್ಥವಾಗಿರುವ ಜುಲೈ ತಿಂಗಳಲ್ಲಿರುವಷ್ಟೇ ದಿನಗಳು ಆಗಸ್ಟ್‌ ತಿಂಗಳಿನಲ್ಲಿಯೂ ಇರಬೇಕೆಂಬ ಉದ್ದೇಶದಿಂದಲೇ ಅವನು ಹೀಗೆ ಮಾಡಿದನು. ಹೀಗೆ ಆಕ್ಟೇವಿಯನನು ರೋಮ್‌ನ ಪ್ರಪ್ರಥಮ ಚಕ್ರವರ್ತಿಯಾದನು ಮತ್ತು ಅಂದಿನಿಂದ ಕೈಸರ್‌ ಅಗಸ್ಟಸ್‌ ಅಥವಾ “ಮಹಾನುಭಾವ” ಎಂದು ಪ್ರಸಿದ್ಧನಾದನು. ಕಾಲಾನಂತರ ಅವನು “ಪಾಂಟಿಫೆಕ್ಸ್‌ ಮ್ಯಾಕ್ಸಿಮಸ್‌” (ಮಹಾಯಾಜಕ) ಎಂಬ ಬಿರುದನ್ನು ಸಹ ಪಡೆದುಕೊಂಡನು, ಮತ್ತು ಯೇಸು ಜನಿಸಿದ ವರ್ಷವಾದ ಸಾ.ಶ.ಪೂ. 2ರಲ್ಲಿ, ಶಾಸನಸಭೆಯು ಅವನಿಗೆ ಪಾಟರ್‌ ಪಾಟ್ರಿಐ, ಅಂದರೆ “ರಾಷ್ಟ್ರಪಿತ” ಎಂಬ ಬಿರುದನ್ನೂ ಕೊಟ್ಟಿತು.

ಅದೇ ವರ್ಷದಲ್ಲಿ, “ರಾಜ್ಯವೆಲ್ಲಾ ಖಾನೆಷುಮಾರಿ ಬರಸಿಕೊಳ್ಳಬೇಕೆಂಬ ಆಜ್ಞೆಯು ಚಕ್ರವರ್ತಿಯಾದ ಔಗುಸ್ತನಿಂದ ಹೊರಟಿತು. . . . ಆಗ ಎಲ್ಲರೂ ಖಾನೆಷುಮಾರಿ ಬರಸಿಕೊಳ್ಳುವದಕ್ಕಾಗಿ ತಮ್ಮ ತಮ್ಮ ಊರುಗಳಿಗೆ ಹೊರಟರು.” (ಲೂಕ 2:​1-3) ಈ ರಾಜಾಜ್ಞೆಯ ಫಲಿತಾಂಶವಾಗಿ, ಬೈಬಲ್‌ ಪ್ರವಾದನೆಯನ್ನು ನೆರವೇರಿಸುತ್ತಾ ಯೇಸು ಬೇತ್ಲೆಹೇಮ್‌ನಲ್ಲಿ ಜನಿಸಿದನು.​—⁠ದಾನಿಯೇಲ 11:20; ಮೀಕ 5:⁠2.

ಅಗಸ್ಟಸ್‌ನ ಅಧೀನದಲ್ಲಿದ್ದ ಸರಕಾರದಲ್ಲಿ, ಸ್ವಲ್ಪಮಟ್ಟಿಗಿನ ಪ್ರಾಮಾಣಿಕತೆ ಹಾಗೂ ಸ್ಥಿರವಾದ ಹಣಕಾಸಿನ ವ್ಯವಸ್ಥೆಯಿತ್ತು. ಅಗಸ್ಟಸನು ಕಾರ್ಯಸಾಧಕವಾದ ಅಂಚೆ ವ್ಯವಸ್ಥೆಯನ್ನು ಸಹ ಆರಂಭಿಸಿದನು ಮತ್ತು ರಸ್ತೆಗಳನ್ನೂ ಸೇತುವೆಗಳನ್ನೂ ಕಟ್ಟಿಸಿದನು. ಅವನು ಸೈನ್ಯವನ್ನು ಸರಿಯಾದ ರೀತಿಯಲ್ಲಿ ವ್ಯವಸ್ಥಾಪಿಸಿದನು, ಒಂದು ಕಾಯಂ ನೌಕಾಬಲವನ್ನು ರಚಿಸಿದನು, ಮತ್ತು ಪ್ರೀಟೋರಿಯನ್‌ ಗಾರ್ಡ್‌ ಎಂದು ಪ್ರಸಿದ್ಧವಾದ ಒಂದು ಅಂಗರಕ್ಷಕ ದಳವನ್ನು ಸ್ಥಾಪಿಸಿದನು. (ಫಿಲಿಪ್ಪಿ 1:13) ಇವನ ಆಶ್ರಯದಲ್ಲಿ, ವರ್ಜಿಲ್‌ ಹಾಗೂ ಹಾರೆಸ್‌ ಎಂಬ ಬರಹಗಾರರು ಏಳಿಗೆ ಹೊಂದಿದರು. ಮತ್ತು ಈಗ ಯಾವುದು ಪ್ರಾಚೀನ ಶೈಲಿ ಎಂದು ಕರೆಯಲ್ಪಡುತ್ತದೋ ಆ ಶೈಲಿಯಲ್ಲಿ ಶಿಲ್ಪಿಗಳು ಸುಂದರವಾದ ಶಿಲ್ಪಗಳನ್ನು ಕೆತ್ತಿದರು. ಜೂಲಿಯಸ್‌ ಸೀಸರನು ಪೂರ್ತಿಯಾಗಿ ಕಟ್ಟಿಸದೆ ಬಿಟ್ಟಿದ್ದ ಕಟ್ಟಡಗಳನ್ನು ಅಗಸ್ಟಸನು ಪೂರ್ಣಗೊಳಿಸಿದನು ಮತ್ತು ಅನೇಕ ದೇವಾಲಯಗಳನ್ನು ನವೀಕರಿಸಿದನು. ಅವನು ಜಾರಿಗೆ ತಂದ ಪ್ಯಾಕ್ಸ್‌ ರೊಮಾನ (“ರೋಮನ್‌ ಶಾಂತಿ”)ವು, 200 ವರ್ಷಗಳಿಗಿಂತಲೂ ಹೆಚ್ಚು ಸಮಯದ ವರೆಗೆ ಬಾಳಿತು. ಸಾ.ಶ. 14ರ ಆಗಸ್ಟ್‌ 19ರಂದು, ತನ್ನ 76ರ ಪ್ರಾಯದಲ್ಲಿ ಅಗಸ್ಟಸನು ಮರಣಪಟ್ಟನು ಮತ್ತು ಆ ಬಳಿಕ ಅವನನ್ನು ದೈವೀಕರಿಸಲಾಯಿತು.

