Zasoneka Matai

26 O Yesu vava kamene vova mambu mama mawonso, ovovese alongoki andi vo: 2 “Nuzeye wo vo lumbu yole kaka isidi, e Nduta iyantika,+ o Mwan’a muntu oyekolwa yo vondelwa vana nti.”+

3 Ozevo, mbuta za nganga ye akuluntu a nkangu balungalakene vana yanzala kia ngang’ambuta wakala ye nkumbu a Kayafa,+ 4 bavuende mfulu+ kimana kuna ndekwa bakanga Yesu yo kumvonda. 5 Kansi, bavovele vo: “Ke muna kolo kia nkinzi ko, kimana valembi bwa mavuanga vana vena nkangu.”

6 Ekolo Yesu kakala kuna Betania muna nzo a Simone wa nkwa wazi,+ 7 nkento mosi wizidi vana kakala ye mbwata* ya mazi mansunga mantalu, oyantikidi mo yitila vana ntu a Yesu ekolo kavuende vana meza. 8 Alongoki vava bamwene wo, bakendalele kikilu, bavovele vo: “Ekuma kefwasilanga o mazi mu mpila yayi? 9 Kadi malenda tekwa mu nzimbu zayingi yo vana zo kw’asukami.” 10 Yesu wau kazeye wo, ubavovese vo: “Ekuma nutokanesenanga o nkento? Diambote kavangidi kwa mono. 11 Kadi asukami nukala yau ntangwa zawonso,+ kansi omono ke nukala yame ntangwa zawonso ko.+ 12 Vava kakusidi o mazi mama mansunga muna nitu ame, ovangidi wo muna kubika luziku lwame.+ 13 Kieleka, inuvovese vo, konso kuna kusamunuinua e nsangu zazi zambote mu nza yawonso, e diambu kavangidi o nkento ndioyo disamunua mpe muna luyindulu lwandi.”+

14 I bosi, mosi vana vena yau Kumi ye Zole, nkumbu andi Yuda, wa musi Kereote,+ wele kwa nganga zambuta,+ 15 ovovele vo: “Nki nukumpana avo inyekwele kwa yeno?”+ Bakanini kumvana sekele 30 za palata.+ 16 Tuka muna kolo kiakina, wavavanga ntangw’ambote muna kunyekola.

17 Muna lumbu kiantete kia Mbolo Zakondwa Mfuna,+ alongoki bezidi kwa Yesu, banyuvuidi vo: “Akweyi ozolele vo twakubikila e lambu dia Nduta kimana wadia?”+ 18 Ovovele vo: “Nuenda muna mbanza, kwa Nengandi, numvovesa vo, ‘O Nlongi ovovele vo: “E ntangw’ame yasikidiswa ifinamene; mu nzo aku idila e Nduta ye alongoki ame.”’” 19 Alongoki bavangidi una Yesu kabakanikini, bakubikidi e Nduta.

20 Muna nkokela,+ ovuende vana meza ye alongoki 12.+ 21 Ekolo bedianga, ovovele vo: “Kieleka inuvovese vo, mosi vava nuina okungiekola.”+ 22 Bakendalele kikilu muna diambu diadi, bayantikidi kunyuvula, konso muntu muna yau unyuvuidi vo: “E Mfumu, nga i mono e?” 23 Ovutwidi vo: “Ndiona osidi yame o koko muna longa, i yandi okungiekola.+ 24 Kieleka, Mwan’a muntu se kekwenda kwandi, nze una wasonama mu kuma kiandi, kansi tâtu+ kwa ndiona oyekola o Mwan’a muntu!+ Diambote diadi kala, kele vo muntu ndioyo kawutuki ko.”+ 25 Yuda ona okunyekola, oyuvuidi vo: “E Rabi,* nga i mono e?” Yesu umvutwidi vo: “Ngeye kibeni ovovele wo.”

