Nun Baasand​—Yindaay Teng Kuuhal mu Myand ya mu Spirit Kuunyim kwa Batiisumw

1. I myand kaay yilengel yidy baasand bavul baalong?

MUVW woos oow, baasand biin Krist bavul baaheehet batiisumw. Ukaady muman kulong bwaal oobw eeny? Bib biikal neey udy byeeb wa ku bab, manyik neey biin kween baan-balum ni baan-bakaj bady ni musangal bwiibuh, ni Yehow usaasangal byend! (Tus. 27:11) Langok bwa myand yilengel yiwukaady muman kulong. Udy mulong Diiy dya Mawej ni cisumy, misang yikwaabw mukacy mwa mivw yivul. Kulong kwiibuh kwa Bibl i kukujaadikil neey Bibl i Diiy dya Mawej. Nook, wiiyiil kumanyik ni kukat mwiin mukand mujilang oow. Lukat lwiibuh bwa Yehow lwiiyiil kukasakan ni ufiikil teng ni kwangat dihangadik dya kumukadil mudimw ni uw kuhet baatiisumw. Udy mwangat biin-biin dihangadik dilengel dyeeh!

2. I biny bitwiiyiiy kwiisambil mu ciin bwaal eecy?

² Kuuhal kwiibuh kuhet batiisumw uhetel makab mateekel lulamat lwiibuh bwa Yehow mu diiteet. Ki hawendend ni kukuluuh, wiiyiiy kutwiilangan ni mateet makwaabw. Sataan wiiyiiy kulong bwa lukat lwiibuh bwa Yehow lukooyel ni bwa ulek kumukadil mudimw. (Ef. 4:14) Kwiitaboh bend bwa bwaal oobw bukufikil. I biny bidy mwa kukwambulwiish bwa kushaal ni lulamat kudy Yehow ni kukumbaj mucih iibuh wa kumukadil mudimw? Biikam utungunuk nu kuuy kuuhal​—ni ‘ufik’ hakushaal mwiin Krist mushimat. (Ebr. 6:1) I mushind kaay uwudy mwa kulong naak?

3. Bikaam biin Krist boos balong biny hadyobw baman kuhet baatiisumw?

³ Kuunyim kwa baatiisumw, tut boos tukaakaam kulond mubel waakady mupostol Pool mwaakish biin Krist ba mu Efez. Waakady mwiibakashish bwa kushaalobw biin Krist “bakuluuh.” (Ef. 4:13) Byumvumvwiij neey baakady mwa ‘Kutungunuk ni kuy kuuhal.’ Tudy mwa kumvw cyaakady Pool ukaam kuleeb hafwanyikijiley kukuluuh kwiitut kwa mu spirit ni mushind ukukuluuh mwaan. Balel ba mwaan mutook-took i bamukat ni bady ni musangal bwindiy. Ki kiin ushaal teng mwan buyiil. Hady mafuk mahit, wiiyiiy kulek “myand yoos ya butofw.” (1 Kor. 13:11) I bya mushind aakaabumw bwa biin Krist. Biikam tutungunuk ni kuy kuuhal kuunyim kwa baatiisumw iitut. Tukontonaay mishind yidy mwa kwiitusak bwa kulong naak.

4. I ciikadil kaay cidy mwa kukwambulwiish bwiibuh kuy kuuhal mu myand ya mu spirit? Umvwiij. (Filipw 1:9)

⁴ Kashish lukat lwiibuh bwa Yehow. Ukaady muman kukat Yehow bikasakan. Ki bikaam ukashish bikasakan lukat luwudy naalw bwindiy. I mushind kaay uwudy mwa kulong nook? Mupostol Pool uleejel mushind aakaabumw, udy mu Filipw 1:9. (Bal.) Pool usambiil bwa lukat lwaakady naalw biin Filipw “lutam ni luy kuuhal.” Nook tudy mwa kukashish lukat lwiitut bwa Yehow. Tudy mwa kulong nook hakumanyik kwa “myand ya biin-biin ni kumvw kulengel.” Hatumamanyik Yehow bilengel menmen, twiiyiiy kumukat bikasakan ni twanyish biikadil bindiy ni mushind udyey ulong myand. Lukat lwiitut bwa kusangeej Yehow lwiiyiiy kukasakan, ni katwiin bakatoh bend bwa kulong bwaal bwiikal mwa kumumb mwanz ku makas. Tulong mwiitut moos bwa kumvw cidy lukat lwa Mawej ni mutudy mwa kulong myand yihehetangan ni cidyey mukat.

