Kudumogona

Vakareli vaJehova womosiruwo sanare ngava ligwanekere nomaudigu aga va dilire kundindira. Tu zogereni kuhamena Jakopo. Oguhwe kwa mu pangerere asi a ka kware gumwe gopovana wovakadi vaRabani, gumwe gekoro ogu nga karere Jehova, ntani oguhwe kwa mu huguvaresere asi Jehova nga mu tungika momunene. (Gen. 28:1-4) Jakopo kwa sikisire mo eyi va mu tanterere oGuhwe. Age kwa tundire mosirongo sawo moKanani noku za kembo lyaRabani ogu ga kere novana vavali wovakadi oReya naRakera. Jakopo kwa here munaRabani gomukadona gomunona po, Rakera. Makura yipo ga ruganenene Rabani nomvhura ntambali komeho a mu kware. (Gen. 29:18) Nye yininke kapi ya ya horokere ngwendi moomu ga yi ndindilire Jakopo. Rabani kwa mu gendere konhi yipo a kware munendi gomukondi po, Reya. Rabani kwa pulisire Jakopo a kware Rakera konyima zosivike, nsene tupu ngano ga mu ruganenene hena nomvhura ntambali. (Gen. 29:26, 27) Rabani kwa fukilire hena Jakopo apa nga rugana ngesefa kumwe nendi. Rabani kwa tekwire Jakopo momudona ure wonomvhura 20!​—Gen. 31:41, 42. w23.04 15 ¶5

Yilye ogu natu vhura kuhedera yipo a tu hengagwide ntani a tu pe mavyukiso? Ose twa diva elimbururo kepuro olyo. Ose kuvhura kuhedera Jehova Karunga kupitira mekanderero. Jehova kuna kutuzigida tu kanderere kwendi. Age kuna tu harere tu “kanderere nkenye apa.” (1 Tes. 5:17) Ose kuvhura kukanderera kwendi nemanguruko ntani noku mu pura a tu vyukise meparu lyetu mudima. (Yis. 3:5, 6) Mokumona asi Jehova Karunga gougavi, age kuuyunga asi ose kuvhura tu kanderere kwendi yikando yoyinzi. Jesus gayi kwete egano asi makanderero getu mulyo unene kwaJehova. Nare-nare komeho a wize pevhu, age ga mwene omu oGuhwe ngava limburura makanderero govagara novakadi wovalimburukwi. Pasihonena, Jesus kwa kere konyonga zoGuhwe apa va limbwilire makanderero gokutundilira komutjima govakareli vendi, ngwendi makanderero gaHana, Ndafita, Eliya ntani novakareli vendi vamwe hena wovalimburukwi. (1 Sam. 1:10, 11, 20; 1 Vah. 19:4-6; Epis. 32:5) Eyi yiyo Jesus ga rongere varongwa vendi va kanderere nkenye apa ntani nehuguvaro!​—Mat. 7:7-11. w23.05 2 ¶1, 3

Mupristeli gomunene Jehoyada kwa tjilire Jehova. Age kwa yi rugene oyo apa munaJesebeli gomukadi, Ataliya, ga tamekere kupangera moJuda ga hana asi paveta. Age kwa kere nonyanya unene ntani age kwa here kukara hompakadi, ano eyi kwa mu ninkisire a hetekere ko kudipaga vatekuru vendi navenye yipo a pangere! (2 Hist. 22:10, 11) Gumwe govanona owo kuna kara Jowasi, ogu ga parukire morwa mukadaJehoyada gedina Jehoseba ogu ga mu parwire. Nage namugara gwendi kwa horekere munona ogo ntani kwa mu pakerere mbili. Monkedi zangesi Jehoyada ntani Jehoseba kwa poperere ruvharo rwaNdafita yipo ru dire kuhaga po. Jehoyada kwa twikilire kulimburukwa Jehova ntani kapi ga pulisilire utjirwe wokutjira Ataliya u mu hagekese kurugana youhunga. Apa Jowasi ga kere nonomvhura ntambali, Jehoyada kwa yi likidire hena asi age nga limburukwa Jehova. Age kwa tulisire po egano. Nsene ngano asi egano olyo lya tompokere, Jowasi ngano ga ya kere hompa ogu ngano ga ya kere mupingi gouhunga ogu ga vhulire kupinga yininke nayinye yaNdafita. Ano nsene ngano asi egano olyo kapi lya tompokere, Jehoyada ngano ga fire. Nevatero lyaJehova, egano olyo lya tompokere. w23.06 17 ¶12-13

