Wanzole wa Ntinu

8 Elesa ovovese ngudi a mwana ona kavutulwisa moyo:+ “Telama, wenda ye esi nzo aku, wenda kala konso kuna olenda, kadi Yave ovovele vo mvengele+ ukala mwamu nsi mu mvu nsambwadi.” 2 Muna kuma kiaki, nkento otelamene, ovangidi dina muntu a Nzambi aludi kamvovese. Wele ye esi nzo andi, okedi mvu nsambwadi muna nsi ya Afelesetia.+

3 Vava mvu nsambwadi mialunga, nkento ovutukidi tuka kuna nsi ya Afelesetia, wele lomba kwa ntinu kimana bamvutulwila e nzo andi ye kiana kiandi. 4 O ntinu ovovese Ngekazi wa selo kia muntu a Nzambi aludi, oku vo: “Dodokolo, unzayisa mambu mawonso manene kavanga Elesa.”+ 5 Ekolo Ngekazi kezayisanga kwa ntinu una Elesa kavutulwisila mvumbi o moyo,+ o ngudi a mwana ona wavutulwiswa moyo wizidi kwa ntinu kalomba e nzo andi ye kiana kiandi.+ Vana vau, Ngekazi ovovele vo: “E mfumu ame wa ntinu, ndioyu i nkento, o ndioyu i mwan’andi ona Elesa kavutulwisa moyo.” 6 Muna diadi, o ntinu oyuvuidi nkento una diambu diadi diavangamena, o nkento unzingulwidi lusansu. O ntinu umvene mbanda-mbanda, umvovese vo: “Vutula yawonso kakedi yau ye nluta miawonso miatuka muna kiana kiandi tuka e lumbu kakatuka mu nsi yamu wau.”

7 Elesa olweke kuna Damaseke+ vava Benadadi+ wa ntinu a Suria kayelanga. Banzayisi vo: “O muntu a Nzambi aludi+ wizidi kwaku.” 8 Muna diadi, o ntinu ovovese Kazaele vo:+ “Nata lukau, wenda kika muntu a Nzambi aludi.+ Yuvula Yave muna yandi, oku vo: ‘Nga sasuka isasuka muna kimbevo kiaki?’” 9 Kazaele wele kika Elesa, unatini lukau lwa lekwa yawonso yambote ya Damaseke muna samo 40. Olweke, otelamene vana kena yo vova vo: “Mwan’aku Benadadi wa ntinu a Suria untumini kwa ngeye yayuvula vo: ‘Nga sasuka isasuka muna kimbevo kiaki?’” 10 Elesa umvutwidi vo: “Wenda kumvovesa vo, ‘Sasuka osasuka,’ kansi Yave unsongele vo fwa kefwa.”+ 11 Elesa otungunuini Kazaele yavana kamwene nsoni. I bosi, muntu a Nzambi aludi oyantikidi dila. 12 Kazaele unyuvuidi vo: “E mfumu ame, ekuma odidilanga?” Umvutwidi vo: “Kadi nzeye e mpasi omwesa nkangu a Isaele.+ Yoka oyoka mavata mau mangolo, ovonda makesa mau muna nsosolo, ozengonona wan’au yo tiazuna vumu ya akento bayimita.”+ 13 Kazaele ovovele vo: “E ntaudi aku una vo mbwa kwandi, aweyi kevangila mambu mama?” Elesa ovovele vo: “Yave unsongele vo ngeye okala se ntinu a Suria.”+

14 I bosi, okatukidi vana vena Elesa, ovutukidi kwa mfumu andi ona unyuvuidi vo: “Nkia diambu kavovese Elesa?” Ovutwidi vo: “Edi kampovese vo sasuka osasuka.”+ 15 Kansi e lumbu kialanda, Kazaele obongele vunga, ovungidi dio muna maza, ofukidi* dio vana lose lwa ntinu, oniemenene dio yavana kafwidi.+ Kazaele oyantikidi yala vana fulu kiandi.+

16 O mvu una watanu wa Yorame+ wa mwan’a Akabi wa ntinu a Isaele, ekolo Yosafate kayalanga muna Yuda, Yorame+ wa mwan’a Yosafate wa Ntinu a Yuda oyantikidi yala. 17 Mvu 32 kakala miau vava kayantika yala, mvu nana kayala muna Yerusaleme. 18 Wakangalela muna nzila y’atinu a Isaele,+ wauna wavanga nzo ya Akabi,+ kadi wabonga mwan’a Akabi se nkaz’andi;+ wakwamanana vanga mambu mambi vana meso ma Yave.+ 19 Kansi, Yave kazola fwasa Yuda ko mu kuma kia Davidi wa selo kiandi,+ kadi wansila nsilu wa kumvana mwinda+ yakwele mvu yo wan’andi.

20 Muna lumbu ya Yorame, Edome otelamene Yuda,+ uyitumbikidi ntinu.+ 21 Muna kuma kiaki, Yorame osaukidi kuna Zara ye makalu mandi mawonso ma vita. Otelamene muna fuku, owende esi Edome ana banzungidi ye afidi a makalu ma vita; o makesa matinini muna saba yau. 22 Kansi, Edome otelamène kaka Yuda yamu unu kiaki. Muna ntangwa yayina, Libena+ mpe otelamène Yuda.

23 Mambu mankaka ma lusansu lwa Yorame ye mawonso kavanga, nga ke masonama ko muna nkand’a lusansu lwa ntinu mia Yuda? 24 Yorame olele yo mase mandi, ozikilu yo mase mandi muna Mbanz’a Davidi.+ Akaziya wa mwan’andi+ oyantikidi yala vana fulu kiandi.

25 O mvu una wa 12 wa luyalu lwa Yorame wa mwan’a Akabi wa ntinu a Isaele, Akaziya wa mwan’a Yorame wa Ntinu a Yuda oyantikidi yala.+ 26 Akaziya mvu 22 kakala miau vava kayantika yala, mvu mosi kayala muna Yerusaleme. E nkumbu a ngudi andi, Ataleya+ wa ntekelo* a Omere wa Ntinu+ a Isaele. 27 Wakangalela muna nzil’a nzo ya Akabi,+ wakwamanana vanga mambu mambi vana meso ma Yave, wauna wavanga e nzo ya Akabi, kadi wabongela nkento muna nzo a Akabi.+ 28 Akaziya yo Yorame wa mwan’a Akabi bele nuanisa Kazaele wa Ntinu a Suria kuna Ramote-ngiladi,+ esi Suria balwekele Yorame.+ 29 Ozevo, Yorame wa ntinu ovutukidi kuna Yizerele+ kawukwa e mputa zina kalwekwa kwa esi Suria kuna Rama vava kanuanisa Kazaele wa Ntinu a Suria.+ Akaziya wa mwan’a Yorame wa ntinu a Yuda okulumukini kuna Yizerele kakingula Yorame wa mwan’a Akabi, kadi walwekwa.*