Mbilive zokuhova kwaTimoteusa

3 Nonkango edi usili asi: Nsene mugara a kondja a wapere kukara mupitisili, age kuna kukondjera sirugana sosiwa. 2 Mupitisili a kare ogu a paruka monkedi ezi azi ninkisa vantu va dire kumupangura. A kare ogu ga kara nomukadi gumwe tupu, ogu a lipangere mwanayinye, gonondunge, gonkareso zongwa, ogu a tambura vagenda, age hena ga diva kuronga, 3 kapisi a kare nkorwe ndi nyanya,* a kare ogu a tambura magano govakwawo, kapisi a kare gokutanguna ndi gokudowokera yimaliwa, 4 a kare mugara ogu a pitisire* nawa epata lyendi ano vana vendi va kare wovalimburukwi ntani wonkareso zongwa 5 (nsene asi mugara kapi ga diva kupitisira* epata lyendi, ngapi nye omu na pakera mbili mbungakriste zaKarunga?), 6 kapisi a kare mupuli gomupe morwa kuvhura a linenepeke nga gwane mpanguro zokulifana nezi zoMuzonaguli. 7 Ntani hena, a kare ogu ga divikwa kovantu ava va dira kupura asi age muntu gomuwa, yipo a dire kuswauka ntani a dire kugwira mosiraha soMuzonaguli.

8 Mukwafimbunga nage a kare ogu ga kara nononkedi donongwa, kapisi gokagoma mbetakuvali* ndi gokunwa unene vhinyu ndi gokudowokera yimaliwa nokukondjera uwa wanyamwendi, 9 nye a kare ogu ga kwaterera kepuro nezwi lyewa lyokomutjima, yeeyi alyo sihoramo saKarunga.

10 Nye pomuhowo, mu konakoneni mu dive nsene asi ana wapere sirugana ntani kapi ana kara nousima, makura ntani nye nomu mu tura a kare mukwafimbunga.

11 Vakadi nawo ava kare nononkedi donongwa, kapisi va kare worugambo, ava lipangere mwanayinye ntani ava limburukwe mwanayinye.

12 Mukwafimbunga a kare mugara ogu ga kara nomukadi gumwe tupu ntani a dive kupitisira epata lyendi nokupakera mbili vana vendi. 13 Yeeyi mugara ogu a sikisa mo nawa sirugana sendi, kudivikwa kovantu asi age muntu gomuwa ntani ga kara nemanguruko lyokuuyunga eyi ga pura kuhamena Jesus Kristusa.

14 Ame kuna kumutjangera yininke eyi nampili ngomu nina hara kumumona 15 mokuninkira asi nampo kapi ngani wiza usimbu yipo mu dive omu nomu kara membo lyaKarunga kutanta asi mombungakriste zaKarunga gomunamwenyo, ezi za kara ngwendi ngundi ntani etateko lyousili. 16 Sihoramo sokuhamena kulimburukwa kwaKarunga mulyo unene, aso sesi asi: ‘Age kwa ya kere muntu, Karunga yiyo ga mu hungameka apa ga mu ninka hena a kare sisitwa sopampepo, age kwa monekerere vaengeli, kwa mu divisire konomuhoko, vantu kwa pulire mwendi ntani kwa mu tambwire mouyerere.’