koVaroma
3 Uwa musinke wokukara Mujuda ndi wokukurugana yovamba? 2 Mauwa manzi ga kara. Wokuhova, Vajuda kwa va pa mbudi zaKarunga. 3 Ngapi nye nsene asi Vajuda vamwe kapi va kere nepuro, eyi kutanta nye asi vantu kapi tava vhuru hena kuhuguvara Karunga ndi? 4 Hawe! Nampili vantu va kare vanayimpempa nye Karunga age munasili, ngamoomu va yi tjanga asi: “Kononkango doge yiko ngava kudivira asi ove wa hungama ntani ove kuvhura kufunda nsene va kupangura.” 5 Apa atu rugana yininke yoyidona, vantu kudimburura asi Karunga muhungami. Ayo ngoso kutanta nye asi Karunga kapisi muhungami apa a tu tengeke ndi? (Ame kuna kuuyunga eyi ava gazara vantu vamwe.) 6 Hawe! Nsene asi yimo ngoso, ngapi nye omu Karunga nga pangura uzuni?
7 Nsene asi yimpempa eyi ani tanta kulikida asi eyi a uyunga Karunga usili ntani kuninkisa vantu va mu hamberere, morwasinke na pangwira nge asi ame munanzo? 8 Ndi tu tante nye ngwendi moomu ava tu rundire vamwe asi ose kutanta asi: “Tu ruganeni udona yipo uwa u kare po”? Vantu vangoso va hepa kuvapangura.
9 Ngoso kutanta nye asi twa va pita ndi? Hawe! Ngomu nina yi tanta nare asi Vajuda noVagereka, navenye kwa kara mepangero lyononzo, 10 ngamoomu va yi tjanga asi: “Kwato ogu ga hungama, nampili gumwe, 11 kwato ogu a kwata egano ndi a papare Karunga. 12 Vantu navenye va mu zumba, navenye kwato sikwafo, kwato ogu a likida nkenda, nampili gumwe.” 13 “Nomuliu dawo kwa fana ngwendi eyendo lyokudira kufofera, maraka gawo kwa zura yimpempa.” “Nomurungu dawo ngwendi tuzokagona touhungu.” 14 “Motuna twawo kwa zura mo nonkango deswau nonyengo.” 15 “Nompadi dawo kwa genderera mokutjisanga honde.” 16 “Ezonaguro noudona kwa kara mononzira dawo, 17 ntani awo kapi va diva nzira zombili.” 18 “Awo kapi va paka etjirokarunga momeho gawo.”
19 Ngesi tuna yi diva asi nayinye eyi azi tanta Veta kwa tamba kwava va kara konhi zoVeta, yipo vantu ngava dire kulipopera asi kapi va kara nonzo ezi Karunga nga va pangwira. 20 Yeeyi Karunga kwato ogu a hungameke pokusikisa mo veta, yeeyi Veta kutuvatera tu dive asi yisinke nzo.
21 Monkedi zaKarunga zokuhungameka vantu kapi mwa hamena Veta, ngamoomu va yi pumba moVeta ntani Vaporofete, 22 Karunga kuhungameka vantu navenye ava ava pura mwaJesus Kristusa. Yeeyi navenye vamwe tupu. 23 Yeeyi navenye vananzo yiyo va dilira kukara nouyerere waKarunga. 24 Moufenkenda wendi wounene, Karunga kwa gava Jesus Kristusa a va zowore pokugava sizoweseso, monkedi ozo, age kuvatara asi va hungama. 25 Age kwa mu geve ngonzambo yipo vantu va kare nombili naKarunga pokutura epuro mohonde zendi. Eyi kwa yi rugene mokulikida uhungami wendi, morwa nare age kwa gusilire po vantu nonzo dawo medidimiko lyendi. 26 Posiruwo santaantani, age simpe kulikida uhungami wendi pokuhungameka ogu a pura mwaJesus.
27 Koyili eyi natu likangangera? Hawe, kwato. Kuvhura tu likangangere kusikisa mo Veta? Hawe, nye ntudi veta zepuro. 28 Yeeyi muntu kumuhungameka mepuro nye kapisi mokusikisa mo Veta. 29 Karunga nani goVajuda velike? Nani kapisi gonomuhoko hena dapeke? Nhi, age hena gonomuhoko dapeke. 30 Mokumona asi Karunga gumwe tupu, age nga hungameka ava va rugana yovamba nava va dira kurugana yovamba morwa epuro lyawo. 31 Eyi kutanta nye asi Veta za hepa kuhaga po morwa epuro ndi? Hawe! Nye ose kukwatesa ko Veta.