Hompa Nebukadenesara ngano ga tere Ndaniyera ngonkore zendi ntani ngano ga mu dipagere. Nye Ndaniyera kwa likidire uradi nokufaturura nzodi. Yisinke nampo ya vaterere Ndaniyera a kare nouradi meparu lyendi mudima? Apa Ndaniyera ga kere munona, age ga lirongerere ko kosihonena sozina noguhwe. (Deut. 6:6-9) Ndaniyera ga divire yipango murongo ntani ga divire hena mauzera gomanzi goveta. Pasihonena, age ga divire eyi na lya Muisraeli neyi na dira kulya. (Lev. 11:4-8; Ndan. 1:8, 11-13) Ndaniyera ga divire hena ehistoli lyovantu vaKarunga ntani ga divire eyi ya va horokerere apa ngava dili kuparuka kuliza nonompango daJehova. (Ndan. 9:10, 11) Yihorokwa eyi ga ligwanekerere nayo Ndaniyera meparu lyendi kwa mu ninkisire a kare nehuguvaro asi yikare asi yisinke nga yi mu horokera, Jehova novaengeli vendi wononkondo ngava mu vatera.​—Ndan. 2:19-24; 10:12, 18, 19. w23.08 3 ¶5-6

Repeka kwa kere mukadi gonondunge ogu ga kere nouradi wokutura po matokoro gomanene meparu lyendi nalinye ntani ga divire siruwo esi na rugana yuma yongandi nomu na yi rugana. (Gen. 24:58; 27:5-17) Nye nampili ngoso, age kwa kere mukadi gefumadeko ntani nga kwama mavyukiso. (Gen. 24:17, 18, 65) Nsene o kwatesa ko mawapaiko gaJehova nelinunupiko ngwendi moomu ga yi rugene Repeka, ove ngo tulira po sihonena sosiwa vemepata lyoge ntani womombungakriste. Kudiva apa da hulira nonkondo doge kuna kara sikara esi va hepa Vakriste navenye ava ava honene Jesus. Esitera kwa kere mukadi ogu ga divire apa da hulira nonkondo dendi ntani ogu nga karere Karunga noulimburukwi. Mokumona asi ga divire apa da hulira nonkondo dendi, age kapi ga linenepekere apa ga kere hompa gomukadi. Age kwa purakenene komavyukiso ga sipwa sendi Moredekayi ntani noku ga kwama. (Esit. 2:10, 20, 22) Ove kuvhura o likide sikara oso nsene o pura magano gomawa kwava wopeke ntani noku ga tura pasirugana. (Tit. 2:3-5) Esitera kwa likidire hena monkedi zapeke sikara esi sokudiva apa da hulira nonkondo dendi. Age kwa kere mukadona ‘gosihanga sosiwa,’ nye kapi ga yi likidire kovantu asi age muwa.​—Esit. 2:7, 15. w23.12 19-20 ¶6-8

Kulizuvha unzoni nkenye apa. kapisi mudigo ogu twa hepa kusimba. Nsene asi twa tanta nzo zetu nokulitezurura ntani nokurugana ko yininke eyi twa hepa kurugana yipo tu nyokere po nzo zokulifana, ose kuvhura kukara nehuguvaro asi Jehova ga tu gusira po. (Yirug. 3:19) Konyima zokurugana yininke oyo, Jehova kapi ana tu harere hena tu twikire kulizuvha unzoni. Age ga yi diva asi nsene tu twikira kulizuvha unzoni, ayo ngayi tu koresa. (Epis. 31:10) Nsene tu guva unene, ose kuvhura nampo ngatu hageke kuduka melirombero lyokukagwana mwenyo gwanarunye. (2 Kol. 2:7) Nsene asi ove kutwikira kulizuvha unzoni wounene, demenena ‘kedongweneno po’ eli a gava Karunga. (Epis. 130:4) Apa Jehova a gusire po ava ava li tezurura sili, age kutumbwidira asi: “Kapi ngani diworoka hena mausima gawo.” (Jer. 31:34) Eyi kutanta asi Jehova kapi hena nga gazara nonzo edi ga ku gusira po. Ya ha ku guvisa morwa nampo yeeyi wa zumbanesa yitumbukira yoge yimwe mombungakriste. Jehova kapi a twikire kugazara kuhamena nonzo doge ntani nove kapi wa hepa kudigazara. w23.08 30-31 ¶14-15

Posiruwo souvera woKorona, Nombangi daJehova edi da purakenene mavyukiso aga za geve mbunga zaJehova, kwa nyokerere po kukara nosinka esi va kere naso vantu ava va purakenene konombudi depuko. (Mat. 24:45) Twa hepa kudemenena koyininke “yomulyo po unene.” (Fil. 1:9, 10) Apa atu ligwanekere nomadonganeso, ose kumana siruwo setu sosinzi ntani nononkondo detu. Yininke eyi atu rugana ngwendi kulya, kunwa, yilihafeso ntani yirugana, kuvhura kukara madonganeso kwetu nsene tu yi tura yi kare yininke yomulyo po unene meparu lyetu. (Ruk. 21:34, 35) Mokugwederera ko, nkenye ezuva ose kuzuvha noku resa kuhamena vantu ava ava masha ntani nomalitatano govanapolitika. Twa hepa kudivilisa asi malitatano aga kapi gana kutudonganesa. Nsene tu dira ku yi rugana oyo, ose kuvhura ngatu tameke kukwatesa ko ruha rumwe ndi ruha rwa peke. Satana kuruganesa nonkedi dokulisiga-siga yipo a zonagwise po erwameno lyetu lyokurugana youhunga. w23.07 16-17 ¶12-13