5-6. I mushind kaay utudy mwa kukashish lukat lwiitut bwa Yehow? Umvwiij.

⁵ Twiiyiiy kukat Yehow bikasakan hatumamanyik Mwaan indiy bilengel menmen, udy mufwaanok biikadil byaTaat indiy mu mushind muwaakan. (Ebr. 1:3) Mushind mulengel utudy mwa kumanyik Yeez i kulong myand yidyobw baleej mu mikand ya misah yinaay yileeleeb bwindiy. Uw mwiikal kuy ni ciibidil cya buseeb cya kubal Mukand a Mawej diifuk dyoos, Bwabiny kwiin mwa kutang kaab aak? Hawubaabal myand habitaatal Yeez, imanyin bikasakan meej miibuh ha biikadil bindiy. Waakady muut a kukwaacil myand; ni waakady wangat baan ni wiibabukacil. (Mark 10:13-16) Waakady bilengel ni biiyij bindiy; baakady biiyumvw biilekelel bwa kumwambil myand yaakadyobw naay ku micim. (Mat. 16:22) Nook, Yeez waakady teng wiidikij Taat indiy a mu diiwul. Cikwaabw, Yehow ki yiy utudy mwa kukwaacil bikasakan myand. Tudy mwa kufweej kudyey hatumusaasambil. Hatusaasambil, tudy mwa kumwambil bwaal boos butulaalang eecy butudy naabw ku micim. Tudy bajaadik neey kakutulumbulwishoh bend. I mwiitukat; ni wiitaatacish bwiitut.​—1 Py. 5:7.

⁶ Yeez waakady ni micim yimwiit mund bwa baat. Mupostol Matewus uleebel neey: “Hatadiley baat milul ni milul, umvwiil lus, bwaal baakady bakooy, bahomw ni kuhomw bu mikook kayiy ni waakwiiyilam.” (Mat. 9:36) Ni i mushind kaay udy Yehow byend umvw? Yeez uleebel neey: ‘Taat aam kiish mukat ning waakaabumw ku baan batofw aab, ajimban.” (Mat. 18:14) May aam miitwaakaakish musangal bwaal miituleeleej neey Yehow i mwiitukat bikasakan! Hatumamanyik Yeez bilengelmenmen, lukat lwiitut bwa Yehow lwiiyiiy kukasakan.

7. I mushind kaay mudy kushikat ni biin Krist bashimat mwa kukwambulwiish?

⁷ Udy mwa kuleejangan byeeb lukat luvul ni udy mwa kushaal mwiin Krist mushimat hakwangat diib dya kumanyikangan ni biin-kween baan-balum ni baan-bakaj ba mu cisumbw ciinun. Tal mudyobw ni musangal. Kabiin ni kaakunying bwa diihangadik dyaabaab dya kukadil Yehow mudimw. Iibihanguj bwa bakwambiloh myand yilengel yidyobw bahet mu mudimw a Yehow. Hawukaakaaam kwangat dihangadik dya buseeb, ibalombok mubel. Manyik neey: “baat babuubutuk diib didyek kakuy may makwiibalombol naam.”​—Tus. 11:14.

8. I biny biwudy mwa kulong uw mwiikal weelakan habidy Bibl ulongweesh ang?

⁸ Lek miland. Teng mudyobw bibileej mu cikos 2, Sataan wiiyiiy kukuteet bwa kukukaakaadish bwiibuh kuy kuuhal mu myand ya mu spirit. Umw mushind udyey ulong naak, i hadyey ulong bwa ulandul mamw malongweesh ma mu Bibl. Ciileejel, baat bakwaabw bady mwa kukusak bwa wiitab neey, kiin Mawej udy mwiituhang ni batwaal kabingil ka neey biit i bilongekel. Ki kaabaak muwukaady muut mukuluuh bady mwa kwiikal ki bakulongweesh misang yikwaabw dilongweesh eedy mu kalaas. Misang yikwaabw bidy balongweesh baleeb bidy mwa kumweek bu bya biin-biin bwiibuh. Ki cikwaabw balongeesh aab kabiin banj kumanyik neey, kudy Cyakahang. Vuluk diiy ditam didy mu Tusumw 18:17: “Wa kuuhal kulumbulul cilumbw umweemweek bu mubing, ki diib diiyiiy uluulumbululobw nend umufwiifwiish.” Hamut iibuh kwiitabakan bidyobw bakulongweesh mu kalaas, bikaam ulong ni meej Diiy dya Mawej bwa kumanyik biin-biin. Kaam ni Joojolol myand mu mikand yiitut. Iisambok ni biin-kweet baan-balum ni baan-bakaj baakady biitabil byaab dilongweesh dya neey: biit i bilongekel. Ibihangujok bwa kumanyik cyaakady cibajaadikil neey kudy Cyakahang i mwiitukat. Misambw ya mushind oow yidy mwa kukwambulwiish bwiibuh kuhet bijaadik bya biin-biin neey, kudy Cyakahang.

