Kɔɔlumaa, Fuoo 28
“O puuloo niŋ ŋ cho . . . miiŋgu ni.”—Chɛ. 3:19.
Pesiŋ bɛɛ ŋ yeema miŋ tosa biondɔŋ Adam nda Ifi tosa wo le. Nyɛ cho naa mala ŋ tosa biondɔŋ koŋ te wo cho ni, hiouwɔɔ lachi a pɛɛkoo a Chɛhowa okɔɔ, miŋ chɔm balika melaa le suliŋnda ndɔlaŋ, nduyɛ miŋ kindiŋ le yiyaŋnda ndɔlaŋ biyɔɔ bila. Hei tosaa mala naa mi kaala naŋ nɔ le Chɛhowa wo chɔɔlu hindɔɔ. Yiyaŋndɔ a Ebilaham okɔɔ. Ndoo kaala Chɛhowa tau. O yɔŋ bɛɛ mi ndoo che ndi ikala le kɛɛsiaala Chɛhowalaŋ biyɔɔ bila, ndoo kɛɛ Chɛhowa diom te. Nduyɛ pɛŋ, mbo kindiŋ le Chɛhowa chɔɔloo sinaa. Le tamaseliiyo, mɛɛ o sina maa Chɛhowa kɛɛsiaa le Sodɔm a Komoolua tɛɛmbuu wo, mi siooŋnde bii ndu maa, “yamanɔɔ le chieeŋndo kpou” cho wanaa dɛnɛwɔɔŋnda tɛɛmbuu a wanaa kɛndiaa latulu. Ebilaham ndoo laalaŋ a keŋ te. Le hei, mbo nyuuniaa Chɛhowa o nɛi lebɛɛ niŋ. Mi Chɛhowa biunuŋ ndu, nduyɛ mbo mulul ndu nyunala ndɔlaŋ. O mɛɛlulaŋ, mi Ebilaham sina maa o kɔllo niŋ Chɛhowa tofa ni, nduyɛ o tusi wanaa dɛnɛwɔɔŋnda nyɛpalaa choo latulu a wanaa kɛndiaa le.—Chɛ. 18:20-32. w22.08 28 ¶9-10
Chimɛiyo, Fuoo 29
‘Wana wana nɔla ma tiindaŋndo, a nɔla ma dimul ndu suɛi mi i lo nya tɛɛŋ.’—Pulɔ. 11:13.
A wɔsi 455 tuupa mi Chiisu vialuŋ, mi Masa Ibuŋgaa Nɛhimaya miŋgi saasala balu Chulusalɛm ndaŋ taŋgul. Nduyɛ mbo nuuviaa puaa wana nɔla ma tiindaŋnda, le ma wa chioo hɔlteŋ. O puaa o hɛli wa tɛɛŋ, Hananiya wa waŋndo opilɛ. Nduyɛ, ndu wa wana wa fondaŋ waŋnda chal le chiɛi Mɛlɛkaa mandaa wo bolleŋ ni. Mi Baabuiyo suaa a ndu okɔɔ aa: “Hananiya wo hoo yɛ, o wa wana sakpo, nduyɛ ndu oo nɔ siooŋii Mɛlɛkɛi mbo hiau wanaa ka ka.” (Nɛhi. 7:2) Kaala Hananiya ndoo nɔ le Chɛhowa wo vɛlɛ a siooŋii ndoo nɔ le ndu kɔllo nɛŋioo ve tosa ni, mbo chua walta ndaa ke ndu laŋ la sɔvɛ. Naa bɛɛ, kaala naŋ nɔ le Chɛhowa wo tosa ni miŋ wa wanaa wana nɔla ma tiindaŋ o ndu piɛiyo niŋ. Ŋ tofaŋndɔ vɛlɛ tamaselii Tichikɔɔ wo. Kiilanɔɔ Pɔɔl ndoo nɔ tiindaŋndo o ndu niŋ. Mbo dimi pɛŋ a ndu okɔɔ maa “buɛi laalaŋ Masanɔɔ” o wa ni. (Ɛfi. 6:21, 22) Pɔɔl ndoo tiindaŋ ndu, o cho ko le puaapiliaa Ɛfisɔɔ a Koloose yaulaŋ yoowo le, kɛ le nda kɔltaŋ dɛɛniaa. Tamasi Tichikɔɔ wo loonuŋ naa a puaa naŋ nɔ hau wa okɔɔ, a wana nɔla ma tiindaŋ o Mɛlɛka piɛiyo niŋnda.—Kolo. 4:7-9. w22.09 9-10 ¶5-6
Ndaamaa, Fuoo 30
“Kaalaa kumbu hakila bɔɔbɔɔ.”—1 Pitɛ 4:8.
Mi tɔɔndaŋnda kala kalalaŋ la komal Choosɛ le wɔsilaŋ 13. Choosɛ ndoo tiuba mbo kiisaŋ a kaala Chɛhowa nɔ le ndu wo okɔɔ. Nduyɛ ndoo tiuba mbo dimi maa, mi Chɛhowa mal ndu a teleŋ sɔɔŋ kindilaŋ komal ndu wo. Kɛ o kɛsiŋ suɛi nɛiyaŋ keŋ o kɔl te. Mbo chɔm maa o wa wana taasi, mɛɛ o kɛsi kɔllo. Mi che bɛɛ mbo sɔla fondaa le bɛndaa nduaa maa miŋgullo, kɛ mbo chɔm nda kaalaa, nduyɛ mbo mal nda haki. (Chɛ. 45:4, 5) Mi Choosɛ tiuba le hei tosaa kanifuule, mbo yiyaŋ yiŋgoloŋ a suɛi keŋ okɔɔ. O kɛsi kɔllo o bahawɛila komal ndu laŋ choo le. Kɛ mbo kɛsi kɔl ndɔɔ o sabu Chɛhowaa choo. (Chɛ. 50:19-21) Yɛɛ naŋ pɛɛku yɛ o hei niŋ? Te waŋndo chiee num biyɔɔ le, kɛsiŋ suɛi nɛiyaŋ keŋ o kɔl te. Nduyɛ nɔ kiisaŋndo a Chɛhowa ɔɔ ma yiyaŋ maa o faŋaŋ num kɔɔli le. Yiyaŋ a mɛɛ o cho num malaa le tɔɔndaŋ koŋ biuwɔŋndo yɛ. Le handɔɔ lechoo, te acheleŋnda chiee num biyɔɔ le, kindiŋ mi kaala ŋ nɔ le nda wo kumbu hakila ndalaŋ. w22.11 21 ¶4