Ediworoko lyonomfa daJesus kuna kara ezuva lyomulyo po unene momvhura kovantu vaJehova. Yiso selike silika esi Jesus ga pangerere varongwa vendi nava limburukwa. (Ruk. 22:19, 20) Ayo kutudiworokesa nonkedi omu natu likida rupandu rwetu konzambo zaJesus. (2 Kol. 5:14, 15) Ayo kutupa hena mpito yipo tu hafere ‘kulikorangeda’ novanavazinyetu. (Rom. 1:12) Vamwe kuvahafesa kweyi ava mono neyi ava zuvhu. Ose hena kundindira noruhafo ezuva lyoMurarero gwaHompa morwa twa yi diva asi pezuva olyo ose kuponga kumwe novanavazinyetu uzuni mudima. Nayinye eyi kuninkisa Murarero gwaHompa gu kare nomulyo unene kwetu. w24.01 8 ¶1-3

Nsene tu teda ko unene kweyi Jehova naJesus va futire, ayo ngayi tu vatera tu kwate egano omu va tu hara unene. (Gar. 2:20) Sizoweseso kuna kara uhwi weharo. Jehova kwa tu likida eharo lyenene pokugava Munendi ogu ga hara a ya tu fire. Jehova kwa pulisilire Munendi a hepe ntani a ya tu fire. Jehova kapi a lizuvhu tupu asi ga tu hara, nye age kututantera omu ga tu hara. (Jer. 31:3) Jehova kwa tu kokera kwendi morwa ga tu hara. (Hetakanesa Deuteronomium 7:7, 8.) Kwato muntu ndi nkenye eyi nayi vhura kutugusa ko kwaJehova. (Rom. 8:38, 39) Ngapi omu eharo lyangesi ali kuninkisa o lizuvhe? w24.01 28 ¶10-11

Vakriste wovagwavekwakuhafera ehuguvaro lyawo lyoku ka parukira meguru. Gumwe gwawo kuna kara munazinyetu Frederick Franz ogu ga uyunga kutundilira komutjima asi: “Ehuguvaro lyetu ngali ka sika mo ntani vagwavekwa natuvenye 144 000, ngatu ka gwana eyi ga tu tumbwidira Karunga. Mfeto zetu nga zi ka kara zongwa unene kupitakana omu twa yi gazarere.” Mo-1991, munazinyetu Franz kwa tente asi: “Ose simpe kutara ehuguvaro lyetu asi mulyo unene. . . . Moomu tuna kundindira siruwo sosire, yimo hena tuna kukara norupandu rorunene kehuguvaro lyetu . . . Ame kuhafera unene ehuguvaro lyetu kupitakana pwanare.” Yikare asi ose kuna kundindira ku ka hafera mwenyo gwanarunye pevhu ndi meguru, ose twa kara nehuguvaro lyewa eli ali tu hafesa. Ntani ehuguvaro lyetu kuvhura kunkondopara unene. w23.12 9 ¶6; 10 ¶8

Ponze zevero lyonkongoronzugo zanare kwa kere po sizambero esi ngava zambere yikorama kwaJehova. (Ex. 27:1, 2; 40:29) Nye nampili ngoso, nonzambo dina kapi da vhulire kugusilira po nonzo dovantu. (Heb. 10:1-3) Nonzambo edi ngava twikire kugava ponkongoronzugo kwa likidire asi pwa ya kere nzambo ezi za vhulire kuya gusilira po nonzo nadinye dovantu. Jesus gayi divire asi Jehova kwa mu tumine a wize pevhu mokuya gava rutu rwendi ropanyama ru ya kare nzambo zosizoweseso kovantu. (Mat. 20:28) Yipo nye, pekuho lyendi, Jesus kwa ligeve mwene yipo a rugane eyi ga mu harere Jehova. (Joh. 6:38; Gar. 1:4) Jesus kwa zembe eparu lyendi ‘rumwe tupu’ yipo a dongonone po narunye nonzo dankenye gumwe ogu a tura epuro mwaKristusa.​—Heb. 10:5-7, 10. w23.10 26-27 ¶10-11

