Apa Hompa Ndafita ga kere pepi nokufa, age kwa tanterere Saromo nonkango odo. (1 Vah. 2:1, 3) Vakriste navenye wovagara va hepa kutura pasirugana epukururo olyo. Mokuninka asi yi va tompoke, va hepa kulimburukwa noveta daKarunga ntani nokutura pasirugana nompango domoBibeli momaparu gawo. (Ruk. 2:52) Morwasinke ya karera nomulyo kovanavazinyetu wovadinkantu wovagara va honene Jesus? Vanavazinyetu navenye wovagara va kara noyitumbukira eyi nava vhura kusikisa mo mepata ntani mombungakriste. Vanavazinyetu wovagara, twa si huguvara asi mwa gazadara ko koyitumbukira eyi ngo mu vhura kukara nayo komeho. Ove nampo ono hara ngo kare muzuvhisi gokukarerera, mukwafimbunga, ano konyima mukuronambunga. Ove nampo hena ono hara ngo kware ntani ngo kare novanona. (Efe. 6:4; 1 Tim. 3:1) Wa hepa kuhonena Jesus yipo o vhure kusikisa mo yitambo oyo ntani yi ku tompoke. w23.12 24 ¶1-2

Vakuronambunga kwa va pa situmbukira sokupakera mbili nonzwi daJehova. Vagara ava va ligava vene yipo va va ruganese kwa kara norupandu kositumbukira esi ga va pa Jehova yipo va vatere vapuli vakwawo ntani awo kurugana unene yipo va kare ‘vasita wokutakamesa.’ (Jer. 23:4; 1 Pet. 5:2) Ose kupandura sili kweyi twa kara novagara wokufana ngoso monombungakriste detu. Vakuronambunga kuvhura kulirongera ko kosihonena somupanguli Ngidiyona. (Heb. 6:12) Age kwa kere mupopeli nomusita govantu vaKarunga. (Vap. 2:16; 1 Hist. 17:6) Ngwendi Ngidiyona, vakuronambunga kwa va horowora yipo va pakere mbili vantu vaKarunga poyiruwo yomaudigu. (Yirug. 20:28; 2 Tim. 3:1) Yipo nye, vakuronambunga kuvhura kulirongera ko kosikara saNgidiyona selinunupiko, nelididimiko ntani ulimburukwi. Elididimiko lyendi kwa li hetekere ngomu ga sikisire mo sirugana sendi. Yikare asi ose vakuronambunga ndi hawe, ose kuvhura tu papare nonkedi omu natu pandura unene vakuronambunga. Ose kuvhura kuvatera vanavazinyetu ava wovagara ava ava rugana unene.​—Heb. 13:17. w23.06 2 ¶1; 3 ¶3

Vakriste wokuhova womosiruwo sovapositoli kapi va fire ‘konzara zonene ezi za kere mouzuni naunye.’ Vakurona kwa kere nosinka asi ngapi omu nava gwana nondya dokureresa mapata gawo. Ntani ngapi kuhamena vadinkantu ava va here kutamununa sirugana sawo sokuzuvhisa? Awo nampo kwa li pulire nsene asi kuvhura va ndindire ko nakauke dogoro nga li pwe erumbu. Yikare asi ngapi omu lya va kundamene erumbu, Vakriste kwa tulire po malitjindjo kuliza noukaro. Awo kwa twikilire kuzuvhisa mwankenye nkedi omu ya va tompokere ntani awo kwa hefe kuligavera novapuli vakwawo womoJudeya eyi va kere nayo. (Yirug. 11:29, 30) Ava va gwene evatero kwa li monenene asi Jehova kwa va vaterere. (Mat. 6:31-33) Eyi kwa va hedeserere pepi kumwe novapuli vakwawo ava va va vaterere. Ntani ava va geve yuma ndi ava va lihamekere mo mosirugana sokuvatera vapuli vakwawo mononkedi dapeke, kwa li monenene ruhafo oru a ru tundu mokugava.​—Yirug. 20:35. w23.04 16 ¶12-13