Mbilive zokuhova zaPeturusa
5 Ngomukuronambunga ogu ga limonena omu Kristusa va mu hepekere ntani mokumona asi name ngava ka yererepeka nge kumwe nava va horowora, tani korangeda vakuronambunga mokatji keni asi: 2 Pitisireni siunda saKarunga esi va mu pa asi mu si takamese, kapisi komusininiko, nye nomutjima nagunye kosipara saKarunga; yi ruganeni noupampi, nye kapisi morwa kugwanena mo uwa wanyamweni, 3 kapisi mokuninkilira mo ava va mu pa mu va takamese,* nye mokukara sihonena kosiunda. 4 Ano apa musita gomunene ngava mu horora, ngomu ka gwana nkata zouyerere ezi azi dili kuzonauka.
5 None si vagara wovadinkantu, omu limburukwe kovagara wovakondi.* Namuvenye kareni nelinunupiko monkedi ezi omu litekura, morwa Karunga kwa nyenga ava ava linenepeke, nye age kulikida nkenda zendi zonene kwava va linunupika.
6 Linunupikeni nye konhi zokuwoko kwaKarunga kononkondo, yipo nga mu nenepeke apa nga si sika mo siruwo, 7 oku tomu mu pe yinka yeni nayinye, morwa age kumupakera mbili. 8 Vangarareni oku tomu takamesa, morwa nkore zeni Muzonaguli, kugendagura ngwendi nyime gokununga, a papare ogu na lipapagwira. 9 Mu rwiseni nepuro lyokupama, yeeyi mwa yi diva asi, vapuli vakweni uzuni mudima nawo kuna kuligwanekera nomaudigu aga muna kuligwanekera nago. 10 Konyima zokuhepa pokaruwogona, Karunga ogu ga zura nkenda zonene, ogu ga mu zigidira uyerere wendi wanarunye kupitira mwaKristusa, mwene nga mu deura nawa-nawa. Age nga mu pameka nokumunkondopeka, ntani nokumutura petateko lya kora. 11 Nonkondo dendi danarunye. Amen.
12 Silivanusa* mukwetu gomulimburukwi, kwa vatera nge ni mu tjangere mbilive ezi zonsupi, yipo ni mu korangede ntani nokumudivisa asi Karunga kwa mu likida nkenda zonene zosili. Kwaterereni konkenda ozo. 13 Mukadi* gomoBabironi, ogu va horowora ngwendi nyone, ntani Marukusa ogu ga kara ngwendi munange, vana mu kundisire po. 14 Likunda-kundeni nencumito lyosiumbya.*
Ngano namuvenye one mwa kara mouumwe naKristusa, mu kare nombili.