Kwato eyi natu vhura kurugana ko pwanyamwetu yipo tu kandane po nonzo nonomfa. (Epis. 49:7, 8) Yipo nye, Jehova kwa tulisire po mawapaiko yipo Jesus a gave eparu lyendi mokutuparura. Jehova naJesus kwa tulire po malizambero gomanene. Moomu tuna kuteda ko kelizambero lyaJehova naJesus, yimo hena ngatu kara norupandu kosizoweseso. Apa Adamu ga zonene, age kapi ga kere nompito zokugwana mwenyo gwanarunye, kukwatera mo vana vendi navenye. Mokurugwidira po eyi ga zumbanesere Adamu, Jesus kwa zembe eparu lyendi lyokusikilira mo. Apa Jesus ga kere pevhu, “age kapi ga tulire nzo, ntani mokana kendi kapi nga mu tundu yimpempa.” (1 Pet. 2:22) Apa ga fire, age kwa sikilire mo ngwendi moomu ga sikilire mo Adamu komeho a zone. Yipo nye, apa Jesus ga fire, age kwa futire eyi ga zumbanesere Adamu.​—1 Kol. 15:45; 1 Tim. 2:6. w24.01 10 ¶5-6

Konyima zapa Jesus va mu vhumbwire, age kwa ka hwililire mevango lyokupongokerera montembeli zopampepo. Ose tuna dimburura nawa-nawa asi ewapayiko lyaJehova lyokumukarera mousili kwa zeruka unene morwa nzambo zosizoweseso ntani morwa mupristeli Jesus Kristusa. Mupristeli gomunene gomoIsraeli kwa hwililire mevango lyokupongokerera eli va rugene vantu kumwe nohonde zoyikorama yipo a gave nzambo. Nye Jesus kwa hwililire meguru, evango lyokupongokerera po unene yipo aka sikame komeho zaJehova. Age kwa ka geve eparu lyendi lyokusikiliramo meguru, “yipo a guse po nonzo kupitira monzambo zendi.” (Heb. 9:24-26) Yikare asi ehuguvaro lyetu lyokuka parukira meguru ndi pevhu, natuvenye kuvhura tukarera Jehova montembeli zendi zopasifanekeso. w23.10 28 ¶13-14

Gazadara ko eyi ana kuturuganena Jesus meguru ngaHompa gwetu ntani noMupristeli gomunene gonkenda. Kupitira mwendi, ose kuvhura kuhedere “sipundi saKarunga ogu ga kara nonkenda zonene” kupitira mekanderero nokuhundira egusiropo ntani a tu vatere ‘paapa tuna hepere evatero.’ (Heb. 4:14, 15) Twa hepa kugazadara ko nkenye ezuva kuhamena eyi ga tu ruganena Jehova naJesus ntani eyi vana kuturuganena ngesi. Eharo eli ava tu likida ngano li tu tumangede tu kare noupampi ngomu tuna kukarera Jehova. (2 Kol. 5:14, 15) Nkedi zimwe zomulyo po omu natu likida rupandu kuna kara pokuhetekera ko kuvatera wopeke va kare Nombangi daJehova nokukara varongwa vaJesus. (Mat. 28:19, 20) Eyi yiyo ga rugene mupositoli Paurusa. Age ga yi divire asi mpango zaJehova kuna kara asi “vantu navenye va va parure ntani va kare nediwo lyousili.” (1 Tim. 2:3, 4). w23.10 22-23 ¶13-14

Sinzi setu kuresa velise ezi yipo tu hengagwide vantu ava a tu zuvhisire ntani tu va likide omu eparu ngali ka fana moParadisa. Ngapi natu vatera wopeke va yi pure asi matungiko aga va faturura mEhororo 21:3, 4 ngaga ka sika mo? Ntani ngapi natu nkondopeka ehuguvaro lyetu mwaJehova ntani momatumbwidiro gendi? Jehova kwa gava nokonda domulyo deyi natu karera nehuguvaro asi matumbwidiro gendi nga ka ga sikisa mo. Ose kugwana nokonda deyi natu huguvarera momatumbwidiro gaJehova goParadisa monovelise edi dakukwama ko. Ose kuresa mo asi: “Ano ogu ga hingilire kosipundi souhompa, ta tanta asi: ‘Tara! Ame kuna kuninka yininke nayinye yi kare yoyipe.’ Ta tantere nge hena asi: ‘Tjanga, yeeyi nonkango edi usili ntani kuvhura kudihuguvara.’ Age ta tantere nge hena asi: ‘Yina dongonoka po! Ame nyame etameko nouhura.’”​—Ehor. 21:5, 6a. w23.11 3 ¶3-5

Munazinyetu gomugara kuvhura a yi likide asi ga kara nonondunge pokutura po matokoro gomawa monkedi ezi a dwara ntani nomu a likurura. Sinzi sovantu ava ava rugana yidwara nava ava retesa po magano omu nava honza yidwara, kapi ava fumadeke Jehova ntani awo nampo kuparuka eparu lyokunyata. Magazaro gawo gomadona kukundama omu ava rugana yidwara yokupata ndi yokuninkisa mugara a moneke ngwendi mukadi. Munazinyetu gomugara ogu a honene Jesus nga gazadara ko eyi ayi hafesa Jehova ntani nokuhonena yihonena yoyiwa yovanavazinyetu womombungakriste. Age kuvhura kulipura mwene asi: ‘Matokoro aga ani tura po kulikida asi na kara nonondunge ntani kufumadeka wopeke ndi? Monkedi ezi ani dwara kuninkisa wopeke va yi pure asi ame kukarera Karunga ndi?’ (1 Kol. 10:31-33) Munazinyetu gomugara gomudinkantu ogu ga kara nonondunge nga ninkisa wopeke va mu hare ntani naJehova. w23.12 26 ¶7