“ಇಟ್ಟಿಗೆಯಿಂದ ಕಟ್ಟಲ್ಪಟ್ಟಿದ್ದ ರೋಮ್‌ ನಗರವನ್ನು ಅಮೃತಶಿಲೆಯ ನಗರವಾಗಿ ಮಾರ್ಪಡಿಸಿದೆ” ಎಂದು ಅಗಸ್ಟಸನು ಜಂಬಕೊಚ್ಚಿಕೊಂಡನು. ಈ ಮುಂಚೆ ರೋಮ್‌ನಲ್ಲಿ ಹೇಗೆ ಕಲಹವು ಇತ್ತೋ ಅದೇ ರೀತಿ ಮುಂದೆ ಸಂಭವಿಸಬಾರದೆಂಬ ಉದ್ದೇಶದಿಂದ, ತನ್ನ ಬಳಿಕ ಆಳ್ವಿಕೆಗೆ ಬರಲಿರುವ ಚಕ್ರವರ್ತಿಯನ್ನು ಅವನು ಸಿದ್ಧಪಡಿಸಲು ಬಯಸಿದನು. ಆದರೆ ತನ್ನ ಉತ್ತರಾಧಿಕಾರಿಯ ವಿಷಯದಲ್ಲಿ ಅವನಿಗೆ ಯಾವುದೇ ಆಯ್ಕೆ ಇರಲಿಲ್ಲ. ಅಗಸ್ಟಸ್‌ನ ಸೋದರಳಿಯ, ಇಬ್ಬರು ಮೊಮ್ಮಕ್ಕಳು, ಅಳಿಯ, ಹಾಗೂ ಒಬ್ಬ ಮಲಮಗ​—⁠ಇವರೆಲ್ಲರೂ ಮೃತಪಟ್ಟಿದ್ದರು, ಮತ್ತು ರಾಜ್ಯಾಧಿಕಾರವನ್ನು ನಡೆಸಲು ಅವನ ಮಲಮಗನಾದ ತಿಬೇರಿಯನು ಮಾತ್ರವೇ ಉಳಿದಿದ್ದನು.

“ಕಡೆಗಣಿಸಲ್ಪಡಲಿಕ್ಕಿದ್ದವನು”

ಅಗಸ್ಟಸನು ಮರಣಪಟ್ಟು ಒಂದು ತಿಂಗಳು ಕಳೆಯುವುದಕ್ಕೆ ಮೊದಲೇ, ರೋಮನ್‌ ಶಾಸನಸಭೆಯು 56 ವರ್ಷ ಪ್ರಾಯದ ತಿಬೇರಿಯನನ್ನು ಚಕ್ರವರ್ತಿಯನ್ನಾಗಿ ಮಾಡಿತು. ಸಾ.ಶ. 37ರ ಮಾರ್ಚ್‌ ತಿಂಗಳ ತನಕ ತಿಬೇರಿಯನು ಬದುಕಿದ್ದು ರಾಜ್ಯವಾಳಿದನು. ಆದುದರಿಂದ, ಯೇಸುವಿನ ಸಾರ್ವಜನಿಕ ಶುಶ್ರೂಷೆಯ ಸಮಯಾವಧಿಯಲ್ಲಿ ಅವನು ರೋಮ್‌ನ ಚಕ್ರವರ್ತಿಯಾಗಿದ್ದನು.

ಚಕ್ರವರ್ತಿಯಾಗಿದ್ದ ತಿಬೇರಿಯನಿಗೆ ಸದ್ಗುಣಗಳೂ ಇದ್ದವು ದುರ್ಗುಣಗಳೂ ಇದ್ದವು. ಅವನ ಸದ್ಗುಣಗಳಲ್ಲಿ ಒಂದು ಯಾವುದೆಂದರೆ, ಸುಖಭೋಗಗಳಿಗಾಗಿ ಹಣ ಖರ್ಚುಮಾಡುವುದನ್ನು ಅವನು ಕಟ್ಟುನಿಟ್ಟಾಗಿ ವಿರೋಧಿಸುತ್ತಿದ್ದನು. ಇದರ ಫಲಿತಾಂಶವಾಗಿ, ಅವನ ಸಾಮ್ರಾಜ್ಯವು ಸಮೃದ್ಧವಾಗಿತ್ತು ಮತ್ತು ನೈಸರ್ಗಿಕ ವಿಪತ್ತುಗಳು ಹಾಗೂ ಆಪತ್ತುಗಳಿಂದ ಚೇತರಿಸಿಕೊಳ್ಳಲಿಕ್ಕಾಗಿ ಹಣದ ಅಗತ್ಯವಿದ್ದಾಗ ಅವನ ಬಳಿ ಯಾವಾಗಲೂ ಧನಸಂಗ್ರಹವಿರುತ್ತಿತ್ತು. ತಿಬೇರಿಯನ ಬಗ್ಗೆ ಹೇಳಲ್ಪಡುವ ಒಳ್ಳೇ ವಿಚಾರವೇನೆಂದರೆ, ಅವನು ತನ್ನನ್ನು ಒಬ್ಬ ಸಾಮಾನ್ಯ ಮನುಷ್ಯನನ್ನಾಗಿ ಪರಿಗಣಿಸಿಕೊಂಡನು, ಅನೇಕ ಗೌರವಾರ್ಥಕ ಬಿರುದುಗಳನ್ನು ನಿರಾಕರಿಸಿದನು. ಮತ್ತು ಸಾಮಾನ್ಯವಾಗಿ ಚಕ್ರವರ್ತಿಯ ಆರಾಧನೆಯು ಅಗಸ್ಟಸ್‌ನಿಗೆ ಮಾತ್ರ ಸಲ್ಲುವಂತೆ ಮಾಡಿದನು. ಅಗಸ್ಟಸ್‌ ಹಾಗೂ ಜೂಲಿಯಸ್‌ ಸೀಸರರು ಮಾಡಿದಂತೆ, ತನ್ನ ಜ್ಞಾಪಕಾರ್ಥವಾಗಿ ಅವನು ಒಂದು ಕ್ಯಾಲೆಂಡರ್‌ ತಿಂಗಳಿಗೆ ತನ್ನ ಹೆಸರನ್ನು ಕೊಡಲಿಲ್ಲ, ಇಲ್ಲವೆ ಆ ರೀತಿಯಲ್ಲಿ ಜನರು ತನ್ನನ್ನು ಗೌರವಿಸುವಂತೆ ಅನುಮತಿಸಲೂ ಇಲ್ಲ.

