တယံာ်လၢၤဘၣ်န့ၣ် ယဟိဝၤယွၤ ကမၤလၤကပီၤ အမံၤဒ်လဲၣ်. အကမၤလၤကပီၤ အမံၤခီဖျိ အကစံၣ်ညီၣ်တၢ် တီတီလိၤလိၤ. တကးဒံးဘၣ် အကမၤဟးဂီၤကွံာ် ဘၤဘူၤလိၣ်ဖးဒိၣ် လၢအမ့ၢ် တၢ်ဘူၣ်တၢ်ဘါကမၣ်တဖၣ်. မ့ၢ်လၢ အဝဲသ့ၣ်န့ၣ် မၤတၢ်အၢတၢ်သီ ဒီးတသိၣ်လိ တၢ်မ့ၢ်တၢ်တီ ဘၣ်ဃးဒီး ကစၢ်ယွၤအဂ့ၢ်ဘၣ်. (လီၣ် ၁၇:၅, ၁၆; ၁၉:၁, ၂) တၢ်ဘူၣ်တၢ်ဘါကမၣ် ဟးဂီၤဝံၤအလီၢ်ခံ ဘၣ်သ့ၣ်သ့ၣ် ပှၤတနီၤ ကဆၢတဲာ်လီၤအသးလၢ ကဘူၣ်ထီၣ်ဘါထီၣ်ဝဲ ယဟိဝၤယွၤ တပူၤဃီဒီးပှၤ. ဒီးလၢအၢ်မက့းဒိၣ်န့ၣ် ယဟိဝၤယွၤ ကမၤဟးဂီၤဝဲ မုၣ်ကီၤလံၢ် အတၢ်ပၢတၢ်ပြးခဲလၢာ် ဒီးကမၤဟးဂီၤဝဲ ပှၤလၢအထီဒါအီၤ ဒီးတဲဟးဂီၤအမံၤ. ဘၣ်ဆၣ် ယဟိဝၤယွၤ ကမၤပူၤဖျဲးဝဲ ပှၤလၢအအဲၣ်အီၤ, ဒိကနၣ်အီၤ ဒီးသးအိၣ်မၤလၤကပီၤအမံၤ. (မၢ် ၈:၃၈; ၂ သ့း ၁:၆-၁၀) ဒီးခရံာ်ပၢတၢ် အနံၣ်တကထိဝံၤဒီး ဖဲတၢ်မၤကွၢ်လၢ အလီၢ်ခံကတၢၢ် ဝံၤအလီၢ်ခံ ပှၤကိးဂၤဒဲး ကသ့ၣ်ညါထီၣ်လၢ ပှၤလၢအကြၢး ဒိးန့ၢ်ဘၣ် တၢ်ဘူၣ်ထီၣ်ဘါထီၣ်န့ၣ် မ့ၢ်ထဲ ယဟိဝၤယွၤတဂၤလီၤ. (လီၣ် ၂၀:၇-၁၀) ဖဲန့ၣ်အဆၢကတီၢ် “ဟီၣ်ခိၣ် ကပှဲၤဝဲဒီး တၢ်သ့ၣ်ညါ ယဟိဝၤယွၤ အလၤကပီၤ ဒ်ထံကျၢၢ်ဘၢ ပီၣ်လဲၣ်အသိးလီၤ.” (ဃဘး ၂:၁၄) ဖဲပှၤကိးဂၤဒဲး မၤလၤကပီၤ ယဟိဝၤယွၤအမံၤအခါ ဆိကမိၣ်ကွၢ် အကလီၤသးခုထဲလဲၣ်. တၢး၂၅.၀၁ ၇ ¶၁၅-၁၆

ဖဲခရံာ်ဖိလၢညါတဖၣ် ထံၣ်ဘၣ် တၢ်ထီဒုၣ်ထီဒါအခါ ဒ်သိးအဝဲသ့ၣ် ကအိၣ်ဒီး တၢ်တူၢ်န့ၢ်ခီၣ်ကဲအဂီၢ် တၢ်မနုၤမၤစၢၤ အဝဲသ့ၣ်လဲၣ်. ဖဲအဝဲသ့ၣ်ထံၣ်ဘၣ် တၢ်မၤကွၢ်အခါ တၢ်မၢဖိပီလူး အဲၣ်ဒိးလၢ အဝဲသ့ၣ်ကအိၣ်ဒီး တၢ်ထံၣ်လၢအဂ့ၤ. အဃိ စီၤပီလူး ၡဲပၠးဝဲလၢ ကစၢ်ယွၤပျဲဝဲလၢ ခရံာ်ဖိတဖၣ် ကထံၣ်ဘၣ် တၢ်ကီတၢ်ခဲန့ၣ် မ့ၢ်ဒ်သိး အကမၤစၢၤ အဝဲသ့ၣ်လၢ ကဆဲးအိၣ်ဒီး တၢ်တူၢ်န့ၢ်ခီၣ်ကဲ. တၢ်မၤကွၢ်တဖၣ်အံၤ ကမၤစၢၤ ခရံာ်ဖိတဖၣ်လၢ အဝဲသ့ၣ် ကဆဲးမၤဂ့ၤထီၣ် အတၢ်ဂ့ၤတၢ်ဝါ ဒ်သိး ကမၤတၢ်ဘၣ် ယဟိဝၤယွၤ အသး. ခီဖျိလၢ ခရံာ်ဖိလၢညါတဖၣ် အိၣ်ဒီး တၢ်ထံၣ်လၢအဂ့ၤအဃိ မၤစၢၤအဝဲသ့ၣ်လၢ ကအိၣ်ဒီး တၢ်တူၢ်န့ၢ်ခီၣ်ကဲ. (ဧ့ၤ ၁၂:၁၁) ဖဲခရံာ်ဖိလၢညါတဖၣ် ထံၣ်ဘၣ် တၢ်မၤကွၢ်အခါ စီၤပီလူး ဟ့ၣ်ဂံၢ်ဟ့ၣ်ဘါ အဝဲသ့ၣ် လၢကအိၣ်ဒီး တၢ်တူၢ်န့ၢ်ခီၣ်ကဲ ဒီးတဘၣ်ဟ့ၣ်အၡူဘၣ်. စီၤပီလူး အနီၢ်ကစၢ်ဒၣ်ဝဲ ထံၣ်ဘၣ်တၢ်မၤကွၢ်အဃိ အဟ့ၣ်ကူၣ် အဝဲသ့ၣ်ဒ်န့ၣ်န့ၣ် ဖးဘၣ်ညါ. တချုးလၢ စီၤပီလူး ကဲထီၣ်ခရံာ်ဖိဒံးဘၣ်န့ၣ် အမၤနးမၤဖှီၣ် ခရံာ်ဖိတဖၣ်အဃိ အဝဲသ့ၣ် ကတူၢ်ဘၣ်တၢ် နးထဲလဲၣ်န့ၣ် စီၤပီလူး သ့ၣ်ညါဝဲ. ဒီးဖဲစီၤပီလူး ကဲထီၣ်ခရံာ်ဖိ ဝံၤအလီၢ်ခံ အထံၣ်ဘၣ် တၢ်မၤကွၢ် အကလုာ်ကလုာ်.—၂ ကရံၣ် ၁၁:၂၃-၂၅. တၢး၂၄.၀၉ ၁၂-၁၃ ¶၁၆-၁၇

တၢ်ဆၢကတီၢ် လဲၤပူၤကွံာ် တနံၤဘၣ်တနံၤ ဒီးပတၢ်စံၣ်တဲၤတဲလီၤတၢ်မၤန့ၣ် အရ့ဒိၣ်ထီၣ်မၣ်ဒိၣ်ထီၣ်. ဘၣ်မနုၤအဃိလဲၣ်. ခီဖျိလၢ တၢ်ဆၢကတီၢ် တအိၣ်အါအါလၢၤဘၣ်. ဆိကမိၣ်ကွၢ် ဖဲမၢ်ကူး ၁၃:၁၀ န့ၣ်ယ့ၣ်ၡူး တဲဆိပာ်စၢၤဝဲ ဘၣ်ဃးဒီး တၢ်စံၣ်တဲၤတဲလီၤတၢ်မၤ လၢမုၢ်နံၤခံကတၢၢ် အဆၢကတီၢ်. လၢလံာ်မး အပူၤန့ၣ် ယ့ၣ်ၡူး တဲဝဲလၢ တချုးလၢ “တၢ်အကတၢၢ်” တုၤဒံးဘၣ်န့ၣ် ပှၤကစံၣ်တဲၤတဲလီၤ ဘီမုၢ်တၢ်သးခုကစီၣ် လၢဟီၣ်ခိၣ်ဒီဘ့ၣ်ညါ. (မး ၂၄:၁၄) တၢ်အကတၢၢ်န့ၣ် အဲၣ်ဒိးတဲဝဲ မုၣ်ကီၤလံၢ် အတၢ်ရဲၣ်တၢ်ကျဲၤ လၢအအၢအသီအံၤ ကကတၢၢ်ကွံာ်ဝဲ. ဒီးယဟိဝၤယွၤ ပာ်ပနီၣ်ဃာ်ဝဲ “မုၢ်နံၤအဝဲန့ၣ် ဒီးနၣ်ရံၣ်အဝဲန့ၣ်” လၢတၢ်အကတၢၢ် အဂီၢ်လံ. (မး ၂၄:၃၆; မၤတၢ် ၁:၇) တနံၤဘၣ်တနံၤန့ၣ် တၢ်အကတၢၢ် ဘူးထီၣ် ဒိၣ်ထီၣ်မၣ်ဒိၣ်ထီၣ်. (ရိ ၁၃:၁၁) အဃိ တချုးလၢ တၢ်အကတၢၢ် တုၤဒံးဘၣ်န့ၣ် ပကဘၣ် ဆဲးစံၣ်တဲၤတဲလီၤတၢ် ဆူၣ်ဆူၣ်. ဖဲပဆိကမိၣ်ထံ ဘၣ်ဃးဒီး ပတၢ်စံၣ်တဲၤတဲလီၤတၢ်မၤအခါ ပကဘၣ် သ့ၣ်နီၣ်ထီၣ် တၢ်သံကွၢ်အရ့ဒိၣ် တဖျၢၣ်အံၤ. ဘၣ်မနုၤအဃိ ပစံၣ်တဲၤတဲလီၤ တၢ်သးခုကစီၣ်လဲၣ်. ပမ့ၢ်ဘၣ်တဲတီတီန့ၣ် တၢ်အဲၣ် ထိၣ်ဟူးထိၣ်ဂဲၤထီၣ်ပှၤလၢ ပကစံၣ်တဲၤတဲလီၤတၢ်. ဖဲပစံၣ်တဲၤတဲလီၤတၢ်အခါ ပပာ်ဖျါထီၣ်လၢ ပပာ်လုၢ်ပာ်ပှ့ၤ တၢ်သးခုကစီၣ်, ပအဲၣ်ပှၤဂၤ ဒီးအရ့ဒိၣ်ကတၢၢ်န့ၣ် ပအဲၣ်ယဟိဝၤယွၤ ဒီးပာ်ကဲအမံၤ. တၢး၂၄.၀၅ ၁၄-၁၅ ¶၂-၃