Mosiruwo sanare, “hompa gokombindakano” kwa hepekere vantu vaJehova. (Ndan. 11:40) Pasihonena, oyo kwa horokere posiruwo soyita yokuhova yoUzuni ntani yauvali yoUzuni, apa sinzi sovanavazinyetu va va tulire modorongo ntani apa vanona vamwe woNombangi daJehova va va tjidire mo mosure morwa kudira kulihameka moupolitika. Monomvhura dantani, ulimburukwi wovakareli vaJehova ava va kara mepangero lyahompa gokombindakano kwa u heteka mononkedi dapeke. Pasihonena, posiruwo esi ava rugana ehoroworo, Mukriste kuvhura nampo a kare meheteko lyokuninka asi a kwatese ko mbunga politika zongandi ndi muntu gongandi ogu vana hara kuhorowora. Nampili ngomu ana kudira kuhorowora, age nampo kuvhura a lizuvhe asi ngano mbunga politika zongandi zi vene ehoroworo. Nye nampili ngoso, mokudira kulihameka moupolitika, twa hepa kutakamesa kuhamena yininke eyi a tu rugana ntani kuhamena hena yininke eyi atu gazara nomu atu lizuvhu kuhamena yuma yongandi!​—Joh. 15:18, 19. w23.08 12 ¶17

Ngomu tuna kuduka melirombero, twa hepa ‘kuduka monkedi ezi nazi tu ninkisa tu ka gwane mfeto.’ (1 Kol. 9:24) Jesus kwa uyungire asi kuvhura tu “lizumbilire momakurulya nomomakurunwa nomoyinka youzuni ou.” (Ruk. 21:34) Etjangwa eli ntani nomatjangwa gapeke kuvhura kukuvatera o dimburure malitjindjo aga nampo wa hepa kutura po ngomu ono kuduka melirombero lyokukagwana mwenyo. Ose kuvhura kuyipura nawa-nawa asi ose ngatu ka gwana mfeto zeparu melirombero eli tuna kuduka morwa Jehova kutupa nonkondo edi twa hepa. (Jes. 40:29-31) Yipo nye, twikira kuduka! Honena mupositoli Paurusa, ogu ga dukire unene yipo a ka gwane mfeto ezi za mu kere komeho. (Fil. 3:13, 14) Kwato gokuvhura kukudukira po melirombero eli nye nevatero lyaJehova, ayo kuvhura yi ku tompoke. Jehova kuvhura kukuvatera o simbe nomudigo doge ntani nokuzumba nomudigo edi dina dili kukara hepero. Nevatero lyaJehova, ayo ngayi kutompoka kuduka melirombero nelididimiko ntani nokukagwana mfeto. w23.08 31 ¶16-17

Apa Jesus ga kere nonomvhura 12, vakondi vendi kwa mu sigire moJerusarema. (Ruk. 2:46-52) Aso kwa kere situmbukira saJosefa naMariya mokudivilisa asi vana kara novana vawo navenye ngomu va tengwire kembo konyima zosipito. Apa Josefa naMariya va gwene Jesus, Mariya kwa pere Jesus usima kweyi ga kere moJerusarema. Jesus ngano ga va limbwilire monkedi zondona. Nye mevango lyoyo, age kwa limbwilire vakondi vendi monkedi zoureru ntani nefumadeko. Nye nampili ngoso, Josefa naMariya “kapi va kwete egano eyi ga va tanterere.” Nye Jesus kwa twikilire simpe ku va limburukwa. Vadinkantu, ayo kumudigopera kulimburukwa vakondi veni apa ava rugana mapuko ndi apa ava dili kumukwata egano ndi? Yisinke nayi mu vatera? Gazadareni ko omu ali zuvhu Jehova. Bibeli kuuyunga asi apa omu limburukwa vakondi veni, “ayo kuhafesa Hompa.” (Koros. 3:20) Jehova gayi diva asi poyiruwo yimwe vakondi woge kapi ava kukwata egano ndi poyiruwo yimwe awo kutura po noveta edi adi kudigopere kulimburukwa. Nye apa o tokora kulimburukwa vakondi woge, ayo kumuhafesa. w23.10 7 ¶5-6

