ဒ်သိးနဖိတဖၣ်​ အတၢ်နာ်ကဒိၣ်ထီၣ်အဂီၢ် ထဲလၢနတဲပၠးအီၤ တၢ်အဘၣ်ဒီးတၢ်အကမၣ်န့ၣ်​ တလၢပှဲၤဒံးဘၣ်. နကဘၣ်မၤစၢၤစ့ၢ်ကီး အဝဲသ့ၣ်ဒ်သိးကနၢ်ပၢၢ်ထီၣ်​ တၢ်သံကွၢ်ဒ်သိးဒီး– ‘တၢ်တနီၤနီၤန့ၣ်​ ဖျါလၢအတကမၣ်ဘၣ်​ ဘၣ်ဆၣ်​ ဘၣ်မနုၤအဃိ လံာ်စီဆှံတြီဝဲလဲၣ်. လံာ်စီဆှံအတၢ်သိၣ်တၢ်သီတဖၣ်​ အဘျုးအိၣ်လၢယဂီၢ်ထီဘိန့ၣ်​ ယနာ်အီၤကသ့ဒ်လဲၣ်.’ (ယၡါယၤ ၄၈:၁၇, ၁၈) နဖိမ့ၢ်အဲၣ်ဒိး ဒိးဘျၢထံန့ၣ်​ မၤစၢၤအီၤဒ်သိး ကဆိကမိၣ်ထံဝဲ တၢ်ဂ့ၢ်လၢဘၣ်ဃးဒီး ပှၤလၢအဒိးဘျၢထံဝံၤတဖၣ်​ အမူဒါလီၤတံၢ်လီၤဆဲးတက့ၢ်. ဒီးအဝဲသ့ၣ်ထံၣ်ဝဲ မူဒါအံၤဒ်လဲၣ်. ကကဲဘျုးလၢအဂီၢ်ဒ်လဲၣ်. ဒီးတၢ်ကီတၢ်ခဲကအိၣ်ဒ်လဲၣ်. တၢ်ကီတၢ်ခဲမ့ၢ်အိၣ်သနာ်က့ ကဒိးန့ၢ်ဘၣ်​ တၢ်အဘျုးအါမးန့ၣ်​ တဲနၢ်ပၢၢ်အီၤတက့ၢ်. (မၢ်ကူး ၁၀:၂၉, ၃၀) တၢ်ဂ့ၢ်တဖၣ်အံၤ ပကထံၣ်ဘၣ်ဖဲ ပဒိးဘျၢထံဝံၤအလီၢ်ခံန့ၣ်လီၤ. တချုးလၢအဝဲသ့ၣ်​ ဒိးဘျၢထံဒံးဘၣ်န့ၣ်​ အရ့ဒိၣ်လၢ ကဘၣ်ဆိကမိၣ်ထံဝဲ တၢ်ဂ့ၢ်တဖၣ်အံၤလီၤ. နမ့ၢ်မၤဒ်န့ၣ်န့ၣ်​ အဝဲသ့ၣ်ကနာ်ဝဲလၢ မ့ၢ်မၤထွဲလံာ်စီဆှံ တၢ်သိၣ်တၢ်သီန့ၣ်​ ကဂ့ၤလၢအဝဲသ့ၣ်အဂီၢ်ထီဘိလီၤ. တၢး၁၇.၁၂ ၁၈-၁၉ ¶၁၄-၁၅

ပအိၣ်​ မူဘၣ်လၢဆၢကတီၢ်လၢ အကီခဲဒိၣ်မးလီၤ. အဒိ, သုဝဲဒီပုၢ်ဝဲၢ်မုၣ်ခွါအါဂၤ ကတူၢ်ဘၣ်​ တၢ်ဆူးတၢ်ဆါနးနးကလဲာ်တဖၣ်လီၤ. ဒီးအဂၤတနီၤန့ၣ်​ အသးကပှၢ်လံ ဘၣ်ဆၣ်​ ကဘၣ်ကွၢ်ထွဲဒံး အဘူးအတံၢ်လၢ အသးပှၢ်တဖၣ်လီၤ. တကးဒံးဘၣ်​ တနီၤနီၤန့ၣ်​ အိၣ်ဒီးတၢ်ကီတၢ်ခဲလၢ ကလုၢ်အီၣ်လုၢ်အီ အဟံၣ်ဖိဃီဖိအဂီၢ်န့ၣ်လီၤ. ဒီးပသ့ၣ်ညါလၢသုဝဲသ့ၣ်အါဂၤန့ၣ်​ သုထံၣ်ဘၣ်တၢ်ကီတၢ်ခဲအါမးလၢ အဟဲဘၣ်သုတကတီၢ်ဃီန့ၣ်လီၤ. ဘၣ်ဆၣ်​ ဆၣ်လၢအသးသမူ တအိၣ်ဘၣ်ဒၣ်လဲာ် ယဟိဝၤယွၤ မ့ၢ်သးအိၣ်ဝဲန့ၣ်​ အဝဲကသးအိၣ်နၤ ထဲလဲၣ်န့ၣ်​ ဆိကမိၣ်ကွၢ်တက့ၢ်. နမၤယွၤအတၢ်မၤ မ့ၢ်လၢနအဲၣ်အီၤအဃိအဝဲကသးအိၣ်နၤဖးဒိၣ်ညါ. (စံးထီၣ်ပတြၢၤ ၁၉:၁, ၃, ၁၄) ပပၢ်အိၣ်လၢမူခိၣ်​ သ့ၣ်ညါပဂ့ၢ်ခဲလၢာ်လီၤ. လံာ်စီဆှံတဲဝဲလၢ “သုခိၣ်သူအဘိဒၣ်လဲာ် ဘၣ်တၢ်ဂံၢ်အီၤခဲလၢာ်လီၤ.” (မးသဲ ၁၀:၃၀) ယဟိဝၤယွၤ အဲၣ်ဒိးလၢပကသ့ၣ်ညါလၢ အဝဲ “ကွၢ်ထွဲပှၤလၢအဒိကနၣ်အီၤ” န့ၣ်လီၤ. (စံးထီၣ်ပတြၢၤ ၃၇:၁၈, ခ့ခါစှီၤကျိာ်) နတၢ်ကီတၢ်ခဲတဖၣ်န့ၣ်​ ယဟိဝၤယွၤ ထံၣ်ဝဲခဲလၢာ် ဒီးဒ်သိးနလဲၤခီဖျိအီၤ တခါစုာ်စုာ်ကန့ၢ်အဂီၢ် အဝဲဟ့ၣ်နၤတၢ်ဂံၢ်တၢ်ဘါလၢ နလိၣ်ဘၣ်တဖၣ်သ့ဝဲလီၤ. တၢး၁၈.၀၁ ၃ ¶၁; ၄ ¶၄

တၢ်မၤအသးဘၣ်ဃးဒီး စီၤပ့းတရူး မၤသမူထီၣ်က့ၤ နီၢ်တဘံၤသါအဂ့ၢ်န့ၣ်​ ထိၣ်ဟူးထိၣ်ဂဲၤထီၣ်​ ပှၤဝ့ၢ်ဖိအါဂၤအသး ဒ်သိးကကဲထီၣ်– “ပှၤစူၢ်က့ၤနာ်က့ၤ” တၢ်န့ၣ်လီၤ. ခရံာ်အပျဲၢ်အဘီၣ်အသီတဖၣ်အံၤ တဲဘၣ်ပှၤဂၤတၢ်သးခုကစီၣ်လၢ အဘၣ်ဃးဒီး ယ့ၣ်ၡူးဒီးယဟိဝၤယွၤန့ၣ်​ အိၣ်ဒီးတၢ်သ့တၢ်ဘၣ်လၢ ကမၤဂဲၤဆၢထၢၣ်သမူထီၣ်က့ၤ ပှၤသံတဖၣ်သ့ဝဲအဂ့ၢ်န့ၣ်လီၤ. (မၤတၢ် ၉:၃၆-၄၂) ဖဲစီၤပီလူး မၤသမူထီၣ်က့ၤ ပှၤတဂၤအခါ ပှၤလၢအထံၣ်ဘၣ်ဝဲန့ၣ်​ အိၣ်ဝဲစ့ၢ်ကီးလီၤ. ဘၣ်တဘျီ စီၤပီလူးမၤဝဲ တၢ်အိၣ်ဖှိၣ်လၢဟံၣ်ဖီခိၣ်​ လၢဝ့ၢ်တြိၤအါအပူၤန့ၣ်လီၤ. ခဲအံၤ ဝ့ၢ်အံၤအိၣ်လၢ ကီၢ်ထၢးကံၣ်​ မုၢ်ထီၣ်ကလံၤစိးတခီန့ၣ်လီၤ. စီၤပီလူးတဲတၢ်တုၤလၢ ဖးဖီမုၢ်လီၤ. ဒီးပှၤသးစၢ်လၢအမ့ၢ် စီၤအူတူၤဃူးန့ၣ်​ ဆ့ၣ်နီၤဒိကနၣ်တၢ်လၢ ပဲတြီဖိအခိၣ်​ ဒီးမံခ့ဘၣ်အသးအဃိ လီၤတဲာ်လၢဟံၣ်သၢကထြၢအဖီလာ်န့ၣ်လီၤ. ဘၣ်သ့ၣ်သ့ၣ်​ စီၤလူၤကၣ်န့ၣ်​ မ့ၢ်ဝဲပှၤအဆိကတၢၢ်တဂၤလၢ အလဲၤဖီၣ်ထီၣ်​ စီၤအူတူၤဃူးန့ၣ်လီၤ. ဒ်ကသံၣ်သရၣ်တဂၤအသိး စီၤလူၤကၣ်သ့ၣ်ညါဝဲလၢ ဖိသၣ်အံၤတမ့ၢ်လၢအဘၣ်ဒိ ယိယိဖိဘၣ်​ အဝဲသံဝဲလီၤ. စီၤပီလူးစ့ၢ်ကီး စံၣ်လီၤလၢတၢ်ဖီလာ် ဒီးဖိးဟုထီၣ်စီၤအူတူၤဃူး ဒီးစံးဝဲလၢ– “အဝဲမူဒံးကစီဒီလီၤ.” ပှၤအိၣ်ဖဲန့ၣ်တဖၣ်​ ထံၣ်ဘၣ်ဝဲတၢ်မၤအသးအံၤအဃိ ကမၢကမၣ်ဝဲဒိၣ်မးလီၤ. အဝဲသ့ၣ်သ့ၣ်ညါဝဲလၢ ဖိသၣ်ပိာ်ခွါအံၤသံဝဲလံ. ဘၣ်ဆၣ်​ ဘၣ်တၢ်မၤဂဲၤဆၢထၢၣ်သမူထီၣ်က့ၤအီၤအဃိ အဝဲသ့ၣ်​ “အသူၣ်မုာ်သးမုာ်ဝဲဒိၣ်မးလီၤ.”—မၤတၢ် ၂၀:၇-၁၂, ခ့ခါစှီၤကျိာ်. တၢး၁၇.၁၂ ၅-၆ ¶၁၀-၁၁