Ngapi omu vanavazinyetu wovakadi wovadinkantu nava honena Jesus?

 1. Yisinke twa hepa kurugana yipo tu kare Vakriste ava ava honene Jesus?

AYO kutetukisa omu munona a genderere kukura dogoro a ya kare mukondi. Ayo kumoneka ngwendi asi munona kukura ga hana kurugana ko yuma. Nye nsene tuna hara kukwama sihonena saJesus twa hepa kurugana ko yuma.b (1 Kol. 13:11; Heb. 6:1) Mokusikisa mo sitambo oso, twa hepa kukara nelikwatakano lyenene naJehova. Ose twa hepa hena mpepo zokupongoka zi tu vatere tu tunge po yikara eyi ayi hafesa Jehova, nokutunga po udivi wongandi ntani tu liwapaikire yitumbukira eyi nampo nga tu ka kara nayo komeho.—Yis. 1:5.

 2. Yisinke tuna lirongere ko ketjangwa lyaGenesis 1:​27, ntani yisinke natu ka zogera mosirongwa esi?

² Jehova kwa sita mugara nomukadi. (Resa Genesis 1:27.) Ayo kuyimonenena asi mugara nomukadi va lisiga monkedi omu va va sita, nye awo kwa lisiga hena moyininke yimwe. Pasihonena, Jehova kwa sita mugara nomukadi yipo va sikise mo yitumbukira yongandi, nye nampili ngoso awo va hepa yikara noudivi wongandi ou na u va vatera va sikise mo yitumbukira yawo. (Gen. 2:18) Mosirongwa esi, ta tu ka zogera eyi na rugana munazinyetu gomudinkantu gomukadi yipo a honene Jesus. Ano mosirongwa sokukwama ko ngatu ka zogera eyi nava rugana vanavazinyetu wovadinkantu wovagara.

3-4. Kupi oku vanavazinyetu wovakadi wovadinkantu nava gwana yihonena yoyiwa eyi nava honena? (Tara hena efano.)

³ Bibeli kwa tumbura yihonena yovakadi wovanzi ava va here Jehova nokumukarera. (Tara ko jw.org sirongwa “Women in the Bible—What Can We Learn From Them?” moRuingilisa.) Awo kwa likidire yikara eyi vana tumbura metjangwa lina kwatesa ko siparatjangwa setu asi: ‘Kulipangera mwanayinye’ ntani ‘kulimburukwa mwanayinye.’ Mokugwederera ko, vanavazinyetu wovakadi kuvhura va lirongere ko yoyinzi koyihonena yovanavazinyetu wovakadi womombungakriste zawo ava va hara Jehova.

⁴ Vanavazinyetu wovadinkantu wovakadi kuvhura mugazadare ko koyihonena yoyiwa yovanavazinyetu wovakadi ava no mu honena. Nomeneni yikara yawo yoyiwa. Ntani gazadareniko omu no mu honena yikara yawo yoyiwa. Monoparagrafu edi dina ka kwama ko ta tu ka zogera yikara yitatu yomulyo eyi va hepa kutunga po vanavazinyetu wovakadi.

 5. Morwasinke elinunupiko lya karera nomulyo kovanavazinyetu wovakadi ava ava honene Jesus?

⁵ Elinunupiko kuna kara sikara esi twa hepa yipo tu honene Jesus. Nsene mukadi a li nunupika, age nga kara nelikwatakano lyewa naJehova ntani nava wopeke. (Jak. 4:6) Pasihonena, mukadi ogu ga hara Jehova, kukwatesa ko nelinunupiko ewapaiko lyoupangeli eli ga tulisa po Jehova. (1 Kol. 11:3) Mpango ezi zoupangeli kuziruganesa hena mombungakriste ntani mepata.c

 6. Yisinke nava lirongera ko vanavazinyetu wovakadi wovadinkantu kwaRebeka kuhamena elinunupiko?

⁶ Tu tareni sihonena saRebeka. Age kwa kere mukadi gonondunge ogu ga kere nouradi wokutura po matokoro gomanene meparu lyendi nalinye ntani ga divire siruwo esi na rugana yuma yongandi nomu na yi rugana. (Gen. 24:58; 27:​5-17) Nye nampili ngoso age kwa kere mukadi gefumadeko ntani nga kwama mavyukiso. (Gen. 24:​17, 18, 65) Nsene o kwatesa ko mawapaiko gaJehova nelinunupiko ngwendi moomu ga yi rugene Rebeka, ove ngo tulira po sihonena sosiwa vemepata lyoge ntani womombungakriste.