Munasure mukwetu kuvhura nampo a uyunge asi Nombangi daJehova da hepa kutjindja mutaro gwawo kuhamena omu ava tara vagara wokulirara novagara vakwawo ndi vakadi wokulirara novakadi vakwawo. Nayi wapa kwetu mokumutantera asi ose kwa fumadeka vantu ntani nomatokoro gawo. (1 Pet. 2:17) Ose nampo kuvhura tu mu tantere eyi azi uyunga Bibeli ntani nomu za tu retera ruhafo pokuzikwama. Nsene muntu kuna kupatana unene eyi twa pura, kapisi tu genderere kugazara asi twa diva eyi ga pura. Pasihonena, ngapi nsene munasure mukweni a uyunga asi ayo ugova kupura mwaKarunga? Ngoso kuvhura o gazare asi age kwa pura melisinto ntani ga diva yoyinzi kuhamena elisinto ndi? Yosili, ayo kuvhura yi kare asi age nampo kuna kuruguruka tupu yininke eyi ga zuvha. Nampo kuvhura o mu likide yirongwa eyi ya zogera kuhamena unsitwe eyi ya kara ko jw.org. Konyima zosiruwo, age nampo kuvhura nga kare neharo yipo ngomu zogere kumwe sirongwa ndi vidiyo ezi za kara kointaneta zetu. Yosili, apa atu limburura monkedi zefumadeko, ayo kuvhura ngayi mu vatere yipo nga hare kulironga yoyinzi eyi azi uyunga Bibeli. w23.09 17 ¶12-13

Ose kuvhura kukara nehuguvaro asi Jehova nga tu ruganesa ntani nga tu tungika nose nampili yi kare asi twa tura mapuko, sinene tupu tu rugana nayinye eyi natu vhura kurugana ko mokuwapukurura monkedi omu atu rugana yininke ntani noku twikira kuhuguvara mwendi. (Yis. 28:13) Simisoni kapi ga sikilire mo, nye nampili ngoso, age kapi ga hagekere kukarera Jehova, nampili konyima zapa ga rugene epuko naDelira. Ntani Jehova kwa twikilire kuruganesa Simisoni. Jehova kwa ruganesere hena Simisoni monkedi zokutetukisa. Jehova kwa tere Simisoni ngomugara ogu ga kere nepuro lyokupama ntani kwa mu tjenge pelikwamo lyovantu wovalimburukwi ava va tumbura mobuke zoVahebeli egaununo 11. Ayo kutukorangeda pokudiva asi ose kuna kukarera Guhya geharo gemeguru ogu ana hara kutunkondopeka, unene po apa atu kara nomaudigu ntani apa atu hepa evatero lyendi! Yipo nye ngwendi Simisoni, ngano tu li kwambereni Jehova pokuuyunga asi: “Diworoka nge o pe nge ko hena rumwe nonkondo.”​—Vap. 16:28. w23.09 7 ¶18-19

Mokumona asi ose tuna diva asi ezuva lyaJehova pepi lina kara, tuna hara kurugana paapa twa hulira yipo tu zuvhisire ko wopeke mbudi zongwa. Nye poyiruwo yimwe kuvhura nampo tu kare nowoma wokuyirugana oyo. Morwasinke? Morwa kuvhura tu tjire eyi vantu nava tu gazarera ndi eyi nava tu rugana. Eyi yiyo ya horokerere Peturusa. Momasiku aga Jesus va mu twere kompanguro, Peturusa kwa kere nowoma mokulidivisa mwene asi age murongwa gwaJesus ntani kwa rugurukire kupatana asi kapi ga mu diva. (Mat. 26:69-75) Nye Peturusa ga ya fundire po woma ou ga kere nawo. Ano konyima age kwa tjenge asi: “Mwa ha tjira eyi ava tjira vantu ndi asi mu kare nosinka.” (1 Pet. 3:14) Nonkango daPeturusa kutupa ehuguvaro asi ose kuvhura tu funde po utjirwe wokutjira vantu. Yisinke nayi tu vatera tu funde po utjirwe wokutjira vantu? Peturusa kututantera asi: “Fumadekeni Kristusa ngaHompa monomutjima deni.” (1 Pet. 3:15) Ose kuvhura tu lidiworokese nyamwetu asi Jesus Kristusa age Hompa gwetu ntani asi ga kara nononkondo dononene. w23.09 27-28 ¶6-8

Twa hepa kutwikira kunyokera po kulihameka moyirugana yokudira mulyo eyi ya “hamena komundema.” (Efe. 5:11) Ayo usili asi apa muntu a tarere nokupurakena ndi noku uyunga yininke yoruhonda, ayo ku ya mu karera ureru a rugane yirugana yoyidona. (Gen. 3:6; Jak. 1:14, 15) Uzuni ou waSatana kutukumbagera yipo tu yi pure asi yininke eyi a tara Jehova asi yidona ntani ya nyata, ayo kapisi yidona nawa-nawa. (2 Pet. 2:19) Siraha simwe saSatana esi a ruganesa nkenye apa kuna kara mokupiyaganeka vantu yipo va dire kudiva asi eyi yiwa ntani eyi epuko. (Jes. 5:20; 2 Kol. 4:4) Eyi yiyo nye sinzi sonomuvi nomalikwamo gokotivi ntani yininke yokointaneta ayi korangedere magano aga aga lilimbi nonompango daJehova. Satana ana hara tu gazare asi yininke yoyidona kapi a yi reta siponga.​—Efe. 5:6. w24.03 22 ¶8-10

