Diis dya Yehow Didy Kudy Baat Bindiy

1. Bwabiny Yeez ulombel Yehow bwa kulamey biiyij bindiy?

BUFUK kuuhal kwa kufwey, Yeez ulongel diisambil dya habwaah kudy Taat indiy udy mu diiwul. Ulombel Yehow bwa kulamey biiyij bindiy. (Jah 17:15, 20) Biin-biin, Yehow udy teng mwiibalam​—wiibambulwiish ni mulam—​baat bindiy. Ki, Yeez waakady mumanyik neey biiyij bindiy biiyiiy kutwiilangan ni bulwiish bwa Sataan bwaakadyobw kabay batakamin. Yeez utadil neey byaakady bikaam Yehow Iibambulwiish bwa kukasakeenobww bulwiish bubiih bwa Dyabol.

2. Bilondeshel Musambw 33:18-20, bwabiny kabiin bikaam twiikal tuciin hatuheehet makab?

² Bulongolody budy Sataan ulombol oobw, bukookolomweeny biin Krist makab mavul. Tutwiitwiilangan ni makab mady mwa kwiitukooyesh mu mabok ni mady mwa kuteek cikwaabw lulamat lwiitut kudy Yehow mu diiteet. Ki twiiyiiy kutal mu ciin bwaal eecy neey katwiin ni citudy mwa kuciin. Yehow wiitulaalam​—utaatal makeng matutaatameen, ni udy habwiih bwa kwiitwambulwiish bwiitut kuhit naam bilengel. Tukontononaay bileejel bibidy bya mu Bibl bileeleej mudy Yehow ‘utal aab bamuneeneemek.’​—Bal Musambw 33:18-20.

3. I diib kaay ditudy mwa kwiiyumvw neey tudy kaayeet?

³ Ning mutudy ni biin-kweet baan-balum ni baan bakaj mu cisumbw, tudy mwa kwiiyumvw misang yikwaabw kaayeet. Cileejel, baasand bady mwa kumvw buukaay hadyobw kuuhal kwa balony baabab bwa kwiibumvwiij malongweesh madyobw biitab eecy hadyobw baaluk mu cisumbw cyaabab ni bay mu cikwaabw. Bamw ba kutudy bady mwa kuhet kaakunying eecy biiyumvw bakooyel mu mabok, balang neey bataataatameen ni biiyuyumvw nook bab kaayaabwt. Tudy mwa kweelakan bwa kwambiloh baat bakwaabw bwa mushind wiitwiiyuuyumvw bwaal tutaatat ni micim ha kulang neey kabaakumvwoh mutwiiyuuyumvw. Ni mu biisang bya nook, tudy mwa kwiiyihanguj cikwaabw ning kudy biin-biin muut udy mwa kwiitutabaleel. Kwiikal ni meej ma buukaay​—bwa kabingil kaay koos—​bidy mwa kulong bwa misang yikwaabw twiiyumvw neey kabiin biitwambulwiish ni biikal teng tukabakan ni micim. Yehow kiin mukatoh bend bwa twiiyumvw nook. Bwabiny tuleeleeb naak?

4. Bwabiny muprofet Elih uleebel neey: “Nady mushaal teng mim kaayaany”?

⁴ Twangat cileejel cya Elih muut a lulamat. Jezabel wangacil dihangadik bwa bamuzuh, ki bwabiny waakady uy lubil mukacy mwa mafuk 40. (1 Bak 19:1-9) Bulekel bwa byoos, waakady kahend mu cihak, wambiil Yehow neey: “Nady mushaal teng mim kaayaany [muprofet].” (1 Bak 19:10) Kwaakady baprofet bakwaabw mu cibunj; Obadiyah usokokel baprofet 100 ba mukacy mwaabab bwa kaay bibalongel bibiih kudy baat ba Jezabel. (1 Bak 18:7, 13) Bwabiny Elih umvwiil neey waakady kaayend? Ulangil neey baprofet baakady Obadiyah musokok baakady kaabaak bafw boos eeny? Waakady mwiiyumvw misang yikwaabw kaayend bwaal kakwaakady muut mukwaabw ukacil bwa kwiikal nend mu mudimw a Yehow kuunyim kwa diiteet dya Baal ku mulund a Karmel? Waakady mwa kumanyikok neey balwiish bindiy baakady bakaam kumuzuh eecy wiyihangujilok neey kwaakaadyok muut waakady mwa kumulam eeny? Bwaal oobw kabwiin butwaal dyumvwiij dyoos bwa mushind waakady Elih wiiyumvw menmen. Ki i mushind kaay utudy bamanyik neey Yehow waakady mumvw kabingil kaakady kalong bwa Elih iyumvw mwiikal kaayeend ni waakady mumanyik biin-biin mwaakadyey mwa kumwambulwiish.