ಆದರೂ, ತಿಬೇರಿಯನಿಗೆ ಸದ್ಗುಣಗಳಿಗಿಂತಲೂ ಹೆಚ್ಚಾಗಿ ದುರ್ಗುಣಗಳೇ ಇದ್ದವು. ಇತರರೊಂದಿಗೆ ವ್ಯವಹರಿಸುವಾಗ ಅವನು ತುಂಬ ಸಂದೇಹಪಡುವವನಾಗಿದ್ದು, ಕಪಟಭಾವದಿಂದ ನಡೆದುಕೊಳ್ಳುತ್ತಿದ್ದನು. ಮತ್ತು ಅವನ ಆಳ್ವಿಕೆಯಲ್ಲಿ ಯೋಜಿತ ಕೊಲೆಗಳು ಅತ್ಯಧಿಕವಾಗಿದ್ದವು; ಅವನ ಹಿಂದಿನ ಸ್ನೇಹಿತರಲ್ಲಿ ಅನೇಕರು ಈ ಯೋಜಿತ ಕೊಲೆಗೆ ಆಹುತಿಯಾಗಿದ್ದರೆಂದು ಪರಿಗಣಿಸಲಾಗುತ್ತದೆ. ಲೇಸ್‌-ಮ್ಯಾಜೆಸ್ಟಿ (ರಾಜದ್ರೋಹ) ಎಂಬ ನಿಯಮವನ್ನೂ ಅವನು ಜಾರಿಗೆ ತಂದನು. ಇದರಲ್ಲಿ ರಾಜದ್ರೋಹದ ಕೃತ್ಯಗಳಿಗೆ ಮಾತ್ರವಲ್ಲ, ಸ್ವತಃ ರಾಜನ ವಿರುದ್ಧ ಅಪಮಾನಕರವಾಗಿ ಮಾತಾಡುವವರನ್ನು ಸಹ ಶಿಕ್ಷೆಗೆ ಗುರಿಪಡಿಸುವುದೂ ಸೇರಿತ್ತು. ಈ ನಿಯಮದ ಆಧಾರದ ಮೇಲೆಯೇ ಯೇಸುವನ್ನು ಕೊಲ್ಲುವಂತೆ ಯೆಹೂದ್ಯರು ರೋಮನ್‌ ದೇಶಾಧಿಪತಿಯಾದ ಪೊಂತ್ಯ ಪಿಲಾತನನ್ನು ಒತ್ತಾಯಿಸಿದರು ಎಂಬುದು ಸುವ್ಯಕ್ತ.​—⁠ಯೋಹಾನ ​19:12-16.

ರೋಮ್‌ನ ನೆರೆಹೊರೆಯಲ್ಲಿದ್ದ ಅರಮನೆಯ ಅಂಗರಕ್ಷಕ ದಳದ ಕಡೆಗೆ ಹೆಚ್ಚು ಗಮನಕೊಟ್ಟ ತಿಬೇರಿಯನು, ಪಟ್ಟಣದ ಗೋಡೆಯ ಉತ್ತರ ದಿಕ್ಕಿನ ಬಳಿಯಲ್ಲಿ ಸಿಪಾಯಿಗಳಿಗೆ ಭದ್ರವಾದ ಪಾಳೆಯಗಳನ್ನು ಕಟ್ಟಿಸಿಕೊಟ್ಟನು. ಈ ಅಂಗರಕ್ಷಕ ದಳದ ಅಸ್ತಿತ್ವವು, ತಿಬೇರಿಯನ ಅಧಿಕಾರಕ್ಕೆ ಬೆದರಿಕೆಯನ್ನು ಒಡ್ಡುವಂತಿದ್ದ ರೋಮನ್‌ ಶಾಸನಸಭೆಗೆ ಭಯವನ್ನು ಉಂಟುಮಾಡಿತು, ಮತ್ತು ಜನರ ಅಧೀನತೆಯನ್ನೂ ಇದು ನಿಗ್ರಹಿಸಿತು. ಗುಪ್ತವಾಗಿ ದೂರುಕೊಡುವ ಪದ್ಧತಿಯನ್ನು ತಿಬೇರಿಯನು ಉತ್ತೇಜಿಸಿದನು, ಹಾಗೂ ಅವನ ಆಳ್ವಿಕೆಯ ಕೊನೆಯ ಭಾಗವು ಭೀತಿಯಿಂದ ತುಂಬಿತ್ತು.

