Eyi vakuronambunga nava lirongera ko kosihonena saNgidiyona

 1. Kuliza na-1 Peturusa 5:2, sirugana musinke ava rugana vakuronambunga?

VAKURONAMBUNGA kwa va pa situmbukira sokupakera mbili nonzwi daJehova. Vagara ava va ligava vene yipo va va ruganese kwa kara norupandu kositumbukira esi ga va pa Jehova yipo va vatere vapuli vakwawo ntani awo kurugana unene yipo va kare ‘vasita wokutakamesa.’ (Jer. 23:4; resa 1 Peturusa 5:2.) Ose kupandura sili kweyi twa kara novagara wokufana ngoso monombungakriste detu.

 2. Maheteko musinke gamwe aga na va vhura kuligwanekera nago vakuronambunga vamwe?

² Apa vakuronambunga ava sikisa mo yitumbukira yawo, awo kuligwanekera nomaudigu gomanzi. Apo pwa hepa yirugana yoyinzi mokupakera mbili mbungakriste. Mukuronambunga gedina Tony, gomoUnited States, ga hepere kudiva apa da hulira nonkondo dendi apa ngava mu pe yirugana. Age kwa faturura asi: “Ketamekero lyouvera woKorona, ame ngani rugana yirugana yoyinzi mokupitisira mapongo ntani yirugana yokuzuvhisa. Nye nampili ngomu ngani litura mo unene, simpe pwa kere yirugana yoyinzi yokurugana. Ano mwaza siruwo, ame kapi na li tulilire po siruwo sosinzi sokurugana ereso lyange lyoBibeli ntani nelirongo lyanyamwange lyoBibeli ntani nokukanderera.” Ilir, mukuronambunga gomoKosovo, kwa ligwanekera noudigu wapeke. Apa ga kere momukunda omu ngayi horokere yita, ngayi mu digopere kulimburukwa mavyukiso gokutunda kombunga zaJehova. Age kwa tanta asi: “Uradi wange kwa u hetekere apa Beteli za pere nge situmbukira sokuvatera vanavazinyetu ava va tungire komavango gosiponga. Ame kwa kere nowoma ntani mavyukiso kwa monekere ngwendi kapisi mavyukiso gomawa.” Tim, mutumwa gomoAsia, ngayi mu digopere kurugana yininke nayinye eyi ga hepere kurugana nkenye ezuva. Age kwa tanta asi: “Poyiruwo yimwe, ngani lizuvhu sili eroroko lyopamagazaro ntani pamalizuvho.” Yisinke nayi vatera vakurongambunga ava vana kuligwanekera nomaudigu gokulifana?

 3. Ngapi omu natuvenye natu gwanena mo mauwa pokukonakona sihonena somupanguli Ngidiyona?

³ Vakuronambunga kuvhura kulirongera ko kosihonena somupanguli Ngidiyona. (Heb. 6:12; 11:32) Age kwa kere mupopeli nomusita govantu vaKarunga. (Vap. 2:16; 1 Hist. 17:6) Ngwendi Ngidiyona, vakuronambunga kwa va horowora yipo va pakere mbili vantu vaKarunga poyiruwo yomaudigu. (Yirug. 20:28; 2 Tim. 3:1) Yipo nye vakuronambunga kuvhura kulirongera ko kosikara saNgidiyona selinunupiko, nelididimiko ntani ulimburukwi. Elididimiko lyendi kwa li hetekere ngomu ga sikisire mo sirugana sendi. Yikare asi ose vakuronambunga ndi hawe, ose kuvhura tu papare nonkedi omu natu pandura unene vakuronambunga. Ose kuvhura kuvatera vanavazinyetu ava wovagara ava ava rugana unene.—Heb. 13:17.

 4. Ngapi omu Ngidiyona ga likidire elinunupiko?

⁴ Ngidiyona kwa kere mugara gokulinunupika.b Apa muengeli gwaJehova ga tanterere Ngidiyona asi vana mu horowora a ka popere Vaisraeli koVamidiyani wononkondo, mugara ogu gokulinunupika kwa limbwilire asi: “Ezimo lyetu yilyo lya hepa po mekoro lyaManase, ano ame hepere kupita navenye mezimo lyetu.” (Vap. 6:15) Age kwa lizuvhire asi kapi ta vhuru kusikisa mo situmbukira oso, nye Jehova ga yi divire asi kuvhura a si sikise mo. Nevatero lyaJehova, Ngidiyona ya mu tompokere kusikisa mo situmbukira sendi.

