Prɔvabs
22 Fɔ gɛt gudnem bɛtɛ pas bɔku bɔku jɛntri;
Fɔ gɛt rɛspɛkt bɛtɛ pas fɔ gɛt silva ɛn gold.
2 Wan tin bɔt poman ɛn jɛntriman na dat:
Na Jiova mek dɛn ɔl tu.
3 Di wan we gɛt sɛns de si denja ɛn ayd insɛf,
Bɔt di wan we nɔ gɛt ɛkspiriɛns de kɔntinyu fɔ go ɛn sɔfa fɔ dat.
4 Di bɛnifit we di wan dɛn we de put dɛnsɛf dɔŋ ɛn fred Jiova de gɛt
Na jɛntri, glori, ɛn layf.
5 Chukchuk ɛn trap de usay pɔsin we nɔ de du tin tret de waka,
Bɔt ɛnibɔdi we valyu in layf* go go fa frɔm dɛn.
6 Tren pikin di we we go fayn fɔ am;
Ivin we i big, i nɔ go lɛf da trenin de.
7 Jɛntriman de rul poman,
Ɛn di wan we lɛnt na slev to di wan we lɛnt am.
8 Ɛnibɔdi we plant tin we nɔ rayt go avɛst trɔbul,
Ɛn di ken we i bin de yuz fɔ pɔnish pipul dɛn we i vɛks, go brok.
9 Di pɔsin we gɛt fri-an* go gɛt blɛsin,
Bikɔs i de sheb in it wit di po wan dɛn.
10 Drɛb pɔsin we nɔ de sho rɛspɛkt,
Ɛn agyumɛnt nɔ go de igen;
Plaba ɛn kɔs go dɔn.
11 Di wan we gɛt klinat ɛn we de tɔk fayn wɔd dɛn
Go bi padi to di kiŋ.
12 Jiova de wach oba di wan we no sɔntin,
Bɔt i de mek wetin di wan dɛn we de kɔmɔt biɛn dɛn kɔmpin de tɔk nɔ bi.
13 Pɔsin we lezi de tɔk se: “Layɔn de na do!
I go kil mi na di pɔblik ples!”*
14 Wewɔd* uman in mɔt na dip ol.
Di wan we Jiova dɔn kɔndɛm de fɔdɔm insay de.
15 Fulishnɛs de na pikin in at,
Bɔt di ken fɔ kɔrɛkt am go push am fa frɔm am.
16 Di wan we de kruk di po wan fɔ ad pan in jɛntri,
Ɛn di wan we de gi gift to di wan we jɛntri
Go ɛnd pan po.
17 Opin yu yes ɛn lisin to di tin dɛn we di wan we gɛt sɛns de tɔk,
So dat yu go kip wetin a de tich yu na yu at,
18 I fayn fɔ kip dɛn dip insay yu at,
So dat dɛn go de na yu mɔt ɔltɛm.
19 Fɔ mek yu gɛt kɔnfidɛns pan Jiova,
A de ɛksplen tin dɛn to yu tide.
20 A nɔ bin dɔn rayt to yu,
Fɔ gi yu advays ɛn tɛl yu tin dɛn fɔ du,
21 Fɔ tich yu tin dɛn we na tru ɛn we yu fɔ biliv,
So dat yu go go bak to di wan we sɛn yu wit kɔrɛkt ripɔt?
22 Nɔ tif poman bikɔs i po,
Ɛn nɔ sɔprɛs di wan we pipul dɛn nɔ tek mek natin na di siti get,
23 Bikɔs na Jiova insɛf go fɛt dɛn kes,
Ɛn i go kil di wan dɛn we de kruk dɛn.
24 Nɔ kip kɔmpin wit pɔsin we gɛt wamat
Ɛn nɔ gɛt ɛnitin fɔ du wit pɔsin we kwik fɔ vɛks,
25 So dat yu nɔ go ɛva lan di tin dɛn we i de du,
Ɛn i tɔn trap fɔ yu.
26 Nɔ bi pɔsin we de shek an fɔ mek agrimɛnt,
We de gi garanti fɔ sɔntin we pɔsin trɔs.
27 If yu nɔ gɛt natin fɔ pe,
Dɛn go pul yu bed ɔnda yu!
28 Nɔ muv bekin dɛn we bin dɔn de trade trade,
We yu gret gret granpa dɛn bin dɔn put.
29 Yu dɔn si man we sabi du in wok?
Na bifo kiŋ dɛn i go tinap;
I nɔ go tinap bifo kɔmɔn pipul dɛn.