Tuku

42 Vava Yakobo kawidi vo madia* mena kuna Engipito,+ ovovese wan’andi amakala vo: “Ekuma nutalanenanga kaka muntu yo nkwandi?” 2 Okudikidi vo: “Ngwidi vo madia mena kuna Engipito. Nukulumuka kûna nuatusumbila madia, kimana twakwamanana zinga yo lembi fwa mu kuma kia nzala.”+ 3 Muna diadi, e mpangi kumi za Yosefe+ bakulumukini kuna Engipito mu sumba madia. 4 Kansi, Yakobo kayambwidi Benyamini+ ko wa nleke a Yosefe kenda kumosi ye mpangi zandi, kadi ovovele vo: “Olenda bwilwa sumbula kia lufwa.”+

5 O wan’a Isaele balweke kuna Engipito kumosi ye akaka bayenda sumbanga madia, kadi o mvengele ulweke kuna nsi ya Kenani.+ 6 Yosefe yandi watuminanga e nsi,+ yandi watekanga madia kwa wantu awonso ova nza.+ Muna kuma kiaki, e mpangi za Yosefe balweke, bamvumbamene.+ 7 Vava Yosefe kamwene mpangi zandi, ubazayididi vana vau, kansi kayisunzwidi kwa yau ko.+ Ubayuvuidi kuna makasi vo: “Akweyi nutukidi?” Bavutwidi vo: “Kuna nsi a Kenani, madia twizidi sumba.”+

8 Yosefe ozayididi e mpangi zandi, kansi oyau ke banzayididi ko. 9 Vana vau Yosefe osungamen’e ndozi zina kalota mu kuma kiau,+ ubavovese vo: “Oyeno nu alangi! Fulu ya nsi ina ke itoma taninuanga ko nuizidi tala!” 10 Bamvovese vo: “Ve, e mfumu ame, e ntaudi zaku madia bezidi sumba. 11 Yeto awonso tu wan’a se dimosi. Tu akwa unsongi. E ntaudi zaku ke alangi ko.” 12 Kansi, Yosefe ubavovese vo: “Luvunu lweno! Zunga ya nsi ina ke itoma taninuanga ko nuizidi langa!” 13 Muna diadi bavovele vo: “E mfumu ame, mpangi 12 twawutuka.+ Tu wan’a se dimosi+ kuna nsi ya Kenani; ona wanleke osidi yo se dieto.+ Kansi o wankaka, kena diaka ko.”+

14 Yosefe ubavovese vo: “Wauna kaka inuvovese—‘Oyeno nu alangi!’ 15 Nufwete tontwa muna diambu edi: Ndidi e ndofi muna moyo a Faro, ke nukatuka va fulu kiaki ko yavana o nlek’eno kekwiza ovava.+ 16 Nutuma mosi muna yeno kenda vutukila o nlek’eno, ekolo ankaka besala mu pelezo. Muna mpila yayi, e mvovo mieno mitontwa, mu zaya kana vo mana nuvovele maludi. Avo ke wau ko, ndidi e ndofi muna moyo a Faro, oyeno nu alangi.” 17 Muna diadi, ubasidi vamosi muna pelezo mu lumbu tatu.

18 Muna lumbu kiatatu, Yosefe ubavovese vo: “Nuvanga dina ikunuvovesa kimana nuazinga. Kadi Nzambi aludi ivuminanga. 19 Avo nu akwa unsongi, yambula mosi muna mpangi eno kasala mu pelezo yayi, kansi ankaka babonga madia mu kuma kia esi nzo zeno befwanga e nzala.+ 20 I bosi, nuntwasila o nleke eno, kimana diazayakana vo e mvovo mieno mialudi kikilu, muna diadi ke nufwa ko.” Bavangidi dina bazayisu.

21 Bavovele muntu yo nkwandi vo: “Tumbwa kieleka tuna tumbwa mu kuma kia nleke eto,+ kadi twamona e mpasi zandi vava katudodokela vo twamfwila e nkenda, kansi ke twanwila ko. Ekiaki i kuma zitubwididi e mpasi zazi.” 22 O Rubeni ubavovese vo: “Nga kianuvovesa wo ko vo: ‘Ke tumvondi ko e?’ Kansi ke nuangwila ko.+ Owau o menga mandi mukutulanda mena.”+ 23 Kansi, ke bazaya wo ko vo Yosefe mu kubawa kena, kadi nsekodi kasadila mu vovana yau. 24 Muna kuma kiaki, ubavavukidi, oyantikidi dila.+ Vava kavutukidi yo vovana yau diaka, osolele Simeone+ vana bena, unkangidi vana meso mau.+ 25 I bosi, Yosefe okanikini vo bazadisilwa e nsaku zau yo madia, bavutula e nzimbu za konso muntu muna nsaku andi yo kubavana ma kia dia muna nkangalu. I diau babavanga.

26 Basidi madia mau vana ntandu a mabuluku, bele kwau. 27 Vava balweke vana fulu kina beleka, mosi muna yau oziwidi e nsaku andi mu vana e titi kwa buluku diandi, omwene nzimbu muna nu’a nsaku andi. 28 Ozayisi e mpangi zandi vo: “E nzimbu zame zivutwilu, ezi omu nsaku ame!” E ntima miau mitelamene, bazakamene, batalanene yo vova vo: “Nkia diambu diadi katuvangidi o Nzambi?”

29 Vava balweke kwa se diau Yakobo muna nsi ya Kenani, banzayisi mambu mawonso mababwididi, oku vo: 30 “O muntu una vo i mfumu muna nsi, ku makasi katuvovesele;+ oyikidi vo nsi yayina twele langa. 31 Kansi tumvovese vo: ‘Tu akwa unsongi. Ke tu alangi ko.+ 32 Mpangi 12 twawutuka,+ tu wan’a se dimosi. O mosi kena diaka ko,+ o nleke osidi yo se dieto kuna nsi ya Kenani.’+ 33 Kansi, o muntu una vo i mfumu muna nsi utuvovese vo: ‘Muna wau izayila vo nu akwa unsongi: Nusisa mosi muna yeno.+ Nubonga madia mu kuma kia esi nzo zeno befwanga e nzala, nuenda.+ 34 Nuntwasila o nlek’eno, kimana yazaya vo ke nu alangi ko, kansi nu akwa unsongi. I bosi, ikunuvutulwila mpangi eno yo kunuyambula nuavanga kinkita omu nsi.’”

35 Ekolo basokomwenenge nsaku zau, e nzimbu za konso muntu zikedi muna nsaku andi. Vava bamwen’e nzimbu, oyau yo se diau babakamene kwa wonga. 36 Yakobo wa se diau ubavovese vo: “Kadi mono nusisa moko mankatu!+ O Yosefe kena diaka ko,+ o Simeone mpe kena diaka ko,+ owau se nunata diaka Benyamini! Ekuma mambu mama mawonso mambwididi?” 37 Rubeni ovovese se diandi vo: “Avo kitwese Benyamini ko kwa ngeye, vonda wan’ame wole amakala.+ Yekeka Benyamini ova moko mame, ikumvutula kwa ngeye.”+ 38 Kansi, o se umvovese vo: “O mwan’ame ke kulumuka yeno ko, kadi o mpangi andi wafwa, yandi kaka wasala.+ Avo obwidilu sumbula kia lufwa muna nkangalu eno, ozevo mu ntantu+ nukulumwina e mvu zame muna Ziami.”*+