 5. Poyiruwo musinke nayi vhura kudigopera mukuronambunga kulinunupika?

⁵ Vakuronambunga kurugana paapa va hulira mokulikida elinunupiko moyinike nayinye. (Mika 6:8; Yirug. 20:18, 19) Awo kapi ava li kangangere yininke eyi ava vhuru kurugana ndi yininke eyi va rugana. Ntani awo kapi ava gazara asi awo kwato mulyo morwa mapuko aga va rugana. Nye poyiruwo yimwe, ayo udigu unene komukuronambunga mokulinunupika. Pasihonena, kuvhura a tambure yitumbukira yoyinzi, ano konyima ta yi mu digopere kuyisikisa mo nayinye. Ndi kuvhura va mu ninkagure monkedi omu a sikisa mo situmbukira sendi songandi ndi kuvhura va mu pandadeke monkedi omu a sikisa mo situmbukira sendi sa peke. Yisinke nava lirongera ko vakuronambunga kwaNgidiyona eyi nayi va vatera momaukaro gokufana ngoso?

 6. Yisinke vakuronambunga nava lirongera ko kelinunupiko lyaNgidiyona? (Tara hena efano.)

⁶ Pura ko vamwe va kuvatere. Ngidiyona kwa yi likidire asi ga linunupika morwa age nga pura wopeke yipo va mu vatere. (Vap. 6:27, 35; 7:24) Vakuronambunga ava va kara nonondunge nawo kurugana yokulifana. Tony, ogu ka tu tumbura ketameko kwa faturura asi: “Morwa monkedi omu va dewire nge apa na kere munona, ame ngani tambura yirugana yoyinzi kupitakana pweyi ngani vhuru kurugana. Makura yipo na tokwere kugwederera ko moukareli wetu wepata sirongwa sokuhamena elinunupiko ntani ame kwa pulire ko mukadange yipo a gave ko magano gendi. Ame hena kwa tarerere vidiyo ko-jw.org zo siparatjangwa asi Ngwendi Jesus, deura nokuhuguvara nokupa yitumbukira wopeke.” Tony kwa tamekere kupura ko wopeke yipo va mu vatere noyitumbukira yendi. Yitundwamo musinke ya kere? Tony kwa tanta asi: “Yirugana yomombungakriste kuna ku yi sikisa mo wopeke, ntani ame nina kara nosiruwo sosinzi sokunkondopeka ukaume wange kumwe naJehova.”

 7. Ngapi omu vakuronambunga nava honena Ngidiyona apa ava va ninkagura? (Jakopo 3:13)

⁷ Wa ha handuka nsene gumwe kuna kukuninkagura. Eheteko limwe hena eli ava ligwanekere nalyo vakuronambunga kuna kara apa ava va ninkagura. Sihonena saNgidiyona kuvhura hena kuva vatera moukaro ou. Age ga yi divire asi kapi ga sikilira mo, makura yipo ga limbwilire nougomoki apa Vaefurayimi va mu ninkagwire. (Vap. 8:1-3) Ngidiyona kapi ga va limbwilire nehandu. Age kwa yi likidire asi ga linunupika pokupurakena kweyi va sivanene ntani pokuuyunga nawo monkedi zombili. Eyi kwa va ninkisire va li ture. Vakuronambunga ava va kara nonondunge kuhonena Ngidiyona pokupurakena nawa ntani pokulimburura monkedi zombili apa ava va ninkagura. (Resa Jakopo 3:13.) Eyi kuninkisa mbungakriste zi kare mouumwe.

 8. Yisinke vakuronambunga nava vhura kurugana nsene kuna ku va pandadeka? Gava sihonena.

⁸ Gava efumano nalinye kwaJehova. Apa Ngidiyona va mu pandadekere kweyi ga fundire Vamidiyani, age kwa geve efumano kwaJehova. (Vap. 8:22, 23) Ngapi omu nampo vakuronambunga nava honena Ngidiyona? Awo kuvhura kugava efumano nalinye kwaJehova kweyi ava sikisa mo. (1 Kol. 4:6, 7) Pasihonena, nsene mukuronambunga kuna ku mu pandadeka kweyi ga diva nawa kuronga, age kuvhura a uyunge asi magano kuna tundilire moNonkango daKarunga ntani asi natuvenye kulironga eyi ayi tundu kombunga zaJehova. Poyiruwo yimwe vakuronambunga kuvhura va gazadare ko nsene asi awo kuronga monkedi ezi azi fumadekesa ko Jehova ndi nsene asi awo kuronga tupu nositambo sokuhafesa vantu. Tu tareni ko sihonena somukuronambunga gedina Timothy. Apa va mu horowere a kare mukuronambunga, Timothy kwa here kugava yiuyungwa yanavenye. Age kwa tanta asi: “Ame ngani ruganesa etwaromo noyifanekeso yoyire ntani youdigu. Ano rorunzi vantu ngava pandadeke nge. Ngoyitundwamo, eyi kwa ninkisire vantu va demenene kwange mevango lyokudemenena koBibeli ndi kwaJehova.” Mwaza siruwo, Timothy gaya dimbwilire asi ga hepa kutjindja monkedi omu a rongo yipo wopeke va dire kudemenena unene kwendi. (Yis. 27:21) Yitundwamo musinke ya kere? Age kwa faturura asi: “Vantu wokulisiga-siga kwa tantera nge omu siuyungwa sange sa va vatera va li didimikire udigu ndi va hedere unene pepi Jehova. Ame kuhafa sili apa ani zuvhu nonkango odo, kupitakana apa ngava pandadeke nge nomvhura dongandi dina ka pita.

 9. Ngapi omu ulimburukwi nouradi waNgidiyona va u hetekere? (Tara efano lyopontunda.)

⁹ Konyima za pa Ngidiyona va mu horowere a kare mupanguli, ulimburukwi nouradi wendi kwa u hetekere. Age kwa mu pere situmbukira sosiponga sokuzonagura po sizambero soguhwe esi ngava karere Bara. (Vap. 6:25, 26) Konyima za pa ga pongayikire vakwayita, Ngidiyona kwa mu pere evyukiso yikando yivali yipo a gurumwise ko sivaro sovakwayita. (Vap. 7:2-7) Moruhura, Ngidiyona kwa mu tanterere a homokere kamba zononkore dawo pokatji komasiku.—Vap. 7:9-11.

10. Ngapi omu ulimburukwi womukuronambunga nava vhura ku u heteka?

¹⁰ Vakuronambunga va hepa ‘kulimburukwa nkenye apa.’ (Jak. 3:17) Mukuronambunga gomuwa kulimburukwa eyi aga uyunga Matjangwa ntani komavyukiso aga aga tundu kombunga zaJehova. Pokuyirugana ngoso, age kutulira po wopeke sihonena sosiwa. Nye simpe hena, ulimburukwi wendi kuvhura ku u heteka. Pasihonena, age nampo kuvhura yi mu karere udigu kutura pasirugana mavyukiso aga a gwana. Ndi momaukaro gamwe, age nampo kuvhura a singanyeke nsene asi mavyukiso gamwe sili mulyo. Ndi kuvhura va mu pure a rugane situmbukira esi na si mu ninkisa va mu kwate. Ngapi omu vakuronambunga nava honena ulimburukwi waNgidiyona momaukaro ga ngoso?

11. Yisinke nayi vatera vakuronambunga va kare valimburukwi?

¹¹ Purakena nawa komavyukiso ntani noku ga tura pasirugana. Karunga kwa tanterere Ngidiyona omu na vhura kuka zonagura po sizambero soguhwe, noku na vhura kuka tungira Jehova sizambero sosipe ntani nosikorama esi na ka zamba. Ngidiyona kapi ga hetekerere ko kurwanesa mavyukiso aga va mu pere, nye age kwa rugene eyi ga mu tanterere Jehova. Neina, vakuronambunga kugwana mavyukiso kombunga zaJehova kupitira monombilive, momadiviso ntani nomomavyukiso aga aga tu vatere tu kare mepopero ntani noku kara pepi naJehova. Ose kwa hara vakuronambunga vetu, morwa awo kulimburukwa pokukwama mavyukiso gokutunda kombunga zaJehova. Mbungakriste nazinye kugwanena mo mauwa.—Epis. 119:112.