9. I biny biwudy mulongel ku cileejel cya Melissa?

⁹ Mwiin-kweet mwaan-mukaj Melissa waakady mulong biin-bwaal byaakady bileeb bwa biit bihang ni kulong ook, kumwambulwiishil bwa kulek kweelakan.b Uleebel neey: “Mushind udy balongweesh balongweesh mu kalaas bwa neey biit ibilongekel udy ni bweenzenj buvul kudy baat. Musang a kuuhal, naakady numvw mooy bwa mim kulek kulandul kwaam. Naakady ni mooy bwaal naakady mumanyik neey, dilongweesh dya neey, biit i bilongekel i dya biin-biin. Ki nalangil neey, Yehow kiin mukat bwiitut kumukadil mudimw mu cingenyingeny. Ki bwabiny nalekel kweelakan kunaakady naak. Nabadil mukand wa neey: Y a-t-il un Créateur qui se soucie de vous? ni broshir wa neey: La vie a-t-elle été créee? Ni wa Cinq questions à se poser sur l’ origine de la vie. Ki cinaakady nakaam biin-biin.”

10-11. I biny bidy mwa kukwambulwiish bwiibuh kwiilam ku myand yiibiih? (1 Biin Tesalonik 4:3, 4)

¹⁰ Lek biikadil bibiih. Mu ciisang cya buusand, kulang kwa kusangil ni muut ukiish wa nyeet yaakaabumw neeb kudy mwa kwiiy kukasakan, ni misang yikwaabw bady mwa kukulongweesh ku makand bwiibuw kwend masandy. Ki cidy Sataan mukat bwa uloong. Ki i biny bidy mwa kukwambulwiish bwiibuh kutaatameen bulwiish oobw? (Bal 1 Biin Tesalonik 4:3, 4.) Mu masambil miibuh mawuloolong, ambil Yehow myand yoos yiwudy naay ku micim. Mwambil biin-biin myand yiwudy naay, ni mulomb bwa akukashish. (Mat. 6:13) Vuluk neey, Yehow i mukat kukwambulwiish, ni kiin mukat bwa kukulumbulwiish. (Mus. 103:13, 14) Cikwaabw, Bibl udy mwa kukwambulwiish. Melissa, utukaady bateel mu bikos bishaal, ulwiil diivit bwa kukasakeen meej mabiih. Uleebel neey: “Kubal kwa Bibl diifuk dyoos kuyaayambulwiish bwa kutungunuk ni kul diivit bwa kwaalakan kubiih. Ni myand yinaakady nabal yaakady yivulwiij neey, nady muut a Yehow ni nady mukat ku mukadil mudimw mu shikacil aam​—Mus. 119:9.

¹¹ Kukaam bwa kwiimanyin myand kaayeeb. Ambil balel biibuh myand yidy yikukasakeen. Kabiish biiheehel bwa kwambil muut myand yiwudy naay, ki bidy ni buseeb buvul bwa kwiiyileeb. Melissa uleeleeb: “Nasambiil ni mucim mukasakan ni naabiil taat bwaaI bunaakady naabw ku micim. Analongel nook, nahetel disulakan didiin dyeeh. Nady mu manyik neey: Yehow waakady musangal bwa mim.”

