Kpekedoo, Fuoo 3
Te wana o wana nyuna nya a tiindaŋ nya nɔ o Kiliti niŋ ndo okɔɔ pɛ, la wa a bɛɛndiaŋ teleŋ o teleŋ le nda chɔmndo. Te la wa nda chɔmndo pɛ la chɔm nda ndi nyɛkɛndɛi nduyɛ o nɛi lebɛɛ niŋ.—1 Pitɛ 3:15.
Baa feleŋgɔnɔ cho wɔ kɔlaŋ o sukuuwo ŋ cho ni? Naapum wanaa nya cho o toŋgo pilɔɔ niŋnda kpou nɔ laalaŋndo maa o cho Mɛlɛka le toosiaa nyɔɔŋ te. Ma yeema le nda chɔmndo o Baabuiyo niŋ maa Mɛlɛka toosiaa nyɔɔŋ kpou ni, kɛ mi siooŋnde wa num. Pɛɛkɔŋndo yeemaŋ ni le hei tosaa! Nduyɛ te a wa pɛɛkoo pɛ, a nɔ ma tosa sɔɔŋ ŋmuuŋ, (1) kindi tiindaŋ numndo maa Mɛlɛka toosiaa nyɔɔŋ kpou ni nduyɛ (2) ma sina mɛɛ ŋ tɛɛsiaa tonya ŋ pɛɛku o Baabuiyo niŋndo nyɛkɛndɛi yɛ. (Luomaŋ. 1:20) A nɔ fɛŋ ma nyunaŋ aa, ‘Le yɛɛ chaaŋaa niaa laalaŋ yɛ maa o cho Mɛlɛka le toosiaa nyɔɔŋ te?’ Okoŋ, ma soliŋ yaula naalaŋ kpeku le yaasiaa tosaa nyɛkɛndɛi. Te a tol nɛi chɔmaa hoo kɔɔli pɛ, i cho wa tɛtɛlɛ le tonya ŋ pɛɛku o Baabuiyo niŋndo tɛɛsiaa mbo hiau mɛɛ num aa yiyaŋ yɛ. Wanaa bɔɔbɔɔ laalaŋ maa nyɔɔŋ kpou a bandɔ ŋ hiŋ ni kanifuule, wanaa nda nɔ bɛɛleŋ le nda tau wa dimul nda ni maa o cho Mɛlɛka le toosiaa nyɔɔŋ te. Te a saaluŋ pɛ suɛi kulle ipilɛ ɔɔ ŋmuuŋ, a tiuba ma ke wanaa cho tonyaa nuuviaa wa mulila sɔvɛlaŋ le nyunala nda laŋ.—Kolo. 4:6 w19.05 29 ¶13
Kɔɔlumaa, Fuoo 4
“Mɛɛ kala chuaa o dɛɛniaa nuaa chɛlɛkpɛ ndɔɔ yɛ, lende ya I dɛɛniaa niŋ nya ni.”—Aisaya 66:13.
Mɛɛ wana suaa le Mɛlɛka wo Ilaacha wa nyaanɔŋndo le yoomu ndɔɔ chiindiaa, mi kɔllo tambu ndu tau nduyɛ mbo yeema pɛŋ piɔmndo. Mi Chɛhowa viam maalikɛinɔɔ le ndu kɔl dɛɛniaa kioo. Mi maalikɛinɔɔ tosa nyɛ le Ilaacha malaa. Mbo ke ndu nyɛdiaa tuuwo nduyɛ mbo dɛɛniaa ndu le mbo de. (1 Masaa. 19:5-8) Nyɛ maalikɛinɔɔ tosa hoo wo pɛɛku naa maa kɛndɛi taaniŋnde tosaa mala waŋndo tau. Naapum nyɛdiaa ŋ ke puaapilɛnɔɔ ɔɔ ndepilɛnɔ cho a kɔl tambɛiyo wo, kɛndɛi ŋ tosal ndu ve, ɔɔ yau ŋ poonyial ndu wo, ke ndu kɔl dɛɛniaa tau. Te o yɔŋ pɛ mi siɔmbulaŋ la wa naa le suɛi o wana koŋ ndo a nyɛ yɔŋnuŋ ndu wo okɔɔ, naapum ŋ nɔla miŋ mala ndu o nɛilaŋ ndaŋ niŋ. Mi Chɛhowa luei Ilaacha yoomuaŋ le kɔlaŋ o tiŋ vilɛiyo niŋ haaa mbo fuuluu o Pembii Saanaive. Fonda o kuɛ koŋ ndo wa landaŋ a wanaa wa ndu nuuviaa le ndu diyɔɔ wa. Yɛɛ hoo pɛɛku yɛ naa? Te ŋ yeema pɛ wana nda kpuuwa niŋ paandu wo kɔl dɛɛniaa kioo, ŋ nɔ fɛŋ miŋ mala ndu mbo pɛŋgi buulaŋndo. Ŋ ke ndu kɔl dɛɛniaa o ndu lo bɛɛ ɔɔ o Toŋgo leMasaa. w19.05 16 ¶11; 17 ¶13-14
Chimɛiyo, Fuoo 5
“Yuŋgu o yuŋgu cho o lɛŋndeŋ ndeŋ niŋ, a cho hunɔɔ mɔnɛi biyɔɔ . . . nduyɛ ma chaŋ. . . . Yuŋgu fula o pulale Netaŋ ndeŋ choo wo nda wa chaŋndo kunda.”—Sɛka. 12:12-14.
Ŋ dimi wɔ maa a cho diomndaŋ veeloo o Sɛkalaya bolle 12 niŋ, o soo a piɔm Mɛsayanɔɔ okɔɔ wo. (Sɛka. 12:10) Mɛɛ ŋ fuuluu o sɔɔŋ 12-14, ma veelu diomndaŋ maa “yuŋgu fula o pulale Netaŋ ndeŋ choo wo” cho mɔnɛi biyɔɔ tau ma chaŋ te Mɛsayanɔɔ sɔla pɛ piɔmndo. Tuupa ma hiou lachi, o bɛnda ma sim ndɔ kpɛ ma nyunaŋ aa, ‘Wanayɛi kuɛɛ cho yɛ pulale Netaŋ ndeŋ tɛɛŋ a Mɛsayanɔɔ?’ Okoŋ ma kandu niko yaasiaa tosaa. Te a nua pɛ Sɛkalaya 12:12 o NWT niŋ, a cho chɔ poonyiaa o peeleŋ tɛɛŋ le num chɔmndo Saamiɛɛ Diiŋ Ndɔɔ 5:13, 14. O bolle Baabuileŋ niŋ ŋ cho sina ni maa Netaŋ po Masaa Deeve wo o wa ni. Bolle Baabuile diiŋ ndɔ leŋ Luku 3:23, 31, cho num mala ma sina maa Netaŋ finya mama Chiisu wo o wa ni sanaa a Meele. Mi nyɔɔ hɛnaŋ num tau le hei sinaa! A sina nyɛ dimiŋ o Baabuiyo niŋndo maa o pulale Deeve leŋ choo Chiisu cho violɔŋ ni. (Maa. 22:42) Deeve ndoo nɔ puaa ndaa hiou 20, nduyɛ Netaŋ bɛɛ wa nda tɛɛŋ. Le saboo hoo Sɛkalaya dimi ni maa pulale Netaŋ ndeŋ le cho mɔnɛi biyɔɔ tau le piɔm Mɛsayanɔɔ. w19.05 30 ¶17