ತಿಬೇರಿಯನ ಮರಣದ ಸಮಯದಲ್ಲಿ, ಅವನನ್ನು ಒಬ್ಬ ಪ್ರಜಾಪೀಡಕನೆಂದು ಪರಿಗಣಿಸಲಾಗಿತ್ತು. ಅವನು ಸತ್ತಾಗ, ರೋಮ್‌ ಜನತೆಯು ಸಂತೋಷಪಟ್ಟಿತು ಮತ್ತು ಶಾಸನಸಭೆಯು ಅವನನ್ನು ದೇವರ ಸ್ಥಾನದಲ್ಲಿಟ್ಟು ಆರಾಧಿಸಲು ನಿರಾಕರಿಸಿತು. ಈ ಕಾರಣಗಳಿಂದ ಹಾಗೂ ಇನ್ನಿತರ ಕಾರಣಗಳಿಂದಲೇ, “ಉತ್ತರರಾಜನ” ಸ್ಥಾನದಲ್ಲಿ “ಒಬ್ಬ ನೀಚನು [“ಕಡೆಗಣಿಸಲ್ಪಡುವವನು,” NW]” ಅಧಿಕಾರಕ್ಕೆ ಬರುವನು ಎಂದು ಹೇಳುವ ಪ್ರವಾದನೆಯು ತಿಬೇರಿಯನ ಸಂಬಂಧದಲ್ಲಿ ನೆರವೇರಿದ್ದನ್ನು ನಾವು ನೋಡುತ್ತೇವೆ.​—⁠ದಾನಿಯೇಲ 11:​15, 21.

ನೀವೇನನ್ನು ಗ್ರಹಿಸಿದಿರಿ?

• ಆಕ್ಟೇವಿಯನನು ರೋಮ್‌ನ ಪ್ರಪ್ರಥಮ ಚಕ್ರವರ್ತಿಯಾಗಿ ಹೇಗೆ ಅಧಿಕಾರಕ್ಕೆ ಬಂದನು?

• ಅಗಸ್ಟಸ್‌ನ ಸರಕಾರದ ಸಾಧನೆಗಳ ಕುರಿತು ಏನು ಹೇಳಸಾಧ್ಯವಿದೆ?

• ತಿಬೇರಿಯನ ಸದ್ಗುಣಗಳು ಹಾಗೂ ದುರ್ಗುಣಗಳು ಯಾವುವು?

• ‘ಕಡೆಗಣಿಸಲ್ಪಡುವವನ’ ಕುರಿತಾದ ಪ್ರವಾದನೆಯು ತಿಬೇರಿಯನ ವಿದ್ಯಮಾನದಲ್ಲಿ ಹೇಗೆ ನೆರವೇರಿತು?

[ಚಿತ್ರ]

ತಿಬೇರಿಯ

[Box/Pictures on page 252-255]

ಸೆನೋಬಿಯ​—⁠ಪಾಲ್ಮೈರದ ಯುದ್ಧವೀರ ರಾಣಿ

“ಅವಳು ಕಪ್ಪು ವರ್ಣದವಳಾಗಿದ್ದಳು . . . ಅವಳ ದಂತಪಂಕ್ತಿಗಳು ಬಿಳಿಯ ಮುತ್ತುಗಳಂತಿದ್ದವು, ಮತ್ತು ಅವಳ ದೊಡ್ಡ ಕಣ್ಣುಗಳು ಕಪ್ಪಾಗಿದ್ದು, ಅಸಾಮಾನ್ಯವಾದ ಕಳೆಯಿಂದ ಕಾಂತಿಭರಿತವಾಗಿದ್ದವು ಹಾಗೂ ಆಕರ್ಷಕವಾದ ಪ್ರಸನ್ನತೆಯಿಂದ ಕಂಗೊಳಿಸುತ್ತಿದ್ದವು. ಅವಳ ಧ್ವನಿಯು ತುಂಬ ಬಲವತ್ತಾಗಿದ್ದು, ಇಂಪಾಗಿತ್ತು. ಅವಳ ಪುರುಷಯೋಗ್ಯ ಗ್ರಹಣ ಶಕ್ತಿಯು, ವ್ಯಾಸಂಗದ ಕಾರಣ ಬಲಗೊಂಡಿತ್ತು ಹಾಗೂ ಅಂದಗೊಂಡಿತ್ತು. ಅವಳಿಗೆ ಲ್ಯಾಟಿನ್‌ ಭಾಷೆಯ ಪರಿಚಯವಿತ್ತು, ಅದೇ ಸಮಯದಲ್ಲಿ ಗ್ರೀಕ್‌, ಸಿರಿಯನ್‌, ಹಾಗೂ ಐಗುಪ್ತ ಭಾಷೆಗಳಲ್ಲಿ ಸಹ ಅವಳು ಪ್ರವೀಣಳಾಗಿದ್ದಳು.” ಎಡ್ವರ್ಡ್‌ ಗಿಬನ್‌ ಎಂಬ ಇತಿಹಾಸಕಾರನು, ಸಿರಿಯದ ಪಟ್ಟಣವಾಗಿದ್ದ ಪಾಲ್ಮೈರದ ಯುದ್ಧವೀರ ರಾಣಿ ಸೆನೋಬಿಯಳನ್ನು ಈ ಮಾತುಗಳಿಂದ ಹೊಗಳಿದನು.

