Egaununo 60

Elikido lyouyerere woUhompa waKristusa

APA ga ka sikire Jesus mosirongo saKesareya Filipi, age kwa rongere mbunga omu mwa kere novapositoli vendi. Age kwa geve kwawo ediviso lyokutetukisa asi: “Yosili nina kumutantera asi, poveli vamwe paapa tuna sikama ngesi, ava ngava dira kumakera nomfa, awo va hana kumona MunwaMuntu ta wiza mouhompa wendi.”

Varongwa vendi tava lipura asi: ‘Yisinke nampo eyi ga tembe Jesus?’ Konyima zosivike, Jesus kwa gusire oPeturusa naJakopo ntani naJohanesa a ze kumwe nawo, makura tava ka ronda ndundu zonde. Kwa kere masiku, morwa vapositoli kwa zuvhire nompofu. Age Jesus simpe kuna kukanderera, makura ta lisitunuka. Sipara sendi kwa paimine ngwendi ezuva, ano yikoverero yendi tayi zere tooto ngwendi site.

Makura yihwi yivali, eyi va nongwenene asi: “OMosesa naEliya,” kwa monekere ntani nokuuyungisa Jesus “yositambo saKarunga esi nga ka sikisa mo Jesus pokukafa moJerusarema.” Sitambo saKarunga kukwatera mo nomfa ntani hena evhumbuko lyaJesus. Nzogera ezi kwa likidire asi nomfa dendi dokuswaukisa kapisi sininke sokuvhura kukandana po, ngomu ga yi harerere Peturusa.

Varongwa apa va hasumukire, tava tara nokupurakena awo vana tetuka. Nampili ngomu lya kere emoneko, ayo kwa monokere ngwendi usili, eyi ya ninkisire Peturusa nage a lihameke mo mosihorokwa nokuuyunga asi: “Hompa, tuna wapeke kukara po. Nsene ono hara, ninka tu tunge marutambo gatatu, rumwe roge, rumwe rwaMosesa, ano oru rukwawo rwaEliya.”

Haga za Peturusa mokuuyunga, va tara ko, eremo lyokupaima tali va kudumike, makura meremo omo tamu tundu ezwi asi: “Ogu yige Munwange ogu na hara, ga za nge komutjima, omu mu zuvhe.” Apa va zuvhire ezwi, varongwa makura tava gu kawomba. Nye Jesus ta tanta asi: “Katukeni, gwa ha mu pwaga.” Ano apa va kankukire, nagumwe si va mwene nye Jesus gelike tupu.

Ezuva lyokukwama ko, apa va humburukire kondundu, Jesus ta va ngongomekedere asi: “Eyi muna mono, mwa ha ka yi tantera muntu, dogoro noku nga ka vhumbuka MunwaMuntu koufe.” Pokumona Eliya memoneko kwa retere epuro kovarongwa. Awo makura tava pura asi: “Valirongi womatjangwa morwasinke ava tantere asi, Eliya yige tanko nga hova kuwiza?”

Jesus ta va limburura asi: “Eliya nare ga wiza, nye awo kapi va ya mu tambwire.” Jesus apa kwa uyungire kuhamena Johanesa Mukuhwi, ogu ga ya sikisire mo sirugana sokulifana nesi saEliya. Johanesa kwa wapaikilire Kristusa nzira, ngamoomu tupu Eliya ga wapaikilire Elisa nzira.

Eh, omu tupu emoneko eli lya nkondopekere oJesus novarongwa vendi! Elikido kwa kere lyouyerere woUhompa waKristusa. Ngwendi moomu ga yi va tumbwidilire Jesus sivike simwe sa pitire po, varongwa kwa mwene “MunwaMuntu ta wiza mouhompa wendi.” Konyima zonomfa daJesus, Peturusa kwa tjenge kuhamena ‘undipo wokutara nomeho efumano lyendi lyenene apa va kere kumwe nendi pondundu zokupongoka.’

Vafalisayi kwa pulire Jesus a rugane sidiviso mokulikida asi yige ogu va tumbwidira moMatjangwa nga kara Hompa gomuhorowora gwaKarunga. Awo kapi va va pere sidiviso sangoso. Nye varongwa vaJesus kwa va pulisilire mokumona elisitunuko lyaJesus ngoumbangi wouporofete woUhompa. Yipo nye Peturusa ga ya tjenge konyima asi: “Ntaantani ose kuna huguvara nye unene mbudi ezi va udisa vaporofete.” Mateusa 16:13; 16:28–17:13; Marukusa 9:1-13; Rukasa 9:27-37; 2 Peturusa 1:16-19.

▪ Komeho zokumakera nomfa, ngapi omu va mwene vamwe Kristusa ta wiza moUhompa wendi?

▪ Yokuhamena kosinke va uyungire oMosesa naEliya kumwe naJesus memoneko?

▪ Morwasinke emoneko eli lya nkondopekerere varongwa?