26 Ekolo badianga, Yesu obongele e mbolo, vava kamene samba, obukunuini yo,+ ovene yo kwa alongoki, ovovele vo: “Nubonga nuadia. Eyayi nitu ame isunzulanga.”+ 27 Obongele e mbungwa, ovutwidi matondo, ubavene yo, ovovele vo: “Nunua yo yeno awonso,+ 28 kadi isunzulanga ‘menga mame+ ma kangu’+ mana mebunguka mu kuma kia wantu ayingi+ muna luloloko lwa masumu.+ 29 Kansi inuvovese vo: Kinua diaka vinyu ko yamuna lumbu kina inua vinyu yampa yo yeno, muna Kintinu kia Se diame.”+ 30 I bosi, vava bamene yimbila e nkunga, bele kuna Mongo a Olive.+

31 Yesu ubavovese vo: “Yeno awonso sakuba nuta mu kuma kia mana mekumbwila mu fuku wau, kadi diasonama vo: ‘Iwanda mvungudi, e kambi dia mameme dimwangana.’+ 32 Kansi vava ifulwa, ikunuvita kuna Ngalili.”+ 33 Petelo umvutwidi vo: “Kana nkutu awonso batel’e sakuba muna diambu diaku, omono kita nkutu sakuba ko!”+ 34 Yesu umvutwidi vo: “Kieleka ivovese vo, mu fuku wau, vitila e nsusu yakokola, okumpanina o nkalu nkumbu tatu.”+ 35 Petelo umvovese vo: “Kana nkutu divava vo yafwa yaku, kilendi kuvanina nkalu ko.”+ Alongoki awonso bavovele diau dimosi.

36 I bosi, Yesu wele yau vana fulu kina ye nkumbu vo Ngetesemane,+ ovovese alongoki vo: “Nuvuanda ovava ekolo ikwenda okuna, yasamba.”+ 37 Onete Petelo ye wana wole a Zebedayo, omwene ntantu yo yangama o ntima.+ 38 Ubavovese vo: “Moyo ame ukendalele kikilu yamu tezo kia fwa. Nukala vava, nuayingila yame.”+ 39 Ovavukidi fiakete, obukikidi lose lwandi, osambidi, oku vo:+ “E Tata, avo dilendakana, yambula e mbungwa yayi+ yampioka. Kansi, ke una nzolele ko, una ozolele kaka.”+

40 Ovutukidi kwa alongoki, ubawene baleka kwau, vovese Petelo vo: “Nga ke nulendi yingila yame kana ola mosi ko e?+ 41 Nuyingila+ yo kwamanana samba+ kimana nualembi bwa muna ntonta.+ Dialudi, o mwanda uzolele, kansi e nitu yatovoka.”+ 42 Wele muna nkumbu yazole, osambidi vo: “E Tata, avo eyayi ke ilendi kumpioka ko lembi yo nua, yambula o luzolo lwaku lwavangama.”+ 43 Wizidi diaka, ubawene baleka, kadi meso mau mazita ye tulu. 44 Ubasisidi, wele samba muna nkumbu a ntatu, ovovele diambu diau dimosi. 45 I bosi, ovutukidi kw’alongoki, ubavovese vo: “E ntangwa yayi nulele kweno yo vunda! E ntangwa keyekolwa o Mwan’a muntu vana moko ma asumuki ifinamene. 46 Nutelama, twenda. Ndiona okungiekola ofinamene.” 47 Ekolo kavovelenge, o Yuda, mosi vana vena yau Kumi ye Zole, wizidi ye ndong’ayingi, bena ye nsosolo ye bota, batuminu kwa mbuta za nganga ye akuluntu a nkangu.+

48 Ndiona wanyekola, wabavana e sinsu, oku vo: “Ndiona ifiba, i yandi ndiona; nunkanga.” 49 Wele kwa Yesu, ovovele vo: “Kiambote e Rabi!”* i bosi, umfibidi. 50 Kansi, Yesu umvovese vo: “E nkwame, nkia kuma winina ovava?”+ Bezidi, bakangidi Yesu, bele yandi. 51 Kansi, mosi mun’awana bakedi yo Yesu olambwidi o koko, ovolele nsosolo andi, ozengele kutu kwa ntaudi a ngang’ambuta.+ 52 Yesu umvovese vo: “Vutula o nsosolo aku vana fulu kiandi,+ kadi awonso bebonga e nsosolo muna nsosolo befwila.+ 53 Nga obenze vo kilendi dodokela Se diame ko mu ntangwa yayi kantwikila vioka mvengo* 12 mia mbasi e?+ 54 Ozevo, aweyi ulunganena e Sono ivovanga vo mambu mafwete vangamena mu mpila yayi?” 55 Muna ntangwa yayina Yesu ovovese ndonga vo: “Nga nuizidi ye nsosolo ye bota mu kunkanga nze mwivi? E lumbu yawonso yakelenge muna tempelo yo longa,+ kansi yeno kenunkangi.+ 56 Mawonso mama mavangamene kimana mana masoneka* angunza malungana.”+ I bosi, alongoki awonso bansisidi, batinini kwau.+