5. I mushind kaay waakady Yehow mujaadikil Elih neey kaakadyoh bend kaayend?

⁵ Yehow wambulwiish Elih mu mishind yivul. Waakady mukashish Elih ku micim bwa kwiisambey. Wihangujil Elih misang yibidy neey: “Bwaabingany udy hiinaah, a Elih?” (1 Bak 19:9, 13) Ku cikuuk ni ku cikuuk, Yehow waakady teng ukun Elih mat haakadyey umwambil mwaakadyey wiiyumvw. Yehow waakady waalabul Elih hakumuleej neey waakady habwiih Nend ni udy ni bukash buvul. Yehow ujaadikil cikwaabw Elih neey kwaakady biin Izaleel bakwaabw bavul bacyaakady batungunuk ni kumuhambidil. (1 Bak 19:11, 12, 18) Cya biin-biin, Elih wiiyumvwiil musulakan haakadyey mwambil Yehow myand yaakady yimutond ni bwa kumvw dyaalabul Dindiy. Yehow waakishil Elih midimw ya buseeb yivul ya kulong. Umwamwambiil bwa kuy kukajikwiil Hazayel hakumushing diisaby bwa kwiikaley mukaleng wa Sirih, ni bwa kushing cikwaabw Yehuh diisaby bwa kushaal mukaleng a Izaleel, ni kuteek Elizeh bu muprofet. (1 Bak 19:15, 16) Hakwaakish Elih midimw eey, Yehow umwambulwiishil bwa iikal wiimanyin teng ha myand yilengel. Mawej umwaakishil cikwaabw ni mulund mulengel Elizeh. I mushind kaay uwudy mwa kuhet dyambulwiish dya kudy Yehow hawiiyuuyumvw kaayeeb?

6. I biny biwudy mwa kuleeb mu diisambil hawiiyuuyumvw neey ukaakab ni buukaay? (Misambw 62:8)

⁶ Yehow ukuloolomb bwa wiikal umusambil. I mutal makab mawudy naam, ni ukujaajadikil neey wiikaakal umvw masambil miibuh diib dyoos. (1 Tes. 5:17) Udy ni musangal bwa kukun mat ku masambil ma bahambidil bindiy. (Tus. 15:8) I biny biwudy mwa kuleeb mu diisambil hawiiyuuyumvw ni ukaakab ni buukaay? Ambil Yehow myand yiwudy naay ku micim, teng bu mulongel Elih. (Bal Misambw 62:8, NWT) Mwambil myand yidy yikutond ni mushind uwiiyuuyumvw. Lomb Yehow bwa akwambulwiish bwa kumanyik ciwudy mwa kulong hawiiyuuyumvw kaayeeb eecy hawudy ni kaakunying. cileejel, uw mwiisangan kaayeeb kuuhal kwa balony biinun ba mu kalaas ni utal neey i bikasakan bwa kwiibaalabul ku majooj habitaatal myand yiwudy mwiitabij, lomb Yehow bwa akwaakish mucim mukasakan bwiibuh kwiibumvwiij. Udy mwa kumulomb cikwaabw bwa akwaakish meej bwiibuh kutal mushind uwudy mwa kumvwiij malongweesh mawudy mwiitabij ni budyumw. (Luuk 21:14, 15) Uw mwiiyumvw neey udy mukooyel mu mabok bwa myand kahand, lomb Yehow bwa akwambulwiish bwa nwiisamb ni mwiin Krist mukuluuh mu diitabij ha bwaal aab. Udy mwa kulomb Yehow bwa akwambulwiish bwa kwambil muut uwudy muteekel micim bwa umvw mushind uwiiyuuyumvw. Ambil Yehow myand yoos yidy yikutond, tal mudyey waalabul ku masambil miibuh ni iitab dyambulwiish didy bakwaabw bakwaakish; uw mulong nook, kwakwiitaloh bend neey udy kaayeeb.

