Mbilive koVahebeli

6 Yipo nye, twa ha kareni tupu perongo eli twa hovere kulironga kuhamena Kristusa, nye tu kondjereni kupameka epuro lyetu. Twa ha tengureni komarongo aga twa hovere kulironga, ngwendi kulitezurura koyirugana ya hana sikwafo ntani kupura mwaKarunga, 2 nerongo lyokuhamena ekuho, kukambeka mawoko, evhumbuko lyovafe ntani mpanguro zanarunye. 3 Mevatero lyaKarunga, ngatu pama mepuro.

4 Vamwe kwa nyoka erongo lyousili ntani nokuvhura si kuvavatera va litezurure. Awo kwa gwana uzera nouhwi wemeguru ntani mpepo zokupongoka. 5 Awo kwa tambura nonkango daKarunga nokulimonena matungiko* gomouzuni* woupe, 6 nye awo kwa zumba epuro ntani nokuvhura si kuvavatera va litezurure hena, morwa awo kwa pampara MunwaKarunga kositji nokumuswaukisa. 7 Karunga kutungika evhu apa azi roko mvhura nkenye apa, makura ta li reta yimeno kowo ava li limi. 8 Nye nsene li reta mega nononhonho alyo ku li siga ntani Karunga kuvhura a li fingilire, ano moruhura ngava li hwika.

9 Nye vakwetu wokuhara, twa yi diva asi one mwa pitakana ava va zumba epuro, one kuna kurugana eyi ngayi ninkisa Karunga a mu parure, nampili ngomu tuna kuuyunga monkedi zangesi. 10 Yeeyi Karunga muhungami, kapi nga divara yirugana yeni neharo eli mwa likida morwa edina lyendi, kweyi mwa kwefe vapongoki ntani kweyi muna kutwikira kuvakwafa. 11 Nye ose kuna hara asi namuvenye mu likide upampi, yipo mu kare nehuguvaro dogoro ngayi sike mo nayinye eyi mwa ndindira. 12 Mwa ha dwapa, nye honeneni ava va gwene eyi ga va tumbwidilire Karunga morwa kulididimika ntani kulikida epuro.

13 Apa Karunga ga tumbwidilire Abirahamu, age kwa ligene mwene morwa kwato ogu ga mu pita, 14 pokutanta asi: “Ngani ku tungika ntani ngani vhukisa ruvharo roge.” 15 Abirahamu kwa lididimikilire, makura ta gwana eyi va mu tumbwidilire. 16 Yeeyi vantu kugana kogu ga va pita, makura mugano gwawo ta gu hagekesa po nompata, morwa ago kupameka asi eyi vana uyunga usili. 17 Mokulifana, apa Karunga ga likidire sitambo sendi esi asi dili kurunduruka kwava ngava ka pinga eyi ga tumbwidira, age kwa yi pamekere nomugano, 18 yipo asi ose atu gwana epopero mwaKarunga tu kwaterere kehuguvaro lyetu, morwa twa gwana ekorangedo lyenene kupitira metumbwidiro lyendi ntani momugano gwendi. Age kapi a tanta yimpempa morwa mugano netumbwidiro lyendi kapi ayi runduruka. 19 Ehuguvaro lyetu kwa fana ngwendi sisikameso separu lyetu,* alyo kwa kora ntani lyosili, alyo kutuninkisa tu pitakane ekehe,* 20 eli ga hovere kutupitira Jesus, mupristeli gomunene gwanarunye ngwendi Merekisedeki.