12. I mushind kaay uwudy mwa kwangat mahangadik malengel?

¹² Lek may matam ma mu Bibl makulombol. Bu muwendend ukuluuh, balel biibuh i bakat kukuleekeel bwiibuh kwiiyangacil mahangadik. Ki i bamanyik myand yivul ya mu shikacil yiwudy uw kuy mumanyik. I mushind kaay uwudy mwa kweewuk bwa kulek kulong bwaal bubiih budy mwa kunyang bulund bwiibuh ni Yehow? (Tus. 22:3) Mwiin-kweet mwaan-mukaj Kari umvumvwiij cyaakady cimwambulwiish bwa kwangatey mahangadik ma buseeb. Waakady mwiiy kumanyik neey: biin Krist bashimat kabiin bakaam bwa biikal bibalombol mu myand yoos. Uleeleeb neey: “Nakaamin kumanyik bikasakan may matam ma mu Bibl hamut a kulond mikenj.” Hawubaabal Bibl, iyihanguj neey: ‘I mushind kaay udy verseh oow uyambulwiish habitaatal mushind a kulang wa Yehow? May matam madyomw aam mady mwa kulombol shikacil aam eeny? Biby naak, i musangal kaay unady mwa kuhetelok ha kwiimakooyel?’ (Mus. 19:7; Ye. 48:17, 18) Kubal kwa Bibl ni kulangil a may matam, kwiiyiiy kukwambulwiish bwiibuh kwangat mahangadik masaasangeej Yehow. Bumuwututungunuk ni kuy kuuhal, uleeleej mudyobw kabay teng mwa kukwangacil mahangadik bwaal udy mu manyik bilengel mudy Yehow ulang mu bwaal oobw.

13. I mushind kaay udy balund balengel mwa kukwambulwiish? (Tusumw 13:20)

¹³ Sungul balund bady bakat Yehow. Teng mutubam kwiibital, balund bawusuusungul bady mwa kukwambulwiish bwiibuh kuy kuuhal mu spirit. (Bal Tusumw 13:20.) Mwiin-kweet mwaan-mukaj Sara ujimbajil musangal indiy. Ki kulongekel bwaal kahand bwaakady bumwambulwiish bwa kuhetululey cikwaabw musangal. Sara uleeleeb neey: “Nady muhet balund balengel mu shikacil aam mu ciisang cilengel. Mim ni mwiin-kweet saand mwaan-mukaj tudyaakal tuy nend mu dya luming dyoos bwa kukalong Cibumb cya Muteetekel. Mulund naany mukwaabw uyambulwiishil bwa mim kutang kutwaal malabul mu bisangil. Bumwaakady balund baam bayambulwiish, natangil kwiilongel Bibl ni nasambil bikasakan. Nakashishil bikasakan bulund bwaam ni Yehow, ni natwaadijil kwiiyumvw cikwaabw ni musangal.”

14. I biny bilongel Julien bwa kuhet balund balengel?

¹⁴ I mushind kaay uwudy mwa kuhet balund bady mwa kukusak bwa kulong myand yilengel? Julien, ukaakal mudimw bu mukul, uleeleeb neey: “Hanacyaakady mwaan mutofw, nahetel balund baIengel hanaakady mu mudimw a bukajaady. Balund aab baakady ni cisumy, ni bayaambulwiishil bwa munady mwa kwiikal ni musangal mu mudimw a bukajaady. Nangacil kiihacil ka kukal mudimw a kudiil baat musah wa diib ni ku diib. Natadil cikwaabw neey cyaakady muhet balund bavul balengel bwaal naakady natal teng balund ba mulong naany. Hahitil mafuk, naheteI cikwaabw balund balengel ku Betel. Cileejel cyaabab i ciiyambulwiish bwa kukaam mishind yilengel ya kuhitij naay kaheeh, ni kulong nook kwaakady kuufweej habwiih menmen ni Yehow.”

15. I mubel kaay waakady Pool mwaakish Timoteh habitaatal bulund? (2 Timoteh 2:20-22)

¹⁵ I biny biwudy mwa kulong uw mutal neey muut kahand wa mu cisumbw kiin mulengel bwa kudy nend bulund? Pool waakady mumanyik neey kwaakady biin Krist bakwaabw ba mu cisumbw cya biin Krist cya mu siyekel a kuuhal baakady batal myand ya mu spirit mu mushind mubiih, ki bwabiny udimwiijil Timoteh bwa kaay waashikat bikasakan ni baat ba nook. (Bal 2 Timoteh 2:20-22.) Bulund bwiitut ni Yehow budy ni buseeb. Kabiin bikaam twiitab bwa muut ning waakaabumw iitukooyesh mu diitabij habitaatal bulund bwiitut ni Taat iitut udy mu diiwul.​—Mis. 26:4.