7. Cileejel cya Mauricio cikuloolongweeshok biny?

⁷ Yehow i mwiitwaakish tut boos mudimw a kulong udy ni buseeb. Iikal mujaadik neey i mumanyik ni wanyanyish midimw yoos yiwuloolong mu cisumbw ni mu mudimw a bukajaady. (Mus. 110:3) I mushind kaay mudy kwiikal ni bivul bya kulong mu mudimw oow kukwambulwiish hawumvumvwok buukaay? Tutalaay cileejel cya mwiin-kweet mwaan-mulum Mauricio.b Mafuk makeeh Mauricio muman kuhet baatiisumw, umw wa ku balund nend ba ha micim utwaadijil kulek bulongolody bwa Mawej. Mauricio uleeleeb neey: “Hanatadil mwaakadyey mulek Yehow byaakady biiteng bikasakan ku micim,” “Naakady mwiiyihanguj ning naakady mwa kukumbaj mucih unalongel bwa kukadil Yehow mudimw ni bwa kushaal umw a mu biin mu cisak cindiy. Niiyumvwiil kaayaany ni nalangil neey kakwaakady muut udy mwa kumvw myand yidy yiitond.” I biny byambulwiishil Mauricio? Uleeleeb neey: “naakadiil bikasakan mudimw a bukajaady.” “Kulong nook kuyambulwiishil bwa kulek kwiikal ni meej ma buukaay ni bwa kulek kulang bibiih bwa mim. Numvwiil musangal ni meej ma buukaay makeehelok hanaakady nadiil baat musah ni baan-beet bakwaabw.” Biin-biin, ning mutudy katuy tudiil baat musah ku mazubw maabab, i biitutukashish ku micim bwa kwiibadiil musah hakwiibafundil mikand ni kwiisamb naabw ku telefon. I biny bikwaabw byambulwiishil Mauricio? Uleeleeb neey: “Naakady natungunuk ni kukal midimw yivul mu cisumbw. Naakady nalong mwa mim moos bwa kulongolol bisangil ni midimw ya kulong mu bisangil yaakadyobw bayaakish. Kulong kwa midimw eey kulongel bwa niiyumvw neey naakady ni buseeb ku mees kwa Yehow ni kwa baat bakwaabw.”

8. Tudy mwa kwiiyumvw bicy hatuheehet makab makasakan?

⁸ Tudy batakamin bwa kuhet makab mu mafuk ma bulekel aam. (2 Tim. 3:1) Cikwaabw, tudy mwa kushushumuk hady makab ma mishind kahand miitufikil. Tudy mwa kuhet lutat bwa myand ya fwalang, dokteer udy mwa kwiitwambil neey tudy ni lubeel lukasakan, eecy tudy mwa kufwiish muut utudy bakat. Mu biisang eeby, tudy mwa kwiikal ni kaakunying eecy bahomw, amanaman biby biikal neey makab i ma kamulondakany eecy cikwaabw miikal mavul musang aakaabumw. Vuluk neey Yehow i mumanyik myand yidy naay woos wa kutudy, ni ku dyambulwiish dindiy tudy mwa kutaatameen makab moos ni mucim aakaabumw.

9. Teelok mamw ma ku makab mahetel Yoobw.

⁹ Lang ket bwa mwaakady Yehow mwambulwiish Yoobw mwiin mudimw indiy a lulamat. Uhetel makab ma mulul mamwaakishil kaakunying mu ciisang kahand. Mu diifuk dyaakaabumw, bamwambiil neey nyam yindiy yoos i biiyiib ni bazuh biin mudimw bindiy ni bwaal bukwaabw bubiih menmen i bwa neey baan bindiy baakadyey mukat bafwiil. (Yoobw 1:13-19) Kuunyim kwa kalung kakeeh, hacyaakadyey udil, mwiikal ni kaakunying kavul, lubel lukasakan lwiiyiil kumukwaat cikwaabw. (Yoobw 2:7) Shikacil indiy waakady mubiih menmen ni Yoobw mwiin kaayend kuleeb neey: “Bibaatond! Ciish niikaloh buyiil.”​—Yoobw 7:16.