Nkongoronzugo kwa fene ngwendi tende ezi ngava simbi Vaisraeli apa ngava dirauka. Awo kwa zi ruganesere hambara nomvhura dokusika ko-500 dogoro apa ntembeli va ya zi tungire moJerusarema. (Ex. 25:8, 9; Num. 9:22) “Nkongoronzugo” kwa kere evango eli Vaisraeli ngava gava nonzambo dawo. (Ex. 29:43-46) Nye nampili ngoso, nkongoronzugo kwa fanekesere hena yininke yoyiwa po unene. Kwa ‘fanekesere yininke yemeguru’ ntani kwa fanekesa ntembeli zonene zaJehova zopampepo. Mupositoli Paurusa kwa uyungire asi “tenta ezi [ndi nkongoronzugo] kwa fanekesa yininke yina kuhoroka ngesi.” (Heb. 9:9) Yipo nye, apa Paurusa ga tjangerere Vahebeli, azo ntembeli zopampepo nare pozili. Azo kwa tamekere kukara po momvhura 29 mosiruwo sovapositoli. Momvhura ozo, yipo Jesus ga gwene ekuho noku tameka kukara “mupristeli gomunene” gwaJehova gomontembeli zopampepo.​—Heb. 4:14; Yirug. 10:37, 38. w23.10 25-26 ¶6-7

Twa hepa kukara vantu woureru ndi wougomoki nsene yininke kuna ku tu digopera meparu lyetu yipo tu karere Jehova noruhafo. Ngapi natu yi rugana oyo? Twa hepa kukara nougomoki apa yininke yemeparu lyetu ayi litjindji ntani pokufumadeka magano gava wopeke nopokufumadeka matokoro govantu wopeke. Ngovakareli vaJehova, ose tuna hara kukara nougomoki. Ose tuna hara hena kulinunupika ntani noku kara nonkenda. Jehova ku mu tumbura asi “Mupopeli” morwa age kwa likorerera ntani kapi a li nyunganga. (Deut. 32:4) Nye nampili ngoso, age hena kwa kara nougomoki. Ngomu yininke yomouzuni ou yina kulitjindja, Karunga kutwikira kutambura maukaro ntani age kudivilisa asi nayinye eyi ga tumbwidira ngayi ka sika mo. Jehova kwa sita vantu yipo va mu fane nevhuliko lyokutambura maukaro apa yininke ayi litjindji meparu lyetu. MoBibeli ose kugwana mo nompango edi na di tu vatera yipo tu ture po matokoro gomawa yikare asi maudigu musinke aga natu vhura kuligwanekera nago. Sihonena saJehova ntani nonompango edi ga tu pa, kwa tu pa umbangi ou au likida asi nampili ngomu ga kara “Mupopepi,” Jehova age hena kwa kara nougomoki. w23.07 20 ¶1-3

MoBibeli, Jehova kwa lihetakanesa mwene kwazinya ogu ga kara neharo. (Jes. 66:12, 13) Gazadara ko tupu kwazinya ogu ga hara munendi gomunona nokumupakera mbili. Zinya kudivilisa yipo a mu pe eyi ana hepa. Apa atu guwu, ose kuvhura tu kare nehuguvaro asi Jehova nga tu likida eharo. Age kapi a hageke kutuhara apa atu rugana yoyidona. (Epis. 103:8) Apa Vaisraeli ngava zonene Jehova yikando yoyinzi, ano konyima apa va litezwilire age kwa va huguvaresere asi ga va hara. Pasihonena, age kwa tente asi: “Ove ntumbu kwange kwa ku hara yiyo na ku fumadeka.” (Jes. 43:4, 5) Jehova kutulikida eharo lyokulifana nampili neina. Nampili apa atu tura nonzo dononene, apa atu litezurura nokutengura kwaJehova, ose ku ya dimburura asi age simpe ga tu hara. Age kwa tumbwidira asi “kapi a likata-kata kudongwenena po.” (Jes. 55:7) Bibeli kwa faturura egusiropo lyangesi ngwendi “yiruwo yepwizumuko” yokutunda kwaJehova.​—Yirug. 3:19. w24.01 27 ¶4-5