16. I biihacil kaay biwudy mwa kwiifundil?

¹⁶ Wiifundil biihacil bidy ni buseeb. Wiifundil biihacil bidy mwa kukashish diitabij diibuh ni bidy mwa kukwambulwiish bwa kushaal mwiin Krist mushimat. (Ef. 3:16) Cileejel, udy mwa kwangat dihangadik dya kulengej mushind iibuh a kwiilongel ni wa kubal Bibl. (Mis. 1:2, 3) Eecy udy mwa kwangat dihangadik dya kwiikal ni ciibidil cya kusambil misang yivul ni hakulong masambil malaalukil ku micim yiibuh. Misang yikwaabw bikaam wiiyibidij bwa kwiikand bikasakan mu mishind iibuh ya kuhitij naay kaheeh ni mushind uwudy mwa kukal mudimw ni diib diibuh. (Ef. 5:15, 16) Hady Yehow utal kwiikashishomw kwiibuh kwa kuh kuuhal menmen, wiikaakal ni musangal.

17. I musangal kaay uwiiyiiy kuhet hawambambulwiish bakwaabw?

¹⁷ Udy mwa kushaal mwiin Krist mukuluuh mu diitabij diib diwambambulwiish baat bakwaabw. Yeez uleebel neey: “Waakaakishangan biit udy ni musangal muvul muhitok waakaakishobw!” (Yil. 20:35) Wiiyiiy kuhet mabenesh mavul uw ukal mudimw ni diib diibuh ni diikand diibuh dya buusand bwa kwambulwiish bakwaabw. Cileejel, udy mwa kwangat diihandik dya kwambulwiishok muut mukuluuh ni mwiin-kweet udy mulemen mu cisumbw ciinun. Misang yikwaabw udy mwa kwiibambulwiish ha kuy kwiibasumbil biit bikaakaamobw ni kwiibambulwiish bwa mushind a kukal mudimw ni byaamw. Uw mwiikal mwiin-kweet mwaan-mulum, wiifundil kiihacil ka kushaal mukwanjok wa mudimw, ni bwiibuh kwambulwiish baan-been baan-balum ni baan bakaj. (Fili. 2:4) Udy mwa kuleej muwudy mukat baat bakiish Batemw ba Yehow hakwiibadiil musah mulengel a Bukaleng . (Mat. 9:36, 37) Kuk mushind, udy mwa kwiifundil kiihacil ka kukal mudimw a bukajaady wa ku diib ni ku diib.

18. Mudimw a kudiil baat musah wa ku diib ni ku diib udy mwa kukwambulwiish bwa kuy kuuhal mu myand ya mu spirit bicy?

¹⁸ Mudimw a ku diib ni ku diib udy mwa kukwambulwiish hakukuhetesh mishind yivul bwa kuy kuuhal menmen mu myand ya mu spirit. Mudimw a buuseb’ aa njil udy mwa kwiikal bu lufungul ludy mwa kukwambulwiish bwiibuh kuy ku Kalaas ka Badiil ba Baat Musah ba Bukaleng. Udy mwa kukal mudimw ku Betel eecy bwa kwambulwiish ku midimw ya lwiibak lwa mazubw mataatal myand ya Bukaleng. Mwiin-kweet mwaan-mukaj Kaitlyn udy seb’ aa njil wa bidimw 21 uleeleeb neey: “Kuhitij diib mu mudimw a bukajaady ni biin-kweet bashimat kuuyambulwiishil bwa mum kuy kuuhal mu myand ya mu spirit hanamanyin kuhet baatiisumw. Cileejel cyaabab cyaakady cisak bwa mum kulong bikasakan ni bwa kulengeej mushind aam a kulongweesh.”

19. I mabenesh kaay mawiiyiiy kuhet hawutuutungunuk ni kuy kuuhal mu myand ya mu spirit?

¹⁹ Uw mutungunuk ni kuy kuuhal mu myand ya mu spirit, Yehow wiiyiiy ukufiil kis bikasakan. Kunyangoh bend buusand bwiibuh hakukal mudimw bibiih ni diib diibuh ni diikand hakulong myand yikiish ni buseeb. (1 Jah 2:17) Kwakwiikaloh bend ni kaakunying kady muut mwa kuhet hakwangat mahandik mabiih. Ki, wiiyiiy kwiikal biin-biin ni musangal muvul. (Tus. 16:3) Ciileejel ciibuh cilengel ciiyiiy cikashish biin Krist neeb, baasand ni bakuluuh. (1 Tim. 4:12) Ni bwaal bwa buseeb budy neey, wiiyiiy kwiikal ni diitalal ni musangal bya kudy Yehow ni wiiyiiy kwiikal cikwaabw ni bulund busheem nend.​—Tus. 23:15, 16.