ಪಾಲ್ಮೈರದ ಕುಲೀನ ವ್ಯಕ್ತಿಯಾಗಿದ್ದ ಆಡಿನೇಥಸನು ಸೆನೋಬಿಯಳ ಗಂಡನಾಗಿದ್ದನು. ರೋಮನ್‌ ಸಾಮ್ರಾಜ್ಯದ ಪರವಾಗಿ ಅವನು ಪರ್ಷಿಯದ ವಿರುದ್ಧ ಯಶಸ್ವಿಕರ ದಂಡಯಾತ್ರೆಯನ್ನು ನಡೆಸಿದ್ದರಿಂದ, ಸಾ.ಶ. 258ರಲ್ಲಿ ಅವನನ್ನು ರೋಮ್‌ನ ಪರರಾಜ್ಯ ಪ್ರತಿನಿಧಿಯ ಹುದ್ದೆಗೆ ಬಡ್ತಿಮಾಡಲಾಗಿತ್ತು. ಎರಡು ವರ್ಷಗಳ ಬಳಿಕ, ರೋಮನ್‌ ಚಕ್ರವರ್ತಿಯಾಗಿದ್ದ ಗಲೀಏನಸನು ಆಡಿನೇಥಸನಿಗೆ ಕಾರೆಕ್ಟೋರ್‌ ಟೋಟ್ಯುಸ್‌ ಆರಿಯಂಟಿಸ್‌ (ಇಡೀ ಪೂರ್ವ ಭಾಗದ ಗವರ್ನರ್‌) ಎಂಬ ಬಿರುದನ್ನು ನೀಡಿದನು. ಪರ್ಷಿಯದ ರಾಜನಾದ Iನೆಯ ಶಾಪೂರನ ವಿರುದ್ಧ ಸಾಧಿಸಿದ ಜಯದ ಅಂಗೀಕಾರದೋಪಾದಿ ಈ ಬಿರುದು ಅವನಿಗೆ ಸಿಕ್ಕಿತ್ತು. ಕಾಲಕ್ರಮೇಣ ಆಡಿನೇಥಸನು ಸ್ವತಃ “ರಾಜಾಧಿರಾಜ” ಎಂಬ ಬಿರುದನ್ನು ತನಗೆ ಕೊಟ್ಟುಕೊಂಡನು. ಆಡಿನೇಥಸನ ಈ ಎಲ್ಲ ಯಶಸ್ಸುಗಳಿಗೆ, ಬಹಳಮಟ್ಟಿಗೆ ಸೆನೋಬಿಯಳ ಧೈರ್ಯ ಹಾಗೂ ದೂರದೃಷ್ಟಿಯೇ ಕಾರಣವಾಗಿದ್ದಿರಬಹುದೆಂದು ಹೇಳಲಾಗುತ್ತದೆ.

ಸೆನೋಬಿಯಳು ಒಂದು ಸಾಮ್ರಾಜ್ಯವನ್ನು ಕಟ್ಟಲು ಹಾರೈಸುತ್ತಾಳೆ

ಸಾ.ಶ. 267ರಲ್ಲಿ, ಆಡಿನೇಥಸನು ತನ್ನ ಅಧಿಕಾರದ ತುತ್ತತುದಿಯಲ್ಲಿರುವಾಗ, ಅವನೂ ಅವನ ವಾರಸುದಾರನೂ ಕೊಲ್ಲಲ್ಪಟ್ಟರು. ಸೆನೋಬಿಯಳ ಮಗನು ಇನ್ನೂ ಚಿಕ್ಕವನಾಗಿದ್ದರಿಂದ, ಅವಳೇ ತನ್ನ ಗಂಡನ ಸ್ಥಾನವನ್ನು ವಹಿಸಿಕೊಂಡಳು. ಸೌಂದರ್ಯವತಿಯೂ, ಮಹತ್ವಾಕಾಂಕ್ಷಿಯೂ, ಆಡಳಿತವನ್ನು ನಿರ್ವಹಿಸುವುದರಲ್ಲಿ ಸಮರ್ಥಳೂ, ತನ್ನ ಮೃತಪಟ್ಟ ಪತಿಯೊಂದಿಗೆ ದಂಡಯಾತ್ರೆ ಮಾಡುವ ರೂಢಿಯಿದ್ದವಳೂ, ಅನೇಕ ಭಾಷೆಗಳನ್ನು ನಿರರ್ಗಳವಾಗಿ ಮಾತಾಡುವವಳೂ ಆಗಿದ್ದ ಸೆನೋಬಿಯಳು, ತನ್ನ ಪ್ರಜೆಗಳ ಗೌರವ ಹಾಗೂ ಬೆಂಬಲವನ್ನು ಸಂಪಾದಿಸಲು ಶಕ್ತಳಾದಳು. ಸೆನೋಬಿಯಳು ವಿದ್ಯಾಪ್ರೇಮಿಯಾಗಿದ್ದಳು ಮತ್ತು ಯಾವಾಗಲೂ ಬುದ್ಧಿವಂತರು ಅವಳ ಜೊತೆಗಿರುತ್ತಿದ್ದರು. ತತ್ವಜ್ಞಾನಿಯೂ ಆಲಂಕಾರಿಕ ಭಾಷಣಕಾರನೂ ಆಗಿದ್ದ ಕ್ಯಾಸಿಯಸ್‌ ಲಾಂಜೈನಸ್‌ ಅವಳ ಸಲಹೆಗಾರರಲ್ಲಿ ಒಬ್ಬನಾಗಿದ್ದು, ಅವನು “ನಡೆದಾಡುವ ಗ್ರಂಥಾಲಯ ಅಥವಾ ಮ್ಯೂಸಿಯಮ್‌ ಆಗಿದ್ದನು” ಎಂದು ಹೇಳಲಾಗುತ್ತದೆ. ಪಾಲ್ಮೈರ ಮತ್ತು ಅದರ ಸಾಮ್ರಾಜ್ಯ​—⁠ರೋಮ್‌ನ ವಿರುದ್ಧ ಸೆನೋಬಿಯಳ ಕ್ರಾಂತಿ (ಇಂಗ್ಲಿಷ್‌) ಎಂಬ ಪುಸ್ತಕದಲ್ಲಿ, ಅದರ ಲೇಖಕರಾದ ರಿಚರ್ಡ್‌ ಸ್ಟೋನ್‌ಮನ್‌ ದಾಖಲಿಸಿದ್ದು: “ಆಡಿನೇಥಸನ ಮರಣಾನಂತರ ಸುಮಾರು ಐದು ವರ್ಷಗಳಲ್ಲೇ . . . ಸೆನೋಬಿಯಳು ತಾನು ಪೂರ್ವದ ರಾಣಿಯೆಂಬ ಭಾವನೆಯನ್ನು ಜನರ ಮನಸ್ಸಿನಲ್ಲಿ ಅಚ್ಚೊತ್ತಿದ್ದಳು.”

