Buke zokuhova zoVahompa

2 Apa ga kere Ndafita pepi nokufa, age kwa tanterere munendi Saromo asi: 2 “Ame ntaantani ni fe. Yipo nye, kora ntani kara nouradi. 3 Wa hepa kulimburukwa Karunga goge Jehova pokusikisa mo noveta dendi nonompangera dendi noyipango yendi ntani nomavyukiso gendi aga va tjanga moVeta zaMosesa, yipo ngayi ku tompoke nkenye eyi ngo rugana ntani nkenye oku ngo za. 4 Ano Jehova nga sikisa mo eyi ga tumbwidira nge. Age kwa tente asi: ‘Nsene vana woge ngava twikira kulimburukwa nge nomutjima gwawo nagunye ntani nomwenyo* gwawo nagunye, moruvharo roge ngamu tunda nkenye apa gumwe ogu nga hingira posipundi souhompa moIsraeli.’

5 “Ove wa yi diva eyi ga rugana nge Jowabu munaSeruya, age kwa dipaga Abineli munaNere ntani Amasa munaJetere ava va kere vapitisili wovakwayita. Age kwa tjisangere honde zawo posiruwo esi ya dilire ko yita mosirongo ntani honde zawo kwa nyatekere liva oru rwa kere mombunda zendi noyicamakaku eyi ya kere konompadi dendi. 6 Wa hepa kukara nonondunge ngo dire kupulisira mugara ogu gonomvhi a ze moNtoko* nombili.

7 “Nye ngo likide eharo lyanarunye vana vaBarasirayi goMugiliyata ntani ngo va ninke nawo va lye kositafura soge, yeeyi awo kwa kwatesere nge ko apa na tjwayukire mukuroge Abisaromo.

8 “Ntani Simeyi munaGera gomorudi rwaMbenyameni gomoBahulimu kwa tunga pepi nove. Age kwa swawire nge apa na zire koMahanayimu, nye apa ga wizire a ya gwane nge konontere domukuro gwaJorodana, ame kwa mu tumbwidilire medina lyaJehova asi kapi ngani mu dipaga norufuro. 9 Nye nampili ngoso, wa hepa kumutengeka, yeeyi ove mugara gonondunge. Ove wa diva eyi ngo mu rugana. Ngo dipage mugara ogo gonomvhi.”*

10 Konyima zosiruwo, Ndafita ta fu ngwendi ozinakuru, makura tava ka mu horeka moSitata saNdafita. 11 Ndafita kwa pangerere moIsraeli nomvhura 40. Age kwa pangerere moHeburoni nomvhura ntambali, ano moJerusarema nomvhura 33.

12 Makura Saromo ta hingire posipundi souhompa soguhwe Ndafita, ano mwaza siruwo uhompa wendi kwa kere nononkondo.

13 Konyima, Adoniya munaHagiti kwa zire kwaBateseba ozina vaSaromo, Bateseba ta pura asi: “Ove kuna wiza mombili ndi?” Age ta limburura asi: “Nhi.” 14 Makura Adoniya ta tanta asi: “Koyili yimwe nina hara kukutantera.” Bateseba ta mu limburura asi: “Tantera nge.” 15 Adoniya ta tanta hena asi: “Nove wa yi diva asi ngano nyame na kara hompa ntani Vaisraeli nyame va ndindira ni kare hompa, nye Jehova kwa gava uhompa kwamumbyange. 16 Nye kosili sininke simwe esi nina hara o ruganene nge. Nina kanderere wa ha nyoka.” Bateseba ta mu tantere asi: “Uyunga.” 17 Adoniya ta tanta asi: “Ka pure hompa Saromo a pe nge Abisaga gomoSunemu a kare mukadange, yeeyi age kapi na nyoka nsene no ka mu pura ove.” 18 Makura Bateseba ta mu limburura asi: “Nawa tupu. Nani ka kuuyungira po kwahompa.”

19 Bateseba ta zi kwahompa Saromo a ka uyungire po Adoniya. Makura hompa ta katuka a ze kwaBateseba, ta linyongamene komeho zendi. Hompa ta hingire posipundi sendi souhompa, makura ta ninki vantu va retere ozina sipundi souhompa, yipo va hingire korulyo rwendi. 20 Makura Bateseba ta tanta asi: “Nina hara kukuhundira sininke simwe. Na kanderere wa ha nyoka.” Hompa ta limburura asi: “Hundireni nge tupu yina, kapi nani nyoka.” 21 Bateseba ta tanta asi: “Gava Abisaga gomoSunemu kwa mukuroge Adoniya yipo a mu kware.” 22 Makura hompa Saromo ta tantere ozina asi: “Morwasinke muna kuhundilira nge ni gave Abisaga gomoSunemu kwaAdoniya? Nsene ngoso, mu hundilireni hena nouhompa, yeeyi age mukurwange ntani mupristeli Abiyatara naJowabu munaSeruya kumukwatesa ko.”