 7. Ngapi omu vanavazinyetu wovakadi wovadinkantu nava honena Esitera ogu ga divire apa da hulire nonkondo dendi?

⁷ Kudiva apa da hulira nonkondo doge kuna kara sikara esi va hepa Vakriste navenye ava ava honene Jesus. Bibeli kuuyunga asi: ‘Unongo kwa kara pwava va linunupika ndi ava va diva apa da hulira nonkondo dawo.’ (Yis. 11:2) Esitera kwa kere mukadi ogu ga divire apa da hulira nonkondo dendi ntani ogu nga karere Karunga noulimburukwi. Mokumona asi ga divire apa da hulira nonkondo dendi, age kapi ga linenepekere apa ga kere hompa gomukadi. Age kwa purakenene komavyukiso ga sipwa sendi Moredekayi ntani noku ga kwama. (Esit. 2:​10, 20, 22) Ove kuvhura o likide sikara oso nsene o pura magano gomawa kwava wopeke ntani noku ga tura pasirugana.—Tit. 2:​3-5.

 8. Kuliza na 1 Timoteusa 2:​9, 10, ngapi omu sikara esi sokudiva apa da hulira nonkondo doge, nasi vatera munazinyetu gomukadi kuhamena ndwareso zendi nomaliwapaiko?

⁸ Esitera kwa likidire hena monkedi zapeke sikara esi sokudiva apa da hulira nonkondo dendi. Age kwa kere mukadona ‘gosihanga sosiwa,’ nye kapi ga yi likidire kovantu asi age muwa. (Esit. 2:​7, 15) Ngapi omu vanavazinyetu wovakadi nava gwanena mo uwa mosihonena saEsitera? Nkedi zimwe kuzigwana mwa 1 Timoteusa 2:​9, 10. (Resa) Mupositoli Paurusa kwa tanterere vakadi vadware yidwara yokuwapera. Nkango zoRugereka ezi va ruganesere apa, kutanta asi Mukriste gomukadi ga hepa kudwara monkedi zefumadeko ntani ga hepa kugazadara ko omu wopeke ava lizuvhu kuhamena eyi a dwara. Ayo kutuhafesa kweyi vanavazinyetu wovakadi ava kwama epukururo eli!

 9. Yisinke natu lirongera ko kosihonena saAbigayili?

⁹ Nondunge kuna kara sikara simwe hena esi va hepa kutunga po vanavazinyetu wovakadi navenye ava ava honene Jesus. Yisinke nondunge? Alyo kuna kara evhuliko lyokudiva yininke youhunga neyi yepuko ntani nokurugana youhunga. Tu tareni sihonena saAbigayili. Mugara gwendi kwa tulire po etokoro lyedona eli ngano lya retere yitundwamo yoyidona kepata lyendi nalinye. Abigayili kwa rugene ko yuma usimbu. Mokumona asi age kwa ruganesere nondunge, age kwa poperere vemepata lyendi. (1 Sam. 25:​14-23, 32-35) Nondunge kutuvatera nose tu dive siruwo esi natu uyunga nesi natu mwena. Ntani ado kutuvatera tu likide elituromo mwava wopeke.—1 Tes. 4:11.

10-11. Mauwa musinke no gwanena mo nava wopeke nsene o diva kuresa nokutjanga nawa? (Tara hena efano.)

¹⁰ Munazinyetu gomukadi goMukriste ga hepa kulironga yininke eyi nga yi muvatera meparu lyendi. Yininke yimwe eyi a lirongo mukadi pounona ngayi muvatera meparu lyendi. Tu tareni ko yihonena yimwe.

¹¹ Lironga kuresa nokutjanga nawa. Monompo dimwe, kuresa nokutjanga kapi ava yi tara asi yininke yomulyo eyi ga hepa kulironga mukadi. Nye nampili ngoso, yininke oyo mulyo koVakriste navenye.d (1 Tim. 4:13) Yipo nye, wa ha pulisira nkenye eyi yi ku hagekese kulironga kuresa nokutjanga nawa. Mauwa musinke ngo gwanena mo? Ayo ngayi ku vatera o gwane yirugana ntani ngayi ku karera ureru kulironga Bibeli noku zi ronga wopeke. Nye somulyo po unene ngo hedera Jehova pepi ngomu ngo resa Nonkango dendi nokuditeda.—Jos. 1:8; 1 Tim. 4:15.