57 Awana bakangidi Yesu bànete kwa Kayafa+ wa ngang’ambuta, kuna kukutakene asoneki ye akuluntu.+ 58 Kansi, Petelo unlende kuna vala yakuna yanzala kia ngang’ambuta. Vava kakotele, ovuende kumosi ye selo kimana kamona e mfoko a diambu.+

59 E mbuta za nganga ye Mbazi a Nkanu* yawonso bavavidi kimbangi kia luvunu mu kuma kia Yesu kimana bamvonda.+ 60 Kansi ke basolwele kio ko, kana una vo mbangi zayingi za luvunu zayiza.+ I bosi, vezidi mbangi zole 61 bavovele vo: “O muntu ndioyo wavova vo: ‘Omono ndenda bangula tempelo a Nzambi yo tungulula yo mu lumbu tatu.’”+ 62 Muna diadi, ngang’ambuta otelamene, umvovese vo: “Nga kuvutula diambu ko e? Adieyi ovovele mu kuma kia diambu bekumfundilanga o wantu awaya?”+ 63 Kansi Yesu odingalele kwandi.+ Muna kuma kiaki, ngang’ambuta umvovese vo: “Idisisi e ndofi muna nkumbu a Nzambi amoyo, utuvovesa kana vo ngeye i Kristu wa Mwan’a Nzambi!”+ 64 Yesu umvovese vo: “Ngeye kibeni ovovele wo. Kansi inuvovese vo: Tuka owau, numona Mwan’a muntu+ ovuende kuna koko kwalunene kwa nkuma+ yo kwiza muna matuti ma zulu.”+ 65 O ngang’ambuta otiazwini e mvuatu miandi yo vova vo: “Otiangwini Nzambi! Nkia kimbangi diaka tuvuidi o mfunu? Yeno kibeni nuwidi o lutiangu lwandi. 66 Adieyi nubenze?” Bavutwidi vo: “Lufwa lumfwanukini.”+ 67 I bosi bantaulwidi o mete vana lose,+ banwende nkome.+ Ankaka banwende mbata vana lose,+ 68 banyuvuidi vo: “E Kristu, utusakulwila, nani uwende?”

69 Petelo vava kavuende vana mbazi, vana yanzala, ntaudi ankento wizidi kwa yandi, ovovele vo: “Ngeye mpe wakala yo Yesu wa Ngalili!”+ 70 Kansi, ovakwidi wo nkalu vana bena yau awonso, oku vo: “Kizeye dio ko dina ovovele.” 71 Una kavaikidi vana vitu, ntaudi ankaka ankento umwene, ovovese ana bakedi vana, oku vo: “Ndioyo mpe kakala yo Yesu wa Nazarete.”+ 72 Ovakwidi wo diaka nkalu yo dia e ndofi vo: “Kizeye kwame muntu ndioyo ko!” 73 Ke vavioka kolo ko, awana batelamene muna ndambu bezidi kwa Petelo, bamvovese vo: “Kieleka, ongeye mpe u mosi muna yau, kadi e mpov’aku ifundidi.” 74 I bosi, oyantikidi kuyisiba yo dia e ndofi, oku vo: “Kizeye kwame muntu ndioyo ko!” Vana vau e nsusu ikokwele. 75 Petelo osungamene e mvovo mia Yesu vo: “Vitila e nsusu yakokola, okumpanina nkalu nkumbu tatu.”+ Ovaikidi kuna mbazi, obokomokene ye dilu.