10. I mushind kaay waakady Yehow mwambulwiish Yoobw bwa kutaatameeney makab mindiy? (Tal cifwaatul cya ha cizubw.)

¹⁰ Diis dya yehow dyaakady kudy Yoobw. Bwaal Yehow waakady mukat Yoobw, umwaakishil cyaakadyey ukaam bwa kutaatameeney makab maakadyey utwiilangan naam ni bwa kushaaley ni lulamat kudyey. Yehow wiisambil ni Yoobw, umuvulwiij bwa meej mindiy makiish ni bulekel ni bwa mushind udyey utabalel biit bidyey muhang. Umwambil cikwaabw bwa nyam yitam yivul yikeekemesh. (Yoobw 38:1, 2; 39:9, 13, 19, 27; 40:15; 41:1, 2) Yehow ukadil cikwaabw mudimw ni sangiilum mukwaabw diijin dindiy waakady Elihuh bwa kukashish Yoobw ku micim. Elihuh umujaadikil neey wiiyiiy teng kwaakish bahambidil bindiy bulang bwa kutaatameen kwaababw. Ki Yehow waakady musak Elihuh bwa kuyey kakish Yoobw mibel ya lukat. Elihuh wambulwiishil Yoobw bwa kaay waalang bikasakan bwa shikacil indiy hakumuvulwiiljok neey tudy tuut tukeeh menmen hatwiifwaafwanyikij ni Yehow, Hang a diiwul ni bulab. (Yoobw 37:14) Yehow wambidil cikwaabw Yoobw bwa kwiikaley usambidil balund bindiy basat baakady bamulongel bibiih. (Yoobw 42:8-10) I mushind kaay udy Yehow wiitukwanjok leeloow hatutwiitwiilangan ni makab makasakan?

11. I mushind kaay udy Bibl wiitwambulwiish mu biisang bitudy mu makab?

¹¹ Leeloow, Yehow kiin wiisamb neet buludy-ludy bu mulongeley bwa yoobw, ki wiisaasamb neet ku dyambulwiish dya Bibl, Diiy dindiy. (Rom 15:4) Wiitukaakashish ku micim hakwiitwaakish kutakamin bwa mafuk maciiyiiy. Tukontononaay may kahand ma mu Bibl mady mwa kwiitukashish mu ciisang cituhehet makab. Mu Bibl, Yehow wiitujaajadikil neey kakwiishoh bend ciit​—ni mateet makasakan—​‘biikal mwa kunyang lukat ludy hakacy hiitut [nend].’ (Rom 8:38, 39) Wiitujaajadikil cikwaabw neey “udy habwiih ni boos bamubiibiikan” mu diisambil. (Mus. 145:18) Yehow wiitwambambil neey tut bamuteekel micim, tudy mwa kutaatameen mateet ning ma bicy ni tushaal cikwaabw ni musangal hatukaakab. (1 Kor. 10:13; Jak 1:2, 12) Diiy dya Mawej dituvuvulwiij cikwaabw neey makab matutwiitwiilangan naam leeloow madyok bwa mafuk makeeh menmen hatwiimafwaafwanyikij ni bulang bwa buyiil budy Mawej wiitwaakish. (2 Kor. 4:16-18) Yehow wiitwaakakish kutakamin kwa biin-biin kwa neey kubutul boos bakaakaamish makab moos matudy naam, i bwiin kuleeb neey​—Sataan Dyabol ni bamulong a myand yibiih teng bu yiy. (Mus. 37:10) Udy mukwaatok yimw verseh ya mu Bibl yikaakashish mu mut yidy mwa kukwambulwiish bwa kutaatameen makab mawiikal mwa kutwiilangan naam eeny?

12. I biny bidy Yehow wiitulomb bwa kulong tut tukaam menmen kuhet mabenesh ku dyambulwiish dya diiy dindiy?

¹² Yehow wiitulomb bwa twiikal ni diib dya kwiilongel Bibl ha ciibidil ni bwiitut kulangil bikasakan ha bitubaabal. Hatukookoyel habituloolong, diitabij diitut diiyiiy kukasakan menmen ni twiiyiiy kwiikal habwiih menmen ni Taat iitut udy mu diiwul. Bu cihet, Myand yitudy babal yiiyiiy kwiitukashish bwiitut kutaatameen makab. Yehow wakaakakish cikwaabw aab bady ni diitabij mu diiy dindiy spirit indiy mujilangan. Ni spirit oow udy mwa kwiitwaakish “bukash buhit bwa ha ciibidil” bwa kutaatameen makab moos.​—2 Kor. 4:7-10.

13. Byaakudy bya mu spirit bidyobw biitwaakish kudy “muhik a lulamat udy mudimuk” biitwambulwiish bwa kutaatameen mateet bicy?