ಸೆನೋಬಿಯಳ ಕ್ಷೇತ್ರದ ಒಂದು ಭಾಗದಲ್ಲಿ ಪರ್ಷಿಯವು ಇತ್ತು; ಅವಳೂ ಅವಳ ಪತಿಯೂ ಸೇರಿಕೊಂಡು ಅದನ್ನು ದುರ್ಬಲಗೊಳಿಸಿದ್ದರು. ಮತ್ತು ಇನ್ನೊಂದು ಭಾಗದಲ್ಲಿ ಕುಸಿಯುತ್ತಿದ್ದ ರೋಮ್‌ ಇತ್ತು. ಆ ಸಮಯದಲ್ಲಿ ರೋಮನ್‌ ಸಾಮ್ರಾಜ್ಯದಲ್ಲಿ ಅಸ್ತಿತ್ವದಲ್ಲಿದ್ದ ಪರಿಸ್ಥಿತಿಗಳ ಕುರಿತು ಇತಿಹಾಸಕಾರನಾದ ಜೆ. ಎಮ್‌. ರಾಬರ್ಟ್ಸ್‌ ಹೇಳುವುದು: “ಮೂರನೆಯ ಶತಮಾನದಲ್ಲಿ . . . ರೋಮ್‌ನ ಪೂರ್ವ ಹಾಗೂ ಪಶ್ಚಿಮ ಗಡಿನಾಡುಗಳಿಗೆ ಕಷ್ಟಕಾಲವು ಒದಗಿಬಂದಿತ್ತು. ಅದೇ ಸಮಯಕ್ಕೆ ರೋಮ್‌ನಲ್ಲಿ ಆಂತರಿಕ ಯುದ್ಧ ಹಾಗೂ ಉತ್ತರಾಧಿಕಾರಗಳ ಕುರಿತಾದ ವ್ಯಾಜ್ಯಗಳು ಆರಂಭಗೊಂಡಿದ್ದವು. ಇಪ್ಪತ್ತೆರಡು ಸಾಮ್ರಾಟರು (ಸುಳ್ಳು ಹಕ್ಕುದಾರರನ್ನು ಬಿಟ್ಟು) ಅಧಿಕಾರಕ್ಕೆ ಬಂದುಹೋದರು.” ಇನ್ನೊಂದು ಕಡೆಯಲ್ಲಿ, ಸಿರಿಯದ ರಾಣಿಯು ತನ್ನ ಸಾಮ್ರಾಜ್ಯದಲ್ಲಿ ಸಂಪೂರ್ಣ ಅಧಿಕಾರವನ್ನು ಸ್ಥಾಪಿಸಿದ್ದಳು. “ಎರಡು ಸಾಮ್ರಾಜ್ಯಗಳು [ಪರ್ಷಿಯ ಮತ್ತು ರೋಮ್‌] ಹೆಚ್ಚು ಬಲಗೊಳ್ಳದಂತೆ ನೋಡಿಕೊಳ್ಳುತ್ತಾ, ಈ ಎರಡೂ ಸಾಮ್ರಾಜ್ಯಗಳನ್ನು ಆಳಸಾಧ್ಯವಿರುವಂತಹ ಒಂದು ಮೂರನೆಯ ಸಾಮ್ರಾಜ್ಯವನ್ನು ಕಟ್ಟುವ ಕಡುಬಯಕೆ ಅವಳಲ್ಲಿತ್ತು” ಎಂದು ಸ್ಟೋನ್‌ಮನ್‌ ದಾಖಲಿಸುತ್ತಾರೆ.

ಸಾ.ಶ. 269ರಲ್ಲಿ, ತನ್ನ ರಾಜಯೋಗ್ಯ ಅಧಿಕಾರಗಳನ್ನು ವಿಸ್ತರಿಸುವ ಅವಕಾಶ ಸೆನೋಬಿಯಳಿಗೆ ದೊರಕಿತು. ಆಗ ರೋಮ್‌ನ ಆಳ್ವಿಕೆಯನ್ನು ಪ್ರತಿಭಟಿಸುತ್ತಿದ್ದ ಒಬ್ಬ ಸೋಗುಗಾರನು ಐಗುಪ್ತಕ್ಕೆ ಬಂದನು. ತತ್‌ಕ್ಷಣವೇ ಸೆನೋಬಿಯಳ ಸೈನ್ಯವು ಐಗುಪ್ತಕ್ಕೆ ಹೋಗಿ, ದಂಗೆಯನ್ನು ಅಡಗಿಸಿ, ಆ ದೇಶವನ್ನು ಸ್ವಾಧೀನಪಡಿಸಿಕೊಂಡಿತು. ತಾನೇ ಐಗುಪ್ತದ ರಾಣಿಯೆಂದು ಘೋಷಿಸಿಕೊಂಡು, ತನ್ನ ಹೆಸರಿನಲ್ಲಿ ನಾಣ್ಯಗಳನ್ನು ಟಂಕಿಸಿದಳು. ಈಗ ಅವಳ ರಾಜ್ಯವು ನೈಲ್‌ ನದಿಯಿಂದ ಯೂಫ್ರೇಟೀಸ್‌ ನದಿಯ ವರೆಗೂ ವ್ಯಾಪಿಸಿತ್ತು. ಅವಳ ಜೀವಿತದ ಈ ಹಂತದಲ್ಲಿ, “ದಕ್ಷಿಣ ರಾಜ”ನ ಸ್ಥಾನವನ್ನು ಸೆನೋಬಿಯಳು ಆಕ್ರಮಿಸಿದ್ದಳು.​—⁠ದಾನಿಯೇಲ 11:​25, 26.