23 Makura hompa Saromo ta gana medina lyaJehova asi: “Karunga ngano a tengeke nge nsene ni dira kudipaga Adoniya, morwa ana hundire nge yininke eyi. 24 Tani gana kwaJehova Karunga goMunamwenyo ogu ga ninka nge ni nkondopare ntani ni hingire posipundi souhompa sotate Ndafita ntani ogu ga pa nge uhompa noruvharo rwange ngwendi moomu ga yi tumbwidira. Adoniya va hepa kumudipaga naina.” 25 Makura hompa Saromo ta tumu Benaya munaJehoyada a ka dipage Adoniya, age ta zi, ta ka mu dipaga.

26 Hompa ta tantere mupristeli Abiyatara asi: “Tengura kembo lyoge koAnatoti, ove ono fire kukudipaga nye kapi nani kudipaga, morwa ove kwa simbire sikesa saJehova, Hompa Mupangeli gwanayinye komeho zotate Ndafita ntani morwa ove kwa kere notate momaudigu gawo nagenye.” 27 Makura Saromo ta ninki Abiyatara a hageke kuruganena Jehova ngomupristeli yipo yi sike mo eyi ga uyungire Jehova kuhamena epata lyaEli moSiro.

28 Apa ga yi zuvhire Jowabu, ta dukire kotende zaJehova ta ka kwata konombinga dosizambero, yeeyi age kwa kwatesere ko Adoniya nampili ngomu ga dilire kukwatesa ko Abisaromo. 29 Hompa Saromo tava mu tantere asi: “Jowabu ana dukire kotende zaJehova ntani kweli kosizambero.” Makura Saromo ta tantere Benaya munaJehoyada asi: “Zende o ka mu dipage!” 30 Benaya ta zi kotende zaJehova, ta ka mu tantera asi: “Hompa kuna hara o tunde ko oko.” Nye age ta mu limburura asi: “Hawe! Yiko nani fira kooku.” Benaya ta tengura ta ka tantera hompa asi: “Eyi yiyo ana tanta Jowabu ntani ngesi yimo ana limburura nge.” 31 Makura hompa ta mu tantere asi: “Ka rugane eyi ana tanta. Ka mu dipage ntani ka mu horeke, yipo name nepata lyotate tu dire kukara nousima wohonde ezi ga tjisanga mawoko-woko. 32 Jehova ta mu tengwida kuwoko morwa honde ezi ga tjisanga, yeeyi age kwa dipaga vagara vavali wovahungami ntani wovawa kumupitakana awo otate Ndafita va hana kuyidiva. Awo kuna kara Abineli munaNere ogu ga kere mukurona govakwayita woVaisraeli ntani Amasa munaJetere ogu ga kere mukurona govakwayita wovantu womorudi rwaJuda. 33 Jowabu noruvharo rwendi tava va tengwida kuwoko morwa honde zawo ezi ga tjisanga. Nye Jehova ngano a gave mbili zanarunye kwaNdafita noruvharo rwendi nepata lyendi ntani nouhompa wendi.” 34 Makura Benaya munaJehoyada ta zi ta ka dipaga Jowabu, tava ka mu horeka membo lyendi momburundu. 35 Hompa ta tura Benaya munaJehoyada a kare mukurona govakwayita a pinganene po Jowabu ntani ta ninki mupristeli Sadoko a guse situmbukira saAbiyatara.

36 Makura hompa ta zigida Simeyi, ta mu tantere asi: “Dika embo moJerusarema o kare moomo, kapisi ngo tunde mo o ze kwapeke. 37 Nsene ngo tunda mo o pitakane Muramba gwaKidironi, ove ngo fa ntani nomfa doge nyamoge ngo di liretera.” 38 Simeyi ta tantere hompa asi: “Eyi ono uyunga yiwa. Ame mukareli goge nani rugana eyi ana tanta hompa.” Makura Simeyi ta kara moJerusarema mazuva gomanzi.

39 Nye konyima zonomvhura ntatu, vapika vendi vavali tava dukire kwaAkisi munaMaka hompa gomoGata. Apa ga zuvhire Simeyi asi vapika vendi moveli moGata, 40 Simeyi ta wapaike sindongi sendi ta zi kwaAkisi moGata a ka papare vapika vendi. Apa ga ka tengwire koGata kumwe novapika vendi, 41 Saromo tava mu tantere asi: “Simeyi ka tundire moJerusarema a ze koGata, nye ngesi ana ka tengura.” 42 Makura hompa ta zigida Simeyi, ta mu pura asi: “Nani kapi na gene komeho zaJehova nokukurondora asi nsene ngo tunda mo moJerusarema ngo fa? Nani kapi wa tente asi eyi na uyungire yiwa ntani ngo yi limburukwa ndi? 43 Morwasinke nye wa dililire kusikisa mo mugano ogu na tulire po komeho zaJehova nompangera ezi na ku tanterere?” 44 Hompa makura ta tantere Simeyi asi: “Ove wa diva yininke yoyidona eyi wa rugana otate Ndafita ntani Jehova nga ku tengwida kuwoko morwa yininke oyo. 45 Nye hompa Saromo ngava mu tungika ntani Jehova nga ninka uhompa waNdafita u kare dogoro narunye.” 46 Hompa ta tantere Benaya munaJehoyada a ze a ka dipage Simeyi, makura age ta zi ta ka mu dipaga.

Yipo nye, uhompa naunye tau kara waSaromo.