Job
42 Na de Job tɛl Jiova se:
2 “Na naw a no se yu ebul fɔ du ɔltin.
Ɛn natin nɔ de we yu de tink bɔt we yu nɔ ebul fɔ du.
3 Yu tɔk se, ‘Udat dis we de kwɛstyɔn di tin dɛn we a dɔn disayd ɛn de tɔk we i nɔ no natin?’
So a tɔk, bɔt a nɔ bin gɛt ɔndastandin;
A tɔk bɔt tin dɛn we tu wɔndaful fɔ mi, we a nɔ bin no.
4 I tɛl mi se, ‘Duya lisin, ɛn a go tɔk.
A go aks yu kwɛstyɔn dɛn, ɛn yu go ansa mi.’
5 A bin dɔn yɛri bɔt yu,
Bɔt naw a de si yu wit mi yay.
6 Na dat mek a dɔn tek bak ɔl wetin a bin se,
Ɛn a dɔn sidɔm insay dɔst ɛn ashis fɔ sho se a ripɛnt.”
7 Afta Jiova dɔn tɔk dɛn wɔd dɛn de to Job, Jiova tɛl Ɛlifaz di Timanayt se:
“A vɛks bad bad wan pan yu ɛn yu tu padi dɛn, bikɔs una nɔ tɔk di tru bɔt mi jɔs lɛk aw mi savant Job bin tɔk di tru bɔt mi. 8 Naw tek sɛvin man kaw ɛn sɛvin man ship ɛn go to mi savant Job. Una mek bɔn sakrifays fɔ unasɛf ɛn mi savant Job go pre fɔ una. A go mɔs lisin to am, ɛn a nɔ go pɔnish una fɔ di fulish tin dɛn we una tɔk, bikɔs una nɔ tɔk di tru bɔt mi jɔs lɛk aw mi savant Job bin tɔk di tru bɔt mi.”
9 So Ɛlifaz di Timanayt, Bildad di Shuayt, ɛn Zofa di Neamatayt go du wetin Jiova dɔn tɛl dɛn fɔ du. Ɛn Jiova lisin to Job in prea.
10 Afta Job dɔn pre fɔ in padi dɛn, Jiova pul Job in trɔbul dɛn ɛn mek i gɛt ɔl in prɔpati dɛn bak. Jiova gi am dɔbul pan ɔl wetin i bin gɛt trade. 11 Ɔl in brɔda dɛn, in sista dɛn, ɛn ɔl in padi dɛn we i bin gɛt trade bin kam to am ɛn it wit am na in os. Dɛn sho se dɛn sɔri fɔ am ɛn ɛnkɔrej am bikɔs ɔf ɔl di trɔbul dɛn we Jiova bin dɔn alaw fɔ mit am. Ich wan pan dɛn gi am mɔni ɛn wan gold riŋ.
12 So Jiova blɛs di las pat pan Job in layf pas di biginin, ɛn Job kam fɔ gɛt 14,000 ship dɛn, 6,000 kamɛl dɛn, 1,000 pia kaw dɛn, ɛn 1,000 uman dɔnki dɛn. 13 Dɔn bak i bin kam fɔ gɛt sɛvin ɔda bɔypikin dɛn ɛn tri ɔda galpikin dɛn. 14 I kɔl di fɔs galpikin Jimayma, di sɛkɔn galpikin Kizaya, ɛn di tɔd galpikin Karɛn-apɔk. 15 No uman nɔ bin de na ɔl di land we fayn lɛk Job in galpikin dɛn, ɛn dɛn papa gi dɛn ɛn dɛn brɔda dɛn prɔpati.
16 Afta dat, Job liv fɔ 140 ia, ɛn i si in pikin dɛn ɛn in gret granpikin dɛn, i si 4 jɛnɛreshɔn dɛn. 17 Faynali Job day, i bin liv lɔng ɛn i bin satisfay wit in layf.