¹³ Ku dyambulwiish dya Yehow, “muhik a lulamat udy mudimuk” uhaahatul biin bwaal bivul, video, ni misambw yidy mwa kwiitwambulwiish bwa kukashish diitabij diitut ni bwiitut kushaal habwiih ni Yehow. (Mat. 24:45) Bikaam tukal mudimw bilengel ni biit byoos bidy Yehow wiitwaakish ha ciisang cikumban. Mwiin-kweet sangikaj mukwaabw wa mu États-Unis uleebel mafuk mashaal aam neey waakady wanyish bikasakan byaakudy byoos bya mu spirit. Uleeleeb neey: “Mu mivw 40 yinady mukadil Yehow mudimw, nahetel makab misang ni misang bwa mucim aam mutook.” Waakady mutwiilangan ni mateet makasakan​—kaak indiy mwaan-mulum waakady mwendesh a mashiny cikol a mal, balel bindiy bahetel lubel lukasakan ni bafwiil, ni uhetel lubeel lwa kanseer misang yibidy. I biny bimwambulwiishil bwa kutaataameney? Uleeleeb neey: “Yehow waakady teng uyambulwiish. Byaakudy bya mu spirit bidyey muyaakish ku dyambulwiish dya muhik a lulamat udy mudimuk i biiyambulwiish bwa kutaatameen. Bwa bwaal oobw, nady mwa kwiiyumvw teng bu Yoobw uleebel neey: ‘Teng ni munaafw, cya kulekoh bend mucim aam mutook!’”​—Yoobw 27:5, NWT.

14. I mushind kay udy Yehow ukal mudimw ni biin Krist neet bwa kwiitwambulwiish mu ciisang citudy ni makab? (1 Biin Tesalonik 4:9)

¹⁴ Yehow i mulongweesh baat bindiy bwa kukatangan ni bwa kukashishangan ku micim mu biisang bya makab ni mal. (2 Kor. 1:3, 4; bal 1 Biin Tesalonik 4:9.) Hakwiidikij Elihuh, biin-kwet baan-balum ni baan-bakaj i bakat bikasakan kwiitwambulwiish bwiitut kushaal ni lulamat hatutwiitwiilangan ni makab. (Yil. 14:22) Cileejel, tutaalaay mudyobw bakashish Diana ni bamwambulwiish bwa kushaaley mukasakan mu myand ya mu spirit kudy biin mu cisumbw cyaabab haakady mbaayend mukeng ni lubeel lukasakan. Uleeleeb neey: “Byaakady bikasakan. Ki tutadil bukash bwa Yehow ni dyambulwiish dindiy dya lukat mukacy mwa suuny yikasakan eey. Biin mu cisumbw ciitut balongel myand yivul bwa kwiitwambulwiish. Baakady biitukumbul, bitubiikan ku telefon, baakady bitubukacil ni myand eey yoos yitwambulwiishil bwa kutungunuk ni kutaatameen. Bu munady ciy nendesh mashiny, biin-kweet baan-balum ni baan-bakaj i bajaadikil neey nady teng ni mushind a kutweel mu bisangil ni bwa mim kuy kadiil baat musah hanady mukat bwa kuy.” I dibenesh kaay dya kwiikal mu cisak cya mu spirit cidy ni lukat eecy!

15. Bwabiny tudy batwiishiibw neey tudy mwa kutaataatameen makab?

¹⁵ Tut boos twiiyiiy kutwiilangan ni mateet. Nook, teng mutubiibilong, katwaakwiikaloh bend kaayeet mu ciisang cituhehet makab. Teng bu taat udy ni lukat, Diis dya Yehow didy teng kutudy bwa kwiitwambulwuish. Udy neet habwiih, ni udy habwiih bwa kumvw myand yitudy naay bwa kwiitwambulwiish ni mukat bikasakan bwa kwiitwambulwiish. (Ye. 43:2) Tudy batwiishibw neey tudy mwa kutaatameen bulwiish bwaal i mwiitwaakish byoos bitukaakaam bwa kutaatameen. I mwiitwaakish diisambil, Bibl, byaakudy bivul bya mu spirit bu cya bukish ni biin-kweet bwa kwiitwambulwiish mu biisang bitukaakaam dyambulwiish.

16. I mushind kaay udy Yehow mwa kwiitutabaleel ni lukat?

¹⁶ Tudy ni musangal bwa kwiikal ni Taat iitut a mu diiwul wiitutaatabaleel! “Musangal udy mu micim yiitut waalaalukil kudyey.” (Mus. 33:21) Tudy mwa kuleej Yehow neey twanyanyish mushind udyey wiitutabaleel ni lukat hakulong bwa byaakudy bya mu spirit eeby biitwambulwiish. Tukaakaam cikwaabw bwiitut kulong citudy mwa kulong bwiitut kulond may ma Mawej. Cikwaabw, tut batungunuk ni kulong mwiitut moos bwa kukooyel Yehow ni bwa kulong myand yiwaakan ku mees kwindiy, wiikaakal teng wiitutabaleel buyiil!​—1 Py. 3:12.