12. Ngapi omu vakuronambunga nava tura pasirugana Vahebeli 13:17 nsene pana horoka elitjindjo lyokutunda kombunga zaJehova?

¹² Kara neharo lyokutura po malitjindjo. Diworoka asi Jehova kwa tanterere Ngidiyona a tume kembo hambara vakwayita vendi navenye. (Vap. 7:8) Age nampo ga li pulire asi: ‘Eli elitjindjo lina kara sili hepero ndi? Nayi tompoka ndi? Nye nampili ngoso, Ngidiyona ga limburukwire. Neina vakuronambunga kuhonena Ngidiyona pokutura pasirugana malitjindjo aga aga tundu kombunga zaJehova. (Resa Vahebeli 13:17.) Pasihonena, mo-2014 Mbungagendesi kwa tulire po elitjindjo kuhamena monkedi omu ngava futire noproyeka doYinyanga yoUhompa eyi ngava dike ntani noYinyanga yoyigongi. (2 Kol. 8:12-14) Nombungakriste kapi da hepere kufuta yimaliwa eyi va ruganesere mokudika matungo ogo. Mosiruwo sanare mbunga zaJehova nga zi korotesa yimaliwa konombungakriste yipo di tunge matungo goUhompa, ano konyima nombungakriste nga di tengwida yimaliwa oyo. Nye ngesi, Mbungagendesi kuruganesa yigava yokutundilira konombungakriste nadinye eyi ava gava koyirugana youzuni mudima yipo va dike Yinyanga yoUhompa ntani noYinyanga yoyigongi nkenye oku vana yi hepere, nampili yi kare asi mbungakriste ozo kuna gava ko tupu yimaliwa yoyiyisesu. Apa José ga zuvhire elitjindjo olyo, age kwa kere nomasinganyeko asi kapi ngayi tompoka, age kwa gazarere asi: ‘Kwato nampili Sinyanga simwe soUhompa esi ngava vhura kudika. Eyi kapisi yimo ava yi rugana koruha oru rouzuni.’ Yisinke ya vaterere José a kwatese ko evyukiso olyo? Age kwa uyunga asi: “Nonkango edi da kara moYisewe 3:5, 6 kwa diworokesere nge ni huguvare mwaJehova. Ano yitundwamo kwa ya kara yoyiwa! Ose kapi tupu tuna kudika Yinyanga yoUhompa yoyinzi, nye twa lironga mokugava mononkedi dokulisiga-siga yipo ava va kara neyi yoyinzi va gave, yi kwafe ava va kara neyi yoyisesu.”

13. (a) Yisinke ga pulire nawa-nawa Ngidiyona? (b) Ngapi omu vakuronambunga nava honena Ngidiyona? (Tara hena efano.)

¹³ Kara nouradi pokurugana mpango zaJehova. Ngidiyona kwa limburukwire Jehova nampili ngomu ga kere nowoma ntani nampili ngomu situmbukira sendi sa kere sosiponga. (Vap. 9:17) Konyima zapa Ngidiyona ga gwene ehuguvareso lyokutunda kwaJehova, age ga yi pulire nawa-nawa asi Karunga nga mu vatera a popere vantu vaKarunga. Vakuronambunga ava va tunga komavango oku va silika sirugana setu awo kuhonena Ngidiyona. Awo kupitisira nouradi mapongo ntani noyirugana yokuzuvhisa nampili ngomu ava ligwanekere nomatjiliso asi ta va va kwata, noku va hepeka noku zumbanesa yirugana yawo ndi ku va tekura nonyanya.c Poudigu wounene, vakuronambunga ngava ka hepa kuka kara nouradi yipo va ka limburukwe nkenye mavyukiso aga ngava ka gwana, nampili ngayi kare asi ago siponga moku ga kwama. Pasihonena, ose kuvhura ngatu gwane mavyukiso kuhamena omu ngatu zuvhisa mbudi zompanguro ntani neyi ngatu hepa kurugana yipo ngatu ka paruke ehomono lyaGogo zaMagogo.—Hes. 38:18; Ehor. 16:21.