12. Ngapi omu etjangwa lyomoYisewe 31:26 nali kuvatera o kare muntu gokupurakena nawa nokuuyunga nonkenda?

¹² Lironga kupurakena nokuuyunga monkedi zongwa. Ayo yakara nomulyo koVakriste va yi rugane oyo. Murongwa Jakopo kwa tu pa epukururo lyewa poku tu tanterera asi: “Nkenye ogu a genderere kupurakena, nye mokuuyunga nokuhanduka a liwore.” (Jak. 1:19) Nsene o purakena nawa ngomu wopeke vana kuuyunga, ove ngo yi likida asi wa kara “nonkenda” kwawo. (1 Pet. 3:8) Nsene kapi ono kwata nawa egano eyi ana kuuyunga muntu ndi omu ana kulizuvha, kuvhura omu pure mapuro gokuwapera nye gazadara ko komeho o uyunge. (Yis. 15:28) Lipura nyamoge asi: ‘Eyi nina hara kuuyunga kuna kara usili ntani ayo kukorangeda ndi? Nayi likida efumadeko ntani nkenda ndi?’ Lirongera ko kovanavazinyetu wovakadi ava ava purakene nawa ntani noku uyunga nonkenda. (Resa Yisewe 31:26.) Purakena nawa monkedi omu ava uyunga. Nsene o lironga nawa yininke eyi, ngayi kurerupira kutulisa po ukaume nava wopeke ntani nokukara nombili kumwe nawo.

13. Ngapi omu no lironga kurugana yirugana yemembo? (Tara hena efano.)

¹³ Lironga omu norugana yirugana yemembo. Momambo gomanzi, vakadi yiwo ava rugana yirugana yoyinzi. Oyina woge ndi munazinyetu gomukadi ogu ga diva yirugana oyo kuvhura va ku vatere yipo nove o yi dive. Munazinyetu gomukadi Cindy kwa tanta asi: “Uhwi wounene ou va pange oyina kuna kara pokuronga nge asi nsene o rugana unene ngo hafa. Kulironga yininke eyi ngwendi kutereka, kuzeresa, kuhonza ntani nokurandanga kwa rerupika eparu lyange ntani kwa pange mpito zokurugana unene mosirugana saJehova. Oyina kwa ronga nge hena omu nani tambura vagenda, ano eyi kwa ninkisa nge ni lidive novanavazinyetu ava va kara nonkareso zongwa ezi nani vhura kuhonena. (Yis. 31:​15, 21, 22) Mukadi ogu a rugana unene nokutambura vagenda ogu a rugana yirugana yemembo, age sihonena sosiwa kwava vemepata lyendi ntani nava womombungakriste.—Yis. 31:​13, 17, 27; Yirug. 16:15.

14. Yisinke ono lirongere ko kosihonena saCrystal ntani yisinke no demenena po kurugana?

¹⁴ Lironga ko yimwe eyi ngayi ku vatera o lirerese ko nyamoge. Aso kuna kara sitambo somulyo esi nava litulira po Vakriste navenye. (Fil. 4:11) Munazinyetu gomukadi Crystal kwa tanta asi: “Vakondi vange kwa korangedere nge ni lironge udivi wongandi kosure ou ngani ruganesa konyima meparu lyange. Otate kwa tanterere nge ni lirongere omu ava gendesa yimaliwa eyi ava ruganesa monongesefa, ano eyi kwa vaterere nge.” Kugusa ko kulirongera yininke eyi ngayi ku vatera o gwane yirugana, hetekera ko kulironga omu no ruganesa yimaliwa eyi o gwana. (Yis 31:​16, 18) Litura mo unene mosirugana saJehova ntani nyokera po makongo ga hana hepero nokukara yina ku gwanene po meparu.—1Tim. 6:8.

15-16. Morwasinke vanavazinyetu wovakadi wovadike va karera nomulyo unene? (Marukusa 10:​29, 30)

¹⁵ Nsene o tunga po yikara eyi ayi hafesa Jehova ntani nokulironga udivi wokulisiga-siga, ayo ngayi ku vatera momatokoro aga ngo tura po komeho. Tu tareni ko yininke yimwe eyi ngo vhura kurugana komeho

¹⁶ Kuvhura ngo tokore kukara mudike siruwo songandi. Ngwendi moomu ga yi uyungire Jesus, vakadi vamwe kuvhura nga va tokore kukara vadike nampili ngomu mompo zawo va dira kuhara vantu va kare vadike. (Mat 19:​10-12) Vamwe kuvhura va tokore kukara vadike morwa nokonda dongandi. Yipura nawa-nawa asi Jehova naJesus kapi ava kutara asi ove kwato mulyo morwa yeeyi wa dira kukwara. Mouzuni mudima, vanavazinyetu wovakadi wovadike kuna kara sihonena sosiwa monombungakriste. Mokumona asi awo kwa hara wopeke ntani kuvapakera mbili, awo kwa kara ngwendi vakuru novamumbya ntani vazinya kovanavazinyetu wovanzi.—Resa Marukusa 10:​29, 30; 1 Tim 5:2.

