Wantete wa Ntinu

12 Rekabame wele kuna Sekeme, kadi Isaele yawonso bezidi kuna Sekeme+ kimana banyadika se ntinu.+ 2 Vava Yerobame wa mwan’a Nebate kawá wo (kuna Engipito kakala, kadi i kuna katinina Solomo wa Ntinu, kuna Engipito kazingilanga),+ 3 bambokelese. I bosi, Yerobame ye nkutakani yawonso ya Isaele bezidi kwa Rekabame, bavovele vo: 4 “O se diaku watubadisila e vangu.+ Avo ovevuele e salu kiabala ye vangu kiazitu* katuvana se diaku, tukusadila ntangwa zawonso.”

5 Ubavovese vo: “Nuenda kweno, nuvutuka vava kivioka lumbu tatu.” O nkangu wele kwandi.+ 6 Rekabame wa Ntinu wele mokena ye ambuta* ana basadila se diandi Solomo vava kakala moyo, ubayuvuidi vo: “Nkia luludiku nulenda kumpana kimana yavana e mvutu kwa nkangu wau?” 7 Bamvutwidi vo: “Avo okitukidi selo kia nkangu wau o unu, wavanga dina balombele yo kubavana mvutu zambote, ozevo selo yaku bekala ntangwa zawonso.”

8 Kansi, obembwele luludiku lwa ambuta,* wele mokena ye matoko ana bakula yandi, ana bansadisanga.+ 9 Ubayuvuidi vo: “Nkia luludiku nulenda kumpana kimana twavana mvutu kwa nkangu wau umpovese vo: ‘Vevola e vangu kina katuvana o se diaku’?” 10 Matoko ana bakula yandi bamvovese vo: “Edi ofwete vova kwa nkangu wau uvovese vo: ‘O se diaku wabadisa e vangu, kansi ngeye utuvevolwela kio;’ i wau wuwu ofwete kubavovesa: ‘Nlembo ame ansuka uluta luketo lwa se diame o vonga. 11 Se diame wanuvana e vangu kiazitu, omono ikudikila e zitu dia vangu kieno. Se diame wanutumbila muna lubamba, kansi omono ikunutumbila muna nzwadi mia nsende.’”

12 Yerobame ye nkangu awonso bezidi kwa Rekabame muna lumbu kina kiatatu, wauna ntinu kabavovesa vo: “Nuvutuka vava kivioka lumbu tatu.”+ 13 Kansi, o ntinu ovene mvutu zabala kwa nkangu, obembwele luludiku lwa ambuta.* 14 Ubavutwidi mun’owu wa luludiku lwa matoko, oku vo: “Se diame wanuvana e vangu kiazitu, omono ikudikila e zitu dia vangu kieno. Se diame wanutumbila muna lubamba, kansi mono ikunutumbila muna nzwadi mia nsende.” 15 Ozevo, ntinu kawididi nkangu ko, kadi kwa Yave diatuka,+ kimana dialungana e diambu kavova o Yave muna Akiya+ wa musi Silo kwa Yerobame wa mwan’a Nebate.

16 Isaele yawonso vava bamona vo ntinu kabawididi ko, o nkangu uvutwidi kwa ntinu vo: “Nkia kunku tuna kiau muna Davidi? Ke tuna ye vua ko muna mwan’a Yisai. E Isaele, nuenda kwa nzambi zeno. E Davidi, owau lunga-lunga e nzo aku!” Muna diadi, wan’a Isaele bavutukidi muna nzo zau.*+ 17 Kansi, Rekabame okwamanene yala Aneyisaele ana bazingilanga muna mbanza za Yuda.+

18 Rekabame wa Ntinu otumini Adorame+ ona wakala se nkengi awana basalanga e salu yangolo, kansi Isaele yawonso bantubidi matadi yavana kafwa. Rekabame wa Ntinu, omente muna kalu diandi dia vita, otinini kuna Yerusaleme.+ 19 Aneyisaele batelamena+ e nzo a Davidi yamu unu kiaki.

20 Isaele yawonso vava bawidi wo vo Yerobame ovutukidi, bambokelese keza kwa nkangu, bantumbikidi se ntinu a Isaele yawonso.+ Ke vakala mosi ko walanda nzo a Davidi, kanda dia Yuda kaka.+

21 Vava Rekabame kalwaka kuna Yerusaleme, okutakes’e nzo a Yuda yawonso ye kanda dia Benyamini, 180.000 ma makesa matoma longwa* banuanisa e nzo a Isaele muna vutulwisa kintinu kwa Rekabame wa mwan’a Solomo.+ 22 E diambu dia Nzambi aludi dizidi kwa Semaya+ wa muntu a Nzambi aludi, oku vo: 23 “Vovesa Rekabame wa mwan’a Solomo wa ntinu a Yuda ye nzo yawonso ya Yuda yo Benyamini ye nsadisw’a nkangu vo, 24 ‘I wau wuwu kavovele o Yave: “Ke nutomboki ko, nuanuanisa mpangi zeno Aneyisaele. Konso muntu kavutuka kuna nzo andi, kadi kwa mono ditukidi.”’”+ Muna diadi, balemvokele diambu dia Yave, bavutukidi kuna nzo wauna o Yave kabavovesa.

25 Yerobame otungidi* Sekeme+ kuna zunga kia miongo mia Eferaime yo zingila mûna. I bosi, ovaikidi muna Sekeme, otungidi Penuele.+ 26 Yerobame ovovele muna ntim’andi vo: “Owau e kintinu kivutuka muna nzo a Davidi.+ 27 Avo nkangu wau ukwamanene tomboka mu tambika yimenga muna nzo a Yave kuna Yerusaleme,+ o ntim’a nkangu wau uvutuka kwa mfumu au, Rekabame wa Ntinu a Yuda. Bekumponda yo vutuka kwa Rekabame wa Ntinu a Yuda.” 28 Vava ntinu kamokena y’aludiki andi, ovangidi wan’a ngombe wole a wolo,+ ovovese nkangu vo: “Diampasi kwa yeno mu tomboka kuna Yerusaleme. E Isaele, o ndioyu i Nzambi eno ona wanuvaikisa muna Engipito.”+ 29 I bosi, odongekele kimosi kuna Betele,+ kiankaka odongekele kio kuna Dani.+ 30 Ediadi diabafila muna sumu,+ o nkangu wayendanga yakuna Dani muna sambila teke kia mwan’a ngombe.

31 Otungidi masambilu muna mabata, otumbikidi kinganga kwa wantu muna nkangu, ana bena vo ke Anelevi ko.+ 32 Yerobame osikidisi mpe nkinzi muna lumbu kia 15 kia ngonde ya nana nze nkinzi una wavangwanga muna Yuda.+ Okelele yimenga kwa wan’a ngombe ana kavanga vana ziku katunga kuna Betele,+ otumbikidi nganga za mabata mana katunga kuna Betele. 33 Muna lumbu kia 15 kia ngonde ya nana, e ngonde ina kasola, oyantikidi tambika yimenga vana ziku dina katunga kuna Betele. Osikidisi nkinzi mu kuma kia wan’a Isaele, otombokele kuna ziku muna tambika tukau yo yoka ndumbu.