ಸೆನೋಬಿಯಳ ರಾಜಧಾನಿ

ಸೆನೋಬಿಯಳು ತನ್ನ ರಾಜಧಾನಿಯಾದ ಪಾಲ್ಮೈರವನ್ನು ಎಷ್ಟು ಚೆನ್ನಾಗಿ ಭದ್ರಪಡಿಸಿ, ಅಂದಗೊಳಿಸಿದಳೆಂದರೆ, ಅದು ರೋಮನ್‌ ಜಗತ್ತಿನಲ್ಲಿದ್ದ ಅತಿ ದೊಡ್ಡ ನಗರಗಳಿಗೆ ಸರಿಸಮವಾಗಿತ್ತು. ಅದರ ಜನಸಂಖ್ಯೆಯು 1,50,000ದಷ್ಟಿತ್ತೆಂದು ಅಂದಾಜುಮಾಡಲಾಗುತ್ತದೆ. ಪಾಲ್ಮೈರದಲ್ಲಿ, ನಯನಮನೋಹರವಾದ ಸಾರ್ವಜನಿಕ ಕಟ್ಟಡಗಳು, ದೇವಾಲಯಗಳು, ಉದ್ಯಾನವನಗಳು, ಕಂಭಗಳು, ಮತ್ತು ಸ್ಮಾರಕ ಸ್ತಂಭಗಳು ತುಂಬಿದ್ದವು. ಮತ್ತು ಆ ಪಟ್ಟಣದ ಸುತ್ತಲೂ 21 ಕಿಲೊಮೀಟರುಗಳಷ್ಟು ಸುತ್ತಳತೆಯಿರುವ ಒಂದು ಗೋಡೆಯು ಇತ್ತು. ಮುಖ್ಯ ಪ್ರವೇಶಮಾರ್ಗದ ಉದ್ದಕ್ಕೂ, ಕಾರಿಂತ್‌ ಶೈಲಿಯ ಸ್ತಂಭಗಳಿಂದ ರಚಿತವಾಗಿದ್ದ 50 ಅಡಿಗಿಂತಲೂ ಎತ್ತರವಾದ ಸುಮಾರು 1,500 ಕಂಭಸಾಲುಗಳು ಇದ್ದವು. ಪಟ್ಟಣದಾದ್ಯಂತ ವೀರನಾಯಕರು ಹಾಗೂ ಶ್ರೀಮಂತ ದಾನಿಗಳ ಪ್ರತಿಮೆಗಳು ಮತ್ತು ಎದೆವಿಗ್ರಹಗಳು ಇದ್ದವು. ಸಾ.ಶ. 271ರಲ್ಲಿ ಸೆನೋಬಿಯಳು, ತನ್ನ ಹಾಗೂ ತನ್ನ ಮೃತ ಪತಿಯ ಪ್ರತಿಮೆಗಳನ್ನು ಪ್ರತಿಷ್ಠಾಪಿಸಿದಳು.

ಪಾಲ್ಮೈರದಲ್ಲಿದ್ದ ಅತ್ಯುತ್ತಮ ವಾಸ್ತುಶಿಲ್ಪಗಳಲ್ಲಿ ಒಂದು, ಸೂರ್ಯದೇವನ ದೇವಾಲಯವಾಗಿತ್ತು. ಇದು ನಗರದ ಧಾರ್ಮಿಕ ನೋಟವನ್ನು ಎದ್ದುಕಾಣುವಂತೆ ಮಾಡಿತು ಎಂಬುದರಲ್ಲಿ ಸಂಶಯವೇ ಇಲ್ಲ. ಸೆನೋಬಿಯಳು ಸಹ ಸೂರ್ಯದೇವನೊಂದಿಗೆ ಸಂಬಂಧಿಸಿದ ದೇವತೆಯನ್ನು ಆರಾಧಿಸಿದ್ದಿರಬಹುದು. ಆದರೂ, ಮೂರನೆಯ ಶತಮಾನದ ಸಿರಿಯದಲ್ಲಿ ಅನೇಕ ಧರ್ಮಗಳು ಅಸ್ತಿತ್ವದಲ್ಲಿದ್ದವು. ಸೆನೋಬಿಯಳ ರಾಜ್ಯದಲ್ಲಿ, ಕ್ರೈಸ್ತರೆಂದು ಹೇಳಿಕೊಳ್ಳುವವರು, ಯೆಹೂದ್ಯರು, ಮತ್ತು ಸೂರ್ಯ ಹಾಗೂ ಚಂದ್ರ ದೇವರ ಆರಾಧಕರು ಇದ್ದರು. ತನ್ನ ಸಾಮ್ರಾಜ್ಯದಲ್ಲಿನ ವಿವಿಧ ಆರಾಧನಾ ವಿಧಗಳ ಕಡೆಗೆ ಅವಳಿಗೆ ಯಾವ ಮನೋಭಾವವಿತ್ತು? ಲೇಖಕರಾದ ಸ್ಟೋನ್‌ಮನ್‌ ದಾಖಲಿಸಿದ್ದು: “ಒಬ್ಬ ಬುದ್ಧಿವಂತ ಶಾಸಕಿಯು, ತನ್ನ ಜನರಿಗೆ ಸೂಕ್ತವಾಗಿ ಕಂಡುಬರುವ ಯಾವುದೇ ಪದ್ಧತಿಗಳನ್ನು ಅಲಕ್ಷಿಸುವುದಿಲ್ಲ. . . . ದೇವದೇವತೆಗಳು . . . ಯಾವಾಗಲೂ ಪಾಲ್ಮೈರದ ಪಕ್ಷವನ್ನೇ ವಹಿಸುತ್ತಿದ್ದರು ಎಂಬುದು ಎಲ್ಲರ ಅಭಿಪ್ರಾಯವಾಗಿತ್ತು.” ಸೆನೋಬಿಯಳು ಧರ್ಮದ ವಿಷಯದಲ್ಲಿ ಸಹನಶೀಲಳಾಗಿದ್ದಳು ಎಂಬುದು ಸುವ್ಯಕ್ತ.