17. Yisinke na rugana munazinyetu gomukadi gomudinkantu yipo a liwapaikire ngesi sirugana sosiruwo nasinye?

¹⁷ Ove kuvhura ngo kare mosirugana sosiruwo nasinye. Vanavazinyetu wovakadi yiwo ava rugana unene mosirugana sokuzuvhisa mouzuni naunye. (Epis 68:11) Kuvhura o litulire po sitambo ngesi sokukara mosirugana sosiruwo nasinye ndi? Kuvhura ngo kare muzuvhisi gokukarerera nokuvatera kutunga matungo goukareli wetu ndi kukara moBeteli. Kanderera kuhamena sitambo soge. Uyunga nava wopeke ava va sikisa mo sitambo oso ntani va pura va ku tantere eyi no rugana yipo o si sikise mo. Makura rugana ko yuma eyi nayi kuvatera o sikise mo sitambo oso. Nsene o sikisa mo sitambo soge, ove ngo gwana hena nompito dononzi mosirugana saJehova.

18. Morwasinke munazinyetu gomukadi na horowera nawa mugara ogu nga kwara? (Tara hena efano.)

¹⁸ Kuvhura ngo tokore kukwara. Yikara ntani noudivi ou tuna zogere ngayi kuvatera o kare mukadi gomuwa. Nsene kuna kugazadara kukwara, wa hepa kuhorowora nawa muntu ogu ono hara ngo kware. Alyo kuna kara etokoro limwe lyenene eli ngo vhura kutura po meparu. Diworoka asi ove ngo kara moupangeli wamugara goge. (Rom. 7:2; Efe. 5:​23, 33) Yipo nye, lipura nyamoge asi: ‘Age kuhetekera ko kugazara nokurugana yininke ngwendi Jesus ndi? Age kutura Jehova muhowo meparu lyendi? Age kutura po matokoro gomawa ndi? Age kutambura mapuko gendi? Age kufumadeka vakadi ndi? Age nga vatera nge ni kare nelikwatakano kumwe naJehova nokupakera nge mbili ntani nga vhura kukara kaume gwange gomuwa ndi? Age kusikisa mo yitumbukira yendi? Pasihonena, yitumbukira musinke ga kara nayo mombungakriste ntani age kuyisikisa mo ndi?’ (Ruk. 16:10; 1 Tim. 5:8) Nye nampili ngoso, nsene ono hara kugwana mugara gomuwa, nove wa hepa kukara mukadi gomuwa.

19. Morwasinke situmbukira sokukara “mukwafi” sa karera nomulyo?

¹⁹ Bibeli kuuyunga asi mukadi gomuwa, age “mukwafi” gwamugara gwendi. (Gen. 2:18) Eyi ngesi kutanta asi mukadi kwato mulyo ndi? Hawe. Situmbukira esi ga kara naso mukadi ngomukwafi, aso mulyo. Diworoka asi yikando yoyinzi, Bibeli kwa faturura Jehova asi “mukwafi.” (Epis. 54:4; Heb. 13:6) Mukadi kukara mukwafi gwa mugara gwendi apa a mu kwatesa ko nokumuvatera a tulise po matokoro aga naga kundama epata lyawo. Ntani mokumona asi ga hara Jehova, age kurugana yininke eyi ayi vatere wopeke va dimburure yikara yoyiwa eyi ga kara nayo mugara gwendi. (Yis. 31:​11, 12; 1 Tim. 3:11) Nsene o hara Jehova unene nokuvatera wopeke membo ntani nomombungakriste, ayo ngayi kuvatera o liwapaikire situmbukira soge somononkwara apa ngo kwara.

20. Ngapi omu yirugana eyi a rugana zinya nayi vhura kukundama vemepata lyendi?

²⁰ Kuvhura ngo kare zinya. Konyima zokukwara, nampo kuvhura ngomu kare novana. (Epis. 127:3) Yipo nye, ayo ya kara nomulyo mokugazadara ko eyi ya hamena mo mokukara zinya gomuwa. Yikara ntani udivi eyi tuna zogere mosirongwa esi, ngayi kuvatera o kare mukadi gomuwa ntani zinya. Nsene o kara neharo nonkenda ntani nelididimiko, ngayi vatera epata lyoge li hafe ntani vana woge ngava kara mepopero ntani ngava lizuvha asi wa va hara.—Yis. 24:3.

21. Ngapi omu a tu lizuvhu kuhamena vanavazinyetu wovakadi ntani morwasinke? (Tara efano lyopontunda.)

²¹ Vanavazinyetu wovakadi, ose twa mu hara kwanayinye eyi omu ruganene Jehova novantu vendi. (Heb. 6:10) One kurugana unene yipo mu tunge po yikara eyi ayi hafesa Jehova ntani noudivi owu au mu vatere nava wopeke yipo mu hafere eparu ntani nokuliwapaikira nawa yitumbukira yokomeho. One mulyo unene mombunga zaJehova!