14. Ngapi omu elididimiko lyaNgidiyona va lihetekere?

¹⁴ Situmbukira saNgidiyona sokukara mupanguli kwa hamenene mo yirugana yoyinzi. Apa Vamidiyani vatjwayukire masiku aga ya kere yirwa, Ngidiyona kwa va tjidire kutundilira kedamenena lyaJesireli dogoro komukuro gwaJorodana, oku nampo kwa zulire yinhwa. (Vap. 7:22) Ngoso Ngidiyona ga hagekere apa ga ka sikire poJorodana ndi? Hawe! Nampili ngomu ga rorokere, nage kumwe novakwayita vendi 300 kwa rutire mukuro ntani kwa twikilire kutjida Vamidiyani. Moruhura, awo va kwete Vamidiyani noku va funda.—Vap. 8:4-12.

15. Siruwo musinke nampo elididimiko lyomukuronambunga nava li heteka?

¹⁵ Poyiruwo yimwe, situmbukira esi ga kara naso mukuronambunga sokupakera mbili mbungakriste ntani nepata lyendi kuvhura ku mu ninkisa a li zuvhe eroroko panandunge ndi pamalizuvho. Ngapi omu vakuronambunga nava honena Ngidiyona momaukaro gangoso?

16-17. Yisinke ya vaterere Ngidiyona a lididimikire ntani ehuguvaro musinke va hepa kukara nalyo vakuronambunga? (Jesaya 40:28-31) (Tara hena efano.)

¹⁶ Kara nehuguvaro asi Jehova nga ku nkondopeka. Ngidiyona kwa huguvarere mwaJehova asi nga mu pa nonkondo, ano Jehova ga yi rugene ngoso. (Vap. 6:14, 34) Sikando simwe, Ngidiyona novakwayita vendi kwa tjidire vahompa vavali woVamidiyani pevhu, mevango lyokuninka asi vahompa owo va ronde ponongameru. (Vap. 8:12, 21) Nye Karunga ga vaterere Vaisraeli va kwate vahompa owo ntani nokufunda moyita. Mokulifana, vakuronambunga nawo kuvhura kuhuguvara mwaJehova ogu a dili ‘kukurupa ndi a roroke.’ Age ngava pa nonkondo apa vana di hepere.—Resa Jesaya 40:28-31.

¹⁷ Tu tareni sihorokwa saMatthew, gumwe gomoKomitiye ezi azi ruganene kumwe nosipangero. Yisinke ya mu vaterere yipo a lididimikire? Matthew kwa tanta asi: “Ame na limonena usili wononkango edi da kara moVafilipi 4:13. Yiruwo yoyinzi apa ngani roroka unene ntani apa ngani li zuvhu asi kapi hena nani vhura kutwikira, ame ngani kanderere unene pokulikwambera Karunga a penge ko nonkondo edi na hepere yipo ni vatere vanavazinyetu. Moyiruwo yina, ame kwa li zuvhire asi mpepo zaJehova kuna ku pa nge nonkondo yipo ni twikire kulididimikira.” Ngwendi Ngidiyona, vakuronambunga kuvhura va li gwanekere nomaudigu namplili ngomu vana kutwikira kupakera mbili siunda saKarunga. Yipo nye, awo va hepa kulinunupika noku dimburura asi awo kapi tava vhuru kusikisa mo nkenye apa eyi vana hara kurugana. Makura awo kuvhura va kare nehuguvaro asi Jehova nga purakena makanderero gawo ntani nga va nkondopeka yipo va lididimikire.—Epis. 116:1; Fil. 2:13.

18. Mokuruguruka mo, ngapi omu vakuronambunga nava honena Ngidiyona?

¹⁸ Vakuronambunga kuvhura kulirongera ko yoyinzi kwaNgidiyona. Vakuronambunga va hepa kulinunupika, yipo va dive asi yitumbukira yokuhura kupi nava vhura kutambura ntani apa wopeke ava va ninkagura ndi ava va pandadeke. Awo va hepa kulikida ulimburukwi nouradi, unene po ngomu uhura wouzuni ou woudona una kuhedera pepi. Ntani va hepa kukara nehuguvaro asi yi kare asi yisinke eyi ngava vhura kuligwanekera nayo, Karunga ngava nkondopeka. Yosili, ta tu pandura vagara ava ava rugana unene yipo va tu takamese ntani “vagara vangoso va fira kuvafumadeka unene.”—Fil. 2:29.