ತನ್ನ ಆಕರ್ಷಕ ವ್ಯಕ್ತಿತ್ವದಿಂದ ಸೆನೋಬಿಯಳು ಅನೇಕರ ಮೆಚ್ಚುಗೆ ಪಡೆದಳು. ದಾನಿಯೇಲನ ಪ್ರವಾದನೆಯಲ್ಲಿ ಮುಂತಿಳಿಸಲ್ಪಟ್ಟ ಒಂದು ರಾಜಕೀಯ ಪ್ರಭುತ್ವವನ್ನು ಪ್ರತಿನಿಧಿಸುವುದರಲ್ಲಿ ಅವಳು ನಿರ್ವಹಿಸಿದ ಪಾತ್ರವು ಅತಿ ಹೆಚ್ಚು ಗಮನಾರ್ಹವಾಗಿತ್ತು. ಆದರೂ, ಅವಳ ಆಳ್ವಿಕೆಯು ಕೇವಲ ಐದು ವರ್ಷಗಳ ವರೆಗೆ ಮಾತ್ರ ಉಳಿದಿತ್ತು. ಸಾ.ಶ. 272ರಲ್ಲಿ, ರೋಮನ್‌ ಚಕ್ರವರ್ತಿಯಾದ ಆರೀಲಿಯನನು ಸೆನೋಬಿಯಳನ್ನು ಸೋಲಿಸಿದನು ಮತ್ತು ಪಾಲ್ಮೈರವನ್ನು ಇನ್ನೆಂದಿಗೂ ಸರಿಪಡಿಸಲು ಸಾಧ್ಯವಿಲ್ಲದಂತಹ ಸ್ಥಿತಿಗೆ ತಂದುಬಿಟ್ಟನು. ಸೆನೋಬಿಯಳಿಗೆ ಮಾತ್ರ ಕೃಪಾಭಿಕ್ಷೆ ನೀಡಲಾಯಿತು. ಅವಳು ರೋಮನ್‌ ಶಾಸನಸಭೆಯ ಸದಸ್ಯನೊಬ್ಬನನ್ನು ಮದುವೆಯಾಗಿ, ತನ್ನ ಜೀವಿತದ ಉಳಿದ ಕಾಲಾವಧಿಯನ್ನು ನಿವೃತ್ತಳಾಗಿ ಕಳೆದಳೆಂದು ಹೇಳಲಾಗುತ್ತದೆ.

ನೀವೇನನ್ನು ಗ್ರಹಿಸಿದಿರಿ?

• ಸೆನೋಬಿಯಳ ವ್ಯಕ್ತಿತ್ವವು ಹೇಗೆ ವರ್ಣಿಸಲ್ಪಟ್ಟಿದೆ?

• ಸೆನೋಬಿಯಳ ಸಾಹಸ ಕಾರ್ಯಗಳಲ್ಲಿ ಕೆಲವು ಯಾವುವು?

• ಧರ್ಮದ ವಿಷಯದಲ್ಲಿ ಸೆನೋಬಿಯಳಿಗೆ ಯಾವ ಮನೋಭಾವವಿತ್ತು?

[ಚಿತ್ರ]

ತನ್ನ ಸೈನಿಕರನ್ನು ಸಂಬೋಧಿಸಿ ಮಾತಾಡುತ್ತಿರುವ ರಾಣಿ ಸೆನೋಬಿಯ

[Chart/Pictures on page 246]

ದಾನಿಯೇಲ 11:​20-26ರಲ್ಲಿ ತಿಳಿಸಲ್ಪಟ್ಟಿರುವ ಅರಸರು

ದಾನಿಯೇಲ 11:20 ಅಗಸ್ಟಸ್‌

ದಾನಿಯೇಲ 11:​21-24 ತಿಬೇರಿಯ

ದಾನಿಯೇಲ 11:​25, 26 ಆರೀಲಿಯನ್‌ ರಾಣಿ ಸೆನೋಬಿಯ

[ಚಿತ್ರ]

ತಿಬೇರಿಯ

[ಚಿತ್ರ]

ಆರೀಲಿಯನ್‌

[ಚಿತ್ರ]

ಶಾಲ್‌ಮೇನ್‌ನ ಚಿಕ್ಕ ಪ್ರತಿಮೆ

[ಚಿತ್ರ]

ಅಗಸ್ಟಸ್‌

[ಚಿತ್ರ]

17ನೆಯ ಶತಮಾನದ ಬ್ರಿಟಿಷ್‌ ಯುದ್ಧ ನೌಕೆ

[ಪುಟ 341 ರಲ್ಲಿ ಇಡೀ ಪುಟದ ಚಿತ್ರ]

[Picture on page 233]

ಅಗಸ್ಟಸ್‌

[Picture on page 234]

ತಿಬೇರಿಯ

[Picture on page 235]

ಅಗಸ್ಟಸನ ಆಜ್ಞೆಯ ಕಾರಣದಿಂದಲೇ, ಯೋಸೇಫ ಹಾಗೂ ಮರಿಯರು ಬೇತ್ಲೆಹೇಮ್‌ಗೆ ಪ್ರಯಾಣಿಸಿದರು

[Picture on page 237]

ಮುಂತಿಳಿಸಲ್ಪಟ್ಟಂತೆಯೇ ಯೇಸು ಮರಣದಲ್ಲಿ “ಭಗ್ನ”ಗೊಳಿಸಲ್ಪಟ್ಟನು

[ಪುಟ 356 ರಲ್ಲಿರುವ ಚಿತ್ರಗಳು]

1. ಶಾಲ್‌ಮೇನ್‌ 2. ಒಂದನೆಯ ನೆಪೋಲಿಯನ್‌ 3. ಒಂದನೆಯ ವಿಲ್‌ಹೆಲ್ಮ್‌ 4. ಜರ್ಮನ್‌ ಸೈನಿಕರು, Iನೆಯ ಲೋಕ ಯುದ್ಧ