Apay ay Masapol ay Mantoltoloy Ka?

1. Kas-ano ka ay magon-gonaan no itoltoloy mo ay man-adal si Bibliya?

Sigorado, din panag-adal mo sin kangronaan ay it-itdon di Bibliya et pinapigsana di layadmo en Jehova. Kasapolan ay itoltoloymo ay papigsaen din naey ay layadmo. (1 Pedro 2:2) No itoltoloymo ay omasag-en en Apo Diyos babaen sin panang-adal sin Kali na, mawad-anka si namnama ay biyag ay eng-enggana.​—Basaem nan Juan 17:3; 1 Timoteo 2:3, 4.

No mataptapiyan di ammom maipanggep en Apo Diyos, pomigpigsa di pammatim. Di pammatim din tomolong en sik-a ta maparagsak mo si Apo Diyos. (Hebreo 11:1, 6) Tolonganna sik-a ay manbabawi ya man-amag si gawis ay panagbalbaliw sin biyagmo.​—Basaem nan Inam-amag 3:19.

2. Kas-ano ay magon-gonaan din odom sin panakaammom en Apo Diyos?

Sigorado, laydem ay ibaga sin odom dadin naad-adalmo. Laylayden tako ay mang-ibagbaga sin mayat ay damag. No itoltoloy mo ay man-adal si Bibliya, masursurom ay usaren di Bibliya ay mang-ilawlawag si pammatim en Jehova ya di mayat ay damag.​—Basaem nan Roma 10:13-15.

Kaadoan ay ipogaw et irogida ay ibaga di mayat ay damag sin gagayyemda ono toton-odda. Ngem masapol ay man-annad ka. Imbes ay ibagam ay din patpatienda et baken tet-ewa, ibagam din maipanggep si karkari en Apo Diyos. Adim linglingan ay din il-ilaen di ipogaw et din gawis ay og-ogalim baken din ibagbagam.​—Basaem nan 2 Timoteo 2:24, 25.

3. Sino ay relasyon en Apo Diyos din mabalin mo ay ragsaken?

No man-adalka si Kalin Apo Diyos, makatolong na ta pomigsa di pammatim enggana ay mawad-an ka si espesyal ay relasyon en Jehova. Manbalinka ay miyembro sin pamilya na.​—Basaem nan 2 Corinto 6:18.

4. Kas-ano ay itoltoloy mo ay manprogreso si ispiritual?

Mabalin ay pomigsa ka si ispiritual no itoltoloy mo ay man-adal si Kalin Apo Diyos. (Hebreo 5:13, 14) Manpatolong ka sin esa ay Saksin Jehova ta itdoanna sik-a si Bibliya ay usarenyo di libro ay Ania a Talaga ti Isursuro ti Biblia? No itoltoloy mo ay man-adal si Kalin Apo Diyos, gomawgawis di biyagmo.​—Basaem nan Salmo 1:1-3; 73:27, 28.

Wada sin Bibliya am-in ay “nakaskas-daaw ay mayat ay damag di naragsak ay Diyos,” si Jehova. (1 Timoteo 1:11, NW) Mabalinka ay omasag-en en Apo Diyos no makikadwa ka sin manserserbi en sisya. (Hebreo 10:24, 25) No ipapatim ay paragsaken si Jehova, gongon-odem di tet-ewa ay biyag —biyag ay eng-enggana. Maga di kamamayatan ay amagem no din omasag-en ya manserbi en Apo Diyos.​—Basaem nan 1 Timoteo 6:19.