Jehova kuvhura kutuvatera nsene kuna kuligwanekera noudigu. Pasihonena, nsene kuna kupura muhona gwetu a tu pe ko siruwo ngatu ka kare posigongi ndi kuna kumupura yipo tu tjindje siruwo nomazuva aga atu rugana yipo tu ponge mapongo nagenye, ose kuvhura kuyadimburura omu Jehova a tu vatere. Yitundwamo kuvhura kuyakara yoyiwa kupitakana omu twa yi ndindira. Ngoyitundwamo, ose kuyahuguvara unene mwaJehova. Esira kwa kanderere kwaJehova yipo a mu vatere. Esira nga kanderere kwaJehova nkenye apa ga kere nosinka kuhamena eyi ga hepere kurugana. (Esir. 8:21-23; 9:3-5) Mokumona asi Esira kwa huguvarere mwaJehova, vantu wopeke nawo va kere neharo mokumukwatesa ko ntani nokuhonena epuro lyendi. (Esir. 10:1-4) Nsene tuna kara nosinka kuhamena yihepwa yetu yopanyama ndi kuhamena epopero lyava vemepata lyetu, twa hepa kukara nehuguvaro nokukanderera kwaJehova. w23.11 18 ¶15-17

Jehova kapi ana kuuyunga asi nsene tuna hara kukara vahungami, twa hepa kurugana yokulifana ngwendi eyi ga rugene Abirahamu. Pwa kara nonkedi dononzi omu natu likida epuro lyetu kupitira moyirugana. Ose kuvhura tu tambure vantu wovape komapongo, kuvatera vanavazinyetu ava vana hepa evatero ntani kuruganena uwa vemepata lyetu. Eyi kuna kara yininke eyi ayi hafesa Karunga ntani nga tu tungika. (Rom. 15:7; 1 Tim. 5:4, 8; 1 Joh. 3:18) Nkedi zimwe zongwa omu natu likida epuro kuna kara pokuzuvhisa mbudi zongwa noupampi kwava wopeke. (1 Tim. 4:16) Natuvenye kuvhura kuyilikida kupitira moyirugana yetu asi twa kara nepuro asi matumbwidiro gaJehova ngaga ka sika mo ntani asi nonzira daJehova nongwa. Nsene tu yi rugana ngoso, ose ngatu kara nehuguvaro asi Karunga nga tu tara asi vahungami ntani ngovakaume vendi. w23.12 2 ¶3; 6 ¶15

Apa Hompa Ndafita ga kere pepi nokufa, age kwa tanterere Saromo nonkango odo. (1 Vah. 2:1, 3) Vakriste navenye wovagara va hepa kutura pasirugana epukururo olyo. Mokuninka asi yi va tompoke, va hepa kulimburukwa noveta daKarunga ntani nokutura pasirugana nompango domoBibeli momaparu gawo. (Ruk. 2:52) Morwasinke ya karera nomulyo kovanavazinyetu wovadinkantu wovagara va honene Jesus? Vanavazinyetu navenye wovagara va kara noyitumbukira eyi nava vhura kusikisa mo mepata ntani mombungakriste. Vanavazinyetu wovagara, twa si huguvara asi mwa gazadara ko koyitumbukira eyi ngo mu vhura kukara nayo komeho. Ove nampo ono hara ngo kare muzuvhisi gokukarerera, mukwafimbunga, ano konyima mukuronambunga. Ove nampo hena ono hara ngo kware ntani ngo kare novanona. (Efe. 6:4; 1 Tim. 3:1) Wa hepa kuhonena Jesus yipo o vhure kusikisa mo yitambo oyo ntani yi ku tompoke. w23.12 24 ¶1-2

Vakuronambunga kwa va pa situmbukira sokupakera mbili nonzwi daJehova. Vagara ava va ligava vene yipo va va ruganese kwa kara norupandu kositumbukira esi ga va pa Jehova yipo va vatere vapuli vakwawo ntani awo kurugana unene yipo va kare ‘vasita wokutakamesa.’ (Jer. 23:4; 1 Pet. 5:2) Ose kupandura sili kweyi twa kara novagara wokufana ngoso monombungakriste detu. Vakuronambunga kuvhura kulirongera ko kosihonena somupanguli Ngidiyona. (Heb. 6:12) Age kwa kere mupopeli nomusita govantu vaKarunga. (Vap. 2:16; 1 Hist. 17:6) Ngwendi Ngidiyona, vakuronambunga kwa va horowora yipo va pakere mbili vantu vaKarunga poyiruwo yomaudigu. (Yirug. 20:28; 2 Tim. 3:1) Yipo nye, vakuronambunga kuvhura kulirongera ko kosikara saNgidiyona selinunupiko, nelididimiko ntani ulimburukwi. Elididimiko lyendi kwa li hetekere ngomu ga sikisire mo sirugana sendi. Yikare asi ose vakuronambunga ndi hawe, ose kuvhura tu papare nonkedi omu natu pandura unene vakuronambunga. Ose kuvhura kuvatera vanavazinyetu ava wovagara ava ava rugana unene.​—Heb. 13:17. w23.06 2 ¶1; 3 ¶3